Em i Bikpela Samting Long Luksave Long Mining Bilong Ol Mak!
“Pastaim mi ting pikinini man bilong mipela, Andreas, i gat het pen tasol. Tasol em i no laik kaikai na skin bilong em i hat nogut tru. Bihain het bilong em i pen moa yet na mi tingting planti. Taim man bilong mi i kam bek long haus, mipela i kisim Andreas i go long dokta. Dokta i glasim sik bilong Andreas na salim em i go hariap long haus sik. Em i no gat het pen nating, sik bilong em i bikpela moa. Em i gat sik meninjaitis. Ol i givim ol marasin long em na i no longtaim na sik bilong em i pinis.”—Gertrud, wanpela mama long Jemani.
ATING dispela samting i painim Gertrud i bin painim planti papamama. Ol i lukim sampela mak i soim olsem pikinini bilong ol i sik. Tru, i no olgeta sik i bikpela tru, tasol papamama i no ken sakim ol mak i soim olsem pikinini i gat sik. Sapos ol i lukim gut ol mak bilong sik na mekim sampela samting, ating sik i no ken go bikpela. Dispela em i bikpela samting tru.
Dispela samting i stret tu long ol narapela samting—i no long sik tasol. Yumi ken tingim dispela bikpela bagarap i bin kamap long sunami long Disemba 2004 long sampela hap arere long solwara India. Sampela lain bilong gavman long Australia na Hawaii i lukim olsem ol masin bilong ol long makim strong bilong guria samting i pilim dispela bikpela guria i bin kamap long noten Sumatra, olsem na ol i save bikpela bagarap inap painim ol man bihain long dispela guria. Tasol i no gat sampela lain o masin long dispela hap bilong kisim toksave na mekim sampela samting. Olsem na winim 220,000 manmeri i dai.
Sampela Mak i Bikpela Samting Moa
Taim Jisas Krais i stap long graun, em i skulim ol man long luksave long ol mak i kamap na long mekim ol samting i stret long dispela. Em i toktok long wanpela bikpela samting moa. Baibel i stori olsem: “Ol Farisi na Sadyusi i kam long Jisas na ol i laik traim em. Ol i tokim em long wokim wanpela mirakel olsem mak bilong soim ol olsem em i mekim wok bilong God. Tasol em i bekim tok bilong ol olsem, ‘Long apinun yupela i save tok, “Skai i retpela. Bai gutpela taim nau.” Na long moningtaim yupela i save tok, “Klaut i blak na skai i retpela. Olsem na nau bai i gat win na ren.” Yes, yupela i save lukim ol mak bilong skai na skelim gut. Tasol yupela i no save lukim na skelim ol mak bilong dispela taim nau.’ ”—Matyu 16:1-3.
Taim Jisas i toktok long “ol mak bilong dispela taim nau,” em i makim olsem ol Juda i wok long harim tok bilong em, ol i mas pilim olsem dispela taim ol i stap long en i sot pinis. Bikpela bagarap tru i laik painim ol lo na pasin ol Juda i stap aninit long en, na olgeta Juda bai pilim dispela. Sampela de paslain long taim em i dai, Jisas i tokim ol disaipel bilong em long narapela mak—em mak bilong em i kam i stap. Tok em i mekim long dispela samting em i bikpela samting tru long olgeta manmeri bilong nau.