Husat Bai Abrusim Bagarap Long De Bilong Jehova?
“Wanpela De bai i kamap na bai paia i kukim olgeta manmeri bilong bikhet.”—MALAKAI 4:1.
1. Olsem wanem Malakai i stori long pinis bilong pasin nogut bilong dispela graun?
SPIRIT bilong God i kirapim profet Malakai long raitim ol tok profet long ol bikpela samting bai kamap liklik taim bihain. Ol dispela bikpela samting bai painim olgeta manmeri bilong graun. Malakai 4:1 i tok: “Harim gut. Wanpela De bai i kamap na bai paia i kukim olgeta manmeri bilong bikhet na olgeta manmeri nogut, olsem paia i save kukim kunai i drai. Long dispela De bai ol i bagarap long paia na bai ol i pinis olgeta.” Olsem wanem? Ol samting bilong dispela graun bai bagarap olgeta? Em bai i kain olsem wanpela diwai ol rop bilong en i bagarap olgeta, olsem na diwai i no inap kru gen.
2. Sampela skripsa i stori olsem wanem long de bilong Jehova?
2 Ating bai yu askim olsem, ‘Profet Malakai i tok long wanem “De” ’? Em wankain de olsem Aisaia 13:9 i tok long en: “Tru tumas, dispela taim nogut tru i kam nau, em i taim Bikpela i bin makim bilong kam wantaim bikpela belhat bilong en na bagarapim olgeta hap bilong graun na pinisim tru olgeta man na meri i save mekim sin.” Sefanaia 1:15 i tok olsem: “Long dispela De, belhat bilong God bai i kamap ples klia, na bai ol manmeri i gat bikpela hevi na bel nogut, na bai ol samting i bagarap nabaut. Na ol klaut bai i karamapim san na bikpela tudak bai i kamap.”
“Bikpela Hevi Tru”
3. De bilong Jehova em i wanem samting?
3 Long bikpela truim bilong tok profet bilong Malakai, de bilong Jehova em i wanpela hap taim Baibel i kolim olsem “bikpela hevi tru.” Jisas i tok: “Long dispela taim bai i gat bikpela hevi tru. Stat long taim graun i nupela yet na i kam inap long nau, kain hevi olsem i no bin kamap bipo. Na bihain tu bai i no gat kain hevi olsem i kamap gen.” (Matyu 24:21) Tingim ol bikpela hevi ol manmeri i bin karim, em i go bikpela moa yet bihain long 1914. (Matyu 24:7-12) Long Namba Tu Pait, winim 50 milion manmeri i dai! Tasol long taim bilong “bikpela hevi tru” ol dispela hevi bilong nau i olsem liklik samting tasol. Dispela bikpela hevi tru—em wankain hap taim olsem de bilong Jehova—bai pinis long Armagedon na pinisim taim bilong las de bilong pasin nogut bilong dispela graun.—2 Timoti 3:1-5, 13; KTH 7:14; 16:14, 16.
4. Wanem ol samting bai kamap na nau de bilong Jehova i pinis?
4 Long pinis bilong dispela de bilong Jehova, ol lain bilong Satan bai pinis olgeta. Pastaim olgeta lotu giaman bai bagarap. Bihain, Jehova bai mekim kot long ol bikpela wok bisnis na wok politik em Satan i bosim. (KTH 17:12-14; 19:17, 18) Esekiel i tok profet olsem: “Ol bai i tromoi ol gol na silva bilong ol long ol rot olsem pipia, long wanem, gol na silva i no inap helpim ol long taim Bikpela i belhat long ol.” (Esekiel 7:19) Sefanaia 1:14 i tok long dispela de olsem: “De bilong Bikpela i mekim kot bilong en, em i klostu nau na dispela De bai i kamap kwiktaim tru.” Ol tok Baibel i mekim long de bilong Jehova i mas kirapim yumi long tingting strong long bihainim ol stretpela lo bilong God.
5. Ol man i pret long nem bilong Jehova, wanem samting bai painim ol long nau na long bihain?
5 Taim Malakai i stori pinis long ol samting de bilong Jehova bai mekim long graun bilong Satan, Malakai 4:2 i kamapim tok bilong Jehova, olsem: “Yupela manmeri i save bihainim tok bilong mi bai mi kisim bek yupela long strong bilong mi. Strong bilong mi i bikpela tru olsem lait bilong san na em bai i mekim gut long yupela olsem san i save hatim skin bilong ol manmeri. Na bai yupela i gat bikpela amamas olsem ol pikinini bulmakau i lusim banis na i kalap kalap i go ausait.” “Lait bilong san” i makim Jisas Krais. Em i “lait bilong graun” long ol samting bilong spirit. (Jon 8:12) Jisas i stap olsem lait i oraitim ol man—pastaim em i oraitim ol long ol samting bilong spirit, em samting i painim yumi long nau, na long nupela taim em bai oraitim ol man long skin. Olsem Jehova i tok, ol man i kamap orait ol bai “amamas olsem ol pikinini bulmakau i lusim banis na i kalap kalap i go ausait.”
6. Ol wokman bilong Jehova bai mekim wanem bikpela bung bilong amamas long winim pait?
6 Olsem wanem long ol man i sakim ol lo bilong Jehova? Long Malakai 4:3 Jehova i tok: “Taim mi mekim ol dispela samting bai yupela [ol wokman bilong God] i daunim ol man nogut, na krungutim ol olsem das bilong graun.” Ol man i lotuim God ol bai i no insait long wok bilong bagarapim graun bilong Satan. Tasol taim ol i insait long bikpela amamas bilong winim pait i kamap bihain long de bilong Jehova, i olsem ol i “daunim ol man nogut.” Bikpela amamas i bin kamap taim Fero na ami bilong em i bagarap long solwara Retsi. (Kisim Bek 15:1-21) Na olsem tasol taim Satan na graun bilong em i bagarap pinis, bikpela bung bilong amamas long winim pait bai kamap. Ol gutpela man i abrusim de bilong Jehova bai singaut: “Yumi amamas moa yet, long wanem, em i kisim bek yumi pinis.” (Aisaia 25:9) Bikpela amamas tru bai kamap taim Jehova i kamapim long ples klia olsem i stret em i stap Nambawan Bos, na graun i kamap klin bilong ol man i ken stap bel isi long en!
Kristendom i Bihainim Pasin Bilong Ol Israel
7, 8. Long taim bilong Malakai lain Israel i stap olsem wanem long ol samting bilong spirit?
7 Ol man Jehova i orait long ol em ol man i save mekim wok bilong em, na ol i narapela kain long ol man i no save mekim olsem. Wankain samting i bin kamap taim Malakai i raitim buk bilong em. Lain Israel i bin kalabus long Babilon inap 70 yia, na bihain long dispela, long yia 537 B.C.E. hap lain bilong ol i go bek long ples. Tasol insait long 100 yia bihain long dispela, lain Israel i tromoi lotu i tru na kirap mekim pasin nogut. Planti ol i daunim nem bilong Jehova, givim baksait long ol stretpela lo bilong em, bagarapim tempel taim ol i bringim ol animal bilong mekim ofa em ol i aipas, lek nogut, na sik, na ol i katim marit wantaim ol meri ol i bin maritim taim ol i yangpela.
8 Olsem na Jehova i tokim ol: “Mi bai kam bilong skelim pasin bilong yupela. Na kwiktaim bai mi kotim ol man i save wokim posin na ol glasman na ol man i save bagarapim marit na ol man i save autim tok giaman long kot na ol bosman i no save baim gut ol wokman bilong ol na ol man i save trikim na kisim olgeta samting bilong ol meri, man bilong ol i dai pinis, na bilong ol pikinini, papa bilong ol i dai pinis, na bilong ol man bilong ol arapela kantri. Ol man i mekim dispela olgeta kain pasin, ol i no save stap aninit long mi, olsem na bai mi kotim ol. . . . Mi tasol mi Bikpela na mi no save senisim tingting bilong mi.” (Malakai 3:5, 6) Tasol Jehova i singautim ol man i laik lusim pasin nogut bilong ol: “Sapos yupela i lusim pasin nogut na kam bek long mi, mi tu bai mi lusim belhat na kisim bek yupela.”—Malakai 3:7.
9. Namba wan truim bilong tok profet bilong Malakai i kamap olsem wanem?
9 Ol dispela tok i bin kamap tru long taim bilong ol aposel tu. Hap lain bilong ol Juda i mekim wok bilong Jehova na kamap hap bilong nupela lain Kristen em spirit holi i bin makim ol, na bihain ol man bilong ol narapela lain tu i insait long dispela lain. Tasol klostu olgeta Israel bilong skin i givim baksait long Jisas. Olsem na Jisas i tokim lain Israel: “Harim. Nau ples bilong yupela bai i bagarap na i stap nating.” (Matyu 23:38; 1 Korin 16:22) Olsem Malakai 4:1 i tok profet long en, long 70 C.E., wanpela ‘De bilong bagarap long paia’ i painim lain Israel bilong skin. Taun Jerusalem na tempel bilong en i bagarap, na ol i tok winim wan milion manmeri i dai, long wanem, ol i hangre, ol i pait long kisim namba bilong bosim ol man, na ami bilong Rom i pait long ol. Tasol ol man i mekim wok bilong Jehova i abrusim dispela bikpela hevi.—Mak 13:14-20.
10. Long wanem rot ol manmeri na ol pris pasto i bihainim pasin bilong lain Israel long taim bilong ol aposel?
10 Ol manmeri, na moa yet lain Kristendom i bin bihainim pasin bilong lain Israel long taim bilong ol aposel. Ol lida na ol manmeri bilong Kristendom i laikim ol bilip bilong lotu bilong ol yet na ol i no laikim ol tok i tru bilong God em Jisas i bin lainim ol man long en. Ol pris pasto i gat bikpela asua tru long dispela samting. Ol i no laik mekim wok long nem bilong Jehova, na ol i rausim dispela nem long Baibel bilong ol. Ol i daunim nem bilong Jehova taim ol i lainim ol man long ol tok Baibel i no as bilong en, olsem ol bilip haiden i tok ol man bai kisim pen oltaim long bikpaia, God Triwan, yumi gat wanpela spirit i no save dai, na evolusen. Olsem na ol i no litimapim nem bilong Jehova olsem i stret ol i mas mekim, wankain olsem ol pris long taim bilong Malakai i no bin mekim.
11. Olsem wanem ol lotu bilong graun i kamapim klia ol i lotu tru long husat?
11 Taim bilong las de i kirap long 1914, na long dispela taim ol lotu i tok ol i Kristen ol i kamapim klia ol i lotu tru long husat. Long taim bilong namba wan na namba tu bikpela pait, ol i kirapim lain bilong ol long pait long ol narapela kantri ol i no stap wanbel wantaim ol, maski ol i mas kilim i dai ol wanlotu bilong ol. Tok Bilong God i kamapim long ples klia ol man i bihainim tok bilong Jehova na ol man i no save bihainim. Em i tok: “Sapos yumi laik save husat em i pikinini bilong God, na husat em i pikinini bilong Satan, orait yumi ken save olsem, man i no mekim stretpela pasin, em i no bilong God. Na man i no save laikim tru ol arapela pikinini bilong God, em tu i no bilong God. Bipo tru yupela i bin harim tok olsem, yumi wan wan i mas laikim tru ol arapela. Yumi no ken i stap olsem Kein. Em i man bilong Satan, na em i kilim i dai brata bilong en.”—1 Jon 3:10-12.
Truim Tok Profet
12, 13. Ol wokman bilong God i bin truim wanem ol tok profet long taim bilong yumi?
12 Long pinis bilong Namba Wan Pait long 1918, ol wokman bilong Jehova inap luksave olsem Jehova i no orait long Kristendom na olgeta narapela lotu giaman. Kirap long dispela taim, em i bin singautim ol man i gat gutpela bel: “Yupela ol manmeri bilong mi, yupela i mas lusim dispela ples na i kam ausait. Nogut yupela i poroman wantaim em long ol sin em i save mekim. Na nogut yupela bai i poroman wantaim em tu long taim em i kisim pe nogut bilong ol dispela sin. Em i hipim ol sin bilong en i kam antap inap long heven. Na God i tingim gut olgeta pasin nogut em i bin mekim.” (KTH 18:4, 5) Ol manmeri i gat laik tru long lotu long Jehova, Jehova i kirap mekim ol i kamap klin long ol samting nogut bilong lotu giaman, na ol i kirap autim gutnius bilong Kingdom long olgeta hap, em wanpela wok ol i mas pinisim paslain long pinis bilong pasin nogut bilong dispela graun.—Matyu 24:14.
13 Dispela i kamap bilong truim tok profet bilong Malakai 4:5, em Jehova i tok: “Dispela De bilong mi em i bikpela De na bai mi mekim olgeta manmeri i pret nogut tru. Tasol pastaim bai mi salim profet Elaija i kam long yupela na bihain dispela De bai i kamap.” Elaija i bin makim Jon na namba wan truim bilong dispela tok profet i kamap long Jon Bilong Baptais. Jon i mekim wankain wok olsem Elaija taim em i baptaisim ol Juda i bel hevi long ol rong ol i bin mekim long Lo Bilong Moses. Na bikpela samting moa, Jon i redim rot bilong Mesaia. Tasol wok bilong Jon i olsem liklik truim tasol bilong tok profet bilong Malakai. Jisas i tok Jon em i namba tu Elaija, tasol tok bilong Jisas i makim olsem wok bilong Elaija bai kamap long bihain tu.—Matyu 17:11, 12.
14. Yumi mas mekim wanem bikpela wok paslain long pinis bilong pasin nogut bilong dispela graun?
14 Tok profet bilong Malakai i soim olsem dispela bikpela wok bilong Elaija bai kamap paslain long “bikpela De” bilong Jehova. Dispela de bai pinis long Armagedon, em pait bilong bikpela de bilong God i Gat Olgeta Strong i kam klostu pinis. Dispela i makim olsem paslain long pinis bilong pasin nogut bilong dispela graun na paslain long kirap bilong Taim Bilong Wan Tausen Yia bilong Kingdom bilong God i stap aninit long King Jisas Krais, ol man bai autim tok wankain olsem Elaija i bin mekim. Na olsem dispela tok profet i tok, taim Jehova i no bagarapim yet pasin nogut bilong dispela graun, lain Elaija bilong nau na planti milion Kristen i tingting long kisim laip long graun, ol i givim bel long kamapim bek lotu i tru, na litimapim nem bilong Jehova, na lainim ol man i olsem sipsip long tok i tru bilong Baibel.
Jehova i Blesim Ol Wokman Bilong Em
15. Olsem wanem Jehova i save tingim ol wokman bilong em?
15 Jehova i save blesim ol man i mekim wok bilong em. Malakai 3:16 i tok: “Bihain ol manmeri i save stap aninit long Bikpela na i harim tok bilong en, ol i toktok long ol yet, na Bikpela i harim toktok bilong ol. Na Bikpela i tok, na long heven ol i raitim wanpela buk i gat nem bilong ol manmeri i save stap aninit long Bikpela na i tingting long em oltaim.” Kirap long taim bilong Abel, God i bin raitim long wanpela buk nem bilong ol man em bai givim laip oltaim long ol. Long ol dispela man Jehova i tok: “Yupela i mas tilim olgeta samting bilong yupela long 10-pela hap na bringim wanpela hap olgeta long haus bilong mi. Olsem na ol wokman bilong mi bai i gat planti kaikai. Yupela i mekim olsem na bai mi ken givim planti gutpela samting long yupela na yupela i no ken sot. Bihainim dispela rot na bai yupela i ken save olsem tok bilong mi em i tru olgeta.”—Malakai 3:10.
16, 17. Olsem wanem Jehova i bin mekim gut long lain bilong em na blesim wok bilong ol?
16 Jehova i bin mekim gut tru long ol man i givim bel tru long em. Olsem wanem em i bin mekim? Wanpela samting i olsem: Save bilong yumi long laik bilong God i bin go bikpela. (Sindaun 4:18; Daniel 12:10) Narapela samting, em wok autim tok i bin karim planti gutpela kaikai. Planti manmeri i gat gutpela bel i bin joinim ol long mekim lotu i tru, na ol i kamap lain “planti manmeri tru . . . ol i bilong olgeta lain man na bilong olgeta kantri na bilong olgeta kain skin na bilong olgeta tok ples. . . . Ol i singaut strong olsem, ‘God bilong yumi em i save sindaun long sia king bilong en, na Pikinini Sipsip, tupela tasol i save kisim bek yumi na mekim yumi i stap gut.’ ” (KTH 7:9, 10) Dispela bikpela lain i bin kamap ples klia tru, na namba bilong ol man i lotu long Jehova i winim 6 milion na ol i stap long 93,000 kongrigesen long olgeta hap!
17 Narapela samting i kamapim klia blesing bilong Jehova em olsem: Ol Witnes Bilong Jehova i save wokim ol buk na nius bilong Baibel em ol i tilim long olgeta hap bilong graun, winim olgeta narapela nius long bipo yet na i kam inap nau. Nau long olgeta mun ol i wokim inap 90 milion nius Wastaua na Kirap! Ol i wokim Wastaua long 144 tok ples, na Kirap! long 87 tok ples. Buk bilong stadi long Baibel, Tok i Tru i Bringim Man Long Laip Oltaim, ol i bin kamapim long 1968, na ol i bin wokim inap olsem 107 milion long 117 tok ples. Long 1982 ol i wokim buk Yu Inap i Stap Oltaim Long Paradais Long Graun, na ol i wokim inap olsem 81 milion long 131 tok ples. Na buk Save i Bringim Man Long Laip Oltaim i kamap long 1995, ol i wokim pinis inap 85 milion long 154 tok ples. Long 1996 ol i wokim buklet God i Laik Yumi Mas Mekim Wanem? na ol i wokim pinis inap 150 milion long 244 tok ples.
18. Bilong wanem yumi gat planti gutpela samting bilong spirit, maski ol man i birua long yumi?
18 Ol i bin kisim ol dispela gutpela samting bilong spirit, maski lain bilong Satan i bin birua tru long ol inap longpela taim. Dispela i soim olsem tok i stap long Aisaia 54:17 i tru: “Tasol i no gat wanpela bilong ol dispela samting bilong pait inap bagarapim yu. Na bai yu sanap strong na bekim tok bilong ol man i sutim ol kain kain tok long yu. Long dispela pasin mi save was gut long olgeta wokman bilong mi na mekim ol i win. Mi Bikpela, mi tok pinis.” Ol wokman bilong Jehova i save olsem bikpela truim bilong Malakai 3:17 i kamap long ol, na dispela i mekim gut bel bilong ol. Em i tok: “Dispela ol lain bai i stap lain bilong mi tasol. Long dispela bikpela De mi bin makim, bai ol dispela lain i stap manmeri tru bilong mi.”
Amamas Long Mekim Wok Bilong Jehova
19. Olsem wanem ol man i mekim wok bilong Jehova i narapela kain long ol man i no mekim?
19 Ol gutpela wokboi bilong Jehova na ol wokboi bilong Satan i narapela narapela kain na dispela samting i wok long kamap klia moa. Malakai 3:18 i tok profet olsem: “Long dispela taim bai yupela i ken lukim gen pasin mi save mekim long ol stretpela manmeri i save bihainim mi, na pasin mi save mekim long ol man nogut, em ol man i save sakim tok bilong mi.” Wanpela samting i makim ol man i mekim wok bilong Jehova, em ol i amamas tru long mekim dispela wok. Wanpela as bilong dispela em ol i tingim ol gutpela samting bai kamap long bihain. Ol i bilip tru long Jehova taim em i tok: “Lukim, mi wokim nupela skai na nupela graun. Na ol man bai i no inap tingim moa ol samting i bin kamap bipo. Yupela i ken bel gut na amamas oltaim long nupela samting nau mi wokim.”—Aisaia 65:17, 18; Song 37:10, 11, 29; KTH 21:4, 5.
20. Bilong wanem yumi lain bilong i stap amamas tru?
20 Yumi bilip long tok promis bilong Jehova olsem lain bilong em i stap gut long em, ol bai abrusim bagarap long bikpela de bilong em na go insait long nupela taim. (Sefanaia 2:3; KTH 7:13, 14) Na maski sampela i dai paslain long nupela taim, long wanem, ol i lapun, o kisim sik, o bagarap i painim ol, Jehova i tok promis olsem em bai tingim ol na kirapim bek ol bilong ol i ken kisim laip oltaim. (Jon 5:28, 29; Taitus 1:2) Tru, yumi olgeta i karim sampela hevi taim yumi wet long dispela de bilong Jehova, tasol i gat as tru na yumi ken stap amamas, winim olgeta narapela manmeri bilong dispela graun.
Bai Yu Bekim Olsem Wanem?
• De bilong Jehova em wanem samting?
• Olsem wanem ol lotu bilong dispela graun i bihainim pasin bilong lain Israel bilong bipo?
• Ol wokman bilong Jehova i truim wanem ol tok profet?
• Olsem wanem Jehova i bin mekim gut long lain bilong em?
[Piksa long pes 21]
“Paia i kukim” Jerusalem long taim bilong ol aposel
[Ol Piksa long pes 23]
Jehova i save lukautim ol man i mekim wok bilong em
[Ol Piksa long pes 24]
Ol wokman bilong Jehova i wetim ol gutpela samting bai kamap, olsem na ol i stap amamas tru