“God Em i Man Bilong Pasin Laikim”
“Man i no gat pasin laikim em i no save long God, long wanem, God em i Man bilong pasin laikim.”—1 JON 4:8, NW.
1-3. (a) Baibel i mekim wanem bikpela tok long pasin laikim bilong Jehova? Olsem wanem dispela tok i narakain? (b) Wanem as na Baibel i tok “God em i Man bilong pasin laikim”?
OLGETA pasin bilong Jehova i nambawan, na gutpela olgeta, na yumi laikim ol tru. Tasol yumi laikim moa yet pasin laikim bilong em. Pasin laikim em i nambawan samting i save kirapim yumi long i go klostu long Jehova. Na gutpela tru, pasin laikim em i nambawan bikpela pasin bilong em. Yumi save olsem wanem?
2 Tru, God i gat bikpela strong, na em i bihainim stretpela pasin long olgeta taim, na em i bihainim gutpela tingting na save long olgeta samting em i mekim. Em i as tru bilong ol dispela pasin na i no gat narapela man i kamapim ol dispela pasin wankain olsem em i save mekim. Tasol long 1 Jon 4:8 Baibel i mekim wanpela bikpela tok long pasin laikim bilong Jehova na em i no mekim long ol dispela narapela pasin, olsem: “God em i Man bilong pasin laikim.” Yes, Jehova i gat bikpela pasin laikim. Pasin laikim em i pasin tru bilong em. Long ol bikpela pasin bilong em yumi ken tok olsem: Jehova i gat bikpela strong na dispela i save inapim em long mekim ol samting. Stretpela pasin na gutpela tingting na save bilong em i save stiaim em long ol samting em i mekim. Tasol pasin laikim i save kirapim em long mekim ol samting. Na taim em i kamapim ol narapela pasin, em i save kamapim wantaim pasin laikim.
3 Planti taim Baibel i tok olsem Jehova em i as tru bilong pasin laikim. Olsem na sapos yumi laik kisim save long dispela pasin laikim, yumi mas kisim save long Jehova. Olsem na yumi laik skelim sampela samting bilong pasin laikim bilong Jehova.
Nambawan Samting i Kamapim Pasin Laikim
4, 5. (a) Wanem pasin laikim i winim tru ol narapela pasin laikim? (b) Bilong wanem yumi ken tok olsem pasin laikim i stap namel long Jehova na Pikinini bilong em i strong tru na i no gat narapela tupela man i bin pas strong olsem?
4 Jehova i bin kamapim dispela pasin long kain kain rot, tasol i gat wanpela samting em i bin mekim i kamapim pasin laikim bilong em, winim olgeta narapela rot. Em wanem samting? Jehova i bin salim Pikinini bilong em i kam bilong kisim pen na i dai bilong helpim yumi. Yumi ken tok olsem dispela em i nambawan samting i kamapim pasin laikim, winim olgeta narapela samting. Wanem as na yumi ken tok olsem?
5 Baibel i tok long Jisas olsem “God i bin wokim em paslain long olgeta narapela samting.” (Kolosi 1:15, NW ) Tingim—Pikinini bilong Jehova i bin i stap paslain long God i wokim heven na graun. Papa na Pikinini i bin stap wantaim inap hamas yia? Sampela saientis i ting heven na graun i bin i stap inap olsem 13 bilion yia. Tasol maski dispela tingting i stret o nogat, namba wan pikinini bilong Jehova i bin i stap laip planti planti yia moa! Em i mekim wanem samting long ol dispela yia? Pikinini i bin amamas long i stap olsem “saveman i bosim wok” bilong Papa bilong em. (Sindaun 8:30; Jon 1:3) Jehova na Pikinini bilong em ol i bin wok wantaim long kamapim olgeta narapela samting. Tupela i bin amamas tru wantaim! Tupela i bin stap wantaim inap longtaim tru, na pasin bilong tupela long pas gut wantaim i strong nogut tru, em samting yumi no inap save gut long en. Olsem na em i klia tru olsem dispela pasin laikim i stap namel long God Jehova na Pikinini bilong em i strong tru, i no gat narapela tupela man i bin pas strong olsem.
6. Taim Jisas i kisim baptais, Jehova i mekim wanem bilong soim olsem em i gat wanem tingting long Pikinini bilong Em?
6 Tasol Jehova i bin salim Pikinini bilong em i kam bilong kamap wanpela bebi hia long graun. Dispela i mekim na winim 30 yia Jehova i no inap bung long heven wantaim dispela Pikinini em i laikim tumas. Long heven Jehova i lukluk i stap na em i gat laik tru long save long ol samting i painim Jisas taim em i wok long i go bikpela na kamap man i gutpela olgeta. Taim Jisas i gat samting olsem 30 krismas em i bin kisim baptais. Long dispela taim Papa i stap long heven na em yet i tok: “Dispela em i Pikinini bilong mi. Mi laikim em tumas. Bel bilong mi em i amamas long em.” (Matyu 3:17) Jehova i lukim olsem Jisas i mekim gut olgeta samting Baibel i bin tok profet long em, na em i mekim olgeta samting Jehova i askim em long mekim, olsem na yumi save Papa bilong em i mas amamas tru long em!—Jon 5:36; 17:4.
7, 8. (a) Jisas i mas karim wanem pen na hevi long Nisan 14, 33 C.E.? Dispela i mekim wanem long Papa bilong em i stap long heven? (b) Wanem as na Jehova i larim Pikinini bilong em i kisim bikpela pen na i dai?
7 Tasol Jehova i pilim olsem wanem long Nisan 14, 33 C.E., taim wanpela man i givim Jisas long han bilong ol birua na ol man i kros na holim em? Na taim ol i tok bilas long Jisas, spetim em, na paitim em? Na taim ol i wipim em, na dispela i brukim na bagarapim skin long baksait bilong em? Na taim ol i nilim han na lek bilong em long pos diwai na larim em i hangamap i stap na ol man i tok nogut long em? Papa i pilim olsem wanem taim Pikinini em i laikim tumas i pilim bikpela pen na i singaut long em? Kirap long taim Jehova i stat long wokim olgeta samting na i kam, dispela Pikinini em i laikim tumas i bin i stap, tasol nau Jehova i mas lukim em i pulim win laspela taim na em i dai, i olsem em i no stap moa. Jehova i pilim olsem wanem long dispela?—Matyu 26:14-16, 46, 47, 56, 59, 67; 27:26, 38-44, 46; Jon 19:1.
8 Jehova tu i save pilim ol samting long bel, olsem na pen em i pilim taim Pikinini bilong em i karim bikpela pen na i dai, i mas bikpela tru. Yumi no inap mekim sampela tok i makim tru tru pen em i pilim. Samting yumi inap kamapim, em as na Jehova i larim dispela samting i kamap. Wanem as na Jehova i larim em yet i pilim kain pen olsem? Jehova i kamapim wanpela bikpela samting long yumi long Jon 3:16—em wanpela ves bilong Baibel i gat bikpela mining bilong en, olsem na sampela i tok dispela wanpela ves i kamapim ol bikpela tok i stap long ol Gutnius. Ves i tok: “God i gat wanpela Pikinini tasol i stap. Tasol God i laikim tumas olgeta manmeri bilong graun, olsem na em i givim dispela wanpela Pikinini long ol. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.” Olsem na as na Jehova i larim ol dispela samting i kamap em i olsem: pasin laikim. Dispela pasin laikim Em i kamapim i winim olgeta narapela pasin laikim.
Jehova i Save Tokaut Olsem Em i Laikim Yumi
9. Satan i laik bai yumi kisim wanem tingting long pasin bilong Jehova long tingim yumi? Tasol Jehova i tok wanem long yumi?
9 Tasol dispela i kamapim wanpela bikpela askim olsem: God i save laikim yumi wan wan? Sampela i wanbel long tok olsem God i laikim tumas olgeta man, olsem Jon 3:16 i tok. Tasol ol i ting olsem, ‘God i no inap laikim mi yet.’ Satan i laik bai yumi bilip olsem Jehova i no save laikim yumi na em i no tingim yumi. Tasol maski yumi ting narapela i no inap laikim yumi na yumi olsem pipia nating, Jehova i save tokim yumi olsem em i tingim olgeta wan wan gutpela wokboi bilong em na ol i olsem gutpela samting long ai bilong em.
10, 11. Olsem wanem tok piksa Jisas i mekim long ol liklik pisin i kamapim klia olsem Jehova i ting yumi i bikpela samting tru?
10 Olsem, skelim tok bilong Jisas i stap long Matyu 10:29-31. Bilong soim olsem ol disaipel ol i gutpela samting, Jisas i tok: “Yupela i save, ol man i save baim tupela liklik pisin long 10 toea tasol. Na Papa bilong yupela i save lukautim gut ol dispela pisin. Sapos em i no laik, orait i no inap wanpela bilong ol i pundaun long graun. Na tu, God i kaunim pinis olgeta gras long het bilong yupela, na em i save gut tru long yupela. Olsem na yupela i no ken pret. Yupela i winim planti lain liklik pisin.” Long taim bilong Jisas, ol dispela tok i gat wanem mining long ol man i bin harim?
11 Long taim bilong Jisas pe bilong ol dispela liklik pisin bilong kaikai em i liklik tru. Long wanpela liklik mani, man inap baim tupela pisin. Tasol bihain Jisas i tok long Luk 12:6, 7 olsem, sapos man i tromoi tupela liklik mani em bai kisim faipela liklik pisin, i no fopela. Ol i givim dispela wanpela pisin moa, olsem dispela pisin em i samting nating. Ating long tingting bilong ol man, kain pisin olsem em i samting nating, tasol Man bilong wokim olgeta samting i gat wanem tingting long ol? Jisas i tok: “God i no save lusim tingting long wanpela bilong ol dispela liklik pisin [dispela liklik pisin ol i givim nating, em tu em i no lusim tingting long en].” Orait nau yumi kirap long kisim gut bikpela tok Jisas i laik kamapim. Jehova i save tingim wanpela liklik pisin, olsem na yumi save em i tingim moa yet ol man! Olsem Jisas i tok, Jehova i save long olgeta liklik samting bilong yumi. Man! Tingim, em i kaunim pinis olgeta gras long het bilong yumi!
12. Olsem wanem yumi ken save Jisas i no kolim nating dispela tok olsem God i kaunim pinis olgeta gras long het bilong yumi?
12 Sampela inap ting Jisas i kolim nating dispela tok. Tasol tingting long samting i mas kamap bilong kirapim bek ol man i dai pinis. Jehova i mas save gut tru long yumi bilong em i ken wokim yumi gen! Em i tingim tru yumi na em i tingim olgeta samting bilong yumi, olgeta save i stap insait long ol jin na olgeta samting yumi holim long tingting na olgeta samting i bin painim yumi. Kaunim namba bilong ol gras long het bilong man, em olsem 100,000, em i liklik samting taim yu skelim wantaim ol samting God bai mekim bilong kirapim bek man. Tok bilong Jisas i kamapim gut tru olsem Jehova i save tingim yumi wan wan!
13. Olsem wanem stori bilong King Jehosafat i soim olsem Jehova i save wok long painim ol gutpela pasin long yumi, maski yumi no gutpela olgeta?
13 Baibel i kamapim narapela samting i helpim yumi long save olsem Jehova i laikim yumi. Em i save wok long painim ol gutpela pasin i stap long bel bilong yumi na em i laikim tru ol dispela gutpela pasin. Tingim gutpela King Jehosafat. Taim em i no tingting gut na mekim samting i no stret tumas, profet bilong Jehova i tokim em: “Yu bin mekim dispela kain pasin, olsem na Bikpela i belhat long yu.” Taim man i tingim dispela tok, em inap kirapim em long tingting gut! Tasol dispela i no pinisim tok bilong Jehova. Em i tok moa: “Tasol yu save mekim sampela gutpela pasin tu.” (2 Stori 19:1-3) I stret Jehova i belhat, tasol dispela i no mekim na em i no tingim “sampela gutpela pasin” bilong Jehosafat. Yumi amamas long save olsem God bilong yumi i save wok long painim ol gutpela pasin long yumi, maski yumi no gutpela olgeta, a?
God i “Redi Long Lusim Rong”
14. Taim yumi mekim sin, yumi inap kisim wanem tingting i givim hevi long yumi? Olsem wanem pasin bilong Jehova long lusim rong inap helpim yumi?
14 Taim yumi mekim sin, yumi bel hevi, na sem, na bel i kotim yumi, na dispela inap mekim na yumi kisim tingting olsem yumi no inap winim mak bilong mekim wok bilong Jehova. Tasol tingim, Jehova em i “redi long lusim rong.” (Song 86:5, NW ) Yes, sapos yumi tanim bel long ol sin yumi bin mekim na wok strong long no ken mekim gen, pasin bilong Jehova long lusim rong inap helpim yumi. Yumi laik skelim ol tok Baibel i mekim bilong kamapim dispela gutpela pasin, em hap bilong pasin laikim bilong Jehova.
15. Taim Jehova i lusim rong bilong yumi em i save putim ol dispela rong longwe olsem wanem long yumi?
15 Devit, man bilong raitim song, i kolim tok i kamapim gut pasin bilong Jehova long lusim rong: “Hap bilong sankamap em i no klostu long hap bilong san i go daun. Em i longwe tru. Olsem tasol God i save rausim sin bilong yumi na sin i stap longwe tumas.” (Song 103:12) Hap sankamap i longwe olsem wanem long hap san i go daun? Yumi ken tok em i longwe tru, tupela hap i no inap bung wantaim. Wanpela saveman i tok mining bilong dispela i olsem ‘longwe nogut tru; em i longwe moa yet.’ Ol tok spirit bilong God i kirapim Devit long raitim i tokim yumi olsem taim Jehova i lusim rong bilong yumi, i olsem em i putim dispela rong longwe nogut tru long yumi.
16. Taim Jehova i lusim ol sin bilong yumi, bilong wanem yumi ken pilim olsem long ai bilong em yumi stap klin?
16 Olsem wanem? Yu bin traim long rausim wanpela mak nogut long wanpela waitpela laplap? Maski yu traim bes bilong yu long rausim dispela mak, mak i stap yet. Tasol lukim tok Jehova i mekim long pasin bilong em long lusim rong: “Maski yupela i gat planti sin, na yupela i stap olsem waitpela laplap em retpela pen i bagarapim pinis, mi Bikpela, mi tok, bai yupela inap kamap waitpela gen olsem ais, na olsem waitpela gras bilong sipsip.” (Aisaia 1:18) Dispela tok “retpela” i makim kala i ret tru.a Sin i stap olsem dispela retpela mak na long hatwok bilong yumi yet yumi no inap rausim. Tasol Jehova inap rausim ol sin ol i olsem retpela mak na mekim ol i kamap waitpela olsem ais o olsem waitpela gras bilong sipsip. Olsem na taim Jehova i lusim ol sin bilong yumi, yumi no ken pilim olsem dispela retpela mak bilong sin i pas oltaim long yumi.
17. Olsem wanem Jehova i save tromoi ol sin bilong yumi i go baksait long em?
17 Bihain long taim Hesekia i winim wanpela sik nogut, em i raitim wanpela singsing, em kain singsing i save kirapim bel na em bilong tok tenkyu. Long dispela singsing em i tokim Jehova olsem: “Yu bin tromoi olgeta sin bilong mi i go baksait long yu.” (Aisaia 38:17, NW ) Long dispela tok piksa i olsem Jehova i kisim ol sin bilong man i tanim bel na em i tromoi ol i go baksait we Em i no inap lukim ol na em i no inap tingim ol moa. Wanpela buk i tok tingting dispela ves i laik kamapim i olsem: “Yu rausim sin bilong mi na i olsem mi no bin mekim.” Kain tok olsem i mekim gut bel bilong yu, a?
18. Olsem wanem profet Maika i soim olsem taim Jehova i lusim ol sin bilong yumi, em i save rausim inap oltaim oltaim?
18 Long wanpela promis bilong stretim bek ol samting, profet Maika i kamapim strongpela bilip bilong em olsem Jehova bai lusim sin bilong ol manmeri bilong em ol i tanim bel: “Bikpela, i no gat wanpela god i olsem yu. Yu save lusim sin bilong ol liklik lain manmeri bilong yu i stap yet. . . . Na bai yu tromoi dispela sin i go daun long solwara i daun tumas.” (Maika 7:18, 19) Tingim ol samting dispela tok i bin mekim long ol manmeri i bin i stap long taim bilong ol man i bin raitim Baibel. Yu ting man inap kisim bek samting ol i bin tromoi “i go daun long solwara i daun tumas”? Olsem na tok bilong Maika i soim olsem taim Jehova i lusim ol sin bilong yumi, em i save lusim ol dispela sin inap oltaim oltaim.
“Long Bikpela Pasin Sori Bilong God”
19, 20. (a) Wanem mining bilong dispela tok Hibru ol i tanim olsem “marimari long” o “sori long”? (b) Olsem wanem Baibel i stori long pasin bilong wanpela mama long lukautim bebi bilong em bilong lainim yumi long pasin sori bilong Jehova?
19 Pasin sori em i narapela hap bilong pasin laikim bilong Jehova. Pasin sori em i wanem samting? Long Baibel, pasin sori na pasin marimari i klostu wankain. Planti tok Hibru na tok Grik i makim pasin sori. Olsem: Ol i save tanim tok Hibru ra·chamʹ olsem “marimari long” o “sori long.” Dispela tok Hibru, em Jehova i save tok em yet i save kamapim, em i kain olsem tok i makim “bel bilong meri” na em inap makim “pasin sori mama i pilim long pikinini.”
20 Baibel i save stori long pasin sori mama i save mekim long bebi bilong em bilong lainim yumi long pasin sori bilong Jehova. Aisaia 49:15 i tok: “Ating wanpela mama inap lusim tingting long pikinini em yet i bin karim na em i no sori [ra·chamʹ] long dispela pikinini em i bin givim susu long en, a? Ating wanpela mama inap mekim olsem, tasol mi no inap tru lusim tingting long yupela. Nogat tru.” I hatwok long yumi ting olsem wanpela mama inap lusim tingting long lukautim na givim kaikai long pikinini i susu yet. Kain liklik pikinini i no inap lukautim em yet; long san na long nait mama i mas lukautim em. Tasol tarangu tru, nau long dispela ‘taim bilong planti hevi nogut tru’ sampela mama i no save lukautim gut bebi bilong ol. (2 Timoti 3:1, 3) Tasol Jehova i tokaut olsem: “Mi no inap tru lusim tingting long yupela.” Bikpela pasin sori Jehova i save pilim long ol wokboi bilong em i strongpela moa, winim bikpela pasin sori ol mama i save pilim long ol liklik pikinini bilong ol.
21, 22. Wanem ol samting i painim lain Israel long Isip bilong bipo? Taim ol i beten singaut long Jehova, em i mekim wanem bilong helpim ol?
21 Olsem wanem Jehova, olsem wanpela papa i laikim tru pikinini, i save kamapim pasin sori? Pasin em i bin mekim long lain Israel bilong bipo i kamapim klia pasin sori bilong em. Klostu long 1500 B.C.E., planti milion Israel i stap wokboi nating long Isip na ol bosman i mekim hatpela pasin tru long ol. (Kisim Bek 1:11, 14) Ol i bel hevi i stap, na ol i beten singaut long Jehova i helpim ol. God bilong sori i mekim wanem taim ol i beten long em?
22 Jehova i bel sori long ol. Em i tok: “Mi lukim pinis ol i wok long mekim nogut long ol manmeri bilong mi long Isip. Na ol manmeri bilong mi i wok long singaut long mi. . . . Mi save tru long pen na hevi ol i karim.” (Kisim Bek 3:7) Taim Jehova i lukim pen na hevi ol manmeri bilong em i karim na harim singaut bilong ol, em i pilim tru na sori long ol. Jehova em i God bilong pilim tru hevi bilong ol man. Na dispela pasin bilong pilim tru hevi bilong narapela em i wankain liklik olsem pasin sori. Tasol Jehova i no pilim tasol hevi bilong lain bilong em, nogat; em i kirap mekim samting bilong helpim ol. Aisaia 63:9 i tok: “Bel bilong en i bin sori tumas long ol na em i bin marimari long ol, olsem na em yet i bin kamap olsem ensel na kisim bek ol.” Long “bikpela strong bilong em,” em i bin kisim bek ol Israel long Isip. (Lo 4:34) Bihain em i wokim mirakel na givim kaikai long ol na kisim ol i go long gutpela graun bilong ol yet.
23. (a) Olsem wanem ol tok bilong man bilong raitim song i helpim yumi long save olsem Jehova i save tingim tru yumi wan wan? (b) Jehova i save helpim yumi long wanem ol rot?
23 Jehova i save mekim pasin sori long ol manmeri bilong em olsem wanpela lain, na tu gutpela God bilong yumi i save tingim yumi olgeta wan wan. Em i save tru long olgeta hevi yumi karim. Man bilong raitim song i tok: “Bikpela i save lukautim ol stretpela manmeri, na em i save harim beten bilong ol. God i save stap klostu long ol manmeri i gat hevi. Na em i save helpim ol manmeri bilip bilong ol i bagarap.” (Song 34:15, 18) Olsem wanem Jehova i save helpim yumi wan wan? I no olsem em bai rausim dispela samting i wok long givim hevi long yumi. Tasol em i bin mekim planti samting bilong helpim ol man i singaut askim em long helpim ol. Tok bilong em i save kamapim ol gutpela tok bilong helpim yumi. Long kongrigesen, em i givim ol wasman husat ol i winim ol mak bilong spirit, na ol i wok strong long bihainim pasin sori bilong Jehova taim ol i helpim ol narapela. (Jems 5:14, 15) Jehova em i Man bilong “harim beten,” na em i save givim “Holi Spirit long ol man i askim em.” (Song 65:2; Luk 11:13) Ol dispela samting bilong helpim yumi i kamapim “bikpela marimari” bilong God bilong yumi.—Luk 1:78.
24. Bai yu mekim wanem long pasin laikim bilong Jehova?
24 Yumi amamas tru long tingim pasin laikim bilong Papa bilong yumi i stap long heven, a? Stori i bin kamap paslain long dispela i bin kirapim yumi long tingim olsem Jehova i bin bihainim pasin laikim taim em i kamapim bikpela strong, stretpela pasin, na gutpela tingting na save bilong em bilong helpim yumi. Na long stori yumi mekim nau yumi luksave olsem Jehova i bin kamapim pasin laikim bilong em long olgeta man—na long yumi wan wan—long ol rot yumi kirap nogut long en. Orait nau yumi wan wan i mas askim yumi yet olsem, ‘Bai mi mekim wanem long pasin laikim bilong Jehova?’ Gutpela sapos yu laikim em tru long bel, tingting, na strong bilong yu. (Mak 12:29, 30) Em i gutpela sapos long olgeta samting yu mekim long olgeta de i kamapim klia olsem yu gat laik tru long kam klostu moa yet long Jehova. Na mipela laik bai Jehova, em God bilong pasin laikim, i ken kam klostu moa yet long yu—i go inap oltaim oltaim!—Jems 4:8.
[Futnot]
a Wanpela saveman i tok dispela retpela kala “i save pas strong tru long ol laplap samting. Pasin bilong wasim planti taim, o yusim dispela laplap longpela taim, o wara bilong nait, o ren, i no inap rausim dispela retpela kala.”
Yu Inap Tingim?
• Olsem wanem yumi save olsem pasin laikim em i nambawan pasin bilong Jehova?
• Jehova i bin salim Pikinini bilong em i kam bilong kisim pen na i dai bilong helpim yumi, na bilong wanem yumi ken tok i no gat narapela pasin laikim i winim dispela?
• Jehova i save mekim wanem bilong helpim yumi long save olsem em i laikim yumi wan wan?
• Baibel i kolim wanem tok i kamapim gut pasin bilong Jehova long lusim rong?
[Piksa long pes 15]
“God . . . i givim dispela wanpela Pikinini long ol”
[Piksa long pes 16, 17]
“Yupela i winim planti lain liklik pisin”
[Kredit Lain]
© J. Heidecker/VIREO
[Piksa long pes 18]
Pasin sori mama i save mekim long bebi bilong em i ken lainim yumi long pasin sori bilong Jehova