Sapta 4
Traipela Imis i Sanap na i Pundaun
1. Wanem as na yumi mas i gat laik long save long samting i bin kamap 10-pela yia bihain long taim King Nebukatnesar i kisim Daniel na sampela moa i go kalabus?
TENPELA yia paslain, King Nebukatnesar i bin bringim Daniel na “ol bikman bilong Juda” i kam kalabus long Babilon. (2 King 24:15) Yangpela Daniel i mekim wok long haus bilong king na wanpela samting i kamap em ol man inap kisim bagarap long en. Wanem as na yumi mas i gat laik long save long dispela samting? Long wanem, samting God Jehova i mekim i helpim Daniel na sampela man moa long abrusim bagarap, na tu, em i soim yumi long ol bikpela gavman bilong bosim graun, em narapela bai kamap bihain long narapela i kam inap long taim bilong yumi, olsem Baibel i tok profet long en.
KING I BUNGIM BIKPELA HEVI
2. Wanem taim Nebukatnesar i kisim namba wan driman i olsem tok profet?
2 Profet Daniel i tok: “Long wanpela nait long namba 2 yia bilong Nebukatnesar i stap king, em i driman. Dispela driman i mekim em i bel hevi tumas na em i no inap slip.” (Daniel 2:1) Man i driman em Nebukatnesar, king bilong Gavman Babilon. Em i kamap olsem bosman bilong graun olgeta long 607 B.C.E. taim Jehova i larim em i bagarapim Jerusalem na tempel bilong en. Long namba 2 yia bilong Nebukatnesar i stap king bilong graun olgeta (606/605 B.C.E.), God i salim wanpela driman long em i pretim em nogut tru.
3. Husat i no inap kamapim as bilong driman bilong king? Nebukatnesar i mekim wanem?
3 Dispela driman i mekim na Nebukatnesar i bel hevi tumas na em i no inap slip. Olsem na em i laik save hariap long as bilong driman. Tasol dispela strongpela king i no inap tingim dispela driman! Olsem na em i singautim ol glasman na ol posinman samting, na em i tokim ol long kamapim dispela driman na as bilong en. Tasol ol i no inap mekim. Nebukatnesar i kros nogut tru, olsem na em i tokim ol soldia “ol i mas kilim i dai olgeta saveman bilong Babilon.” Dispela tok i mekim na Daniel i mas bungim man king i makim bilong kilim i dai ol saveman bilong Babilon. Bilong wanem em i mas bungim em? Long wanem, Daniel na 3-pela poroman Hibru bilong em—Hanania, Misael, na Asaria—ol tu i insait long lain saveman bilong Babilon.—Daniel 2:2-14.
DANIEL I HELPIM OL
4. (a) Olsem wanem Daniel i kisim save long driman bilong Nebukatnesar na as bilong en? (b) Daniel i tok wanem bilong tok tenkyu long God Jehova?
4 Daniel i kisim save long as bilong dispela strongpela tok bilong Nebukatnesar na bihain “Daniel i go kwiktaim long king na i askim em long em i no ken kilim ol saveman hariap, na bai em i ken autim as bilong dispela driman.” King i orait long dispela tok. Orait Daniel i go bek long haus bilong en, na em wantaim 3-pela pren Hibru ol i beten na tok: “Bai God i marimari long yumi na i soim yumi as bilong dispela samting i hait.” Long dispela nait stret, Jehova i soim Daniel long as bilong dispela driman. Daniel i tenkyu tru long dispela na em i tok olsem: “God, mi litimapim nem bilong yu oltaim. Olgeta strong na save i bilong yu tasol. Yu save bosim taim bilong san na ren, na yu yet yu save mekim ol man i kamap king na yu save rausim ol king long wok bilong ol. Na yu givim gutpela tingting na save long ol man. Planti samting i hait na ol man i no save long en. Tasol God, yu save soim ol dispela samting long ol man. Oltaim lait i stap wantaim yu, na yu save pinis long ol samting i hait i stap long tudak.” Daniel i kisim dispela save, na em i litimapim nem bilong Jehova.—Daniel 2:15-23.
5. (a) Taim Daniel i sanap long ai bilong king, olsem wanem em i litimapim nem bilong Jehova? (b) Tok Daniel i autim, bilong wanem em i bikpela samting long yumi long nau?
5 Long de bihain, Daniel i go long Ariok, em namba wan ofisa bilong ol soldia i save lukautim king, na em man king i makim bilong kilim i dai olgeta saveman bilong Babilon. Taim em i save Daniel inap autim as bilong driman, kwiktaim em i kisim em i go long king. Daniel i no litimapim em yet, nogat, em i tokim Nebukatnesar: “I gat wanpela God i stap long heven na em i save kamapim as bilong ol samting i hait. King, God i bin givim yu dispela driman bilong soim yu ol samting bai i kamap bihain.” Daniel i redi long autim ol samting bai kamap long Gavman Babilon na ol samting bai kamap long graun kirap long taim bilong Nebukatnesar i kam inap long taim bilong yumi na bihain long en.—Daniel 2:24-30.
DANIEL I KAMAPIM DRIMAN
6, 7. Wanem dispela driman Daniel i kamapim long king?
6 Nebukatnesar i putim gut yau taim Daniel i kamapim driman, olsem: “King, long driman yu lukim traipela piksa bilong wanpela man. Na dispela samting em i strong na i lait tumas. Yu lukim na yu pret nogut tru. Ol i wokim het bilong en long gol i lait tumas. Bros na tupela han bilong en ol i wokim long silva, na namel bilong en ol i wokim long bras. Tupela lek bilong en ol i wokim long ain, tasol hap daunbilo bilong tupela lek ol i wokim long ain na graun wantaim. Taim yu lukluk yet long dispela piksa na wanpela ston i bruk long maunten [“em han bilong man i no brukim,” NW ] na i pundaun i kam paitim dispela piksa long hap bilong lek [“daunbilo,” NW ] ol i wokim long graun na ain. Na tupela lek [“daunbilo,” NW ] i bruk liklik liklik. Na olgeta ain na graun na bras na silva na gol, olgeta i bruk na i kamap olsem skin bilong rais samting yumi save rausim. Na win i karim ol dispela pipia i go na i no gat liklik hap pipia i stap. Tasol ston i bin paitim dispela piksa, em i kamap bikpela maunten na i karamapim olgeta hap bilong graun.”—Daniel 2:31-35.
7 Ating Nebukatnesar i mas amamas nogut tru long harim Daniel i kamapim dispela driman! Tasol wet pastaim! Daniel i mas kamapim as bilong driman bambai ol i no ken kilim i dai ol saveman bilong Babilon. Daniel i stap olsem maus bilong em yet wantaim 3-pela pren Hibru bilong em, na em i tok: “King, dispela em i driman yu bin lukim. Orait nau bai mi tokim yu long as bilong en.”—Daniel 2:36.
WANPELA GAVMAN I NARAPELA KAIN TRU
8. (a) Daniel i tok het gol i makim husat o wanem samting? (b) Dispela het gol i kamap long wanem taim?
8 “King, yu namba wan na yu winim olgeta arapela king. God i stap long heven em i makim yu i stap king na em i givim yu bikpela strong na biknem. Em i mekim yu bos bilong olgeta lain manmeri na olgeta animal na pisin. Yu olsem dispela het ol i wokim long gol.” (Daniel 2:37, 38) Dispela tok i makim Nebukatnesar bihain long taim Jehova i mekim wok long em long bagarapim Jerusalem long 607 B.C.E. Dispela em i tru, long wanem, ol king i sindaun long Jerusalem ol i bilong lain bilong Devit, em king Jehova i makim. Jerusalem em i nambawan biktaun bilong kantri Juda, em olsem piksa bilong kingdom bilong God na i makim Jehova em i Nambawan Bos bilong graun. Taim Jerusalem i kisim bagarap long 607 B.C.E., dispela piksa bilong kingdom bilong God i no stap moa. (1 Stori 29:23; 2 Stori 36:17-21) Ol strongpela gavman, em narapela bai kamap bihain long narapela, em gol, silva, bras, ain na graun samting bilong dispela imis i makim, ol inap bosim graun, na gavman i stap olsem piksa bilong kingdom bilong God i no inap mekim wanpela samting bilong pasim ol. Long bipo gol i dia tumas, winim ol narapela kain ain samting. Olsem na het gol i makim Nebukatnesar, na em i kisim biknem taim em i bagarapim Jerusalem na daunim dispela gavman i stap olsem piksa bilong kingdom bilong God.—Lukim “Wanpela Soldia King i Kamapim Strongpela Gavman,” long pes 63.
9. Het gol i makim wanem samting?
9 Nebukatnesar i mekim wok king inap 43 yia, na em i namba wan bilong wanpela lain king i bosim Gavman Babilon. Tambu bilong em Nabonaidas na namba wan pikinini bilong Nebukatnesar, em Evil Merodak, ol i insait long dispela lain. Dispela lain i mekim wok king inap 43 yia moa, i go inap long i dai bilong pikinini bilong Nabonaidas, em Belsasar, long 539 B.C.E. (2 King 25:27; Daniel 5:30) Olsem na het gol bilong imis i no makim Nebukatnesar tasol, nogat, em i makim dispela lain king olgeta i bosim Gavman Babilon.
10. (a) Olsem wanem driman bilong Nebukatnesar i makim olsem Gavman Babilon bai pinis? (b) Profet Aisaia i tok wanem long man bilong daunim Babilon? (c) Olsem wanem Midia-Persia i no strong olsem Babilon?
10 Daniel i tokim Nebukatnesar olsem: “Narapela king bai i kamap bihain long yu, tasol em bai i no gat strong olsem yu.” (Daniel 2:39) Wanpela gavman em bros na tupela han silva i makim bai kamap bihain long lain king bilong Nebukatnesar. Olsem 200 yia paslain, Aisaia i bin tok profet long dispela gavman, na i kolim nem bilong dispela king em bai daunim Babilon—em Sairus. (Aisaia 13:1-17; 21:2-9; 44:24–45:7, 13) Dispela em i Gavman Midia-Persia. Maski Gavman Midia-Persia i kamapim gutpela sindaun tru bilong ol man na Babilon i no bin winim ol long mekim olsem, driman i makim Gavman Midia-Persia olsem silva, na silva i no gutpela olsem gol. Gavman Midia-Persia i no strong olsem Gavman Babilon, long wanem, ol i no bin daunim gavman Juda wantaim biktaun bilong en Jerusalem, em olsem piksa bilong kingdom bilong God.
11. Long wanem taim lain king bilong Nebukatnesar i pinis?
11 Inap 60 yia bihain long taim em i bin kamapim as bilong dispela driman, Daniel i lukim lain king bilong Nebukatnesar i pinis. Daniel i stap long nait bilong Oktoba 5/6, bilong 539 B.C.E., taim ami bilong Midia-Persia i daunim taun Babilon, em taun ol man i ting ol ami i no inap daunim, na ol i kilim i dai King Belsasar. Taim ol i kilim i dai Belsasar, het gol bilong imis—em Gavman Babilon—em i pinis.
WANPELA GAVMAN I LARIM KALABUS LAIN I GO
12. Olsem wanem lo Sairus i kamapim long 537 B.C.E. i helpim ol Juda i stap kalabus?
12 Long 539 B.C.E., Midia-Persia i kisim ples bilong Babilon olsem nambawan strongpela gavman i bosim graun. Darius bilong Midia i gat 62 krismas taim em i kamap namba wan king bilong Babilon bihain long taim ol i daunim Babilon. (Daniel 5:30, 31) Inap sotpela taim, em wantaim Sairus bilong Persia ol i wok wantaim long bosim Gavman Midia-Persia. Taim Darius i dai pinis, Sairus wanpela i bosim Gavman Persia. Taim Sairus i stap king em i larim ol Juda i lusim kalabus long Babilon. Long 537 B.C.E., Sairus i kamapim wanpela lo i larim ol Juda i kalabus long Babilon ol i go bek long as ples na wokim gen Jerusalem na tempel bilong Jehova. Tasol ol i no kamapim bek dispela gavman i olsem piksa bilong kingdom bilong God long Juda na Jerusalem.—2 Stori 36:22, 23; Esra 1:1–2:2a.
13. Bros na han silva bilong imis long driman bilong Nebukatnesar i makim wanem samting?
13 Bros na han silva bilong imis i makim lain king bilong Persia kirap long Bikpela King Sairus. Dispela lain king i stap inap 200 yia samting. Ol i ting Sairus i dai taim em i raun long pait long 530 B.C.E. I gat 12-pela king i kamap long lain bilong em, na 2-pela i bin mekim gut long lain bilong Jehova. Wanpela em Darius 1 (bilong Persia), na narapela em Artaserksis 1.
14, 15. Bikpela King Darius na Artaserksis 1 i mekim wanem bilong helpim ol Juda?
14 Darius 1 em i namba 3 king long lain king bilong Persia bihain long Bikpela King Sairus. Namba 1 na namba 2 em Kambises 2 na brata bilong em Bardiya (o ating wanpela pris, nem bilong em Gaumata, em i giaman na tok em i Bardiya). Taim Darius 1, ol i kolim Bikpela King Darius, i kamap king long 521 B.C.E., wok bilong wokim gen tempel long Jerusalem i gat tambu long en. Taim Darius i painim pinis pepa ol i bin raitim lo bilong Sairus long en long haus kot long Ekbatana, em i rausim dispela tambu long 520 B.C.E., na em i givim hap mani bilong haus mani bilong king long wokim gen tempel.—Esra 6:1-12.
15 Narapela king bilong Persia i helpim ol Juda long kamapim bek lotu bilong ol em Artaserksis 1, em i kamap king bihain long papa bilong em Serksis 1 long 475 B.C.E. Ol i givim nem Longimanus long Artaserksis, long wanem, han sut bilong em i longpela, winim han kais. Long namba 20 yia bilong em i stap king, em yia 455 B.C.E., em i makim Nehemia, em man Juda i save lukautim wain bilong king, long kamap gavena bilong Juda na wokim gen banis bilong Jerusalem. Dispela wok i makim stat bilong dispela “70 taims 7-pela yia” Daniel sapta 9 i stori long en na em i makim wanem taim Mesaia, o Krais, em Jisas bilong Nasaret, bai kamap na i dai.—Daniel 9:24-27; Nehemia 1:1; 2:1-18.
16. Long wanem yia Gavman Midia-Persia i pinis olsem bikpela gavman bilong bosim graun? Husat i stap king long dispela taim?
16 Laspela bilong 6-pela king bilong Gavman Persia bihain long Artaserksis 1, em Darius 3. Wok king bilong em i pinis kwiktaim long 331 B.C.E. taim ami bilong Bikpela King Aleksander i daunim tru ami bilong em long Gaugamela, klostu long Nineve bilong bipo. Dispela i pinisim wok gavman bilong Midia-Persia long bosim graun, olsem hap silva bilong imis long driman bilong Nebukatnesar i makim. Long sampela samting, strongpela gavman i kamap bihain em i winim Midia-Persia, na long sampela samting, nogat. Dispela samting i kamap klia taim yumi putim yau long ol narapela tok Daniel i mekim bilong kamapim as bilong driman bilong Nebukatnesar.
WANPELA GAVMAN I BOSIM BIKPELA HAP—TASOL I NO STRONG OLSEM NARAPELA
17-19. (a) Namel bilong dispela imis ol i wokim long bras i makim wanem bikpela gavman? Dispela gavman i bosim wanem ol hap? (b) Aleksander 3 em i husat? (c) Olsem wanem tok Grik i kamap tok ples bilong olgeta hap? Dispela tok ples i gutpela long mekim wanem?
17 Daniel i tokim Nebukatnesar olsem namel bilong dispela traipela imis i makim “namba 3 king bai i kamap na bosim olgeta hap graun. Dispela king i olsem bras.” (Daniel 2:32, 39) Dispela namba 3 gavman bai kamap bihain long Babilon na Midia-Persia. Olsem bras i no gutpela olsem silva, dispela bikpela gavman bai i no gutpela olsem Midia-Persia, long wanem, em bai i no kisim biknem long mekim wanpela gutpela wok olsem larim lain bilong Jehova i lusim kalabus. Tasol dispela gavman i olsem bras bai “bosim olgeta hap graun,” na dispela i makim olsem em bai strongpela moa, winim Babilon o Midia-Persia. Stori bilong ol samting i bin kamap bipo i tok wanem long dispela bikpela gavman?
18 Taim Aleksander 3 i gat 20 krismas, em i kamap king bilong Masedonia long 336 B.C.E. Bihain liklik long dispela em i kirap raun long daunim ol narapela kantri. Em i winim planti pait, olsem na ol i kolim em Bikpela King Aleksander. Em i wok long daunim planti kantri, na em i wok long go insait long graun Persia i bosim. Taim em i winim Darius 3 long pait i kamap long Gaugamela long 331 B.C.E., strong bilong Gavman Persia i laik pinis na Aleksander i mekim kantri Grik i kamap nupela gavman bilong bosim graun.
19 Aleksander i winim pinis pait long Gaugamela na bihain em i kisim ol biktaun bilong Persia, olsem Babilon, Susa, Persepolis, na Ekbatana. Em i daunim ol narapela hap bilong Gavman Persia, na em i kisim graun long hap wes bilong India. Ol lain Grik i go sindaun long ol kantri Aleksander i bin daunim. Olsem na tok Grik na pasin bilong ol Grik i go long olgeta hap ol i bosim. Gavman Grik i winim olgeta narapela gavman i bin kamap paslain long en. Olsem Daniel i bin tok profet, dispela gavman em bras i makim, em bai “bosim olgeta hap graun.” Long dispela rot tok Grik (olsem Koine) i kamap tok ples bilong olgeta hap. Ol tok bilong dispela tok ples i gutpela long kamapim klia tingting bilong man, na em i gutpela tok ples tru bilong raitim Ol Skripsa Grik long en na bilong autim gutnius bilong Kingdom bilong God long ol narapela hap.
20. Wanem samting i kamap long Gavman Grik bihain long indai bilong Bikpela King Aleksander?
20 Bikpela King Aleksander i bosim graun inap 8-pela yia tasol. Aleksander em i kisim sik bihain long wanpela bikpela pati na bihain liklik em i dai, long Jun 13, 323 B.C.E., taim em i gat 32 krismas. Bihain, ol i brukim bikpela gavman bilong em long 4-pela hap, na 4-pela jeneral bilong em i bosim. Olsem na long wanpela bikpela gavman, i gat 4-pela narapela gavman i bin kamap na bihain Gavman Rom i daunim ol. Dispela bikpela gavman bilong bosim graun, em bras i makim, i stap strong inap long 30 B.C.E., taim Rom i daunim laspela bilong dispela 4-pela gavman—em lain king bilong Tolemi i bosim Isip.
WANPELA GAVMAN I SAVE BAGARAPIM NA PINISIM OL NARAPELA
21. Daniel i stori olsem wanem long “namba 4 king”?
21 Daniel i stori moa long imis bilong driman olsem: “Bihain namba 4 king bai i kamap [bihain long Babilon, Midia-Persia, na Grik]. Em bai i strong olsem ain. Ain i save paitim olgeta samting na ol i bruk liklik liklik. Olsem tasol bai dispela king i bagarapim na pinisim olgeta dispela kantri i bin kamap bipo.” (Daniel 2:40) Dispela bikpela gavman bai i gat bikpela strong, olsem ain, bilong bagarapim ol narapela gavman—strong bilong en i winim strong bilong ol bikpela gavman em gol, silva, na bras i makim. Gavman Rom i gat kain strong olsem.
22. Olsem wanem Gavman Rom i stap olsem ain?
22 Rom i bagarapim na pinisim Gavman Grik na em i kisim ol liklik hap bilong Gavman Midia-Persia na Gavman Babilon i stap yet. Rom i no daun long Kingdom bilong God, em Jisas Krais i autim tok bilong en, na ol i kilim em i dai long wanpela pos long 33 C.E. Rom i laik bagarapim lotu Kristen tru, olsem na em i mekim pasin birua long ol disaipel bilong Jisas. Na tu, Rom i bagarapim Jerusalem na tempel bilong en long 70 C.E.
23, 24. Lek ain bilong imis i makim Gavman Rom wantaim wanem narapela gavman?
23 Tasol tupela lek ain bilong imis long driman bilong Nebukatnesar i no makim Gavman Rom tasol—em i makim narapela bikpela gavman i kamap long en. Yumi skelim tok bilong Kamapim Tok Hait 17:10: “Dispela 7-pela het i makim 7-pela king. 5-pela ol i bagarap pinis, na wanpela nau i stap, na wanpela i no kamap king yet. Taim em i kamap pinis, orait em i mas i stap liklik taim tasol.” Rom i kalabusim aposel Jon long ailan Patmos, na long dispela hap em i raitim dispela tok. Faipela king, o bikpela gavman i bosim graun, ol i bagarap pinis em Isip, Asiria, Babilon, Midia-Persia, na Grik. Namba 6—em Gavman Rom—i stap strong yet. Tasol em tu i mas bagarap, na namba 7 king bai kamap long wanpela kantri Rom i bin daunim na kisim. Em wanem bikpela gavman?
24 Long bipo Inglan em i wanpela hap bilong Gavman Rom i stap long not-wes. Tasol long yia 1763, nevi bilong Inglan i bosim pinis olgeta bikpela solwara—long dispela taim Gavman Inglan i kamap. Na long 1776 i gat 13 provins bilong Amerika, bipo Inglan i bosim, ol i tokaut long kisim independens bambai ol inap kamapim Yunaitet Stets Bilong Amerika. Tasol sampela yia bihain gavman bilong Inglan na Amerika ol i wok wantaim long taim bilong pait na gutaim. Olsem na gavman bilong Inglan na Amerika i kamap olsem namba 7 bikpela gavman bilong bosim graun, em tok profet bilong Baibel i stori long en. Wankain olsem Gavman Rom, dispela gavman i stap “strong olsem ain,” em i bosim strong ol samting. Olsem na lek ain bilong imis bilong driman i makim Gavman Rom na gavman bilong Inglan na Amerika wantaim.
SAMTING OL I TANIM WANTAIM I NO GAT STRONG
25. Daniel i tok wanem long lek daunbilo na pinga bilong lek bilong dispela imis?
25 Nau Daniel i tokim Nebukatnesar olsem: “Long driman yu bin lukim olsem, lek [“daunbilo,” NW ] na ol pinga bilong lek bilong dispela samting, ol i bin wokim long graun na ain. As bilong dispela i olsem. Ol manmeri dispela king i bosim bai i bruk lain. Tasol ol dispela lain bai i stap strong yet. Ain i stap wantaim graun long tupela lek [“daunbilo,” NW ], na dispela i soim olsem, olgeta strong bilong ol bai i no pinis kwik. Ol pinga bilong lek ol i wokim long ain na graun i soim olsem, narapela hap bilong dispela kantri bai i strong olsem ain, tasol narapela hap bai i no gat strong, olsem graun.” “Yu bin lukim olsem ol i tanim ain wantaim graun, na olsem tasol ol bai bung wantaim ol pikinini bilong ol man; tasol narapela bai i no inap pas gut wantaim narapela, olsem ain i no save pas gut wantaim graun.”—Daniel 2:41, 42; 2:43, NW.
26. Wok king em lek daunbilo na pinga bilong lek i makim i kamap ples klia long wanem taim?
26 Kirap long het na i go pinis long lek daunbilo ol narapela narapela hap bilong dispela imis Nebukatnesar i lukim long driman i makim ol bikpela gavman bilong bosim graun, em narapela bai kamap bihain long narapela. Olsem na i stret long ting olsem lek daunbilo na pinga bilong lek ol i wokim long “ain na graun” i makim laspela kain pasin bilong ol man long bosim graun em bai kamap long “taim bilong las de.”—Daniel 12:4.
27. (a) Lek daunbilo na pinga bilong lek ol i bin wokim long ain wantaim graun i makim wanem samting? (b) Tenpela pinga bilong lek bilong dispela imis i makim wanem samting?
27 Long yia 1900 Gavman Inglan i bosim 25 pesen bilong olgeta man long graun. Ol narapela bikpela gavman bilong Yurop i bosim planti milion moa. Tasol Namba Wan Pait i mekim na planti ol kantri i bin stap aninit long ol bikpela gavman bilong graun, nau ol i kirap bosim ol yet. Bihain long Namba Tu Pait planti kantri moa i kirap bosim ol yet. Pasin bilong man long tingim lain bilong em, dispela i mekim na namba bilong ol kantri i bosim ol yet i go antap moa. Tenpela pinga long lek bilong dispela imis i makim dispela olgeta gavman na kantri, long wanem, sampela taim long Baibel namba 10 i makim samting bilong graun em inap olgeta.—Skelim wantaim Kisim Bek 34:28; Matyu 25:1; KTH 2:10.
28, 29. (a) Olsem Daniel i tok, graun i makim wanem samting? (b) Yumi ken tok wanem long dispela ain na graun ol i tanim wantaim?
28 Nau yumi stap pinis long “taim bilong las de,” olsem na yumi kamap long lek daunbilo bilong dispela imis. Sampela gavman em lek daunbilo na pinga bilong lek ol i bin wokim long ain wantaim graun ol i strong olsem ain—ol i save bosim strong ol man. Sampela i olsem graun. Olsem wanem ol i olsem graun? Daniel i tok “ol bai bung wantaim ol pikinini bilong ol man.” (Daniel 2:43, NW ) Tasol maski graun i no gat strong—em dispela samting God i bin wokim skin bilong “ol pikinini bilong ol man” long en—ol gavman i kain olsem ain, sampela taim ol i mas larim ol man nating i tok long ol samting ol i laik bai ol dispela gavman bilong ol i mas mekim. (Jop 10:9) Tasol ol dispela gavman i save bosim strong ol man, ol i no save pas gut wantaim ol man nating, olsem ain na graun i no save pas gut wantaim. Long taim dispela imis i kisim bagarap, ol lain politik bilong dispela graun bai bruk bruk nabaut!
29 Lek daunbilo na ol pinga bilong lek i no pas gut wantaim, olsem na dispela bai mekim na imis olgeta bai pundaun o olsem wanem? Wanem samting bai kamap long dispela imis?
LASPELA BIKPELA SAMTING I KAMAP!
30. Stori long bikpela samting i kamap long pinis bilong driman bilong Nebukatnesar.
30 Tingim bikpela samting i kamap long pinis bilong dispela driman. Daniel i tokim king olsem: “Taim yu lukluk yet long dispela piksa na wanpela ston i bruk long maunten [“em han bilong man i no brukim,” NW ] na i pundaun i kam paitim dispela piksa long hap bilong lek [“daunbilo,” NW ] ol i wokim long graun na ain. Na tupela lek [“daunbilo,” NW ] i bruk liklik liklik. Na olgeta ain na graun na bras na silva na gol, olgeta i bruk na i kamap olsem skin bilong rais samting yumi save rausim. Na win i karim ol dispela pipia i go na i no gat liklik hap pipia i stap. Tasol ston i bin paitim dispela piksa, em i kamap bikpela maunten na i karamapim olgeta hap bilong graun.”—Daniel 2:34, 35.
31, 32. Daniel i tok wanem samting bai kamap olsem laspela hap bilong driman bilong Nebukatnesar i makim?
31 Bilong kamapim mining bilong ol dispela tok, tok profet i tok moa olsem: “Taim ol dispela king i stap yet God bai i kirapim wanpela kingdom na dispela kingdom bai i stap oltaim oltaim. Ol arapela king i no inap daunim kingdom bilong God, tasol em bai i daunim ol na bagarapim ol arapela king na kingdom bilong en bai i stap oltaim. Yu bin lukim ston i bruk nating [“long maunten, em han bilong man i no brukim,” NW ] na i pundaun na paitim dispela piksa ol i bin wokim long ain na bras na graun na silva na gol. Dispela ston i makim kingdom bilong God. God i gat biknem, em i bin soim yu ol samting bai i kamap bihain. Ol samting yu lukim long dispela driman bai i kamap stret olsem mi tokim yu pinis.”—Daniel 2:44, 45.
32 Nebukatnesar i save Daniel i bin kamapim driman na mining bilong en, olsem na Nebukatnesar i tokaut olsem God bilong Daniel tasol em i “Bikpela bilong olgeta king, na em i save kamapim as bilong ol samting i hait.” Na tu, king i makim Daniel wantaim 3-pela poroman Hibru bilong em long holim wok i gat bikpela namba tru. (Daniel 2:46-49) Tasol as bilong dispela driman i mekim wanem long yumi long nau?
‘WANPELA MAUNTEN I KARAMAPIM GRAUN’
33. Dispela “ston” i bruk long wanem “maunten”? Long wanem taim na olsem wanem dispela samting i bin kamap?
33 “Taim God i bin makim bilong ol arapela lain” i bosim graun i bin pinis long Oktoba 1914, na long dispela taim God i kamapim Kingdom long heven taim em i givim wok king long pikinini bilong em, Jisas Krais, olsem “King bilong olgeta king, na Bikpela bilong olgeta bikman.”a (Luk 21:24; KTH 12:1-5; 19:16) Olsem na long strong bilong God—i no long han bilong ol man—dispela “ston” i makim Kingdom bilong Mesaia, i bruk na lusim “maunten,” i makim nambawan wok bos bilong Jehova long heven na graun. Dispela gavman bilong heven i stap long han bilong Jisas Krais na God i givim laip oltaim long em na em i no inap i dai. (Rom 6:9) Olsem na dispela kingdom bilong “Bikpela [God] bilong yumi wantaim dispela man em i makim”—em i kamapim olsem Jehova em i nambawan Bos bilong heven na graun—bai i no gat narapela man inap kisim dispela kingdom long bihain. Em bai stap oltaim oltaim.—KTH 11:15.
34. Olsem wanem Kingdom bilong God i kamap long “taim ol dispela king i stap”?
34 Dispela Kingdom i kamap “taim ol dispela king i stap yet.” (Daniel 2:44) Dispela i no makim ol gavman em 10-pela pinga bilong lek i makim na em tasol, nogat, em i makim tu ol gavman em hap ain, bras, silva, na gol i makim. Tru, ol gavman bilong Babilon, Persia, Grik na Rom ol i no bosim graun moa, tasol liklik hap bilong ol dispela gavman i stap yet long 1914. Gavman Otoman bilong Turki i bosim graun bilong Babilon, na kantri Persia (Iran), Grik, na Rom long Itali ol i gat gavman bilong ol yet.
35. Wanem taim dispela “ston” bai paitim imis? Dispela imis bai pinis olgeta o olsem wanem?
35 Klostu nau Kingdom bilong God long heven bai paitim dispela imis long hap bilong lek daunbilo. Long dispela rot, olgeta gavman dispela imis i makim bai bruk liklik liklik na pinis olgeta. Tru tumas, long dispela pait bilong “bikpela de bilong God I Gat Olgeta Strong,” dispela “ston” bai paitim imis strong tru na imis bai kamap olsem paura na win bilong belhat bilong God bai karim dispela paura i go olsem skin bilong rais samting yumi save rausim. (KTH 16:14, 16) Bihain, Kingdom bilong God bai kamap gavman bilong bosim “olgeta hap bilong graun,” olsem dispela ston i bin kamap bikpela maunten na karamapim olgeta hap bilong graun.—Daniel 2:35.
36. Wanem as na yumi inap tok olsem Kingdom bilong Mesaia em i wanpela strongpela gavman?
36 Kingdom bilong Mesaia i stap long heven, tasol em bai mekim wok long strong bilong en long mekim gut long olgeta man bilong bihainim tok ol i stap long graun. “Ol arapela king i no inap daunim” dispela strongpela gavman, na ol narapela lain i no inap senisim. Dispela Kingdom i no olsem gavman bilong ol man bilong graun i save dai—em “bai i stap oltaim oltaim.” (Daniel 2:44) I gutpela tru sapos yu inap i stap aninit long dispela gavman inap oltaim oltaim.
[Futnot]
a Lukim Sapta 6 bilong dispela buk.
YU BIN KISIM WANEM SAVE?
• Ol narapela narapela hap bilong traipela imis long driman bilong Nebukatnesar i makim wanem ol strongpela gavman bilong bosim graun?
• Lek daunbilo na 10-pela pinga bilong lek ol i wokim long ain wantaim graun i makim wanem samting?
• Long wanem taim na long wanem “maunten” ol i bin brukim dispela “ston”?
• Wanem taim bai “ston” i paitim dispela imis?
[Blok/Ol Piksa long pes 63-67]
WANPELA SOLDIA KING I KAMAPIM STRONGPELA GAVMAN
PIKININI man bilong king bilong Babilon, em bai senisim papa bilong en, em wantaim ami bilong em i daunim tru ami bilong King Neko bilong Isip long taun Karkemis, long Siria. Ol Isip i laik ranawe i go bek long Isip, na ol Babilon i ranim ol. Tasol pikinini man bilong king i kisim wanpela toksave i kirapim em long lusim pait. Em i kisim toksave olsem papa bilong em, Nabopolasar, i dai pinis. Em i givim wok long ol jeneral bilong em long bringim i kam long Babilon ol kalabusman na ol mani kago ol i bin kisim, na Nebukatnesar i hariap i go bek long as ples bilong sindaun long sia king papa i bin lusim taim em i dai.
Olsem na Nebukatnesar i kamap king bilong Babilon long yia 624 B.C.E. na em i namba tu king bilong bosim Gavman Babilon. Em i stap king inap 43 yia na em i kisim ol graun bipo Gavman Asiria i bin bosim, na em i kisim Siria long hap not na Palestain long hap wes i go inap long boda bilong Isip.—Lukim mep.
Long namba 4 yia bilong em i stap king (620 B.C.E.), Nebukatnesar i daunim Juda na mekim ol i stap aninit long em. (2 King 24:1) Tripela yia bihain ol Juda i bikhet na Babilon i kam banisim taun na pait long ol. Nebukatnesar i kisim Jehoiakin, Daniel, na sampela moa i go kalabus long Babilon. Na tu, king i kisim sampela plet na kap samting bilong tempel bilong Jehova. Em i makim ankol bilong Jehoiakin, em Sedekaia, long kamap king bilong Juda.—2 King 24:2-17; Daniel 1:6, 7.
Bihain, Sedekaia tu i bikhet na prenim Isip. Nebukatnesar i kam banisim gen Jerusalem, na long 607 B.C.E., em i brukim banis, kukim tempel, na bagarapim taun. Em i kilim i dai olgeta pikinini man bilong Sedekaia na bihain em i kamautim ai bilong Sedekaia na pasim em long baklain na bringim em i go kalabus long Babilon. Nebukatnesar i kalabusim klostu olgeta man na karim ol plet na kap samting bilong tempel i stap yet i go long Babilon. “Ol Babilon i mekim olsem, na bihain ol i kisim ol arapela Juda i go kalabus long kantri Babilon.”—2 King 24:18–25:21.
Nebukatnesar i banisim taun Tair inap 13 yia na em i kisim dispela taun. Ol soldia i karim ol hevipela samting bilong pait na dispela i mekim na ol i kamap “hetkela” na “skin bilong sol bilong ol i tekewe.” (Esekiel 29:18) Bihain, ol lain bilong Tair i givim ol yet long han bilong ami bilong Babilon.
King bilong Babilon em i save gut tru long pasin bilong pait. Sampela buk samting, na ol buk samting em ol man bilong Babilon i bin raitim, i tok em i wanpela king i save mekim stretpela pasin. Baibel i no tok olsem Nebukatnesar em i man bilong mekim stretpela pasin, tasol profet Jeremaia i bin tok, maski Sedekaia i bikhet, ‘sapos em i lusim pait na larim ol ofisa bilong king bilong Babilon i kisim em,’ ol bai mekim stretpela pasin long em. (Jeremaia 38:17, 18) Taim Jerusalem i bagarap pinis, Nebukatnesar i tingim Jeremaia na mekim gutpela pasin long em. King i tokim ofisa bilong em: “Yu go kisim Jeremaia na lukautim em gut. Yu no ken mekim nogut long em. Yu mas bihainim laik bilong en na mekim wanem samting em i askim yu long mekim.”—Jeremaia 39:11, 12; 40:1-4.
Nebukatnesar em i man bilong bosim gut ol samting, olsem na kwiktaim em i luksave long gutpela pasin na save bilong Daniel na 3-pela poroman bilong em—em Satrak, Mesak, na Abetnego—na ol nem Hibru bilong ol em Hanania, Misael, na Asaria. Olsem na king i makim ol long holim wok i gat namba insait long gavman bilong em.—Daniel 1:6, 7, 19-21; 2:49.
Nebukatnesar i save lotu long Marduk, em nambawan god bilong Babilon. King i tok em i winim ol pait, long wanem, Marduk i save helpim em. Long Babilon, em i wokim na bilasim ol tempel bilong Marduk na bilong planti ol narapela god bilong Babilon. Ating traipela imis gol em i bin sanapim long ples stret bilong Dura em i dediketim long Marduk. Na tu, Nebukatnesar i save mekim kain kain pasin bilong glasman bilong kisim save olsem ami bilong em i mas mekim wanem bilong winim pait.
Na tu, Nebukatnesar i kisim bikpela amamas long stretim gut Babilon na mekim i kamap gutpela tru, em nambawan biktaun i gat banis long dispela taim. Em i pinisim wok papa bilong em i bin kirapim bilong sanapim ol traipela banis bilong taun, na ol man i ting i no gat wanpela ami inap winim dispela taun. King i stretim olpela haus king i stap namel long taun na wokim narapela haus king longwe long en olsem 3-pela kilomita long hap not bilong sindaun long en long taim bilong san. Kwin bilong Nebukatnesar em bilong Midia, na em i wari tru long ol liklik maunten na diwai bilong ples bilong em. Olsem na bilong amamasim em Nebukatnesar i wokim ol gaden i naispela tru—em i wanpela samting i gat biknem tru long dispela taim bipo.
Wanpela taim king i wokabaut long haus king bilong em long Babilon na em i hambak na tok: “ ‘Man, Babilon em i bikpela taun na i nambawan tru. Long strong bilong mi yet, mi bin kirapim dispela taun, bilong soim bikpela strong na biknem bilong mi long olgeta lain manmeri.’ Em i toktok yet,” na em i kamap longlong. Inap 7-pela yia em i no inap mekim wok king, na em i kaikai gras, olsem Daniel i bin tok profet long en. Taim 7-pela yia i pinis, Nebukatnesar i kisim bek wok king bilong em, na em i mekim wok king inap long em i dai long 582 B.C.E.—Daniel 4:30-36.
YU BIN KISIM WANEM SAVE?
Yumi ken tok wanem long wok bilong Nebukatnesar olsem
• wanpela man bilong save gut long pait?
• wanpela man bilong bosim gut ol samting?
• wanpela man bilong lotuim Marduk?
• wanpela man bilong wokim ol haus samting?
[Mep]
(Bilong save ol dispela rait i stap we long pes, lukim buk o magasin)
GAVMAN BABILON
SOLWARA RETSI
Jerusalem
Wara Yufretis
Wara Taigris
Ninive
Susa
Babilon
Ur
[Piksa]
Babilon, nambawan taun i gat banis long dispela taim
[Piksa]
Bikpela snek (olsem pukpuk) i makim Marduk
[Piksa]
Ol naispela gaden bilong Babilon i gat biknem
[Sat/Piksa long pes 56]
(Bilong save ol dispela rait i stap we long pes, lukim buk o magasin)
OL BIKPELA GAVMAN LONG TOK PROFET BILONG DANIEL
Traipela imis (Daniel 2:31-45)
BABILON kirap long 607 B.C.E.
MIDIA-PERSIA kirap long 539 B.C.E.
GRIK kirap long 331 B.C.E.
ROM kirap long 30 B.C.E.
INGLAN-AMERIKA kirap long 1763 C.E.
OL GAVMAN I BRUK NABAUT long taim bilong las de
[Piksa i karamapim pes olgeta long pes 47]
[Piksa i karamapim pes olgeta long pes 58]