Wanpela “Wokboi” i Mekim Gut Wok na i Gat Gutpela Tingting

“Wanem wokboi i gat gutpela tingting, na i save mekim gutpela wok oltaim? Bikman i save makim dispela kain wokboi bilong bosim ol arapela wokboi bilong en.”​—⁠MATYU 24:⁠45.

1, 2. I gat wanem as na long nau yumi mas kisim ol kaikai bilong spirit long olgeta taim?

LONG apinun bilong Tunde, Nisan 11, 33 C.E., ol disaipel bilong Jisas i kamapim wanpela askim i bikpela samting tru long yumi long nau. Ol i askim em: “Wanem mak bai i kamap pastaim, na mipela i ken save, yu laik i kam bek na dispela graun i laik pinis?” Bilong bekim dispela askim, Jisas i bin mekim wanpela bikpela tok profet. Em i stori long taim nogut bilong ol bikpela pait, hangre, guria, na ol bikpela sik. Ol i olsem “pen i save kamap pastaim long meri i laik karim pikinini.” Tasol ol samting nogut moa bai kamap. Tok hia bai mekim man i pret, laka?​—⁠Matyu 24:​3, 7, 8, 15-22; Luk 21:​10, 11.

² Kirap long 1914 i kam inap nau, klostu olgeta samting bilong tok profet bilong Jisas i kamap pinis. Ol samting “olsem pen” i kamap bikpela tru long graun. Tasol ol trupela Kristen i no ken pret. Jisas i tok promis olsem em bai lukautim ol long rot bilong ol gutpela kaikai bilong spirit. Long nau Jisas i stap long heven, orait em i bin mekim wanem na yumi hia long graun i ken kisim ol kaikai bilong spirit?

 3. Jisas i mekim wanem na yumi ken kisim ‘kaikai long taim bikman i makim’?

³ Jisas yet i kamapim bekim bilong dispela askim. Taim em i mekim bikpela tok profet, em i askim olsem: “Wanem wokboi i gat gutpela tingting, na i save mekim gutpela wok oltaim? Bikman i save makim dispela kain wokboi bilong bosim ol arapela wokboi bilong en, na bilong skelim kaikai long ol long taim bikman i makim.” Na em i tok moa: “Dispela kain wokboi i ken amamas tru taim bikman bilong en i kam bek na i lukim em i stap mekim wok bilong en. Mi tok tru long yupela, bikman bai i makim dispela wokboi bilong bosim olgeta samting bilong en.” (Matyu 24:​45-47) Em nau, bai i gat wanpela “wokboi,” na em wok bilong em long skelim ol kaikai bilong spirit, em “wokboi” i gat gutpela tingting na i save mekim gutpela wok. Olsem wanem? Wokboi em i wanpela man stret, o wanpela lain man we narapela i kamap bihain long narapela, o narapela samting? Dispela gutpela wokboi i skelim ol kaikai bilong spirit em yumi mas kisim, olsem na i gutpela yumi painim bekim bilong askim hia.

Wanpela Man o Wanpela Lain?

 4. Olsem wanem yumi save “wokboi i gat gutpela tingting” i no wanpela man stret?

⁴ “Wokboi i gat gutpela tingting” i no inap makim wanpela man stret. Bilong wanem? Long wanem, dispela wokboi i kirap skelim kaikai bilong spirit long taim bilong ol aposel, na olsem Jisas i tok, wokboi i mekim yet dispela wok long taim Bikman i kam long 1914. Dispela i olsem 1,900 yia bilong wanpela man i stap gut long wok bilong em. I no gat wanpela man i stap planti yia olsem, Metusela tu nogat!​—⁠Stat 5:⁠27.

 5. Bilong wanem dispela tok “wokboi i gat gutpela tingting” i no inap makim olgeta wan wan Kristen?

⁵ Orait, yu ting dispela tok “wokboi i gat gutpela tingting” inap makim olgeta wan wan Kristen? Tru, olgeta Kristen i mas i gat gutpela tingting na mekim gutpela wok; tasol Jisas i tingim narapela samting taim em i tok long “wokboi i gat gutpela tingting.” Olsem wanem yumi save i olsem? Yumi save, long wanem, em i tok ‘taim bikman i kam bek’ em bai makim dispela wokboi long “bosim olgeta samting bilong en.” Olsem wanem olgeta wan wan Kristen i ken kisim wok bilong bosim olgeta samting, em “olgeta” samting bilong Bikpela? I no inap tru!

 6. Olsem wanem lain Israel i bin stap olsem “wokman,” o “wokboi” bilong God?

⁶ Olsem na i stret yumi tingting olsem Jisas i tok long wanpela lain Kristen ol i olsem “wokboi i gat gutpela tingting.” Yu ting wanpela wokboi inap makim wanpela lain man? Yes, em inap. Seven handet yia paslain long Krais, Jehova i bin kolim lain Israel olgeta olsem “witnes bilong mi” na “wokman bilong mi.” (Aisaia 43:10) Olgeta manmeri bilong Israel, kirap long taim ol i kisim Lo Bilong Moses long 1513 B.C.E. na i go inap long Pentikos 33 C.E., ol i insait long dispela lain i olsem wokman. Planti manmeri Israel i no insait stret long wok bilong bosim ol samting bilong kantri o stretim ol samting na bai i gat ol kaikai bilong spirit. Jehova i makim ol king, jas, profet, pris, na Livai long mekim ol wok olsem. Tasol lain Israel olgeta ol i bin makim wok king bilong Jehova na ol i tokaut long biknem bilong em long ol narapela lain. Olgeta wan wan Israel i mas stap olsem wanpela witnes bilong Jehova.​—⁠Lo 26:19; Aisaia 43:21; Malakai 2:7; Rom 3:​1, 2.

Rausim Wanpela “Wokman”

 7. Bilong wanem lain Israel bilong bipo i no inap stap moa olsem “wokman” bilong God?

⁷ Planti handet yia i go pinis ol Israel i bin stap olsem “wokman” bilong God, orait yu ting ol i makim tu dispela wokboi Jisas i bin stori long en? Nogat, long wanem, ol Israel bilong bipo i no bin bihainim gutpela tingting na ol i no mekim gutpela wok. Pol i kamapim dispela long taim em i kolim tok Jehova i bin mekim long ol Israel, Pol i tok: “Asua bilong yupela tasol, na ol arapela lain i wok long tok bilas na daunim nem bilong God.” (Rom 2:24) Tru tumas, ol Israel i bikhet planti taim na dispela pasin bilong ol i go bikpela tru long taim ol i sakim Jisas, na Jehova i sakim ol.​—⁠Matyu 21:​42, 43.

 8. Long wanem taim wanpela “wokman” i kamap na i kisim wok bilong ol Israel? Dispela i kamap olsem wanem?

⁸ Ol Israel, em “wokman” i no stap gut long wok, tasol dispela i no makim olsem ol gutpela man i lotuim Jehova bai i no gat rot moa long kisim ol kaikai bilong spirit. Long Pentikos 33 C.E., 50 de bihain long Jisas i kirap bek, holi spirit i kam daun long 120 disaipel bilong em i stap long rum antap bilong wanpela haus long Jerusalem. Long dispela taim stret, wanpela nupela lain i kamap. I stret i gat tokaut olsem wanpela nupela lain i kamap, na ol manmeri insait long dispela lain i mekim olsem long taim ol i tokim ol manmeri bilong Jerusalem long “ol strongpela wok bilong God.” (Aposel 2:11) Olsem na dispela nupela lain, em wanpela lain bilong spirit, em i kamap “wokman” husat bai tokaut long biknem bilong Jehova long ol man na i givim kaikai long taim stret. (1 Pita 2:⁠9) I stret bihain ol man i kolim dispela lain olsem “Israel tru bilong God.”​—⁠Galesia 6:⁠16.

 9. (a) “Wokboi i gat gutpela tingting” i makim husat? (b) Husat em “ol arapela wokboi”?

⁹ Olgeta wan wan bilong “Israel tru bilong God” ol i Kristen i dediket na baptais pinis na God i bin makim ol long holi spirit na ol bai go long heven. Olsem na “wokboi i gat gutpela tingting” i makim olgeta manmeri husat i insait long dispela lain bilong spirit God i bin makim na ol i bin i stap long graun kirap long 33 C.E. na i kam inap long nau. Kain olsem olgeta manmeri Israel i bin stap laip namel long 1513 B.C.E. na Pentikos 33 C.E. ol i bin insait long lain wokman i bin stap paslain long taim bilong ol Kristen. Tasol husat em “ol arapela wokboi,” em ol i kisim ol kaikai bilong spirit long wokboi i gat gutpela tingting? Long taim bilong ol aposel, olgeta Kristen i bilong go long heven. Olsem na, ol arapela wokboi, ol tu em ol Kristen God i bin makim, tasol em i makim ol wan wan bilong lain wokboi, i no makim olgeta wantaim. Olgeta bilong ol, na ol lain i mekim bikpela wok insait long kongrigesen tu, ol i mas kisim ol kaikai bilong spirit i kam long gutpela wokboi.​—⁠1 Korin 12:​12, 19-27; Hibru 5:​11-13; 2 Pita 3:​15, 16.

“Tilim Wok Long Ol Wan Wan”

10, 11. Olsem wanem yumi save olsem olgeta bilong lain wokboi i no kisim wankain wok?

¹⁰ “Israel tru bilong God” em lain wokboi i gat gutpela tingting i kisim wanpela bikpela wok, na tu, olgeta wan wan bilong dispela lain i gat wok bilong ol yet long mekim. Tok bilong Jisas long Mak 13:34 i kamapim klia dispela samting. Em i tok: “I olsem wanpela man i lusim haus bilong en na i go wokabaut long narapela hap. Em i tokim ol wokboi long bosim ol samting, na em i tilim wok long ol wan wan. Na em i tokim man i save was long dua long em i mas was gut.” Olsem na olgeta wan wan bilong lain wokboi i kisim wok​—⁠em long mekim ol samting bilong Krais hia long graun i kamap planti. Ol i mekim wok bilong ol inap tru long skel na save bilong ol.​—⁠Matyu 25:​14, 15.

¹¹ Na tu, aposel Pita i bin tokim ol Kristen God i bin makim long taim bilong em: “God i bin marimari long yupela olgeta wan wan na givim ol kain kain presen long yupela. Olsem na yupela wan wan i mas i stap gutpela wokboi bilong God, na yusim ol dispela presen bilong helpim ol arapela manmeri bilong God.” (1 Pita 4:10) Em nau, ol dispela manmeri God i bin makim i mas yusim ol presen God i bin givim long ol na bai narapela i helpim narapela long lain bilong ol yet. Na tu, tok bilong Pita i soim olsem olgeta Kristen bai i no gat wankain save, asainmen, o wok long mekim. Tasol olgeta wan wan bilong lain wokboi inap mekim sampela samting i helpim lain bilong spirit i go bikpela. Olsem wanem ol inap mekim?

12. Olsem wanem olgeta wan wan bilong lain wokboi, maski ol i man o meri, ol i bin insait long wok bilong helpim dispela lain i go bikpela?

¹² Bikpela samting em olgeta wan wan i mas stap olsem witnes bilong Jehova, olsem autim gutnius bilong Kingdom. (Aisaia 43:​10-12; Matyu 24:14) Paslain stret long em i go long heven, Jisas i tokim olgeta gutpela disaipel bilong em, ol man na meri wantaim, long mekim wok tisa. Em i tok: “Yupela i mas i go mekim olgeta lain manmeri i kamap disaipel bilong mi. Na yupela baptaisim ol long nem bilong Papa na bilong Pikinini na bilong Holi Spirit. Na yupela lainim ol long bihainim olgeta tok mi bin givim long yupela. Harim. Mi save stap wantaim yupela olgeta de, i go inap long dispela taim i pinis.”​—⁠Matyu 28:​19, 20.

13. Ol lain God i bin makim i bin kisim wanem gutpela wok?

¹³ Taim ol i painim ol nupela disaipel, ol bai skulim ol gut long bihainim olgeta tok Krais i bin givim long ol disaipel bilong em. Bihain, ol man i harim tok, ol i winim mak bilong skulim ol narapela. Ol man bilong planti kantri husat bai insait long lain wokboi, ol inap long kisim gutpela kaikai bilong spirit i redi i stap. Olgeta Kristen God i bin makim, ol man na meri wantaim, ol i insait long wok bilong kamapim ol disaipel. (Aposel 2:​17, 18) Wok bai i stap olsem kirap long taim dispela wokboi i stat long mekim wok bilong en na i go inap long pinis bilong pasin nogut bilong nau.

14. Husat tasol inap skulim ol narapela insait long kongrigesen? Ol gutpela meri em holi spirit i bin makim, ol i gat wanem tingting long dispela samting?

¹⁴ Ol nupela baptais em God i bin makim ol i kam insait long lain wokboi, na maski husat i bin skulim ol long namba wan taim, bihain ol i kisim tok long ol brata bilong kongrigesen i winim ol mak Baibel i kolim bilong mekim wok elda. (1 Timoti 3:​1-7; Taitus 1:​6-9) Olsem na ol dispela elda i gat gutpela rot tru long helpim lain Israel bilong spirit i go bikpela. Ol gutpela meri Kristen God i bin makim, ol i no bel nogut olsem ol man Kristen tasol i kisim wok tisa insait long kongrigesen. (1 Korin 14:​34, 35) Ol i amamas long gutpela helpim ol i kisim long ol man bilong kongrigesen i givim bel long wok bilong ol, na ol i pilim tru ol gutpela wok ol meri yet i ken mekim, olsem bringim gutnius i go long ol narapela. Ol sista long nau em holi spirit i bin makim, ol tu i kamapim wankain pasin daun, maski ol elda long kongrigesen i bilong liklik lain o nogat.

15. Wanem wanpela bikpela rot bilong kisim ol kaikai bilong spirit long taim bilong ol aposel? Husat i go pas long tilim ol dispela samting i go long ol narapela?

¹⁵ Bikpela kaikai bilong spirit ol man i kisim long taim bilong ol aposel i bin kam long ol pas bilong ol aposel na ol narapela disaipel i go pas long wok. Ol pas ol i raitim​—⁠na moa yet ol pas bilong ol i stap insait long 27 buk bilong Ol Skripsa Grik em God i as bilong en​—⁠ol i go long olgeta kongrigesen na i bin stap olsem as bilong ol tok ol elda i lainim ol narapela long en. Long dispela rot sampela bilong lain gutpela wokboi i bin tilim ol gutpela kaikai bilong spirit long ol Kristen i gat gutpela bel. Lain wokboi long taim bilong ol aposel i kamapim klia ol i stap gut long wok bilong ol.

Dispela “Wokboi” Long 1,900 Yia Bihain

16, 17. Olsem wanem lain wokboi i kamapim klia olsem ol i stap gut long wok bilong ol long ol yia paslain long 1914?

¹⁶ Olsem wanem long nau? Taim Jisas i kam i stap pinis long 1914, em i lukim wanpela lain Kristen em God i bin makim na ol i mekim gut wok bilong givim ol kaikai long taim stret? Yes, em i lukim. I no hatwok long luksave long dispela lain, long wanem, wok ol i mekim i kamapim ol gutpela samting. (Matyu 7:20) Ol samting i kamap kirap long dispela taim na i kam inap nau i soim olsem i stret ol dispela Kristen i lain wokboi i gat gutpela tingting.

¹⁷ Taim Jisas i kam, i gat klostu 5,000 bilong lain wokboi i givim bel long autim tok i tru bilong Baibel. I no gat planti wokman, tasol dispela wokboi i bin yusim kain kain samting bilong helpim planti man moa long harim gutnius. (Matyu 9:38) Olsem: Ol i stretim rot na bai i gat ol tok bilong Baibel i kamap long klostu 2,000 niuspepa. Long dispela rot, tok tru bilong Baibel i go long planti tausen tausen man long wankain taim. Na tu, ol i redim wanpela program bilong 8-pela aua i gat ol piksa slait na piksa wokabaut. Dispela narapela kain program i helpim 9 milion manmeri long ol narapela narapela hap bilong graun long harim ol tok bilong Baibel​—⁠program i stori long kirap bilong taim God i wokim ol samting na i go inap long pinis bilong Taim Bilong Wan Tausen Yia Bilong Krais i Stap King. Na tu, ol i mekim wok long ol buk na nius ol i prinim. Olsem: Long 1914 ol i bin wokim 50,000 Wastaua.

18. Long wanem taim Jisas i bin makim wokboi long lukautim olgeta samting bilong em? Bilong wanem em i mekim olsem?

¹⁸ Tru tumas, taim Bikman i kam, em i lukim gutpela wokboi bilong em i givim bel long givim kaikai long ol arapela wokboi na long autim gutnius. Orait nau wokboi bai kisim bikpela wok moa. Jisas i tok: “Mi tok tru long yupela, bikman bai i makim dispela wokboi bilong bosim olgeta samting bilong en.” (Matyu 24:47) Jisas i mekim olsem long 1919, bihain long wokboi i winim taim bilong sampela traim. Tasol bilong wanem “wokboi i gat gutpela tingting” i kisim bikpela wok moa? Long wanem, ol samting bilong Bikman i kamap planti. God i givim wok king long Jisas long 1914.

19. Stori long olsem wanem bikpela lain manmeri i kisim ol kaikai bilong spirit.

¹⁹ Wanem dispela olgeta samting em Bikman, olsem nupela King, i bin givim long gutpela wokboi bilong em long lukautim? Em olgeta samting bilong spirit bilong Em hia long graun. Olsem: Twenti yia bihain long Krais i kamap King long 1914, bikpela lain bilong “ol arapela sipsip” i kamap ples klia. (KTH 7:9; Jon 10:16) Ol i no lain God i bin makim olsem lain “Israel tru bilong God,” tasol ol i gutpela man na meri i bilip na wet long kisim laip oltaim long graun, na ol i laikim tru Jehova na mekim wok bilong em olsem ol lain God i bin makim i mekim. I olsem ol i bin tokim “wokboi i gat gutpela tingting”: “Mipela i harim olsem God i stap wantaim yupela . . . Olsem na mipela i laik kamap wanlain wantaim yupela.” (Sekaraia 8:23) Ol dispela Kristen i baptais nupela i bin kisim ol gutpela kaikai bilong spirit wankain olsem ol arapela wokboi God i bin makim, na i kam inap long nau tupela lain wantaim i kisim kaikai long wankain tebol spirit. Em i gutpela blesing tru bilong ol bikpela lain manmeri!

20. Olsem wanem ol manmeri bilong bikpela lain i helpim ol samting bilong Bikman i kamap planti?

²⁰ Ol manmeri bilong bikpela lain i bin amamas long kirap autim gutnius wantaim lain wokboi God i bin makim. Ol i mekim wok autim tok na ol samting bilong Bikman long graun i kamap planti, na dispela i mekim wok bilong “wokboi i gat gutpela tingting” i go bikpela moa. Namba bilong ol man i laikim tok i tru i go antap, olsem na ol i mas wokim ol faktori bilong prinim ol buk samting i go bikpela moa na bai i gat inap buk na nius bilong Baibel. Na ol i wokim ol brens ofis bilong ol Witnes Bilong Jehova long planti kantri. Ol i salim ol misineri i go long “olgeta hap bilong graun.” (Aposel 1:⁠8) I gat samting olsem 5,000 Kristen God i bin makim ol i bin stap long 1914, tasol namba bilong ol man i givim biknem long Jehova i go bikpela tru na i winim 6 milion long nau, planti bilong ol em ol manmeri bilong bikpela lain. Em nau, kirap long taim Bikman i kamap king long 1914 na i kam inap nau, ol samting bilong em i kamap planti tru!

21. Bai yumi skelim wanem tupela tok piksa long stadi i kamap bihain long dispela?

²¹ Ol dispela samting i soim olsem dispela wokboi em “i gat gutpela tingting, na i save mekim gutpela wok oltaim.” Bihain stret long Jisas i toktok long “wokboi i gat gutpela tingting,” em i mekim tupela tok piksa i kamapim ol dispela pasin: em tok piksa bilong sampela kranki meri na sampela meri i gat save na tok piksa bilong mani. (Matyu 25:​1-30) Man! Tingting bilong yumi i kirap! Olsem wanem dispela tupela tok piksa i bikpela samting long yumi ol manmeri long nau? Bai yumi skelim dispela askim long stori i kamap bihain long dispela.

‘Wokboi i Mekim Gutpela Wok’ i Winim Traim!

“Taim bilong God i kirapim kot long yumi ol lain bilong em yet, dispela taim i kamap pinis.”​—⁠1 PITA 4:⁠17.

 1. Jisas i lukim wanem samting taim em i skelim “wokboi”?

LONG Pentikos 33 C.E., Jisas i makim wanpela “wokboi” bilong givim kaikai long taim stret long “ol arapela wokboi” bilong em. Long 1914, Jisas i kisim wok King, na bihain liklik em i taim bilong em long skelim wok bilong dispela “wokboi.” Long planti samting em i lukim olsem dispela “wokboi” i kamapim klia em “i gat gutpela tingting na i save mekim gutpela wok.” Olsem na em i makim dispela wokboi long bosim “olgeta samting bilong en.” (Matyu 24:​45-47) Tasol i gat wanpela wokboi nogut, em i no mekim gutpela wok na i no gat gutpela tingting.

“Wokboi Em i Man Nogut”

2, 3. Pastaim “wokboi em i man nogut” i bilong wanem lain? Olsem wanem ‘wokboi nogut’ i kamap?

² Jisas i bin tok long wokboi nogut bihain stret long em i stori long “wokboi i gat gutpela tingting.” Em i tok: “Sapos dispela wokboi em i man nogut na em i ting long bel bilong en, ‘Bikman bilong mi bai i no inap i kam kwik,’ na em i stat long paitim ol wanwok bilong en, na em i wok long kaikai na dring wantaim ol man i save spak, orait bikman bai i kam bek long wanpela de dispela wokboi i no redi, na long wanpela taim em i no save long en. Na bikman bai i bagarapim tru dispela wokboi, na bai em i putim em i stap wantaim ol man bilong giaman, em ol man bilong tupela maus. Long dispela hap bai ol i krai nogut na skrapim tit bilong ol.” (Matyu 24:​48-51) Dispela tok “wokboi em i man nogut” i kirapim yumi long tingim tok Jisas i kamapim paslain long en, em long wokboi i gat gutpela tingting. Tru tumas, pastaim dispela ‘wokboi nogut’ i bilong lain gutpela wokboi.a Olsem wanem dispela samting i kamap?

³ Paslain long 1914, planti bilong lain gutpela wokboi i bilip tru olsem long 1914 ol bai bungim dispela Man i Marit Nupela long heven, tasol samting ol i wet long en i no bin kamap. Dispela samting wantaim sampela narapela samting i mekim na planti i bel hevi na sampela i kros. Sampela bilong ol i kirap “paitim,” olsem toknogutim, lain em bipo ol i stap brata brata wantaim ol na ol i kirap poromanim ‘ol spakman,’ em ol lotu bilong Kristendom.​—⁠Aisaia 28:​1-3; 32:⁠6.

 4. Jisas i mekim wanem long ‘wokboi nogut’ na long ol lain husat i kamapim dispela wankain pasin?

⁴ Pastaim ol i Kristen, tasol bihain em i kamap ples klia ol i ‘wokboi nogut,’ na Jisas i givim strafe na “bagarapim tru” ol. Em i mekim olsem wanem? Em i sakim ol, na ol i lus long kisim laip long heven. Tasol ol i no kisim bagarap wantu. Pastaim ol i mas karim hevi long krai nogut na skrapim tit bilong ol “long ples tudak” i stap ausait long kongrigesen Kristen. (Matyu 8:12) Kirap long taim dispela samting i kamap na i kam inap long nau, sampela narapela bilong lain God i bin makim ol i kamapim wankain tingting nogut, na ol i soim klia olsem ol i ‘wokboi nogut.’ Sampela bilong ol “arapela sipsip” i bihainim pasin nogut bilong ol. (Jon 10:16) Olgeta kain birua olsem bilong Krais i stap ausait long “ples tudak” bilong spirit.

 5. Wokboi i gat gutpela tingting i mekim wanem na ol i stap narapela kain long ‘wokboi nogut’?

⁵ Wokboi i gat gutpela tingting i kisim ol wankain traim olsem dispela ‘wokboi nogut.’ Tasol wokboi i gat gutpela tingting i no kros, nogat, ol i stretim tingting bilong ol. (2 Korin 13:11) Pasin bilong ol long laikim tru Jehova na ol brata i kamap strong moa. Olsem na ol i stap “olsem strongpela pos i karim tok tru” nau long taim nogut bilong “las de.”​—⁠1 Timoti 3:15; 2 Timoti 3:⁠1.

Ol Savemeri na Ol Kranki Meri

 6. (a) Jisas i mekim wanem tok piksa long gutpela tingting bilong gutpela wokboi bilong em? (b) Paslain long 1914, ol Kristen God i bin makim ol i autim wanem tok?

⁶ Bihain long Jisas i stori long ‘wokboi nogut,’ em i mekim tupela tok piksa bilong kamapim klia as na sampela ol Kristen God i bin makim ol bai mekim gutpela wok oltaim na bihainim gutpela tingting na sampela narapela nogat.b Bilong makim gutpela tingting, em i tok: “Kingdom bilong heven bai i olsem stori bilong 10-pela yangpela meri. Wanpela man i marit nupela, em i laik i kam. Na dispela ol yangpela meri ol i kisim ol lam bilong ol, na ol i go bilong bungim em long rot na bringim em i kam. 5-pela bilong ol dispela meri ol i kranki meri, na 5-pela i gat save. Ol kranki meri i bringim ol lam bilong ol i kam, tasol ol i no kisim arapela wel i kam wantaim. Tasol ol meri i gat save, ol i pulimapim arapela wel long ol botol bilong ol na ol i bringim i kam wantaim ol lam.” (Matyu 25:​1-4) Tenpela yangpela meri i kirapim yumi long tingim ol Kristen God i bin makim em ol i stap paslain long 1914. Ol i kisim save olsem man i marit nupela, Jisas Krais, klostu bai em i kam. Olsem na ol i “go” bilong bungim em, ol i strong long autim tok olsem ‘taim bilong ol arapela lain’ bai i pinis long 1914.​—⁠Luk 21:⁠24.

 7. Wanem taim i olsem ol Kristen God i bin makim ‘ol i slip’? Wanem samting i mekim na ol i slip?

⁷ Ol i gat stretpela tingting. Taim bilong ol man bilong ol arapela lain i bin pinis long 1914, na Kingdom Bilong God long han bilong Krais Jisas i kirap mekim wok. Tasol em long heven, long ples ol man i no inap lukim. Long graun, ol man i kirap long karim pen long ol “bikpela hevi” Baibel i tok profet long en. (KTH 12:​10, 12) Taim bilong traim i kamap. Ol Kristen God i bin makim ol i no klia gut long sampela tok, ol i ting “man i marit nupela em i no kam kwik.” Ol i paul na ol man i birua long ol, olsem na planti bilong ol i no wok strong moa na klostu wok bilong autim tok i lus olgeta. Olsem tenpela meri long tok piksa, long ol samting bilong spirit i olsem ‘ai bilong ol i hevi na ol i slip,’ kain olsem ol man i tok ol i Kristen ol i no bin stap gut long God bihain long ol aposel bilong Jisas i dai pinis.​—⁠Matyu 25:5; KTH 11:​7, 8; 12:⁠17.

 8. Wanem samting i bin kamap na i gat singaut olsem: “Man i marit nupela i kam nau”? Em i taim bilong ol Kristen God i bin makim long mekim wanem?

⁸ Tasol long 1919, samting ol i no tingim i kamap. Baibel i tok: “Long biknait tru ol i harim wanpela man i singaut olsem, ‘Man i marit nupela em i kam nau. Yupela kam, yumi go bungim em long rot na bringim em i kam.’ Orait dispela olgeta yangpela meri ol i kirap, na ol i redim lam bilong ol.” (Matyu 25:​6, 7) Long taim i luk olsem i no gat gutpela samting inap kamap, i gat singaut long mekim wok! Long 1918, Jisas, em “ensel bilong autim tok bilong kontrak,” i kamap long tempel spirit bilong Jehova long skelim na mekim kongrigesen bilong God i kamap klin. (Malakai 3:⁠1) Orait nau, ol Kristen God i bin makim i mas i go bungim em long banis bilong tempel spirit hia long graun. Em taim bilong ol long “kirap na lait olsem san.”​—⁠Aisaia 60:1; Filipai 2:​14, 15.

9, 10. Long 1919, bilong wanem sampela Kristen “i gat save” na sampela “ol i kranki”?

⁹ Tasol wet pastaim! Long dispela tok piksa, sampela bilong ol yangpela meri i gat hevi. Jisas i tok moa: “Ol kranki meri i tokim ol meri i gat save olsem, ‘Yupela givim mipela hap wel bilong yupela. Ol lam bilong mipela i laik i dai.’ ” (Matyu 25:⁠8) Sapos i no gat wel, lam i no inap givim lait. Olsem na wel bilong lam i kirapim yumi long tingim tok i tru bilong Baibel na holi spirit bilong God, em ol samting i strongim ol man i lotu tru long God long stap olsem lait. (Song 119:130; Daniel 5:14) Paslain long 1919, ol Kristen God i bin makim na i gat gutpela tingting ol i givim bel long painimaut ol samting God i laik bai ol i mekim, maski inap sotpela taim ol i no gat strong. Olsem na taim i gat singaut long i stap olsem lait, ol i redi.​—⁠2 Timoti 4:2; Hibru 10:​24, 25.

¹⁰ Tasol sampela bilong ol lain God i bin makim, ol i no redi long lusim sampela samting bilong ol yet o taitim bun na mekim wok​—⁠maski ol i laik tru long stap wantaim Man i Marit Nupela. Olsem na long taim ol i mas givim bel long autim gutnius, ol i no redi. (Matyu 24:14) Na tu, ol i traim long pasim ol poroman bilong ol long givim bel long wok, olsem ol i askim ol long kisim sampela wel bilong ol. Long tok piksa bilong Jisas, ol savemeri i tok wanem? Ol i tok: “Dispela wel bai i no inap long mipela na long yupela tu. Mobeta yupela i go long stua na baim bilong yupela yet.” (Matyu 25:⁠9) Olsem tasol long 1919 ol gutpela Kristen God i bin makim, ol i no orait long mekim wanpela samting i daunim strong bilong ol long givim lait. Olsem na ol i winim traim.

11. Wanem samting i painim ol kranki meri?

¹¹ Long pinis bilong stori Jisas i tok: “Ol 5-pela kranki meri i go pinis bilong baim wel, na dispela man i marit nupela em i kam. Na ol meri i redi ol i go insait long haus wantaim em long bikpela kaikai bilong marit. Na ol man i pasim dua. Bihain ol arapela yangpela meri i kam, na ol i tok, ‘Bikman, bikman, kam opim dua long mipela.’ Tasol em i bekim tok olsem, ‘Mi tok tru long yupela, mi no save long yupela.’ ” (Matyu 25:​10-12) Em nau, sampela i no redi long taim Man i Marit Nupela i kam. Olsem na ol i no winim traim na rot i no op moa long i go long bung bilong marit long heven. Em bikpela hevi tru!

Tok Piksa Long Ol Wokboi i Kisim Mani

12. (a) Jisas i tok piksa long wanem samting bilong makim pasin bilong stap gut long wok? (b) Man “i go long longwe ples” em i husat?

¹² Bihain long tok piksa i makim pasin bilong bihainim gutpela tingting, Jisas i kamapim tok piksa i makim pasin bilong stap gut long wok. Em i tok: “I olsem wanpela man i laik wokabaut i go long longwe ples. Em i singautim ol wokboi bilong en i kam, na i putim ol samting bilong en long han bilong ol, bai ol i ken lukautim. Em i tingim pasin na strong bilong ol wokboi wan wan, na em i tilim mani long ol. Long narapela em i givim 5,000 kina na long narapela em i givim 2,000 kina na long narapela em i givim 1,000 kina. Em i mekim olsem na em i go.” (Matyu 25:​14, 15) Man long dispela tok piksa i makim Jisas yet, em “i go long longwe ples” long taim em i go long heven long yia 33 C.E. Tasol paslain long em i go antap, Jisas i putim “ol samting bilong en” i go long han bilong ol gutpela disaipel. Em i mekim olsem wanem?

13. Olsem wanem Jisas i kirapim wanpela bikpela wok na givim namba long “ol wokboi” bilong em long mekim wok bisnis?

¹³ Long taim em i mekim wok bilong em hia long graun, Jisas i autim gutnius bilong Kingdom long olgeta hap bilong Israel, na long dispela rot em i kirapim wanpela bikpela wok. (Matyu 9:​35-38) Paslain long em “i go long longwe ples,” em i givim dispela wok i go long ol gutpela disaipel bilong em, na em i tok: “Yupela i mas i go mekim olgeta lain manmeri i kamap disaipel bilong mi. Na yupela baptaisim ol long nem bilong Papa na bilong Pikinini na bilong Holi Spirit. Na yupela lainim ol long bihainim olgeta tok mi bin givim long yupela.” (Matyu 28:​18-20) Em nau, Jisas i givim namba long “ol wokboi” bilong em long mekim wok bisnis i go inap long taim em i kam bek, na “em i tingim pasin na strong bilong ol wokboi wan wan.”

14. Bilong wanem Jisas i no ting olgeta i mas mekim wankain wok?

¹⁴ Dispela tok i soim olsem olgeta Kristen long taim bilong ol aposel i no gat wankain sindaun na rot i op long ol. Sampela, olsem Pol na Timoti, i no gat samting i pasim ol long insait tru long wok bilong autim tok na skulim ol narapela. Ating sindaun bilong sampela narapela i pasim ol na ol i no stap fri long mekim planti samting. Olsem: Sampela Kristen ol i stap wokboi nating bilong man, sampela i gat sik, lapun, o ol i gat wok long lukautim famili. Na tu, sampela wok insait long kongrigesen i no bilong olgeta disaipel long mekim. Olgeta meri God i bin makim na sampela man God i bin makim, ol i no mekim wok tisa long kongrigesen. (1 Korin 14:34; 1 Timoti 3:1; Jems 3:⁠1) Tasol maski ol i gat wanem kain sindaun, olgeta disaipel bilong Krais God i bin makim​—⁠ol man na meri wantaim​—⁠i mas mekim wok bisnis, olsem mekim gutpela wok long ol rot i op long ol na long sindaun bilong ol na mekim wok Kristen bilong autim tok. Ol wanlain bilong ol long nau i mekim wankain samting.

Taim Bilong Skelim Wok!

15, 16. (a) Taim bilong skelim ol samting, em long wanem taim? (b) Ol man i stap gut long wok i gat wanem ol nupela rot bilong mekim “wok bisnis”?

¹⁵ Tok piksa i go moa: “Longpela taim i go pinis, na bihain bikman bilong ol dispela wokboi i kam bek. Na em i laik stretim tok wantaim ol long dispela mani em i bin givim ol.” (Matyu 25:19) Long 1914​—⁠em longpela taim bihain long 33 C.E.​—⁠Krais Jisas i kam bek olsem King. Tripela na hap yia bihain, long 1918, em i kam long tempel spirit bilong God na truim tok bilong Pita: “Taim bilong God i kirapim kot long yumi ol lain bilong em yet, dispela taim i kamap pinis.” (1 Pita 4:17; Malakai 3:⁠1) Em i taim bilong skelim ol samting.

¹⁶ Ol wokboi, em ol brata bilong Jisas God i bin makim, ol i mekim wanem long “mani” bilong King? Kirap long 33 C.E. na kam inap nau, na ol yia paslain liklik long 1914 tu, planti ol i givim bel long “wok bisnis” bilong Jisas. (Matyu 25:16) Na long taim bilong Wol Woa 1 tu, ol i soim yet bikpela laik long mekim wok bilong Bikman. Olsem na i stret ol dispela man i stap gut long wok ol i kisim ol nupela rot bilong mekim “wok bisnis.” Taim bilong pinis bilong dispela pasin nogut bilong nau i bin kamap. Ol i mas autim gutnius i go long olgeta hap. Em taim bilong kisim “olgeta kaikai bilong graun i mau pinis.” (KTH 14:​6, 7, 14-16) I gat wok long painim ol laspela lain manmeri i olsem pikinini wit na long bungim “planti manmeri tru” bilong ol arapela sipsip.​—⁠KTH 7:9; Matyu 13:​24-30.

17. Olsem wanem ol gutpela Kristen God i bin makim i ‘amamas wantaim bikman bilong ol’?

¹⁷ Taim bilong kisim kaikai i mau em i taim bilong amamas. (Song 126:⁠6) Olsem na i stret, long 1919, taim Jisas i givim bikpela wok moa long ol gutpela brata bilong em, em i tok: “Yu bin lukautim gut ol liklik samting, olsem na mi laik bai yu bosim planti samting. Yu kam amamas wantaim mi.” (Matyu 25:​21, 23) Amamas bilong dispela nupela King bilong Kingdom Bilong God i bikpela tru, winim amamas yumi inap tingim. (Song 45:​1, 2, 6, 7) Gutpela wokboi i insait long dispela amamas, ol i stap mausman bilong King na helpim ol samting bilong em hia long graun i kamap planti. (2 Korin 5:20) Amamas bilong ol i olsem tok profet bilong Aisaia 61:10 i kamapim: “Bai mi singsing amamas long God, Bikpela bilong mi. Bai mi amamas moa yet, long wanem, em i bin kisim bek mi.”

18. I gat wanem as na sampela i no winim dispela taim bilong skelim wok? Wanem samting i painim ol?

¹⁸ Sori tru, sampela i no winim dispela taim bilong skelim wok. Baibel i tok: “Man i bin kisim 1,000 kina em tu i kam, na em i tok olsem, ‘Bikman, mi save pinis, yu hatpela man. Yu save kamautim kaikai long ol gaden ol arapela man i planim. Na long hap graun narapela man i bin tromoi pikinini kaikai long en, yu save kisim ol kaikai i kamap. Olsem na mi pret na mi go haitim dispela 1,000 kina bilong yu long graun. Em hia mani bilong yu.’ ” (Matyu 25:​24, 25) Olsem tasol sampela Kristen God i bin makim ol i no bin mekim “wok bisnis.” Paslain long 1914 ol i no givim bel long autim bilip bilong ol long ol narapela, na ol i no laik kirap na mekim long 1919. Jisas i mekim wanem long pasin bikhet bilong ol? Em i tekewe olgeta wok bilong ol. Em i rausim ol “i go ausait long ples tudak. Long dispela hap bai ol i krai nogut na skrapim tit bilong ol.”​—⁠Matyu 25:​28, 30.

Wok Bilong Skelim Ol Samting i Stap Yet

19. Olsem wanem wok bilong skelim ol samting i go yet? Olgeta Kristen God i bin makim i strong long mekim wanem?

¹⁹ Tru, planti bilong ol manmeri God i bin makim bilong kamap wokboi bilong Krais long taim bilong pinis, ol i no bin mekim wok bilong Jehova long taim Jisas i kirap skelim ol samting long 1918. Olsem wanem? Jisas i no skelim ol? I no olsem. Wok bilong skelim ol i kirap tasol long 1918/1919, taim wokboi i gat gutpela tingting olsem wanpela lain i winim dispela taim bilong skelim ol. Jisas i skelim yet ol Kristen God i bin makim i go inap long taim ol i kisim tru mak. (KTH 7:​1-3) Ol brata bilong Krais i save long dispela samting, olsem na ol i strong long mekim yet “wok bisnis.” Ol i strong long bihainim gutpela tingting, olsem holim planti wel na bai lait bilong ol i ken lait strong. Ol i save olsem taim wanpela i stap gut long God i go inap long taim em i dai, Jisas bai kisim em i go long heven.​—⁠Matyu 24:13; Jon 14:​2-4; 1 Korin 15:​50, 51.

20. (a) Ol narapela sipsip long nau i strong long mekim wanem? (b) Ol Kristen God i bin makim i save tru long wanem samting?

²⁰ Bikpela lain bilong ol arapela sipsip ol i bihainim pasin bilong ol brata bilong ol em God i bin makim. Ol i klia tru olsem save bilong ol long ol samting God i tingting pinis long mekim i makim olsem ol i gat bikpela wok. (Esekiel 3:​17-21) Tok Bilong Jehova na holi spirit i helpim ol, olsem na long rot bilong stadi na ol miting Kristen ol tu i holim planti wel i stap. Ol i larim lait bilong ol i lait, na ol i insait long wok bilong autim tok na skulim ol narapela, na long dispela rot ol i ‘mekim wok bisnis’ wantaim ol brata bilong ol em God i bin makim. Ol Kristen God i bin makim i save tru olsem Bikman i putim mani i stap long han bilong ol. Jisas bai skelim wok ol i mekim bilong lukautim ol samting bilong em hia long graun. Maski ol i no planti, ol i no ken givim wok bilong ol i go long bikpela lain. Olsem na wokboi i gat gutpela tingting i wok yet long go pas na lukautim ol bisnis bilong King, na ol i tenkyu tru long helpim bilong bikpela lain manmeri i givim bel long wok. Bikpela lain manmeri i save long wok bilong ol brata bilong ol em God i bin makim na ol i amamas tru long stap aninit long wok bos bilong ol.

21. Kirap paslain liklik long 1919 na i kam inap long taim bilong yumi, wanem tok i stret long olgeta Kristen?

²¹ Tupela tok piksa hia i givim save long yumi long ol samting i kamap long 1919 o haptaim klostu long en, tasol ol stiatok bilong ol i stret long olgeta trupela Kristen long taim bilong las de. Olsem na tok Jisas i mekim long pinis bilong tok piksa bilong tenpela meri em i bilong ol Kristen God i bin makim em ol i stap paslain long 1919, tasol stiatok bilong en i stret long olgeta Kristen. Gutpela sapos yumi olgeta i tingim tru tok bilong Jisas: “Was gut. Yupela i no save long wanem de na wanem aua Bikpela bilong yupela bai i kamap.”​—⁠Matyu 25:⁠13.

[Ol Futnot]