Yu Inap Winim Ol Hevi
LONG dispela taim nogut, planti i karim ol bikpela hevi. Tasol pasin bilong laikim tru God na bihainim ol stiatok bilong em i helpim ol Kristen long karim ol hevi. Olsem wanem dispela i helpim ol? Tok piksa bilong Jisas Krais i bekim dispela askim. Em i tok ol gutpela disaipel bilong em i olsem “wanpela man i gat gutpela tingting, na em i wokim haus bilong en antap long ples ston.” Jisas i tok: “Ren i kam daun, na tait bilong wara i kamap, na win i kirap strong, na ol dispela samting i sakim dispela haus. Tasol em i no pundaun, long wanem, simen bilong dispela haus em i pas strong tru long bikpela bikpela ston insait long graun.”—Matyu 7:24, 25.
Yumi luksave olsem maski dispela man long tok piksa i gat gutpela tingting, hevi i painim em—olsem bikpela ren, tait wara, na strongpela win i makim. Olsem na Jisas i no tok ol disaipel bilong em bai abrusim ol hevi na stap bel isi oltaim, nogat. (Song 34:19; Jems 4:13-15) Tasol em i tok ol gutpela wokman bilong God inap redi na karim ol bikpela hevi olsem.
Jisas i kirapim tok piksa bilong em na i tok: “Orait man i harim dispela tok bilong mi na i bihainim, em i olsem wanpela man i gat gutpela tingting, na em i wokim haus bilong en antap long ples ston.” Jisas i no tok long wanpela man bai wokim haus tru tru, nogat, em i tok long man i kamapim ol gutpela tingting na pasin Kristen. Ol man i bihainim tok bilong Krais i save tingting gut na skelim gut ol samting. Ol i save bihainim ol tok ol i lainim, olsem na ol tok bilong Krais i olsem as bilong laik bilong ol long mekim ol samting na pasin ol i bihainim. Dispela ston long tok piksa bilong Jisas i stap insait tru long graun. Man long tok piksa bilong Jisas i mas hatwok long digim “hul i go daun” bilong kamap long dispela ston. (Luk 6:48) Na olsem tasol, ol disaipel bilong Jisas i wok strong tru bilong kamapim ol gutpela pasin na bai ol i ken i go klostu long God.—Matyu 5:5-7; 6:33.
Wanem samting i kamap taim ol bikpela hevi i traim pasin bilong ol disaipel bilong Jisas long stap gut long wok Kristen bilong ol? Pasin bilong ol long bihainim tok bilong Krais na ol gutpela pasin Kristen bilong ol bai i stap olsem samting i givim strong long ol long taim bilong hevi, na bikpela samting moa long taim Armagedon bai kamap. (Matyu 5:10-12; KTH 16:15, 16) Em nau, pasin bilong bihainim ol tok bilong Jisas i mekim na planti i winim ol hevi i olsem bikpela win na ren. Yu tu inap mekim olsem.—1 Pita 2:21-23.