Sapta 14
Tupela King i Senis
1, 2. (a) Wanem samting i mekim na Antiokus 4 i mas bihainim tok bilong Rom? (b) Siria i kamap wanpela provins bilong Rom long wanem taim?
ANTIOKUS 4, king bilong Siria, i go insait long graun bilong Isip na em i makim em yet i kamap king bilong en. Tolemi 6, king bilong Isip, i askim Rom long helpim em, olsem na Rom i salim Ambasedo Kaius Popilius Lainas i go long Isip. Em i go wantaim bikpela lain sip, na Palamen bilong Rom i tok Antiokus 4 i mas tokaut olsem em i no king bilong Isip na em i mas lusim Isip. Long Elusis, klostu long Aleksandria, king bilong Siria i bungim ambasedo bilong Rom. Antiokus 4 i askim Lainas long larim em i toktok wantaim ol helpim bilong em, tasol Lainas i droim wanpela mak long graun i raunim king, na em i tok, pastaim king i mas tokim em long samting em bai mekim, na bihain em i ken brukim dispela mak. Dispela i semim tru Antiokus 4, na em i bihainim tok bilong Rom na i go bek long Siria long 168 B.C.E. Olsem na pait namel long king bilong not, em Siria, na king bilong saut, em Isip, i pinis.
2 Rom i bosim planti samting long hap bilong Midel-Is, na em i wok long tokim Siria long ol samting em i mas mekim. Olsem na maski i gat sampela king long lain bilong Selukus i bosim Siria bihain long indai bilong Antiokus 4 long 163 B.C.E., ol i no stap olsem “king bilong kantri bilong hap not.” (Daniel 11:15) Bihain, long 64 B.C.E., Siria i kamap wanpela provins bilong Rom.
3. Rom i daunim na bosim Isip long wanem taim? Em i mekim olsem wanem?
3 Ol king long lain bilong Tolemi long Isip i stap “king bilong kantri bilong hap saut” inap 130 yia samting bihain long indai bilong Antiokus 4. (Daniel 11:14) Long pait bilong Aktium, long 31 B.C.E., Oktevian, empera bilong Rom, i winim tupela ami i bung wantaim, em ami bilong laspela kwin bilong lain bilong Tolemi—Kliopatra 7—na ami bilong man Rom em i bin prenim, em Mak Antoni. Long yia bihain Kliopatra i kilim i dai em yet, na long dispela taim Isip i kamap wanpela provins bilong Rom na i no stap moa olsem king bilong saut. Long yia 30 B.C.E., Rom i bosim Siria na Isip wantaim. Olsem wanem? Yumi mas wetim sampela narapela kantri i kamap king bilong not na king bilong saut?
NUPELA KING I SALIM MAN BILONG “KISIM TAKIS”
4. Bilong wanem yumi ken ting i gat narapela gavman i mas kamap king bilong not?
4 Long kirap bilong 33 C.E., Jisas Krais i tokim ol disaipel bilong em olsem: “Yupela bai i lukim dispela samting nogut tru bipo profet Daniel i bin tok long en, na dispela samting bai i sanap i stap long haus bilong God yet. . . . Long dispela taim ol manmeri i stap long distrik Judia ol i mas ranawe i go long ples maunten.” (Matyu 24:15, 16) Jisas i kolim tok bilong Daniel 11:31, na em i tokim ol disaipel long lukaut long wanpela “samting nogut tru” em bai kamap bihain. Dispela tok profet long king bilong not, Jisas i mekim inap 195 yia bihain long indai bilong Antiokus 4, em i laspela king bilong Siria i bin i stap olsem king bilong not. Olsem na i mas i gat narapela gavman i kamap king bilong not. Em i husat?
5. Husat i kisim ples bilong Antiokus 4 na i kamap king bilong not?
5 Ensel bilong God Jehova i tok profet olsem: “Orait narapela king bai i kisim ples bilong en [bilong Antiokus 4] na em bai i salim wanpela man i go kisim takis long dispela gutpela ples tru i stap insait long ol kantri em i bosim. Dispela king bai i stap sotpela taim tasol, na bai em i dai. Em bai i no dai long pait, na tu bai i no gat man i gat kros long en na i kilim em i dai.” (Daniel 11:20) Dispela king bilong “kisim ples bilong en” em namba wan empera bilong Rom, Oktevian, narapela nem bilong en em Sisar Ogastus.—Lukim “Wanpela Ol i Givim Biknem Long Em, Narapela Em i Man Nogut Tru,” long pes 248.
6. (a) Wanem taim ol i bin salim “wanpela man i go kisim takis” long “dispela gutpela ples tru” i stap insait long ol kantri em i bosim? Bilong wanem dispela em i bikpela samting? (b) Bilong wanem yumi ken tok Ogastus “i no dai long pait, na tu bai i no gat man i gat kros long en na i kilim em i dai”? (c) Wanem senis i kamap long king bilong not?
6 Wanpela hap bilong “dispela gutpela ples tru” bilong Ogastus, em “dispela gutpela graun God i bin givim long ol manmeri bilong en,” em Judia, wanpela provins bilong Rom. (Daniel 11:16) Long 2 B.C.E., Ogastus i salim “wanpela man i go kisim takis” taim em i tokaut olsem ol manmeri i mas rejista—ating em i laik save long hamas man i stap long dispela hap bilong kisim takis long ol na makim sampela long insait long ami. Dispela tokaut i mekim na Josep na Maria i mas i go long Betlehem bilong rejista, na Maria i karim Jisas long dispela hap em tok profet i bin makim. (Maika 5:2; Matyu 2:1-12) Long Ogas 14 C.E.—long “sotpela taim tasol,” o i no longtaim bihain long dispela tokaut long rejista—Ogastus i dai taim em i gat 76 krismas, na em i no dai “long pait” o “man i gat kros long en na i kilim em i dai,” nogat, em i kisim sik na i dai. Tru tumas, gavman i makim king bilong not em i senis! Nau ol empera bilong Gavman Rom i kamap king bilong not.
‘MAN NOGUT TRU BAI KAMAP KING’
7, 8. (a) Husat i senis bilong Ogastus olsem king bilong not? (b) Bilong wanem Sisar Ogastus i no amamas long makim Taiberius long senisim em?
7 Ensel i tok profet moa, olsem: “Bihain [long Ogastus] narapela man bai i kamap king bilong kantri bilong hap not, na em bai i man nogut tru. Dispela man em i no mas kamap king, tasol wantu bai em i kamap na mekim kain kain tok gris na tok giaman, na mekim em yet i stap king bilong kantri bilong hap not.” “Na dispela ol han bilong wara i tait, em bai mekim na wara bai tait moa yet na karamapim ol, na ol bai bagarap; na Lida bilong kontrak tu bai bagarap.”—Daniel 11:21; 11:22, NW.
8 Dispela “man nogut tru” em Sisar Taiberius, pikinini bilong Livia, em namba 3 meri bilong Ogastus. (Lukim “Wanpela Ol i Givim Biknem Long Em, Narapela Em i Man Nogut Tru,” long pes 248.) Ogastus i no save laikim dispela was pikinini, long wanem, em i gat ol pasin nogut na Ogastus i no laik bai em i kamap king bilong kantri bihain long i dai bilong em. Tasol Ogastus i mas makim em olsem senis bilong em maski em i no laik, long wanem, ol narapela senis bilong em i dai pinis. Ogastus i adoptim Taiberius long 4 C.E. na makim em olsem senis bilong em. Orait, Ogastus i dai pinis, na taim “dispela man nogut tru,” Taiberius, i gat 54 krismas, em “i kamap king” bilong Rom na king bilong not.
9. Olsem wanem Taiberius i kamap king long rot bilong “kain kain tok gris na tok giaman”?
9 Wanpela buk (The New Encyclopædia Britannica) i tok: “Long pasin trik Taiberius i wok long pulim na stiaim Palamen, na em i no larim ol i makim em olsem empera inap wanpela mun [bihain long i dai bilong Ogastus].” Em i tokim Palamen olsem i no gat wanpela man inap bosim Gavman Rom olsem Ogastus i bin mekim, na em i askim ol long kamapim bek gavman ripablik na makim wanpela lain man bilong bosim Rom, na i no wanpela man tasol i bosim. Saveman Will Durant i tok: “Palamen i no bilip tru olsem em i laik bai ol i mekim olsem, olsem na ol i mekim ol tok long em i makim ol i rispek na daun long em, na Taiberius i mekim wankain pasin long Palamen. Ol i mekim olsem i go i kam inap long taim em i tok orait long kisim wok king.” Durant i tok moa olsem: “I olsem ol i insait long wanpela pilai, na tupela sait wantaim i mekim gut. Taiberius i laik kisim dispela wok king—sapos em i no laik, orait em inap painim rot long tok nogat; Palamen i pret long em na ol i no laikim em tru, tasol ol i no laik kamapim gen wanpela gavman ripablik kain olsem olpela ripablik i bin bosim Rom.” Olsem na long rot bilong “kain kain tok gris na tok giaman” Taiberius i kamap king.
10. Olsem wanem ‘ol han bilong wara i tait i kisim bagarap’?
10 Ensel i stori long “ol han bilong wara i tait”—em ami bilong ol kantri i stap klostu long Rom—na em i tok: “Em bai mekim na wara bai tait moa yet na karamapim ol na ol bai bagarap.” Taim Taiberius i kamap king bilong not, Sisar Jemanikus, em pikinini bilong brata bilong em, em i komanda bilong ol soldia Rom i stap klostu long wara Rain. Long 15 C.E., Jemanikus na ami bilong em i pait wantaim Arminius, em man Jemani i gat biknem, na Jemanikus i winim sampela pait. Tasol bilong mekim olsem, planti soldia bilong Rom i dai, na bihain Taiberius i no pait moa wantaim Jemani. Em i wok long kirapim ol narapela narapela lain insait long Jemani yet long pait wantaim, na long dispela rot ol i no inap bung na i stap wanbel wantaim. Taiberius i laik lukautim hap graun Rom i holim pinis na em i strongim ami long ol boda bilong Rom. Dispela pasin i wok gut liklik. Olsem na long dispela rot “ol han bilong wara i tait” i kisim “bagarap.”
11. Olsem wanem ‘Lida bilong kontrak i kisim bagarap’?
11 Na “Lida bilong kontrak” tu i kisim “bagarap.” Em dispela kontrak Jehova i bin mekim wantaim Abraham bilong mekim gut long olgeta lain bilong graun. Jisas Krais em i Pikinini bilong Abraham God i bin tok promis long en long dispela kontrak. (Stat 22:18; Galesia 3:16) Long Nisan 14, 33 C.E., Jisas i sanap long ai bilong Pontius Pailat long haus bilong gavena bilong Rom long Jerusalem. Ol pris Juda i bin kotim Jisas long mekim pasin birua long empera. Tasol Jisas i tokim Pailat: “Kingdom bilong mi em i no bilong dispela graun.” Ol Juda i no laik bai Pailat i larim Jisas i go, maski em i no bin mekim wanpela rong, olsem na ol i singaut olsem: “Sapos yu lusim dispela man i go, orait yu no pren bilong Sisar. Man i tok long em yet em i king, em i birua bilong Sisar.” Ol i singaut long kilim Jisas i dai, na bihain ol i tok: “Mipela i no gat narapela king. Sisar wanpela tasol!” Wanpela lo bilong Rom i tok yu no ken mekim tok birua long empera, na Taiberius i bin skruim dispela lo i go moa na tok yu no ken mekim tok i daunim empera liklik, olsem na long dispela as Pailat i larim Jisas i kisim “bagarap,” olsem hangamap long diwai pos.—Jon 18:36; 19:12-16; Mak 15:14-20.
MAN NOGUT BILONG TRIK NA GIAMAN
12. (a) Husat ol i bin mekim kontrak wantaim Taiberius? (b) Olsem wanem Taiberius i “kamap strong” long rot bilong wanpela “liklik kantri”?
12 Ensel i tok profet yet long Taiberius na em i tok: “Ol bai pren wantaim em, olsem na em bai wok long giamanim ol na em bai kam na kamap strong long rot bilong wanpela liklik kantri.” (Daniel 11:23, NW ) Long rot bilong konstitusen ol memba bilong Palamen bilong Rom i bin “pren” wantaim Taiberius, na pastaim em i mas kisim helpim long ol. Tasol em i man bilong trik na giaman, na em i “kamap strong” long rot bilong wanpela “liklik kantri.” Dispela liklik kantri em lain soldia i lukautim haus bilong Sisar, na ol i kem klostu long banis bilong Rom. Ol i stap long dispela hap na dispela i pretim Palamen na i helpim Taiberius long daunim kwik ol man i bikhet na i laik pait bilong daunim strong o namba bilong em. Olsem na long rot bilong 10,000 soldia, Taiberius i bin stap strong.
13. Taiberius i winim ol tumbuna bilong em long mekim wanem samting?
13 Ensel i tok profet moa olsem: “Ol dispela kantri em i pait long ol, em ol kantri i gat planti mani samting. Na em bai i kisim ol gutpela samting em i winim long pait na tilim long ol poroman bilong en. Ol tumbuna bilong en i no bin mekim dispela kain pasin bipo. Em bai i gat tingting bilong kirapim pait na kisim ol taun i gat strongpela banis, na em bai i kisim sampela bilong ol. Tasol em bai i mekim dispela kain pasin long sotpela taim tasol.” (Daniel 11:24) Taiberius i save saspek nating long ol man, na taim em i stap empera, planti taim em i tokim ol soldia long kilim i dai ol man em i saspek nating long ol. Klostu long pinis bilong wok king bilong Taiberius, komanda bilong ol soldia i lukautim haus bilong Sisar, em Sejanus, i kirapim Taiberius long mekim nogut tru long ol man na ol i pret nogut long em. Bihain, Taiberius i kisim tingting nogut long Sejanus tu na i tokim ol soldia long kilim em i dai. Taiberius i bosim strong ol man na mekim nogut tru long ol, winim tru ol tumbuna bilong em.
14. (a) Olsem wanem Taiberius i tilim “ol gutpela samting em i winim long pait” i go long ol provins Rom? (b) Klostu long taim Taiberius i dai, ol man i gat wanem tingting long em?
14 Tasol Taiberius i bin tilim “ol gutpela samting em i winim long pait” i go long ol provins Rom. I kam inap long taim em i dai, olgeta manmeri i stap aninit long em ol i gat gutpela sindaun. Ol manmeri i no gat wok long baim bikpela takis, na em i save givim planti mani bilong helpim ol man i stap long ol hap i gat hevi samting. Sapos ol soldia o ol bikman i mekim nogut long man o ol i no bihainim stretpela pasin long wok ol i mekim, gavman bai mekim save long ol. Em i holim strong wok gavman, olsem na i no gat planti raskol pasin, na em i stretim gut rot bilong salim tok i go i kam long ol narapela na dispela i helpim wok bisnis. Taiberius i strong long ol man i mas bihainim stretpela pasin long wok gavman ol i mekim insait na ausait long Rom. Em i stretim gut ol lo, na gavman i bihainim ol senis Sisar Ogastus i bin kamapim na dispela i mekim na olgeta lo samting i bosim sindaun bilong ol man na ol pasin ol i mas bihainim i kamap gutpela moa. Tasol Taiberius em i man bilong trik na giaman, olsem na saveman Tasitus i kolim em man bilong tupela maus, na man i save giaman na haitim pasin tru bilong em. Klostu long taim em i dai long Mas 37 C.E., ol man i tingim em olsem wanpela man i mekim hatpela wok bos.
15. Namel long 70 i go 130 C.E. samting, Rom i stap olsem wanem?
15 Ol senis bilong Taiberius i kamap olsem king bilong not em Sisar Gaius (Kaligula), Klodius 1, Niro, Vespesian, Taitus, Domisian, Nerva, Trejan, na Hadrian. Buk The New Encyclopædia Britannica i tok, “Ol senis bilong Ogastus i bihainim yet tingting em i bin kamapim bilong bosim ol samting na wokim ol samting, tasol ol i no kamapim planti nupela tingting long mekim ol wok na ol i mekim planti samting bilong pulim ai bilong ol man tasol.” Dispela buk i tok moa olsem: “Namel long 70 i go 130 C.E. samting, olgeta samting bilong Rom i stap gutpela tru na nambawan tru, na namba bilong ol man i stap aninit long Rom i go antap, winim ol narapela taim.” Tru, long dispela taim Rom i gat sampela hevi long boda bilong en, tasol em i no pait wantaim king bilong saut inap long 269 C.E. samting.
EM I LAIK PAIT LONG KING BILONG SAUT
16, 17. (a) Husat i kamap king bilong not olsem Daniel 11:25 i toktok long en? (b) Husat i kamap king bilong saut? Dispela samting i kamap olsem wanem?
16 Ensel bilong God i kamapim sampela tok moa bilong dispela tok profet. Em i tok: “Na em [king bilong not] bai kirapim strong bilong em na bel bilong em long pait long king bilong saut na em bai bungim bikpela lain ami; na king bilong saut tu, bel bilong em bai skrap long pait na em bai bungim bikpela na strongpela lain ami tru. Tasol em [king bilong not] i no inap sanap, long wanem, ol bai pasim tok bilong trikim na paulim em. Na ol man i kaikai ol gutpela kaikai bilong em ol yet bai i bagarapim em. Na lain ami bilong em bai i bagarap olsem wara i tait na i karim ol samting i go, na ol bai kilim i dai planti soldia.”—Daniel 11:25, 26, NW.
17 Klostu 300 yia bihain long taim Oktevian i bin daunim Isip na mekim i kamap wanpela provins bilong Rom, Orelian, empera bilong Rom, i kamap king bilong not. Orait long dispela taim, wanpela meri i stap olsem king bilong saut, em Kwin Septimia Senobia bilong taun Palmira, em Rom i bosim.a (Lukim “Senobia—Soldia Kwin Bilong Palmira,” long pes 252.) Ami bilong Palmira i go insait long Isip long 269 C.E. na ol i giaman na tok ol i helpim Rom long bosim dispela hap. Tasol Senobia i laik bai Palmira i kamap nambawan biktaun long hap is na em i laik bosim ol provins bilong Rom long dispela hap. Orelian i kirap nogut long tingting bilong Senobia, na em i “kirapim strong bilong em na bel bilong em” long pait long Senobia.
18. Wanem samting i kamap long pait namel long Empera Orelian, em king bilong not, na Kwin Senobia, em king bilong saut?
18 King bilong saut, em Senobia i makim, ‘bel bilong em i skrap’ long pait wantaim king bilong not na em i “bungim bikpela na strongpela lain ami tru” aninit long tupela jeneral, em Sabdas na Sabbai. Tasol Orelian i kisim Isip na bihain em i go insait long Esia Maina na Siria. Senobia i lus long pait long Emesa (nau ol i kolim Homs), olsem na em i ranawe i go long Palmira. Taim ami bilong Orelian i banisim dispela taun, Senobia i pait strong long sakim ol, tasol em i no inap. Em wantaim pikinini man bilong em i laik ranawe i go long Persia, tasol ol Rom i holim tupela long wara Yufretis. Long 272 C.E., ol Palmira i givim biktaun bilong ol long han bilong birua. Orelian i no kilim i dai Senobia, tasol em i mekim Senobia i kamap olsem nambawan samting bilong soim long ol man taim em i wokabaut wantaim ami bilong em long ol rot bilong Rom olsem lain bilong winim pait, long 274 C.E. I go inap long taim em i dai, Senobia i stap olsem wanpela meri Rom i gat nem.
19. Olsem wanem ol man i bin “trikim na paulim” Orelian na em i bagarap?
19 Orelian yet ‘i no inap sanap, long wanem, ol i pasim tok bilong trikim na paulim em.’ Long 275 C.E., em i go bilong pait wantaim ol Persia. Taim em i wet i stap long Tres bilong brukim solwara na i go long Esia Maina, “ol man i kaikai ol gutpela kaikai bilong em” ol i trikim na paulim em, na ol i “bagarapim em.” Em i laik kotim Eros, kuskus bilong em, long sampela samting em i no mekim stret. Tasol Eros i raitim wanpela lista i gat nem bilong ol ofisa long en na em i giaman na tok Orelian i bin raitim, na em bai kilim i dai ol ofisa nem bilong ol i stap long lista. Ol dispela ofisa i lukim nem bilong ol i stap long lista na dispela i kirapim ol long pasim tok bilong kilim Orelian i dai, na ol i mekim olsem.
20. Olsem wanem “ami” bilong king bilong not “i bagarap olsem wara i tait na i karim ol samting i go”?
20 Wok bilong king bilong not i no pinis taim Empera Orelian i dai. Sampela empera moa bilong Rom i kamap bihain long en. Inap sampela hap taim i gat wanpela empera bilong Rom i bosim hap wes na wanpela empera i bosim hap is. Long dispela taim i olsem “ami” bilong king bilong not i “bagarap olsem wara i tait na i karim ol samting i go,” o “tromoim nabaut,”b na planti ol i “dai,” long wanem, ol lain Jeman i lusim hap not na kam pait long Rom. Long ol yia namel long 300 na 400 C.E., ol Got i wok long brukim ol boda bilong Rom. Ol i mekim olsem long olgeta taim. Long 476 C.E., Odoaser, lida bilong Jemani, i rausim laspela empera bilong Rom. Bihain liklik long yia 500 C.E., Gavman Rom long hap wes i bagarap olgeta, na ol king bilong Jemani i bosim Inglan, Gol, Itali, Not Afrika, na Spen. Hap is bilong Gavman Rom i stap inap long 1450 C.E. samting.
BIKPELA GAVMAN I BRUK NABAUT
21, 22. Konstantin i kamapim wanem ol senis long 313 C.E. na bihain long en?
21 Ensel bilong Jehova i no stori long olsem wanem Gavman Rom i bagarap insait long planti handet yia, tasol em i tok profet moa long ol samting king bilong not na king bilong saut i mekim. Tasol sapos yumi skelim sampela samting i bin kamap long Gavman Rom, dispela bai helpim yumi long save husat i king bilong not na king bilong saut long bihain.
22 Long 313 C.E. Empera Konstantin bilong Rom i tok na gavman i orait long lotu Kristen, em ol i tromoim pinis bilip tru. Long 325 C.E. em i bosim wanpela bikpela kibung bilong lotu “Kristen” long Naisia, Esia Maina. Bihain, Konstantin i lusim Rom na makim Baisantiam o Konstantinopel long kamap nambawan biktaun bilong em, olsem senis bilong Rom. Orait Gavman Rom i stap aninit long wanpela empera tasol i go inap long i dai bilong Empera Tiodosius 1, long Janueri 17, 395 C.E.
23. (a) Bihain long i dai bilong Tiodosius, Gavman Rom i bruk olsem wanem? (b) Gavman Rom Bilong Is i pinis long wanem taim? (c) Husat i kirap bosim Isip long 1517?
23 Bihain long i dai bilong Tiodosius, ol i brukim Gavman Rom na tupela pikinini man bilong em i bosim. Honorius i kisim hap bilong wes, na Arkadius i kisim hap bilong is, em Konstantinopel i nambawan biktaun bilong en. Inglan, Gol, Itali, Spen, na Not Afrika em sampela provins bilong hap wes. Masedonia, Tres, Esia Maina, Siria, na Isip em ol provins bilong hap is. Long 642 C.E., ol Sarasen (lain Arap) i pait na kisim nambawan biktaun bilong Isip, em Aleksandria, na Isip i kamap wanpela provins bilong ol hetman bilong Islam. Long Janueri 1449, Konstantin 11 i kamap laspela empera bilong hap is. Ol Otoman bilong Turki, em King Mehmed 2 i bosim, ol i pait na kisim Konstantinopel long Me 29, 1453, na dispela i pinisim Gavman Rom Bilong Is. Long yia 1517 Isip i kamap wanpela provins bilong Turki. Tasol bihain, dispela kantri bipo em i bilong king bilong saut, em bai stap aninit long narapela strongpela gavman bilong hap wes.
24, 25. (a) Olsem sampela saveman i tok, wanem samting i makim kirap bilong Gavman Holi Bilong Rom? (b) Bihain, wanem samting i kamap long dispela biknem “empera” bilong Gavman Holi Bilong Rom?
24 Long hap wes bilong Gavman Rom i gat bisop Katolik bilong Rom i kamap, wanpela em Pop Leo 1 (400-461 C.E.), em i gat nem olsem man i strong long mekim wok long namba bilong em olsem pop. Bihain, pop yet i kirap makim husat bai kamap empera bilong hap wes bilong Gavman Rom. Dispela samting i bin kamap long Rom long de Krismas bilong 800 C.E., taim Pop Leo 3 i makim Sals (Salemein) King bilong Frank i kamap empera bilong Gavman Rom Bilong Wes. Dispela i bin kirapim gen wok empera bilong Rom, na sampela saveman i tok, dispela i makim kirap bilong Gavman Holi Bilong Rom. Kirap long dispela taim i gat Gavman Bilong Is na Gavman Holi Bilong Rom i stap long hap wes, na tupela wantaim i tok ol i Kristen.
25 Orait bihain, ol senis bilong Salemein ol i no mekim gut wok king bilong ol. Na inap long sampela hap taim i no gat wanpela man i holim namba olsem empera. Long dispela taim, King Oto 1 bilong Jemani i kisim na bosim bikpela hap bilong not na sentral Itali. Em i makim em yet olsem king bilong Itali. Long Februeri 2, 962 C.E., Pop Jon 12 i makim Oto 1 olsem empera bilong Gavman Holi Bilong Rom. Nambawan biktaun bilong en i stap long Jemani, na ol empera ol i bilong Jemani, na klostu olgeta man ol i bosim, ol tu i bilong Jemani. Faiv handet yia bihain famili Hapsbek bilong Ostria i kisim dispela biknem “empera,” na ol i holim dispela biknem i go inap long taim Gavman Holi Bilong Rom i laik pinis.
YUMI INAP LUKSAVE LONG TUPELA KING
26. (a) Gavman Holi Bilong Rom i pinis olsem wanem? (b) Husat i kamap king bilong not?
26 Taim Napoleon 1 i winim ol pait long Jemani long 1805, em i no laik daun long Gavman Holi Bilong Rom, na dispela i mekim na Gavman Holi Bilong Rom i pundaun long 1805. Empera Fransis 2 em i no inap pait na holim yet biknem olsem empera bilong Gavman Holi Bilong Rom, olsem na long Ogas 6, 1806, em i lusim dispela biknem na em i stap king bilong Ostria tasol. Olsem na Gavman Holi Bilong Rom i pinis 1,006 yia bihain long taim Leo 3, wanpela pop bilong Misin Katolik, na Salemein, wanpela king bilong ol Frank i bin kamapim. Long 1870, Rom i kamap nambawan biktaun bilong kantri Itali, na Vatiken i no bosim. Orait long yia bihain, wanpela gavman Jeman i kamap na ol i makim Wilhelm 1 i stap king o kaiser bilong en. Olsem na king bilong not long taim bilong yumi—em Jemani—i kamap.
27. (a) Isip i kam aninit long lukaut bilong Inglan olsem wanem? (b) Husat i kamap king bilong saut?
27 Tasol king bilong saut long nau i husat? Ol samting i bin kamap i soim yumi olsem Inglan i bin kamap wanpela strongpela gavman kirap long 1600 samting. Napoleon 1 i laik bagarapim rot bilong Inglan long baim na salim kago i go i kam long ol narapela kantri, olsem na em i pait na kisim Isip long 1798. Bikpela pait i kirap, na Inglan i bung wantaim gavman Otoman na ol i pait wantaim Frans na Frans i mas lusim Isip, em king bilong saut long bipo, taim dispela pait namel long king bilong not na saut i bin kirap nupela. Kirap long dispela taim na i go, strong bilong Inglan long bosim Isip i go bikpela. Orait, bihain long 1882 Inglan i bosim tru Isip. Taim Namba Wan Pait i kirap long 1914, Turki i kisim Isip na i gat wanpela gavena i bosim. Tasol Turki i helpim Jemani long pait, olsem na Inglan i rausim dispela gavena na em i tokaut olsem Isip i stap aninit long lukaut bilong en. Isi isi Inglan na Amerika i wok long pas gut wantaim na ol i kamap Gavman Inglan-Amerika. Tupela wantaim i kamap olsem king bilong saut.
[Ol Futnot]
a Dispela tupela tok olsem “king bilong not” na “king bilong saut,” ol i olsem biknem, olsem na em inap makim wanpela king, o wanpela kwin, o sampela kantri i wok bung wantaim olsem wanpela gavman.
b Lukim sta daunbilo bilong Daniel 11:26 long Baibel New World Translation of the Holy Scriptures—With References, em Sosaiti Wastaua Bilong Nu Yok i wokim.
YU BIN KISIM WANEM SAVE?
• Wanem empera bilong Rom i bin kamap king bilong not pastaim? Em i “salim wanpela man i go kisim takis” long wanem taim?
• Husat i kamap king bilong not bihain long Ogastus? ‘Lida bilong kontrak i bagarap’ olsem wanem?
• Wanem samting i kamap long pait namel long Orelian, em king bilong not, na Senobia, em king bilong saut?
• Wanem samting i painim Gavman Rom? Long 1900 wanem ol gavman i stap olsem king bilong not na king bilong saut?
[Blok/Piksa long pes 248-251]
WANPELA OL I GIVIM BIKNEM LONG EM, NARAPELA EM I MAN NOGUT TRU
WANPELA i mekim na wanpela gavman ripablik i gat planti hevi i kamap wanpela strongpela gavman i bosim graun. Narapela i mekim na insait long 23 yia mani samting bilong gavman i kamap planti tru. Ol i litimapim nem bilong wanpela taim em i dai, tasol narapela ol i no laikim tru em. Dispela tupela man i bin i stap empera taim Jisas i stap long graun na mekim wok autim tok. Ol i husat? Na bilong wanem ol i givim biknem long wanpela, tasol narapela nogat?
“OL I BIN WOKIM ROM LONG OL BRIK, TASOL MI WOKIM GEN LONG MABEL”
Long 44 B.C.E. taim ol man i kilim i dai Julius Sisar, tumbuna pikinini bilong susa bilong em, em Gaius Oktevian, i gat 18 krismas tasol. Julius Sisar i bin adoptim em na em i bilong kisim olgeta samting bilong namba wan pikinini, olsem na yangpela Oktevian i go wantu long Rom bilong kisim ol samting Julius Sisar i bin makim bilong em. Long Rom em i bungim wanpela strongpela birua—em namba wan ofisa bilong Sisar, Mak Antoni, em i ting em bai kisim olgeta samting bilong namba wan pikinini. Em nau, inap 13 yia ol i mekim kain kain pasin trik bilong politik na ol i resis long kisim wok gavman.
Oktevian i pait na winim ami bilong Kwin Kliopatra bilong Isip wantaim ami bilong boipren bilong em Mak Antoni long 31 B.C.E., na em wanpela i bosim Gavman Rom. Long yia bihain Antoni na Kliopatra i kilim i dai ol yet, na Oktevian i kisim Isip. Orait, dispela i pinisim laspela hap bilong Gavman Grik, na nau Rom i kamap nambawan strongpela gavman long graun.
Oktevian i save olsem Julius Sisar i bin mekim hatpela pasin long bosim ol man na ol i kilim em i dai, olsem na em i no laik mekim wankain popaia. Ol Rom i laikim wanpela gavman ripablik, olsem na Oktevian i haitim wok king bilong em na em i kamapim wanpela gavman i luk olsem gavman ripablik. Em i no laik kisim biknem olsem “king” o “dikteta.” Na tu, em i tokaut olsem em i laik larim Palamen bilong Rom i bosim olgeta provins na em bai lusim ol wok gavman em i holim. Dispela tingting bilong em i wok gut. Palamen i bel gut long Oktevian na ol i tokim em long holim yet ol wok gavman em i mekim na bosim yet sampela provins.
Long Janueri 16, 27 B.C.E., Palamen i givim Oktevian biknem “Ogastus,” i olsem “I Gat Biknem, Holi.” Na Oktevian i givim nem bilong em yet long wanpela mun bilong yia na rausim wanpela de long Februeri na bungim wantaim ol de bilong Ogas bambai namba bilong ol de insait long Ogas i wankain olsem Julai, em mun ol i putim nem bilong Julius Sisar long en. Olsem na Oktevian i kamap namba wan empera bilong Rom na bihain ol man i kolim em Sisar Ogastus. Bihain em i kisim biknem “pontifeks maksimus” (hetpris), na long 2 B.C.E.—em yia mama i karim Jisas—Palamen i givim em biknem Pater Patriae, olsem “Papa Bilong Kantri Bilong Em.”
Long dispela yia yet, “Sisar Ogastus i putim wanpela lo long ol i mas kisim nem bilong olgeta manmeri. . . . Olsem na olgeta manmeri i go long as ples bilong ol, bai gavman i ken kisim nem bilong ol.” (Luk 2:1-3) Dispela lo i mekim na mama i karim Jisas long Betlehem, na dispela i truim tok profet bilong Baibel.—Daniel 11:20; Maika 5:2.
Long gavman bilong Ogastus ol man i save bihainim stretpela pasin liklik na mani bilong gavman i gat strong. Na tu em i kamapim gutpela rot bilong kisim na salim ol pas na wokim ol rot na ol bris. Em i stretim gut ol samting bilong ami, na kamapim wanpela nevi, na kamapim wanpela lain soldia bilong lukautim haus bilong Sisar. (Filipai 1:13) Aninit long lukaut bilong Ogastus ol man bilong raitim buk olsem Vejil na Horas ol i mekim gutpela wok tru, na ol man bilong sapim piksa long ston ol i wokim ol piksa samting i naispela tru. Ogastus i pinisim sampela haus samting Julius Sisar i no bin pinisim na em i stretim planti tempel. Em i kamapim wanpela hap taim ol i kolim Pax Romana (“Gutaim Bilong Ol Rom”) na dispela hap taim i stap olsem 200 yia samting. Long Ogas 19, 14 C.E., taim em i gat 76 krismas, em i dai na bihain ol i mekim em i kamap olsem wanpela god.
Ogastus i hambak na tok, “Ol i bin wokim Rom long ol brik, tasol mi wokim gen long mabel.” Em i no laik bai Rom i gat planti hevi olsem bipo, olsem na em i laik skulim gut senis bilong em. Tasol em i no inap makim husat em i laikim bilong senisim em. Pikinini man bilong brata bilong em, na tupela tumbuna pikinini, na man bilong pikinini meri bilong em, na pikinini man bilong meri bilong em, olgeta dispela man ol i dai pinis, na Taiberius, em pikinini man bilong namba 3 meri bilong em, em tasol i stap bilong senisim Ogastus.
“NARAPELA EM I MAN NOGUT TRU”
Wanpela mun bihain long i dai bilong Ogastus, Palamen bilong Rom i makim Taiberius—em i gat 54 krismas—long kamap empera. Taiberius i bosim gavman i go inap long Mas 37 C.E. Olsem na em i stap empera bilong Rom taim Jisas i mekim wok bilong em long autim tok.
Taim Taiberius i stap empera em i gat sampela gutpela pasin na sampela pasin nogut. Wanpela gutpela pasin bilong em i olsem, em i no laik baim ol gutpela samting bilong skin em i no gat wok long en. Olsem na gavman i gat planti mani na taim hevi i kamap em i gat mani bilong helpim ol man i bungim taim nogut. Taiberius i save em i wanpela man tasol, na em i no kisim ol biknem, na em i tokim ol man long lotuim Ogastus olsem empera—em yet nogat. Em i no putim nem bilong em long wanpela mun olsem Ogastus na Julius Sisar i bin mekim, na tu, em i no larim ol narapela i mekim olsem bilong givim biknem long em.
Tasol ol pasin nogut bilong Taiberius i winim ol gutpela pasin bilong em. Em i save saspek nating long ol man na bihainim pasin bilong tupela maus, na em yet i tok na ol soldia i kilim i dai planti man—planti bilong ol em pastaim ol i pren bilong em. I gat wanpela lo i tok man i no ken mekim tok birua na pasin birua long empera o gavman, na Taiberius i skruim dispela lo i go moa na i tok man i no ken mekim kain tok i daunim empera liklik. Ating long strong bilong dispela lo tasol, ol Juda i subim Gavena Pontius Pailat long kilim i dai Jisas.—Jon 19:12-16.
Taiberius i laik bai ol soldia bilong lukautim haus bilong Sisar i mas sindaun klostu tru long Rom, olsem na em i wokim ol strongpela haus bilong ol ausait long banis long hap not bilong taun. Dispela lain soldia i stap bilong pretim Palamen bilong Rom, nogut ol i laik daunim strong na namba bilong em, na tu, ol soldia inap pasim ol manmeri i laik bikhet long gavman. Taiberius i kirapim ol man long kamapim long gavman ol man i gat tingting long biruaim gavman, na klostu long pinis bilong wok king bilong em, em i bihainim ol pasin i save pretim tru ol man.
Klostu long taim Taiberius i dai, ol man i ting em i wanpela man nogut. Na taim em i dai ol manmeri bilong Rom ol i amamas, na Palamen i no laik makim em olsem wanpela god. Olsem na long dispela as yumi inap luksave olsem ol samting Taiberius i mekim i truim dispela tok profet i tok olsem wanpela “man nogut tru” bai kamap ‘king bilong not.’—Daniel 11:15, 21.
YU BIN KISIM WANEM SAVE?
• Oktevian i kamap namba wan empera bilong Rom olsem wanem?
• Gavman bilong Ogastus i bin mekim wanem ol gutpela wok?
• Wanem ol gutpela pasin na ol pasin nogut bilong Taiberius?
• Olsem wanem Taiberius i truim tok profet i stori long wanpela “man nogut tru”?
[Piksa]
Taiberius
[Blok/Ol Piksa long pes 252-255]
SENOBIA—SOLDIA KWIN BILONG PALMIRA
“SKIN bilong em i braunpela liklik . . . na tit bilong em i wait olsem pel, na ai bilong em i blakpela na i lait olsem paia na em i gat naispela pasin. Nek bilong em i strong na i gat naispela krai bilong en. Em i save long tingting bilong ol man na dispela save i go bikpela long rot bilong stadi. Em i save gut long tok Latin, tok Grik, tok Siria, na ol tok ples bilong Isip.” Saveman Edward Gibbon i mekim ol dispela tok bilong litimapim nem bilong Senobia—em soldia kwin bilong Palmira long Siria.
Man bilong Senobia em Odinatus, wanpela bikman bilong Palmira. Em i kisim namba olsem nambawan majistret long 258 C.E., long wanem, long nem bilong Gavman Rom em i bin pait na winim Persia. Tupela yia bihain Empera Galienus i givim biknem corrector totius Orientis (gavena bilong hap Is olgeta) long em. Galienus i mekim olsem, long wanem, Odinatus i bin pait na winim King Sepor 1 bilong Persia. Bihain, Odinatus i givim wanpela biknem long em yet, em “king bilong ol king.” Ating gutpela tingting na strong bilong Senobia i helpim Odinatus na em i winim ol dispela pait.
SENOBIA I LAIK KAMAPIM STRONGPELA GAVMAN
Long 267 C.E., taim Odinatus i gat bikpela namba, ol i kilim em i dai wantaim pikinini man bilong em. Senobia i kisim ples bilong man bilong em, long wanem, pikinini man bilong Senobia i yangpela tumas. Senobia i gat naispela skin, na em i strong long kisim namba, na em i save gut long wok bos, long wanem, em i bin mekim wok wantaim man bilong em, na em i save gut long planti tok ples, olsem na ol manmeri em i bosim ol i rispektim em na helpim em. Senobia i gat bikpela laik long kisim save na em i save bung wantaim ol saveman. Wanpela saveman bilong givim tingting long em, em Kasius Longinus. Sampela i tok save bilong dispela man i bikpela olsem save i stap insait long ol buk long wanpela haus laibreri na haus tumbuna. Long wanpela buk (Palmyra and Its Empire—Zenobia’s Revolt Against Rome) Richard Stoneman i bin raitim, i tok: “Insait long 5-pela yia bihain long taim Odinatus i dai . . . , long tingting bilong ol man Senobia i kamap olsem kwin bilong Is.”
Long wanpela boda bilong kantri Senobia i bosim i gat Persia i stap, em Senobia na man bilong em ol i bin daunim strong bilong en, na long narapela boda i gat Rom i stap, na Rom i wok long bagarap. Saveman J. M. Roberts i stori long Gavman Rom long dispela taim, olsem: “Kirap long 200 C.E. samting i go inap long 300 C.E., em taim nogut tru bilong Rom. Long hap bilong is na bilong wes i gat hevi. Na pait i kamap insait long lain Rom, na tok pait i kamap long husat bai kamap empera bihain long narapela. Inap 22 empera (ol giaman empera, ol i no insait long dispela namba) ol i kamap insait long dispela taim.” Tasol dispela meri Siria i holim strong namba bilong em na em wanpela i bosim hap bilong em. Stoneman i tok: “Em i holim strong bilong bosim bikpela hap bilong tupela gavman [Persia na Rom], olsem na em inap kamapim namba 3 gavman bilong bosim dispela tupela gavman olgeta.”
Long yia 269 C.E., rot i op bilong Senobia i ken skruim ol hap em i bosim i go bikpela taim wanpela king giaman i save kros long wok bos bilong Rom em i kamap king long Isip. Kwiktaim ami bilong Senobia i go long Isip na daunim dispela bikhetman, na em i kirap bosim Isip. Senobia i makim em yet olsem kwin bilong Isip, na em i wokim mani i gat nem bilong em long en. Nau ol hap Senobia i bosim i kirap long wara Nail na i go inap long wara Yufretis. Long dispela taim, Senobia i kamap “king bilong kantri bilong hap Saut.”—Daniel 11:25, 26.
NAMBAWAN BIKTAUN BILONG SENOBIA
Senobia i strongim na bilasim gut Palmira, na Palmira i kamap wankain olsem ol narapela biktaun bilong ol Rom. Namba bilong ol man i sindaun long dispela biktaun i winim 150,000. Ol gutpela gutpela haus, ol tempel, ol gaden, ol traipela pos, na ol bikpela ston i gat rait long en, ol i pulap long dispela biktaun, em banis i raunim. Banis i raunim taun em i longpela olsem 21 kilomita. Inap 1,500 traipela pos ston long stail bilong ol Korin i lain i stap, em longpela bilong ol inap 15 mita, na ol i sanap arere long nambawan bikrot. Long dispela biktaun i gat planti piksa ol i bin sapim, em piksa bilong ol man i gat nem, na ol maniman. Long yia 271 C.E., Senobia i sanapim 2-pela piksa, narapela i makim em yet na narapela i makim man bilong em i dai pinis.
Wanpela gutpela haus tru long Palmira em Tempel Bilong San, na ating em i bikpela samting bilong lotu bilong ol man long dispela biktaun. Ating Senobia tu i bin lotu long wanpela god i olsem god bilong san. Tasol namel long 200 C.E. i go inap long 300 C.E., Siria em ples bilong planti lotu. Long hap Senobia i bosim i gat ol man i tok ol i Kristen, ol Juda, na ol man i save lotu long san na mun. Senobia i gat wanem tingting long ol dispela narapela narapela pasin bilong lotu? Stoneman i tok: ‘Kwin i gat gutpela tingting, olsem em i no ken sakim ol pasin tumbuna i stret long lain bilong em. Em i ting dispela i mekim na ol god i helpim Palmira.’ I luk olsem Senobia i orait long ol narapela lotu.
Pasin bilong Senobia i mekim na planti manmeri i laikim em. Tasol nambawan bikpela samting Senobia i mekim i olsem: Em i makim wanpela lain politik em tok profet bilong Daniel i stori long en. Senobia i mekim wok kwin inap 5-pela yia tasol. Empera Orelian bilong Rom i pait na winim Senobia long 272 C.E. na bihain ol i kisim ol samting bilong Palmira na bagarapim tru dispela taun na ol i no inap stretim bek. Orelian i no kilim i dai Senobia. Ol i tok Senobia i bin maritim wanpela memba bilong palamen long Rom na em i no holim wanpela wok.
YU BIN KISIM WANEM SAVE?
• Ol man i tok wanem long pasin bilong Senobia?
• Kolim sampela samting Senobia i bin mekim.
• Senobia i gat wanem tingting long ol narapela narapela lotu?
[Piksa]
Kwin Senobia i givim tok long ol soldia bilong em
[Sat/Ol Piksa long pes 246]
OL KING LONG DANIEL 11:20-26
King King
Bilong Not Bilong Saut
Daniel 11:20 Ogastus
Daniel 11:21-24 Taiberius
Daniel 11:25, 26 Orelian Kwin Senobia
Olsem tok profet Gavman Inglan,
i makim, Gavman Jeman na bihain
Rom i bruk na Gavman
ol dispela gavman Inglan-Amerika
i kamap
[Piksa]
Taiberius
[Piksa]
Orelian
[Piksa]
Piksa bilong Salemein
[Piksa]
Ogastus
[Piksa]
Sip bilong pait bilong Inglan, bilong 1600 samting
[Piksa i karamapim pes olgeta long pes 230]
[Piksa long pes 233]
Ogastus
[Piksa long pes 234]
Taiberius
[Piksa long pes 235]
Lo bilong Ogastus i mekim na Josep wantaim Maria i mas i go long Betlehem
[Piksa long pes 237]
Olsem tok profet i makim, Jisas i “bagarap” olsem em i dai
[Ol Piksa long pes 245]
1. Salemein 2. Napoleon 1 3. Wilhelm 1 4. Ol soldia Jeman, Namba Wan Pait