Wetim Gutpela Samting Long Dispela Taim Nogut
LONG Mas 2006, wanpela presiden bilong Amerika, em Bill Clinton, i mekim tok long wanpela kibung long Ottawa, Kanada, em i tok: “Ol manmeri nating bilong kantri ol i gat bikpela strong moa long helpim ol lain bilong kantri na stretim ol hevi bilong ol, winim olgeta taim bipo.” Em i tok, kirap long taim traipela sunami i kamapim bikpela bagarap long 2004, planti manmeri bilong olgeta hap ol i givim taim na mani bilong ol long helpim ol lain i stap nogut, na em i tok nau long dispela taim, “narapela kantri i wok long kisim helpim long narapela kantri, winim ol taim bipo.”
Orait, yu ting ol bikpela bagarap olsem sunami samting inap kirapim ol lain bilong olgeta hap long wok gut wantaim bilong kamapim pasin wanbel long bihain? Yu ting i gat as na yumi ken bilip olsem pasin bilong ‘ol kantri long helpim ol narapela kantri’ bai kamapim bel isi na gutpela taim tru long graun?
As Bilong Bilip na Wetim Samting Tru
Stori bilong ol samting i bin kamap insait long 6 tausen yia i go pinis i kamapim klia olsem ol man bilong graun i no bin wok gut wantaim na bai narapela i helpim gut narapela. Olsem na i gat as na Baibel i tok: “Ol king na ol man bilong graun i no inap kisim bek yu. Olsem na nogut yu bilip long ol.” (Song 146:3) Sapos yumi bilip long ol oganaisesen bilong graun, ol mani kago samting bilong en, na ol samting ol lain bilong graun i laik mekim, ol dispela hatwok bilong yumi bai lus nating. Bilong wanem? Long wanem, “olgeta pasin bilong dispela graun, em ol pasin bilong bel i kirap na aigris, ol . . . bai i pinis.”—1 Jon 2:17.
Tasol kirap long bipo yet na i kam inap long nau, ol stretpela man i bin bilip na wetim God i helpim ol. Baibel i tok long em olsem: “Oltaim mipela Israel [bilong bipo] i save bilip long yu na wetim yu long helpim mipela,” na “ol tumbuna bilong ol i bin bilip long em na wetim em i helpim ol.” Na Baibel i kamapim planti tok i soim olsem ol man i ken bilip na wetim God i helpim ol. (Jeremaia 14:8; 17:13; 50:7) Tru tumas, Baibel i strongim yumi long “bilip na wetim Bikpela i kam helpim [yumi].”—Song 27:14.
Sindaun 3:5, 6 i tok: “Yu mas bilip strong long Bikpela. Yu no ken ting save bilong yu yet inap helpim yu. Long olgeta samting yu mekim, yu mas tingting strong long Bikpela na yu mekim, na em bai i soim yu stretpela rot long bihainim.” Yu inap bilip tru long kain promis olsem, long wanem, God Jehova i no save senis, na oltaim em i save bihainim stret tok bilong em. (Malakai 3:6; Jems 1:17) Em i laik bai ol gutpela samting i painim yu, na sapos oltaim yu putim yau long ol tok bilong em long Baibel, em bai stiaim gut wokabaut bilong yu nau long dispela taim nogut bilong pret.—Aisaia 48:17, 18.
Ol man i givim bel tru long bihainim rot God i makim, ol inap bilip tru long dispela tok promis: “Yupela i no ken pret, long wanem, mi God bilong yupela na mi stap wantaim yupela. Bai mi mekim yupela i kamap strong na bai mi helpim yupela. Bai mi was gut long yupela na long bikpela strong bilong mi bai mi daunim ol birua bilong yupela.” (Aisaia 41:10) Pasin bilong beten strong na tingim tingim long bel ol dispela tok promis, em i save mekim gut bel bilong olgeta manmeri i laikim tru Jehova, long wanem, dispela i helpim ol long karim ol bikpela hevi na daunim pasin bilong tingting planti.
Tingim Andrea, em wanpela Witnes Bilong Jehova na em i gat tupela pikinini. Em i tok: “Pasin bilong beten na tingim tingim long bel ol tok promis bilong Jehova, dispela tasol i save helpim mi long kisim bek strong taim ol hevi i kamap na mi tingting planti long ol samting. Sapos oltaim mi putim Jehova i stap olsem strong bilong mi, mi inap i stap strong.”
Bilip Strong Long Jehova
Bilong kamapim klia olsem pasin bilong bilip na wetim Jehova em i bikpela samting, wanpela man bilong raitim song i tok: “Ol manmeri i laikim tumas lo bilong yu, ol i stap gut tru, na i no gat wanpela samting inap mekim ol i pundaun.” (Song 119:165) Taim yu stadi gut long Baibel, dispela inap helpim yu long pulimapim ol gutpela samting bilong spirit long tingting na bel bilong yu, em ‘ol pasin i tru na i gutpela long ol man i mekim na ol stretpela pasin na ol klinpela pasin na ol naispela samting na ol samting i gutpela tru na olgeta pasin i nambawan tru na yumi save amamas tru long lukim ol man i mekim.’ Sapos yu wok strong long harim, lainim, kisim, na bihainim ol dispela samting, orait “God, em i as bilong pasin bilong bel isi, em bai i stap wantaim [yu].”—Filipai 4:8, 9.
John i bin mekim wok bilong God inap planti yia pinis na em i tok: “Paslain long mi ken senisim tingting bilong mi long ol samting mi ting em bai kamap long bihain, mi save i gat wanpela bikpela samting mi mas mekim. Mi mas senisim tru tingting na pasin bilong mi paslain long mi ken pas gut wantaim God. Bilong mekim olsem, mi mas kamap man bilong tingim ol tok bilong God. Olsem na mi mas tingim God long olgeta samting mi laik mekim, na kisim tingting bilong God long ol samting, na bilong kisim dispela pasin mi mas ritim tok bilong em long Baibel na tingim tingim long bel.”
Sapos yu kisim dispela gutpela wara, olsem tok i tru i stap long Baibel na i save givim laip long man, i olsem yu kisim marasin ol i traim pinis na i nambawan tru bilong helpim yu long sakim ol samting nogut i save kamap long olgeta de long rot bilong televisen na ol nius samting. Na sapos yu bihainim ol tok bilong Baibel, dispela bai strongim famili bilong yu long pas gut wantaim na helpim yu long daunim sampela hevi na pasin bilong tingting planti. Na tu, God i tok promis olsem em i redi long “was gut long ol manmeri i save aninit long em wanpela tasol.” (2 Stori 16:9) Em bai stretim ol hevi na bai yu no inap pret long wanpela samting.
Phinehas, em i bin stap long taim bilong pait na taim bilong ol man i kilim i dai planti man, na em i tok: “Mi lain pinis long putim laip bilong mi long han bilong Jehova. Pasin bilong bihainim ol stiatok bilong Baibel i bin helpim mi long abrusim planti hevi.” Sapos yu bilip tru long God Jehova, em inap helpim yu long winim ol bikpela hevi tru. (Song 18:29) Taim pikinini i pas gut wantaim papamama, em i save lain long trastim ol na em i stap bel isi long han bilong ol, maski em i gat sik o i tingting planti long wanpela samting. Na wankain samting bai painim yu sapos yu harim na bihainim dispela singaut long bilip na wetim Jehova.—Song 37:34.
As Tru Bilong Wetim God
Jisas Krais i tokim lain bilong em: “Yupela i mas mekim kain prea olsem, ‘Papa bilong mipela, yu stap long heven, nem bilong yu i mas i stap holi. Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven.’ ” (Matyu 6:9, 10) Dispela Kingdom bilong heven—em wanpela gavman i stap long han bilong Jisas Krais—em rot bilong God long kamapim olsem em i stap Nambawan King bilong bosim graun.—Song 2:7-12; Daniel 7:13, 14.
Ol kain kain pret i save painim ol man long nau i kamapim klia tru olsem God i mas kirap mekim sampela samting bilong pinisim pret. Na gutpela tru, dispela taim i kam klostu pinis! God i putim Jisas Krais pinis olsem King Mesaia na i givim namba long em bilong kamapim long ples klia olsem i stret Jehova i stap King, na bilong mekim holi nem bilong Em. (Matyu 28:18) Liklik taim nau na Kingdom bai bosim graun na pinisim olgeta samting i as bilong pret na tingting planti. Aisaia 9:6 i kolim sampela biknem bilong Jisas i soim olsem em inap tru long i stap gutpela King husat inap rausim olgeta pret long bel bilong yumi. Olsem: Em i gat ol nem olsem “Papa bilong i stap oltaim,” “Man bilong givim gutpela tingting tru,” na “King bilong kamapim gutpela sindaun na bel isi.”
Tingim dispela gutpela nem “Papa bilong i stap oltaim.” Jisas i gat strong na namba—na laik tu—bilong helpim ol man i save bihainim tok bilong em bambai ol i ken i stap oltaim oltaim long graun, na ofa bilong em long baim bek ol man em rot bilong ol i ken mekim olsem. Olsem na bihain ol bai lusim kalabus bilong sin ol i bin kisim long namba wan sinman, Adam. (Matyu 20:28; Rom 5:12; 6:23) Na Krais bai mekim wok long namba God i bin givim em bilong kirapim bek planti manmeri ol i dai pinis.—Jon 11:25, 26.
Taim Jisas i stap long graun em i kamapim klia tru olsem em i “Man bilong givim gutpela tingting tru.” Em i gat bikpela save long Baibel na em i save long ol tingting na pasin bilong yumi ol man, olsem na em i gat save long stretim ol hevi bilong ol wan wan de. Nau Krais i King long heven na em i stap yet olsem “Man bilong givim gutpela tingting tru”—em i nambawan man insait long rot bilong God long salim tok i kam long ol man bilong graun. Ol tok kaunsel bilong Jisas i stap long Baibel i gat gutpela tingting na save long en na i no gat liklik popaia long en. Sapos yu save na bilip long dispela, bai yu no tingting planti na pret pret long ol samting.
Na Aisaia 9:6 i kolim Jisas olsem “King bilong kamapim gutpela sindaun na bel isi.” Olsem na liklik taim bai Krais i mekim wok long strong bilong em long rausim olgeta pasin i no stret—bilong wok politik, wok bilong ol man, na ol samting bilong mani. Em bai mekim olsem wanem? Em bai bungim olgeta lain manmeri aninit long Kingdom Bilong Mesaia, na em bai kamapim bel isi long graun.—Daniel 2:44.
Taim Kingdom i bosim graun, bel isi bai stap oltaim oltaim long olgeta hap graun. Bilong wanem yu ken bilip tru long dispela? Long wanem, Aisaia 11:9 i tok: “Bai i no gat wanpela [i stap aninit long Kingdom] i mekim nogut long narapela, long wanem, olgeta samting long graun bai i save tru long Bikpela.” Bihain olgeta man na meri long graun bai i gat stretpela save long God na ol bai bihainim tok bilong em. Taim yu tingim dispela, ating bel bilong yu i gutpela tru, a? Sapos olsem, orait yu no ken lusim taim long kisim dispela gutpela save long Jehova.
Bilong kisim dispela save bilong God i strongim bilip na givim laip long man, yu mas skelim ol tok bilong Baibel long ol samting i kamap long nau, na ol tok promis bilong Baibel long gutpela taim bai kamap bihain. Olsem na mipela i laik kirapim yu long stadi long Baibel wantaim ol Witnes Bilong Jehova, ol i save mekim dispela wok long hap bilong yu, i no gat pe bilong en. Em wanpela rot bilong daunim pret na painim gutpela samting bilong bilip na wet long en nau long dispela taim nogut bilong hevi.
[Blok/Ol Piksa long pes 7]
As na Yumi Ken Bilip na Wetim Kingdom
Jisas Krais, em King bilong Kingdom Bilong God, em i bin kisim strong na namba bilong inapim em long bosim heven na graun. (Matyu 28:18) Em bai stretim bek olgeta samting bilong graun na bai graun i kamap gutpela gen. Na em i gat strong long daunim olkain sik. Ol strongpela wok Jisas i bin mekim long graun i olsem piksa bilong ol gutpela samting tru bai kamap taim em i bosim graun olsem nambawan gutpela King yumi ken bilip tru long en. Long lista daunbilo, wanem ol pasin bilong dispela King Mesaia yu save laikim moa yet?
▪ Ol manmeri i no pret long go long em.—Mak 10:13-16.
▪ Em i isi long ol man na i mekim wankain pasin long olgeta man.—Mak 10:35-45.
▪ Yumi inap bilip long em, na em i no save tingim em yet tasol.—Matyu 4:5-7; Luk 6:19.
▪ Em i mekim stretpela pasin na stretpela kot.—Aisaia 11:3-5; Jon 5:30; 8:16.
▪ Em i tingim ol man, mekim gut long ol, na mekim pasin daun.—Jon 13:3-15.
[Piksa long pes 4]
Pasin bilong ritim Baibel na tingim tingim long bel inap helpim yumi long bilip na wetim Jehova