Wanpela Lain Sipsip, Wanpela Wasman

“Yupela ol man i bin bihainim mi yupela tu bai i sindaun long 12-pela gutpela sia na yupela bai i bosim ol 12-pela lain bilong Israel.”​​—MT. 19:28.

 1. Jehova i mekim wanem pasin long ol tumbuna pikinini bilong Abraham? Bilong wanem dispela i no makim olsem em i no tingim liklik ol narapela manmeri?

JEHOVA i laikim tru Abraham, olsem na Em i soim pasin laikim long ol tumbuna pikinini bilong Abraham. Inap 15 handet yia, em i tingim lain Israel​—em ol i bin kamap long Abraham​—olsem lain bilong em yet, em “lain manmeri bilong em stret.” (Ritim Lo 7:6.) Olsem wanem? Dispela i makim olsem Jehova i no tingim liklik ol manmeri bilong ol narapela lain? Nogat. Insait long dispela haptaim, ol manmeri i no bilong lain Israel husat i laik lotuim Jehova ol inap bung wantaim lain Israel. Ol dispela manmeri em ol i bin kirap bihainim lotu Juda, ol i olsem hap bilong dispela lain. Ol Israel i mas mekim gutpela pasin long ol olsem ol i brata bilong ol. (Wkp. 19:​33, 34) Na ol dispela manmeri yet i mas bihainim olgeta lo bilong Jehova.​​—Wkp. 24:22.

 2. Jisas i mekim wanem narapela kain tokaut? Dispela i kamapim wanem ol askim?

² Tasol Jisas i mekim wanpela narapela kain tokaut long ol Juda long taim bilong em, olsem: “God bai i rausim kingdom bilong en long han bilong yupela, na givim long wanpela lain manmeri ol i save kamapim kaikai bilong dispela kingdom.” (Mt. 21:43) Husat i insait long dispela nupela lain? Dispela senis i mekim wanem samting long yumi long nau?

Nupela Lain

3, 4. (a) Olsem wanem aposel Pita i kamapim long ples klia husat dispela nupela lain? (b) Husat i insait long dispela nupela lain?

³ Aposel Pita i kamapim long ples klia husat dispela nupela lain. Em i tokim ol wanbilip Kristen bilong em olsem: “God i makim yupela pinis, na yupela i stap lain manmeri bilong em stret. Yupela i stap ol pris bilong lain bilong king. Yupela i stap lain manmeri i holi, em ol lain manmeri tru bilong God. Yupela i stap lain manmeri God i bin makim bilong em yet, bai yupela i ken tokaut long olgeta gutpela pasin em i bin mekim long yupela. Yupela i ken tokaut long em i bin singautim yupela long lusim tudak yupela i bin i stap long en, na em i bringim yupela i kam insait long lait bilong em, em lait i gutpela moa yet.” (1 Pi. 2:9) Olsem Baibel i bin tok profet, ol Juda bilong skin em ol i bilip long Jisas olsem Mesaia, em ol namba wan manmeri bilong dispela nupela lain. (Dan. 9:27a; Mt. 10:6) Bihain, planti manmeri em ol i no bilong lain Israel, ol tu i insait long dispela lain, long wanem, Pita i tok moa: “Bipo yupela i stap ol manmeri nating. Tasol nau yupela i stap lain manmeri bilong God.”​—1 Pi. 2:10.

⁴ Long dispela ves, Pita i toktok long husat? Long kirap bilong pas bilong em, em i tok: “God i givim yumi nupela laip. Na dispela nupela laip i strongim yumi long wetim em i inapim tru ol gutpela samting em i laik givim long yumi. Em i makim yumi pinis bilong kisim gutpela laip bilong heven. Dispela laip em i no inap bagarap. Em i klin olgeta long ai bilong God, na em bai i no inap pinis. God i redim dispela laip pinis, bilong yupela i kisim long taim yupela i stap wantaim em long heven.” (1 Pi. 1:​3, 4) Olsem na dispela nupela lain em ol Kristen God i bin makim, em ol i wet long kisim laip long heven, ol i “lain Israel tru bilong God.” (Ga. 6:16) Long wanpela driman, aposel Jon i lukim olsem dispela Israel bilong spirit ol i 144,000. “God i bin baim bek ol . . . namel long olgeta manmeri bilong graun, na ol i stap olsem namba wan lain God i kisim bek, bai ol i stap ol lain bilong em yet na bilong Pikinini Sipsip,” na ol bai mekim wok “pris” na ‘stap king wantaim Krais long 1,000 yia.’​—KTH 5:10; 7:4; 14:​1, 4; 20:6; Jem. 1:18.

I Gat Sampela Moa i Insait Long En?

 5. (a) Dispela tok “lain Israel tru bilong God” i makim husat? (b) Bilong wanem sampela taim dispela tok “lain Israel” i makim olsem sampela lain moa i insait long en?

⁵ I klia tru olsem dispela tok “lain Israel tru bilong God” long Galesia 6:16 i makim tasol ol Kristen God i bin makim. Tasol olsem wanem? Sampela taim Jehova i stori long lain Israel olsem tok piksa bilong makim ol arapela Kristen, na i no ol manmeri tasol em God i bin makim long holi spirit? Yumi inap painim bekim bilong dispela askim long tok bilong Jisas long ol gutpela aposel bilong em, em i tok: “Papa bilong mi em i givim kingdom long mi, olsem tasol mi givim kingdom long yupela. Na long kingdom bilong mi yupela bai i sindaun long tebol bilong mi na kaikai na dring. Na yupela bai i sindaun long ol gutpela sia na yupela bai i bosim ol 12-pela lain bilong Israel.” (Lu. 22:​28-30) Dispela bai kamap long “taim olgeta samting i kamap nupela,” olsem long taim bilong Wan Tausen Yia Bilong Krais i Stap King.​​—Ritim Matyu 19:28.

6, 7. Long Matyu 19:28 na Luk 22:​30, dispela tok “ol 12-pela lain bilong Israel” i makim husat?

⁶ Ol 144,000 bai mekim wok king na pris na jas long heven long taim bilong Wan Tausen Yia Bilong Krais i Stap King. (KTH 20:4) Ol bai skelim husat long kot? Na ol bai bosim husat? Long Matyu 19:28 na Luk 22:​30, Baibel i tokim yumi olsem ol bai bosim “ol 12-pela lain bilong Israel.” Long ol dispela ves, “ol 12-pela lain bilong Israel” i makim husat? Ol i makim olgeta manmeri i wet long kisim laip long graun​—em ol manmeri i bilip long ofa bilong Jisas, tasol ol i no insait long lain husat bai mekim wok king na pris long heven. (Lain Livai i no insait long lista bilong 12-pela lain bilong Israel bilong skin.) Ol manmeri em ol 12-pela lain bilong Israel long dispela ves i makim, em ol manmeri husat bai kisim ol gutpela samting bilong spirit aninit long wok pris bilong ol 144,000. Ol dispela manmeri i no bilong lain pris, tasol ol tu ol i lain bilong God, na God i laikim tru ol na i orait long ol. I stret Baibel i tok piksa long ol i olsem lain bilong em long bipo.

⁷ Bihain long aposel Jon i lukim 144,000 Israel bilong spirit em ol i kisim pinis mak paslain long bikpela hevi tru, em i lukim tu “planti manmeri tru” i no gat man i save long namba bilong ol, na ol i bilong “olgeta kantri.” (KTH 7:9) Ol bai abrusim bagarap long bikpela hevi tru na stap long Taim Bilong Wan Tausen Yia Bilong Krais i Stap King. Long dispela taim planti bilion manmeri bai kirap bek long matmat na bung wantaim ol. (Jo. 5:​28, 29; KTH 20:13) Olgeta dispela manmeri ol i insait long “ol 12-pela lain bilong Israel,” na Jisas wantaim ol 144,000 i wok king wantaim em, ol bai skelim ol long kot.​—Ap. 17:31; 24:15; KTH 20:12.

 8. Ol samting i kamap long Bikpela De Bilong God i Tekewe Sin Bilong Ol Manmeri, olsem wanem dispela i piksa long pasin i stap namel long ol 144,000 na ol narapela manmeri?

⁸ Ol samting i kamap long Bikpela De Bilong God i Tekewe Sin Bilong Ol Manmeri, em i save kamap wanpela taim long olgeta yia, dispela i olsem piksa na i makim pasin i stap namel long 144,000 na ol narapela manmeri. (Wkp. 16:​6-10) Pastaim, hetpris i mas ofaim wanpela bulmakau man bilong rausim “sin bilong em yet na sin bilong ol famili bilong en.” Olsem na pastaim ofa bilong Jisas i helpim ol lain bilong em, olsem ol namba tu pris, em ol manmeri husat bai wok king wantaim em long heven. Na tu, long dispela Bikpela De Bilong God i Tekewe Sin Bilong Ol Manmeri, ol i kisim tupela meme bilong rausim ol sin bilong ol narapela Israel. Long dispela taim, ol lain pris i makim ol 144,000, na ol narapela Israel i makim ol manmeri i wet long kisim laip oltaim long graun. Dispela i soim yumi olsem dispela tok “ol 12-pela lain bilong Israel” long Matyu 19:28 i no makim ol namba tu lain pris bilong Jisas em God i bin makim, nogat, em i makim ol narapela manmeri em ol i bilip long ofa bilong Jisas.a

 9. Long driman bilong Esekiel long tempel, ol pris i makim husat? Ol Israel i no bilong lain pris ol i makim husat?

⁹ Tingim narapela samting. Profet Esekiel i kisim wanpela bikpela driman long tempel bilong Jehova. (Ese., sap. 40-​48) Long dispela driman, ol pris i wok insait long tempel, na ol i skulim ol man na ol i kisim ol tok i kam long Jehova bilong stiaim na stretim ol yet. (Ese. 44:​23-31) Na tu, ol manmeri bilong ol narapela lain i kam bilong lotuim Jehova na givim ol ofa. (Ese. 45:​16, 17) Olsem na long dispela driman, ol pris i makim ol manmeri God i bin makim long holi spirit, na ol Israel em ol i no bilong lain pris, ol i makim ol manmeri i wet long kisim laip oltaim long graun. Dispela driman i soim olsem tupela lain i wok gut wantaim, na lain pris i go pas long lotu i tru.

10, 11. (a) Yumi lukim truim bilong wanem tok bilong Jisas na dispela i strongim tru bilip bilong yumi? (b) Dispela i kamapim wanem askim long ol arapela sipsip?

¹⁰ Jisas i tok long “ol arapela sipsip” em ol i no bilong wankain “banis” olsem “liklik lain sipsip” bilong ol manmeri God i bin makim. (Jo. 10:16; Lu. 12:32) Em i tok: “Mi mas bringim ol dispela sipsip tu i kam. Na bai ol i harim maus bilong mi. Na bai i gat wanpela lain sipsip tasol na wanpela wasman tasol bilong ol sipsip.” Taim yumi lukim truim bilong dispela tok, dispela i strongim tru bilip bilong yumi, a? Tupela lain i bung wantaim​—liklik lain God i bin makim na bikpela lain manmeri bilong ol arapela sipsip. (Ritim Sekaraia 8:​23.) Tru, ol arapela sipsip i no mekim wok insait long namba 2 banis bilong tempel spirit, tasol ol i mekim wok insait long bikpela ples bung bilong tempel.

¹¹ Sampela taim Jehova i mekim tok piksa long ol Israel em ol i no bilong lain pris bilong makim ol arapela sipsip. Olsem na yu ting i stret ol dispela lain em ol i tingting long kisim laip long graun, ol tu i kisim bret na wain long taim bilong Memorial? Orait nau bai yumi stori long bekim bilong dispela askim.

Nupela Kontrak

12. Jehova i tok profet long wanem nupela samting bai kamap?

¹² Jehova i tok profet long nupela samting em bai wokim bilong lain bilong em, olsem: “Dispela nupela kontrak mi laik mekim wantaim ol manmeri bilong Israel. . . . Bai mi putim lo bilong mi long tingting bilong ol na bai mi raitim tok bilong lo long bel bilong ol. Na bai mi stap God bilong ol na bai ol i stap lain manmeri bilong mi.” (Jer. 31:​31-33) Long rot bilong dispela nupela kontrak, tok promis Jehova i bin mekim long Abraham bai kamap tru na i stap inap oltaim oltaim.​​—Ritim Stat 22:18.

13, 14. (a) Husat i insait long nupela kontrak? (b) Husat bai kisim ol gutpela samting bilong dispela kontrak? Olsem wanem ol i “bihainim” dispela nupela kontrak?

¹³ Jisas i toktok long dispela nupela kontrak long nait paslain long em i dai, em i tok: “Dispela kap wain em i nupela kontrak mi mekim long blut bilong mi, em mi kapsaitim bilong helpim yupela.” (Lu. 22:20; 1 Ko. 11:25) Olsem wanem? Olgeta Kristen i insait long dispela nupela kontrak? Nogat. Sampela, olsem ol aposel husat i bin dring long dispela kap long dispela nait, ol i insait long nupela kontrak.b Jisas i mekim narapela kontrak wantaim ol bilong mekim wok king wantaim em long Kingdom bilong em. (Lu. 22:​28-30) Ol bai wok wantaim Jisas long Kingdom bilong em.​​—Lu. 22:​15, 16.

¹⁴ Olsem wanem long ol manmeri em ol bai stap long graun aninit long Kingdom bilong em? Ol bai kisim ol gutpela samting bilong dispela kontrak. (Ga. 3:​8, 9) Ol i no insait long dispela kontrak, tasol ol i “bihainim” ol tok bilong dispela kontrak, olsem Aisaia i tok profet long en: “Ol manmeri bilong ol arapela kantri i stap wantaim ol manmeri bilong mi, na ol i save aninit long mi na laikim mi tru na mekim wok bilong mi, na ol i bihainim ol lo bilong de Sabat na ol i bihainim olgeta tok bilong kontrak mi bin mekim wantaim ol manmeri bilong mi, ol i ken amamas. Bai mi bringim ol i go long Saion, dispela maunten bilong mi, na bai ol i amamas long i stap long haus bilong mi.” Orait nau Jehova i tok: “Haus bilong mi bai i stap haus bilong ol manmeri bilong olgeta kantri i ken i kam long en na beten long mi.”​—Ais. 56:​6, 7.

Husat i Mas Kisim Bret na Wain?

15, 16. (a) Aposel Pol i bungim nupela kontrak wantaim wanem samting? (b) Bilong wanem ol manmeri em ol i wet long kisim laip long graun ol i no kisim bret na wain long taim bilong Memorial?

¹⁵ Ol manmeri bilong nupela kontrak ol “inap i go insait long Rum Tambu Tru bilong haus bilong God na [ol i] no ken pret.” (Ritim Hibru 10:​15-20.) Ol i dispela lain husat bai ‘kisim kingdom, em i no inap guria.’ (Hi. 12:28) Olsem na ol dispela manmeri tasol em ol bai mekim wok king na pris wantaim Jisas Krais long heven, ol i ken dring long dispela “kap” i makim nupela kontrak. Ol dispela manmeri husat i insait long nupela kontrak em ol manmeri ol i makim pinis long marit long Pikinini Sipsip. (2 Ko. 11:2; KTH 21:​2, 9) Olgeta narapela manmeri em ol i go long Memorial ol i no kisim bret na wain, ol i go long bung na long pasin rispek ol i lukluk tasol.

¹⁶ Aposel Pol tu i helpim yumi long save olsem ol manmeri i wet long kisim laip oltaim long graun ol i no kisim bret na wain long Memorial. Em i tokim ol Kristen God i bin makim: “Olgeta taim yupela i kaikai dispela bret na dring long dispela kap, yupela i save tokaut long pen na i dai bilong Bikpela, inap long taim em i kam bek.” (1 Ko. 11:26) Long wanem taim Bikpela bai “kam bek”? Long taim em i kisim laspela bilong lain i olsem meri bilong em i go long heven. (Jo. 14:​2, 3) Tru tumas, Kaikai Bilong Bikpela em i save kamap long olgeta yia, em bai i no stap inap olgeta taim bihain. “Ol arapela pikinini” bilong lain bilong meri em ol i stap yet long graun, ol bai kisim yet bret na wain i go inap long olgeta bilong ol i kisim presen bilong ol em laip long heven. (KTH 12:17) Tasol sapos ol manmeri em ol i wet long kisim laip long graun ol i kisim bret na wain, orait dispela kaikai bilong Memorial bai i stap inap oltaim oltaim.

“Bai Ol i Kamap Lain Manmeri Bilong En”

17, 18. Olsem wanem tok profet bilong Esekiel 37:​26, 27 i kamap tru?

¹⁷ Jehova i tok profet olsem lain bilong em bai stap wanbel. Em i tok: “Bai mi mekim kontrak wantaim ol na bai ol i ken i stap gut oltaim oltaim. Na bai mi larim ol i stap long graun bilong ol na bai ol i kamap bikpela lain manmeri. Na bai haus bilong mi i stap namel long ol oltaim oltaim. Na bai mi stap wantaim ol. Na bai mi stap God bilong ol, na bai ol i stap ol lain manmeri bilong mi.”​—Ese. 37:​26, 27.

¹⁸ Olgeta manmeri bilong God inap kisim ol gutpela samting long truim bilong dispela gutpela tok promis, em dispela kontrak bilong ol Kristen i stap gut oltaim oltaim. Yes, Jehova i bin tok promis olsem olgeta gutpela wokman bilong em bai i stap gut. Pasin em holi spirit bilong Jehova i save kamapim i stap ples klia namel long ol. Haus bilong God long dispela tok profet i makim lotu Kristen tru i stap namel long ol. Ol i kamap lain manmeri tru bilong em, long wanem, ol i bin lusim olgeta pasin bilong lotuim god giaman na ol i lotu long Jehova wanpela tasol olsem God bilong ol.

19, 20. Husat i insait long dispela lain em Jehova i kolim ol olsem “lain manmeri bilong mi”? Nupela kontrak inap kamapim wanem ol samting?

¹⁹ Yumi amamas tru long lukim olsem dispela tupela lain i stap wanbel long taim bilong yumi! Tru, bikpela lain manmeri em ol i wok long kamap planti tru, ol i no wet long kisim laip long heven, tasol ol i amamas long bung wantaim ol manmeri em ol bai go long heven. Ol i bung wantaim ol Israel tru bilong God. Taim ol i mekim olsem, ol i insait long dispela lain em Jehova i kolim ol olsem “lain manmeri bilong mi.” Ol i truim dispela tok profet olsem: “Long dispela taim ol lain manmeri bilong planti kantri bai i kam long Bikpela na bai ol i kamap lain manmeri bilong en. Na em bai i stap namel long yupela.”​—Sek. 2:11; 8:21; ritim Aisaia 65:22; KTH 21:​3, 4.

²⁰ Long rot bilong nupela kontrak, Jehova i mekim na olgeta dispela samting inap kamap. Inap planti milion manmeri bilong ol arapela kantri ol i kam insait long lain em Jehova i laikim tumas. (Mai. 4:​1-5) Ol i tingting strong long bihainim ol tok bilong dispela kontrak na kisim ol gutpela samting bilong en. (Ais. 56:​6, 7) Taim ol i mekim olsem, ol i kisim gutpela blesing bilong i stap bel isi wantaim lain Israel tru bilong God. Mipela i laik bai yu tu i ken kisim dispela gutpela samting​—long nau na i go inap long olgeta taim bihain!

[Ol Futnot]

Yu Tingim Yet?

• Husat em “ol 12-pela lain bilong Israel” em ol 144,000 bai bosim?

• Long nupela kontrak, wanem pasin i stap namel long ol manmeri God i bin makim na ol arapela sipsip?

• Olsem wanem? Olgeta Kristen i mas kisim bret na wain long taim bilong Memorial?

• Baibel i mekim wanem tok profet long pasin wanbel long taim bilong yumi?

[Sat/Ol Piksa long pes 25]

(Bilong save ol dispela rait i stap we long pes, lukim buk o magasin)

Long nau, planti manmeri i wok wantaim lain Israel tru bilong God

7,313,173

4,017,213

1,483,430

373,430

1950 1970 1990 2009