Buk Bilong Baibel Namba 23—Aisaia

Man Bilong Raitim: Aisaia

Ples Em i Bin Raitim: Jerusalem

Raitim Pinis: Bihain long 732 B.C.E.

Taim: 778 samting–bihain long 732 B.C.E.

 1. Long 778 B.C.E. samting, wanem samting i kamap long hap bilong Midel-Is, na kantri Israel na kantri Juda?

KING nogut bilong Asiria i laik daunim ol bikpela na liklik kantri long hap bilong Midel-Is. Long dispela hap olgeta, ol kantri i toktok long bungim strong bilong ol na redi long sakim dispela king. (Ais. 8:​9-13) I no longtaim na ol birua bai daunim kantri Israel long hap not, em ol i bin lusim Jehova, na i luk olsem sampela kantri i laik daunim ol king bilong Juda long hap saut. (2 Kin., sap. 15-21) I gat ol nupela kain samting bilong pait, na dispela tu i mekim na long dispela taim planti man i pret nogut tru. (2 Sto. 26:​14, 15) Husat inap helpim ol Juda na kisim bek ol long han bilong ol birua? Nem bilong Jehova i stap long maus bilong ol manmeri na ol pris long liklik kantri Juda, tasol bel bilong ol i stap longwe long em. Pastaim ol i singautim ol Asiria i kam helpim ol, na bihain ol i singautim ol Isip. (2 Kin. 16:7; 18:21) Ol i no bilip moa long strong bilong Jehova long helpim ol. Sampela i lotuim ol god giaman; na sampela i giaman tasol na mekim nating ol pasin bilong lotu, na ol i no aninit tru long God.

 2. (a) Husat i tokaut olsem em i laik i go autim tok bilong Jehova? Wanem taim em i kirap long mekim? (b) Nem bilong dispela profet i makim wanem samting?

² Orait, husat bai autim tok bilong Jehova na tokaut long strong bilong em long kisim bek ol man? Kwiktaim wanpela man i tok: “Yu salim mi.” Man bilong mekim dispela tok em Aisaia, em i bin autim sampela tok profet paslain long dispela taim. Em i mekim dispela tok long yia lepraman King Usia i dai, em olsem 778 B.C.E. (Ais. 6:​1, 8) Insait bilong nem Aisaia i olsem, “Wok Bilong Jehova Long Kisim Bek Ol Man.” Em i wankain olsem nem Jisas (“Jehova i Save Kisim Bek Ol Man”). Long kirap bilong tok profet bilong Aisaia na i go inap long pinis bilong en, em i kamapim klia olsem Jehova em i Man bilong kisim bek ol man.

 3. (a) Yumi gat wanem save long Aisaia? (b) Em i mekim wok profet insait long wanem ol yia? Husat moa ol i stap profet long taim bilong em?

³ Aisaia em i pikinini bilong Emos (i no Amos, em narapela profet bilong Juda). (1:⁠1) Baibel i no stori long mama i karim em o em i dai olsem wanem, tasol ol Juda i save stori olsem king nogut Manase i tok na ol man i kisim so na katim bodi bilong em long tupela hap. (Skelim wantaim Hibru 11:37.) Ol rait bilong em i makim olsem em i stap long Jerusalem wantaim meri bilong em, em tu i profet, na tupela pikinini man bilong ol, em nem bilong tupela pikinini i gat tok profet long en. (Ais. 7:3; 8:​1, 3) Aisaia i mekim wok profet long taim bilong 4-pela king bilong Juda: Usia, Jotam, Ahas, Hesekia. Em i mekim wok profet inap 46 yia samting, kirap long yia 778 B.C.E. (taim Usia i dai, o paslain long dispela taim) na em i wok i go winim yia 732 B.C.E. (em namba 14 yia bilong Hesekia). Yumi ken ting, long dispela yia em i raitim pinis ol tok profet bilong em long buk. (1:1; 6:1; 36:⁠1) Ol narapela profet long taim bilong em, em Maika long Juda, na Hosea na Odet long hap not.​—⁠Mai. 1:1; Hos. 1:1; 2 Sto. 28:​6-9.

 4. Wanem ol samting i makim olsem Aisaia i bin raitim dispela buk?

⁴ Jehova yet i tokim Aisaia long raitim ol dispela tok profet long strafe bai painim sampela lain. Dispela i kamap klia long tok bilong Aisaia 30:8: “Bikpela i bin tokim mi long raitim ol tok long pasin bilong ol manmeri long buk na katim dispela tok tu long hap ston. Olsem bai dispela tok inap i stap oltaim.” Ol tisa bilong lotu Juda long bipo i luksave olsem Aisaia i raitim dispela buk na ol i putim i stap namba wan long ol bikpela buk bilong ol profet (Aisaia, Jeremaia, Esekiel).

 5. Wanem samting i makim olsem i gat wanpela man tasol i bin raitim Buk Aisaia?

⁵ Kirap long sapta 40, pasin bilong raitim stori i senis, olsem na sampela man i tok dispela i makim olsem narapela man i bin raitim, olsem “Namba 2 Aisaia.” Tasol as bilong dispela i olsem: Kirap long sapta 40 Aisaia i stori long narapela samting. I gat planti samting i makim olsem Aisaia i bin raitim olgeta tok bilong dispela buk i gat nem bilong em i stap. Olsem: Dispela tok ‘God bilong Israel, em God bilong mekim gutpela na stretpela pasin olgeta,’ em i stap 12-pela taim samting long sapta 1-39, na 13 taim samting long sapta 40-66; em olsem 25 taim olgeta, o winim dispela namba. Tasol em i stap 6-pela taim tasol long ol narapela hap bilong Ol Skripsa Hibru. Aposel Pol tu i makim olsem Aisaia i bin raitim olgeta dispela tok, long wanem, Pol i kolim sampela tok bilong narapela narapela hap bilong buk na em i tok, olgeta dispela tok em tok bilong Aisaia.​—⁠Skelim Rom 10:​16, 20; 15:12 wantaim Aisaia 53:1; 65:1; 11:⁠1.

 6. Rait bilong Aisaia ol man i painim klostu long raunwara Detsi, olsem wanem dispela i helpim yumi long save tru olsem (a) ol tok bilong ol Baibel long nau i wankain olsem ol i bin raitim long pastaim, na (b) wanpela man tasol, nem bilong em Aisaia, i bin raitim olgeta tok bilong dispela buk?

⁶ Na kirap long yia 1947, ol i bin kisim sampela olpela rait i stap insait long ol hul bilong maunten klostu long Khirbet Qumran, long hap not-wes bilong raunwara Detsi. Em ol Olpela Rait Bilong Detsi, na wanpela bilong ol em rait bilong profet Aisaia. Em naispela rait long tok Hibru bilong ol man i stap paslain long taim bilong ol Masoret, na em i bilong 2,000 yia bipo, olsem 100 B.C.E. samting. Olsem na dispela rait i olpela tru​—⁠ol i bin raitim olsem 1,000 yia paslain long olpela rait Masoret i stap yet, em rait bilong ol i as bilong ol tok bilong Ol Skripsa Hibru long ol Baibel bilong nau. Wan wan liklik rait tasol, olsem leta, na sampela pasin bilong kolim tok, i narapela kain liklik, tasol ol bikpela tok bilong en i wankain stret olsem ol tok ol Masoret i bin raitim. Olsem na yumi ken save, ol tok bilong Aisaia long ol Baibel bilong nau i wankain olsem spirit bilong God i bin kirapim Aisaia long raitim long pastaim. Na tu, ol dispela olpela rait i daunim tok bilong ol man i tok tupela man i bin raitim dispela buk; yumi inap save dispela tok bilong ol i no stret, long wanem, long dispela olpela rait, sapta 40 i kirap long laspela lain bilong blok i gat sapta 39 long en, na hap bilong namba wan tok bilong sapta 40 ol i raitim i go long narapela blok. Olsem na kuskus i raitim ol dispela tok em i no gat tingting liklik olsem sapta 40 i kirapim nupela hap bilong buk o narapela man i senisim Aisaia na i kirap raitim dispela hap.a

 7. I gat wanem ol planti samting i kamapim long ples klia olsem Buk Aisaia i tru na yumi inap bilip tru long en?

⁷ I gat planti samting i makim olsem ol tok bilong Buk Aisaia i tru na yumi inap bilip tru long en. Ol man bilong raitim ol Skripsa Kristen long Baibel ol i kamapim planti tok bilong Aisaia, winim olgeta narapela profet​—⁠Moses tasol nogat. Na i gat planti stori bilong ol samting i bin kamap bipo na ol samting bilong bipo ol saveman i bin painim insait long graun, em ol i kamapim klia olsem ol tok bilong Aisaia i tru, olsem: I gat ol rait i stori long ol king bilong Asiria, na ston i gat 6-pela kona na King Senakerip yet i kamapim stori bilong em long en i stori long taim em i traim long kisim taun Jerusalem.b (Ais., sap. 36, 37) Na taun Babilon i bagarap na ol hip pipia ston bilong en i stap yet, na dispela i kamapim long ples klia olsem tok bilong Aisaia 13:​17-22 i kamap tru pinis.c Olgeta wan wan bilong ol planti tausen Juda em King Sairus i larim ol i lusim Babilon na go bek long ples, ol i olsem mak bilong soim olsem tok bilong Aisaia i tru, long wanem, 200 yia paslain long en Aisaia i bin kolim nem bilong dispela king na tok em bai mekim olsem. Ating ol i bin soim dispela tok long Sairus, long wanem, taim em i larim liklik lain Juda i lusim Babilon, em i tok Jehova i makim em bilong mekim dispela wok.​—⁠Ais. 44:28; 45:1; Esr. 1:​1-3.

 8. Olsem wanem truim bilong ol tok profet i makim Mesaia i kamapim klia olsem God i as bilong ol dispela tok?

⁸ Wanpela bikpela samting bilong Buk Aisaia, em ol tok profet i makim Mesaia. Aisaia i kolim planti samting bilong i stap bilong Jisas long graun na ol dispela samting i kamap tru pinis long Jisas, olsem na sampela i kolim Aisaia olsem “profet bilong Gutnius.” Inap longtaim pinis ol tok bilong sapta 53 i bin stap olsem ‘ol tok hait.’ Man bilong Itiopia, em Aposel sapta 8 i stori long en, em i no save long insait bilong ol dispela tok, na ol Juda tu i no save. Tasol dispela sapta i tok profet stret tru long ol samting nogut ol man bai mekim long Jisas, na i olsem man i bin raitim dispela tok profet em i lukim long ai bilong em yet. Ol Skripsa Grik i kamapim truim bilong ol tok profet bilong dispela sapta, olsem: 53 ves 1​—⁠Jon 12:​37, 38; 53 ves 2​—⁠Jon 19:​5-7; 53 ves 3​—⁠Mak 9:12; 53 ves 4​—⁠Matyu 8:​16, 17; 53 ves 5​—⁠1 Pita 2:24; 53 ves 6​—⁠1 Pita 2:25; 53 ves 7​—⁠Aposel 8:​32, 35; 53 ves 8​—⁠Aposel 8:33; 53 ves 9​—⁠Matyu 27:​57-60; 53 ves 10​—⁠Hibru 7:27; 53 ves 11​—⁠Rom 5:18; 53 ves 12​—⁠Luk 22:37. Em nau, God tasol i as bilong ol tok profet i kamap stret tru olsem, a?

HELPIM YUMI OLSEM WANEM?

34. Wanem sampela gutpela tok piksa i strongim tok bilong Aisaia?

³⁴ Taim yumi skelim olgeta tok bilong Buk Aisaia, yumi save em wanpela gutpela presen God Jehova i givim long yumi bilong helpim yumi. Em i kamapim ol tingting bilong God i winim tru tingting bilong ol man. (Ais. 55:​8-11) Na i gat planti tok piksa i stap long Buk Aisaia na ol man i mekim pablik-tok long Baibel ol inap kamapim, em ol i gutpela tru na i gat strong bilong kirapim tingting bilong man, olsem ol tok piksa Jisas i mekim. Aisaia i kirapim tru tingting bilong yumi na yumi pilim tru pasin longlong bilong man i kisim wanpela diwai na i mekim wok long wanpela hap bilong en olsem paiawut, na long narapela hap bilong en em i wokim wanpela imis bilong lotu long en. Aisaia i stori gut na yumi pilim tru hevi bilong man i laik slip, tasol bet i sotpela na blanket i liklik tumas. Na i olsem yumi harim pairap bilong ol profet i slip strong na pulim nus, na ol i olsem ol mauspas dok i les long singaut. Sapos yumi ‘lukluk insait long buk bilong Bikpela na ritim tok bilong en,’ olsem Aisaia i tok yumi mas mekim, bai yumi pilim tru strongpela tok bilong Aisaia i makim taim bilong yumi.​—⁠44:​14-20; 28:20; 56:​10-12; 34:⁠16.

35. Aisaia i mekim wanem ol tok i makim Kingdom bilong Mesaia, na i makim man i go pas, em Jon Bilong Baptais?

³⁵ Tok profet bilong Aisaia i kamapim planti tok long Kingdom bilong God i stap long han bilong Mesaia. Jehova yet i nambawan bikpela King, na em yet i kisim bek yumi. (33:22) Tasol olsem wanem long Mesaia? Ol tok ensel i mekim long Maria long dispela pikinini em bai karim, em i soim olsem tok bilong Aisaia 9:​6, 7 bai kamap tru long dispela pikinini, olsem em bai sindaun long sia king bilong Devit; na “em bai i stap king bilong ol lain bilong Jekop oltaim. Na wok king bilong en bai i no inap pinis.” (Lu. 1:​32, 33) Matyu 1:​22, 23 i stori long meri singel i karim Jisas na dispela i truim tok profet bilong Aisaia 7:14 na i kamapim long ples klia olsem Jisas em dispela “Emanuel.” Inap olsem 30 yia bihain, Jon Bilong Baptais i kam autim tok olsem “kingdom bilong heven em i kam klostu pinis.” Olgeta fopela man bilong raitim Gutnius i kamapim tok bilong Aisaia 40:3 bilong makim olsem Jon Bilong Baptais em dispela man ‘i singaut long ples i no gat man.’ (Mt. 3:​1-3; Mk. 1:​2-4; Lu. 3:​3-6; Jo. 1:23) Taim Jisas i kisim baptais em i kamap Mesaia​—⁠em King Jehova i makim, na kru i kamap long lain bilong Jesi​—⁠na em bai bosim olgeta lain man. Ol i mas bilip long em, olsem Aisaia 11:​1, 10 i tok profet long en.​—⁠Ro. 15:​8, 12.

36. I gat wanem truim bilong ol tok profet i makim dispela man em i Mesaia na King?

³⁶ Aisaia i mekim sampela tok moa i helpim yumi long save long dispela man em i Mesaia na King! Jisas i ritim hap tok long Buk Aisaia bilong soim ol man em i King Jehova i makim, na bihain em i kirap long “autim gutnius bilong kingdom bilong God.” Em i tok, “God i salim mi na mi kam bilong mekim dispela wok.” (Lu. 4:​17-19, 43; Ais. 61:​1, 2) Fopela Gutnius i stori gut long planti samting bilong wok Jisas i mekim long graun na em i dai olsem wanem, olsem Aisaia sapta 53 i tok profet long en. Ol Juda i harim tok bilong Kingdom na ol i lukim ol mirakel bilong Jisas, tasol ol i no save long as bilong en, long wanem, bel bilong ol i pas na ol i no bilip. Dispela i truim tok bilong Aisaia 6:​9, 10; 29:13; na 53:⁠1. (Mt. 13:​14, 15; Jo. 12:​38-40; Ap. 28:​24-27; Ro. 10:16; Mt. 15:​7-9; Mk. 7:​6, 7) Jisas i stap olsem ston i sutim lek bilong ol na ol i pundaun, tasol em i kamap olsem nambawan ston tru Jehova i putim long maunten Saion bilong wokim haus spirit bilong em antap long en. Dispela i truim tok bilong Aisaia 8:14 na; 28:16.​—⁠Lu. 20:17; Ro. 9:​32, 33; 10:11; 1 Pi. 2:​4-10.

37. Ol aposel bilong Jisas i kamapim tok bilong Aisaia bilong makim wanem samting?

³⁷ Ol aposel bilong Jisas Krais i mekim wok long tok profet bilong Aisaia na ol i kamapim tok bilong en bilong makim wok autim tok. Olsem: Bilong makim olsem i mas i gat ol man bilong autim tok bambai ol narapela i ken bilip, Pol i kolim tok bilong Aisaia, olsem: “Ol manmeri i amamas tru long lukim man i kam bilong bringim gutnius.” (Ro. 10:15; Ais. 52:7; lukim tu Rom 10:​11, 16, 20, 21.) Pita tu i kolim tok bilong Aisaia bilong makim olsem gutnius bai stap oltaim, em i tok: “Buk bilong God i tok olsem, ‘Olgeta manmeri i no save stap longpela taim long graun. Ol i save pinis hariap olsem gras, na biknem bilong ol i save pundaun olsem ol plaua nabaut. Gras i save drai, na ol plaua i save pundaun. Tasol tok bilong Bikpela i save stap oltaim oltaim.’ Dispela tok em i dispela gutnius ol i bin autim long yupela.”​—⁠1 Pi. 1:​24, 25; Ais. 40:​6-8.

38. Aisaia i mekim wanem gutpela tok long Kingdom na bihain sampela man moa bilong raitim Baibel i kamapim gen wankain tok?

³⁸ Aisaia i mekim ol naispela tok moa yet long Kingdom yumi wetim i kamap bihain! Lukim! I gat “nupela skai na nupela graun,” na “i gat wanpela king bai i kamap, na dispela king wantaim ol bikman bilong kantri bai ol i bihainim gutpela na stretpela pasin tasol na bosim gut ol manmeri.” Em samting bilong amamas tru long en, a? (65:​17, 18; 32:​1, 2) Pita i kamapim gen gutpela tok bilong Aisaia, olsem: “God i promis pinis long em bai i wokim nupela skai na nupela graun, na stretpela pasin tasol bai i stap long en. Yumi wet long dispela samting tasol.” (2 Pi. 3:13) Dispela gutpela tok bilong ol samting bilong Kingdom​—⁠em nambawan bikpela tok bilong Baibel​—⁠i kamap klia tru long laspela hap bilong Kamapim Tok Hait.​—⁠Ais. 66:​22, 23; 25:8; KTH 21:​1-5.

39. Aisaia i tokaut long wanem gutpela samting tru yumi ken wetim i kamap bihain?

³⁹ Tru, Buk Aisaia i kamapim ol strongpela tok long belhat bilong Jehova bai painim ol birua na ol man i giaman na tok ol i wokman bilong em. Tasol buk i tokaut tu long gutpela samting tru yumi ken wetim, em Kingdom bilong Mesaia, em bai mekim nem bilong Jehova i stap holi. Buk Aisaia i helpim yumi long kisim gut as bilong ol gutpela tok i tru bilong Kingdom bilong Jehova, na em i kirapim tru bel bilong yumi na yumi amamas na wetim Jehova “i kisim bek yumi.”​—⁠Ais. 25:9; 40:​28-31.

[Ol Futnot]