Sakim Satan na Em Bai Ranawe!

“Yupela i mas . . . stap aninit long God. Yupela i mas sakim Satan, na em bai i lusim yupela na ranawe.”​—JEMS 4:7.

1, 2. (a) Dispela tok i stap long Aisaia sapta 14 i kamapim wanem pasin bilong Satan? (b) Bai yumi skelim wanem ol askim?

SATAN em i man bilong hambak tru. Wanpela profet bilong God, Aisaia, i mekim wanpela tok i kamapim klia pasin hambak bilong em. Winim wan handet yia paslain long taim kantri Babilon i kamap nambawan strongpela gavman bilong graun, tok profet bilong Aisaia i makim olsem lain bilong Jehova i mekim dispela tokaut i go stret long “king bilong Babilon”: “Yu bin i gat tingting olsem, ‘Bai mi abrusim ol sta na i go antap tru long heven. Na bai mi putim sia king bilong mi antap tru long ol sta bilong God [ol king i kamap long lain bilong Devit]. . . . Bai mi stap olsem God Antap Tru.’ ” (Aisaia 14:​3, 4, 12-15; Namba 24:17) Pasin hambak bilong “king bilong Babilon” i wankain olsem tingting bilong Satan, em “giaman god bilong dispela graun.” (2 Korin 4:4) Tasol pasin hambak bilong Satan bai pinis, wankain olsem ol lain king bilong Babilon i bin pinis.

² Tasol Satan i stap yet, olsem na ating i gat sampela askim yumi wok long tingim, olsem: Yumi mas pret long Satan? Bilong wanem em i save kirapim ol man long mekim nogut long ol Kristen? Yumi ken mekim wanem na bai Satan i no ken winim yumi?

Yumi Mas Pret Long Satan?

3, 4. Bilong wanem ol Kristen God i bin makim na ol poroman bilong ol i no pret long Satan?

³ Wanpela tok bilong Jisas Krais i strongim tru ol Kristen God i bin makim. Em i tok: “Bihain liklik yu bai karim pen, tasol dispela i no ken mekim yu i pret. Harim. Satan bai i mekim, na ol bai i kalabusim sampela man namel long yupela, bilong traim yupela. Na bai yupela i karim hevi na pen inap long 10-pela de. Tasol yu mas holim bilip, i go inap long taim yu dai, na bai mi givim yu laip olsem prais.” (KTH 2:10) Dispela lain God i bin makim, na ol poroman bilong ol i wet long kisim laip oltaim long graun, ol i no pret long Satan. Tasol i no olsem ol yet i gat strongpela bel na ol i no save pret, nogat. Ol i no pret long Satan, long wanem, ol i save pret long God na ol i “go long [em] na hait, olsem ol pikinini kakaruk i save hait aninit long wing bilong mama kakaruk.”​—Song 34:9; 36:7.

⁴ Ol disaipel bilong Jisas Krais long bipo i gat strongpela bel na ol i stap gut long God inap long taim ol i dai, maski ol i bin kisim planti pen na hevi. Ol i no pret long samting Satan inap mekim long ol, long wanem, ol i save Jehova i no inap lusim ol man i stap gut long Em. Long nau tu, maski ol man i birua tru long ol Kristen God i bin makim na long ol poroman bilong ol, ol i strong long stap gut long God. Tasol aposel Pol i tok olsem Satan inap kirapim ol man long kilim i dai ol Kristen. Ating yumi mas pret long dispela o olsem wanem?

 5. Hibru 2:​14, 15 i givim wanem save long yumi?

⁵ Pol i tok Jisas i bin “kamap man” na “bai em i ken i dai, na long dispela pasin em i ken bagarapim Satan, em dispela man i gat strong bilong mekim ol manmeri i dai. Ol manmeri ol i save pret long dai, na . . . dispela pret bilong ol i mekim ol i stap olsem ol kalabus bilong Satan. Tasol Jisas em i dai bilong lusim ol long dispela kalabus.” (Hibru 2:​14, 15) Satan em “dispela man i gat strong bilong mekim ol manmeri i dai,” na em i stiaim Judas Iskariot na bihain em i kirapim ol hetman Juda na ol Rom long kilim i dai Jisas. (Luk 22:3; Jon 13:​26, 27) Tasol long rot bilong dai bilong em olsem ofa, Jisas i kisim bek ol sinman long kalabus bilong Satan na em i wokim rot bambai yumi ken kisim laip i stap oltaim oltaim.​—Jon 3:16.

6, 7.  Satan i save mekim ol samting inap long wanem mak bilong kilim man i dai?

⁶ Satan i save mekim ol samting inap long wanem mak bilong kilim man i dai? Stat long taim Satan i bin kirap long mekim pasin nogut, ol tok giaman na wok bilong em long stiaim tingting bilong ol man i bin mekim na ol i dai. Dispela samting i bin kamap, long wanem, Adam i bin mekim sin na long dispela rot em i givim sin na dai long olgeta man bilong graun. (Rom 5:12) Na tu, ol wokman bilong Satan long graun i bin mekim nogut long ol manmeri i lotuim Jehova, na sampela taim ol i kilim ol i dai, olsem ol i bin mekim long Jisas Krais.

⁷ Tasol yumi no ken ting Satan inap kilim i dai olgeta man em i gat laik long kilim i dai. God i save lukautim ol manmeri i bilong Em na em i no inap larim Satan i pinisim olgeta man i save lotu tru long Em. (Rom 14:8) Tru, Jehova i save larim olgeta manmeri bilong em i kisim nogut long han bilong ol birua, na em i save larim dai i painim sampela bilong yumi long pasin birua Satan i save mekim long yumi. Tasol Baibel i gat gutpela tok promis tru long God bai kirapim bek olgeta manmeri em ‘nem bilong ol i stap long buk’ bilong em​—na Satan i no inap mekim wanpela samting bilong pasim dispela samting!​—Malakai 3:16; Jon 5:​28, 29; Aposel 24:15.

Bilong Wanem Satan i Birua Long Yumi?

 8. Bilong wanem Satan i kirapim ol man long birua long ol wokman bilong God?

⁸ Sapos yumi ol wokman bilong God i stap gut long em, i gat as na Satan i kirapim ol man long birua long yumi. Em i laik bai yumi lusim bilip. Yumi pas gut wantaim Papa bilong yumi long heven, na Satan i laik bagarapim dispela samting. Yumi no ken kirap nogut long dispela. Long Iden Jehova i tok profet olsem pasin birua bai stap namel long “meri” na “snek,” na namel long “lain” bilong meri na “lain” bilong snek. (Stat 3:​14, 15) Baibel i kamapim klia olsem Satan em dispela “snek bilong bipo yet” na i tokaut olsem taim bilong em i sot pinis na em i gat bikpela belhat tru. (KTH 12:​9, 12) Pasin birua i wok long kamap yet namel long dispela tupela “lain,” olsem na ol man i stap gut long wok bilong Jehova ol i ken save, lain bilong Satan bai mekim nogut long ol. (2 Timoti 3:12) Yu save long as na Satan i mekim nogut long yumi?

9, 10. Satan i bin kamapim wanem bikpela tok? Olsem wanem pasin ol man i mekim i insait long dispela tok?

⁹ Bipo Satan i kamapim bikpela tok long husat i mas i stap nambawan bos bilong heven na graun. Na tu, em i tok i no gat wanpela man bai i stap gut long Man Bilong Wokim ol. Satan i bin mekim nogut long stretpela man Jop. Bilong wanem? Long wanem, em i laik bai Jop i lusim Jehova. Long dispela taim meri bilong Jop wantaim 3-pela pren giaman bilong em i helpim wok bilong Satan. Olsem Buk Jop i soim yumi, Satan i salensim God na i tok, i no gat wanpela man bai stap gut long God sapos God i larim em i traim dispela man. Tasol Jop i stap gut long God na i kamapim long ples klia olsem Satan em i man bilong giaman. (Jop 1:8–2:9; 16:2; 27:5; 31:6) Satan i save birua long ol Witnes Bilong Jehova long nau bambai ol i lusim Jehova na dispela bai kamapim klia olsem tok em i bin sutim i tru.

¹⁰ Yumi save, Satan i save kirapim ol man long birua long yumi, long wanem, em i laik tru long yumi lusim pasin bilong i stap gut long God, na dispela save inap helpim yumi long i stap strong na no ken pret. (Lo 31:6) God bilong yumi em i King Bilong Heven na Graun, na em bai helpim yumi long holimpas pasin bilong i stap gut long em. Tru tumas, oltaim yumi mas wok long i stap gut long Jehova na mekim bel bilong em i amamas, na long dispela rot bai em inap bekim tok long man bilong sutim tok bilas long em, em Satan.​—Sindaun 27:11.

“Kisim Bek Mipela Long Dispela Man Nogut”

11. Wanem mining bilong dispela beten, “Yu no ken larim ol traim i kamap long mipela”?

¹¹ Em i hatwok long holimpas pasin bilong i stap gut long God, olsem na oltaim yumi mas beten strong. Ol tok bilong bikpela beten bilong Jisas inap helpim gut yumi. Hap tok bilong dispela beten i olsem: “Yu no ken larim ol traim i kamap long mipela, tasol yu ken kisim bek mipela long ol samting nogut [“dispela man nogut,” NW].” (Matyu 6:13) Jehova i no save pulim yumi long mekim sin. (Jems 1:13) Tru, sampela taim Baibel i tok em i save mekim sampela samting o kirapim ol man long mekim, tasol dispela i makim olsem em i larim ol dispela samting i kamap. (Rut 1:​20, 21) So taim yumi beten olsem Jisas i bin makim, yumi askim Jehova long em i no ken larim yumi pundaun long traim. Na em bai harim beten bilong yumi, long wanem, Baibel i tok pinis: “God i save bihainim tok bilong en, na em bai i no inap larim wanpela bilong ol traim i kamap long yupela, em i winim strong bilong yupela. Nogat. Sapos traim i kamap long yupela, orait God bai i wokim rot bilong helpim yupela. . . . Em bai i mekim yupela i sanap strong, na dispela traim bai i no inap daunim yupela.”​—1 Korin 10:13.

12. Bilong wanem yumi mas beten olsem, “Kisim bek mipela long dispela man nogut”?

¹² Long dispela beten, taim Jisas i tok pinis long traim, i stret em i tok: “Kisim bek mipela long dispela man nogut.” (NW) Buk Baibel i tanim olsem: “Kisim bek mipela long ol samting nogut.” Long Baibel, dispela tok “kisim bek mipela long,” i toktok long ol manmeri, na Gutnius Matyu i raitim i toktok long Satan em i “man bilong traim.” (Matyu 4:​3, 11) Olsem na em i bikpela samting long beten askim God long kisim bek yumi long “dispela man nogut,” Satan. Em i laik kirapim yumi long mekim sin long God. (1 Tesalonaika 3:5) Taim yumi beten olsem, “Kisim bek mipela long dispela man nogut,” yumi askim Papa bilong yumi long heven long soim rot long yumi na helpim yumi bambai Satan i no ken winim yumi.

No Ken Larim Satan i Winim Yu

13, 14. Bilong wanem ol Korin i mas senisim pasin ol i bin mekim long wanpela man insait long kongrigesen husat i bin mekim pasin pamuk?

¹³ Taim Pol i tokim ol Kristen long Korin long lusim rong bilong ol narapela, em i tok: “Sapos yupela i lusim rong bilong wanpela man, orait mi tu mi save lusim. Na sapos i gat wanpela rong mi mas lusim, orait mi save lusim long ai bilong Krais, bilong helpim yupela. Mi mekim olsem, long wanem, mi pret, nogut Satan i giamanim yumi na i winim yumi. Yumi save pinis long tingting na pasin bilong em.” (2 Korin 2:​10, 11) Satan inap winim yumi long kain kain rot, tasol bilong wanem Pol i mekim dispela tok?

¹⁴ Pol i tok strong long ol Korin, long wanem, ol i larim wanpela pamukman i stap insait long kongrigesen. Ating Satan i amamas tru, long wanem, dispela i bagarapim nem bilong kongrigesen, em ol i bin larim “wanpela kain pasin pamuk i kamap namel long [ol], em kain pasin nogut tru ol haiden yet i no save mekim.” Bihain ol i rausim dispela sinman long kongrigesen. (1 Korin 5:​1-5, 11-13) Bihain moa, dispela man i tanim bel. Sapos ol Kristen i no laik lusim rong bilong em na kisim em bek, Satan bai i winim ol long narapela rot. Em wanem rot? Ol bai mekim hatpela pasin na i no marimari long dispela man, ol bai mekim wankain pasin olsem Satan i save mekim. Sapos man husat i tanim bel pinis i kisim ‘bikpela hevi moa i daunim em tru’ na nau em i lusim pasin bilong lotuim God, ol elda bai i gat hap asua bilong dispela samting long ai bilong Jehova, em God bilong marimari. (2 Korin 2:7; Jems 2:13; 3:1) I no gat wanpela Kristen i laik bihainim pasin bilong Satan na mekim hatpela pasin long man na i no marimari liklik long em.

Klos Pait Bilong God i Lukautim Yumi

15. Yumi mekim wanem kain pait? Yumi mas mekim wanem bilong winim pait?

¹⁵ Yumi mas mekim pait bilong spirit long ol spirit nogut bambai God i ken kisim bek yumi long Satan. Yumi mas pasim “olgeta klos pait God i save givim long yumi” bambai yumi ken winim dispela pait. (Efesus 6:​11-18) Wanpela hap bilong dispela klos pait, em “stretpela pasin olsem siot kapa i karamapim bros.” (Efesus 6:14) King Sol bilong Israel bilong bipo i bin sakim tok bilong God na em i no inap kisim moa holi spirit. (1 Samuel 15:​22, 23) Tasol sapos yumi mekim stretpela pasin na pasim ol klos pait bilong spirit, bai yumi gat holi spirit bilong God na em bai lukautim yumi na Satan wantaim ol spirit nogut bilong em i no ken winim yumi.​—Sindaun 18:10.

16. Wanem samting bai lukautim yumi na ol spirit nogut i no ken winim yumi?

¹⁶ Sapos yumi ritim na stadi long Baibel long olgeta taim, na mekim wok long ol buk na nius yumi kisim long rot bilong ‘bosboi i save mekim gut wok bilong en,’ dispela na ol narapela samting bai lukautim yumi na ol spirit nogut i no ken winim yumi. (Luk 12:42) Long dispela rot yumi pulimapim ol gutpela klinpela samting bilong spirit long tingting bilong yumi, olsem Pol i tokim yumi: “Ol brata, . . . oltaim yupela i mas tingting tasol long ol pasin i tru na ol pasin i gutpela long ol man i mekim na ol stretpela pasin na ol klinpela pasin na ol naispela samting na ol samting i gutpela tru na olgeta pasin i nambawan tru na olgeta pasin yumi save amamas tru long lukim ol man i mekim.”​—Filipai 4:8.

17. Wanem samting bai helpim yumi long mekim gut wok bilong autim gutnius?

¹⁷ Jehova i save helpim yumi na bai yumi “redi long autim gutnius bilong God i laik wanbel wantaim ol manmeri, na putim dispela pasin olsem su bilong [yumi].” (Efesus 6:15) Sapos oltaim yumi insait long ol tok i kamap long ol miting Kristen, dispela bai inapim yumi long autim gutnius bilong Kingdom Bilong God. Yumi save kisim bikpela amamas tru long helpim ol narapela long kisim save long tok i tru bilong God na kamap fri long ol samting bilong spirit! (Jon 8:32) “Bainat bilong Holi Spirit, em tok bilong God,” i nambawan samting bilong sakim ol bilip giaman na “daunim olgeta kain tingting na giaman tok i save pasim rot bilong ol man.” (Efesus 6:17; 2 Korin 10:​4, 5) Sapos yumi gat save long mekim gutpela wok long Tok Bilong God, em Baibel, dispela bai helpim yumi long skulim ol man long tok i tru na i lukautim yumi na bai yumi no pundaun long ol trik bilong Satan.

18. Olsem wanem yumi ken “sanap strong na sakim olgeta kain pasin bilong trik na giaman Satan i save hait na mekim”?

¹⁸ Bilong kirapim tok long ol klos pait bilong spirit bilong yumi, Pol i tok: “Yupela i mas tingting long olgeta bikpela strong bilong en, na yupela i mas sanap strong. Yupela i mas pasim olgeta klos pait God i save givim long yumi, na bai yupela inap long sanap strong na sakim olgeta kain pasin bilong trik na giaman Satan i save hait na mekim.” (Efesus 6:​10, 11) Tok Grik bilong dispela tok “sanap strong” i toktok long soldia i sanap strong long ples bilong pait. Yumi sanap strong long ples bilong mekim pait bilong spirit, tasol Satan i save mekim olkain pasin trik na giaman bilong bagarapim pasin wanbel bilong yumi, o paulim ol tok bilong yumi, o mekim na yumi no stap gut moa long God. Tasol i kam inap long nau, Satan i no win long dispela pait​—na bihain tu em i no inap win, nogat tru!a

Sakim Satan na Em Bai Ranawe

19. Wanem wanpela rot bilong sakim Satan?

¹⁹ Yumi inap winim pait bilong spirit yumi mekim long Satan na ol spirit nogut i stap aninit long em. I no gat as na yumi pret na guria long Satan, long wanem, disaipel Jems i tok: “Yupela i mas sakim Satan, na em bai i lusim yupela na ranawe.” (Jems 4:7) Wanpela rot bilong sakim strong Satan wantaim ol spirit nogut i save wok wantaim em, em yumi mas stap longwe long ol samting bilong glasman na marila samting na ol man i save mekim ol dispela pasin. Baibel i tokaut klia olsem ol wokman bilong Jehova i no ken lukluk long ol mak o long ol sta bilong kisim save long samting bai kamap bihain, o insait long wok bilong ol spirit nogut. Sapos oltaim yumi save mekim ol wok bilong spirit na bilip bilong yumi i strong, yumi no ken pret na ting wanpela man bai wokim marila o posin samting long yumi.​—Namba 23:23; Lo 18:​10-12; Aisaia 47:​12-15; Aposel 19:​18-20.

20. Olsem wanem yumi inap sakim Satan?

²⁰ Yumi save “sakim Satan” taim yumi bihainim gut ol lo na tok i tru bilong Baibel na sanap strong long mekim pait long em. Ol lain bilong dispela graun i wanbel wantaim Satan, long wanem, em i god bilong dispela graun. (2 Korin 4:4) Olsem na yumi save givim baksait long ol pasin bilong graun, olsem pasin antap, tingim yumi yet tasol, pasin pamuk, pasin bilong pait na bagarapim man, na laikim tumas planti mani kago. Yumi save, taim Satan i traim Jisas long ples nating, Jisas i kamapim ol tok bilong Baibel bilong sakim pait bilong em, na Satan i lusim em na ranawe. (Matyu 4:​4, 7, 10, 11) Na olsem tasol, Satan bai ‘lusim yumi na ranawe’ sapos yumi stap aninit tru long Jehova na yumi beten na wetim em i helpim yumi. (Efesus 6:18) God Jehova na Pikinini bilong em bai helpim yumi, olsem na i no gat wanpela man inap bagarapim tru yumi​—na Satan tu i no inap!​—Song 91:​9-11.

[Futnot]

Wanem Bekim Bilong Yu?

• Yu ting yumi mas pret long Satan?

• Bilong wanem Satan i kirapim ol man long birua long ol Kristen?

• Bilong wanem yumi beten askim God long kisim bek yumi long “dispela man nogut”?

• Olsem wanem yumi ken winim pait bilong spirit yumi mekim long Satan?

[Piksa long pes 26]

Ol disaipel bilong Krais long bipo i no bin pret na ol i stap gut long God inap long taim ol i dai

[Piksa long pes 27]

Ol manmeri i dai pinis em Jehova i tingim ol, Satan i no inap pasim ol long kirap bek

[Piksa long pes 28]

Yu save beten askim God long kisim bek yu long “dispela man nogut”?

[Piksa long pes 29]

Yu save pasim “olgeta klos pait God i save givim long yumi”?