Pasin Bilong Bihainim Ol Lo Bilong Jehova i Litimapim Nem Bilong Em
“Bai mi tenkyu long em na tokaut long [“litimapim,” “NW”] biknem bilong em.”—SONG 69:30.
1. (a) Bilong wanem i stret yumi litimapim nem bilong Jehova? (b) Olsem wanem yumi litimapim nem bilong em long pasin bilong tok tenkyu?
JEHOVA em i God i gat olgeta strong, King bilong heven na graun, na Man bilong wokim yumi. Olsem na i stret yumi litimapim nem bilong em na tokaut long ol samting em i laik mekim. Pasin bilong litimapim nem bilong Jehova em olsem yumi ting em i nambawan tru, na yumi litimapim nem bilong em long tok na long pasin bilong yumi. Bilong mekim olsem wantaim pasin bilong “tenkyu” long em, oltaim yumi mas tenkyu long ol samting em i mekim bilong helpim yumi na long ol samting em bai mekim long bihain. Kamapim Tok Hait 4:11 i soim wanem kain tingting yumi mas kisim—long dispela ves ol gutpela spirit long heven i tokaut: “Bikpela, yu God bilong mipela. Yu tasol yu stap antap tru na inap tru long olgeta man i ken amamas long yu na litimapim nem bilong yu na i stap aninit long strong bilong yu. Long wanem, yu bin wokim olgeta samting. Long laik bilong yu yet yu bin mekim olgeta samting i kamap, na nau dispela olgeta samting i stap.” Olsem wanem yumi litimapim nem bilong Jehova? Long rot bilong kisim save long em na mekim ol samting em i laik bai yumi mas mekim. Yumi mas i gat wankain tingting olsem bilong man bilong raitim song. Em i tok: “Yu God bilong mi, mi laik yu skulim mi gut bai mi bihainim laik bilong yu.”—Song 143:10.
2. Jehova i mekim wanem long ol man i save litimapim nem bilong em na ol man i no save litimapim nem bilong em?
2 Jehova i save tingim tru ol man i litimapim nem bilong em. Long dispela as em i “save mekim gut tru long ol man i wok long painim em.” (Hibru 11:6) Ol man i mekim olsem ol i kisim wanem gutpela samting? Long beten Jisas i tokim Papa bilong em long heven: “Laip bilong i stap gut oltaim, em i olsem. Ol man i kisim dispela laip, ol i save long yu, yu wanpela tasol yu God tru. Na ol i save long Jisas Krais, em yu bin salim i kam.” (Jon 17:3) Em nau, ol man i ‘tenkyu long God na litimapim biknem bilong em’ ol bai “kisim graun God i givim ol, na bai ol i stap oltaim long en.” (Song 37:29) Tasol ol man nogut “i no inap painim gutpela taim.” (Sindaun 24:20) Na long dispela taim bilong las de, em i bikpela samting long yumi litimapim nem bilong Jehova, long wanem, klostu nau em bai bagarapim ol man nogut na lukautim ol stretpela man na ol i no ken bagarap. “Dispela graun bai i pinis, na olgeta pasin bilong dispela graun, . . . ol tu bai i pinis wantaim. Tasol man i bihainim tok bilong God, em bai i stap oltaim.”—1 Jon 2:17; Sindaun 2:21, 22.
3. Bilong wanem yumi mas putim gut yau long tok bilong Buk Malakai?
3 Ol tok i kamapim laik bilong Jehova i stap long Baibel, long wanem, “spirit bilong God yet i bin kamapim olgeta tok i stap long buk bilong God.” (2 Timoti 3:16) Baibel i gat planti stori i kamapim pasin bilong Jehova long mekim gut long ol man i litimapim nem bilong em na i stori long ol samting i painim ol man i no save mekim olsem. Wanpela stori olsem i kamap long Israel long taim bilong profet Malakai. Long yia 443 B.C.E. samting, Malakai i raitim buk i gat nem bilong em. Long dispela taim Nehemia em i gavena bilong Juda. Dispela gutpela buk i gat strong na i gat ol tok na tok profet ol i bin raitim “bilong givim tingting long yumi ol man i stap long dispela taim nau, em taim dispela graun klostu i laik pinis.” (1 Korin 10:11) Pasin bilong putim gut yau long tok bilong Malakai inap helpim yumi long redi long “bikpela De” bilong Jehova, taim Em i pinisim pasin nogut bilong dispela graun.—Malakai 4:5.
4. Malakai sapta 1 i kirapim yumi long tingim wanem 6-pela samting?
4 Olsem wanem buk bilong Malakai, em i raitim inap olsem 2,400 yia i go pinis, inap helpim yumi long dispela taim na redim yumi long bikpela de bilong Jehova? Namba wan sapta i kirapim yumi long tingim 6-pela samting i bikpela samting long wok bilong yumi long litimapim nem bilong Jehova long pasin bilong tenkyu long em bambai em i ken orait long yumi na yumi ken kisim laip oltaim: (1) Jehova i save laikim tru lain bilong em. (2) Yumi mas soim olsem yumi tingim tru ol samting i holi. (3) Jehova i laik bai yumi givim ol nambawan gutpela samting bilong yumi long em. (4) Pasin bilong laikim tru ol narapela i kirapim man long mekim lotu i tru, pasin mangal, nogat. (5) Lotu long God long pasin em i laikim i no wanpela samting i save putim hevi long man. (6) God bai skelim olgeta pasin yumi mekim. Orait long dispela namba wan stori bilong ol dispela tripela stori long Buk Malakai, yumi ken tingim olgeta dispela 6-pela samting taim yumi skelim Malakai sapta 1.
Jehova i Laikim Tru Lain Bilong Em
5, 6. (a) Bilong wanem Jehova i laikim tru Jekop? (b) Sapos yumi bihainim pasin bilong Jekop long stap gut long God, yumi inap kisim wanem ol samting?
5 Pasin sori bilong Jehova i kamap ples klia long ol ves i stap long kirap bilong Buk Malakai. Kirap bilong buk i tok: “Bikpela i givim dispela tok long Malakai bilong em i ken autim long ol Israel.” Na God i tok tu olsem: “Longtaim tru mi laikim yupela tumas.” Long dispela ves yet Jehova i tok: “Mi laikim Jekop.” Jekop em i man bilong bilip long Jehova. Bihain, Jehova i senisim nem bilong Jekop i kamap Israel, na Jekop i kamap tumbuna papa bilong lain Israel. Jekop em i wanpela bilipman, olsem na Jehova i laikim em tru. Jehova i laikim tu ol manmeri bilong Israel i gat wankain tingting long Em olsem Jekop.—Malakai 1:1, 2.
6 Sapos yumi laikim tru Jehova na stap gut long lain bilong em, tok i stap long 1 Samuel 12:22 i ken mekim gut bel bilong yumi. Em i tok: “Em [“Jehova,” NW ] i tingting long biknem na promis bilong en na em i no inap givim baksait long yupela.” Jehova i save laikim tru lain bilong em na i givim ol gutpela samting long ol, na bihain em bai givim laip oltaim long ol. Olsem na Baibel i tok: “Yu mas bilip tru long God, na mekim gutpela pasin. Yu mekim olsem na bai yu stap gut oltaim long graun bilong yu, na i no gat wanpela samting i ken bagarapim yu. Yu mas amamas long Bikpela, na em bai i givim yu ol samting yu laikim tru.” (Song 37:3, 4) Pasin bilong yumi long laikim tru Jehova i insait long namba 2 samting Malakai sapta 1 i stori long en.
Soim Olsem Yu Tingim Tru Ol Samting i Holi
7. Bilong wanem Jehova i no laikim Iso?
7 Long Malakai 1:2, 3, Jehova i tok: “Mi laikim Jekop.” Tasol bihain em i tok: “Mi no laikim Iso.” Bilong wanem i olsem? Jekop i litimapim nem bilong Jehova, tasol brata bilong em, Iso, nogat. Iso i gat nem Idom tu. Long Malakai 1:4, ol i kolim kantri Idom olsem ples bilong ol lain pipel nogut, na i tokaut long pasin nogut bilong ol. Dispela nem Idom (olsem “Retpela”) ol i givim long Iso bihain long taim em i salim gutpela namba bilong em—olsem namba wan pikinini—long Jekop bilong kisim retpela sup. Stat 25:34 i tok: “Iso i soim olsem em i ting namba bilong en olsem namba wan pikinini em i samting nating.” Aposel Pol i kirapim ol wanbilip long was gut, “nogut wanpela man i bihainim pasin pamuk. Nogut wanpela man i givim baksait long God, olsem bipo Iso i bin mekim. Em i laik baim kaikai wanpela taim tasol, na em i tromoi olgeta gutpela samting em inap kisim olsem namba wan pikinini man bilong papa bilong en.”—Hibru 12:14-16.
8. Wanem samting i kirapim Pol long tok Iso i olsem man i mekim pasin pamuk?
8 Bilong wanem Pol i bungim pasin bilong Iso wantaim pasin pamuk? Long wanem, sapos man i gat wankain tingting olsem Iso, dispela inap mekim na man i no ting ol samting holi i bikpela samting. Na dispela pasin inap kirapim man long mekim ol bikpela rong, olsem pasin pamuk. Olsem na yumi olgeta i ken askim yumi yet olsem: ‘Sampela taim mi gat laik long senisim gutpela samting mi inap kisim olsem wanpela Kristen—em laip oltaim—bilong kisim samting bilong nau tasol olsem wanpela plet sup? Mi save daunim ol samting i holi, maski mi no luksave olsem mi mekim olsem?’ Iso i gat laik long inapim kwik laik bilong skin. Em i tokim Jekop: “[“Hariap,” NW ] givim mi sampela bilong dispela retpela sup nau yu kukim.” (Stat 25:30) Sori tru, sampela wokman bilong God i bin tok: “Hariap! Maski long wet long taim bilong stretim gut marit.” Laik bilong ol long mekim maritpasin, maski ol i kisim wanem hevi long en, i bin kamap olsem plet sup bilong ol.
9. Olsem wanem yumi inap holimpas pasin bilong pret long Jehova?
9 Yumi no ken daunim ol samting i holi na ting pasin bilong stap klin, na stap gut long God, na ol samting bilong spirit yumi kisim i samting nating tasol. Yumi no ken bihainim pasin bilong Iso—yumi mas bihainim pasin bilong Jekop na pret long God na soim olsem yumi tingim tru ol samting i holi. Olsem wanem yumi inap mekim? Yumi mas bihainim gut ol lo bilong Jehova. Dispela i bringim yumi long namba 3 samting Malakai sapta 1 i tok long en. Em wanem samting?
Givim Nambawan Gutpela Samting Bilong Yumi Long Jehova
10. Long wanem rot ol pris i tingim alta bilong Jehova i samting nating?
10 Ol pris bilong Juda i wok long tempel long Jerusalem long taim bilong Malakai ol i no givim ol nambawan gutpela ofa long Jehova. Malakai 1:6-8 i tok: “Pikinini i save aninit long papa bilong en, na wokman tu i save bihainim tok bilong bosman bilong en. Olsem na yupela harim. Mi papa bilong yupela. Bilong wanem yupela i no save aninit long mi? Mi bos bilong yupela. Olsem wanem na yupela i no save bihainim tok bilong mi?” Ol pris i askim olsem: “Mipela i givim baksait long yu olsem wanem?” Jehova i tok: “Yupela i save kukim ol ofa nogut long alta bilong mi.” Ol pris i askim: “Mipela i bin daunim nem bilong yu olsem wanem?” Orait Jehova i tokim ol: “Yupela i ting alta bilong mi em i samting nating, na long dispela pasin yupela i daunim nem bilong mi.” Ol dispela pris i soim olsem ol i tingim alta bilong Jehova i samting nating taim ol i ofaim wanpela animal nogut, na ol i ting “em i stret” long mekim olsem.
11. (a) Jehova i tok wanem long ol ofa nogut? (b) Bilong wanem ol narapela tu i gat asua?
11 Jehova i toktok gut wantaim ol long ol ofa em i no orait long en: “Sapos yupela i givim kain abus olsem long namba wan gavman bilong yupela, yupela i ting em bai i amamas long yupela, a? O yupela i ting em bai i bekim wanpela gutpela samting long yupela?” Nogat, gavena bilong ol i no ken laikim kain presen olsem. Na King bilong heven na graun i no ken laikim tru ol kain ofa nogut! Na i no ol pris tasol i gat asua. Tru, ol i daunim nem bilong Jehova taim ol i ofaim ol animal. Tasol olsem wanem? Ol narapela man i no gat asua? Nogat. Ol i gat asua! Ol i bin makim ol dispela animal i aipas, lek nogut, na sik, na bringim i kam long ol pris bilong ol i ken mekim ofa long en. Ol i mekim bikpela rong tru!
12. Wanem samting i helpim yumi long givim nambawan gutpela samting bilong yumi long Jehova?
12 Pasin bilong givim nambawan gutpela samting bilong yumi long Jehova em i rot bilong soim olsem yumi laikim em tru. (Matyu 22:37, 38) Oganaisesen bilong Jehova long nau i no bihainim pasin bilong ol pris nogut long taim bilong Malakai. Oganaisesen i save givim yumi planti gutpela tok bilong Baibel i helpim yumi long litimapim nem bilong Jehova na tok tenkyu long em long rot bilong bihainim ol lo bilong em. Namba 4 bikpela samting Malakai sapta 1 i stori long en i insait long dispela samting.
Pasin Sori i Kirapim Man Long Mekim Lotu i Tru, Pasin Mangal, Nogat
13. Ol pris i mekim wanem na dispela i soim olsem pasin bilong mangal long mani i kirapim ol long mekim wok bilong ol?
13 Ol pris long taim bilong Malakai ol i tingim ol yet tasol, ol i no gat pasin sori, na ol i mangal long mani. Olsem wanem yumi save long dispela? Malakai 1:10 i tok: “Mobeta wanpela man i pasim ol dua bilong haus bilong mi, bai yupela i no inap i go insait na laitim paia bilong kukim ol dispela ofa nogut long alta bilong mi. Mi no save amamas long pasin bilong yupela. Na bai mi no ken kisim ol ofa yupela i bringim i kam long mi.” Em nau, ol dispela pris i mangal long mani ol i tokim ol man long baim ol liklik wok ol pris i save mekim long tempel, olsem ol i mas baim ol pris long pasim ol dua na laitim paia long ol alta! Olsem na yumi no kirap nogut long Jehova i no amamas long ofa bilong ol!
14. Bilong wanem yumi ken tok olsem pasin sori i kirapim ol Witnes Bilong Jehova long mekim wok bilong ol?
14 Pasin bilong ol pris long Jerusalem bilong bipo long mangal long mani na tingim ol yet tasol, dispela inap kirapim yumi long tingim tok bilong Baibel i tok olsem ol man i save mangal ol bai i no inap i go insait long Kingdom bilong God. (1 Korin 6:9, 10) Taim yumi tingim pasin bilong ol dispela pris long tingim ol yet tasol, dispela inap helpim yumi long amamas moa yet long wok autim tok ol Witnes Bilong Jehova i save mekim long olgeta hap. Yumi mekim dispela wok long laik bilong yumi yet, yumi no askim wanpela man long baim yumi long mekim wok. Nogat. Yumi no save “mekim wok bisnis long tok bilong God.” (2 Korin 2:17) Olsem Pol, yumi olgeta wan wan inap tok olsem: “Mi bin [“amamas long,” NW ] autim gutnius bilong God long yupela, na mi no bin kisim pe long dispela wok.” (2 Korin 11:7) Pol i tok, ‘mi bin amamas long autim gutnius.’ Dispela i givim tingting long yumi long namba 5 samting Malakai sapta 1 i stori long en.
Pasin Bilong Lotu Long God i No Wanpela Samting i Putim Hevi Long Man
15, 16. (a) Ol pris i gat wanem kain tingting long wok bilong mekim ol ofa? (b) Ol Witnes Bilong Jehova i mekim ol ofa bilong ol olsem wanem?
15 Ol pris long Jerusalem bilong bipo i no gat bilip ol i ting wok bilong mekim ol ofa em i wanpela wok nating ol i les long mekim. Em i givim hatwok long ol. Long Malakai 1:13, God i tokim ol olsem: “Yupela i save tok, ‘E, mipela i les pinis long mekim ol ofa.’ Na dispela i soim olsem yupela i no laikim mi.” Ol dispela pris i daunim ol samting holi bilong God. Yumi mas beten askim God long helpim yumi bambai yumi no ken kamap wankain olsem ol dispela pris. Yumi mas i gat wankain tingting olsem i stap long 1 Jon 5:3: “Sapos yumi laikim tru God, orait yumi save bihainim ol lo bilong en. Na ol lo bilong en i no givim hevi long yumi.”
16 Yumi mas amamas long givim ol ofa bilong spirit long God. Yumi no ken ting dispela i wanpela hatwok yumi les long mekim. Yumi mas bihainim dispela tok: “Yupela i mas beten olsem, ‘God, yu ken lusim olgeta sin bilong mipela, na kisim ol gutpela samting mipela i laik givim yu. . . . Mipela bai i mekim ol gutpela pasin bipo mipela i bin promis long mekim.’ ” (Hosea 14:2) Ol dispela “gutpela pasin” i makim ol ofa bilong spirit, em ol tok yumi mekim bilong litimapim nem bilong Jehova na tokaut long laik bilong em. Hibru 13:15 i tok: “Oltaim yumi mas givim biknem long God long nem bilong Jisas, na dispela pasin i mas i stap olsem ofa yumi save givim long God. Yes, oltaim maus bilong yumi i mas litimapim nem bilong en.” Yumi amamas long ol ofa bilong spirit yumi mekim, long wanem, ol i soim olsem yumi laikim tru God, na yumi no mekim nating tasol ol dispela ofa, nogat. Dispela i bringim yumi long namba 6 samting yumi ken kisim save long en long Malakai sapta 1.
God Bai Skelim Yumi Olgeta
17, 18. (a) Bilong wanem Jehova i tok “man bilong giaman em i mas bagarap”? (b) Ol dispela man bilong giaman ol i no bin tingting long wanem samting?
17 God i skelim pasin bilong ol manmeri i stap long taim bilong Malakai, na em bai mekim wankain long yumi tu. (Rom 14:12; Galesia 6:5) Olsem na Malakai 1:14 i tok: “Mi Bikpela, mi tok olsem, man bilong giaman em i mas bagarap. Dispela kain man i gat ol gutpela abus long banis bilong en na em i promis pinis long givim long mi. Tasol em i save kisim ol abus nogut na mekim ofa long mi.” Man i gat wanpela lain animal, i no olsem em i gat wanpela animal tasol—olsem wanpela sipsip samting—na nau em inap givim dispela wanpela animal tasol. Nogat. Taim em i makim wanpela animal bilong mekim ofa long en, i no olsem em i mas makim wanpela animal i aipas, o lek nogut, o sik. Sapos em i givim wanpela animal nogut, dispela i makim olsem em i daunim ol samting holi bilong Jehova, long wanem, man i gat planti animal, em inap painim wanpela i no gat sik samting!
18 Olsem na i gat as tru na Jehova i tok man bilong giaman em i mas bagarap, em man i gat gutpela animal bilong givim tasol em i bringim—o pulim i kam—wanpela animal i aipas, lek nogut, o sik, i go long pris bilong em i ken mekim ofa long en. Tasol i no gat wanpela liklik tok i kamapim olsem ol pris i kolim tok bilong Lo na tok olsem i no stret long ofaim animal i gat sik samting. (Wok Pris 22:17-20) Ol man i gat gutpela tingting, ol i luksave olsem gavena bilong ol bai i no amamas sapos ol i traim long givim kain presen olsem long em. Tasol nau ol i laik mekim olsem long King bilong heven na graun, Jehova, em i winim tru olgeta gavena. Malakai 1:14 i tok: “Mi bikpela king, na olgeta lain pipel i save pret na aninit long mi.”
19. Yumi gat laik long wanem samting i mas kamap? Yumi mas wok long mekim wanem ol samting?
19 Yumi ol wokman bilong God i stap gut long em, yumi gat bikpela laik tru long de i mas kamap na bai olgeta manmeri i litimapim nem bilong Nambawan King, Jehova. Long dispela taim, “olgeta samting long graun bai i save tru long Bikpela.” (Aisaia 11:9) Tasol nau long dispela taim yumi mas givim bel tru long bihainim ol lo bilong Jehova na mekim wankain tok olsem man bilong raitim song i tok: “Bai mi tenkyu long em na tokaut long [olsem “litimapim,” NW ] biknem bilong em.” (Song 69:30) Bilong yumi ken mekim olsem, Malakai i gat sampela tok moa em bilong helpim yumi. Olsem na long narapela tupela stori i kamap bihain long dispela, gutpela sapos yumi putim gut yau long ol narapela hap bilong Buk Malakai.
Yu Inap Tingim?
• Bilong wanem yumi mas litimapim nem bilong Jehova?
• Bilong wanem Jehova i no orait long ol ofa ol pris i mekim long taim bilong Malakai?
• Olsem wanem yumi mekim ol ofa bilong litimapim nem bilong Jehova?
• Wanem samting i mas kirapim yumi long mekim lotu i tru?
[Piksa long pes 9]
Tok profet bilong Malakai i tok long taim bilong yumi
[Piksa long pes 10]
Iso i no tingim ol samting i holi
[Piksa long pes 11]
Ol pris na ol manmeri i mekim ol ofa God i no ken orait long en
[Piksa long pes 12]
Long olgeta hap ol Witnes Bilong Jehova i mekim ol ofa bilong litimapim nem bilong God, no gat pe