Ol Samting Jehova i Wokim i Kamapim Savetingting Bilong Em

“Ol man i lukim ol samting [God] i bin wokim. Long dispela rot ol man inap save long sampela pasin bilong God i stap hait.”​—RO. 1:20.

 1. Savetingting bilong dispela graun i mekim wanem long planti man long nau?

LONG nau, ol i kolim planti man olsem man i gat savetingting, tasol planti taim i no gat as bilong tok olsem. Sampela i tok wanpela man i gat savetingting, long wanem, em i gat planti save. Tasol ol saveman bilong dispela graun i no inap stiaim ol man long kisim save long as tru bilong laip. Nogat. Ol man husat i larim ol dispela saveman i stiaim ol, ol bai stap olsem ol man em ‘olgeta pasin bilong trik na giaman bai sakim ol nabaut olsem win na si i save sakim kanu long solwara, na kanu i trip nabaut.’​—Ef. 4:​14.

2, 3. (a) Bilong wanem Jehova “em wanpela tasol i gat save tru”? (b) Olsem wanem savetingting bilong God i narapela kain long savetingting bilong dispela graun?

² Em i narapela kain long ol man i kisim savetingting tru, em God Jehova i As bilong en! Baibel i tok long Jehova olsem “em wanpela tasol i gat save tru.” (Ro. 16:27) Em i save long olgeta samting bilong heven na graun; olsem wanem ol samting i bin kamap na i kamap long wanem taim. Jehova i kamapim olgeta lo i bosim ol samting bilong graun, na ol saveman i save mekim wok long ol dispela lo long mekim wok painimaut bilong ol. Olsem na God i no ting ol samting ol man i wokim na save bilong ol em i samting tru. “Save bilong dispela graun em i olsem longlong pasin tasol long ai bilong God.”​—1 Ko. 3:19.

³ Baibel i tok Jehova i save givim “gutpela tingting na save” long ol wokman bilong em. (Snd. 2:6) Savetingting i kam long God i klia tru, na i no olsem savetingting bilong ol man. Savetingting bilong God i helpim ol man long skelim gut ol samting na stretpela save na gutpela tingting i as bilong en. (Ritim Jems 3:​17.) Aposel Pol i amamas tru long savetingting bilong Jehova. Em i tok: “Olaman! Ol gutpela pasin bilong God na tingting na save bilong en i pulap tru, na i daun tumas olsem solwara! Yumi man i no inap tru long painim as bilong olgeta tingting bilong en. Yumi no inap tru long bihainim olgeta rot bilong en.” (Ro. 11:33) Jehova i gat olgeta savetingting, olsem na yumi bilip tru olsem ol lo bilong em bai stiaim yumi long nambawan gutpela rot long bihainim. Jehova i save tru long ol samting yumi mas kisim bilong i stap amamas, winim tru save bilong ol man.​—Snd. 3:​5, 6.

Jisas​​—“Saveman i Bosim Wok”

 4. Wanem wanpela rot bilong save long savetingting bilong Jehova?

⁴ Yumi inap lukim savetingting na ol narapela gutpela pasin bilong Jehova long ol samting em i bin wokim. (Ritim Rom 1:​20.) Ol samting Jehova i bin wokim, ol bikpela samting na ol liklik samting, ol i kamapim klia sampela pasin bilong em. Maski yumi lukluk i go we​—long skai antap o long graun​—yumi lukim planti samting i kamapim klia olsem i gat wanpela Man i bin wokim ol dispela samting na em i gat olgeta savetingting na pasin laikim. Yumi inap kisim planti save long em taim yumi skelim ol samting em i bin wokim.​—Sng. 19:1; Ais. 40:26.

5, 6. (a) Jehova na husat moa i insait long wokim ol samting? (b) Orait nau bai yumi skelim wanem samting? Bilong wanem bai yumi mekim olsem?

⁵ Jehova i no stap wanpis taim em “i mekim kamap skai na graun na olgeta samting i stap long en.” (Stt. 1:1) Baibel i tok, paslain tru long Jehova i wokim heven na graun, em i bin wokim wanpela spirit na long rot bilong em Jehova i wokim “olgeta samting.” Dispela spirit em dispela wanpela Pikinini tasol bilong God​—em “namba wan pikinini bilong God”​—na bihain em i kam long graun olsem wanpela man, em Jisas. (Kl. 1:​15-17) Olsem Jehova, Jisas i gat savetingting. Long Sindaun sapta 8, Baibel i tok long em olsem em i man i gat gutpela tingting na save. Dispela sapta bilong Baibel i tok long Jisas tu olsem em i “saveman i bosim wok” bilong God.​—Snd. 8:​12, 22-​31.

⁶ Olsem na heven na graun i kamapim klia savetingting bilong Jehova na Jisas, em Saveman i Bosim Wok. Yumi inap kisim gutpela skul long ol dispela samting. Orait nau yumi ken skelim 4-pela samting em Sindaun 30:​24-28 i tok ol i gat “gutpela tingting tru.”a

Kisim Skul Long Pasin Bilong Wok Strong

7, 8. Wanem pasin bilong anis i save kirapim tru tingting bilong yu?

⁷ Taim yumi skelim ol “liklik” animal na wok ol i mekim, dispela inap givim skul long yumi. Olsem, tingim gutpela tingting tru bilong anis.​—Ritim Sindaun 30:​24, 25.

⁸ Sampela saveman i ting long olgeta wan wan man i gat olsem 200,000 anis, na olgeta anis i wok strong long antap na insait long graun. Ol anis i save stap olsem lain anis, na long klostu olgeta lain ol i gat 3-pela kain anis: ol kwin, ol man, na ol wokboi. Olgeta anis i save mekim sampela wok bilong helpim lain anis. Wanpela kain anis long Saut Amerika, em anis bilong katim lip, i gat save tru long wokim gaden. Ol dispela liklik anis i save givim gris, planim gen, na katim wanpela kain talinga, na long dispela rot ol inap kamapim planti talinga tru. Ol saveman i kisim save olsem dispela anis i save senisim pasin bilong mekim wok bilong em bambai em i ken kamapim kaikai inap long skel bilong lain anis olgeta.b

9, 10. Olsem wanem yumi ken bihainim pasin bilong anis long wok strong?

⁹ Yumi inap kisim skul long ol anis. Ol i skulim yumi olsem yumi mas wok strong sapos yumi laik bai wok bilong yumi i kamapim ol gutpela samting. Baibel i tokim yumi: “Yupela ol lesman, mi gat tok long yupela olsem. Yupela go lukim gut pasin bilong ol anis na bai yupela i kamap saveman. Ol anis i no gat hetman o bikman o ofisa bilong bosim ol. Tasol taim i gat planti kaikai i stap, ol anis i save bungim kaikai na putim i stap bilong taim kaikai i sot.” (Snd. 6:​6-8) Jehova na Jisas, em Saveman i Bosim Wok bilong em, tupela wantaim i save wok strong. Jisas i tok: “Papa bilong mi em i save wok oltaim i kam inap long nau. Na mi tu mi save wok.”​—Jo. 5:17.

¹⁰ Yumi save bihainim pasin bilong God na Krais, olsem na yumi tu i mas wok strong. Maski yumi kisim wanem wok insait long oganaisesen bilong God, yumi olgeta i mas “wok strong long mekim wok bilong Bikpela.” (1 Ko. 15:58) Olsem na i gutpela sapos yumi bihainim tok Pol i givim long ol Kristen long Rom, olsem: “Yupela i mas wok strong oltaim na larim Holi Spirit i kirapim yupela long mekim wok bilong Bikpela.” (Ro. 12:11) Wok yumi mekim long bihainim laik bilong Jehova bai i no inap lus nating, long wanem, Baibel i tok: “God em i no man nogut, na bai em i lusim tingting long ol gutpela wok yupela i bin mekim. Nogat.”​—Hi. 6:10.

Lukautim Yumi Long Ol Samting Bilong Spirit

11. Stori long sampela samting bilong mumut.

¹¹ Wanpela kain mumut i narapela liklik animal em yumi inap kisim skul long em long sampela bikpela samting. (Ritim Sindaun 30:26.) Em i gat ol sotpela raunpela yau na ol sotpela lek. Dispela liklik animal i save stap namel long ol bikpela ston. Ai bilong em i sap tru na dispela i helpim em long lukautim em yet, na ol hul na ol ples hait insait long ol bikpela ston long maunten i gutpela ples bilong hait long ol birua. Ol mumut i save stap gut taim planti i pas wantaim, na dispela i lukautim ol na i helpim ol long narapela i ken hatim skin bilong narapela long taim bilong kol.c

12, 13. Yumi inap kisim wanem skul long mumut?

¹² Yumi inap kisim wanem skul long mumut? Namba wan samting, dispela animal i no save stap we ol birua i ken bagarapim em. Em i save mekim wok long gutpela ai bilong em long lukim ol birua taim ol i stap longwe yet, na em i stap klostu long ol hul na ples hait namel long ol bikpela ston na dispela inap helpim em long abrusim bagarap. Na olsem tasol, ai bilong yumi i mas sap long ol samting bilong spirit bambai yumi ken luksave long ol samting nogut bilong dispela graun bilong Satan. Aposel Pita i kirapim ol Kristen olsem: “Yupela i mas stap redi na was gut. Satan, dispela birua bilong yupela, em i olsem wanpela laion i singaut strong. Oltaim em i save raun bilong painim ol manmeri bilong kaikai.” (1 Pi. 5:8) Taim Jisas i stap long graun, em i was i stap, em i lukaut long olgeta pasin bilong Satan long traim bagarapim pasin bilong em long i stap gut long God. (Mt. 4:​1-11) Jisas i stap olsem gutpela piksa ol disaipel bilong em i ken bihainim!

¹³ Wanpela rot bilong was i stap, em yumi ken mekim wok long olgeta samting Jehova i givim long yumi bilong lukautim yumi long ol samting bilong spirit. Yumi no ken lusim pasin bilong stadi long Baibel na go oltaim long ol miting Kristen. (Lu. 4:4; Hi. 10:​24, 25) Na wankain olsem mumut i stap gut taim em i pas gut wantaim ol narapela mumut, yumi mas pas gut wantaim ol wanbilip Kristen, na dispela “i ken strongim bel bilong yumi olgeta wantaim.” (Ro. 1:12) Taim yumi kisim ol samting Jehova i givim long yumi, yumi kamapim olsem yumi wanbel wantaim tok bilong Devit, em man bilong raitim song, em i tok: “Bikpela em i strongpela banis bilong mi. Em i olsem ston i haitim mi, na em i save kisim bek mi long han bilong ol birua. God bilong mi em i olsem bikpela ston mi save go long en na hait long ol birua.”​—Sng. 18:2.

Sanap Strong Maski i Gat Pasin Birua

14. Wanpela grasopa i no bikpela samting, tasol yumi ken tok wanem long wanpela bikpela lain grasopa?

¹⁴ Na tu, yumi ken kisim skul long ol grasopa. Wanpela grasopa, longpela bilong em olsem 5-pela sentimita, ating yumi no ting em i bikpela samting tumas, tasol yumi kirap nogut long wanpela bikpela lain grasopa. (Ritim Sindaun 30:27.) Ol i ken kaikai planti tru, olsem na kwiktaim wanpela bikpela lain grasopa inap pinisim kaikai long wanpela gaden i redi. Baibel i tok nois bilong wanpela lain grasopa i wok long i kam klostu i olsem karis i pairap long ston na olsem kunai i paia. (Jol. 2:​3, 5) Ol man i bin wokim ol paia bilong pasim ol grasopa long kam, tasol ol i no inap. Bilong wanem? Long wanem, bodi bilong ol grasopa i dai long paia i kilim i dai paia, na bihain ol narapela grasopa i ken flai i go. Maski ol i no gat king o lida bilong ol, wanpela bikpela lain grasopa i wok olsem wanpela lain ami i wok gut wantaim, na ol i no gat wanpela samting inap pasin ol.d​​—Jol. 2:​25.

15, 16. Olsem wanem ol man bilong autim tok bilong Kingdom long nau i olsem wanpela bikpela lain grasopa?

¹⁵ Profet Joel i tok, wok bilong ol wokman bilong Jehova i olsem wok bilong ol grasopa. Em i tok: “Ol dispela grasopa i ran i kam olsem ol man bilong pait, na ol i go antap long ol banis bilong taun. Na ol i wokabaut i go stret tasol, olsem ol soldia i mats na wokabaut i go. Ol i no tanim i go long narapela hap na ol i no pasim rot bilong ol yet. Ol i brukim olgeta banis na i go insait, na i no gat wanpela samting inap long pasim ol.”​—Jol. 2:​7, 8.

¹⁶ Dispela tok profet i kamapim klia wok bilong ol man i save autim tok bilong Kingdom Bilong God long nau! I no gat wanpela “banis,” olsem pasin birua, inap pasim wok bilong ol long autim tok. Nogat. Ol i bihainim pasin bilong Jisas, husat i bin wok strong long bihainim laik bilong God, maski planti taim ol man i givim baksait long em. (Ais. 53:3) Tru, sampela Kristen i kisim bagarap na ol i dai, long wanem, ol i holimpas bilip. Tasol wok autim tok i go yet, na namba bilong ol man bilong autim tok bilong Kingdom i wok long go bikpela. Planti taim pasin birua i mekim na planti manmeri moa i harim gutnius, em ol bai i no inap harim gutnius sapos i no gat dispela pasin birua. (Ap. 8:​1, 4) Olsem wanem? Long wok bilong yu long autim tok, yu save wok strong olsem ol grasopa​—maski ol man i no laik harim tok na ol i birua?​—Hi. 10:39.

“Pas Tru Long Gutpela Pasin”

17. Bilong wanem ol hanlek bilong geko inap pas strong long glas na siling samting?

¹⁷ Ol liklik palai, olsem geko, i save pas tru long ol banis na siling bilong haus na ol i no save pundaun. (Ritim Sindaun 30:28.) Ol saveman i kirap nogut long pasin bilong dispela liklik animal long wokabaut na sut i go i kam long banis na siling. Olsem wanem geko inap mekim olsem? I no olsem geko i gat sampela kain glu long hanlek bilong em, nogat; olgeta pinga long hanlek bilong geko i gat planti liklik liklik baret i gat planti tausen samting i luk olsem gras. Olgeta wan wan gras i gat planti handet samting olsem tret i liklik tru. I gat wanpela kain strong i save kamap long en, na dispela i mekim na maski geko i ran long glas, hanlek bilong em inap pas strong long glas! Ol saveman i kirap nogut long samting geko inap mekim, na ol i tok sapos ol inap wokim wanpela kain samting olsem hanlek bilong geko, ol inap mekim wok long dispela olsem wanpela strongpela glu.e

18. Olsem wanem yumi ken “pas tru long gutpela pasin”?

¹⁸ Yumi inap kisim wanem skul long geko? Baibel i tok: “Yupela i mas givim baksait tru long pasin nogut, na yupela i mas pas tru long gutpela pasin.” (Ro. 12:9) Ol samting nogut i pulap long dispela graun bilong Satan, na dispela inap mekim na yumi no pas tru long ol stiatok bilong God. Olsem: Pasin bilong pren wantaim ol man i no bihainim ol lo bilong God​—maski em long skul, ples wok, o long rot bilong kain kain amamas i no stret long ai bilong God​—dispela inap daunim laik bilong yumi long mekim ol samting i stret. No ken larim dispela samting i kamap long yu! Baibel i givim tok lukaut olsem: “Nogut yu ting, save bilong yu yet em i samting tru.” (Snd. 3:7) Mobeta yu bihainim gutpela tok Moses i bin givim long lain bilong God long bipo, em i tok: “Yupela i mas aninit long God, Bikpela bilong yumi, na lotu long em wanpela tasol. Yupela i mas holimpas strong long em.” (Lo 10:20) Sapos yumi pas tru wantaim Jehova, bai yumi bihainim pasin bilong Jisas, em Baibel i tok long em olsem: “Yu save laikim stretpela pasin, na yu no laikim tru pasin nogut.”​—Hi. 1:9.

Kisim Skul Long Ol Samting God i Wokim

19. (a) Yu save lukim wanem ol pasin bilong Jehova long ol samting em i bin wokim? (b) Olsem wanem savetingting bilong God inap helpim yumi?

¹⁹ Olsem yumi stori pinis, yumi inap lukim ol pasin bilong Jehova long ol samting em i bin wokim, na yumi inap kisim gutpela skul long ol dispela samting. Taim yumi skelim gut ol samting Jehova i bin wokim, bai yumi kirap nogut tru long savetingting bilong em. Sapos yumi wok long tingim gut savetingting bilong God, dispela bai mekim yumi i stap amamas tru long nau na lukautim yumi long bihain. (Sav. 7:12) Yes, bai yumi yet i lukim truim bilong tok i stap long Sindaun 3:​13, 18, i tok: “Man i kisim gutpela tingting na save, em i ken amamas tru. Gutpela tingting i olsem diwai bilong givim laip. Olsem na ol man i holimpas gutpela tingting, ol i gat laip i gutpela tru na ol i amamas.”

[Ol Futnot]

Yu Inap Tingim?

Yumi ken kisim wanem skul long . . .

• anis?

• mumut?

• grasopa?

• geko?

[Piksa long pes 16]

Olsem wanem? Yu save wok strong olsem anis bilong katim lip?

[Ol Piksa long pes 17]

Ol mumut i save pas gut wantaim na dispela i lukautim gut ol. Yu save mekim wankain pasin?

[Ol Piksa long pes 18]

Olsem ol grasopa, ol wokman Kristen i wok strong na i no les

[Piksa long pes 18]

Wankain olsem geko i save pas strong long ol banis samting, ol Kristen i mas pas strong long ol gutpela samting

[Kredit Lain]

Stockbyte/Getty Images