‘Tokaut Strong Long Tok Bilong God na i No Pret’

“Holi Spirit i pulap long ol, na ol i autim tok bilong God. Ol i tokaut strong na ol i no pret.”​—AP. 4:31.

1, 2. Bilong wanem yumi mas wok strong long mekim gut wok autim tok?

TRIPELA de paslain long Jisas i dai, em i tokim ol disaipel bilong em: “Bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap.” Jisas i kirap bek pinis, na paslain long em i go long heven, em i tokim ol disaipel bilong em long ol i mas ‘mekim olgeta lain manmeri i kamap disaipel bilong em, na lainim ol long bihainim olgeta tok em bin givim long ol.’ Em i tok promis olsem em bai stap wantaim ol “olgeta de, i go inap long dispela taim i pinis.”​—Mt. 24:14; 26:​1, 2; 28:​19, 20.

² Yumi ol Witnes Bilong Jehova, na yumi insait long wanpela wok i bin kirap long taim bilong ol aposel. I no gat narapela wok i bikpela samting tru olsem wok bilong autim tok bilong Kingdom na kamapim ol disaipel, em dispela wok i helpim ol man long kisim laip. Olsem na em i bikpela samting long yumi mekim gut wok autim tok! Long dispela stadi, bai yumi kisim save long olsem wanem holi spirit i helpim yumi long autim strong tok na yumi no pret. Tupela stadi i kamap bihain long dispela, bai soim olsem wanem spirit bilong Jehova inap stiaim yumi long skulim gut ol man na autim tok long olgeta taim.

Yumi No Ken Pret

 3. Bilong wanem yumi mas i gat pasin bilong i no pret bambai yumi ken autim tok bilong Kingdom?

³ Wok em God i bin givim long yumi long autim tok bilong Kingdom i wanpela gutpela wok tru. Tasol dispela wok i gat ol hatwok bilong en tu. Sampela man i amamas long bilipim gutnius bilong Kingdom Bilong God, tasol planti ol i olsem ol man i bin stap long taim bilong Noa. Jisas i tok, ol i “stap olsem tasol i go inap long taim bikpela tait i kamap na i pinisim olgeta dispela manmeri.” (Mt. 24:​38, 39) Na tu, i gat ol man i tok bilas o birua long yumi. (2 Pi. 3:3) Ol bikman bilong gavman, ol wanskul, ol wanwok, na famili tu inap birua long yumi. Na ol pasin bilong yumi yet inap putim hevi long yumi, olsem yumi gat pasin bilong sem o yumi pret olsem ol man bai sakim yumi. Planti samting inap mekim na yumi hatwok long “daunim pret na tokaut strong” long tok bilong God. (Ef. 6:​19, 20) Bilong yumi no ken les long autim tok bilong God, yumi mas kisim pasin bilong i no pret. Wanem samting inap helpim yumi long kisim dispela pasin?

 4. (a) Pasin bilong i no pret em wanem samting? (b) Olsem wanem aposel Pol i bin strongim bel na bai em inap autim tok long ol Tesalonaika?

⁴ Tok Grik ol i tanim olsem “tokaut strong” i makim pasin bilong “i no pret long tokaut, tokaut stret, na tokaut klia.” Dispela tok i givim tingting olsem man ‘i gat strongpela bel, em i bilip long em yet, na i no pret.’ Dispela i no makim pasin bilong mekim hatpela tok, nogat. (Kl. 4:6) Yumi gat pasin bilong i no pret, na tu, yumi laik stap wanbel wantaim olgeta man. (Ro. 12:18) Taim yumi autim gutnius bilong Kingdom Bilong God, yumi no ken pret long autim tok, tasol yumi mas toktok long pasin i no bagarapim bel bilong man. Tru tumas, bilong yumi kisim pasin bilong i no pret, yumi mas wok strong long kisim sampela narapela pasin tu. Bilong kisim pasin bilong i no pret, yumi no ken bilip long strong na save bilong yumi yet. Bihain long aposel Pol na ol poroman bilong em ‘i bin kisim pen long Filipai,’ olsem wanem ol i “strongim bel” bilong ol na bai ol inap autim tok long ol man long Tesalonaika? Pol i tok: “God bilong yumi em i strongim bel bilong mipela.” (Ritim 1 Tesalonaika 2:2.) God Jehova inap rausim tingting bilong pret na givim yumi dispela wankain pasin bilong i no pret.

 5. Olsem wanem Jehova i givim pasin bilong i no pret long Pita, Jon, na ol arapela disaipel?

⁵ Taim “ol hetman [bilong ol manmeri] na ol saveman bilong lo” i salensim aposel Pita na Jon, tupela i tok: “Yupela i ting wanem pasin i stret long ai bilong God? Mitupela i mas bihainim tok bilong God o mitupela i mas bihainim tok bilong yupela? Yupela yet i ken skelim. Tasol mitupela i no inap pasim maus. Mitupela i mas autim tok long olgeta samting mitupela i bin lukim na harim.” Ol i no beten askim God long pinisim pasin birua, nogat, tupela aposel na ol wanbilip i beten olsem: “Bikpela, yu mas tingting nau long olgeta tok ol i mekim bilong pretim mipela, na yu mas helpim mipela ol wokboi bilong yu. Olsem na bai mipela i ken strong tru long autim tok bilong yu, na mipela i no ken pret.” (Ap. 4:​5, 19, 20, 29) Jehova i mekim wanem? (Ritim Aposel 4:31.) Long rot bilong spirit bilong em, Jehova i helpim ol long kisim pasin bilong i no pret. Spirit bilong God inap mekim wankain samting long yumi. Orait, olsem wanem yumi inap kisim spirit bilong God? Olsem wanem dispela spirit i ken stiaim yumi long wok autim tok?

Kisim Pasin Bilong i No Pret

6, 7. Wanem nambawan gutpela rot long kisim holi spirit bilong God? Kamapim sampela stori.

⁶ Nambawan gutpela rot bilong kisim holi spirit bilong God, em yumi mas askim God long givim long yumi. Jisas i tokim ol man olsem: “Yupela papa i save mekim planti pasin nogut, tasol yupela i save tumas long givim ol gutpela samting long ol pikinini bilong yupela. Olsem na yupela i ken save tru, Papa bilong yupela i stap long heven em bai i amamas long givim Holi Spirit long ol man i askim em.” (Lu. 11:13) Tru tumas, oltaim yumi mas beten askim God long givim holi spirit long yumi. Sapos yumi pret long mekim sampela hap wok bilong autim tok​—olsem autim tok long rot, autim tok long kain kain taim na ples, o long bisnis teritori​—orait yumi inap beten askim Jehova long givim yumi spirit bilong em na helpim yumi long kisim pasin bilong i no pret.​—1 Te. 5:17.

⁷ Wanpela meri Kristen, nem bilong em Rosa, em i bin mekim olsem.a Wanpela de, Rosa i stap long ples wok bilong em, na wanpela wanwok tisa i ritim wanpela ripot bilong narapela skul we ol i bin mekim pasin nogut long ol pikinini. Tingting bilong dispela tisa i bagarap stret na em i singaut olsem, “Man! Pasin bilong graun i go nogut olgeta.” Rosa i no inap surik long autim tok long kain taim olsem. Em i mekim wanem na bai em i no pret long autim tok? Rosa i tok: “Mi beten long Jehova na askim em long givim spirit bilong em bilong helpim mi.” Em inap autim gut tok na stretim rot bilong toktok moa wantaim tisa long bihain. Tingim tu liklik meri Milane, husat i gat 5-pela krismas na i stap long New York City. Milane i tok: “Paslain long mi go long skul, mi na mama bilong mi i save beten long Jehova.” Ol i beten long wanem samting? Ol i askim God long givim Milane pasin bilong i no pret long sanap strong na autim tok bilong God bilong em! Mama bilong Milane i tok: “Dispela i bin helpim Milane long stori gut long tingting bilong em long ol betde na ol bikpela de, na helpim em na bai em i no ken insait long ol bung bilong selebretim ol dispela de.” Ol dispela ekspiriens i soim olsem beten inap helpim yumi long kisim pasin bilong i no pret.

 8. Pasin bilong Jeremaia long i no pret inap skulim yumi long wanem samting?

⁸ Tingim tu wanem samting i bin helpim profet Jeremaia long kisim pasin bilong i no pret. Taim Jehova i makim em long kamap profet namel long ol kantri nabaut, Jeremaia i tok: “God, Bikpela, mi yangpela tumas na mi no save long pasin bilong autim tok.” (Jer. 1:​4-6) Tasol bihain, Jeremaia i autim strong tok na mekim gen na gen na planti i ting em i man bilong toktok tasol long ol hevi na ol samting nogut bai kamap. (Jer. 38:4) Winim 65 yia, Jeremaia i no pret long tokaut long strafe bilong Jehova. Em i gat nem long Israel olsem man bilong autim strong tok na i no pret, olsem na winim 600 yia bihain, taim Jisas i autim tok na i no pret, sampela i ting Jisas em i Jeremaia husat i kirap bek. (Mt. 16:​13, 14) Olsem wanem profet Jeremaia​—em pastaim em i surik long autim tok​—i daunim pasin bilong em long sem? Em i tok: “Mi pilim tok bilong yu [God] i olsem wanpela bikpela paia i stap long bel bilong mi na i olsem paia i lait insait long ol bun bilong mi. Mi trai hat long pasim tok bilong yu, tasol mi no inap.” (Jer. 20:9) Yes, tok bilong Jehova i givim strong long Jeremaia na i kirapim em long toktok.

 9. Olsem wanem tok bilong God inap mekim wankain samting long yumi olsem em i bin mekim long Jeremaia?

⁹ Aposel Pol i raitim pas long ol Hibru na i tok: “Tok bilong God em i gat laip, na em i wok strong i stap. Em i sap moa, na i winim bainat i gat tupela sap. Dispela tok i save sutim man na i go insait tru. Em i go kamap stret long dispela hap tewel na spirit i bruk, na long ol dispela hap skru na kru bilong bun i pas wantaim. Olsem na em i save gut tru long olgeta tingting na laik bilong bel bilong yumi.” (Hi. 4:12) Dispela tok bilong God inap mekim wankain samting long yumi olsem em i bin mekim long Jeremaia. Tingim, maski God i yusim ol man long raitim Baibel, em i no wanpela buk i gat savetingting bilong ol man long en, nogat, spirit bilong God i kamapim ol tok bilong en. Long 2 Pita 1:​21, Baibel i tok: “I no gat wanpela tok profet i bin kamap long laik bilong man i autim. Nogat. Holi Spirit yet i kirapim ol man na ol i autim tok God i givim long ol.” Taim yumi lusim taim bilong stadi gut long Baibel, ol tok em holi spirit i kamapim bai pulap long tingting bilong yumi. (Ritim 1 Korin 2:10.) Dispela tok inap kamap olsem “paia” insait long bel bilong yumi, na yumi mas tokaut long en long ol narapela man.

10, 11. (a) Sapos yumi laik kisim pasin bilong i no pret long autim tok, yumi mas i gat wanem kain pasin bilong stadi long Baibel? (b) Stori long wanpela samting yu tingting long mekim bilong helpim stadi bilong yu yet i kamap gutpela moa.

¹⁰ Bilong Baibel stadi i ken helpim tru yumi, yumi mas stadi long pasin we i mekim tok bilong Baibel i go daun long bel bilong yumi, na stiaim pasin bilong yumi. Olsem, profet Esekiel i lukim driman we God i tokim em long kaikai wanpela skrol i gat strongpela tok long en, na em i mas autim dispela tok long ol man i no laik harim. Esekiel i mas putim dispela tok long bel na tingting bilong em. Taim em i mekim olsem, wok bilong autim dispela tok i gutpela samting​—olsem swit bilong hani.​—Ritim Esekiel 2:8–3:​4, 7-9.

¹¹ Samting i painim Esekiel i save painim yumi tu. Long nau, planti man i no laik harim tok bilong Baibel. Bilong yumi ken wok strong yet long mekim wok bilong autim tok bilong God, em i bikpela samting long yumi mas stadi long Baibel long pasin i helpim yumi long pilim tru tok bilong en. Yumi mas stadi long olgeta taim, na i no long wan wan taim tasol. Yumi mas i gat wankain laik olsem man bilong raitim song husat i tok: “Bikpela, mi laik bai tok bilong mi na tingting bilong mi i ken i orait long ai bilong yu. Bikpela, yu ples hait bilong mi na helpim bilong mi.” (Sng. 19:14) Em i bikpela samting tru long yumi lusim hap taim bilong tingim tingim long bel ol tok yumi ritim bambai tok i tru bilong Baibel i ken i go daun long bel bilong yumi! Tru tumas, yumi mas wok strong long mekim stadi bilong yumi yet i kamap gutpela moa.b

12. Olsem wanem ol miting Kristen i helpim yumi na bai holi spirit i ken stiaim yumi?

¹² Narapela rot bilong kisim helpim long holi spirit bilong Jehova, em pasin bilong “tingting tu long ol arapela manmeri bilong God, na painim rot bilong kirapim ol long laikim ol arapela na mekim ol gutpela pasin long ol. Na yumi ol manmeri bilong God i no ken lusim pasin bilong bung wantaim.” (Hi. 10:​24, 25) Pasin bilong wok strong long i go oltaim long ol miting Kristen, putim gut yau, na bihainim ol tok yumi harim, em ol gutpela rot we holi spirit i ken stiaim yumi. Dispela em olsem, long wanem, spirit bilong Jehova i save stiaim yumi long rot bilong kongrigesen.​—Ritim KTH 3:6.

Ol Gutpela Samting i Kamap Long Pasin Bilong i No Pret

13. Ol samting ol Kristen long taim bilong ol aposel i mekim long wok autim tok i skulim yumi long wanem samting?

¹³ Holi spirit em i nambawan bikpela strong long heven na graun, na dispela spirit inap strongim ol man long mekim laik bilong Jehova. Holi spirit i strongim ol Kristen long taim bilong ol aposel, na ol inap mekim bikpela wok bilong autim tok. Ol i autim gutnius “long olgeta manmeri i stap long graun.” (Kl. 1:23) Taim yumi tingim olsem planti bilong ol dispela Kristen ol i ‘no bin skul na ol i man nating tasol,’ i klia tru olsem wanpela strong i kirapim ol long autim tok.​—Ap. 4:13.

14. Wanem samting inap mekim na ‘spirit bilong God i kirapim bel bilong yumi long mekim wok’?

¹⁴ Taim yumi wokabaut long pasin we yumi larim holi spirit i stiaim laip bilong yumi, dispela tu inap kirapim yumi long autim tok na i no pret. Taim yumi beten oltaim bilong kisim holi spirit, givim bel long mekim stadi bilong yumi yet, beten na tingim tingim long bel ol tok yumi ritim, na go oltaim long ol miting Kristen, orait ol dispela samting inap helpim yumi long ‘larim Holi Spirit i kirapim yumi.’ (Ro. 12:11) Baibel i stori long “wanpela man Juda nem bilong em Apolos, as ples bilong em Aleksandria, em i kam long Efesus.” Na Baibel i tok moa: “Spirit bilong God i mekim na bel bilong em i kirap stret long mekim wok, olsem na em i toktok na skulim ol man long ol stretpela tok long ol samting bilong Jisas.” (Ap. 18:​24, 25, NW) Taim yumi “larim Holi Spirit i kirapim” yumi, bai yumi kisim strongpela bel moa long autim tok long ol haus na long kain kain taim na ples.​—Ro. 12:11.

15. Taim yumi autim strong tok na i no pret, olsem wanem dispela bai helpim yumi?

¹⁵ Taim yumi autim strong tok na i no pret, dispela bai helpim yumi. Tingting bilong yumi long dispela wok bai kamap gutpela moa, long wanem, yumi kliagut moa olsem wok yumi mekim i bikpela samting na i helpim tru ol man. Amamas bilong yumi i go bikpela taim yumi mekim gut wok autim tok, na dispela bai kirapim yumi long givim bel moa yet long mekim wok. Na taim yumi tingim olsem taim i sot pinis long mekim wok autim tok, dispela bai strongim pasin bilong yumi long givim bel long wok.

16. Yumi mas mekim wanem sapos yumi no givim bel tumas long wok autim tok?

¹⁶ Tasol olsem wanem sapos yumi no givim bel tumas long wok autim tok olsem bipo yumi bin mekim? Em i gutpela long yumi skelim gut bel bilong yumi. Pol i tok: “Oltaim yupela i mas skelim pasin na tingting bilong yupela yet na painimaut, bilip bilong yupela i stap strong, o nogat.” (2 Ko. 13:5) Askim yu yet: ‘Spirit bilong God i wok yet long kirapim mi long mekim wok? Mi save beten askim Jehova long givim spirit bilong em long mi? Ol beten bilong mi i soim olsem mi bilip olsem em bai helpim mi long mekim laik bilong em? Mi save tok tenkyu long wok bilong autim tok em i bin givim long yumi? Olsem wanem long pasin bilong mi long mekim stadi bilong mi yet? Mi save lusim bikpela hap taim long tingim tingim long bel ol tok mi ritim na harim? Mi save insait tru long ol miting bilong kongrigesen?’ Taim yu skelim ol kain askim olsem, dispela inap helpim yu long luksave long ol samting yu no strong long en na mekim ol samting bilong stretim dispela samting.

Larim Holi Spirit i Helpim Yu Long Kisim Pasin Bilong i No Pret

17, 18. (a) Wok autim tok long nau i bikpela olsem wanem? (b) Yumi mas mekim wanem na bai yumi “no pret long autim tok” long gutnius bilong Kingdom Bilong God?

¹⁷ Jisas i kirap bek pinis, na em i tokim ol disaipel bilong em: “Holi Spirit bai i kam i stap long yupela, na yupela bai i kisim strong. Na yupela bai i autim tok bilong mi long Jerusalem, na long olgeta hap bilong Judia, na long distrik Samaria, na i go inap long olgeta hap bilong graun.” (Ap. 1:8) Wok autim tok i bin kirap long dispela taim na i go bikpela tru long nau, winim olgeta taim bipo. Winim 7 milion Witnes Bilong Jehova i autim tok bilong Kingdom long 230 kantri samting, na ol i lusim klostu 1.5 bilion aua long wok autim tok long olgeta yia. Yumi amamas tru long yumi ken givim bel long mekim dispela wok, em wanpela wok i no inap kamap gen!

¹⁸ Olsem long taim bilong ol aposel, long nau tu spirit bilong God i stiaim wok bilong autim tok i kamap long olgeta hap bilong graun. Sapos yumi larim holi spirit i stiaim yumi, bai yumi “no pret long autim tok.” (Ap. 28:31) Olsem na yumi mas larim holi spirit i stiaim yumi taim yumi autim gutnius bilong Kingdom Bilong God!

[Ol Futnot]

Yu Lainim Wanem Samting?

• Bilong wanem yumi mas i gat pasin bilong i no pret long autim tok bilong God?

• Wanem samting i helpim ol disaipel long bipo long autim tok na ol i no pret?

• Olsem wanem yumi inap kisim pasin bilong i no pret?

• Pasin bilong i no pret i save helpim yumi olsem wanem?

[Piksa long pes 7]

Olsem wanem papamama inap helpim ol pikinini bilong ol long kisim pasin bilong i no pret?

[Ol Piksa long pes 8]

Sotpela beten inap helpim yu long kisim strong long mekim wok autim tok