Jehova i Givim Lait Long Lain Bilong Em na Ol i Kamap Nambawan Tru
“Jerusalem [“meri,” “NW”], yu kirap na lait olsem san, long wanem, nau bikpela lait na strong bilong mi, Bikpela, i lait antap long yu.”—AISAIA 60:1.
1, 2. (a) Ol manmeri bilong graun i stap olsem wanem? (b) Husat i as bilong dispela tudak ol manmeri i stap long en?
“GUTPELA sapos i gat wanpela man i olsem Aisaia o Pol!” Em tok presiden bilong Amerika, Harry Truman, i bin mekim long 1945 samting. Bilong wanem em i mekim kain tok olsem? Long wanem, em i ting long taim bilong em i mas i gat ol lida i gat gutpela pasin tru. Wanpela taim i nogut tru i bin kamap, em namba tu bikpela pait. Tasol maski dispela pait i pinis, bel isi i no stap long graun. Ol man i stap long tudak. Na tru tumas, inap 57 yia bihain long dispela pait i pinis, graun i stap yet long tudak. Sapos Presiden Truman i stap laip long nau, em bai luksave yet olsem i mas i gat ol gutpela lida i gat stretpela pasin olsem Aisaia o aposel Pol.
2 Yumi no save Presiden Truman i bin save long dispela samting o nogat, tasol aposel Pol i toktok long dispela tudak i bagarapim ol man, na em i bin mekim tok lukaut long en. Em i mekim tok lukaut long ol wanbilip: “Yumi no save pait long ol manmeri. Nogat. Yumi pait long ol strongpela spirit na ol gavman na ol kain kain samting i gat strong, ol i save bosim graun long dispela taim bilong tudak. Yumi pait long olgeta spirit nogut i stap antap.” (Efesus 6:12) Dispela tok bilong Pol i soim olsem em i save long tudak bilong spirit i stap long dispela graun, na tu, i soim olsem em i save long as bilong en—em ol strongpela spirit nogut em lain “i save bosim graun.” Ol strongpela spirit i as bilong tudak i stap long graun, olsem na ol man bilong graun inap mekim wanem bilong rausim dispela tudak?
3. Maski ol man bilong graun i stap long tudak, Aisaia i tok profet olsem ol man i stap gut long God ol bai kisim wanem samting?
3 Aisaia tu i tok long dispela tudak i bagarapim ol man. (Aisaia 8:22; 59:9) Tasol em i tingim taim bilong yumi, na spirit holi i kirapim em long tok profet olsem long dispela taim bilong tudak, Jehova bai helpim ol man i laikim tru lait long ol i ken kisim gutpela tingting long ol samting. Em nau, maski Pol o Aisaia i no stap wantaim yumi, ol tok ol i bin raitim i stap bilong stiaim yumi. Bilong yumi ken save olsem dispela em i wanpela gutpela blesing long ol man i laikim tru Jehova, yumi ken skelim sampela tok profet bilong Aisaia i stap long sapta 60 long buk bilong em.
Wanpela Meri i Givim Lait
4, 5. (a) Jehova i tokim wanpela meri long mekim wanem? Jehova i tok promis long wanem samting bai kamap? (b) Aisaia sapta 60 i stori long wanem ol gutpela samting?
4 Ol namba wan tok bilong Aisaia 60 i stori long wanpela meri i stap nogut tru—em i stap long tudak na i slip long graun. Wantu lait i kamap na Jehova i tokaut: “Jerusalem [“meri,” NW ], yu kirap na lait olsem san, long wanem, nau bikpela lait na strong bilong mi, Bikpela, i lait antap long yu.” (Aisaia 60:1) Em taim bilong dispela meri long sanap na kamapim lait na biknem bilong God. Bilong wanem? Bekim i stap long ves i kamap bihain. “Lukim. Ol blakpela klaut na bikpela tudak i karamapim olgeta arapela lain manmeri bilong graun. Tasol mi Bikpela, mi kam long yu, na bikpela lait bilong mi i lait strong antap long yu.” (Aisaia 60:2) Taim meri i bihainim tok bilong Jehova, Jehova i tok ol gutpela samting bai kamap long dispela. Em i tok: “Ol arapela lain manmeri bai i lukim dispela lait bilong yu na ol bai i kam long yu. Na ol king tu bai i lukim dispela strongpela lait bilong yu, na ol bai i kirap i kam.”—Aisaia 60:3.
5 Ol gutpela tok bilong dispela 3-pela ves ol i olsem kirap bilong ol narapela ves bilong Aisaia sapta 60 na ol i kamapim ol bikpela tok bilong en. Ol ves i tok profet long ol samting bai painim dispela meri i makim samting olsem tok profet na i stori long olsem wanem yumi inap i stap long lait bilong Jehova, maski ol manmeri i stap long tudak. Tasol ol samting dispela 3-pela ves i tok profet long en i makim wanem ol samting?
6. Husat dispela meri Aisaia sapta 60 i stori long en? Husat i olsem maus bilong en long graun?
6 Dispela meri Aisaia 60:1-3 i tok long en, em Saion, oganaisesen bilong Jehova long heven, olsem ol ensel. Long nau, i gat wanpela lain long graun i olsem maus bilong Saion, em hap lain bilong “lain Israel tru bilong God,” olsem lain Kristen God i bin makim long spirit holi em ol i bilong olgeta hap, na ol bai mekim wok king wantaim Krais long heven. (Galesia 6:16) Dispela lain bilong spirit bai i gat 144,000 manmeri long en, na truim bilong Aisaia sapta 60 long nau i kamap long ol manmeri bilong dispela lain em ol i stap laip long “taim bilong las de.” (2 Timoti 3:1; KTH 14:1) Dispela tok profet i stori tu long ol poroman bilong ol dispela Kristen God i bin makim, em bikpela lain manmeri bilong lain “arapela sipsip.”—KTH 7:9; Jon 10:16.
7. Saion i stap olsem wanem long 1918? Olsem wanem Baibel i bin tok profet long dispela samting?
7 Olsem wanem? I gat wanpela hap taim em “lain Israel tru bilong God” i bin stap long tudak, olsem dispela meri long tok profet i makim? Yes, dispela samting i kamap inap olsem 80 yia i go pinis. Long taim bilong namba wan pait bilong olgeta hap, ol Kristen God i bin makim ol i bin hatwok tru long mekim wok witnes. Tasol long 1918, long laspela yia bilong pait, i olsem wok bilong autim tok i pinis. Ol i sutim tok giaman long Joseph F. Rutherford, em i bosim wok bilong autim tok long olgeta hap, na long sampela narapela brata, na kot i makim ol long kalabus inap longpela taim. Buk Kamapim Tok Hait i tok profet long ol Kristen God i bin makim i stap long graun long dispela taim, ol i olsem bodi bilong ol daiman i slip “long bikrot bilong dispela bikpela taun, yumi save tok bokis na kolim em olsem, Sodom na Isip.” (KTH 11:8) Long dispela taim, Saion i stap long bikpela tudak tru—tudak tru i painim ol pikinini bilong Saion hia long graun!
8. Wanem bikpela senis i kamap long 1919? Wanem samting i kamap long dispela?
8 Tasol long 1919, bikpela senis i kamap. Jehova i givim lait long Saion! Hap lain bilong Israel tru bilong God i kirap mekim wok bilong kamapim lait bilong God, ol i strongim bel na kirap gen long autim gutnius. (Matyu 5:14-16) Pasin bilong ol dispela Kristen long givim bel gen long wok i mekim na lait bilong Jehova i pulim ol narapela. Lain i kam pastaim em ol nupela man bilong lain Israel bilong God. Aisaia 60:3 i kolim ol olsem ol king, long wanem, ol bai mekim wok king wantaim Krais long Kingdom bilong God long heven. (KTH 20:6) Bihain, bikpela lain bilong ol narapela sipsip i kirap kam long lait bilong Jehova. Em “ol arapela lain manmeri” dispela tok profet i kolim.
Ol Pikinini Bilong Meri i Kam Bek!
9, 10. (a) Meri i lukim wanem gutpela samting? Dispela i makim wanem samting? (b) I gat wanem as na Saion i amamas?
9 Nau Jehova i kirap mekim sampela tok moa bilong tok profet i stap long Aisaia 60:1-3. Em i tokim dispela meri long mekim narapela samting. Harim tok em i mekim: “Yu mas apim het bilong yu na lukluk nabaut.” Meri i bihainim tok, na em i lukim wanpela gutpela samting tru! Ol pikinini bilong em ol i wok long kam bek. Ves i tok moa: “Lukim ol pikinini bilong yu i bung wantaim na ol i kam long yu. Ol pikinini man bilong yu bai i wokabaut i kam long ol ples i stap longwe. Na ol man bilong ol arapela kantri bai i putim ol pikinini meri bilong yu long bros bilong ol na karim ol i kam.” (Aisaia 60:4) Wok bilong autim tok bilong Kingdom long olgeta hap i kirap long 1919 i bin pulim planti tausen nupela man bilong mekim wok bilong Jehova. Ol tu i bin kamap “ol pikinini man” na “ol pikinini meri” bilong Saion, olsem lain Israel tru bilong God. Olsem na Jehova i mekim na Saion i bin kamap nambawan tru taim em i bringim ol laspela man bilong lain 144,000 i kam long lait.
10 Olsem wanem? Yu inap tingim bikpela amamas bilong Saion taim ol pikinini bilong em i stap wantaim em? Tasol Jehova i kamapim sampela narapela as na Saion i ken amamas. Em i tok: “Yu bai lukim dispela na pes bilong yu bai i lait moa yet. Na lewa bilong yu bai i kalap wantaim bikpela amamas. Ol bikpela sip bai i bringim planti gutpela samting i kam long yu. Na yu bai kisim planti mani samting long olgeta kantri bilong graun.” (Aisaia 60:5) Olsem dispela tok profet i kamapim, kirap long 1935 samting, planti Kristen em ol i tingting long kisim laip long graun, ol i bin kam long Saion. Ol i bin lusim “solwara,” em ol lain manmeri i stap longwe long God, na ol i olsem dispela planti mani samting bilong olgeta kantri. Ol i “gutpela samting bilong olgeta lain.” (Hagai 2:7, NW; Aisaia 57:20) Ol dispela “gutpela samting” i no kirap bihainim rot ol yet i makim bilong lotu long Jehova, nogat. Ol i mekim na Saion i kamap gutpela moa taim ol i kam lotu wantaim ol brata bilong ol em God i bin makim, na olgeta i stap “wanpela lain sipsip” aninit long “wanpela wasman tasol.”—Jon 10:16.
Ol Bisnisman na Ol Wasman Bilong Sipsip i Kam Long Saion
11, 12. Stori long ol lain man i wokabaut i go long Saion.
11 Dispela wok bilong bungim ol man i mekim na namba bilong ol man i litimapim nem bilong Jehova i go bikpela tru. Ol ves i kamap bihain i tok profet long dispela. Tingim olsem yu sanap long maunten Saion wantaim dispela meri i makim samting olsem tok profet. Yu lukluk i go long hap is, na yu lukim wanem samting? “Planti kamel tru bilong ol lain Midian na Efa bai i bringim ol kago i kam long yu. Bai ol i go long kantri Seba na kisim gol na paura bilong kamapim smok i gat gutpela smel na bringim i kam long yu. Na ol manmeri bai i litimapim biknem bilong mi, Bikpela.” (Aisaia 60:6) Bikpela lain bisnisman i stiaim ol kamel bilong ol i go long Jerusalem. Ol kamel i olsem tait wara i karamapim graun! Ol bisnisman i karim planti presen i gat bikpela pe, “gol na paura bilong kamapim smok i gat gutpela smel.” Na ol dispela bisnisman i kam long lait bilong God bilong “litimapim biknem bilong” Jehova long ples klia.
12 I no ol bisnisman tasol i wokabaut i kam. Ol wasman bilong sipsip tu i wokabaut i kam long Saion. Tok profet i tok moa: “Ol Kedar na ol Nebaiot bai i bringim olgeta lain sipsip bilong ol i kam long yu.” (Aisaia 60:7a) Ol lain i save lukautim ol sipsip ol i wokabaut i kam long taun i holi bilong ofaim ol nambawan gutpela animal bilong ol long Jehova. Ol i givim ol yet tu bilong mekim wok bilong Saion! Jehova i ting olsem wanem long ol dispela man bilong ol narapela ples? God yet i tok: “Bai mi amamas long lukim ol manmeri bilong mi i bringim ol dispela sipsip na ofaim antap long alta bilong mi. Na bai mi mekim haus bilong mi i kamap nambawan tru na i gat biknem.” (Aisaia 60:7b) Jehova i amamas long ol ofa na wok bilong ol dispela man bilong ol narapela ples. Ol i kam na dispela i mekim tempel bilong em i kamap nambawan tru.
13, 14. Wanem samting i kam long hap bilong wes?
13 Nau tanim het na lukluk i go long hap bilong wes. Yu lukim wanem samting? Long longwe i luk olsem wanpela waitpela klaut i stap antap long solwara. Jehova i mekim wanpela askim yu tu i laik kamapim: “Wanem ol dispela waitpela samting i spit i kam olsem klaut win i bringim i kam antap long solwara, na olsem ol pisin i flai i kam bek long haus bilong ol?” (Aisaia 60:8) Jehova i bekim askim bilong em yet: “Em ol sip bilong ol longwe ples. Tru tumas, ol manmeri bilong ol longwe ples i wet long mi long helpim ol. Na ol i salim ol dispela bikpela sip i kam bilong bringim ol pikinini bilong yu i kam bek long yu. Na ol dispela manmeri i salim tu planti silva na gol i kam long ol dispela sip. Ol i mekim olsem, long wanem, ol i lukim mi i mekim gut tru long yu na yu gat biknem, na ol i laik givim biknem long mi God, Bikpela bilong Israel.”—Aisaia 60:9.
14 Yu inap lukim dispela long ai bilong tingting? Dispela waitpela klaut i kam klostu liklik na i luk olsem planti liklik liklik mak i stap longwe long hap bilong wes. Em i luk olsem wanpela lain pisin i raun antap long biksi. Tasol taim ol i kam klostu moa, yu lukim olsem em ol sip sel bilong ol i stap antap bilong win i ken holim. Planti sip i wok long i kam long Jerusalem, olsem na ol i luk olsem wanpela bikpela lain pisin. Long ol longwe longwe hap ol dispela sip i kam hariap tru, ol i bringim ol bilipman long Jerusalem bilong ol i ken lotu long Jehova.
Oganaisesen Bilong Jehova i Go Bikpela
15. (a) Aisaia 60:4-9 i tok wanem wok i go bikpela? (b) Ol Kristen tru i save kamapim wanem kain pasin?
15 Dispela tok profet ves 4 i go inap 9 i kamapim em i makim wok i go bikpela long olgeta hap kirap long 1919! Bilong wanem Jehova i blesim Saion na mekim wok i go bikpela? Long wanem, kirap long 1919, lain Israel bilong God i bin bihainim tok na kamapim lait bilong God. Tasol olsem ves 7 i tok, ol nupela man i kam “antap long alta bilong [God].” Alta em ples bilong wokim ol ofa, na dispela hap bilong tok profet i helpim yumi long tingim olsem, bilong mekim wok bilong Jehova yumi mas givim ol samting bilong yumi yet. Aposel Pol i tok: “Yupela i mas givim bodi bilong yupela long God olsem ofa i stap laip na i holi na God i save laikim, em wok bilong God yupela i mekim wantaim stretpela tingting.” (Rom 12:1, NW ) Olsem Pol i tok, ol Kristen tru i no ting sapos ol i go long lotu inap wanpela taim long wik, dispela em inap. Ol i givim taim, strong, na mani samting bilong ol bilong helpim lotu i tru. Kain manmeri olsem i givim bel long lotu ol i mekim haus bilong Jehova i kamap nambawan tru, a? Tok profet bilong Aisaia i tok dispela bai mekim olsem. Na yumi ken save tru olsem ol kain man bilong givim bel long lotu, ol i nambawan tru long ai bilong Jehova.
16. Husat i bin helpim wok bilong wokim gen tempel na taun Jerusalem long bipo? Husat i bin helpim wok bilong strongim lotu i tru long nau?
16 Ol dispela nupela man i kam ol i laik mekim wok. Tok profet i tok moa: “Ol man bilong ol arapela kantri bai i kam wokim gen ol banis bilong yu. Na ol king bilong ol bai i mekim wok bilong yu.” (Aisaia 60:10) Long namba wan truim bilong dispela tok i kamap taim lain Israel i lusim kalabus bilong Babilon, ol king na ol man bilong ol arapela kantri ol i helpim wok bilong wokim gen tempel na taun Jerusalem. (Esra 3:7; Nehemia 3:26) Long truim bilong dispela tok profet long nau, bikpela lain manmeri i bin helpim lain remnan long strongim lotu i tru. Ol i bin helpim wok bilong strongim ol kongrigesen Kristen na long dispela rot ol i bin strongim “ol banis” bilong oganaisesen bilong Jehova. Ol i insait tu long wok bilong sanapim ol haus—ol Haus Kingdom, Haus Kibung, na haus Betel. Long olgeta dispela rot ol i helpim ol brata bilong ol em God i bin makim, long lukautim ol samting bilong oganaisesen bilong Jehova i wok long i go bikpela!
17. Wanem wanpela rot bilong Jehova long mekim lain bilong em i kamap nambawan tru?
17 Laspela tok bilong Aisaia 60:10 i strongim tru bel bilong yumi! Jehova i tok: “Pastaim mi bin kros nogut tru long yu na mi bin mekim save long yu. Tasol nau mi belgut long yu na mi marimari long yu.” Yes, long 1918 na 1919, Jehova i bin stretim lain bilong em. Tasol dispela em i samting bilong bipo. Nau em taim bilong Jehova long marimari long lain wokman bilong em, em dispela lain God i bin makim ol, na ol poroman bilong ol em ol arapela sipsip. Yumi ken save em i bin marimari long ol, long wanem, em i bin mekim ol i kamap bikpela lain tru, olsem mekim ol i kamap nambawan tru.
18, 19. (a) Jehova i mekim wanem tok promis long ol nupela man i kam insait long oganaisesen bilong em? (b) Ol narapela ves bilong Aisaia sapta 60 i stori long wanem samting?
18 Long olgeta yia, planti handet tausen nupela “man bilong ol arapela kantri” i kam long oganaisesen bilong Jehova, na rot i op yet long planti moa i ken bihainim ol. Jehova i tok long Saion: “Ol dua bilong banis bilong yu bai i op i stap long san na long nait, na ol manmeri bilong ol arapela kantri bai i bringim ol mani samting bilong ol i kam long yu. Na ol bai i bringim tu ol king bilong ol i kam olsem wokboi nating bilong yu.” (Aisaia 60:11) Sampela birua i traim long pasim ol dispela “dua,” tasol yumi save olsem ol bai no inap. Jehova yet i bin tok olsem ol dua bai op i stap. Lain bilong em bai wok long go bikpela.
19 Long dispela taim bilong las de, Jehova i bin blesim lain bilong em long ol narapela rot tu, olsem mekim ol i kamap nambawan tru. Ol narapela ves bilong Aisaia 60 i gat ol tok profet long en i kamapim ol dispela rot.
Yu Inap Stori Long Dispela?
• Husat dispela “meri” bilong God? Husat i olsem maus bilong en hia long graun?
• Long wanem taim ol pikinini bilong Saion i slip long graun? Long wanem taim na olsem wanem ol i “kirap”?
• Long tok profet Jehova i mekim, em i stori long wanem ol samting i makim namba bilong ol man bilong autim tok bilong Kingdom i go bikpela long nau?
• Long wanem ol rot Jehova i bin givim lait bilong em long lain bilong em?
[Piksa long pes 10]
Jehova i tokim “meri” bilong em long sanap
[Piksa long pes 12]
Lain sip i luk olsem ol pisin i stap longwe