Sapta 42
Nupela Heven na Nupela Graun
1. Taim ensel i soim long Jon ol samting bai kamap long taim 1,000 yia i kirap, Jon i stori olsem wanem long dispela samting em i lukim?
JON i driman yet na ensel i soim gutpela piksa long em long ol samting bai kamap taim dispela 1,000 yia i kirap. Jon i stori long ol samting em i lukim, olsem: “Nau mi lukim nupela skai na nupela graun i stap. Namba wan skai na namba wan graun i go pinis olgeta. Na solwara i no i stap moa.” (KTH 21:1) Jon i lukim gutpela samting tru!
2. (a) Long yia 537 paslain long Krais, wanem samting i painim ol Juda na dispela i truim tok profet bilong Aisaia long nupela skai na nupela graun? (b) Olsem wanem yumi save i mas i gat narapela truim bilong dispela tok profet bilong Aisaia? Wanem samting bai kamap bilong truim dispela tok?
2 Sampela handet yia paslain long taim bilong Jon, Jehova i bin tokim Aisaia olsem: “Lukim, mi wokim nupela skai na nupela graun. Na ol man bai i no inap tingim moa ol samting i bin kamap bipo.” (Aisaia 65:17; 66:22) Wanpela truim bilong dispela tok profet em i bin kamap long taim ol gutpela Juda i go bek long Jerusalem long yia 537 paslain long Krais, em ol i bin stap kalabus long Babilon inap 70 yia pinis. Ol i kam bek pinis, na ol i kamap gutpela na i stap olsem “nupela graun” aninit long nupela gavman i olsem “nupela skai.” Tasol aposel Pita i stori long narapela truim bilong dispela tok profet, na em i tok: “God i promis pinis long em bai i wokim nupela skai na nupela graun, na stretpela pasin tasol bai i stap long en. Yumi wet long dispela samting tasol i mas kamap.” (2 Pita 3:13) Orait, nau Jon i tok, truim bilong dispela tok promis bai kamap “long de bilong Bikpela.” “Namba wan skai na namba wan graun,” em ol samting Satan i bin kamapim na em wantaim ol spirit nogut bilong em ol i bosim, dispela ol samting bai pinis. Na “solwara” tu bai pinis, em ol bikhetman nogut ol i save mekim nabaut na ol i no sindaun gut. Senis bilong ol dispela samting em dispela “nupela skai na nupela graun”—olsem dispela lain ol bai stap long graun long nupela taim na nupela gavman bai bosim ol, em Kingdom bilong God.—Lukim Kamapim Tok Hait 20:11.
3. (a) Jon i stori long wanem samting? Nupela Jerusalem em i wanem samting? (b) Olsem wanem Nupela Jerusalem “i lusim heven na i kam daun”?
3 Jon i tok moa olsem: “Na mi lukim dispela taun bilong God, em nupela Jerusalem. Mi lukim em i stap wantaim God, na i lusim heven na i kam daun. Em i gat gutpela bilas, olsem meri i laik marit na i putim gutpela bilas na i redi long maritim man bilong en.” (KTH 21:2) Nupela Jerusalem em i meri bilong Krais, em dispela lain Kristen em God i bin makim ol, na ol i bin stap strong inap long taim ol i dai, na ol i kirap bek na ol i holim wok king na wok pris wantaim Bikpela Jisas long heven. (KTH 3:12; 20:6) Bipo, taun Jerusalem em as bilong gavman bilong lain Israel. Na i olsem tu long Nupela Jerusalem wantaim Man bilong en, ol bai stap olsem gavman bilong nupela taim em bai kamap long graun. Dispela gavman i olsem “nupela skai.” Dispela meri “i lusim heven na i kam daun,” em i no kam daun tru, tasol em i salim ol lo bilong en i kam daun, olsem bosim graun. Dispela meri bilong Pikinini Sipsip bai helpim gut Pikinini Sipsip long mekim stretpela wok gavman na bosim gut olgeta man long graun. Em gutpela samting tru bilong helpim “nupela graun”!
4. God i mekim wanem tok promis i wankain olsem em i bin mekim long nupela lain Israel long bipo?
4 Na Jon i tok moa olsem: “Na long sia king mi harim maus bilong wanpela man i singaut strong olsem, ‘Harim. Nau haus bilong God i stap wantaim ol manmeri. Em bai i stap namel long ol, na ol bai i stap ol lain manmeri bilong em. Yes, God yet bai i stap wantaim ol, na em bai i stap God bilong ol.’ ” (KTH 21:3) Taim Jehova i bin mekim kontrak bilong Lo wantaim nupela lain Israel long bipo, em i bin tok promis olsem: “Mi bai stap namel long yupela insait long haus bilong mi yet, na bai mi no ken givim baksait long yupela. Bai mi wokabaut namel long yupela na bai mi stap God bilong yupela. Na yupela bai i stap ol manmeri bilong mi.” (Wok Pris 26:11, 12) Orait, nau Jehova i mekim wankain tok promis long ol man i stap gut long em. Long taim bilong 1,000 yia ol bai stap olsem wanpela gutpela lain bilong em.
5. (a) Long taim bilong 1,000 yia, olsem wanem God bai “i stap namel long” ol man bilong graun? (b) Bihain long 1,000 yia, God bai stap namel long ol olsem wanem?
5 Long taim bilong 1,000 yia Jehova bai “i stap namel long” ol man bilong graun inap long wanpela hap taim. Pikinini bilong em, em King Krais Jisas, em bai stap olsem mausman o namelman bilong Jehova, na nau i olsem Jehova yet i stap namel long ol man. Tasol taim 1,000 yia i pinis, Jisas bai givim Kingdom i go bek long Papa bilong em, na nau i no gat wok moa bilong namelman o mausman i stap namel long Jehova na ol man. Orait, nau long spirit Jehova bai stap oltaim wantaim lain bilong em long graun. (Lukim Jon 4:23, 24.) Em wanpela gutpela samting tru bilong ol man i bin kamap gutpela olgeta!
6, 7. (a) Jon i kolim wanem ol gutpela samting bai kamap long nupela taim? Husat bai stap long dispela taim na ol i ken amamas long ol dispela samting? (b) Aisaia i stori olsem wanem long paradais bilong spirit na paradais bilong graun?
6 Na Jon i tok moa olsem: “Em bai i mekim drai wara i stap long ai . . . bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.” (KTH 21:4) Yumi tingim gen sampela tok promis bipo Jehova i bin mekim. Aisaia tu i bin tingting long taim dai na hevi bai pinis na ol man bai stap amamas. (Aisaia 25:8; 35:10; 51:11; 65:19) Orait, nau Jon i tok, truim bilong ol dispela gutpela tok promis bai kamap long De Bilong Kot, em taim bilong 1,000 yia. Pastaim ‘bikpela lain’ bai kisim ol gutpela blesing. “Pikinini Sipsip i stap namel tru long sia king,” em bai i stap yet olsem wasman bilong ol, na em “bai i bringim ol i go long ol hul i gat wara i kamap, em wara bilong givim laip. Na God bai i mekim drai wara bilong ai bilong ol, na ol bai i no krai moa.” (KTH 7:9, 17) Na bihain moa olgeta man i kirap bek na ol i givim bel long ol samting Jehova i mekim bilong helpim ol, ol bai stap wantaim dispela ‘bikpela lain’ na olgeta bai amamas long i stap long paradais bilong spirit na paradais bilong graun.
7 Aisaia i tok, long dispela taim “ol aipas bai ol i lukluk, na ol yaupas bai ol i harim toktok. Na ol lek nogut bai ol i kalap olsem ol dia, na ol mauspas bai ol i singaut na amamas.” (Aisaia 35:5, 6) Na long dispela taim tu ol man “bai i wokim ol haus na stap long ol. Na bai ol i planim ol gaden wain na wokim wain na dring. Ol birua bai i no inap kam moa na rausim ol manmeri bilong mi na sindaun long ol haus bilong ol na kisim ol gaden wain bilong ol na wokim wain na dring. Ol manmeri bilong mi bai i stap longpela taim tru, olsem ol strongpela diwai. Na bai ol i amamas long ol samting ol yet i bin hatwok long kamapim.” (Aisaia 65:21, 22) Olsem na yumi save, bai i no gat wanpela samting inap rausim ol long graun.
8. Jehova yet i tok wanem long truim bilong ol dispela gutpela tok promis?
8 Yumi tingim ol dispela gutpela tok promis na yumi amamas! Ol man i stap gut long God ol bai stap aninit long gutpela gavman bilong heven na ol bai amamas long ol samting Jehova bai givim long ol. Yumi no ken ting ol dispela tok promis i giaman o em i toktok nating bilong wanpela lapun i kalabus long ailan Patmos, nogat. Jehova yet i tok: “Na dispela Man i sindaun long sia king, em i tok olsem, ‘Harim. Mi mekim olgeta samting i kamap nupela.’ Na em i tok moa olsem, ‘Yu raitim dispela tok. Dispela tok em i tru olgeta, inap olgeta man i ken bilip tru long en.’ Na em i tokim mi olsem, ‘Olgeta samting i kamap pinis. Mi tasol mi stap paslain tru na mi stap las tru. Mi as bilong olgeta samting, na mi save pinisim olgeta wok mi mekim.’ ”—KTH 21:5, 6a.
9. Olsem wanem yumi ken bilipim tru ol dispela tok promis?
9 I olsem Jehova yet i raitim nem bilong em long dispela tok promis bilong em long Baibel bilong makim olsem em bai truim ol dispela gutpela tok promis na bai ol man i stap gut long em ol i ken bilip long en. Jehova i no save giaman, na bilong strongim ol dispela tok promis bilong em, em i toktok olsem ol dispela samting em i promis long en i kamap pinis. Em i tok: “Olgeta samting i kamap pinis.” Na i stret Jehova i mekim olsem, long wanem, em “Bikpela I Gat Olgeta Strong,” na em i tok olsem, “ ‘Mi tasol mi stap paslain tru na mi stap las tru.’ Em dispela God tasol, nau em i stap, na bipo tru em i stap, na bihain bai em i kam.” (KTH 1:8) Na em i tok: “Mi bin stap pastaim tru na bihain bai mi stap las tru. Na i no gat narapela god moa i stap, mi wanpela tasol.” (Aisaia 44:6) Olsem na Jehova inap long kirapim ol man long raitim ol tok profet, na em inap tu long truim olgeta samting bilong ol dispela tok profet. Dispela i strongim bilip bilong yumi! Olsem na em i tok promis olsem: “Harim. Mi mekim olgeta samting i kamap nupela”! Orait, yumi no ken ting ol dispela tok promis i giaman, nogat. Yumi mas ting olsem: ‘Mi mas mekim wanem na bai mi ken stap long dispela nupela taim na kisim ol dispela gutpela blesing?’
“Wara” Ol Man i Ken Dring
10. Wanem “wara” Jehova i laik givim long ol man? Dispela “wara” i makim wanem samting?
10 Na Jehova yet i tok: “Sapos nek bilong wanpela man i drai, orait mi bai larim em i dring long hul wara i gat wara bilong laip. Na mi bai larim em i kisim olsem presen. Em i no [ken] baim.” (KTH 21:6b) Man i mas save em i sot long ol save na ol samting bilong spirit na bai dispela “wara” i ken helpim em; na em i mas i gat laik long dring long dispela “wara” Jehova i givim long em. (Aisaia 55:1; Matyu 5:3) Em wanem “wara”? Jisas yet i bekim dispela askim taim em i bin toktok wantaim wanpela meri long hul wara long Samaria. Em i tokim meri: “Sapos wanpela man i dring long dispela wara mi laik givim em, i no gat wanpela taim nek bilong en bai i drai gen. Nogat. Dispela wara mi laik givim em, em bai i kamap olsem hul wara insait long em. Na dispela wara bai i kamap kamap oltaim na givim em laip i stap gut oltaim oltaim.” God em i as bilong dispela ‘wara bilong laip’ i stap long “hul wara,” na dispela wara i kirap long God na i kam long ol man long rot bilong Krais, na God i salim bilong mekim orait ol man na helpim ol long kamap gutpela olgeta. Olsem dispela meri Samaria, yumi tu i mas strong long dring long dispela hul wara, na givim baksait long ol samting bilong graun na givim bel long wok bilong autim gutpela tok!—Jon 4:14, 15, 28, 29.
Ol Man i Winim Pait
11. Jehova i tok promis long wanem samting? Pastaim dispela tok promis i bilong husat?
11 Ol man i dring long dispela “wara” ol i mas winim pait tu, olsem Jehova i tok: “Sapos man i winim pait, orait mi bai givim ol dispela samting long em, na mi bai stap God bilong em, na em bai i stap pikinini bilong mi.” (KTH 21:7) Dispela tok promis i wankain olsem ol tok promis Jisas i bin givim long 7-pela kongrigesen; olsem na pastaim dispela tok promis i bilong ol dispela disaipel em Jehova i bin makim ol long spirit. (KTH 2:7, 11, 17, 26-28; 3:5, 12, 21) Ol brata spirit bilong Jisas, long olgeta taim ol i bin tingting strong long i stap long Nupela Jerusalem. Sapos ol i winim pait olsem Jisas i bin mekim, bai ol inap long kisim tru ol gutpela samting ol i bin wet long en.—Jon 16:33.
12. Olsem wanem Jehova bai truim tok promis bilong Kamapim Tok Hait 21:7 long ‘bikpela lain’?
12 ‘Bikpela lain’ em ol i bilong olgeta lain man, ol tu i wet long kisim ol gutpela samting ol dispela tok promis i kolim. Ol tu i mas winim pait; ol i mas i stap gut long wok bilong Jehova i go inap long taim ‘bikpela hevi tru’ i pinis, na nau ol inap i stap long nupela taim bai kamap long graun, olsem “kisim kingdom Papa i bin redim na makim bilong [ol] pinis, long taim graun i kamap nupela yet.” (Matyu 25:34) Ol dispela lain wantaim ol narapela sipsip bilong Bikpela em ol i bilong i stap long graun ol i mas winim dispela traim bai painim ol long pinis bilong 1,000 yia; Jon i kolim ol olsem “ol manmeri bilong God.” (KTH 20:9) Ol bai stap olsem ol pikinini bilong Man i bin wokim ol, em God Jehova, na ol bai insait long bikpela oganaisesen bilong em i stap long heven na long graun.—Aisaia 66:22; Jon 20:31; Rom 8:21.
13, 14. Sapos yumi laik kisim ol samting God i tok promis long en, yumi mas givim baksait long wanem ol pasin? Bilong wanem yumi mas givim baksait long ol dispela samting?
13 Ol Witnes Bilong Jehova i tingim ol dispela gutpela samting bilong bihain, olsem na ol i mas i stap strong long nau na sakim ol pasin nogut bilong dispela graun em Satan i bosim! Yumi mas strong long givim baksait long Satan, nogut em i pulim yumi long poromanim ol man nogut, em Jehova i tok long ol olsem: “Tasol ol man i save pret na surik bek na ol man i no bilip na ol man i mekim ol kain kain pasin nogut tru na ol man i kilim ol man i dai na ol man i mekim pasin pamuk na ol man i wokim posin na i yusim ol arapela kain pawa na ol man i lotu long ol giaman god na olgeta man i mekim tok giaman, ol bai i go long ples bilong ol, em dispela bikpela hul i gat hatpela paia i lait long ol ston salfa. Dispela em i namba 2 dai.” (KTH 21:8) Ol man i laik i stap long dispela nupela taim bilong bihain ol i mas abrusim ol pasin nogut i save paulim ol man long nau. Ol i mas winim olgeta traim na hevi i painim ol, na ol i mas i stap gut long God na holimpas bilip.—Rom 8:35-39.
14 Ol lotu i gat nem Kristen ol i tok ol yet i meri bilong Krais, tasol ol i mekim ol dispela pasin nogut em Jon i bin kolim. Olsem na ol i mas kisim bagarap wantaim ol narapela lotu giaman bilong Bikpela Babilon, na ol bai pinis olgeta. (KTH 18:8, 21) Sapos sampela bilong lain bilong go long heven o bilong bikpela lain bai stap long graun, sapos ol i kirap mekim ol dispela pasin nogut o ol i kirapim narapela man long mekim, ol bai kisim bagarap na pinis olgeta, inap oltaim oltaim. Sapos ol i no lusim dispela pasin nogut ol i no inap kisim ol samting God i tok promis long en. Na long “nupela graun” sapos sampela ol i kirap long mekim pasin nogut, kwiktaim Jisas bai kilim ol i dai, em “namba 2 dai,” na ol i no inap kirap bek gen.—Aisaia 65:20.
15. Husat ol i winim tru pait? Wanem laspela driman bilong Kamapim Tok Hait?
15 Pikinini Sipsip Krais Jisas wantaim meri bilong em, em lain 144,000, olsem Nupela Jerusalem, ol i bin winim tru pait. Olsem na i stret laspela driman bilong Kamapim Tok Hait em i driman bilong Nupela Jerusalem! Nau Jon i stori long dispela laspela driman bilong em.
[Ol Piksa long pes 302]
Olgeta manmeri bilong “nupela graun” ol bai amamas long mekim ol wok na pren gut wantaim