Maniman i Gat Namba i No Makim Gutpela Rot
DISPELA yangpela maniman i gat namba, em i save bihainim stretpela pasin na ol lo, na em i man bilong lotu. Em i kam long Jisas na brukim skru na i askim em: “Gutpela Tisa, bai mi mekim wanem na mi ken kisim laip i stap gut oltaim oltaim?”—Mak 10:17.
Jisas i tokim em olsem sapos em i laik kisim laip, em i mas bihainim ol lo bilong God. Taim yangpela man i askim Jisas long wanem ol lo, Jisas i tok: “Yupela i no ken kilim i dai ol arapela manmeri. Yupela ol marit, yupela i no ken mekim pasin pamuk. Yupela i no ken stil. Yupela i no ken giaman na kotim nating ol arapela manmeri. Yupela i mas aninit long papamama bilong yupela na bihainim tok bilong ol. Na yu mas laikim tru ol wantok olsem yu laikim yu yet.” Ol dispela lo i stap long Lo God i bin givim long Moses. Orait nau man i tok: “Mi save bihainim tasol dispela olgeta lo. Tasol mi sot yet long wanem samting?”—Matyu 19:16-20.
Jisas i “laikim em tumas” na i tok: “Yu sot yet long wanpela samting. Yu go salim ol samting bilong yu, na dispela mani yu kisim yu mas givim long ol rabisman. Yu mekim olsem, na bai yu gat ol gutpela samting tru long heven. Na yu kam bihainim mi.”—Mak 10:18-21.
Orait nau yangpela man i mas wokim bikpela disisen. Em bai mekim wanem? Em bai lusim ol mani kago bilong em na bihainim Jisas, o em bai holim yet ol samting bilong em? Em bai wok yet long bungim ol gutpela samting long graun, o em bai wok long bungim ol gutpela samting long heven? Ating em i hatwok long makim. Yumi ken save em i laik tru long pas gut wantaim God, long wanem, em i save bihainim ol lo, na em i laik save wanem samting moa em i mas mekim na bai God i ken orait long em. Wanem disisen bilong em? “Bel bilong en i hevi, na em i go. Long wanem, em i gat planti samting tru.”—Mak 10:22.
Dispela yangpela man i no bihainim gutpela tingting. Sapos em i bin bihainim Jisas, em inap kisim samting em i laik tru long kisim—em laip i stap gut oltaim oltaim. Baibel i no tokim yumi long wanem samting i painim dispela yangpela man. Tasol yumi save, klostu 40 yia bihain, ol ami bilong Rom i bin kam na bagarapim Jerusalem na planti hap bilong Judia. Mani kago bilong planti Juda i lus, na laip bilong ol tu i lus.
Tasol aposel Pita na ol narapela disaipel ol i bihainim gutpela tingting. Ol i “lusim olgeta samting” na bihainim Jisas. Dispela disisen i helpim gut ol! Jisas i tokim ol olsem ol bai kisim planti samting moa, winim tru ol samting i lus pinis. Na tu, ol bai kisim laip i stap gut oltaim oltaim. Dispela disisen i no wanpela disisen em bihain ol bai bel hevi long en, nogat.—Matyu 19:27-29.
I gat sampela samting long i stap bilong yumi em yumi olgeta i mas wokim disisen long en—sampela ol i liklik samting na sampela ol i bikpela samting. Jisas i mekim wanem tok long pasin bilong wokim disisen? Bai yu bihainim dispela tok bilong em? Sapos yu mekim olsem, yu bai kisim bikpela amamas tru. Orait nau yumi ken stori long olsem wanem yumi ken bihainim Jisas na larim ol tok bilong em i helpim yumi.