Husat Ol i Kristen Tru?

“LOTU Kristen em wanpela lotu we ol tok bilong Jisas Krais i save stiaim ol man, long pasin bilong ol na long samting ol i skulim ol narapela long en.” (On Being a Christian) Insait bilong dispela tok bilong Hans Küng bilong Swiselan, wanpela tisa bilong lotu, i olsem: Ol Kristen tru ol i man i save bihainim tru ol tok bilong Jisas.

Orait olsem wanem long ol man na ol lain i tok ol i bihainim Krais, tasol ol i no bihainim ol tok em i bin skulim ol man long en? Jisas yet i tok planti man bai tok ol i Kristen. Ol bai tokaut long kain kain wok ol i bin mekim bilong makim olsem ol i Kristen. Ol bai tok: “Mipela i bin mekim wok profet long nem bilong yu. Long nem bilong yu mipela i bin rausim ol spirit nogut. Long nem bilong yu mipela i bin wokim planti mirakel.” Tasol Jisas bai tok wanem long ol? Em bai tok: “Mi no save liklik long yupela. Yupela ol man bilong mekim pasin nogut, yupela klia long mi.”​​—Matyu 7:​22, 23.

Man! Jisas i mekim strongpela tok tru long “ol man bilong mekim pasin nogut” em ol i tok ol i bihainim em! Orait nau yumi ken tingim tupela bikpela samting ol man i mas mekim na bai Jisas i ken tokaut ol i Kristen tru na em i no ken sakim ol olsem man bilong mekim pasin nogut.

“Laikim Tru Ol Arapela”

Wanpela samting Jisas i kolim i olsem: “Mi givim nupela lo long yupela olsem, yupela wan wan i mas laikim tru ol arapela. Mi bin laikim yupela tru, na olsem tasol yupela wan wan i mas laikim tru ol arapela. Sapos yupela wan wan i laikim tru ol arapela man bilong lain bilong mi, orait dispela bai i soim olgeta man olsem, yupela i disaipel bilong mi.”​​—Jon 13:​34, 35.

Jisas i laik bai ol disaipel bilong em i mas laikim tru ol arapela long lain bilong em, na ol narapela man tu. Insait long planti handet yia bihain long Jisas i stap long graun, planti Kristen i bin mekim olsem. Tasol olsem wanem long klostu olgeta lain bilong lotu i tok ol i Kristen? Ol i gat pasin laikim? Nogat tru. Ol i bin go pas long planti pait we blut bilong ol man, em ol i no insait long pait, i bin kapsait.​​—KTH 18:24.

Ol i bin mekim olsem i kam inap long nau. Ol kantri i tok ol i Kristen ol i bin go pas long bagarapim na kilim i dai planti manmeri long taim bilong Wol Woa 1 na Wol Woa 2. Long 1994 long Ruanda, lain bilong ol misin i tok ol i Kristen ol i bin go pas long mekim nogut tru long wanpela lain olgeta bilong narapela skin. Ol i laik pinisim dispela lain olgeta. Desmond Tutu, bipo em asbisop bilong lotu Angliken, em i tok: “Olgeta man insait long dispela pait we narapela i bagarapim nogut tru narapela, ol i wanlotu. Klostu olgeta i Kristen.”

“Holim Strong Tok Bilong Mi”

Namba tu samting Jisas i kolim bilong makim husat i Kristen tru, i olsem: “Sapos yupela i holim strong tok bilong mi, orait yupela bai i stap ol disaipel tru bilong mi. Na yupela bai i save long tok tru, na tok tru bai i mekim yupela i kamap fri.”​​—Jon 8:​31, 32.

Jisas i laik bai ol disaipel bilong em i mas holim strong tok bilong em​​—ol i mas bihainim tru dispela tok. Tasol ol tisa bilong lotu em ol i tok ol i bihainim Krais, ol i no bin mekim olsem. Tisa bilong lotu, Hans Küng, i tok ol i bin “kisim tingting bilong ol Grik.” Ol i bin lusim ol tok bilong Jisas na kirap skulim ol man long bilip bilong klinpaia, pasin bilong lotu long Maria, man i gat wanpela spirit i no save dai, na i gat wanpela lain pris pasto​—ol dispela tingting i bin kam long ol lotu haiden na ol saveman bilong dispela graun.​​—1 Korin 1:​19-​21; 3:​18-​20.

Na tu, ol tisa bilong lotu i bin kirap skulim ol man long bilip bilong God Triwan, tasol i no gat wanpela taim Jisas i tok em yet i God. Dispela bilip i mekim na ol man i no lotu moa long dispela Man em Jisas i save litimapim​—em Papa bilong em, Jehova. (Matyu 5:​16; 6:9; Jon 14:28; 20:17) Hans Küng i tok: “Taim Jisas i stori long God, em i stori long God bilong Abraham, Aisak, na Jekop: Yawe . . . Em wanpela tasol i God bilong Jisas.” Tasol planti man long nau i no luksave olsem God na Papa bilong Jisas em Yawe, o Jehova, olsem planti man i save raitim long Tok Pisin.

Ol hetman bilong lotu i bin givim baksait long tok bilong Jisas long no ken insait long ol samting bilong politik. Long taim bilong Jisas, ol Galili “i gat strongpela tingting long bosim ol yet.” Dispela em tok bilong Trevor Morrow, wanpela man bilong raitim buk. Planti Juda i bin kisim bainat na ol i pait bambai ol i ken kamap fri long makim wanem lain politik na lotu ol i laik bihainim. Olsem wanem? Jisas i tokim ol disaipel long insait long kain pait olsem? Nogat. Em i tokim ol: “Yupela i no man bilong dispela graun.” (Jon 15:19; 17:14) Tasol ol bikman bilong lotu i no bihainim dispela tok. Wanpela man bilong Aialan bilong raitim buk, Hubert Butler, em i tok ol i “autim tok long ol samting bilong pait na politik.” Em i tok: “Planti Kristen insait long wok politik i save sapotim pait, na taim ol bikman bilong politik na ol hetman bilong lotu i bung na pasim tok, Sios i save givim blesing long ol ami bilong gavman bambai ol yet i ken kisim helpim.”

Ol Tisa Giaman i Givim Baksait Long Jisas

Aposel Pol i tok lukaut olsem ol man bai lusim lotu Kristen tru. Em i tok, bihain long em i dai, “ol weldok nogut tru” namel long ol man i tok ol i Kristen ol bai kirap na “mekim tok giaman nabaut, bilong pulim ol manmeri bilong God i go bihainim ol.” (Aposel 20:​29, 30) ‘Maus bilong ol bai tok ol i save long God,’ tasol ‘pasin bilong ol bai soim olsem ol i givim baksait long em.’ (Taitus 1:​16) Aposel Pita tu i tok lukaut olsem ol tisa giaman bai “kamapim ol kain kain tok giaman” na ‘givim baksait long Bikpela i bin baim bek ol.’ Em i tok, pasin nogut bilong ol bai mekim ol man nabaut i “tok nogut long Rot bilong pasin i tru.” (2 Pita 2:​1, 2) Wanpela saveman bilong tok Grik, W. E. Vine, i tok dispela pasin bilong givim baksait long Krais i makim olsem man i “sakim Papa na Pikinini, em i tromoi lotu i tru na lainim ol man long narapela tok.”

Jisas bai mekim wanem sapos ol man i tok ol i disaipel bilong em na long laik bilong ol yet ol i no “holim strong tok bilong [em]” na ol i no mekim ol samting em i tokim ol long mekim? Em i tok lukaut olsem: “Man i tokim ol manmeri olsem em i no man bilong lain bilong mi, mi tu bai mi tokim Papa bilong mi long heven olsem dispela man em i no bilong mi.” (Matyu 10:33) Tru, Jisas i no save givim baksait long man i gat strongpela laik long stap gut long God tasol em i popaia na mekim rong, nogat. Olsem: Inap 3-pela taim aposel Pita i tok em i no save long Jisas, tasol Pita i tanim bel na Jisas i lusim dispela rong. (Matyu 26:​69-​75) Tasol Jisas i save givim baksait long ol man na ol lain ol i olsem weldok i hait insait long skin bilong sipsip​—ol i tok ol i bihainim Krais, tasol ol i bikhet na wok long sakim ol tok Jisas i bin skulim ol man long en. Jisas i tok long ol dispela tisa giaman olsem: “Yupela i mas lukim pasin bilong ol yet na bai yupela i save long ol giaman profet.”​​—Matyu 7:​15-​20.

Ol Aposel i Dai, na Lotu Kristen Giaman i Kamap

Wanem taim ol Kristen giaman i kirap na givim baksait long Krais? Bihain liklik long Jisas i dai. Em yet i bin tokaut olsem Satan bai planim “ol pikinini bilong gras nogut,” em ol Kristen giaman, namel long “ol gutpela pikinini wit,” o ol Kristen tru, em Jisas i bin planim taim em i stap long graun. (Matyu 13:​24, 25, 37-​39) Aposel Pol i tok lukaut olsem ol tisa giaman i kirap pinis long mekim wok bilong ol. As tru na ol i sakim tok bilong Jisas Krais i olsem: Ol i ‘no laikim tru tok tru God i givim long ol.’​​—2 Tesalonaika 2:​10.

Taim ol aposel bilong Jisas Krais i stap yet, ol i pasim rot bilong ol Kristen giaman. Tasol taim ol aposel i dai pinis, ol bikman bilong lotu i kirap mekim “olgeta kain strongpela wok na ol kain kain giaman mirakel . . . [na] olgeta giaman bilong pasin nogut” bilong pulim planti man long lusim ol tok tru em Jisas na ol aposel i bin skulim ol man long en. (2 Tesalonaika 2:​3, 6-​12) Wanpela saveman bilong Inglan, Bertrand Russell, i tok, kongrigesen Kristen bilong pastaim i senis na i kamap wanpela lain bilong lotu em “Jisas, na Pol tu, inap kirap nogut tru long en.”

Kamapim Bek Lotu Kristen Tru

Ol samting i kamap bihain long taim ol aposel i dai pinis i soim olsem, long planti samting i bin kamap long nem bilong lotu Kristen, ol lain i no bihainim ol tok bilong Krais. Tasol dispela i no makim olsem Jisas i no truim tok promis bilong em long stap wantaim ol disaipel “olgeta de, i go inap long dispela taim i pinis,” nogat. (Matyu 28:20) Yumi ken bilip olsem, kirap long taim em i mekim dispela promis, i gat planti man em “ol tok bilong Jisas Krais i [bin] stiaim ol . . . long ol samting ol i mekim na long ol samting ol i skulim ol narapela long en.” Jisas Krais i bin bihainim dispela tok promis bilong helpim kain man olsem taim ol i wok long laikim ol arapela, em mak bilong ol Kristen tru, na holim strong ol tok em i bin skulim ol man long en.

Na tu, Jisas i bin tok promis olsem long taim bilong las de bilong dispela pasin nogut bilong nau, em bai bungim ol disaipel i stap gut long em long wanpela kongrigesen Kristen em ol man inap luksave long en na em bai mekim wok long dispela kongrigesen bilong kamapim laik bilong em. (Matyu 24:​14, 45-​47) Long nau em i save mekim wok long dispela kongrigesen, bilong bungim “planti manmeri”​—ol man, meri, pikinini​—bilong “olgeta lain man na bilong olgeta kantri na bilong olgeta kain skin na bilong olgeta tok ples,” na em i mekim ol i kamap “wanpela lain sipsip tasol” aninit long “wanpela wasman tasol.”​​—KTH 7:​9, 14-​17; Jon 10:16; Efesus 4:​11-​16.

Olsem na yu mas lusim ol lain em ol i bin bagarapim nem bilong Krais na lotu Kristen insait long 2,000 yia i go pinis. Sapos yu no mekim olsem, orait olsem Jisas Krais i tokim aposel Jon, yu inap “kisim pe nogut bilong ol dispela sin” bilong ol, taim God i kam liklik taim bihain na mekim kot long ol. (KTH 1:1; 18:​4, 5) Olsem na tingting strong long stap namel long ol man em profet Maika i tok long ol. Em i tok “wanpela taim bai i kamap bihain” na ol man i lotu tru long God​​—ol Kristen tru​​—ol bai bihainim tok bilong God na “wokabaut long rot” bilong lotu tru i kamap bek. (Maika 4:​1-4) Lain bilong wokim dispela nius bai amamas long helpim yu long kisim save long ol man i lotu tru long God.

[Ol Piksa long pes 5]

Bilong wanem ol Kristen tru i no save insait long pait?

[Ol Kredit Lain]

Soldiers, left: U.S. National Archives photo; flamethrower, right: U.S. Army Photo

[Ol Piksa long pes 7]

“Laikim tru ol arapela” na “holim strong tok bilong mi,” em tupela samting Jisas i tok ol Kristen tru i mas mekim