Bihainim Bilip Bilong Ol
Em i Kisim Skul Long Jisas Long Pasin Bilong Lusim Rong
PITA i no inap lusim tingting long dispela taim Jisas i bin lukluk long em. Olsem wanem? Em inap lukim olsem Jisas i bel hevi o i no amamas long em? Yumi no inap save long dispela; Baibel i tok tasol olsem “Bikpela i tanim na i lukluk long Pita.” (Luk 22:61) Tasol taim Jisas i lukluk long em, Pita i luksave olsem em i bin mekim bikpela rong tru. Em i save olsem em i bin mekim samting em Jisas i bin tok profet long en, em samting Pita i bin strong na tok olsem em bai i no inap tru long mekim—em i bin givim baksait long Bikman bilong em. Bel bilong Pita i bagarap stret, ating dispela em i wanpela taim nogut tru long laip bilong em.
Tasol i no olsem Pita i no gat rot moa long stretim pasin bilong em. Pita i gat strongpela bilip, olsem na em inap kamap strong gen na kisim wanpela bikpela skul long Jisas. Em pasin bilong lusim rong. Yumi olgeta i mas lainim dispela samting, olsem na nau yumi ken skelim olsem wanem Pita i kisim skul long pasin bilong lusim rong.
Em i Mas Kisim Skul Long Planti Samting
Inap 6-pela mun paslain long dispela, long ples bilong em long Kaperneam, Pita i go long Jisas na askim em olsem: “Bikpela, hamas taim brata bilong mi i ken mekim rong long mi, na mi mas lusim rong bilong en? Ating inap long 7-pela taim?” Ating Pita i ting em i mekim gutpela pasin sapos em i mekim olsem, long wanem, ol bikman bilong lotu i lainim ol man olsem ol i mas lusim rong inap 3-pela taim tasol! Jisas i tok: “Mi no tok long yu mas lusim rong bilong en inap 7-pela taim tasol. Nogat. Mi tok, yu mas lusim inap 70 taims 7-pela taim.”—Matyu 18:21, 22.
Yu ting Jisas i tokim Pita long raitim long wanpela buk hamas taim ol man i rongim em? Nogat, taim Jisas i mekim dispela tok 70 taims 7-pela taim, em i laik tok olsem i no gat mak bilong hamas taim man i mas fogivim narapela. Planti man long dispela taim i gat hatpela pasin na pasin bilong tingim rong, na Jisas i soim olsem dispela pasin i bin stiaim Pita na em i ting man i mas kaunim hamas taim em i fogivim narapela. Tasol God i laik bai man i redi oltaim long lusim rong.
Pita i no tok pait wantaim Jisas. Tasol olsem wanem? Em i pilim tru tok bilong Jisas? Taim yumi yet i luksave olsem yumi laik bai ol narapela i mas lusim rong bilong yumi, long dispela kain taim yumi kisim skul long pasin bilong lusim rong. Orait nau yumi ken go bek na tingim ol samting i bin kamap paslain long dai bilong Jisas. Insait long dispela taim nogut, Pita i mekim planti samting em Bikman bilong em i mas fogivim em long en.
Jisas i Mas Fogivim Pita Planti Taim
Em i bikpela nait—laspela nait bilong Jisas long i stap long graun. I gat planti samting Jisas i laik skulim ol aposel bilong em long en—olsem ol samting bilong pasin daun. Jisas i stap gutpela piksa na wasim lek bilong ol, em wanpela wok ol wokboi nating i save mekim. Pastaim, Pita i tingting planti long samting Jisas i laik mekim. Bihain em i tok Jisas i no ken wasim lek bilong em. Tasol bihain gen em i tok Jisas i no ken wasim lek tasol bilong em, nogat, em i mas wasim han na het tu bilong em! Jisas i no les kwik long em, tasol long pasin isi em i stori long bikpela mining bilong samting em i mekim.—Jon 13:1-17.
Tasol bihain liklik, ol aposel i kirap tok pait long husat namel long ol i stap namba wan. Pita tu i bin insait long dispela pasin nogut. Tasol Jisas i stretim ol long gutpela pasin na i tok amamas long gutpela samting ol i bin mekim—ol i bin stap gut long Bikman bilong ol. Tasol em i tok profet olsem olgeta bilong ol bai lusim em. Pita i tok em bai stap wantaim Jisas maski ol man i kilim em i dai. Tasol Jisas i tok profet olsem paslain long kakaruk i krai inap tupela taim long dispela nait, Pita bai tok inap tripela taim olsem em i no save long Bikman bilong em. Pita i tok em i no inap tru long mekim olsem, na tu, em i tok em bai stap gut moa yet long Jisas, winim ol narapela aposel!—Matyu 26:31-35; Mak 14:27-31; Luk 22:24-28.
Yu ting Jisas bai les nau long Pita? Nogat, long dispela taim bilong hevi, Jisas i wok yet long tingim ol gutpela pasin bilong ol aposel bilong em. Em i save Pita bai i no stap gut long em, tasol em i tok: “Mi beten pinis bilong helpim yu, bai bilip bilong yu i no ken pundaun. Na taim yu tanim na yu kam bek, orait yu mas strongim ol brata bilong yu.” (Luk 22:32) Jisas i soim olsem em i bilip long Pita bai kamap strong gen na kirap mekim wok bilong God. Pasin bilong Jisas long fogivim man i gutpela tru!
Bihain, long gaden Getsemani, Jisas i mas stretim Pita planti taim liklik. Jisas i askim em na Jems na Jon tu, long was i stap taim Em i beten. Bel bilong Jisas i bagarap stret na em i nidim helpim, tasol Pita na ol narapela i wok yet long slip. Tok Jisas i mekim i soim olsem em i pilim hevi bilong ol na i fogivim ol, em i tok: “Tru, bel em i gat laik bilong mekim samting, tasol bodi em i no gat strong.”—Mak 14:32-38.
Bihain, bikpela lain man i kam, ol i holim ol bombom na ol bainat na stik. Nau em i taim bilong tingting gut na mekim samting. Tasol Pita i kirap kwik na em i kisim bainat na katim na rausim wanpela yau bilong Malkus, em wanpela wokboi bilong hetpris. Long pasin isi Jisas i stretim Pita, oraitim yau bilong wokboi, na i kamapim stiatok i soim olsem i no stret long pait, em dispela tok i stiaim ol disaipel bilong Jisas i kam inap long nau. (Matyu 26:47-55; Luk 22:47-51; Jon 18:10, 11) Pita i bin mekim pinis planti popaia em Bikman bilong em i mas fogivim. Ating stori bilong em i kirapim yumi long tingim olsem ‘planti taim yumi save popaia.’ (Jems 3:2) God i mas fogivim yumi olgeta long olgeta wan wan de. Tasol sampela samting moa bai painim Pita long dispela nait. Na dispela samting i nogut moa.
Bikpela Rong Bilong Pita
Jisas i tokim bikpela lain man olsem sapos ol i wok long painim em, ol i mas larim ol aposel i go. Pita i lukluk tasol taim ol dispela man i holim Jisas. Pita i ranawe, na ol arapela aposel tu i mekim olsem.
Pita na Jon i stop klostu long haus bilong Hetpris bilong bipo em Anas, we pastaim ol man i kisim Jisas i go bilong sutim ol askim long em. Taim ol man i kisim Jisas i go long narapela hap, Pita na Jon i bihainim ol, tasol ol “i stap longwe liklik.” (Matyu 26:58; Jon 18:12, 13) Pita i no man bilong pret. Em i mas i gat strongpela bel bambai em inap bihainim ol man i kisim Jisas. Ol dispela man i holim ol bainat na stik, na Pita i bin katim yau bilong wanpela bilong ol. Tasol yumi inap lukim pasin bilong Pita long i stap gut long narapela—em i redi long i dai wantaim Bikman bilong em sapos em i mas mekim olsem.—Mak 14:31.
Olsem Pita, planti man long nau i laik bihainim Krais “longwe liklik”—olsem long pasin ol narapela i no inap lukim. Tasol bihain Pita yet i tok, stretpela rot bilong bihainim Krais em olsem: Yumi mas stap klostu tru long em, bihainim pasin bilong em long olgeta taim maski wanem samting i kamap.—1 Pita 2:21.
Pita i was gut na i bihainim ol man i kisim Jisas i go, na em i kamap long geit bilong wanpela bikpela haus long Jerusalem. Em haus bilong Kaiafas, em wanpela hetpris i gat planti mani na bikpela namba. Ol kain haus olsem i raunim ples bung, na i gat geit long fran. Pita i kamap long geit, tasol ol i no larim em i kam insait. Jon i stap insait pinis long banis na em i kam na askim meri bilong was long geit long larim Pita i kam insait. I luk olsem Pita i no stap klostu long Jon, na tu, em i no traim long i go insait long haus na sanap klostu long Bikman bilong em. Em i stap long ples bung, we sampela sleiv na wokboi i hatim skin klostu long paia, long wanem, nait i kol. Ol i lukluk long ol man husat i go i kam na sutim tok giaman long Jisas long kot i kamap insait long haus.—Mak 14:54-57; Jon 18:15, 16, 18.
Paia i givim lait, na meri husat i larim Pita i kam insait long banis inap lukim gut Pita. Em i luksave long em, na sutim tok olsem: “Yu tu yu bin i stap wantaim Jisas bilong Galili.” Pita i kirap nogut, na em i tok em i no save long Jisas—em i tok em i no kliagut long meri i toktok long wanem samting. Pita i go sanap klostu long geit, em i no laik bai ol man i luksave long em, tasol narapela meri i lukim em na i mekim wankain tok olsem: “Dispela man i bin i stap wantaim Jisas bilong Nasaret.” Pita i tok strong olsem: “Tru antap, mi no save long dispela man.” (Matyu 26:69-72) Ating taim Pita i tok inap tupela taim olsem em i no save long Jisas, em i harim kakaruk i krai, tasol em i no tingim tok profet Jisas i bin mekim inap sampela aua paslain long dispela.
Bihain liklik, Pita i mekim yet ol samting na bai ol man i no ken luksave long em. Tasol wanpela lain i sanap insait long ples bung, ol i kam. Wanpela bilong ol em i wanblut bilong Malkus, dispela sleiv Pita i bin katim yau bilong em. Em i tokim Pita olsem: “Ating mi bin lukim yu i stap wantaim em long gaden, a?” Pita i strong long ol i mas save olsem tok bilong ol i no stret. Olsem na em i tok tru antap, na tok olsem God i ken bagarapim em sapos em i giaman. Em i tok pinis na wantu kakaruk i krai—em namba tu taim Pita i harim kakaruk i krai long dispela nait.—Jon 18:26, 27; Mak 14:71, 72.
Nau tasol Jisas i bin kam ausait long veranda i stap long sait bilong ples bung. Long dispela taim stret em i lukluk long Pita, olsem yumi stori pinis long en. Nau Pita i kliagut olsem em i pundaun tru na i no stap gut long Bikman bilong em. Pita i lusim ples bung, na bel bilong em i kotim em stret. Em i wokabaut i go long rot bilong biktaun, na mun i wok long i go daun na i givim lait long em. Em i no inap lukim gut ol samting. Aiwara i pulap long ai. Bel bilong em i bagarap stret na em i krai nogut tru.—Mak 14:72; Luk 22:61, 62.
Bihain long kain rong olsem, em i isi tru long man i ting sin bilong em i bikpela tumas na i no inap long narapela i fogivim em. Pita inap ting olsem Jisas i no inap fogivim em. Tasol olsem wanem? Jisas inap fogivim em?
Rong Bilong Pita i Bikpela Tumas Long Fogivim?
I hatwok long piksaim long tingting bikpela pen Pita i bin pilim taim tulait i bruk na ol samting i kamap long dispela de. Ating em i krosim em yet taim Jisas i dai long dispela apinun bihain long ol man i givim bikpela pen long em inap planti aua! Pita i mas pilim nogut stret long tingim olsem em i mekim na bel hevi bilong Bikman i go bikpela moa long dispela de we em i laspela de bilong Em long i stap laip olsem man. Tasol maski bel hevi bilong Pita i bikpela tru, em i no larim bel hevi i daunim em olgeta. Yumi save long dispela, long wanem, Baibel i tok i no longtaim na em i bung gen wantaim ol brata bilong em. (Luk 24:33) Ating olgeta aposel i bel hevi long pasin ol i bin mekim long dispela nait bilong bikpela hevi, na ol i mekim gut bel bilong narapela narapela.
Yumi lukim hia Pita i mekim wanpela gutpela disisen tru. Taim wanpela wokman bilong God i pundaun, maski rong bilong em i bikpela, dispela i no nambawan bikpela samting, nogat. Nambawan bikpela samting em olsem: Em i mas tingting strong long kirap sanap gen na stretim pasin bilong em. (Sindaun 24:16) Pita i soim olsem em i gat bilip tru taim em i bung wantaim ol brata bilong em, maski em i bel hevi. Taim bel hevi i daunim man, ating em i gat laik long stap wanpis, tasol dispela inap bagarapim em. (Sindaun 18:1) Em i savetingting long i stap klostu long ol wanbilip na kisim strong gen long mekim wok bilong God.—Hibru 10:24, 25.
Pita i stap wantaim ol brata, olsem na em i harim dispela toksave olsem bodi bilong Jisas i no stap moa long matmat. Pita na Jon i ran i go long matmat we ol man i bin planim Jisas na pasim dua bilong matmat. Jon, ating em i yangpela long Pita, em i kamap pastaim long matmat. Taim em i lukim olsem dua bilong matmat i op i stap, em i no laik i go insait. Tasol Pita i no olsem. Maski em i sotwin, em i sut i go insait long matmat. Matmat i stap nating!—Jon 20:3-9.
Olsem wanem? Pita i bilip olsem Jisas i kirap bek pinis? Pastaim nogat, maski ol meri i tok olsem ol ensel i bin kam na tokim ol olsem Jisas i kirap bek pinis. (Luk 23:55–24:11) Tasol long apinun, Pita i no bel hevi moa na em i no gat tupela tingting moa. Jisas i stap laip, nau em i wanpela strongpela spirit! Em i kamap long olgeta aposel bilong em. Tasol pastaim em i kamap long wanpela man tasol. Ol aposel i tok long dispela de olsem: “Tru tumas, Bikpela i kirap bek! Saimon i lukim em pinis!” (Luk 24:34) Bihain, aposel Pol tu i stori long dispela narakain de we Jisas “i kamap long Pita, na bihain gen long ol 12-pela aposel.” (1 Korin 15:5) Saimon em i narapela nem bilong Pita. Jisas i bin kamap long em long dispela de—long taim Pita i stap wanpis.
Baibel i no stori long wanem samting i kamap namel long Jisas na Pita taim ol i bung. Taim Pita i lukim Bikman bilong em i stap laip gen na em i gat rot long tok sori na tanim bel, Pita i pilim tru dispela samting. Em i gat bikpela laik tru long Jisas i mas fogivim em. Na yumi ken save olsem Jisas i fogivim em tru. Ol Kristen long nau husat i mekim sin, ol i mas tingim stori bilong Pita. Yumi no ken ting God i no inap fogivim yumi. Jisas i bihainim stret pasin bilong Papa, husat “i save lusim sin bilong olgeta.”—Aisaia 55:7.
Ol Samting i Soim Olsem Jisas i Fogivim Pita
Jisas i tokim ol aposel bilong em long i go long Galili we ol bai bungim em gen. Taim ol i kam kamap, Pita i go kisim pis long raunwara Galili. Sampela narapela i go wantaim em. Pita i stap gen long dispela raunwara we bipo em i bin lusim bikpela hap taim long en. Pairap bilong bot, nois bilong wara, na strongpela umben long han bilong em, ating ol dispela samting i mekim gut bel bilong em. Olsem wanem? Long dispela nait em i tingting long wanem samting em bai mekim long laip bilong em, taim Jisas i no stap moa long graun? Em i laik kamap gen olsem man bilong kisim pis? Tasol long dispela nait ol i no kisim wanpela pis.—Matyu 26:32; Jon 21:1-3.
Taim tulait i bruk, wanpela man i sanap long nambis na i tokim ol long tromoi umben bilong ol long narapela sait bilong bot. Ol i bihainim dispela tok na kisim 153 pis! Pita i save dispela man em i husat. Em i kalap i go daun long wara na swim i go long nambis. Long nambis, Jisas i givim ol pis i kuk pinis long paia. Em i toktok long Pita.
Jisas i askim Pita sapos em i laikim Bikman bilong em ‘winim ol dispela’—ating em i poinim pinga long ol dispela pis ol i bin kisim. Olsem wanem? Pasin bilong Pita long laikim wok bilong kisim pis bai winim pasin bilong em long laikim Jisas? Pastaim, inap tripela taim Pita i bin tok em i no save long Bikman bilong em, na nau Jisas i givim rot long em long tokaut inap tripela taim long ai bilong ol pren bilong em, olsem em i laikim tru Jisas. Taim Pita i mekim olsem, Jisas i tokim em long rot bilong kamapim dispela pasin laikim: Em i mas putim wok bilong God i stap namba wan samting long laip bilong em, em i mas givim kaikai long ol sipsip bilong Krais na lukautim ol, em ol gutpela disaipel.—Jon 21:4-17.
Long dispela rot Jisas i kamapim klia olsem Pita inap mekim yet gutpela wok bilong em na bilong Papa. Pita bai mekim bikpela wok insait long kongrigesen aninit long wok bos bilong Krais. Dispela i kamapim klia stret olsem Jisas i fogivim tru Pita! Pita i pilim tru long bel dispela pasin marimari.
Pita i stap gut long wok bilong em inap planti yia. Em i strongim ol brata bilong em, olsem Jisas i bin tokim em long mekim long dispela nait Em i dai. Long gutpela pasin na pasin isi Pita i lukautim na givim kaikai long ol disaipel bilong Krais. Dispela man ol i kolim Saimon em i bihainim stret pasin i makim dispela nem Jisas i givim long em—Pita, o Ston—em i stap gut, stap strong, na i mekim ol samting bilong helpim kongrigesen. Ol gutpela samting dispela i kamapim i stap ples klia long tupela pas Pita i bin raitim na i stap long Baibel. Ol dispela pas i soim tu olsem Pita i no inap lusim tingting long skul em i bin kisim long Jisas long pasin bilong lusim rong.—1 Pita 3:8, 9; 4:8.
Yumi tu i mas kisim skul long dispela pasin. Olsem wanem? Long olgeta de yumi save askim God long lusim ol rong bilong yumi? Yumi bilip olsem God i fogivim yumi na yumi stap klin long ai bilong em? Na yumi yet i save fogivim ol narapela man? Sapos olsem, yumi bihainim bilip bilong Pita—na pasin marimari bilong Bikman bilong em.
[Rait long pes 22]
Pita i mekim planti samting em Bikman i mas fogivim em long en, na yumi tu i nidim God long fogivim yumi long olgeta de
[Piksa long pes 23]
“Bikpela i tanim na i lukluk long Pita”
[Piksa long pes 24]
“Saimon i lukim [Bikpela] pinis!”