“Was i Stap”—Taim Bilong Kot i Kamap Pinis
Ol i kisim ol tok bilong dispela stadi long buklet Was i Stap! em ol i bin tokaut long en long ol kibung distrik long olgeta hap bilong graun long 2004/05.
“Yupela i mas was i stap, long wanem, yupela i no save wanem taim dispela ol samting bai i kamap.”—MAK 13:33.
1, 2. Jisas i tok em bai kam olsem wanem samting?
YU BAI mekim wanem sapos yu save i gat wanpela stilman i raun long hap yu sindaun long en na stilim ol samting long ol haus? Bilong lukautim famili na ol gutpela samting bilong yu, yu bai was i stap. Yumi save stilman i no save salim wanpela pas bilong toksave long taim em bai kam. Nogat, em i save kam isi na long taim yu no ting em bai kam.
2 Sampela taim Jisas i mekim tok piksa long pasin bilong stilman long mekim wok bilong em. (Luk 10:30; Jon 10:10) Taim Jisas i stori long ol samting bai kamap long taim bilong las de na paslain long em i kam bilong mekim kot, Jisas i mekim dispela tok lukaut: “Yupela i mas was gut. Yupela i no save wanem de Bikpela bilong yupela bai i kam. Yupela tingim dispela samting. Sapos papa bilong haus i save pastaim long wanem taim long nait stilman bai i kam, orait em bai i was i stap na em bai i no inap larim stilman i brukim haus na i kam insait.” (Matyu 24:42, 43) Olsem na Jisas i tok em bai kam olsem stilman—long taim ol man i no ting em bai kam.
3, 4. (a) Bilong bihainim tok lukaut bilong Jisas long taim em bai kam, yumi mas mekim wanem? (b) Wanem ol askim i kamap?
3 Dispela tok piksa i stret, long wanem, ol man i no save long wanem de stret Jisas bai kam. Long dispela wankain tok profet, Jisas i bin tok: “I no gat wanpela man i save wanem de na wanem aua dispela ol samting bai i kamap. Ol ensel long heven i no save, na Pikinini tu em i no save. Papa wanpela tasol em i save.” (Matyu 24:36) Olsem na Jisas i tok: ‘Yupela i mas redi.’ (Matyu 24:44) Ol man i bihainim tok lukaut bilong Jisas ol bai redi, ol bai i no mekim nabaut, maski Jisas i kam long wanem taim olsem Man bilong givim strafe bilong Jehova.
4 Orait sampela bikpela askim i kamap: Tok lukaut bilong Jisas i bilong ol man bilong graun tasol, o ol trupela Kristen tu i gat wok long “was i stap”? Bilong wanem em i bikpela samting long “was i stap,” na olsem wanem yumi ken mekim olsem?
Tok Lukaut i Go Long Husat?
5. Olsem wanem yumi save dispela tok “was i stap” i go long ol Kristen tru?
5 Taim Bikpela i kam, ol manmeri bilong dispela graun bai i ting em i kam olsem stilman, ol dispela man i no save putim yau long tok lukaut long bikpela bagarap bai kamap. (2 Pita 3:3-7) Tasol olsem wanem long ol Kristen tru? Aposel Pol i raitim pas long ol wanbilip: “Yupela yet i save pinis, De bilong Bikpela bai i kamap wantu tasol olsem stilman i kam long nait.” (1 Tesalonaika 5:2) Yumi bilip tru olsem “De bilong Bikpela bai i kamap.” Tasol yu ting dispela i mekim na yumi no gat wok long was i stap? Tingim, Jisas i mekim dispela tok long ol disaipel bilong em: “Pikinini Bilong Man bai i kam long wanpela taim yupela i no ting em bai i kam.” (Matyu 24:44) Paslain long dispela, Jisas i bin tokim ol disaipel long painim Kingdom pastaim, na em i mekim dispela tok lukaut: “Yupela tu i mas redi. Pikinini Bilong Man bai i kam long wanpela taim yupela i no ting em bai i kam.” (Luk 12:31, 40) Em i klia tru olsem Jisas i tingim ol disaipel bilong em taim em i mekim dispela tok lukaut: “Was i stap.”
6. Bilong wanem yumi mas “was i stap”?
6 Bilong wanem yumi mas “was i stap” na “redi”? Jisas i tok: “Tupela man bai i stap long gaden, na God bai i kisim wanpela, na em bai i lusim narapela i stap. Tupela meri bai i wokim plaua bilong bret i stap, na God bai i kisim wanpela na lusim narapela i stap.” (Matyu 24:40, 41) Ol man i redi, God bai “kisim” ol, o kisim bek ol, taim em i bagarapim pasin nogut bilong dispela graun. Em bai “lusim” ol arapela na ol bai bagarap, long wanem, ol i bin inapim laik bilong ol yet tasol. Ating sampela manmeri olsem em ol lain husat i bin save long tok i tru, tasol ol i no was i stap.
7. Yumi no save long de stret pasin nogut bilong dispela graun bai pinis na dispela i opim rot long yumi ken mekim wanem?
7 Yumi no save long de stret pasin nogut bilong dispela graun bai pinis. Dispela i opim rot long yumi ken soim olsem yumi laikim tru God na long dispela as yumi mekim wok bilong em. Bilong wanem yumi tok olsem? Yumi inap pilim olsem pinis i no kam hariap. Sori tru, sampela Kristen husat i pilim olsem, ol i no strong moa long mekim wok bilong Jehova. Tasol taim yumi dediket, yumi amamas long givim yumi yet bilong mekim wok bilong Jehova. Ol man i save long Jehova ol i save olsem sapos ol i kirap givim bel long wok bilong Jehova paslain liklik long pinis i kamap, Jehova i no inap tingim dispela. Em i save lukim tingting na laik bilong man.—1 Samuel 16:7.
8. Olsem wanem pasin bilong laikim tru Jehova i kirapim yumi long was i stap?
8 Yumi laikim tru Jehova, olsem na yumi kisim bikpela amamas taim yumi mekim laik bilong em. (Song 40:8; Matyu 26:39) Na yumi laik mekim wok bilong Jehova i go inap oltaim oltaim. Dispela samting yumi wetim i gutpela samting tru, maski yumi mas wet long en inap longpela taim, winim taim yumi bin ting yumi mas wet long en. Na bikpela samting moa, yumi was i stap, long wanem, yumi wet long ol samting de bilong Jehova bai mekim bilong kamapim ol samting em i tingting pinis long mekim. Yumi gat bikpela laik long amamasim God na dispela i kirapim yumi long bihainim tok bilong em long Baibel na putim Kingdom bilong em i stap namba wan samting long laip bilong yumi. (Matyu 6:33; 1 Jon 5:3) Orait nau yumi ken skelim olsem wanem pasin bilong was i stap i mas stiaim ol disisen yumi mekim na ol samting yumi save mekim long olgeta de.
Yu Wok Long Bihainim Wanem Rot?
9. Bilong wanem em bikpela samting long ol man bilong graun i mas luksave long taim yumi stap long en?
9 Planti man long nau i luksave olsem ol bikpela hevi na ol samting nogut tru i save kamap long olgeta de, na ating ol i no amamas long rot ol i wok long bihainim. Tasol yu ting ol i save ol dispela samting i wok long kamap long graun i makim wanem samting? Ol i save yumi stap long taim pasin bilong dispela “graun i laik pinis?” (Matyu 24:3) Na olsem wanem? Ol i save olsem pasin bilong ol man long tingim ol yet tasol, pait na bagarapim man, na mekim ol narapela pasin God i no laikim, i makim olsem taim bilong yumi em “taim bilong las de”? (2 Timoti 3:1-5) Em i bikpela samting long ol i mas luksave long ol dispela samting i makim wanem samting, na tingim rot ol i wok long bihainim.
10. Yumi mas mekim wanem bilong was i stap?
10 Tasol olsem wanem long yumi? Long olgeta de yumi mas wokim disisen long ol samting bilong wok mani, helt, famili bilong yumi, na long ol samting bilong lotu. Yumi save pinis long tok Baibel i mekim, na yumi traim long bihainim. Olsem na i gutpela sapos yumi askim yumi yet olsem: ‘Mi larim ol samting mi wari long en i mekim na mi no tingim moa ol wok Kristen mi laik mekim? Mi larim save na tingting bilong ol man bilong graun i stiaim ol samting mi laik mekim?’ (Luk 21:34-36; Kolosi 2:8) Yumi mas wok long kamapim klia olsem yumi bilip long Jehova long bel olgeta na yumi no ting save bilong yumi yet inap helpim yumi. (Sindaun 3:5) Long dispela rot, bai yumi holimpas “dispela laip em i laip tru”—em laip oltaim long nupela taim God bai kamapim.—1 Timoti 6:12, 19.
11-13. Yumi ken lainim wanem samting long ol samting i bin kamap (a) long taim bilong Noa? (b) long taim bilong Lot?
11 Baibel i gat planti stori em ol inap helpim yumi long was i stap. Tingim ol samting i bin kamap long taim bilong Noa. Paslain tru long Jehova i mekim ol samting, em i stretim rot na bai ol man i kisim tok lukaut. Noa na famili bilong em tasol i harim dispela tok, ol narapela man, nogat. (2 Pita 2:5) Jisas i stori long dispela: “Kain pasin ol i bin mekim long taim bilong Noa, ol bai i mekim wankain pasin tasol long taim Pikinini Bilong Man i kamap. Taim bikpela tait i no kamap yet, ol i wok long kaikai na dring, na ol man i maritim ol meri, i go inap long taim Noa i go insait long sip. Ol i no save long dispela samting bai i kamap long ol, na ol i stap olsem tasol i go inap long taim bikpela tait i kamap na i pinisim olgeta dispela manmeri. Orait wankain pasin tasol bai i kamap long taim Pikinini Bilong Man i kamap.” (Matyu 24:37-39) Dispela inap lainim yumi long wanem samting? Sapos yumi larim ol samting long sindaun bilong yumi ol man—ol samting yumi save mekim long olgeta de—i kisim ples bilong ol wok Kristen em God i tok yumi mas tingim pastaim, orait yumi mas tingting gut long i stap bilong yumi.—Rom 14:17.
12 Tingim tu taim bilong Lot. Taun Sodom we Lot na famili bilong em i stap long en, i gat planti gutpela samting bilong skin, tasol taun i pulap long pasin nogut. Jehova i salim ol ensel bilong em bilong bagarapim dispela ples. Ol ensel i kirapim Lot na famili bilong em long ranawe lusim Sodom na ol i no ken lukluk i go bek. Ol ensel i strongim ol, na ol i lusim taun. Tasol i luk olsem meri bilong Lot i no inap lusim tingting long haus bilong em long Sodom. Em i sakim tok, lukluk i go bek, na lusim laip bilong em. (Stat 19:15-26) Jisas i mekim tok lukaut long taim bihain na i tok: “Yupela i mas tingim samting i bin kamap long meri bilong Lot.” Olsem wanem? Yumi save bihainim dispela tok lukaut?—Luk 17:32.
13 Ol man husat i bihainim ol tok lukaut bilong God i abrusim bagarap, olsem Noa wantaim famili bilong em na Lot wantaim ol pikinini meri bilong em. (2 Pita 2:9) Taim yumi tingim tingim long bel ol dispela samting, tok i stap long ol dispela tok lukaut i strongim bel bilong yumi, olsem ol man i laikim stretpela pasin God bai kisim bek ol. Dispela i mekim na yumi bilip na wet long truim bilong tok promis bilong God long “em bai i wokim nupela skai na nupela graun” i gat “stretpela pasin tasol bai i stap long en.”—2 Pita 3:13.
‘Taim Bilong Kot i Kamap Pinis’!
14, 15. (a) Wanem ol samting i insait long “taim” bilong kot? (b) Wanem ol samting i insait long pasin bilong ‘pret long God na litimapim nem bilong em’?
14 Taim yumi was i stap, yumi ken ting wanem ol samting bai kamap? Buk Kamapim Tok Hait i stori long olsem wanem ol samting God i tingting pinis long mekim bai wok long kamap. Em i bikpela samting long yumi mekim wok long dispela save bambai yumi ken redi i stap. Tok profet i kamapim klia ol samting bai kamap long “de bilong Bikpela,” em dispela de i kirap taim Krais i kamap King long heven long 1914. (KTH 1:10) Buk Kamapim Tok Hait i kirapim yumi long tingim wanpela ensel i gat wok long autim “gutnius bilong i stap oltaim oltaim.” Long strongpela nek em i tokaut: “Taim i kamap pinis bilong God i skelim pasin bilong olgeta man long kot. Olsem na yupela i mas pret long em na litimapim nem bilong em.” (KTH 14:6, 7) Dispela “taim” bilong kot em i sotpela taim; insait long en i gat wok bilong tokaut long kot na givim strafe olsem kot i makim, em dispela tok profet i stori long en. Yumi stap nau long dispela haptaim.
15 Long nau, paslain long taim bilong kot i pinis, Baibel i tokim yumi: “Yupela i mas pret long [God] na litimapim nem bilong em.” Olsem wanem yumi ken mekim dispela? Pasin bilong pret long God i mas kirapim yumi long givim baksait long pasin nogut. (Sindaun 8:13) Sapos yumi litimapim nem bilong God, bai yumi daun long em na putim gut yau long tok bilong em. Bai yumi no bisi long mekim narapela samting na nau yumi no gat taim long ritim Baibel long olgeta de. Bai yumi no ting tok bilong God olsem yumi mas go long ol miting Kristen i liklik samting. (Hibru 10:24, 25) Bai yumi amamas long gutpela wok bilong autim gutnius bilong Kingdom Bilong Mesaia na bai yumi givim bel long mekim. Bai yumi bilip long Jehova long olgeta taim na long bel olgeta. (Song 62:8) Yumi save olsem Jehova em i King Bilong Heven na Graun, olsem na taim yumi daun long em olsem King bilong yumi, yumi litimapim nem bilong em. Olsem wanem? Tru tru yu save pret long God na litimapim nem bilong em long olgeta dispela rot?
16. Olsem wanem yumi ken tok, kot bilong Bikpela Babilon em Kamapim Tok Hait 14:8 i tok long en, i kamap pinis?
16 Buk Kamapim Tok Hait sapta 14 i stori long ol arapela samting bai kamap long taim bilong kot. Pastaim em i stori long Bikpela Babilon, em olgeta lotu giaman: “Narapela ensel i bihainim namba wan ensel na i kam. Dispela namba 2 ensel i tok olsem, ‘Bikpela taun Babilon em i bagarap pinis! Yes, em i bagarap pinis!’ ” (KTH 14:8) Em nau, long tingting bilong God, Bikpela Babilon i bagarap pinis. Long 1919 ol wokman bilong Jehova em i bin makim, ol i no kalabus moa long ol bilip na pasin bilong Bikpela Babilon, em ol dispela samting i bin bosim ol lain man inap planti tausen yia. (KTH 17:1, 15) Olsem na ol wokman bilong God ol inap givim ol yet bilong helpim lotu i tru. Kirap long dispela taim, wok bilong autim gutnius bilong Kingdom Bilong God i bin kamap long olgeta hap.—Matyu 24:14.
17. Yumi mas mekim wanem bilong lusim Bikpela Babilon?
17 Tasol strafe God i givim long Bikpela Babilon i no pinis yet. Klostu nau em bai bagarap olgeta. (KTH 18:21) Olsem na i gat as na Baibel i tokim ol man long olgeta hap: “Yupela i mas lusim [Bikpela Babilon] . . . na i kam ausait. Nogut yupela i poroman wantaim em long ol sin em i save mekim.” (KTH 18:4, 5) Olsem wanem yumi lusim Bikpela Babilon? Yumi no bung moa wantaim lotu giaman, tasol i no dispela samting tasol, i gat sampela samting moa yumi no insait long en. Ol samting bilong Bikpela Babilon i insait long planti bikpela de na kastam ol man i save tingim, na pasin bilong ol man long orait long pasin pamuk, na ol amamas ol i painim i gat ol samting bilong ol spirit nogut i insait long en, na planti samting moa. Bilong was i stap, em i bikpela samting long ol pasin na ol laik bilong bel bilong yumi i mas kamapim klia olsem yumi stap longwe tru long Bikpela Babilon.
18. Ol Kristen i was i stap ol i tingim tok bilong Kamapim Tok Hait 14:9, 10, olsem na ol i was gut long wanem samting?
18 Buk Kamapim Tok Hait 14:9, 10, i stori long narapela samting bilong “taim bilong kot.” Narapela ensel i tok: “Sapos wanpela man i lotu long dispela wel animal na long piksa bilong en, na em i kisim mak long pes na long han bilong en, orait bai em i mas dringim wanpela kain wain. Dispela wain em belhat bilong God.” Bilong wanem i olsem? ‘Wel animal na piksa bilong en’ i makim wok bos bilong ol man em ol i no ting Jehova em i nambawan bos. Ol Kristen i was gut na i no larim wanpela samting i stiaim tingting na pasin bilong ol, em ol tingting na pasin inap makim olsem ol i mekim wok bilong ol lain i sakim namba bilong trupela God, Jehova, long stap nambawan bos. Ol Kristen i save olsem Kingdom Bilong God i kamap pinis long heven, em bai pinisim olgeta gavman bilong ol man, na em bai stap inap oltaim oltaim.—Daniel 2:44.
No Ken Lusim Tingting Olsem Taim i Sot Pinis
19, 20. (a) Yumi stap long taim bilong las de, olsem na yumi ken save Satan bai traim long mekim wanem? (b) Yumi mas tingting long mekim wanem?
19 Yumi stap long taim bilong las de, olsem na ol hevi na traim bai go bikpela. Yumi stap yet long dispela graun i gat pasin nogut long en na sin i stap yet long yumi, olsem na yumi save sik, go lapun, wanpela yumi laikim tru em i dai, narapela i bagarapim bel bilong yumi, yumi bel hevi long ol man i no laik harim tok bilong Baibel yumi autim, na planti samting moa. No ken lusim tingting olsem Satan i laik mekim wok long ol dispela hevi i save painim yumi bambai yumi givap—yumi lusim wok bilong autim gutnius o yumi no bihainim moa ol lo bilong God. (Efesus 6:11-13) Nau em i no taim bilong lusim tingting olsem taim i sot pinis!
20 Jisas i save olsem planti samting bai daunim yumi na yumi laik givap, olsem na em i tok: “Yupela i mas was i stap, long wanem, yupela i no save wanem taim dispela ol samting bai i kamap.” (Mak 13:33) Olsem na oltaim yumi mas was i stap na tingim taim yumi stap long en. Yumi mas was gut long ol trik bilong Satan em ol inap mekim na yumi no givim bel moa long tok i tru o yumi lusim olgeta. Yumi mas tingting long givim bel na wok strong moa long autim gutnius bilong Kingdom Bilong God. Tru tumas, yumi mas tingim olsem taim i sot pinis na tingim tok lukaut bilong Jisas: “Was i stap.” Taim yumi mekim olsem, yumi litimapim nem bilong Jehova na yumi insait long dispela lain i wet long kisim ol blesing bilong em inap oltaim oltaim.
Bai Yu Bekim Olsem Wanem?
• Olsem wanem yumi save tok bilong Jisas long “was i stap” i go long ol Kristen tru?
• Wanem ol stori bilong Baibel inap helpim yumi long “was i stap”?
• Taim bilong kot em wanem samting? Yumi mas mekim wanem paslain long dispela taim i pinis?
[Piksa long pes 23]
Jisas i tok em bai kam olsem stilman
[Piksa long pes 24]
Klostu nau Bikpela Babilon bai bagarap
[Ol Piksa long pes 25]
Yumi mas tingting strong long givim bel long autim tok