Sapta 7

Fopela Tok i Senisim Sindaun Bilong Ol Man

 1. Fopela tok i kamap long wanpela banis long bipo yet ol i kamapim wanem ol bikpela samting?

FOPELA tok i kamap long wanpela banis bilong haus. Tasol dispela fopela tok i pretim nogut tru wanpela strongpela king. Ol i makim olsem tupela king bai pinis long mekim wok king na wanpela bai i dai, na wanpela strongpela gavman i bin bosim graun bai pinis. Ol samting dispela tok i mekim i daunim tru nem bilong wanpela lain lotu. Na dispela fopela tok i litimapim klinpela lotu bilong Jehova na i strongim wok king bilong em long wanpela taim ol manmeri i no tingim liklik dispela tupela samting. Na tu, dispela tok i givim save long yumi long ol samting i kamap long nau! Olsem wanem fopela tok inap mekim ol dispela samting? Bai yumi skelim.

 2. (a) Wanem samting i kamap long Babilon bihain long i dai bilong Nebukatnesar? (b) Husat i stap king long dispela taim?

² Ol samting Daniel sapta 4 i stori long en i bin kamap planti yia i go pinis. Hambakman Nebukatnesar i wok king long Babilon inap 43 yia na em i dai long 582 B.C.E. Ol narapela narapela man bilong famili bilong em ol i kamap king, tasol sampela i dai taim ol i yangpela yet o ol man i kilim ol i dai. Bihain, wanpela man, em Nabonaidas, i bikhet na birua long gavman na long rot bilong pait em i kamap king. Nabonaidas em i pikinini bilong wanpela pris meri bilong god Sin, em god bilong mun, na em i no wanblut bilong Nebukatnesar. Sampela saveman i ting Nabonaidas i bin maritim pikinini meri bilong Nebukatnesar bilong strongim wok king bilong em, na em i makim Belsasar, pikinini bilong tupela, i stap king wantaim em, na sampela taim em i lusim Babilon inap sampela yia na larim Belsasar i bosim ol samting. Sapos olsem, Belsasar em i tumbuna pikinini bilong Nebukatnesar. Olsem wanem? Long rot bilong ol samting i bin painim bubu bilong em, Belsasar i kisim save olsem Jehova em i Nambawan God Tru, na em inap daunim tru ol king? Nogat tru!​—Daniel 4:37.

BIKPELA KAIKAI OL I NO INAP BOSIM

 3. Stori long bikpela kaikai bilong Belsasar.

³ Kirap bilong Daniel sapta 5 i kamapim stori bilong wanpela bikpela kaikai. “Taim Belsasar i stap king bilong Babilon, em i mekim wanpela bikpela kaikai. Em i singautim ol bikman bilong en i kam long dispela kaikai na ol i dring wain wantaim em. Namba bilong ol dispela bikman, em inap olsem 1,000.” (Daniel 5:1) Ol i mas i gat wanpela bikpela haus bambai ol dispela man wantaim ol meri na nambatu lain meri bilong king ol inap bung long en. Wanpela saveman i tok: “Ol bikpela kaikai bilong ol Babilon ol i nambawan tru, tasol long pinis bilong en ol man i save spak. Wain ol i kisim long ol narapela kantri na planti gutpela kaikai samting i pulap long tebol. Ol naispela smel i pulap long haus; ol lain bilong mekim singsing na musik i wok long amamasim ol man i bung.” Belsasar i bosim dispela bung na em i sindaun long hap ol man inap lukim em na em i wok long dring wain​—na em i dring planti tru.

 4. (a) Bilong wanem yumi inap ting pasin bilong ol Babilon long pati na kaikai long nait bilong Oktoba 5/6, 539 B.C.E. i narapela kain? (b) Ating wanem samting i strongim bel bilong ol Babilon na ol i no pret long ol ami i kam pait long ol?

⁴ Ol Babilon i amamas na givim bel long pati long dispela nait bilong Oktoba 5/6, 539 B.C.E., na dispela pasin i narapela kain. Kantri bilong ol i insait long pait, na ol i wok long bungim ol hevi. I no longtaim i go pinis na ami bilong Midia-Persia i bin winim Nabonaidas na em i mas ranawe na hait long taun Borsipa, long saut-wes bilong Babilon. Na tu, ami bilong Sairus i stap ausait long Babilon. Tasol i luk olsem Belsasar na ol bikman bilong en ol i no tingting planti long dispela samting. Taun bilong ol, Babilon, em i strongpela taun tru na i no gat wanpela ami inap brukim banis bilong en na go insait! Dispela taun i gat ol traipela banis na bikpela baret, em wara bilong Yufretis i pulap long en na i ran namel long taun. I no gat wanpela birua i bin daunim Babilon insait long 100 yia samting. Olsem na i no gat as na ol i tingting planti, a? Ating Belsasar i ting bikpela nois bilong pati bilong ol bai soim ol birua i stap ausait olsem ol i no pret na tingting planti long ol na dispela bai mekim na ol birua bai les long pait.

5, 6. Belsasar i mekim wanem taim em i spak long wain? Samting em i mekim, bilong wanem em i olsem bikpela tok nogut long Jehova?

⁵ Bihain, pasin bilong dring planti i mekim save long Belsasar. Olsem Sindaun 20:1 i tok, ‘man i dring planti bai i tok bilas na tok nogut.’ Em nau, pasin bilong dring planti wain i kirapim king long mekim bikpela rong. Em i tokim ol man long bringim ol plet kap holi bilong tempel bilong Jehova i kam. Ol dispela plet kap, em Nebukatnesar i bin kisim taim em i daunim Jerusalem, ol i gat wanpela wok tasol, em bilong yusim long lotu i klin. Ol pris Juda bilong bipo, em ol i gat namba long yusim ol dispela plet kap samting long tempel long Jerusalem, Jehova i bin tokim ol long ol i mas i stap klin.​—Daniel 5:2; skelim wantaim Aisaia 52:11.

⁶ Tasol Belsasar i tingim wanpela bikpela pasin hambak moa em i laik mekim. “Ol wokman i bringim ol kap gol i kam na olgeta man na meri i dring long ol dispela kap. Ol i dring wain i stap na ol i wok long litimapim nem bilong ol god ol i bin wokim long gol na long silva na long bras na long ain na long diwai na long ston.” (Daniel 5:​3, 4) Olsem na Belsasar i laik litimapim ol giaman god bilong em na daunim Jehova! I luk olsem ol man bilong Babilon i gat dispela pasin. Ol i ting ol Juda i samting nogut, na ol i tok bilas long lotu bilong ol na tokim ol olsem ol i no inap go bek long as ples bilong ol. (Song 137:​1-3; Aisaia 14:​16, 17) King i spak na ating em i ting sapos em i daunim na semim ol dispela kalabuslain na tok nogut long God bilong ol, dispela bai mekim na ol meri bilong em na ol ofisa bai ting em i wanpela strongpela man.a Tasol sapos Belsasar i bin pilim amamas long dispela strong bilong em, dispela amamas i no stap longpela taim.

HANRAIT I STAP PINIS LONG BANIS

7, 8. Wanem samting i kamap bilong pasim bikpela kaikai bilong Belsasar? Dispela i mekim wanem long king?

⁷ Baibel i tok: “Orait wantu wanpela han bilong man i kamap long banis bilong rum na i wok long rait antap long banis. Long dispela hap lam i lait bikpela na king i lukim klia tru dispela han.” (Daniel 5:5) Em i narapela kain samting tru long lukim! Wanpela han i kamap nating na i olsem em i drip antap long win klostu long wanpela hap bilong banis i gat planti lait. Olgeta lain long pati ol i pasim maus na lukluk long dispela han. Dispela han i kirap raitim wanpela tok hait antap long banis.b Dispela i makim samting nogut bai kamap na ol man i no inap lusim tingting long dispela, olsem na i kam inap long taim bilong yumi ol man i save tok “hanrait i stap pinis long banis” bilong makim wanpela samting nogut bai kamap kwiktaim.

⁸ Dispela i mekim wanem long dispela king i gat pasin hambak na i laik litimapim em yet na ol god bilong em na daunim Jehova? “King i pret nogut tru, na pes bilong en i senis olgeta na strong bilong en i pinis na olgeta bun bilong en i guria.” (Daniel 5:6) Belsasar i laik bai ol man i stap aninit long em i mas lukim em olsem wanpela man i gutpela tru na i gat biknem. Tasol em i kamap man i pret nogut tru​—pes bilong em i senis, na olgeta bun long bodi bilong em i guria, na lek tu i guria na i no gat strong moa. Tok Devit i mekim long Jehova long wanpela singsing i tru tumas: “Yu save daunim ol manmeri bilong hambak.”​—2 Samuel 22:​1, 28; skelim wantaim Sindaun 18:12.

 9. (a) Bilong wanem pret bilong Belsasar i no wankain olsem pasin bilong pret long God? (b) Em i mekim wanem tok long ol saveman bilong Babilon?

⁹ Yumi mas save, as na Belsasar i pret i no olsem em i pret na daun long Jehova, em dispela kain pret i as bilong gutpela tingting. (Song 111:10) Em i pret long samting nogut bai painim em, na dispela i no givim gutpela tingting long dispela king i guria i stap.c Em i bin toknogutim God, tasol em i no askim God long lusim tingting long dispela tok em i bin mekim, nogat; em i “singaut strong long ol i mas tokim ol glasman na ol man i gat save long ol samting bai i kamap, long ol i mas i kam.” Em i tok: “Sapos wanpela man inap long ritim dispela tok na tokim mi long as bilong en, orait bai mi putim ol retpela laplap bilong king long em. Na bai mi putim sen gol long nek bilong en na bai em i gat biknem. Na em bai i kamap namba 3 ofisa bilong gavman bilong mi.” (Daniel 5:7) Namba 3 ofisa bilong gavman bai i gat bikpela namba tru​—tupela king, em Nabonaidas na Belsasar tasol, bai winim em. Ating Belsasar i bin tingting long givim dispela namba long namba wan pikinini man bilong em, olsem na yumi save king i gat laik tru long save long insait bilong dispela tok!

10. Ol saveman inap kamapim insait bilong hanrait i stap long banis o olsem wanem?

¹⁰ Ol saveman i kam bung long dispela bikpela rum. I gat planti i stap, long wanem, Babilon i gat planti lotu giaman na planti tempel. I gat planti man ol i tok ol inap kamapim as bilong ol samting i stap hait na kamapim insait bilong ol narapela kain rait i gat tok hait long en. Ating ol saveman i amamas long traim save bilong ol. Ol inap mekim dispela wok bilong ol long ai bilong ol bikman, na mekim king i amamas, na kisim bikpela namba. Tasol ol i no inap tru! “I no gat wanpela bilong ol inap long ritim dispela tok. Na i no gat wanpela bilong ol inap long tokim king long as bilong dispela tok.”d​—Daniel 5:8.

11. Ating wanem as na ol saveman bilong Babilon i no inap ritim rait i stap long banis?

¹¹ Yumi no save olsem ol saveman inap ritim ol leta bilong dispela rait o nogat. Sapos ol i no inap ritim ol leta, ol dispela giamanman inap kamapim kain kain giaman stori long mining bilong dispela rait, na ating ol inap mekim sampela tok bilong amamasim king. O ating olgeta man inap ritim ol wan wan leta bilong dispela rait. Tasol long ol tok ples olsem tok Aram na Hibru ol i no save raitim ol leta olsem a, e, i, o, u, olsem na fopela rait inap i gat ol narapela narapela mining bilong en. Sapos olsem, ating ol saveman bai i no inap save wanem tok ol i mas kamapim. Na tu, maski ol inap kamapim ol wan wan tok, ol i no inap save long as bilong ol dispela tok na kamapim mining bilong ol. Tasol i gat wanpela samting yumi save long en: Ol saveman bilong Babilon ol i no inap tru long kamapim insait bilong rait i stap long banis!

12. Ol saveman i no inap kamapim insait bilong dispela rait na dispela i kamapim klia wanem samting?

¹² Olsem na dispela i kamapim klia olsem ol saveman bilong Babilon wantaim lotu bilong ol i giaman. Ol i no inap helpim king! Taim Belsasar i kisim save olsem em i bin bilip nating long ol dispela saveman, em i pret moa yet, na pes bilong en i senis moa yet, na ol bikman i “wari tru.”e​—Daniel 5:9.

OL I SINGAUTIM MAN I GAT GUTPELA TINGTING

13. (a) Bilong wanem kwin i tok long singautim Daniel i kam? (b) Olsem wanem long sindaun bilong Daniel long dispela taim?

¹³ Long dispela taim stret kwin yet​—ating em mama bilong king​—em i go insait long rum kaikai. Em i bin harim tok long dispela pairap, na em i save long wanpela man em inap kamapim insait bilong hanrait i stap long banis. Planti yia paslain papa bilong em, Nebukatnesar, i bin makim Daniel olsem hetman bilong olgeta saveman bilong king. Mama bilong king i tingim yet Daniel olsem wanpela man “i gat narakain save tru.” I luk olsem Belsasar i no save long Daniel, olsem na ating taim Nebukatnesar i dai pinis ol i rausim bikpela namba Daniel i bin holim long gavman. Tasol Daniel i ting pasin bilong holim bikpela nem na namba em i samting nating. Ating em i winim 90 krismas long dispela taim na em i stap gut long Jehova na mekim yet wok bilong em. Maski em i kalabus inap 80 yia long Babilon, ol man i save kolim yet nem Hibru bilong em. Mama bilong king tu i kolim em Daniel, em i no kolim dispela nem bilong Babilon ol i bin givim long em. Mama i tokim king: “Yu mas salim tok i go long dispela man Daniel . . . na askim em long kam tokim yu long as bilong dispela tok i stap long banis.”​—Daniel 1:7; 5:​10-12.

14. Daniel i gat wanem hevi taim em i lukim hanrait i stap long banis?

¹⁴ Ol i singautim Daniel na em i kam sanap long ai bilong Belsasar. King i pilim nogut long askim dispela man Juda long helpim em, long wanem, em i bin tok nogut long God bilong dispela Juda. Tasol Belsasar i laik grisim Daniel na em i tok long givim wankain prais long Daniel olsem em i bin tok long givim long ol narapela saveman​—sapos em inap ritim dispela tok na kamapim insait bilong en, king bai makim em olsem namba 3 bikman bilong gavman. (Daniel 5:​13-16) Daniel i lukim dispela hanrait i stap long banis, na spirit holi i helpim em long save long mining bilong en. Em i wanpela tok i kam long God Jehova na i tokaut long bagarap bai painim king! Olsem wanem Daniel i ken sanap long pes stret bilong dispela king i gat pasin hambak na kolim bikpela strafe bai painim em​—na mekim tu long ai bilong ol meri bilong em na ol bikman? Tingim hevi bilong Daniel! Em i gat wanem tingting? Switpela tok bilong king long givim ol gutpela presen na biknem long em i wok long pulim tingting bilong em? Em bai isi long king na i no tokaut strong long strafe Jehova bai givim long em?

15, 16. Wanem bikpela samting i bin kamap long bipo na Belsasar i no larim dispela i skulim em? Kain samting olsem i save kamap planti taim long nau o olsem wanem?

¹⁵ Daniel i strongim bel na tok: “Maski, mi no ken kisim ol presen long yu. Sapos yu laik, orait yu ken givim long narapela man. Tasol king, nau bai mi ritim dispela tok na tokim yu long as bilong en.” (Daniel 5:17) Orait nau Daniel i tokaut long bikpela nem na namba bilong Nebukatnesar, em wanpela king i gat bikpela strong tru, na husat man em i laik kilim i dai, o paitim, o litimapim, o daunim, em i ken mekim long laik bilong em. Tasol Daniel i tokim Belsasar olsem Jehova, em “God Antap Tru,” i bin mekim Nebukatnesar i kamap strongpela na bikpela king. Na tu, Jehova i bin daunim em tru taim em i hambak. Em nau, Nebukatnesar i kisim save olsem “God Antap Tru i bosim olgeta manmeri. Long laik bilong em yet, em i save mekim ol man i kamap king.”​—Daniel 5:​18-21.

¹⁶ Belsasar i “save pinis long ol dispela samting.” Tasol em i no larim ol samting i bin kamap bipo i skulim em. Nebukatnesar i mekim sin taim em i mekim pasin hambak, tasol Belsasar i mekim bikpela sin moa taim em i hambak na mekim ol samting bilong daunim Jehova. Daniel i kamapim long ples klia sin bilong king. Na tu, long ai bilong ol dispela haiden i bung i stap, em i tokim Belsasar olsem ol god giaman “i no save lukluk na i no save harim toktok na i no save long wanpela samting.” Profet bilong God i no pret long tok moa olsem Jehova em God “i save bosim laip bilong yu na olgeta samting yu save mekim.” I kam inap long nau, ol manmeri i save wokim ol god long ol samting i no gat laip, na ol i lotuim mani, wok skin, biknem, na amamas. Tasol ol dispela samting i no ken givim laip long man. Jehova tasol i bin wokim yumi, na em yet i save givim laip na win long yumi.​—Daniel 5:​22, 23; Aposel 17:​24, 25.

INSAIT BILONG TOK BOKIS I KAMAP KLIA!

17, 18. Wanem 4-pela tok i stap long banis? Wanem insait bilong ol dispela tok?

¹⁷ Nau lapun profet i kirap mekim samting ol saveman bilong Babilon i no inap mekim. Em i ritim na kamapim insait bilong hanrait i stap long banis. Dispela tok i olsem: “ME’NE, ME’NE, TE’KEL na PAR’SIN.” (Daniel 5:​24, 25, NW ) Wanem insait bilong ol dispela tok?

¹⁸ Insait bilong ol dispela tok i olsem “wanpela mina, wanpela mina, wanpela sekel, na wanpela hap sekel.” Olgeta dispela tok i makim hevi bilong wan wan mani long skel, kirap long bikpela mani i go long liklik mani. Em i wanpela strongpela tok bokis! Maski sapos ol saveman bilong Babilon inap ritim ol dispela leta, yumi no kirap nogut olsem ol i no inap kamapim insait bilong en.

19. Wanem insait bilong dispela tok “ME’NE”?

¹⁹ Spirit bilong God i stap long Daniel na em i tok: “As bilong dispela tok ‘Kaunim’ [“ME’NE,” NW ] i olsem. God i kaunim pinis hamas de bai yu stap king. Nau em i las de bilong yu.” (Daniel 5:26) Long dispela namba wan tok, taim yu bungim sampela bilong ol leta olsem a, e, i, o, u wantaim ol dispela leta i stap long banis, i gat tupela tok Aram ol dispela leta inap makim​—wanpela em “mina” na narapela em i wanpela tok i olsem “kaunim.” Daniel i save gut olsem taim bilong ol Juda long i stap kalabus i laik pinis. Tok profet i tok ol bai kalabus 70 yia, na ol i kalabus inap 68 yia pinis. (Jeremaia 29:10) Bikpela Man bilong makim taim, em Jehova, em i kaunim pinis hamas de Babilon bai bosim graun, na ol man i bung long bikpela kaikai bilong Belsasar ol i no save olsem pinis i klostu tru. Tru tumas, taim i pinis​—taim bilong Belsasar na taim bilong papa bilong em, Nabonaidas. Ating long dispela as na dispela tok “ME’NE” i stap tupela taim​—bilong tokaut long pinis bilong wok king bilong tupela wantaim.

20. Wanem insait bilong dispela tok “TE’KEL”? Olsem wanem dispela i makim Belsasar?

²⁰ Dispela tok “TE’KEL” i stap wanpela taim tasol na i makim wanpela samting tasol. Ating dispela i makim Belsasar tasol. Na dispela i stret, long wanem, em yet i bin hambak na i no daun long Jehova. Insait bilong dispela tok yet i olsem “sekel,” tasol ol leta i stap long banis inap spelim dispela tok olsem “skelim.” Olsem na Daniel i tokim Belsasar: “Dispela tok ‘Skelim’ [“TE’KEL,” NW ] i olsem. God i skelim pinis pasin bilong yu, na skel bilong en i soim olsem yu no save mekim gutpela pasin.” (Daniel 5:27) Long ai bilong Jehova, ol manmeri bilong graun ol i olsem das. (Aisaia 40:15) Ol i no inap pasim em long mekim ol samting em i tingting pinis long mekim. Olsem na wanpela hambak king inap mekim wanem? Belsasar i traim long litimapim em yet, winim King bilong heven na graun. Dispela man nating bilong graun i bin mekim tok bilong daunim Jehova na tok bilas long klinpela lotu, tasol ‘skel i soim olsem em i no save mekim gutpela pasin.’ Tru tumas, i stret Belsasar i kisim strafe, em dispela strafe bai painim em kwiktaim tru!

21. Olsem wanem tok “PAR’SIN” i gat tripela insait bilong en? Dispela tok i makim wanem samting bai kamap long wok Babilon i holim olsem gavman bilong bosim graun?

²¹ Laspela tok i stap long banis em “PAR’SIN.” Baibel Hibru bilong bipo i tok, taim Daniel i kolim dispela tok em i kolim olsem “PE’RES,” na dispela i makim olsem em i stori long wanpela man tasol, long wanem, ating em i toktok wantaim wanpela king na narapela king i no stap. Dispela tok i pinisim bikpela tok bokis bilong Jehova i gat tripela mining bilong en. Insait bilong dispela tok “par’sin” i olsem “hap sekel.” Tasol ol inap kamapim tupela narapela mining bilong ol leta bilong dispela tok​—olsem “brukim” na “ol Persia.” Olsem na Daniel i tok: “Dispela tok ‘Brukim’ [“PE’RES,” NW ] i olsem. God i brukim pinis kantri bilong yu na em i tilim hap i go long ol Midia na hap i go long ol Persia.”​—Daniel 5:28.

22. Belsasar i mekim wanem taim em i harim pinis insait bilong tok bokis? Ating em i gat wanem tingting taim em i mekim olsem?

²² Em nau, insait bilong dispela tok bokis i kamap klia. I no longtaim na ami bilong Midia-Persia bai daunim strongpela taun Babilon. Maski Belsasar i pilim nogut tru long tok bilong strafe bai painim em, em i truim tok em i bin mekim. Em i tokim ol man long putim retpela laplap long Daniel na sen gol long nek bilong em, na tokaut olsem Daniel em i namba 3 bilong gavman bilong en. (Daniel 5:29) Daniel i no sakim ol dispela samting, long wanem, em i save dispela i save litimapim nem bilong Jehova. Ating Belsasar i ting sapos em i mekim gut long profet bilong Jehova, orait Jehova bai marimari long em. Sapos em i ting olsem, sori tru, samting em i mekim i no inap helpim em.

BABILON I PUNDAUN

23. Wanem tok profet bilong bipo i wok long kamap tru long taim Belsasar i mekim yet bikpela kaikai?

²³ Taim Belsasar na ol lain i bung long bikpela kaikai i wok long dring bilong litimapim ol god bilong ol na tok bilas long Jehova, wanpela bikpela samting i wok long kamap long tudak ausait long haus king. Tok profet Aisaia i bin mekim klostu 200 yia paslain i wok long kamap tru. Long rot bilong Aisaia, Jehova i bin tok profet long Babilon olsem: “Mi bai pinisim olgeta hevi ol Babilon i bin givim long ol arapela lain manmeri.” Yes, olgeta hevi dispela taun nogut i bin mekim long ol manmeri God i makim, em bai pinis. Em bai pinis olsem wanem? Dispela tok profet i tok: “Yupela ol ami bilong kantri Elam, yupela kam pait long Babilon. Na yupela ol ami bilong kantri Midia, yupela kam banisim dispela taun.” Elam i kamap hap bilong Persia bihain long taim bilong Aisaia. Long taim bilong bikpela kaikai bilong Belsasar, em Aisaia i bin tok profet long en, Persia na Midia i bung bilong “kam pait” na “banisim” Babilon.​—Aisaia 21:​1, 2, 5, 6.

24. Tok profet bilong Aisaia i bin stori long wanem ol samting bai kamap taim Babilon i pundaun?

²⁴ Tok profet i bin kamapim nem bilong man bilong go pas long pait na ol bikpela samting em bai mekim bilong winim pait. Winim 200 yia paslain, Aisaia i bin tok profet olsem Jehova bai makim wanpela man, nem bilong em Sairus, bilong kam pait long Babilon. Long taim bilong pait, olgeta samting i laik pasim em bai i no inap. Ol wara bilong Babilon bai “drai,” na ol strongpela dua bai op i stap. (Aisaia 44:27–45:3) Em nau, ol samting i kamap olsem. Ol ami bilong Sairus i bin wokim wanpela baret na bai wara Yufretis i ken ran long dispela baret, na taim wara i slek ol inap wokabaut long as bilong dispela wara. Ol soldia bilong Babilon ol i no mekim gut wok bilong ol na ol i larim ol dua bilong banis i op i stap. Ol man bilong raitim stori bilong ol samting i bin kamap bipo ol i tok ol birua i bin kam insait long taun taim ol manmeri bilong taun ol i pati i stap. Bilong kisim taun Babilon i no gat hatwok. Ol Babilon i bekim pait liklik tasol. (Jeremaia 51:30) Tasol i gat wanpela bikman i painim bagarap. Daniel i tok: “Orait long dispela nait tasol ol Midia i kam kilim i dai Belsasar, king bilong ol Babilon. Na Darius bilong Midia i kamap king na i bosim dispela kantri. Darius i gat 62 krismas long taim em i kamap king bilong Babilon.”​—Daniel 5:​30, 31.

HANRAIT LONG BANIS I SKULIM YUMI

25. (a) Bilong wanem Babilon bilong bipo i makim stret olgeta lotu giaman bilong graun long taim bilong yumi? (b) Olsem wanem ol wokboi bilong God long nau ol i bin i stap kalabus long Babilon?

²⁵ Ol tok bilong Daniel sapta 5, em spirit bilong God i bin kamapim, em i bikpela samting long yumi. Babilon bilong bipo em i ples bilong lotu giaman, olsem na i stret em i makim olgeta lotu giaman bilong dispela graun. Buk Kamapim Tok Hait i makim olgeta lotu giaman i olsem wanpela pamukmeri i laik kilim i dai ol man, na i kolim em olsem “Bikpela taun Babilon.” (KTH 17:5) Maski em i kisim ol tok lukaut long ol bilip na pasin giaman bilong em i bagarapim nem bilong God, em i mekim pasin birua long ol man i save autim tok i tru bilong Baibel. Olsem ol man long Jerusalem na Juda bilong bipo, liklik lain Kristen God i makim ol, ol i bin kalabus long “Bikpela taun Babilon” taim ol pris pasto i kirapim ol gavman long birua long ol na klostu ol i pasim wok olgeta bilong autim tok bilong Kingdom long 1918.

26. (a) Olsem wanem “Bikpela taun Babilon” i bin pundaun long 1919? (b) Wanem tok lukaut yumi mas bihainim na tokim ol narapela long en?

²⁶ Tasol kwiktaim “Bikpela taun Babilon” i pundaun! Wankain olsem Babilon bilong bipo taim em i pundaun long 539 B.C.E., i no gat bikpela pairap. Tasol taim Bikpela Babilon i pundaun, dispela i mekim nogut tru long em. Dispela samting i kamap long 1919 C.E. taim lain bilong Jehova i lusim kalabus long Babilon na God i mekim gut long ol na orait long ol. Em nau, Bikpela taun Babilon i no gat strong moa long kalabusim lain bilong God, na long dispela taim wok i kirap bilong tokaut long ples klia olsem em i wanpela giaman lain yumi no inap bilip long en. Em i pundaun olgeta na i no inap sanap gen, na klostu nau bagarap bai painim em. Olsem na ol wokboi bilong Jehova i bin autim dispela tok lukaut: “Yupela ol manmeri bilong mi, yupela i mas lusim dispela ples na i kam ausait. Nogut yupela i poroman wantaim em long ol sin em i save mekim. Na nogut yupela bai i poroman wantaim em tu long taim em i kisim pe nogut bilong ol dispela sin.” (KTH 18:4) Yu bin bihainim dispela tok lukaut? Yu save givim dispela tok long ol narapela?f

27, 28. (a) Daniel i no bin lusim tingting long wanem bikpela tok i tru? (b) Wanem ol samting i kamapim klia olsem klostu nau Jehova bai kirap mekim save long ol lain nogut bilong dispela graun bilong nau?

²⁷ Olsem na hanrait i stap pinis long banis long nau​—tasol i no bilong “Bikpela taun Babilon” tasol. Tingim wanpela bikpela tok tru bilong Buk Daniel: Jehova em i King bilong heven na graun. Em wanpela tasol i gat namba bilong makim wanpela man long bosim olgeta manmeri. (Daniel 4:​17, 25; 5:21) Jehova bai rausim olgeta samting i laik pasim em long mekim ol samting em i tingting pinis long mekim. I no longtaim na Jehova bai kirap mekim olsem. (Habakuk 2:3) Daniel i bin lukim kain taim olsem i kamap taim em i winim 90 krismas. Em i lukim Jehova i rausim wanpela strongpela gavman i bosim graun​—em wanpela gavman i bin mekim nogut long lain bilong God kirap long taim Daniel i stap manki yet.

²⁸ I gat planti samting i kamapim klia tru olsem God Jehova i putim pinis wanpela man long sia king long heven bilong bosim olgeta manmeri. Ol lain bilong dispela graun i bin givim baksait long dispela King na ol i birua long wok king bilong en, na dispela i kamapim klia olsem klostu nau Jehova bai bagarapim olgeta birua bilong dispela Kingdom. (Song 2:​1-11; 2 Pita 3:​3-7) Olsem wanem long yu? Yu save mekim ol samting i soim olsem yu save taim i sot pinis na yu bilip strong long Kingdom bilong God? Sapos olsem, dispela hanrait i stap long banis i bin skulim yu gut!

[Ol Futnot]

YU BIN KISIM WANEM SAVE?

• Wanem samting i kamap na i pasim bikpela kaikai bilong Belsasar long nait bilong Oktoba 5/6, 539 B.C.E.?

• Wanem insait bilong hanrait i stap long banis?

• Wanem tok profet long Babilon bai pundaun i wok long kamap tru taim Belsasar i mekim bikpela kaikai bilong em?

• Stori bilong hanrait long banis em i bikpela samting olsem wanem long taim bilong yumi?

[Piksa i karamapim pes olgeta long pes 98]

[Piksa i karamapim pes olgeta long pes 103]