Sapta 13

Tupela King i Pait

1, 2. Wanem as na yumi laik save long tok profet i stap long Daniel sapta 11?

TUPELA king i resis wantaim na pait strong bambai narapela i ken daunim narapela na kamap nambawan. Pastaim wanpela i win na bihain narapela i win, i go i kam inap planti yia. Sampela taim, wanpela king i stap nambawan na narapela i stap nating, na sampela taim tupela i no pait wantaim. Tasol wantu pait i kirap gen, na pait namel long tupela i go yet. Sampela i bin insait long dispela pait em King Selukus 1 Naikato bilong Siria, King Tolemi Lagus bilong Isip, prinses bilong Siria em i kamap kwin bilong Isip, em Kliopatra 1, tupela empera bilong Rom, em Ogastus na Taiberius, na Kwin Senobia bilong Palmira. Klostu long pinis bilong dispela pait, Natsi Jemani, ol gavman Komiunis, Gavman Inglan-Amerika, Lig ov Nesen, na Yunaitet Nesen i bin insait long dispela pait. Dispela olgeta lain politik i no luksave olsem dispela pait bai pinis olsem wanem. Ensel bilong Jehova i bin autim dispela tok profet long profet Daniel inap 2,500 yia i go pinis.​—Daniel, sapta 11.

² Ating Daniel i mas amamas tru long harim ensel i tokaut long ol bikpela samting bai kamap namel long tupela king ol bai kamap bihain! Yumi tu i laik save long dispela samting, long wanem, dispela tupela king i wok long pait wantaim i kam inap long taim bilong yumi. Taim yumi skelim ol samting i bin kamap bipo na olsem wanem namba wan hap bilong dispela tok profet i kamap tru pinis, dispela bai strongim bilip bilong yumi olsem laspela hap bilong dispela tok profet bai kamap tru. Sapos yumi putim yau long dispela tok profet, yumi inap save yumi stap long taim bilong dispela pait i laik pinis. Na dispela save bai strongim yumi long i stap isi na wetim God i kirap mekim ol samting bilong helpim yumi na bai yumi no insait long dispela pait bilong tupela king. (Song 146:​3, 5) Olsem na yumi laik putim gut yau long tok ensel i mekim long Daniel.

PAIT WANTAIM GAVMAN GRIK

 3. Dispela ensel i bin helpim husat “long namba wan yia bilong Darius bilong kantri Midia i stap king”?

³ Ensel i tok: “Long namba wan yia bilong Darius bilong kantri Midia i stap king bilong Babilon [539/538 B.C.E.], mi bin helpim Maikel.” (Daniel 11:1) Darius i dai pinis, tasol ensel i toktok long samting i bin kirap taim Darius i stap king. Darius i bin tokim ol man long rausim Daniel long hul bilong ol laion. Em i raitim wanpela tokaut i go long olgeta manmeri i stap aninit long em long ol i mas givim biknem long God bilong Daniel. (Daniel 6:​21-27) Dispela ensel i no bin helpim Darius, nogat, em i helpim wanwok bilong em Maikel​—em ensel i lukautim ol Israel. (Skelim wantaim Daniel 10:​12-14.) Dispela ensel bilong God i helpim Maikel taim em i pait wantaim dispela ensel nogut i save lukautim kantri Midia-Persia.

4, 5. Long dispela tok profet, 4-pela king bilong Persia ol i husat?

⁴ Ensel bilong God i tok moa olsem: “Daniel, harim. . . . Tripela king moa bai i kamap na bosim kantri Persia. Na bihain wanpela king moa bai i kamap. Dispela namba 4 king bai i gat planti mani samting, i winim ol samting bilong ol arapela king bilong Persia. Na taim strong bilong en i kamap bikpela na em i gat planti samting, em bai i mekim olgeta Grik i bel nogut long em, na bai ol i laik pait long em.” (Daniel 11:2) Ol dispela king bilong Persia i husat?

⁵ Tripela king bilong pastaim em Bikpela King Sairus, na Kambisis 2, na Darius 1. Badiya (o wanpela man i giaman na tok em i Badiya, nem bilong em Gaumata) i bin mekim wok king inap 7-pela mun tasol, olsem na tok profet i no stori long wok king bilong em. Long 490 B.C.E., namba 3 king, em Darius 1, i traim long go insait long kantri Grik long namba tu taim. Tasol long taun Maraton, ami Grik i winim ol tru na ami Persia i ranawe i go long Esia Maina. Darius i stretim gut ol samting bilong pait gen long kantri Grik, tasol 4-pela yia bihain em i dai, taim em i no mekim yet dispela pait. Pikinini bilong em, Serksis 1, i mekim dispela pait. Em i “namba 4 king” na senis bilong papa. Em dispela king i bin maritim Esta.​—Esta 1:1; 2:​15-17.

6, 7. (a) Olsem wanem namba 4 king “i gat planti samting” bilong pait na “i mekim olgeta Grik i bel nogut long em”? (b) Wanem samting i bin kamap long pait Serksis i mekim long kantri Grik?

⁶ Tru tumas, Serksis 1 “i gat planti samting” bilong pait na “em bai i mekim olgeta Grik i bel nogut long em,” em olgeta provins Grik wantaim. Wanpela buk (The Medes and Persians​—Conquerors and Diplomats) i tok: “Ol man i stap long haus king na ol i laik kisim namba, ol i wok long kirapim Serksis long pait, olsem na em i salim ami na nevi long pait.” Saveman Herodotus bilong 400 B.C.E. samting, i tok: “I no gat narapela ami bilong Persia em namba bilong ol soldia i winim dispela.” Em i tok namba bilong ol man insait long nevi “em 517,610. Namba bilong ol soldia i save wokabaut long lek em 1,700,000; ol soldia i sindaun long hos em 80,000; na tu i gat lain Arap i sindaun long kamel, na lain Libia i raun long karis na mekim pait, mi ting namba bilong ol i olsem 20,000. Namba bilong olgeta man i insait long ami na nevi em 2,317,610.”

⁷ Serksis 1 i gat tingting long daunim tru ol Grik, na long 480 B.C.E. em i kisim traipela ami bilong em i go pait wantaim ol Grik. Ol Grik i traim long pasim ol long Temopaili, tasol ami bilong Persia i kam na bagarapim tru Atens. Tasol long Salamis ami Grik i daunim tru ami Persia. Ol Grik i winim Persia gen long Platea, long 479 B.C.E. Insait long 143 yia bihain i gat 7-pela king bilong Persia i kamap bihain long Serksis, na i no gat wanpela bilong ol i kam pait long kantri Grik. Tasol wanpela strongpela king i kamap long kantri Grik.

STRONGPELA GAVMAN I BRUK NA KAMAP FOPELA

 8. Wanem “strongpela king” i kamap? Olsem wanem em i kirap “bosim planti kantri na planti manmeri”?

⁸ Ensel i tok: “Bihain wanpela strongpela king bai i kamap na em bai i bosim planti kantri na planti manmeri. Na wanem samting em i laik mekim, em bai i mekim tasol.” (Daniel 11:3) Aleksander i gat 20 krismas taim em i “kamap” king bilong Masedonia long 336 B.C.E. Em i kamap “wanpela strongpela king”​—em Bikpela King Aleksander. Em i bihainim wanpela tingting bilong papa bilong em, Filip 2, na em i daunim na kisim ol provins bilong Persia i stap long Midel-Is. Ami bilong em i brukim wara Yufretis na wara Taigris, na 47,000 soldia bilong em i rausim 250,000 soldia bilong Darius 3 long Gaugamela. Darius i ranawe na bihain ol man i kilim em i dai, na dispela i pinisim lain king bilong Persia. Gavman Grik i kamap namba wan bikpela gavman long graun, na Aleksander “i bosim planti kantri na planti manmeri.”

9, 10. Dispela tok profet long “ol lain pikinini” bilong Aleksander bai i no bosim gavman bilong em, olsem wanem dispela i bin kamap tru?

⁹ Aleksander bai bosim graun sotpela taim tasol, long wanem, ensel bilong God i tok: “Taim strong bilong en i kamap bikpela, kantri bilong en bai i bruk na kamap 4-pela kantri, na ol lain pikinini bilong em yet bai i no bosim ol dispela kantri. Nogat. Ol arapela man bai i bosim ol, tasol strong bilong ol bai i no wankain olsem strong bilong dispela strongpela king.” (Daniel 11:4) Taim Aleksander i no winim yet 33 krismas, wantu sik i kisim em na em i dai long Babilon long 323 B.C.E.

¹⁰ “Ol lain pikinini bilong em” bai i no bosim dispela bikpela gavman. Brata bilong em Filip 3 Arideus i mekim wok king inap 6-pela yia na ol man i bihainim tok bilong Olimpias, em mama bilong Aleksander, na ol i kilim em i dai long 317 B.C.E. Pikinini bilong Aleksander, em Aleksander 4, i mekim wok king i go inap long 311 B.C.E., taim wanpela jeneral bilong papa bilong em, em Kasanda, i kilim em i dai. Pikinini bilong Aleksander i bin kamap nating long rot bilong pamuk, em Heraklis, i laik mekim wok king long nem bilong papa, tasol ol man i kilim em i dai long 309 B.C.E. Olsem na lain pikinini bilong Aleksander i pinis na wok bilong bosim “ol dispela kantri” i no stap moa long famili bilong em.

11. Olsem wanem gavman bilong Aleksander i “bruk na kamap 4-pela kantri”?

¹¹ Bihain long indai bilong Aleksander, gavman bilong em i “bruk na kamap 4-pela kantri.” Ol jeneral bilong em i pait namel long ol yet bilong bosim ol narapela narapela hap graun. Jeneral Antigonus 1 i traim long bosim gavman olgeta bilong Aleksander. Tasol em i dai long pait bilong Ipsus long Frigia. Long yia 301 B.C.E., 4-pela jeneral bilong Aleksander i bosim olgeta hap graun Aleksander i bin kisim. Kasanda i bosim Masedonia na Grik. Laisimakus i bosim Esia Maina na Tres. Selukus 1 Naikato i kisim Mesopotemia na Siria. Na Tolemi Lagus i kisim Isip na Palestain. Olsem tok profet i makim, bikpela gavman bilong Aleksander i bruk na kamap 4-pela kantri Grik.

TUPELA KING I KAMAP NA I RESIS WANTAIM

12, 13. (a) Olsem wanem 4-pela kantri Grik i kamap tupela kantri tasol? (b) Selukus i kamapim wanem lain king long Siria?

¹² Kasanda i mekim wok king inap sampela yia tasol na em i dai, na long 285 B.C.E., Laisimakus i kisim hap bilong Yurop em Gavman Grik i bosim. Long 281 B.C.E., ami bilong Selukus 1 Naikato i pait na winim ami bilong Laisimakus na kilim em i dai, na Selukus i kisim bikpela hap graun bilong Esia em Gavman Grik i bosim. Antigonus 2 Gonatas, em tumbuna pikinini bilong wanpela jeneral bilong Aleksander, i kamap king bilong Masedonia long 276 B.C.E. Bihain Masedonia i stap aninit long Rom, na long 146 B.C.E. em i kamap wanpela provins bilong Rom.

¹³ Orait, nau 2-pela tasol bilong dispela 4-pela kantri Grik i stap strong​—wanpela i stap aninit long Selukus 1 Naikato na narapela em Tolemi Lagus i bosim. Selukus i kamapim wanpela lain king long Siria. Na em i bin kamapim sampela taun, wanpela em Antiok​—em i namba wan biktaun bilong Siria​—na narapela em ples bilong ol sip i sua long en, em Selusia. Bihain tru, aposel Pol i bin skulim ol man long Antiok, na long dispela hap ol disaipel bilong Jisas i kisim nem Kristen namba wan taim. (Aposel 11:​25, 26; 13:​1-4) Ol man i kilim i dai Selukus long 281 B.C.E., tasol lain king bilong em i bosim dispela hap i go inap 64 B.C.E. taim Jeneral Niuas Pompei bilong Rom i mekim Siria i kamap wanpela provins bilong Rom.

14. Wanem taim lain king bilong Tolemi i kirap bosim Isip?

¹⁴ Wanpela gavman Grik i stap longpela taim, winim ol narapela 3-pela, em gavman bilong Tolemi Lagus, o Tolemi 1, na em i kisim biknem olsem king long 305 B.C.E. Lain king em i kamapim i bosim Isip i go inap long taim Rom i daunim Isip long 30 B.C.E.

15. Wanem 2-pela strongpela king i kamap long dispela 4-pela kantri Grik? Ol i kirapim wanem pait?

¹⁵ Olsem na long 4-pela kantri Grik i gat 2-pela strongpela king i bin kamap​—Selukus 1 Naikato i bosim Siria na Tolemi 1 i bosim Isip. Kirap long dispela tupela king, dispela pait namel long “king bilong hap not” na “king bilong hap saut” i kirap, olsem Daniel sapta 11 i stori long en. Ensel bilong Jehova i no kolim nem bilong tupela king, long wanem, ol i husat na ol i bosim wanem kantri, dispela bai senis senis insait long ol handet handet yia i kamap bihain. Ensel i stori long ol king na ol samting i kamap na i insait long dispela pait, na em tasol.

PAIT I KIRAP

16. (a) Dispela 2-pela king ol i stap long hap not na hap saut bilong husat? (b) Husat ol i kamap namba wan “king bilong not” na namba wan “king bilong saut”?

¹⁶ Putim gut yau! Ensel bilong Jehova i stori long kirap bilong dispela pait olsem: “Na king bilong saut bai kamap strong, na wanpela prins bilong em [Aleksander] tu; na em [king bilong not] bai daunim em na bosim planti kantri tru, winim ol kantri em i bosim.” (Daniel 11:​5, NW ) Dispela tok “king bilong not” na “king bilong saut” i makim ol king i stap long hap not na hap saut bilong ol lain bilong Daniel, em ol i lusim pinis kalabus long Babilon na ol i stap long kantri Juda. Namba wan “king bilong saut” em Tolemi 1 bilong Isip. Wanpela jeneral bilong Aleksander i bin daunim Tolemi 1 na em i “bosim planti kantri tru,” em Selukus 1 Naikato bilong Siria. Em i kamap “king bilong not.”

17. Long kirap bilong dispela pait namel long king bilong not na king bilong saut, kantri Juda i stap aninit long husat?

¹⁷ Taim dispela pait i kirap, kantri Juda i stap aninit long king bilong saut. Kirap long 320 B.C.E., Tolemi 1 i kirapim ol Juda long kam sindaun long Isip. Wanpela lain Juda i kam sindaun na ol i kamap planti long Aleksandria, em taun Tolemi 1 i bin kamapim wanpela haus laibreri long en i gat biknem. I go inap 198 B.C.E. ol Juda i sindaun long Juda ol i stap aninit long Isip, em lain king bilong Tolemi, em king bilong saut, i bosim.

18, 19. Bihain, tupela king i mekim wanem bilong “stap gut wantaim”?

¹⁸ Ensel i tok profet long tupela king olsem: “Sampela yia bihain king bilong hap saut bai i salim pikinini meri bilong en i go maritim king bilong kantri long hap not. Dispela i bilong mekim tupela kantri i stap gut wantaim. Tasol strong bilong dispela meri bai i no i stap longpela taim, na strong bilong man bilong en tu bai i pinis. Bai ol i kilim i dai dispela meri na ol lain i bin go wantaim em, na papa bilong en na man bilong en.” (Daniel 11:6)a Orait yumi laik save, dispela samting i kamap olsem wanem?

¹⁹ Tok profet i no stori long Antiokus 1, em pikinini na senis bilong Selukus 1 Naikato, long wanem, em i no bin mekim bikpela pait wantaim king bilong saut. Tasol senis bilong em, em Antiokus 2, i pait longpela taim wantaim Tolemi 2, em pikinini bilong Tolemi 1. Antiokus 2 i makim king bilong not, na Tolemi 2 i makim king bilong saut. Antiokus 2 i marit long Laodisi, na ol i gat wanpela pikinini man, nem bilong em Selukus 2, na Tolemi 2 i gat wanpela pikinini meri, nem bilong em Berenisi. Long 250 B.C.E., tupela king i laik “stap gut wantaim.” Bilong mekim olsem, Antiokus 2 i katim marit bilong em wantaim meri bilong em Laodisi, na em i maritim Berenisi, em “pikinini meri” bilong king bilong saut. Antiokus 2 na Berenisi i kamapim wanpela pikinini man, em i bilong senisim papa bilong em na kamap king bilong Siria, tasol pikinini bilong Laodisi nogat.

20. (a) Olsem wanem “strong bilong dispela meri” i no stap longpela taim? (b) Olsem wanem strong bilong Berenisi, na “ol lain i go wantaim em,” na “man bilong en,” i pinis? (c) Husat i kamap king bilong Siria taim “strong” bilong Antiokus 2 i “pinis”?

²⁰ “Strong bilong dispela meri,” Berenisi, em papa bilong em, Tolemi 2. Taim papa i dai long 246 B.C.E., Berenisi i ‘no stap strong longpela taim’ wantaim man bilong em. Antiokus 2 i rausim em na maritim gen Laodisi, na em i makim pikinini bilong tupela long senisim em na kamap king. Ol i bihainim laik bilong Laodisi na kilim i dai Berenisi wantaim pikinini man bilong em. Ol i kilim i dai “ol lain i bin go wantaim em”​—em ol wokboi samting i bin lusim Isip na kam wantaim Berenisi long Siria. Laodisi i givim marasin nogut long Antiokus 2, olsem na “strong bilong man bilong en [olsem man bilong Berenisi]” tu “i pinis.” Em nau, papa bilong Berenisi, na man bilong en, em man Siria, em i bin mekim Berenisi i stap “strong” inap sotpela taim, dispela tupela man i dai. Orait pikinini man bilong Laodisi, em Selukus 2, i stap king bilong Siria. Tasol narapela king long lain bilong Tolemi bai mekim wanem long ol dispela samting?

WANPELA KING I BEKIM RONG

21. (a) Husat i “wanblut bilong dispela meri” Berenisi, na olsem wanem em i “sanap”? (b) Olsem wanem Tolemi 3 i bin “go insait long taun i gat strongpela banis na pait long king bilong hap not” na winim em?

²¹ Ensel i tok: “Bihain liklik wanpela wanblut bilong dispela meri bai i [“sanap,” NW ] kamap king bilong hap saut. Na dispela king bai i go pait long ami bilong king bilong hap not na bai i go insait long taun i gat strongpela banis na pait long king bilong hap not na winim ol.” (Daniel 11:7) “Wanblut bilong dispela meri” Berenisi em i brata bilong em. Taim papa bilong em i dai, em i “sanap” olsem king bilong saut, olsem Tolemi 3, king bilong Isip. Kwiktaim em i kirap mekim ol samting bilong bekim rong bilong ol man i bin kilim i dai susa bilong en. Em i go bilong pait wantaim King Selukus 2 bilong Siria, em Laodisi i bin kirapim em long kilim i dai Berenisi na pikinini man bilong en, na Tolemi 3 i go insait long “taun i gat strongpela banis” na pait long king bilong hap bilong not. Tolemi 3 i kisim strongpela hap bilong taun Antiok na em i kilim i dai Laodisi. Em i go insait moa long hap king bilong not i bosim long hap bilong sankamap, na em i pait na kisim ol samting bilong Babilon na em i mats i go olgeta long India.

22. Tolemi 3 i bringim wanem ol samting i kam bek long Isip? Bilong wanem “i no gat pait inap long sampela yia” wantaim king bilong not?

²² Wanem samting i kamap bihain long dispela? Ensel bilong God i tok: “Em bai i kisim piksa bilong ol giaman god bilong ol wantaim olgeta gutpela samting bilong ol dispela giaman god ol i bin wokim long gol na silva. Na em bai i bringim dispela olgeta samting i go long Isip. Bai i no gat pait inap long sampela yia.” (Daniel 11:8) Winim 200 yia paslain, King Kambisis 2 bilong Persia i bin daunim Isip na em i kisim ol god bilong Isip, olsem “ol giaman god bilong ol,” i go bek long ples bilong em. Taim Tolemi 3 i pait na kisim olgeta samting bilong Susa, bipo em i namba wan biktaun bilong Persia, em i kisim bek ol dispela god na karim ol i go bek long Isip. Na tu, em i bringim long Isip planti gutpela samting “ol i bin wokim long gol na silva.” Tolemi 3 i mas go bek long Isip bilong daunim pait bilong sampela man i laik bikhet long gavman, olsem na “i no gat pait inap long sampela yia” wantaim king bilong not.

KING BILONG SIRIA I BEKIM PAIT

23. Bilong wanem king bilong not “i go bek long kantri bilong en” bihain long taim em i go pait long king bilong saut?

²³ King bilong not i mekim wanem long ol dispela samting i kamap? Ensel i tokim Daniel olsem: “Bihain king bilong hap not bai i go . . . pait long king bilong hap saut. Na em bai i go bek long kantri bilong en.” (Daniel 11:9) King bilong not​—em Selukus 2 bilong Siria​—i bekim pait. Em i go pait long king bilong Isip, em king bilong saut, tasol em i lus long pait. Selukus 2 wantaim liklik hap lain ami bilong em “i go bek long kantri bilong en” long namba wan biktaun bilong Siria, em Antiok, long 242 B.C.E. Taim em i dai, pikinini bilong em Selukus 3, i senisim em na kamap king.

24. (a) Wanem samting i painim Selukus 3? (b) Olsem wanem King Antiokus 3 bilong Siria i “kam” long graun bilong king bilong saut na “daunim planti ples olsem wara i tait bikpela”?

²⁴ Tok profet i tok wanem samting bai painim pikinini bilong King Selukus 2 bilong Siria? Ensel i tokim Daniel olsem: “Ol pikinini man bilong em, bel bilong ol bai skrap long pait na ol bai bungim bikpela lain ami tru. Na taim em i kam em bai daunim planti ples olsem wara i tait bikpela. Tasol em bai i go bek, na bel bilong em bai skrap long pait i go inap long taun bilong em i gat strongpela banis.” (Daniel 11:​10, NW ) Wok king bilong Selukus 3 i no winim 3-pela yia na ol man i kilim em i dai. Brata bilong em, Antiokus 3, i senisim em na kamap king bilong Siria. Dispela pikinini bilong Selukus 2 i bungim bikpela ami bilong i go pait long king bilong saut, em Tolemi 4. Dispela nupela king bilong Siria, em king bilong not, em i pait wantaim Isip na kisim bek taun Selusia, provins Koli-Siria, na tupela biktaun, em Tair na Tolemeas, na ol taun i stap klostu long ol. Em i daunim tru wanpela ami bilong King Tolemi 4 na em i kisim planti taun bilong Juda. Klostu long kirap bilong yia 217 B.C.E., Antiokus 3 i lusim Tolemeas na em i go long hap not na i kamap “long taun bilong em i gat strongpela banis” i stap long Siria. Tasol i no longtaim na senis i kamap.

SENIS I KAMAP

25. Tolemi 4 na Antiokus 3 i bung we na mekim pait? King bilong saut, em bilong Isip, i “winim” wanem samting?

²⁵ Yumi gat wankain laik olsem Daniel long harim tok ensel bilong Jehova i mekim, em i tok profet olsem: “Orait king bilong hap saut bai i gat bikpela kros tru na bai em i go pait long king bilong hap not na winim bikpela ami bilong en na kalabusim ol.” (Daniel 11:11) Tolemi 4, em king bilong saut, wantaim 75,000 soldia bilong em, ol i go long hap not bilong pait wantaim birua bilong ol. King Antiokus 3 bilong Siria, em king bilong not, i kamapim “bikpela ami,” olsem 68,000 soldia, bilong pait wantaim king bilong saut. Tasol king bilong saut i “winim” dispela “bikpela ami” long pait i kamap long taun Rafia i stap long nambis, klostu long boda bilong Isip.

26. (a) Olsem wanem king bilong saut ‘i winim dispela pait’ bilong Rafia? Kontrak bilong mekim i dai pait i tok wanem? (b) Olsem wanem Tolemi 4 “i no inap i stap strong longpela taim”? (c) Husat i kamap king bilong saut bihain long Tolemi 4?

²⁶ Tok profet i tok moa olsem: “Em bai i amamas [“hambak,” NW ] tru long em i winim dispela pait. Em bai i kilim i dai planti tausen soldia, tasol bai em i no inap i stap strong longpela taim.” (Daniel 11:12) Tolemi 4, em king bilong saut, “em i winim dispela pait” na em i kilim i dai 10,000 soldia i save wokabaut long lek na 300 soldia i save sindaun long ol hos, na em i kisim 4,000 ol i go kalabus. Tupela king i wokim wanpela kontrak bilong mekim i dai pait na kontrak i tok Antiokus 3 bai holim yet taun Selusia, tasol Tolemi 4 i kisim provins Fonisia na Koli-Siria. King bilong saut, em Isip, em i “hambak” taim em i winim dispela pait na em i hambak moa yet long Jehova. Tolemi 4 i bosim yet kantri Juda. Tasol “em i no inap i stap strong longpela taim” na mekim pait na winim gen king bilong Siria, em king bilong not. Nogat. Tolemi 4 i kirap mekim pasin pamuk na olkain pasin doti, na taim pikinini man bilong em, Tolemi 5, i gat 5-pela krismas em i senisim papa na kamap king bilong saut sampela yia paslain long indai bilong Antiokus 3.

ANTIOKUS 3 I KAM BEK GEN

27. Olsem wanem king bilong not i bungim gen bikpela ami “bihain long sampela yia” bilong kisim bek hap graun em Isip i bin kisim?

²⁷ Antiokus 3 i bin mekim planti bikpela samting, olsem na ol i kolim em Bikpela King Antiokus. Ensel i stori long em olsem: “King bilong hap not bai i bungim gen bikpela lain soldia tru, i winim namba bilong ol soldia i bin i go pait bipo. Na bihain long sampela yia, bai em i kisim dispela bikpela strongpela ami na bai ol i go pait long king bilong hap saut. Na bai ol i kisim planti kaikai samting i go wantaim ol.” (Daniel 11:13) Dispela “sampela yia” i olsem 16 yia samting bihain long taim ami bilong Isip i bin winim ami bilong Siria long Rafia. Taim yangpela Tolemi 5 i kamap king bilong saut, Antiokus 3 i bungim “bikpela lain soldia tru, i winim namba bilong ol soldia i bin i go pait bipo”​—em i laik kisim bek hap graun em i bin lusim long taim em i bin pait wantaim king bilong saut, em Isip. Bilong mekim olsem, em i bungim ami bilong em wantaim ami bilong King Filip 5 bilong Masedonia.

28. Wanem ol hevi i painim yangpela king bilong saut?

²⁸ Na tu, king bilong saut i gat sampela hevi insait long kantri bilong em yet. Ensel i tok: “Long dispela taim ol planti man bai i birua long king bilong hap saut.” (Daniel 11:14a) Planti i bin ‘birua long king bilong hap saut.’ Ol ami bilong Antiokus 3 na Filip 5 bilong Masedonia i kam pait long em, na tu, em i gat sampela hevi insait long Isip yet. Planti Isip i bikhet long gavman, long wanem, man i lukautim yangpela Tolemi 5 na i mekim wok king long nem bilong en, em Agatoklis, i save mekim pasin antap na daunim ol Isip. Ensel i tok moa olsem: “Na long lain bilong yu, Daniel, sampela man bilong pait bai i harim tok bilong wanpela samting olsem driman. Na bai ol i kirapim pait long king bilong hap saut, bilong mekim tok bilong dispela driman i kamap tru. Tasol bai ol i lus long pait.” (Daniel 11:14b) Em nau, sampela bilong lain bilong Daniel bai bikhet na “kirapim pait” long king bilong saut. Tasol dispela “driman” bilong ol man Juda long daunim wok bos bilong ol narapela lain i bosim as ples bilong ol em i giaman tasol. Ol bai “lus long pait.”

29, 30. (a) Olsem wanem king bilong not i daunim “ol soldia bilong king bilong hap saut”? (b) Olsem wanem king bilong not i “sanap” long “dispela gutpela graun God i bin givim long ol manmeri bilong en”?

²⁹ Ensel bilong Jehova i tok profet moa olsem: “King bilong hap not wantaim ol soldia bilong en, ol bai i kam na banisim wanpela strongpela taun na bai ol i pait na kisim taun. Na ol soldia bilong kantri bilong hap saut bai i no inap pait moa. Ol gutpela strongpela soldia bilong ol tu bai i no gat strong bilong pait. Olsem na king bilong hap not bai i mekim ol samting long laik bilong em yet na i no gat wanpela man inap pasim em. Em bai i kisim [“sanap long,” NW ] dispela gutpela graun God i bin givim long ol manmeri bilong en, na em bai i wok long bagarapim ol samting.”​—Daniel 11:​15, 16.

³⁰ King bilong not i daunim “ol soldia bilong kantri bilong hap saut” em Tolemi 5 i bosim. Long Panias (Sisaria Filipai), Antiokus 3 i ranim Jeneral Skopas bilong Isip na 10,000 “gutpela strongpela soldia,” i go long taun Saidon, em “wanpela strongpela taun.” Orait nau Antiokus 3 i kam “banisim” na kisim dispela taun bilong Fonisia long 198 B.C.E. Em i “mekim ol samting long laik bilong em yet,” long wanem, ami bilong king bilong saut, em Isip, i no inap pasim em. Antiokus 3 i daunim Saidon pinis na em i go pait long Jerusalem, em nambawan biktaun bilong “dispela gutpela graun God i bin givim long ol manmeri bilong en,” em graun bilong Juda. Long 198 B.C.E., king bilong saut, em Isip, i no bosim moa Jerusalem na Juda, nogat; nau king bilong not, em Siria, i bosim. Long dispela taim king bilong not, em Antiokus 3, i kirap long sanap long “dispela gutpela graun God i bin givim long ol manmeri bilong en.” Em bai “bagarapim” ol man bilong Juda na Isip i laik birua long em. King bilong not inap mekim laik bilong em i go inap long wanem taim?

ROM I PASIM ANTIOKUS 3

31, 32. Bilong wanem king bilong not i pasim tok wantaim king bilong saut long sekan?

³¹ Ensel bilong Jehova i bekim dispela askim, olsem: “Bihain king bilong hap not bai i tingting long kisim olgeta ami bilong en na i go pait long kantri bilong hap saut. Em bai i tingting long mekim ol gutpela wok, na em bai i mekim. Na tu, em bai i salim pikinini meri bilong en i go maritim king bilong hap saut. Em i ting, long dispela rot em inap daunim kantri bilong hap saut. Tasol dispela tingting bilong en bai i popaia, na em bai i no kisim wanpela samting.”​—Daniel 11:17.

³² King bilong not, Antiokus 3, em i “tingting long kisim olgeta ami bilong en” na daunim tru Isip. Tasol em i no mekim, nogat; em i pasim tok wantaim Tolemi 5, king bilong saut, long sekan. Ol samting Rom i tok strong long en, dispela i mekim na Antiokus 3 i senisim tingting bilong em. Taim Antiokus 3 na King Filip 5 bilong Masedonia i bung wantaim bilong kisim sampela graun bilong yangpela king bilong Isip, ol man i lukautim Tolemi 5 ol i askim Rom long helpim ol. Rom i laik bai strong bilong en long bosim ol kantri i ken i go bikpela, olsem na em i kirap soim strong bilong en long helpim Isip.

33. (a) Kontrak bilong sekan namel long Antiokus 3 na Tolemi 5 i tok wanem? (b) Wanem as na Kliopatra 1 i maritim Tolemi 5? Bilong wanem dispela samting i popaia?

³³ Rom i subim Antiokus 3 long sekan wantaim king bilong saut. Tasol Antiokus 3 i no laik givim bek ol dispela graun em i bin winim long pait, olsem Rom i tokim em long mekim, nogat. Em i tingting long givim dispela graun long Isip taim “pikinini meri bilong en,” Kliopatra 1, i maritim Tolemi 5, tasol i no olsem em bai givim tru. Em bai givim provins Juda, em “dispela gutpela graun God i bin givim long ol manmeri bilong en,” na sampela provins moa long Kliopatra 1 olsem pe meri i mas givim long man i maritim em. Tasol taim ol i marit long 193 B.C.E., King bilong Siria i no givim ol dispela provins long Tolemi 5. Dispela marit em i wanpela wok politik tasol bilong mekim Isip i daun long Siria. Tasol dispela tingting bilong em i popaia na em i “no kisim wanpela samting,” long wanem, Kliopatra 1 i laik helpim man bilong em, na papa bilong em nogat. Taim pait i kirap namel long Antiokus 3 na Rom, Isip i helpim Rom.

34, 35. (a) King bilong not i go pait long wanem “ol kantri i stap arere long solwara”? (b) Olsem wanem Rom i bin pinisim “bikhetpasin” bilong king bilong not? (c) Antiokus 3 i dai olsem wanem? Husat i kamap king bilong not bihain long em?

³⁴ Ensel i stori long ol samting i kamap long king bilong not, na em i tok: “Na bihain em [Antiokus 3] bai i go pait long ol kantri i stap arere long solwara na em bai i winim planti kantri. Tasol wanpela ofisa bilong narapela kantri [Rom] bai i pinisim bikhetpasin bilong en, na mekim dispela bikhetpasin bilong em yet [Antiokus 3] i bagarapim em [Antiokus 3] olgeta. Na king bilong hap not [Antiokus 3] bai i go bek long kantri bilong en na i stap long ol taun i gat strongpela banis. Tasol em bai i pundaun na bagarap na ol man bai i no lukim em moa.”​—Daniel 11:​18, 19.

³⁵ Dispela “ol kantri i stap arere long solwara” em Masedonia, Grik, na Esia Maina. Wanpela pait i kirap long kantri Grik long 192 B.C.E., na Antiokus 3 i mas go long Grik. Rom i no amamas long king bilong Siria i laik kisim sampela hap graun moa long dispela hap, olsem na Rom i kirapim pait long em. Long Termopali ami bilong Rom i winim pait. Klostu wanpela yia bihain long taim Siria i lus long pait bilong Magnisia long 190 B.C.E., Rom i kisim olgeta hap bilong Grik, na Esia Maina, na sampela hap i stap long hap wes bilong ol maunten Taurus. Siria i mas baim Rom long bikpela mani, na tu, Rom i kirap bosim king bilong not, em Siria. Rom i rausim ami bilong Antiokus 3 long Grik na Esia Maina na ol i bagarapim klostu olgeta sip bilong en, olsem na em i “go bek long kantri bilong en na i stap long ol taun i gat strongpela banis” long Siria. Rom i bin “mekim dispela bikhetpasin bilong em yet i bagarapim em olgeta.” Antiokus 3 i dai long 187 B.C.E., taim em i traim long stilim ol samting bilong wanpela tempel long Elamaias, Persia. Olsem na em i “pundaun” long indai na pikinini bilong em Selukus 4 i senisim em na kamap king bilong not.

PAIT I GO YET

36. (a) King bilong saut i traim mekim wanem bilong pait yet wantaim king bilong not? Tasol wanem samting i painim king bilong saut? (b) Selukus 4 i dai olsem wanem? Husat i kamap senis bilong em?

³⁶ Tolemi 5, em king bilong saut, i laik kisim ol dispela provins olsem pe bilong em long maritim Kliopatra, tasol ol man i givim marasin nogut long em na em i dai. Tolemi 6 i kisim ples bilong em. Tasol olsem wanem long Selukus 4? Bilong kisim mani bilong baim Rom, em i salim man i save lukautim mani bilong em, Hiliodoras, i go long Jerusalem long kisim ol mani samting ol i tok i stap long tempel. Hiliodoras i laik stap king, olsem na em i kilim i dai Selukus 4. Tasol King Yumanis bilong Pergamum na brata bilong em Atalas i makim brata bilong Selukus 4, em Antiokus 4 long kamap king.

37. (a) Antiokus 4 i laik soim ol man olsem strong bilong em i winim strong bilong God Jehova, olsem na em i mekim wanem? (b) Wanem samting i kamap long pasin bilong Antiokus 4 long bagarapim tempel long Jerusalem?

³⁷ Nupela king bilong not, em Antiokus 4, i traim long bagarapim pasin lotu Jehova i bin kamapim, na long dispela rot em i laik soim ol man olsem strong bilong em i winim strong bilong God. Em i bikhet long Jehova na dediketim tempel bilong Jerusalem long Sus, o Jupita. Long Disemba 167 B.C.E., ol i sanapim wanpela alta bilong ol haiden antap long bikpela alta i stap long ples bung bilong tempel, em hap ol i save kukim ofa long Jehova long olgeta de. Tenpela de bihain ol i mekim wanpela ofa long Sus long dispela alta bilong ol haiden. Samting nogut ol i mekim long tempel i kirapim ol Juda long pait long Siria na ol Makabi i go pas long pait. Inap 3-pela yia Antiokus 4 i pait wantaim ol. Long 164 B.C.E., long wankain de olsem ol i bin bagarapim alta, Judas Makabeus i dediketim gen tempel long Jehova, na long dispela taim ol i kirapim dispela bikpela de bilong makim tempel i kamap haus bilong God, ol i kolim Hanuka.​—Jon 10:22.

38. Olsem wanem ol Makabi i pinis long bosim Judia?

³⁸ Ating ol Makabi i wokim wanpela kontrak wantaim Rom long 161 B.C.E, na ol i kamapim wanpela gavman long 104 B.C.E. Tasol pasin birua i stap yet namel long ol na king bilong not, em Siria. Bihain, Rom i mas kam na stretim dispela. Jeneral Niuas Pompei bilong Rom i banisim Jerusalem inap 3-pela mun na kisim dispela taun long 63 B.C.E. Long 39 B.C.E., Palamen bilong Rom i makim Herot​—wanpela man bilong Idom​—bilong i stap king bilong Judia. Em i kisim Jerusalem long 37 B.C.E., na ol Makabi i pinis long bosim Judia.

39. Tok yu skelim long Daniel 11:​1-19 i bin helpim yu olsem wanem?

³⁹ Yumi amamas tru long lukim namba wan hap bilong tok profet bilong dispela pait namel long tupela king i kamap tru olgeta! Tru tumas, em i narapela kain samting tru long skelim ol samting i bin kamap 500 yia bihain long taim Daniel i bin kisim ol dispela tok profet na yumi inap save husat ol king i stap olsem king bilong not na king bilong saut! Tasol ol gavman ol i makim i save senis senis taim dispela pait namel long tupela king i go yet inap long taim Jisas Krais i bin i stap long graun na i kam inap long taim bilong yumi. Sapos yumi skelim ol samting i bin kamap long bipo wantaim ol tok i stap long dispela tok profet, orait long dispela rot yumi inap save husat i makim dispela tupela king.

[Futnot]

YU BIN KISIM WANEM SAVE?

• Wanem tupela lain strongpela king i bin kamap long ol kantri Grik? Ol i kirapim wanem pait?

• Olsem Daniel 11:6 i tok profet, olsem wanem tupela king i “stap gut wantaim”?

• Olsem wanem pait i go yet namel long

Selukus 2 na Tolemi 3 (Daniel 11:​7-9)?

Antiokus 3 na Tolemi 4 (Daniel 11:​10-12)?

Antiokus 3 na Tolemi 5 (Daniel 11:​13-16)?

• Wanem as na Kliopatra 1 i maritim Tolemi 5? Bilong wanem dispela samting i popaia (Daniel 11:​17-19)?

• Taim yu putim gut yau long ol tok bilong Daniel 11:​1-19, olsem wanem dispela i bin helpim yu?

[Sat/Ol Piksa long pes 228]

OL KING LONG DANIEL 11:​5-19

Daniel 11:5 Selukus 1 Naikato Tolemi 1

Daniel 11:​7-9 Selukus 2 Tolemi 3

Daniel 11:​10-12 Antiokus 3 Tolemi 4

[Piksa]

Mani i gat piksa bilong Tolemi 2 na meri bilong em

[Piksa]

Selukus 1 Naikato

[Piksa]

Antiokus 3

[Piksa]

Tolemi 6

[Piksa]

Tolemi 3 na ol senis bilong em ol i bin wokim dispela tempel bilong Horas long Idfu, Isip

[Mep/Ol Piksa long pes 216, 217]

(Bilong save ol dispela rait i stap we long pes, lukim buk o magasin)

Dispela tok “king bilong hap not” na “king bilong hap saut” i makim ol king i stap long hap not na hap saut bilong ol lain bilong Daniel

MASEDONIA

GRIK

ESIA MAINA

ISRAEL

LIBIA

ISIP

ITIOPIA

SIRIA

Babilon

AREBIA

[Piksa]

Tolemi 2

[Piksa]

Bikpela King Antiokus

[Piksa]

Wanpela hap ston ol i raitim sampela bikpela tokaut bilong Bikpela King Antiokus long en

[Piksa]

Mani i gat piksa bilong Tolemi 5 long en

[Piksa]

Dua bilong Tolemi 3, long Karnak, Isip

[Piksa i karamapim pes olgeta long pes 210]

[Piksa long pes 215]

Selukus 1 Naikato

[Piksa long pes 218]

Tolemi 1