Skulim Ol Pikinini Bilong Yu

Wanpela Kingdom Bai Senisim Ol Samting Bilong Dispela Graun

YU SAVE long wanem Kingdom mipela i toktok long en?​—⁠a Em dispela Kingdom Jisas i tokim yumi long beten long en. Em i skulim yumi long askim God: “Kingdom bilong yu i mas i kam.” (Matyu 6:​9, 10) Klostu 2000 yia i go pinis, ol disaipel bilong Jisas i beten long God long Kingdom bilong Em i mas i kam. Yu bin beten long en tu?​—⁠

Bilong save long Kingdom em i wanem samting, pastaim yu mas save long insait bilong dispela tok king. King em wanpela man husat i save bosim ol manmeri. Na king i save bosim wanpela kantri. Kingdom Bilong God bai bosim graun olgeta. Taim Kingdom Bilong God i bosim graun, olgeta manmeri long graun bai kisim ol gutpela blesing Kingdom bai kamapim.

Kingdom Bilong God em i wanpela gavman long heven. Long Aisaia 9:​6, Baibel i stori long Man husat bai bosim dispela gavman. Lukim tok Baibel i mekim long dispela King: ‘Wanpela pikinini man i kamap pinis long yumi. Em bai i stap king bilong yumi, na em bai i gat dispela nem, “King bilong kamapim gutpela sindaun na bel isi.” ’

Husat dispela King bilong kamapim gutpela sindaun?​—⁠ Yes, em Pikinini Bilong God. Husat dispela God?​—⁠ Yu tok stret, em Jehova. Baibel i tok long em olsem: “Yu Bikpela, na yu God Antap Tru, na yu save bosim olgeta hap bilong graun.” (Song 83:18) Planti taim Baibel i save kolim Jisas olsem “Pikinini Bilong God.” Wanpela as em long wanem Jehova i givim laip long Jisas. Jehova em i Papa tru bilong Jisas.​—⁠Luk 1:​34, 35; Jon 1:​34, 49; 3:17; 11:27; 20:31; Aposel 9:⁠20.

Kingdom Bilong God em Jisas i skulim yumi long beten long en, em i wanpela narapela kain gavman. Jehova i makim Pikinini bilong em, Jisas, long kamap King bilong dispela Kingdom. Tasol yu save olsem i gat sampela narapela manmeri God i makim bilong mekim wok king wantaim Jisas long Kingdom bilong Papa bilong em?​—⁠ Nau yumi ken stori long ol dispela manmeri.

Paslain long Jisas i dai, em i tokim ol gutpela aposel bilong em olsem em bai go long “haus” bilong Papa bilong em long heven. Em i tok: “Mi go bilong redim ples bilong yupela. . . . Na ples mi stap long en, yupela tu bai i stap long en wantaim mi.” (Jon 14:​1-3) Yu save long wanem wok ol aposel na ol man God i makim bai mekim long heven wantaim Jisas?​—⁠ Ol bai mekim wok “king wantaim Krais.” Na tu, Baibel i kolim namba bilong ol manmeri bai mekim wok king wantaim Jisas. Namba bilong ol em 144,000.​—⁠KTH 14:​1, 3; 20:⁠6.

Yu ting graun bai stap olsem wanem taim King bilong kamapim gutpela sindaun na lain 144,000 i mekim wok king?​—⁠ Gutpela samting tru bai kamap, a? Bai i no gat woa. Ol animal bai i stap gut wantaim ol narapela animal na wantaim yumi ol man tu. I no gat man bai kisim sik o dai. Ol aipas bai lukluk gen, ol yaupas bai harim gen, ol lek nogut bai ran na kalap olsem dia. Graun bai kamapim gutpela kaikai bilong olgeta manmeri. Na olgeta manmeri bai laikim tru narapela narapela olsem Jisas i bin skulim ol disaipel bilong em long mekim. (Jon 13:​34, 35) Orait, yumi ken opim ol ves bilong Buk Aisaia i stap long hia na ritim stori bilong ol gutpela samting bai kamap.​—⁠Aisaia 2:4; 11:​6-11; 25:8; 33:24; 35:​5, 6; 65:​21-24.

Kirap long taim Jisas i bin skulim ol man long beten olsem “Kingdom bilong yu i mas i kam,” planti milion manmeri i bin kisim save long dispela Kingdom. Dispela save i bin senisim tru i stap bilong ol. Klostu nau, taim dispela Kingdom i kam na i senisim ol gavman bilong dispela graun, olgeta man husat i mekim wok bilong God Jehova na King em i bin makim, Jisas Krais, ol bai stap bel isi, kisim gutpela helt, na amamas.​—⁠Jon 17:⁠3.

[Futnot]

OL ASKIM:

▪ Husat bai stap King long Kingdom Bilong God?

▪ Husat bai mekim wok king wantaim Jisas long Kingdom bilong Papa bilong em?

▪ Graun bai stap olsem wanem taim Jisas i mekim wok king?