Laip Oltaim Long Graun​​—Em Wanpela Bilip i Kamap Klia Gen

“Orait nau Daniel, yu pasim buk i gat ol dispela tok long en. . . . Dispela buk i mas pas i stap inap klostu long taim bilong las de. Na planti manmeri bai i raun long olgeta hap, na bai ol i kisim planti save long olkain samting.”​​—DAN. 12:4; futnot

1, 2. Bai yumi skelim wanem ol askim long dispela stadi?

LONG nau planti milion manmeri i kliagut long tok bilong Baibel olsem ol man bai stap laip oltaim long graun long wanpela paradais. (KTH 7:​9, 17) Taim God i wokim namba wan man, em i kamapim olsem em i no wokim man bilong i stap sampela yia tasol na bihain em i dai, nogat, em i wokim man bilong i stap oltaim.​​—Stt. 1:​26-​28.

² Ol Israel i bilip olsem ol man bai kamap gutpela olgeta gen wankain olsem Adam long bipo. Ol Skripsa Grik i stori gut long rot em God bai mekim wok long en bilong givim laip oltaim long ol man long Paradais long graun. Orait, bilong wanem dispela bilip i mas kamap klia gen? Olsem wanem em i kamap klia gen na planti milion manmeri i kisim save long en?

Ol Man i Haitim Dispela Bilip

 3. Bilong wanem yumi no kirap nogut olsem bilip bilong laip oltaim long graun, dispela bilip i bin i stap hait?

³ Jisas i bin tok profet olsem ol profet giaman bai paulim ol tok bilong em na ol bai giamanim planti manmeri. (Mt. 24:11) Aposel Pita i givim tok lukaut long ol Kristen olsem: “Sampela man bai i kirap namel long yupela tu na giaman long skulim ol manmeri long ol samting bilong God.” (2 Pi. 2:1) Aposel Pol i tok: “Bihain ol man bai i no laik harim moa ol stretpela tok. Nogat. Yau bilong ol bai i skrap long harim ol narakain narakain tok, na ol bai i kisim planti man bilong skulim ol long kain tok ol i save laik long harim.” (2 Ti. 4:​3, 4) Satan i insait long wok bilong giamanim ol manmeri na em i bin yusim ol lotu Kristendom long haitim gutpela tok i tru bilong samting God i laik mekim long ol man na dispela graun.​​—Ritim 2 Korin 4:​3, 4.

 4. Ol hetman apostet bilong lotu i bin sakim wanem bilip em ol man i wok long wetim?

⁴ Baibel i tokaut olsem Kingdom Bilong God em wanpela gavman long heven, em bai bagarapim na pinisim olgeta kain gavman ol man i bin kamapim. (Dan. 2:​44) Insait long 1,000 yia bilong Krais i stap king, Satan bai kalabus long wanpela hul i no gat as, ol man i dai pinis ol bai kirap bek, na ol manmeri bai kamap gutpela olgeta gen long graun. (KTH 20:​1-3, 6, 12; 21:​1-4) Tasol ol hetman apostet bilong ol lotu Kristendom i bin kisim narapela tingting na skulim ol man long en. Olsem: Samting olsem 200 yia bihain long Krais, Tisa Bilong Lotu, Origen bilong Aleksandria, i daunim tok bilong ol man em ol i bilip olsem Taim Bilong Wan Tausen Yia bai kamapim ol blesing long graun. Buk The Catholic Encyclopedia i tok saveman bilong lotu Katolik, Augustine bilong Hippo (354-​430 C.E.) i tok “bai no gat taim bilong wan tausen yia.”a

5, 6. Bilong wanem Origen na Augustine i sakim dispela bilip bilong Wan Tausen Yia?

⁵ Bilong wanem Origen na Augustine i sakim bilip bilong Wan Tausen Yia? Origen i kisim bilip bilong ol Grik olsem ol man i gat wanpela spirit i no inap dai. Bilip bilong Pleto long man i gat wanpela spirit i no inap i dai, i stiaim strong tingting bilong Origen, olsem na Werner Jaeger, em wanpela tisa bilong lotu, i tok, Origen “i holim bilip olsem man i gat wanpela spirit i no inap i dai, em bilip em i bin kisim long Pleto, na putim i go insait long bilip Kristen.” Olsem na Origen i tok ol blesing bilong Wan Tausen Yia bai no inap kamap long graun, nogat, ol bai kamap long ples spirit.

⁶ Paslain long Augustine i joinim lotu “Kristen” long taim em i gat 33 krismas, em i bin bihainim ol tok bilong Plotinus, em wanpela man i bin stap 200 yia samting bihain long Krais na i bin kamapim wanpela pasin bilong bilip em ol tok bilong Pleto i as bilong en. Taim Augustine i joinim lotu “Kristen,” em i holim yet dispela bilip. Buk The New Encyclopædia Britannica i tok, “em i bungim ol bilip bilong Nupela Testamen wantaim ol bilip bilong Pleto.” Buk The Catholic Encyclopedia i tok Augustine i tok olsem dispela Taim Bilong Wan Tausen Yia em Buk Kamapim Tok Hait sapta 20 i stori long en, em “wanpela tok bokis tasol.” Buk i tok moa: ‘Ol tisa bilong lotu i kamap bihain, ol tu i kisim dispela tingting, na ol i no skulim moa ol man olsem taim bilong wan tausen yia bai kamapim ol blesing long graun.’

 7. Wanem bilip giaman i bin daunim bilip bilong laip oltaim long graun? Dispela samting i bin kamap olsem wanem?

⁷ Wanpela bilip em planti man bilong Babilon long bipo i bin holim na planti long nau tu i holim​—olsem man i gat wanpela spirit i no inap dai​—​dispela bilip i daunim bilip bilong stap laip oltaim long graun. Taim Kristendom i kisim dispela bilip, ol tisa bilong lotu i paulim ol tok bilong Baibel we i stori long sampela man bai kisim laip long heven, na bai i luk olsem Baibel i tok olgeta gutpela man bai go long heven. Na dispela i mekim na ol man i ting graun em ples bilong skelim man bilong save em i fit long kisim laip long heven o nogat. Klostu wankain samting i bin kamap long bilip em ol Juda bilong bipo i holim olsem ol man bai stap laip oltaim long graun. Isi isi ol Juda i kisim bilip bilong ol Grik olsem ol man i gat wanpela spirit i no inap i dai, na dispela i daunim bilip ol i bin holim long pastaim olsem ol man bai stap laip long graun. Dispela em narapela kain tru long tok Baibel i mekim long man! Baibel i no tok ol man i gat bodi bilong spirit, nogat, ol i gat bodi bilong graun. Jehova i bin tokim namba wan man: “Mi bin wokim yu long graun.” (Stt. 3:​19) Dispela graun em ples ol man bai stap oltaim long en, heven, nogat.​​—Ritim Song 104:5; 115:16.

Tok i Tru i Kamap Ples Klia

 8. Sampela saveman namel long yia 1600-1690 samting i tok wanem long samting ol man i bin wetim?

⁸ Maski planti lotu i tok ol i Kristen ol i no bilip olsem ol man bai stap oltaim long graun, Satan i no inap tru long haitim tok i tru. Long bipo na i kam, sampela man i ritim gut Baibel na ol i lukim lait bilong tok i tru taim ol i kliagut moa long ol wok God bai mekim bilong helpim ol man long kamap gutpela olgeta gen. (Sng. 97:11; Mt. 7:​13, 14; 13:​37-​39) Wok bilong tanim tok bilong Baibel na prinim Baibel i bin mekim na bihain long yia 1600 samting planti man i gat Baibel bilong ol yet. Long 1651, wanpela saveman i raitim tok olsem, long rot bilong Adam ol man “i no inap moa long stap long Paradais, na ol i no inap stap Laip Oltaim Long Graun,” olsem na long Krais “i stret olgeta man i mas stap laip long Graun.” (Ritim 1 Korin 15:​21, 22.) Wanpela man i gat nem, em John Milton (1608-​1674), em i raitim buk Paradise Lost na buk Paradise Regained. Long ol buk bilong em, Milton i stori long pe ol gutpela man bai kisim long graun long wanpela paradais. Milton i bin lusim planti yia long givim bel tru long stadim Baibel, na em i bin luksave olsem tok i tru bilong Baibel bai kamap klia long taim Krais i kam i stap.

9, 10. (a) Isaac Newton i tok wanem long samting ol man i wetim? (b) Bilong wanem Newton i ting taim bilong Krais i kam i stap, em i longwe yet?

⁹ Bikman Isaac Newton (1642-​1727), em wanpela saveman bilong matematiks, em i gat bikpela laik long save gut long ol tok bilong Baibel. Em i kisim save olsem ol lain holi bai kirap bek na kisim laip long heven na mekim wok king wantaim Krais. (KTH 5:​9, 10) Long ol manmeri husat bai stap aninit long Kingdom, em i tok: “Bihain long de bilong kot, ol manmeri bai stap long graun, tasol ol bai no stap laip inap 1,000 yia tasol, nogat, ol bai stap laip inap oltaim oltaim.”

¹⁰ Tasol Newton i ting taim bilong Krais long kam i stap, em bai kamap planti handet yia bihain. Saveman Stephen Snobelen i tok: “Wanpela as na Newton i ting Kingdom Bilong God i stap longwe yet, em long wanem, em i lukim bilip giaman bilong God Triwan i strong tru long taim bilong em.” Gutnius i stap hait yet. Newton i lukim olsem i no gat wanpela lain Kristen inap tru long autim tok bilong Kingdom. Snobelen i tok moa: “Ol dispela tok profet bilong Daniel na bilong Jon [long Buk Kamapim Tok Hait] em samting man i no inap long kisim save gut yet long en, inap long taim bilong las de.” Newton i tok: “Daniel i tok, ‘planti manmeri bai i raun long olgeta hap, na bai ol i kisim planti save long olkain samting.’ Ol i mas autim Gutnius long olgeta lain manmeri paslain long taim bilong bikpela hevi tru na pinis bilong dispela graun i kam. Bikpela lain manmeri i holim han bilong ol diwai pam em ol i abrusim bikpela hevi tru, bai ol i no inap kamap bikpela lain tru sapos ol man i no autim Gutnius long ol paslain long pinis i kam.”​​—Dan. 12:​4, futnot; Mt. 24:14; KTH 7:​9, 10.

11. Long taim bilong Milton na Newton, bilong wanem bilip bilong laip oltaim long graun em i stap hait long planti manmeri?

¹¹ Long taim bilong Milton na Newton, sapos wanpela man i tokaut long wanpela tingting em i pait wantaim bilip bilong lotu, hevi inap painim dispela man. Olsem na planti ol wok painimaut bilong Baibel em tupela i bin raitim long ol buk, ol i no bin prinim long taim ol i stap laip yet, bihain long taim tupela i dai, ol man i prinim ol buk bilong ol. Bihain long yia 1500 samting, sampela man i lusim Misin Katolik na sampela bilip bilong en. Dispela lain i kisim nem Protestan. Tasol ol i no rausim dispela bilip giaman i tok man i gat wanpela spirit i no inap i dai, na planti lotu Protestan i wok yet long skulim ol man long tingting bilong Augustine. Olsem: Dispela Taim Bilong Wan Tausen Yia i bin kamap na i go pinis, na em i no samting we bai kamap long bihain taim, nogat. Olsem wanem? Save i kamap planti long taim bilong pinis?

Stretpela Save i Kamap Planti

12. Stretpela save bai kamap planti long wanem taim?

¹² Daniel i tok profet olsem “long taim bilong las de,” wanpela gutpela samting tru bai kamap. (Ritim Daniel 12:​3, 4 na futnot, 9, 10.) Jisas i tok: “Long dispela taim ol stretpela manmeri bai i lait olsem san.” (Mt. 13:43) Olsem wanem stretpela save i kamap planti long taim bilong pinis? Skelim sampela samting i bin kamap long ol yia paslain long 1914, em yia we taim bilong las de i kirap.

13. Bihain long ol i skelim gut ol tok i stori long man inap kamap gutpela gen wankain olsem Adam, Charles Taze Russell i tok wanem?

¹³ Long yia 1870 samting, sampela man i gat gutpela bel, ol i wok strong long kliagut long ol “gutpela tok” bilong Baibel. (2 Ti. 1:​13) Wanpela man olsem em Charles Taze Russell. Long 1870, em wantaim sampela man em ol tu i wok long painim tok i tru, ol i kamapim wanpela klas bilong stadim Baibel. Long 1872, ol i skelim gut dispela tok i stori long man inap kamap gutpela gen wankain olsem Adam long bipo. Bihain, Russell i tok: “Inap long dispela taim mipela i no luksave klia olsem pe em sios (kongrigesen bilong ol Kristen God i bin makim) bai kisim, i no wankain long pe ol bilipman bilong dispela graun bai kisim.” Pe ol bilipman bai kisim em “ol bai kamap gutpela gen wankain olsem namba wan tumbuna bilong ol, Adam, long gaden Iden.” Russell i tok ol narapela i bin helpim em long kisimgut save long Baibel. Husat ol dispela man?

14. (a) Henry Dunn i kisim wanem tingting long tok bilong Aposel 3:​21? (b) Dunn i tok husat bai stap laip oltaim long graun?

¹⁴ Henry Dunn em wanpela bilong ol man i bin helpim Russell. Em i bin raitim tok i stori long “olgeta samting i kamap nupela gen, olsem bipo yet [God] i bin tok long maus bilong ol profet.” (Ap. 3:​21) Dunn i save olsem taim olgeta samting i kamap nupela gen, ol man bai kamap gutpela olgeta long graun insait long Wan Tausen Yia Bilong Krais i Stap King. Na tu, Dunn i skelim wanpela askim em planti man i no kliagut long en, Husat bai stap laip oltaim long graun? Em i tok olsem planti milion man bai kirap bek, ol bai lainim tok i tru, na bai rot i op long ol i ken kamapim bilip bilong ol long Krais.

15. George Storrs i kisim wanem save long kirap bek?

¹⁵ Long 1870, George Storrs tu i kisim save olsem ol man nogut bai kirap bek bambai rot i op long ol i ken kisim laip oltaim. Na tu, long stadi bilong em long Baibel, em i kisim save olsem sapos wanpela man husat i kirap bek, em i no laik bihainim tok, orait em bai “i dai, maski ‘em i gat 100 krismas pinis.’ ” (Ais. 65:20) Storrs i bin stap long Brooklyn, New York, na em i edita bilong magasin Bible Examiner.

16. Wanem samting i mekim na Ol Sumatin Bilong Baibel i stap narapela kain long Kristendom?

¹⁶ Long stadi bilong em long Baibel, Russell i kisim save olsem nau em taim bilong autim gutnius long olgeta hap bilong graun. Olsem na long 1879, em i kamapim magasin Zion’s Watch Tower and Herald of Christ’s Presence, nau ol i kolim Wastaua i Tokaut Long Kingdom Bilong Jehova. Long pastaim, wan wan man tasol i kliagut long gutpela samting bai painim ol manmeri, tasol nau planti grup bilong ol Sumatin Bilong Baibel long planti kantri i kisim Wastaua na ol i wok long stadim. Dispela bilip olsem liklik lain tasol bai go long heven, na planti milion manmeri bai kamap gutpela olgeta na stap laip long graun, i mekim na Ol Sumatin Bilong Baibel i stap narapela kain long ol Kristendom.

17. Olsem wanem planti manmeri i kisim save long stretpela save?

¹⁷ “Taim bilong las de” em Baibel i tok profet long en, em i kirap long 1914. Yu ting planti man i kisim stretpela save long gutpela samting ol man i wetim? (Dan. 12:4) Long 1913, ol i prinim ol tok bilong Russell long 2,000 niuspepa em 15,000,000 man i ritim. Long pinis bilong 1914, winim 9,000,000 manmeri long planti hap i bin lukim piksa “Photo-Drama of Creation”​​—em wanpela piksa wokabaut i gat ol slait i stori long Wan Tausen Yia Bilong Krais i Stap King. Long 1918 i go inap long 1925, ol wokboi bilong Jehova i givim tok “Planti Milion Man i Stap Nau Ol i No Ken i Dai,” long olgeta hap bilong graun, long 30 tok ples. Dispela tok i stori gut long bilip bilong laip oltaim long graun. Long 1934, ol Witnes Bilong Jehova i luksave olsem ol man husat i tingting long kisim laip long graun, ol i mas kisim baptais. Ol i kliagut long bilip bilong laip oltaim long graun, na dispela i kirapim tru laik bilong ol long givim bel long autim gutnius bilong Kingdom. Long nau, planti milion manmeri i gat tingting long stap oltaim long graun na ol i tenkyu tru long Jehova long dispela samting.

Taim Bilong “Olgeta Samting i Stap Gutpela Tru” i Kam Klostu Pinis!

18, 19. Aisaia 65:​21-​25 i stori long wanem kain sindaun?

¹⁸ Spirit bilong God i kirapim profet Aisaia long stori long gutpela sindaun ol lain manmeri bilong God bai amamas long kisim hia long graun. (Ritim Aisaia 65:​21-​25.) I gat sampela diwai i bin stap long taim Aisaia i raitim ol dispela tok, em 2,700 yia i go pinis, na ol dispela diwai i stap laip yet long nau. Yu inap piksaim long tingting olsem yu yet i stap laip longpela taim tru olsem ol dispela diwai na yu gat strong na gutpela helt?

¹⁹ Ol man bai no stap sampela yia tasol na ol i dai, nogat, ol bai stap laip oltaim oltaim na ol bai gat sans long wokim ol samting long han bilong ol, planim ol diwai purpur samting, na kisim save long kain kain samting. Tingim ol nupela pren bai yu inap kisim. Pasin pren bilong yupela bai no gat pinis bilong en. Man! Bai “olgeta samting i stap gutpela tru” na “ol pikinini bilong God” long graun bai amamas long olgeta dispela samting!​​—Ro. 8:​21.

[Futnot]

Yu Inap Stori Long Dispela?

• Bilip bilong laip oltaim long graun, wanem samting i mekim na dispela bilip i bin i stap hait?

• Long yia 1600 samting, sampela man bilong ritim Baibel i kisim save long wanem samting?

• Olsem wanem bilip bilong laip oltaim long graun em i kamap klia paslain liklik long 1914?

• Olsem wanem planti man i kisim save olsem ol man bai kisim laip long graun?

[Ol Piksa long pes 13]

John Milton (han kais) na Isaac Newton (han sut) i save long bilip bilong laip oltaim long graun

[Ol Piksa long pes 15]

Ol Sumatin Bilong Baibel i bin kisim save long Baibel olsem nau em taim bilong autim tok long olgeta hap long dispela bilip bilong gutpela samting bai painim ol man