Yu Save Kisim Helpim i Kam Long Jehova?
“Bikpela i save helpim mi na mi no inap pret.”—HIBRU 13:6.
1, 2. Bilong wanem i bikpela samting yumi larim Jehova i helpim na soim rot long yumi?
TINGIM olsem yu wokabaut long wanpela rot long ples maunten. Tasol yu no stap wanpis, long wanem, wanpela man bilong soim rot i bin tok em i laik go wantaim yu, na em i nambawan man tru bilong soim rot. Skin bilong em i gat strong na em i save pinis long wokabaut long kain ples olsem, winim yu, tasol em i tingim yu na em i wokabaut isi isi wantaim yu. Em i lukim olsem sampela taim yu laik pundaun. Em i no laik yu kisim bagarap, olsem na em i putim han i kam bilong helpim yu long ol hap we yu inap pundaun. Bai yu sakim dispela helpim? Nogat tru! Nogut yu pundaun na bagarap.
2 Yumi ol Kristen i save bihainim wanpela rot i gat hatwok bilong en. Olsem wanem? Yumi mas wokabaut wanpis long dispela rot? (Matyu 7:14) Nogat, Baibel i kamapim klia olsem nambawan gutpela Man Bilong Soim Rot, God Jehova, em i larim ol man i wokabaut wantaim em, olsem stap pren bilong em. (Stat 5:24; 6:9) Olsem wanem? Jehova i save helpim ol wokboi bilong em taim ol i wokabaut? Em i tok: “Mi God, Bikpela bilong yupela. Mi save sambai long yupela na mi tokim yupela olsem, yupela i no ken pret. Bai mi helpim yupela.” (Aisaia 41:13) Olsem dispela man bilong soim rot long tok piksa yumi stori pinis long en, Jehova i save helpim na mekim pasin pren long ol man i laik wokabaut wantaim em. Yumi no laik sakim dispela helpim, a?
3. Long dispela stadi, bai yumi stori long wanem ol askim?
3 Long stadi paslain long dispela, yumi bin toktok long 4-pela rot Jehova i bin mekim wok long en bilong helpim lain bilong em long bipo. Olsem wanem? Em i save helpim lain bilong em long nau long wankain 4-pela rot? Na yumi ken mekim wanem bilong kisim dispela helpim? Nau bai yumi stori long ol dispela askim. Taim yumi mekim olsem, dispela bai strongim bilip bilong yumi olsem tru tru Jehova em i Helpim bilong yumi.—Hibru 13:6.
Helpim i Kam Long Ol Ensel
4. Olsem wanem na ol wokboi bilong God long nau i ken bilip tru olsem ol ensel i helpim ol?
4 Olsem wanem? Ol ensel i save helpim ol wokboi bilong Jehova long nau? Yes, ol i save mekim olsem. Tru, long nau ol i no save kamap ples klia na kisim bek ol man—em ol i save lotu tru long God—long samting inap bagarapim ol. Long taim bilong ol man i bin raitim Baibel tu, i no planti taim ol ensel i bin kamap ples klia na helpim ol man, wan wan taim tasol. Planti samting ol ensel i bin mekim, ol man i no bin lukim long ai tru bilong ol, wankain olsem long nau. Tasol taim ol wokboi bilong God i bin save olsem ol ensel i stap bilong helpim ol, dispela i bin strongim bel bilong ol. (2 King 6:14-17) I gat as tru na yumi tu i ken pilim olsem.
5. Baibel i tok wanem bilong soim olsem ol ensel i insait long wok autim tok long nau?
5 Ol ensel bilong Jehova i tingim tru wanpela bikpela wok em yumi insait long en. Em wanem wok? Yumi ken kisim bekim bilong dispela askim long Kamapim Tok Hait 14:6: “Mi lukim narapela ensel i flai i go namel long skai. Em i gat gutnius bilong i stap oltaim oltaim, na em i gat wok bilong autim dispela gutnius long ol manmeri i stap long graun. Em i autim long ol manmeri bilong olgeta lain man na bilong olgeta kantri na bilong olgeta tok ples na bilong olgeta kain skin.” Dispela “gutnius bilong i stap oltaim oltaim,” em dispela “gutnius bilong kingdom” em Jisas i bin tok profet ol bai “autim . . . long olgeta hap bilong graun, bai olgeta lain manmeri i ken harim” paslain long las de i kamap bilong dispela pasin nogut bilong nau. (Matyu 24:14) Tru, ol ensel yet i no autim tok. Jisas i bin givim dispela bikpela wok long ol man hia long graun. (Matyu 28:19, 20) Tasol i gutpela samting tru long save olsem taim yumi mekim dispela wok, ol ensel holi i helpim yumi, em ol spirit i gat savetingting na bikpela strong!
6, 7. (a) Wanem samting i soim olsem ol ensel i helpim wok bilong yumi long autim tok? (b) Yumi mas mekim wanem na bai ol ensel bilong Jehova i ken helpim yumi?
6 I gat planti samting i soim olsem ol ensel i helpim wok bilong yumi. Olsem: Planti taim yumi harim tok olsem taim ol Witnes Bilong Jehova i autim tok, ol i bungim wanpela man o meri em nau tasol em i bin beten askim God long helpim em long painim tok i tru. Kain ekspiriens olsem i save kamap planti taim, olsem na yumi no ken ting ol dispela samting i kamap nating tasol, nogat. Ol ensel i helpim dispela wok, olsem na planti manmeri i save lain long mekim olsem dispela “ensel i flai i go namel long skai” i tok: “Yupela i mas pret long [God] na litimapim nem bilong em.”—KTH 14:7.
7 Olsem wanem? Yu laik bai ol strongpela ensel bilong Jehova i helpim yu? Sapos olsem, orait wok strong long mekim wok bilong autim tok. (1 Korin 15:58) Taim yumi amamas na wok strong long mekim dispela bikpela wok Jehova i givim long yumi, ol ensel bilong em bai helpim yumi.
Helpim i Kam Long Nambawan Ensel
8. Jisas i holim wanem bikpela wok long heven? Olsem wanem na dispela i strongim bel bilong yumi?
8 Na tu, Jehova i save helpim yumi long rot bilong nambawan ensel. Kamapim Tok Hait 10:1 i stori long wanpela “strongpela ensel” em “pes bilong en i lait olsem san.” Dispela ensel aposel Jon i lukim long driman, em i makim Jisas Krais i kisim biknem pinis long heven. (KTH 1:13, 16) Tru Jisas em wanpela ensel? Yes, em i nambawan ensel. (1 Tesalonaika 4:16) Olsem wanem em i nambawan ensel? Em i gat bikpela strong, winim ol arapela pikinini spirit bilong Jehova. Jehova i bin putim em i stap bos bilong olgeta ensel bilong Em. Tru tumas, dispela nambawan ensel em i gat bikpela strong tru bilong helpim yumi. Long wanem ol rot?
9, 10. (a) Olsem wanem Jisas i stap olsem “helpim” bilong yumi taim yumi mekim sin? (b) Pasin Jisas i makim inap helpim yumi olsem wanem?
9 Lapun aposel Jon i tok: “Sapos wanpela man i mekim sin, orait yumi gat Helpim bilong yumi, em i stap wantaim Papa. Em Jisas Krais, dispela man bilong mekim stretpela pasin olgeta.” (1 Jon 2:1) Bilong wanem Jon i tok Jisas em i “Helpim” bilong yumi, na moa yet long taim yumi “mekim sin”? Olgeta de yumi save mekim sin, na sin i kamapim dai. (Saveman 7:20; Rom 6:23) Tasol Jisas i bin givim laip bilong em olsem ofa bilong tekewe ol sin bilong yumi. Na em i stap klostu long gutpela Papa bilong yumi i gat pasin marimari na em i askim Em long helpim yumi. Yumi olgeta wan wan i mas i gat dispela helpim. Olsem wanem yumi inap kisim? Taim yumi mekim sin, yumi mas tanim bel na askim God long lusim rong bilong yumi long rot bilong ofa bilong Jisas long tekewe sin. Na tu, yumi mas abrusim pasin bilong mekim gen dispela sin.
10 Jisas i dai bilong helpim yumi, na tu, em i makim gutpela pasin tru yumi ken bihainim. (1 Pita 2:21) Pasin bilong em i save soim rot long yumi, na i helpim yumi long stiaim wokabaut bilong yumi na bai yumi inap abrusim ol bikpela sin na mekim ol pasin God Jehova i laikim. Yumi amamas tru yumi gat kain helpim olsem, a? Jisas i bin tok promis long ol disaipel bilong em long God bai givim narapela helpim long ol.
Helpim i Kam Long Holi Spirit
11, 12. Spirit bilong Jehova em i wanem samting? Bikpela bilong strong bilong en i olsem wanem? Bilong wanem yumi mas i gat holi spirit long nau?
11 Jisas i tok promis: “Bai mi askim Papa, na em bai i givim yupela narapela Helpim bilong strongim yupela. Na em bai i stap wantaim yupela oltaim oltaim. Dispela Helpim em i Spirit bilong tok tru. Ol manmeri bilong graun ol i no inap kisim em.” (Jon 14:16, 17) Dispela “Spirit bilong tok tru,” o holi spirit, em i no wanpela man, nogat; em i wanpela strong—em strong bilong Jehova. Dispela strong i bikpela tru na i no gat pinis bilong en. Em strong Jehova i bin mekim wok long en bilong wokim heven na graun, na ol mirakel, na long kamapim laik bilong em long ol man long rot bilong ol driman. Jehova i no mekim kain wok olsem long spirit bilong em long nau, olsem na yu ting yumi no gat wok long kisim?
12 Yumi stap long “taim bilong . . . planti hevi nogut tru,” olsem na long nau, winim olgeta taim bipo, yumi mas i gat spirit bilong Jehova. (2 Timoti 3:1) Holi spirit i save strongim yumi long sanap strong na karim ol hevi. Em i helpim yumi long kisim ol gutpela pasin i helpim yumi long go klostu moa long Jehova na ol brata na sista spirit bilong yumi. (Galesia 5:22, 23) Yumi mas mekim wanem bilong kisim dispela gutpela helpim i kam long Jehova?
13, 14. (a) Bilong wanem yumi ken bilip olsem Jehova i amamas long givim holi spirit long ol manmeri bilong em? (b) Wanem kain pasin man i mekim i soim olsem em i sakim dispela presen, em holi spirit?
13 Namba wan samting, yumi mas beten askim God long givim holi spirit long yumi. Jisas i tok: “Yupela papa i save mekim planti pasin nogut, tasol yupela i save tumas long givim ol gutpela samting long ol pikinini bilong yupela. Olsem na yupela i ken save tru, Papa bilong yupela i stap long heven em bai i amamas long givim Holi Spirit long ol man i askim em.” (Luk 11:13) Yes, Jehova em i nambawan gutpela Papa tru. Sapos yumi bilip na askim em long givim yumi holi spirit, orait em bai givim yumi olsem presen. Olsem wanem? Yumi save askim em? Long olgeta de yumi mas beten askim em long givim holi spirit long yumi.
14 Namba tu samting, bilong kisim dispela presen, yumi mas mekim ol samting i stret wantaim dispela presen. Yumi ken tok piksa olsem: Ating wanpela Kristen i wok strong long lusim pasin bilong lukim ol piksa bilong pasin sem, olsem ponografi. Em i bin beten askim God long givim holi spirit bilong helpim em long givim baksait long dispela pasin doti. Em i bin askim ol elda Kristen long givim sampela tok kaunsel long em, na ol i bin tokim em long no ken go klostu liklik long ol piksa bilong pasin sem. (Matyu 5:29) Tasol olsem wanem sapos em i sakim tok bilong ol na em i wok yet long lukim? Em i mekim ol samting i stret wantaim beten bilong em long askim God long givim holi spirit bilong helpim em? Nogat, a? Em i wok long givim bel hevi long spirit bilong God na em bai lus long kisim dispela presen. (Efesus 4:30) Tru tumas, yumi olgeta i mas mekim olgeta samting yumi inap mekim na bai yumi ken wok yet long kisim dispela gutpela helpim i kam long Jehova.
Helpim i Kam Long Baibel
15. Yumi mas mekim wanem bilong soim olsem yumi no tingim Baibel i olsem wanpela buk nating tasol?
15 Inap planti handet yia pinis Baibel i bin helpim ol gutpela wokboi bilong Jehova. Baibel i no wanpela buk nating tasol. Em i gat bikpela strong tru bilong helpim yumi. Bilong kisim dispela helpim, yumi mas kirap mekim sampela wok. Yumi mas ritim Baibel long olgeta de.
16, 17. (a) Song 1:2, 3 i tok long wanem gutpela samting bai kamap long pasin bilong ritim lo bilong God? (b) Olsem wanem Song 1:3 i makim olsem yumi mas mekim bikpela wok?
16 Song 1:2, 3 i stori long man i bihainim pasin God i laikim, olsem: “[Em] i save laikim tumas lo bilong God, na em i save tingting long dispela lo long san na long nait. Dispela man i olsem diwai ol man i bin planim klostu long [“ol baret,” NW ] wara. Em i save karim kaikai . . . na lip bilong en i no save drai. Olgeta samting em i mekim i save kamap gutpela.” Yu kisim bikpela tok bilong ol dispela ves? Taim yumi ritim dispela tok, ating yumi tingim wanpela gutpela diwai i stap klostu long wara. Em wanpela gutpela ples tru bilong sindaun na malolo! Tasol dispela song i no singautim yumi long tingim malolo. Ol tok bilong dispela song i makim olsem yumi mas kirap mekim bikpela wok. Olsem wanem i olsem?
17 Dispela gutpela diwai i no bin kamap nating tasol klostu long wara, nogat. Em i wanpela diwai i save karim planti kaikai, em wanpela man i bin “planim,” long hap em yet i bin makim—‘klostu long ol baret wara.’ Olsem wanem wanpela diwai i ken stap klostu long planti baret wara? Olsem: Long gaden bilong ol diwai prut, ating papa bilong gaden i digim ol baret bilong bringim wara i kam long as bilong ol gutpela diwai bilong em. Em nau, yumi kliagut long bikpela tok! Sapos long ol samting bilong spirit yumi stap gut olsem dispela diwai, orait dispela i olsem, long wanem, narapela i bin mekim bikpela wok bilong helpim yumi. Yumi bung wantaim wanpela oganaisesen i save bringim ol gutpela wara bilong tok i tru i kam stret long yumi, tasol yumi yet i mas mekim sampela wok. Bilong kisim dispela gutpela wara, yumi mas skelim ol tok long bel na mekim wok painimaut na bai ol dispela tok i tru bilong Baibel i ken go insait long tingting na bel bilong yumi. Long dispela rot yumi tu bai kamapim gutpela kaikai.
18. Yumi mas mekim wanem na bai yumi inap painim bekim long Baibel long ol askim bilong yumi?
18 Tasol Baibel i no inap helpim yumi sapos yumi no opim na ritim. Na tu, yumi no ken ting olsem Baibel em wanpela buk we sapos yumi gat askim, orait yumi ken opim nating na em bai op stret long pes i kamapim bekim bilong yumi. Taim yumi mas skelim samting yumi mas mekim, yumi mas wok strong long “save gut long God” olsem yumi digim graun bilong painim ol gutpela samting i stap hait. (Sindaun 2:1-5) Bilong painim ol gutpela tok bilong Baibel bilong helpim yumi yet, yumi mas wok strong long stadi gut, olsem mekim wok painimaut. Yumi gat planti buk em Baibel i as bilong en bilong helpim yumi long painim ol dispela tok. Taim yumi mekim wok long ol dispela buk bilong painim ol gutpela savetingting i stap long Tok Bilong God, em nau, yumi kisim dispela helpim i kam long Jehova.
Helpim i Kam Long Ol Wanbilip
19. (a) Olsem wanem na yumi ken tingim ol stori long Wastaua na Kirap! i olsem wanpela helpim yumi bin kisim long rot bilong ol wanbilip? (b) Wanpela stori long Wastaua o Kirap! i bin helpim yu yet olsem wanem?
19 Oltaim long lain bilong Jehova, narapela i bin helpim narapela. Yu ting pasin bilong Jehova i bin senis long dispela samting? Nogat. Ating yumi olgeta i ken tingim sampela taim we yumi bin kisim helpim long ol wanbilip bilong yumi long taim stret yumi mas kisim. Olsem wanem? Yu inap tingim wanpela stori long Wastaua o Kirap! i bin mekim gut bel bilong yu long taim yu gat hevi o i bin helpim yu long stretim wanpela hevi o long sanap strong taim samting i traim bilip bilong yu? Jehova i bin givim yu dispela helpim long rot bilong “wokboi i gat gutpela tingting” em dispela lain i bin kisim wok bilong givim “kaikai long [yumi] long taim bikman i makim.”—Matyu 24:45-47.
20. Long wanem ol rot ol elda Kristen i save kamapim klia ol i stap olsem “presen”?
20 Tasol planti taim, helpim yumi kisim em i kam stret long ol wanbilip. Olsem: Wanpela elda Kristen i mekim wanpela tok yumi pilim tru long bel, o em i kam mekim sepeding visit na dispela i helpim yumi long karim wanpela hevi, o em i givim yumi sampela gutpela tok kaunsel i helpim yumi long luksave long, na daunim, wanpela pasin kranki. Wanpela Kristen i raitim pas i tok tenkyu long helpim em i bin kisim long wanpela elda. Em i tok: “Long taim mipela i autim tok, em i lusim haptaim bilong kirapim mi long kamapim tingting bilong mi. Long nait paslain, mi bin beten askim Jehova long salim wanpela mi ken toktok wantaim em. Neks de, dispela brata i toktok wantaim mi na em i mekim long gutpela pasin sori. Em i helpim mi long luksave olsem longtaim tru Jehova i bin helpim mi. Mi tenkyu long Jehova i bin salim dispela elda i kam long mi.” Long ol kain rot olsem, ol elda Kristen i save kamapim klia ol i stap olsem “presen” Jehova i bin givim long rot bilong Jisas Krais bilong helpim yumi long sanap strong long rot i go long laip.—Efesus 4:8.
21, 22. (a) Wanem samting i save kamap taim ol brata na sista long kongrigesen i bihainim tok bilong Filipai 2:4? (b) Bilong wanem ol liklik wok bilong helpim ol arapela, ol tu i bikpela samting?
21 Olgeta wan wan gutpela Kristen, i no ol elda tasol, i gat laik long bihainim dispela tok: “Yupela i no ken lukautim ol samting bilong yupela tasol. Nogat. Yupela wan wan i mas lukautim ol samting bilong ol arapela manmeri bilong yupela na helpim ol long i stap gut.” (Filipai 2:4) Taim olgeta long kongrigesen Kristen i bihainim dispela tok, planti wok bilong mekim gutpela pasin long ol arapela i kamap. Olsem: Wantu, wanpela bikpela hevi i bin painim wanpela famili. Papa i bin kisim yangpela pikinini meri bilong em i go wantaim em long stua. Taim ol i laik kam bek long haus, ka i bamim ol. Pikinini meri i dai na papa i kisim bikpela bagarap. Taim em i lusim haus sik, bagarap long skin i mekim na pastaim em i no inap mekim wanpela samting bilong lukautim em yet. Meri bilong em i bel hevi tru, olsem na em wanpela i no inap lukautim man. Olsem na tupela marit insait long kongrigesen i kisim dispela tupela i go stap wantaim ol na ol i lukautim ol inap sampela wik.
22 Tasol wok bilong mekim gutpela pasin long ol arapela i no samting i save kamap long taim bilong ol bikpela hevi tasol we man i mas lusim planti samting bilong em yet bilong helpim ol arapela, nogat. Sampela taim, helpim yumi kisim em long ol liklik samting tasol. Tasol maski em i liklik helpim, yumi save amamas tru long dispela helpim, a? Olsem wanem? Yu inap tingim sampela taim we wanpela brata o sista i bin mekim gutpela tok long yu o mekim gut long yu long taim stret yu mas kisim helpim? Planti taim Jehova i save lukautim yumi long kain rot olsem.—Sindaun 17:17; 18:24.
23. Taim narapela i wok long helpim narapela, Jehova i gat wanem tingting long dispela?
23 Olsem wanem? Yu laik bai Jehova i mekim wok long yu bilong helpim ol arapela? Rot i op long yu ken mekim olsem. Jehova i save pilim tru ol wok yu mekim. Baibel i tok: “Sapos yu marimari long rabisman na yu givim samting long em, i olsem yu larim Bikpela i dinau long yu, na bihain Bikpela bai i bekim dispela dinau.” (Sindaun 19:17) Yumi kisim bikpela amamas long givim yumi yet bilong helpim ol brata na sista bilong yumi. (Aposel 20:35) Tasol amamas man i save kisim long helpim ol arapela na nupela strong ol i kisim, dispela i no save painim man i stap longwe long ol arapela. (Sindaun 18:1) Olsem na oltaim yumi mas go long ol miting Kristen na bai yumi wan wan i ken strongim bel bilong ol arapela.—Hibru 10:24, 25.
24. Yumi no bin lukim ol bikpela mirakel Jehova i bin mekim long bipo, olsem na bilong wanem yumi no ken pilim olsem yumi sot long samting?
24 Yumi amamas taim yumi tingim ol rot Jehova i save mekim wok long en bilong helpim yumi, a? Tru, yumi no stap long wanpela taim we Jehova i save wokim ol bikpela mirakel bilong kamapim laik bilong em, tasol yumi no ken pilim olsem yumi sot long samting. Bikpela samting tru i olsem: Jehova i save givim yumi olgeta helpim em yumi mas kisim bilong stap gut long em. Na sapos yumi stap strong long bilip, bai yumi stap na lukim wanpela bikpela wok tru Jehova bai mekim, winim ol wok bipo em i bin mekim! I gutpela sapos yumi pasim tok long bel long kisim na mekim wok long olgeta gutpela helpim Jehova i save givim long yumi na bai yumi tu i ken soim olsem yumi wanbel long yiateks bilong 2005: “Jehova em i helpim bilong mi.”—Song 121:2, NW.
Yu Ting Olsem Wanem?
Olsem wanem Jehova i helpim yumi long nau long rot bilong—
• ol ensel?
• holi spirit?
• Baibel?
• ol wanbilip?
[Piksa long pes 18]
Yumi save ol ensel i helpim wok autim tok, na dispela i strongim bel bilong yumi
[Piksa long pes 21]
Jehova inap mekim wok long wanpela wanbilip bilong mekim gut bel bilong yumi