Sapta 15

Tupela King i Kamkamap Long Taim Bilong Yumi

 1. Wanpela saveman i tok wanem ol kantri i go pas long Yurop namel long 1800 i go inap long 1900?

“KIRAP long 1800 i go inap long 1900 ol senis i kamap long hap bilong Yurop i narapela kain tru, winim ol narapela taim bipo.” Saveman Norman Davies i tok olsem. Na em i tok moa olsem: “Yurop i gat bikpela strong, winim ol narapela taim bipo: strong bilong kamapim ol nupela samting, strong bilong wok bisnis, strong bilong senisim ol samting long sindaun bilong ol, strong namel long ol kantri.” Davies i tok: “Ol kantri i go pas long dispela ‘taim bilong strong’ long Yurop, pastaim em Inglan . . . na bihain, kirap long 1870 samting, em Jemani.”

“TINGTING BILONG TUPELA BAI I NOGUT”

 2. Taim yia 1900 i laik kamap, husat i stap ‘king bilong not’ na ‘king bilong saut’?

² Klostu long taim yia 1900 i laik kamap, Gavman Jemani i stap ‘king bilong not’ na Inglan i stap ‘king bilong saut.’ (Daniel 11:​14, 15) Ensel bilong Jehova i tok: “Bihain dispela tupela king bai i sindaun wantaim na kaikai. Tasol tingting bilong tupela bai i nogut na tupela bai i mauswara na mekim planti tok giaman long tupela yet. Na samting tupela i laik mekim tupela bai i no inap long mekim. Long wanem, taim God i makim bilong mekim ol dispela samting i no kamap yet.”​—Daniel 11:27.

3, 4. (a) Husat i kamap namba wan empera bilong Gavman Jeman? Ol i kamapim wanem kontrak? (b) Kaiser Wilhelm i bin bihainim wanem pasin?

³ Long Janueri 18, 1871, Wilhelm 1 i kamap namba wan empera bilong Gavman Jemani. Em i makim Otto von Bismarck long stap hetman. Bismarck i tingting strong long mekim dispela nupela gavman i kamap gutpela, olsem na em i wok long abrusim ol pait samting wantaim ol narapela kantri, na em i wokim wanpela kontrak (Triple Alliance) wantaim Ostria-Hangari na Itali bambai 3-pela kantri i ken wok wantaim. Tasol i no longtaim na laik bilong nupela king bilong not i pait wantaim laik bilong king bilong saut.

⁴ Taim Wilhelm 1 na senis bilong em Frederick 3 i dai long 1888, Wilhelm 2, em i gat 29 krismas, i kamap king. Wilhelm 2, olsem Kaiser Wilhelm, i subim Bismarck long lusim wok na em i kirap bihainim wanpela pasin bambai namba bilong Jemani long bosim ol samting i ken go bikpela long olgeta hap. Wanpela saveman i tok: “Taim Wilhelm 2 i bosim Jemani, Jemani i kisim pasin hambak na pasin bilong kros na pait.”

 5. Olsem wanem tupela king i “sindaun wantaim”? Ol i mekim wanem kain tok taim ol i sindaun wantaim?

⁵ Long ples Heig, Netelan, long Ogas 24, 1898, King Nicholas 2 bilong Rasia i singautim ol bikman bilong ol narapela narapela kantri long kam long wanpela kibung bilong kamapim bel isi namel long ol kantri. Bel na tingting bilong ol bikman long dispela kibung i no stap isi. Long dispela kibung na long narapela i kamap long 1907 ol i kamapim Kot Bilong Abitresen long ples Heig. Gavman Jeman na Inglan ol i kamap memba bilong dispela kot, na long skin i luk olsem ol i laikim pasin bilong i stap bel isi wantaim. I olsem tupela “i sindaun wantaim,” olsem ol i pren wantaim, tasol ‘tingting bilong tupela i nogut.’ Pasin bilong ol man politik long “mauswara na mekim planti tok giaman” i no inap kamapim bel isi tru. Ol samting ol i laik mekim long wok politik, wok bisnis, na wok ami ol “i no inap long mekim,” long wanem, taim Jehova i makim bilong pinisim dispela tupela king “i no kamap yet.”

EM I LAIK BAGARAPIM “KONTRAK HOLI”

6, 7. (a) King bilong not i “go bek long kantri bilong en” olsem wanem? (b) King bilong saut i mekim wanem taim king bilong not i kamapim wanpela strongpela gavman bambai em i ken surikim mak bilong graun bilong en i go bikpela na em i ken bosim planti hap moa?

⁶ Ensel bilong God i stori moa olsem: “Na king bilong kantri bilong hap not bai i karim olgeta samting [“planti samting,” NW ] em i bin kisim long pait, na em bai i go bek long kantri bilong en. Em bai i tingting strong long bagarapim lotu bilong ol manmeri bilong God [olsem “kontrak holi,” NW ]. Na olgeta samting em i laik mekim em bai i mekim tasol, na bihain em bai i go bek long kantri bilong em yet.”​—Daniel 11:28.

⁷ Kaiser Wilhelm i bin go bek long “kantri bilong en,” olsem em i mekim wankain pasin olsem king bilong not bilong bipo bipo i bin mekim. Em i mekim olsem wanem? Em i kamapim wanpela strongpela gavman bambai em i ken surikim mak bilong graun bilong Gavman Jeman i go bikpela na em i ken bosim planti hap. Wilhelm 2 i wok long kisim sampela hap graun long Afrika na long sampela narapela hap tu. Em i laik winim nevi bilong Inglan, olsem na em i kirap long kamapim wanpela strongpela nevi. Wanpela buk (The New Encyclopædia Britannica) i tok: “Pastaim nevi bilong Jemani em i liklik tru, tasol insait long 10-pela yia em i kamap bikpela tru​—nevi bilong Inglan tasol i winim em.” Inglan i laik bai nevi bilong en i ken i stap nambawan, olsem na em i mas kirap wokim sampela sip moa. Na tu, Inglan i wokim wanpela kontrak (Triple Entente) bilong i stap pren na wok wantaim Frans na Rasia. Nau Yurop i bruk long tupela lain bilong pait​—Jemani, Ostria-Hangari, na Itali long wanpela lain na Inglan, Frans, na Rasia long narapela.

 8. Olsem wanem Gavman Jeman i gat “planti samting”?

⁸ Gavman Jeman i bihainim strongpela pasin long bosim ol samting, na long dispela rot em i kisim “planti samting,” long wanem, Jemani em i nambawan kantri bilong dispela 3-pela kantri i wok wantaim. Ostria-Hangari na Itali ol i Katolik. Olsem na pop i orait long dispela tripela gavman, tasol king bilong saut na 2-pela narapela kantri i wok wantaim em, ol i no Katolik, na pop i no orait long ol.

 9. Olsem wanem bel bilong king bilong not i tingting strong long bagarapim “kontrak holi”?

⁹ Olsem wanem long ol manmeri bilong Jehova? Inap longpela taim ol i bin tokaut olsem ‘taim bilong ol arapela lain man’ bai pinis long 1914.a (Luk 21:24) Long 1914, Kingdom bilong God long han bilong Jisas Krais, em senis bilong King Devit, i kamap long heven. (2 Samuel 7:​12-16; Luk 22:​28, 29) Long Mas 1880, nius Wastaua i bin stori long wok bos bilong Kingdom bilong God na pinis bilong ‘taim bilong ol arapela lain man,’ olsem tupela samting bai kamap long wankain taim. Tasol bel bilong king bilong not, em Jemani, i tingting strong long bagarapim ‘kontrak holi bilong Kingdom.’ Kaiser Wilhelm i no daun long wok bos bilong Kingdom, olsem na ‘em i mekim samting em i laik mekim,’ bambai em i ken bosim graun olgeta. Tasol taim em i mekim olsem, em i mekim ol samting i kirapim Namba Wan Pait.

KING I “PUNDAUN” LONG PAIT

10, 11. Namba Wan Pait i kirap olsem wanem? Olsem wanem dispela i kamap “long taim God i makim”?

¹⁰ “Long taim God i makim, king bilong kantri bilong hap not bai i go . . . na pait long kantri bilong hap saut gen, tasol em bai i no inap winim [em] olsem bipo.” (Daniel 11:29) “Taim God i makim” bilong pinisim wok bilong ol narapela lain long bosim graun, dispela taim i kamap long 1914 taim em i kamapim Kingdom bilong heven. Long Jun 28, 1914, wanpela teroris bilong Serbia i bin kilim i dai Bikman Francis Ferdinand bilong Ostria na meri bilong em long Sarayevo, Bosnia. Dispela samting i kirapim Namba Wan Pait.

¹¹ Kaiser Wilhelm i strongim Ostria-Hangari long bekim pait long Serbia. Ostria-Hangari i save Jemani bai helpim ol, olsem na ol i tokaut long Julai 28, 1914, olsem ol bai pait long Serbia. Tasol Rasia i kam helpim Serbia. Taim Jemani i tokaut olsem em bai pait long Rasia, orait Frans (em i insait long kontrak wantaim Rasia) i helpim Rasia. Em nau, Jemani i tokaut olsem em bai pait long Frans. Bilong em i ken pait long Frans, Jemani i go insait long Beljam. Beljam i bin tokaut olsem em i no laik insait long dispela pait na Inglan i tok em bai helpim Beljam. Olsem na Inglan i tokaut olsem em bai pait long Jemani. Sampela narapela kantri i go insait long dispela pait, na Itali i lusim lain bilong Jemani na i go long lain bilong Inglan. Long taim bilong pait, Inglan i kisim na lukautim Isip bambai king bilong not i no ken pasim Sues Kanal na i go insait long Isip, bipo bipo em graun bilong king bilong saut.

12. Long taim bilong Namba Wan Pait, olsem wanem king bilong not “i no inap winim ol olsem bipo”?

¹² Wanpela buk (The World Book Encyclopedia) i tok: “Maski Inglan wantaim lain pren bilong en i bikpela na strongpela lain, i luk olsem Jemani bai winim pait.” Long ol narapela pait namel long tupela king, Gavman Rom, em king bilong not, i bin winim ol dispela pait. Tasol nau em “i no inap winim ol olsem bipo.” King bilong not i no winim dispela pait. Ensel i kamapim as bilong dispela samting na em i tok: “Ol sip bilong Kitim bai kam na pait long em, na em bai pundaun.” (Daniel 11:30a, NW ) Dispela “ol sip bilong Kitim” i makim wanem samting?

13, 14. (a) Ol “sip bilong Kitim” i pait long king bilong not, ol i makim wanem samting? (b) Taim pait i go yet, olsem wanem sampela sip moa bilong Kitim i kam insait long pait?

¹³ Long taim bilong Daniel, Kitim em i Saiprus. Klostu long kirap bilong Namba Wan Pait Inglan i kisim Saiprus. Na olsem wanpela buk (The Zondervan Pictorial Encyclopedia of the Bible) i tok, dispela nem Kitim “i makim ol kantri bilong Wes ol i gat ol sip.” Wanpela Baibel (New International Version) i tanim dispela tok “ol sip bilong Kitim” olsem “ol sip bilong hap bilong wes.” Long taim bilong Namba Wan Pait ol sip bilong Kitim em ol sip bilong Inglan i stap long solwara long hap wes bilong Yurop.

¹⁴ Dispela pait i go i go, na nevi bilong Inglan i kisim strong taim sampela sip moa bilong Kitim i kam helpim em. Long Me 7, 1915, klostu long nambis bilong Aialan, sabmarin U-20 bilong Jemani i sutim bom na bagarapim sip Lusitania, em i save karim ol manmeri i no insait long pait. Planti manmeri i dai na 128 bilong ol em ol manmeri bilong Amerika. Bihain, ol sabmarin bilong Jemani i raun na pait long solwara Atlantik. Orait, long Epril 6, 1917, Presiden Woodrow Wilson bilong Amerika i tokaut olsem Amerika bai pait long Jemani. Ol sip na ol soldia bilong Amerika i go insait long pait, olsem na king bilong saut​—nau em Gavman Inglan-Amerika​—em i pait tru wantaim king bilong not.

15. King bilong not i “pundaun” long wanem taim?

¹⁵ Gavman Inglan-Amerika i pait strong na king bilong not i “pundaun,” na long Novemba, 1918, em i tokaut olsem em i lus long pait. Wilhelm 2 i ranawe i go stap long Netelan, na Jemani i kamap wanpela ripablik. Tasol king bilong not i no pinis olgeta.

KING I “MEKIM TRU WOK BILONG EM”

16. Taim King bilong not i lus long pait, em i mekim wanem olsem tok profet i tok?

¹⁶ “Em bai i go bek na tromoi strongpela tok nogut long kontrak holi na mekim tru wok bilong em; na em i mas i go bek na tingim ol manmeri i bin lusim dispela kontrak holi.” (Daniel 11:30b, NW ) Ensel i tok profet olsem, na tok bilong em i kamap tru.

17. Wanem samting i opim rot bilong Adolf Hitler long kamap strong?

¹⁷ Pait i pinis long 1918, na Inglan wantaim Amerika na sampela kantri moa em ol i bin winim Jemani, ol i subim Jemani long sainim wanpela kontrak bilong sekan i kolim sampela strafe ol bai givim long Jemani. Ol Jeman i pilim olsem dispela strafe i strongpela tumas, na nupela gavman ripablik i no gat strong. Inap planti yia liklik i gat bikpela hevi i kamap long Jemani, na dispela bikpela hevi bilong mani i bin kamap long 1930 samting i mekim na i gat 6 milion man i no gat wok mani. Dispela i givim rot long Adolf Hitler long kamap strong, na long 1933 em i kamap bikman bilong Gavman Jeman na long yia bihain em i kisim namba olsem presiden bilong gavman. Ol Natsi i kolim dispela gavman Namba Tri Gavman Jeman (Third Reich).b

18. Hitler i “mekim tru wok bilong em” olsem wanem?

¹⁸ Taim Hitler i kirap bosim Jemani, kwiktaim em i kirap mekim nogut long “kontrak holi,” i makim ol brata bilong Jisas Krais em God i bin makim ol. (Matyu 25:40) Hitler i “mekim tru wok bilong em,” olsem em i mekim nogut tru long ol dispela Kristen i bin stap gut long God. Hitler i stiaim ol samting na bai ol wok bisnis na ol samting bilong politik i kamap gutpela, i olsem “em i mekim tru wok bilong em” long ol dispela samting tu. Insait long sotpela taim tasol Jemani i kamap wanpela strongpela gavman em ol narapela gavman i mas lukaut gut long en.

19. Hitler i laik bai sampela i helpim em, olsem na em i prenim husat?

¹⁹ Hitler i “tingim ol manmeri i bin lusim dispela kontrak holi.” Ol i husat? Em ol hetman bilong Kristendom tasol. Ol i tok ol i lain bilong God, tasol ol i no stap moa olsem ol disaipel bilong Jisas Krais. Hitler i singautim ol dispela hetman bilong misin ol “i bin lusim dispela kontrak holi” na bai ol i ken helpim em, na ol i mekim olsem. Em i wokim kontrak wantaim pop bilong Rom. Long 1935, Hitler i kamapim wanpela dipatmen bilong lukautim ol samting bilong lotu. Em i laik bai ol misin Evanjelikal i ken stap aninit long wok bos bilong gavman.

“OL SOLDIA” BILONG KING

20. King bilong not i yusim wanem “ol soldia”? Ol i pait long husat?

²⁰ I no longtaim na Hitler i kirapim pait, olsem ensel i tok profet: “Ol soldia bilong en bai i mekim haus bilong God i kamap doti long ai bilong God. Na bai ol i tambuim ol Israel long ol i no ken mekim ol ofa long God long olgeta de.” (Daniel 11:31a) “Ol soldia” i makim ami em king bilong not i yusim bilong pait wantaim king bilong saut long Namba Tu Pait. Long Septemba 1, 1939, “ol soldia” Natsi i go insait long Polan. Tupela de bihain, Inglan na Frans i mekim tokaut bilong kirapim pait long Jemani bilong helpim Polan. Olsem na Namba Tu Pait i kirap. Kwiktaim Jemani i winim Polan na i no longtaim na em i kisim Denmak, Nowe, Netelan, Beljam, Laksambek, na Frans. Buk The World Book Encyclopedia i tok: “Long pinis bilong 1941 Natsi Jemani i bosim bikpela hap bilong Yurop.”

21. Olsem wanem na taim nogut i painim king bilong not long Namba Tu Pait? Bihain wanem samting i kamap long dispela pait?

²¹ Maski Jemani i bin sainim wanpela kontrak wantaim Soviet Yunion (Rasia) long i stap pren na wok gut wantaim na ol i makim boda bilong graun bilong ol, Hitler i go insait long graun bilong ol Soviet long Jun 22, 1941. Dispela i mekim na Soviet Yunion i kirap helpim Inglan. Ami Soviet i pait strong, maski long kirap bilong pait Jemani i bin kisim bikpela hap graun bilong ol. Long Disemba 6, 1941, ami bilong Jemani i lus long pait long Mosko. Long de bihain, helpim bilong Jemani, em Japan, i tromoi ol bom long Pel Haba, Hawaii. Hitler i harim dispela na em i tok: “Nau yumi no inap lus long dispela pait.” Long Disemba 11, wantu Hitler i tokaut olsem Jemani bai pait long Amerika. Tasol em i no skelim gut strong bilong Soviet Yunion na Amerika. Ami Soviet i bekim pait long hap is na ol ami bilong Inglan na Amerika i wok long kam klostu long Jemani long hap wes, olsem na Hitler i wok long lus long pait. Jemani i wok long lusim planti hap graun. Hitler i kilim i dai em yet, na bihain Jemani i givim em yet long han bilong Inglan na Amerika long Me 7, 1945.

22. Olsem wanem king bilong not i “mekim haus bilong God i kamap doti” na ‘tambuim ol long mekim ofa long God long olgeta de’?

²² Ensel i tok “ol soldia bilong en [Hitler] bai i mekim haus bilong God i kamap doti long ai bilong God. Na bai ol i tambuim ol Israel long ol i no ken mekim ol ofa long God long olgeta de.” Long taim bilong ol Israel bilong bipo, haus bilong God i stap long Jerusalem, tasol taim ol i sakim Jisas, orait Jehova i givim baksait long ol wantaim tempel bilong ol. (Matyu 23:37–24:2) Kirap long taim bilong Jisas, tempel tru bilong Jehova em i samting bilong spirit, na rum tambu tru bilong en i stap long heven, na banis spirit bilong en i stap long graun na ol man God i makim ol, olsem ol brata bilong Hetpris Jisas, ol i stap long en na mekim wok. Kirap long 1935 samting, bikpela lain i lotu wantaim lain remnan em God i bin makim ol na i olsem ol i mekim wok long dispela “haus bilong God.” (KTH 7:​9, 15; 11:​1, 2; Hibru 9:​11, 12, 24) Long ol kantri dispela king bilong not i bosim, em i nogutim banis bilong dispela tempel long graun taim em i mekim nogut tru long lain remnan na ol wanwok bilong ol. Olsem na ol i no inap “mekim ol ofa long God long olgeta de,” olsem autim tok na litimapim nem bilong God long ples klia. (Hibru 13:15) Tasol maski ol i karim bikpela pen na hevi, ol Kristen God i bin makim wantaim “ol arapela sipsip” ol i mekim yet wok bilong autim tok long taim bilong Namba Tu Pait.​—Jon 10:16.

“OL I SANAPIM DISPELA SAMTING NOGUT TRU”

23. Long 66 C.E. “dispela samting nogut tru” em i wanem samting?

²³ Taim Namba Tu Pait i laik pinis, narapela samting i kamap olsem ensel bilong God i bin tok profet long en. “Bai ol i sanapim dispela samting nogut tru insait long haus bilong God.” (Daniel 11:31b) Jisas tu i bin stori long “dispela samting nogut tru.” Long 66 C.E. “dispela samting nogut tru” em i ami bilong Rom taim em i kam long Jerusalem bilong daunim ol Juda i bikhet long gavman.c​—Matyu 24:15; Daniel 9:27.

24, 25. (a) “Dispela samting nogut tru” em wanem samting long taim bilong yumi? (b) “Ol i sanapim dispela samting nogut tru” long wanem taim? Ol i mekim olsem wanem?

²⁴ Wanem “samting nogut tru” ol i bin “sanapim” long taim bilong yumi? Em i wanpela “samting nogut tru” i laik kisim ples bilong Kingdom bilong God. Pastaim dispela samting i olsem Lig ov Nesen, em dispela wel animal i bin go insait long hul i no gat as taim Namba Tu Pait i kirap, olsem em i no stap moa olsem oganaisesen bilong kamapim gutaim na bel isi. (KTH 17:8) Tasol dispela “wel animal” em “bai i lusim dispela hul.” Em i mekim olsem taim 50 kantri, wanpela bilong ol em Soviet Yunion bilong pastaim, ol i kamapim Yunaitet Nesen long Oktoba 24, 1945. Em nau, ol i sanapim “dispela samting nogut tru” em ensel i bin tok profet long en​—em Yunaitet Nesen.

²⁵ Jemani i bin stap olsem nambawan birua bilong king bilong saut long Namba Wan Pait na Namba Tu Pait na em i bin stap olsem king bilong not. Orait nau husat bai kamap king bilong not?

[Ol Futnot]

YU BIN KISIM WANEM SAVE?

• Long 1900, king bilong not na king bilong saut ol i husat?

• Samting i kamap long Namba Wan Pait long king bilong not, olsem wanem em i no “olsem bipo”?

• Bihain long Namba Wan Pait, olsem wanem Hitler i bin mekim Jemani i kamap wanpela strongpela gavman?

• Wanem samting i kamap long dispela resis namel long king bilong not na king bilong saut long taim bilong Namba Tu Pait?

[Sat/Ol Piksa long pes 268]

OL KING LONG DANIEL 11:​27-31

[Piksa]

Presiden Woodrow Wilson wantaim King George 5

[Piksa]

Ol i bin mekim nogut long planti Kristen long ol banis kalabus nogut

[Piksa]

Ol hetman bilong Kristendom i bin helpim Hitler

[Piksa]

Ka em Bikman Ferdinand i bin stap long en taim ol i kilim em i dai

[Piksa]

Ol soldia Jeman, Namba Wan Pait

[Piksa long pes 257]

Long Yalta long 1945, Praim Minista Winston Churchill bilong Inglan, Presiden Franklin D. Roosevelt bilong Amerika, na Bikman bilong ol Soviet, em Joseph Stalin, ol i pasim tok long bosim Jemani, na kamapim nupela gavman long Polan, na toktok long kamapim Yunaitet Nesen

[Ol Piksa long pes 258]

1. Bikman Ferdinand 2. Nevi bilong Jemani 3. Nevi bilong Inglan 4. Lusitania 5. Tokaut bilong Amerika long pait

[Ol Piksa long pes 263]

Taim helpim bilong Jemani, em Japan, i tromoi ol bom long Pel Haba Adolf Hitler i tingting strong olsem em bai winim pait