‘Ol Man i Tok Mi Husat Tru?’

NAU em taim bilong Krismas gen. Ol man long olgeta hap i mekim wanpela pati bilong betde. Em betde bilong husat? Yu ting em betde bilong Pikinini bilong God o bilong wanpela man i givim bel long lotu Juda na em i gat tingting long stretim dispela lotu long hap bilong Israel long taim bilong em? Em betde bilong wanpela man bilong helpim ol rabisman, o wanpela paitman i laik daunim Gavman Rom, olsem na ol i kilim em i dai, o em i wanpela saveman i wok strong long kamapim save bilong em yet na em i tok gutpela tingting i stap long bel bilong em? I gat as na yu inap tingting: ‘Jisas Krais em i husat tru?’

Jisas yet i laik save long bekim bilong ol man long dispela askim. Wanpela taim em i bin askim ol disaipel bilong em: “Ol manmeri i save tok, mi husat tru?” (Mak 8:27) Bilong wanem em i mekim dispela askim? Planti manmeri i lusim em pinis. Sampela i paul na ol i bel hevi, long wanem, em no larim ol i mekim em i kamap king. Na tu, taim ol birua i askim em long kamapim wanpela mak bilong heven bilong kamapim ples klia em i husat, em i no mekim dispela samting. Olsem na taim ol aposel i bekim dispela askim bilong Jisas, ol i tok wanem? Ol i kamapim sampela tingting bilong ol manmeri, olsem: “Sampela i save tok, yu Jon Bilong Baptais. Na sampela i tok, yu Elaija. Na sampela i save tok, yu Jeremaia o wanpela profet.” (Matyu 16:​13, 14) Ol disaipel i no kamapim ol planti tok nogut ol man bilong Palestain i bin mekim long Jisas​—⁠olsem em i wanpela man bilong tok bilas, man bilong giaman, profet giaman, o longlong man.

Ol i Gat Kain Kain Tingting Long Jisas

Sapos Jisas i mekim wankain askim long nau, ating em bai senisim dispela askim liklik, olsem: “Ol saveman i save tok, mi husat tru?” Ating long nau tu, ol man i gat kain kain bekim long dispela askim. David Tracy bilong Yunivesiti Bilong Chicago i tok, ol man i gat kain kain tingting long Jisas na long ol tok em i bin mekim na ol wok bilong em. Insait long 100 yia i go pinis, ol saveman i bin mekim wok long kain kain rot bilong painim bekim bilong dispela askim olsem, Jisas em i husat tru. Em nau, ol i gat wanem kain tingting long Jisas?

Sampela saveman i ting dispela Jisas bilong bipo em wanpela profet Juda i tok profet olsem pinis bai kamap na em i singautim ol man long tanim bel. Tasol ol i no laik kolim em Pikinini bilong God, o Mesaia, o Man bilong kisim bek ol man. Planti saveman i no bilip long stori bilong Baibel olsem pastaim Jisas i bin stap long heven na taim em i dai em i kirap bek. Sampela i ting Jisas em i wanpela man i bin mekim ol gutpela tok na gutpela pasin na long dispela rot em i kirapim planti lotu na bihain ol dispela lotu i kamap lotu Kristen. Na olsem nius Theology Today i tok, sampela man i tingim Jisas olsem ‘wanpela man i wok long painim rong long ol narapela, o wanpela saveman i raun, o wanpela man nating i gat narapela kain bilip, o wanpela man bilong stretim wok bilong ol man bilong ples, o wanpela man i no laik bihainim pasin na sindaun bilong ol narapela man, o wanpela man i kamapim tingting bilong em long ol rabisman i stap long ol liklik ples bilong Palestain.’

Na sampela i gat tingting i narakain moa yet. Long musik rap, na long ol piksa ol i wokim long ol kain kain ples, na long sampela danis, ol i makim olsem Jisas em i blakskin.a Sampela i ting Jisas em i wanpela meri. Long Julai 1993, ol man i kam raun long wanpela kain so ol i kolim Orens Kaunti Fea long California ol i lukim wanpela piksa bilong “Kristi,” em wanpela meri i stap skin nating na i makim Krais i stap long diwai kros. Long dispela taim yet long New York, ol i soim piksa bilong “Krista,”​—⁠em wanpela meri i stap long diwai kros na i makim Jisas. Ol man i toktok planti long dispela tupela piksa. Na long kirap bilong yia 1999, ol man inap baim wanpela buk i stori long “pasin sori i stap namel long Manki Jisas na dog bilong em, Angel.” Sampela i tok, long dispela stori pasin pren bilong tupela “i kirapim tru bel bilong ol man na i soim olsem dispela manki na wanpela dok i redi long lusim laip bilong ol bambai narapela i ken helpim narapela.”

Yu Ting Em i Bikpela Samting?

Bilong wanem yu mas kisim save long Jisas em i husat tru long bipo na long nau? Napoleon i bin tok olsem: “Ol man i stap aninit long Jisas Krais, ol i no lukim em, tasol ol i bihainim tok bilong em.” Jisas i skulim ol man long ol tok i gat strong, na em yet i bihainim ol dispela tok, na long dispela rot em i bin senisim i stap bilong planti bilion man inap olsem 2,000 yia pinis. Wanpela man bilong raitim buk i tok, ‘Olgeta ami, na olgeta nevi, na olgeta gavman, na olgeta king, olgeta wantaim i no bin senisim i stap bilong ol man long dispela graun olsem Jisas i bin mekim.’

Na tu, yu mas save long Jisas em i husat tru long bipo na long nau, long wanem, em bai mekim sampela samting long i stap bilong yu long bihain. Yu gat rot long i stap aninit long wanpela gavman i stap pinis long heven​—⁠em Kingdom bilong God em Jisas i bosim. Nau graun bilong yumi i stap nogut tru, tasol bihain Jisas bai stretim bek wara na win na ol kain kain animal na diwai samting. Ol tok profet bilong Baibel i tokaut klia olsem Kingdom bilong Jisas bai givim kaikai long ol man i hangre, lukautim ol rabisman, oraitim ol sikman, na kirapim bek ol man i dai pinis.

Ating yu laik save long wanem kain man i bosim dispela kain gavman em yumi mas kisim. Stori i kamap bihain long dispela bai helpim yumi long kisim save long Jisas em i husat tru.

[Futnot]