Sapta 6
Dispela Tok Yumi Olgeta i Mas Tingim
1, 2. (a) Satan i kamapim wanem bikpela tok long Iden? (b) Wanem tok bilong Satan i soim olsem em i kamapim dispela bikpela tok?
YU INSAIT long nambawan bikpela tok olgeta manmeri i mas tingim. Tingting bilong yu long dispela tok bai i makim olsem yu bai kisim laip oltaim o nogat. Dispela tok i kamap taim pasin bikhet i kamap long Iden. Long dispela taim, Satan i askim Iv olsem: “Ating God i tambuim yutupela long kaikai pikinini bilong olgeta diwai bilong gaden, a?” Iv i kamapim tok God i bin mekim long wanpela diwai, em i tok: “Yutupela i no ken kaikai pikinini bilong dispela diwai, . . . nogut yutupela i dai.” Nau Satan i tok Jehova i giaman, na em i tok Iv na Adam i no ken i dai sapos ol i sakim tok bilong God. Satan i tok God i laik pasim ol long kisim gutpela samting—olsem ol yet i no ken makim wanem pasin i gutpela na wanem pasin i nogut. Satan i tok: “Sapos yutupela i kaikai pikinini bilong dispela diwai, bai ai bilong yutupela i op na yutupela i kisim save long wanem samting i gutpela, na wanem samting i nogut, na bai yutupela i kamap wankain olsem God. God i save long dispela, olsem na em i tambuim yutupela long kaikai pikinini bilong dispela diwai.”—Stat 3:1-5.
2 I olsem Satan i tok ol manmeri bai i stap gutpela moa sapos ol yet i makim ol samting ol i laik mekim na maski long bihainim ol lo bilong God. Olsem na Satan i sutim tok long pasin bilong God long bosim ol man. Dispela i kamapim nambawan bikpela tok, olsem i stret God i stap nambawan bos bilong heven na graun o nogat. Dispela askim i kamap: Wanem rot i gutpela bilong helpim ol man—pasin bilong Jehova long bosim ol o ol man i bosim ol yet? Jehova inap pinisim Adam tupela Iv wantu tasol, tasol dispela i no inap stretim gut dispela bikpela tok long husat i nambawan bos. Sapos God i larim ol lain man i kamap na mekim ol samting inap longpela taim, long dispela rot em inap kamapim klia wanem ol samting bai kamap taim ol man i bosim ol yet na i no bihainim ol lo bilong em.
3. Satan i kamapim wanem namba tu bikpela tok?
3 Taim dispela bikpela tok i kamap long Iden, Satan i no pinis long sutim tok long wok king bilong Jehova. Em i tok em inap pulim ol narapela man tu long lusim Jehova. Dispela i kamap namba tu bikpela tok. Satan i tok em inap pulim ol pikinini bilong Adam tupela Iv na olgeta pikinini bilong God long heven, em ol ensel, na namba wan Pikinini bilong Jehova tu, Em i laikim em tumas, na ol bai lusim Jehova. Long taim bilong Jop, Satan i tok ol man i mekim wok bilong Jehova, long wanem, ol i tingim skin bilong ol yet, na i no olsem ol i laikim tru God na wok bos bilong em, nogat. Satan i tok taim hevi i painim ol, ol bai tingim ol yet na lusim God.—Jop 2:1-6; KTH 12:10.
Ol Samting i Bin Kamap
4, 5. Ol samting i bin kamap i kamapim klia wanem samting bilong wok bilong ol man long bosim ol yet?
4 Wanpela bikpela samting bilong dispela tok long husat i mas i stap nambawan bos em olsem: God i no wokim ol man bilong bosim wokabaut bilong ol yet na sindaun bilong ol bai kamap gutpela, nogat. Bilong helpim gut ol, God i wokim ol bilong bihainim ol stretpela lo bilong em. Profet Jeremaia i tok: “Bikpela, mi save, mipela man i no inap bosim wokabaut bilong mipela yet na bihainim ol rot mipela i laikim. Bikpela, yu ken stretim mipela.” (Jeremaia 10:23, 24) Olsem na Baibel i tok: “Yu mas bilip strong long Bikpela. Yu no ken ting save bilong yu yet inap helpim yu.” (Sindaun 3:5) Bilong ol man i ken stap laip, God i wokim ol bilong i stap aninit long ol lo i bosim ol samting bilong graun. Na olsem tasol em i kamapim ol lo bilong stretpela pasin, na sapos ol lain man i bihainim ol dispela lo, ol bai i stap gut wantaim.
5 Tru tumas, God i save ol lain man bai i no inap i stap gut sapos ol i no stap aninit long wok bos bilong em. Ol man i traim long bosim wokabaut bilong ol yet, na ol i bin kamapim kain kain gavman na lotu, na wok bilong lukautim ol samting bilong mani. Ol dispela samting i bin mekim na ol man i no stap wanbel wantaim, na dispela i kamapim pasin bilong pait na bagarapim man, woa, na indai. “Sampela bikman i wok long daunim ol arapela manmeri na mekim nogut long ol.” (Saveman 8:9) Dispela samting i bin kamap long bipo yet i kam inap nau. Na olsem Baibel i tok profet, ol man nogut na ol giaman profet i “kamap nogut tru.” (2 Timoti 3:13) Insait long wan handet yia i go pinis, wok bilong saiens na wok bilong ol man long kamapim kain kain masin na haus faktori samting i go bikpela tru, tasol ol bikpela hevi tu i bin kamap, winim olgeta taim bipo. Tok bilong Jeremaia 10:23 i bin kamap tru—God i no bin wokim ol man bilong bosim wokabaut bilong ol yet.
6. Klostu nau God bai i mekim wanem bilong pinisim pasin bilong ol man long bosim wokabaut bilong ol yet?
6 Pasin bilong ol man long bosim wokabaut bilong ol yet na sakim wok bos bilong God i bin kamapim ol samting nogut inap longpela taim pinis, na dispela i kamapim klia olsem wok bos bilong ol man i no inap kamap gutpela. Wok bos bilong God tasol inap kamapim amamas, pasin wanbel, gutpela helt, na laip oltaim. Na Baibel i soim olsem klostu nau pasin bilong Jehova long larim ol man i bosim wokabaut bilong ol yet bai i pinis. (Matyu 24:3-14; 2 Timoti 3:1-5) I no longtaim na God bai pasim wok bilong ol man long bosim graun na gavman bilong em yet bai bosim. Tok profet bilong Baibel i tok: “Taim ol dispela king i stap yet [ol gavman bilong ol man long nau] God bai i kirapim wanpela kingdom [long heven] na dispela kingdom bai i stap oltaim oltaim [no gat wanpela taim bihain ol man bai bosim graun gen]. Ol arapela king i no inap daunim kingdom bilong God, tasol em bai i daunim ol na bagarapim ol arapela king [bilong nau] na kingdom bilong en bai i stap oltaim.”—Daniel 2:44.
Go Insait Long Nupela Taim God Bai Kamapim
7. Taim God i pinisim wok bos bilong ol man, husat bai i stap yet?
7 Taim Kingdom bilong God i pinisim wok bos bilong ol man, husat bai i stap yet? Baibel i tok: “Ol gutpela stretpela man [ol man i daun long wok king bilong God] bai i stap gut oltaim long graun bilong yumi. Tasol God bai i rausim ol man i save mekim pasin nogut na i no save bihainim em [em ol man i sakim wok king bilong God]. Em bai i kamautim ol, olsem man i kamautim kaikai long gaden bilong en.” (Sindaun 2:21, 22) Man bilong raitim song, em tu i tok: “I no longtaim na bai ol man nogut i lus olgeta. . . . Ol stretpela man bai i kisim graun God i givim ol, na bai ol i stap oltaim long en.”—Song 37:10, 29.
8. Olsem wanem God bai kamapim klia tru olsem i stret em i stap King?
8 Taim graun bilong Satan i pinis, God bai i kamapim nupela taim i no gat pasin bilong pait na bagarapim man, ol woa, pasin bilong stap rabis, pen na hevi, sik, na i dai, em ol dispela samting i bin kalabusim ol man inap planti tausen yia. Baibel i stori gut long ol gutpela samting bai i painim ol man i harim tok: “Em [God] bai i mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.” (KTH 21:3, 4) Long rot bilong Kingdom bilong em long heven em Krais i bosim, God bai kamapim klia tru olsem i stret Em i stap King bilong yumi, olsem Man bilong bosim yumi.—Rom 16:20; 2 Pita 3:10-13; KTH 20:1-6.
Ol Samting Ol i Mekim
9. (a) Ol manmeri i bin i stap gut long Jehova, ol i ting olsem wanem long tok bilong em? (b) Noa i mekim wanem bilong soim olsem em i stap gut long God? Pasin bilong em inap lainim yumi long wanem samting?
9 Kirap long bipo yet na i kam inap nau, i gat ol man na meri bilong bilip em ol i bin kamapim klia pasin bilong ol long i stap gut long Jehova, em i King. Ol i save ol i mas harim na bihainim tok bilong God bambai ol i ken i stap laip. Noa em i kain man olsem. Olsem na God i tokim Noa: “Bai mi pinisim tru olgeta lain manmeri. . . . Wokim wanpela sip.” Na Noa i daun long tok bilong Jehova. Maski ol narapela man long dispela taim ol i bin kisim tok lukaut, ol i stap olsem tasol—i olsem ol i no ting i gat wanpela bikpela samting i laik kamap. Tasol Noa i wokim wanpela traipela sip na em i wok strong long autim tok long ol man long ol stretpela pasin bilong Jehova. Baibel i tok: “Noa i mekim olgeta samting olsem God i tokim em.”—Stat 6:13-22; Hibru 11:7; 2 Pita 2:5.
10. (a) Olsem wanem Abraham na Sara i stap gut long wok bos bilong Jehova? (b) Pasin bilong Abraham na Sara inap lainim yumi long wanem samting?
10 Abraham na Sara tu i stap olsem gutpela piksa long pasin bilong i stap gut long wok bos bilong Jehova—ol i mekim ol samting em i tokim ol long mekim. Ol i stap long Ur long Kaldia, em i wanpela taun i gat planti samting bilong skin. Tasol taim Jehova i tokim Abraham long i go long narapela kantri, em wanpela kantri em i no save long en, Abraham “i go olsem Bikpela i bin tokim em.” Ating sindaun bilong Sara i gutpela tru—em i gat haus, ol pren, na ol wanblut. Tasol em i daun long Jehova na man bilong em na em i go long kantri Kenan, maski em i no save em bai i gat wanem kain sindaun long dispela hap.—Stat 11:31–12:4; Aposel 7:2-4.
11. (a) Wanem ol traim i painim Moses na em i stap gut long wok bos bilong Jehova? (b) Pasin bilong Moses inap helpim yumi olsem wanem?
11 Moses em narapela man i bin stap gut long wok bos bilong Jehova. Na em i mekim olsem, maski i gat hatwok tru long mekim—em i mas sanap long ai bilong king bilong Isip na toktok wantaim em. Moses i no hambak na ting em inap mekim dispela samting. Nogat. Em i ting em i no inap toktok gut. Tasol em i harim tok bilong Jehova. Jehova i sambai long em, na brata bilong em Aron i helpim em, olsem na Moses i givim tok bilong Jehova long king inap planti taim. Sampela man bilong lain Israel tu i sutim tok long Moses. Tasol Moses i mekim olgeta samting olsem Jehova i bin tokim em, na long rot bilong Moses, lain Israel inap lusim Isip.—Kisim Bek 7:6; 12:50, 51; Hibru 11:24-27.
12. (a) Wanem samting i soim olsem, bilong i stap gut long God yumi no ken bihainim tasol ol lo bilong God ol i bin raitim? (b) Sapos yumi pilim tru dispela kain pasin bilong i stap gut long God, olsem wanem dispela inap helpim yumi long bihainim tok bilong 1 Jon 2:15?
12 Ol man i bin stap gut long Jehova, ol i no ting ol i mas bihainim tasol ol tok bilong God ol man i bin raitim. Taim meri bilong Potifar i laik pulim Josep long slip wantaim em, ol i no bin raitim yet wanpela lo bilong God i tambuim pasin pamuk. Tasol Josep i save long pasin bilong marit em Jehova i bin kamapim long Iden. Em i save God i no inap orait long pasin bilong slip wantaim meri bilong narapela man. Josep i no laik traim God na bai em i ken save God bai larim em i bihainim pasin bilong ol Isip inap long wanem mak. Em i tingim tingim ol samting God i bin mekim bilong helpim ol man na em i holimpas ol pasin Jehova i laikim, na nau em i wok strong long bihainim laik bilong God.—Stat 39:7-12; Song 77:11, 12.
13. (a) Olsem wanem Jop i kamapim klia olsem Satan i giaman? (b) Olsem wanem tripela yangpela Hibru i kamapim klia dispela samting?
13 Maski ol bikpela traim i painim ol, ol man i save gut long Jehova ol i no save lusim em. Satan i tok sapos olgeta samting bilong Jop i lus o bikpela sik i painim em, Jop tu—em Jehova i bin mekim gutpela tok long em—em bai lusim God. Tasol Jop i kamapim klia olsem Satan i giaman, maski Jop yet i no save long as na ol bikpela hevi i painim em. ( Jop 2:9, 10) Inap planti handet yia bihain, Satan i laik truim tok bilong em na em i kirapim king bilong Babilon long tokim tripela yangpela Hibru long ol bai i dai long bikpela paia sapos ol i no brukim skru na lotu long imis king i bin tokim ol man long wokim. Nau ol i mas tingting: Bai ol i bihainim tok bilong king o bihainim lo bilong Jehova i tambuim pasin bilong lotuim god giaman. Ol i tokaut strong olsem ol bai mekim wok bilong Jehova na em i Nambawan Bikpela King bilong ol. Pasin bilong i stap gut long God i bikpela samting tru long ol—laip bilong ol, nogat!—Daniel 3:14-18.
14. Olsem wanem yumi ol sinman inap soim olsem yumi stap gut long Jehova?
14 Olsem wanem? Ol dispela stori i makim olsem bilong i stap gut long Jehova, man i mas i stap gutpela olgeta o sapos man i popaia em i lus olgeta long i stap gut long God? Nogat tru! Baibel i tok sampela taim Moses i popaia. Tru, Jehova i no amamas long dispela samting, tasol em i no sakim Moses. Ol aposel bilong Jisas Krais tu i gat ol pasin kranki. Jehova i save yumi kisim sin long Adam, olsem na em i amamas sapos yumi no bikhet na sakim laik bilong em. Sapos yumi popaia na mekim wanpela rong, em i bikpela samting long yumi mas tanim bel tru na no ken mekim gen. Long dispela rot yumi kamapim klia olsem yumi laikim tru ol samting Jehova i tok i gutpela, na yumi nolaik tru long ol samting em i tok i nogut. Yumi bilip long ofa bilong Jisas em inap tekewe sin, na long dispela as yumi inap i stap klin long ai bilong God.—Amos 5:15; Aposel 3:19; Hibru 9:14.
15. (a) Husat namel long olgeta man bilong graun i stap gut olgeta long God? Dispela i kamapim klia wanem samting? (b) Ol samting Jisas i bin mekim i helpim yumi olsem wanem?
15 Tasol ating ol man i no inap stap gut olgeta long wok bos bilong Jehova, o olsem wanem? Bekim bilong dispela askim i stap olsem wanpela tok hait i go inap 4,000 yia. (1 Timoti 3:16) God i bin wokim Adam i gutpela olgeta, tasol em i no givim bel tru long God. Olsem na husat inap mekim? No gat wanpela pikinini bilong Adam inap mekim, long wanem, ol i gat sin. Jisas Krais tasol inap mekim olsem. (Hibru 4:15) Ol samting Jisas i mekim i kamapim klia olsem, sapos Adam i laik, em inap tru long i stap gut olgeta long God, long wanem, i no gat planti hevi i bin painim em olsem i bin painim Jisas. Ol samting God i bin wokim i gutpela olgeta na i no gat asua. Olsem na Jisas Krais i stap olsem gutpela piksa yumi ken bihainim bilong soim olsem yumi bihainim ol lo bilong God na givim bel long Jehova, em King bilong heven na graun.—Lo 32:4, 5.
Olsem Wanem Long Yumi Yet?
16. Bilong wanem oltaim yumi mas was gut long tingting bilong yumi long wok bos bilong Jehova?
16 Yumi olgeta wan wan long nau i mas tingim dispela bikpela tok long husat i mas i stap nambawan bos. Sapos yumi bin tokaut klia olsem yumi stap long sait bilong Jehova, Satan bai birua long yumi. Long kain kain rot em i save putim hevi long yumi na em bai mekim olsem i go inap long taim pasin nogut bilong graun bilong em i pinis. Olsem na oltaim yumi mas was gut. (1 Pita 5:8) Pasin bilong yumi i kamapim klia tingting bilong yumi long Jehova i mas i stap nambawan bos, na long yumi bai stap gut long God, maski ol traim i painim yumi. Yumi no ken ting pasin bilong bikhet long God i samting nating, long wanem, planti manmeri i save mekim, nogat. Bilong stap gut long God, yumi mas bihainim ol stretpela pasin bilong em long olgeta samting yumi mekim.
17. Husat i as bilong pasin bilong giaman na stil na dispela i mas kirapim yumi long klia olgeta long ol dispela pasin?
17 Olsem: Yumi no ken bihainim pasin bilong Satan, em i “papa tru bilong pasin bilong tok giaman.” ( Jon 8:44) Yumi mas tok tru long olgeta taim. Long dispela graun Satan i bosim, planti yangpela i no save tok tru long papamama bilong ol. Tasol ol yangpela Kristen i sakim dispela pasin, na long dispela rot ol i kamapim klia olsem tok Satan i mekim i no tru, olsem lain bilong God bai lusim pasin bilong i stap gut long God taim traim i painim ol. ( Jop 1:9-11; Sindaun 6:16-19) Sampela pasin giaman i save kamap insait long wok bisnis na sapos man i mekim, em i bihainim pasin bilong “papa tru bilong pasin bilong tok giaman.” Em i no bihainim pasin bilong God bilong tok tru. Yumi mas sakim ol dispela pasin. (Maika 6:11, 12) Na tu, i no stret long stil, maski man i sot long ol samting o em i stilim samting bilong man i gat planti mani kago. (Sindaun 6:30, 31; 1 Pita 4:15) Maski planti man long hap bilong yumi i save stil o yumi stilim liklik samting tasol, pasin bilong stil i brukim lo bilong God.—Luk 16:10; Rom 12:2; Efesus 4:28.
18. (a) Long pinis bilong Wan Tausen Yia Bilong Krais i Stap King, wanem traim bai i painim olgeta manmeri bilong graun? (b) Nau yumi mas kisim pasin bilong mekim wanem?
18 Long Taim Bilong Wan Tausen Yia Bilong Krais i Stap King, Satan na ol spirit nogut bai i stap long hul i no gat as, na ol i no inap paulim tingting bilong ol manmeri. Em bai gutpela samting tru! Tasol taim dispela wan tausen yia i pinis, bai ol i lusim dispela hul inap liklik taim. Satan na ol man i bihainim em, ol bai putim hevi long ol manmeri i kamap gutpela olgeta na ol i holimpas ol lo bilong God. (KTH 20:7-10) Sapos yumi stap laip long dispela taim, bai yumi givim bel long husat? Long dispela taim olgeta manmeri bai i stap gutpela olgeta, olsem na sapos wanpela man i no stap gut long God em bai lus olgeta, long wanem, em laik bilong em yet na em i mekim. Olsem na long nau yumi mas kisim pasin bilong bihainim kwik olgeta tok Jehova i givim yumi, maski em i kam long rot bilong Baibel o oganaisesen bilong em! Taim yumi mekim olsem, yumi soim olsem yumi givim bel tru long em olsem King bilong heven na graun.
Stori Gen Long Ol Dispela Tok
• I gat wanem bikpela tok yumi olgeta i mas tingim? Olsem wanem yumi insait long dispela bikpela tok?
• Ol man na meri bilong bipo i bin mekim wanem bikpela samting bilong soim olsem ol i stap gut long Jehova?
• Bilong wanem pasin yumi mekim long olgeta de i mas litimapim nem bilong Jehova?