No Ken Larim Tingting Bilong Ol Man i Stiaim Yu

LONG olgeta hap ol man i gat narapela narapela tingting long wanem pasin i stret o i no stret, na wanem pasin i gutpela o i nogut. Na dispela tingting bilong ol i save senis senis. Olsem na taim yumi ritim stori bilong Baibel long ol samting i bin kamap long bipo tru, yumi mas save long tingting bilong ol man long dispela taim bipo na wanem pasin i stret long ai bilong ol, na yumi no ken skelim ol tok yumi ritim wantaim tingting bilong yumi yet long wanem samting i stret o i no stret.

Olsem: Tingim tupela samting Ol Skripsa Grik i toktok long en planti taim​—biknem na sem. Bilong kisimgut ol ves i toktok long biknem na sem, yumi mas tingim ol dispela lain bilong bipo ol i gat wanem tingting long en.

Long Taim Bilong Ol Aposel

Wanpela saveman i tok: “Ol Grik, ol Rom, na ol Juda i tingim biknem na sem i bikpela samting tru. Ol man i redi long i dai bilong kisim biknem, gutpela nem namel long ol man, ol man i orait long ol, na rispek.” Dispela i mekim na ol i bihainim kwik tingting bilong ol man.

Biknem na namba i nambawan bikpela samting long ol lain i tingim tru namba bilong man, olsem em i wanpela bikman o wokboi nating. Biknem em i bikpela samting tru long ai bilong man yet na ol narapela tu. Taim man i givim biknem long narapela man, em i tokaut olsem dispela man i bin mekim pasin ol narapela i ting i stret em i mas mekim. Na tu, ol i mas soim olsem ol i kirap nogut long bikpela mani kago bilong man, o bikpela namba bilong em, na soim rispek long em. Man inap kisim biknem long gutpela pasin em i mekim bilong helpim ol man, o long winim ol narapela long sampela wok samting. Tasol man i kisim sem taim ol man i semim em o tok bilas long em long ai bilong ol narapela. I no olsem man yet i pilim samting em i bin mekim o bel bilong em i kotim em, nogat, em i gat sem long ol man i bin tokaut olsem em i gat asua.

Taim Jisas i toktok long man i kisim “ namba wan sia” o sia i stap “long baksait tru” long wanpela bikpela kaikai, tingting bilong ol man bilong dispela taim bai makim olsem em i kisim biknem o em i kisim sem long dispela. (Lu. 14:​8-10) Inap tupela taim samting, ol disaipel bilong Jisas i tok pait long “husat em i namba wan bilong ol.” (Lu. 9:46; 22:24) Ol i kamapim klia wanpela bikpela tingting bilong ol man i bin stap long taim bilong ol. Na ol hetman bilong lotu Juda em ol i gat pasin antap na i resis long i stap nambawan, ol i lukim olsem wok bilong Jisas long autim tok i laik daunim biknem na bikpela namba bilong ol. Ol i strong long paitim tok wantaim em long ai bilong planti man bambai ol i ken daunim em, tasol ol i lus tru.​—Lu.13:​11-17.

Na i gat narapela tingting i stap namel long ol Juda, ol Grik, na ol Rom long taim bilong ol aposel, olsem: Pasin bilong holimpas man na sutim tok long em long kot long ai bilong planti man olsem em i bin mekim rong, dispela i gat bikpela sem long en. Na sapos ol i pasim han lek bilong man long rop o kalabusim em, ol man i ting em samting bilong sem pipia. Dispela pasin ol i mekim i nogutim em tru long ai bilong ol pren na famili na ol wanples​—maski kot i pasim tok pinis olsem em i gat asua o nogat. Orait, kirap long dispela taim em i gat nem nogut long ai bilong ol man, dispela inap mekim na em i no rispek moa long em yet na em i no i stap gut wantaim ol man. Na sapos ol i rausim klos bilong man o wipim em, dispela i givim bikpela sem tru long em, winim pasin bilong pasim em long rop. Dispela i kirapim ol man long nolaik tru long em na tok bilas long em, na em i no gat biknem moa.

Taim ol i nilim man long diwai na kilim em i dai, dispela i givim bikpela sem moa yet long em. Saveman Martin Henge i tok: “Dispela kain pasin bilong kilim man i dai, em i strafe bilong ol wokboi nating. Em i makim olsem ol i daunim em tru na em i kisim bikpela sem na pen nogut.” Taim man i bin kisim dispela kain sem, ol wanples i strong long famili na ol pren bilong em i mas givim baksait olgeta long em. Krais i bin dai long dispela pasin, olsem na olgeta manmeri i laik i stap Kristen long taim bilong ol aposel, ol i kisim hevi long ol man i tok bilas long ol na semim ol. Ating planti man ol i bin ting, em i pasim kranki stret long man i tokaut olsem em i disaipel bilong wanpela man ol i bin nilim em long diwai na em i dai. Aposel Pol i tok: “Mipela i save autim tok bilong Krais i dai pinis long diwai . . . na dispela tok i olsem tok nogut long tingting bilong ol Juda. Na ol Grik i ting dispela em i kranki toktok tasol.” (1 Ko. 1:23) Ol Kristen bilong bipo ol i bin mekim wanem bilong winim dispela hevi?

Ol i Kisim Narapela Kain Lo

Ol Kristen bilong pastaim ol i bihainim lo na ol i wok strong long abrusim sem i kamap long man i mekim pasin i no stret. Aposel Pita i tok: “Yupela i mas lukaut, nogut ol i givim pen long yupela, long wanem, yupela i bin kilim man i dai o stilim ol samting o mekim ol arapela kain pasin nogut o yupela i bin paulim wok bilong ol arapela.” (1 Pi. 4:15) Tasol Jisas i tok profet long ol man bai mekim nogut long ol disaipel bilong em, long wanem, ol i holim nem bilong em. (Jo. 15:20 ) Pita i tok: “Sapos man em i Kristen, na long dispela as em i karim pen, orait em i no ken sem. Nogat. Em i mas amamas long dispela nem Kristen, na litimapim nem bilong God.” (1 Pi. 4:16) Taim man i kisim nogut long i stap disaipel bilong Krais na em i no sem long dispela, i olsem em i sakim ol pasin na tingting ol man bilong dispela taim i strong long bihainim.

Ol pasin na tingting ol man i bin putim olsem lo bilong ol, ol Kristen i no inap larim dispela i makim wanem kain pasin ol yet bai bihainim, nogat. Wanpela Mesaia ol i bin nilim em pinis long diwai em i kranki stret long tingting bilong ol manmeri i bin stap long taim bilong ol aposel. Dispela inap subim ol Kristen long bihainim tingting ol man i holim na ol i ting i stret. Tasol ol Kristen i bilip olsem Jisas em Mesaia, olsem na ol i mas bihainim em, maski ol man i tok bilas long ol. Jisas i tok olsem: “Sapos wanpela man . . . i sem long mi na long tok bilong mi, orait bihain, taim Pikinini Bilong Man i stap long bikpela lait bilong Papa bilong en na em i kam wantaim ol ensel bilong God, em bai i sem long dispela man tu.”​—Mk. 8:38.

Long nau yumi inap kisim hevi long ol man i strong long subim yumi na bai yumi lusim lotu Kristen. Yumi inap kisim dispela hevi long ol wanskul, ol neiba, o ol wanwok em ol i laik pulim yumi long mekim ol pasin i no stret, olsem pamuk, pasin giaman, na ol kain pasin olsem. Ating ol bai strong long mekim yumi i sem long yumi bihainim ol stretpela lo na pasin. Orait yumi mas mekim wanem?

Bihainim Ol Man i No Wari Long Kisim Sem

Bilong i stap gut long Jehova, Jisas i bin dai long pasin i gat bikpela sem tru long en. “Em i karim pen na i dai long diwai . . . tasol [em] i no wari long sem em bai i kisim.” (Hi. 12:2) Ol birua i solapim pes bilong em, spetim em, rausim klos bilong em, wipim em, nilim em long diwai, na toknogutim em. (Mk. 14:65; 15:​29-32) Tasol Jisas i no wari long sem ol i laik givim long em. Maski ol i givim bikpela pen tru long em, em i no surik. Em i save, long ai bilong Jehova em i no bin kisim sem, na em i no bin strong long kisim biknem long ol man. Tru, Jisas i bin i dai olsem wanpela wokboi nating, tasol Jehova i kirapim em bek long matmat na i givim biknem tru long en na sindaunim em klostu long Em. Filipai 2:​8-11 i tok: “[Krais Jisas] i daunim em yet na i bihainim tok bilong God, i go inap long em i dai . . . . Long dispela as tasol God i litimapim Jisas na mekim em i stap antap tru. Na God i givim em wanpela nem i gutpela tru na i winim olgeta arapela nem . . . bai olgeta ensel na olgeta man na ol arapela samting i stap long heven na long graun na aninit long graun ol i ken brukim skru long ai bilong Jisas na i stap aninit long em. Na olgeta bilong ol i ken tokaut olsem, ‘Jisas Krais em i Bikpela.’ Na long dispela pasin ol bai i givim biknem long God Papa.”

Tasol i no olsem Jisas i no pilim dispela sem i kamap long pasin bilong ol long kilim em i dai, nogat. Pikinini Bilong God i tingting planti long sem Papa bilong em inap kisim taim ol i sutim tok long em olsem em i bin tok bilas long God. Jisas i askim Jehova long em i ken abrusim dispela samting. Em i beten olsem: “Mi laik bai yu rausim dispela kap long mi.” Tasol Jisas i daun na bihainim laik bilong God. (Mk. 14:36) Jisas i sanap strong na sakim ol hevi ol i putim long em na em i no wari long kisim sem. Long wanem, ol man bilong pilim dispela kain sem, em ol man i bin kisim tru tingting bilong planti man i stap long taim bilong em. I klia tru olsem Jisas yet i no bihainim tingting bilong ol.

Ol birua i bin holimpas ol disaipel bilong Jisas tu na wipim ol. Dispela pasin i semim ol long ai bilong planti man. Ol man i ting ol i pipia nating na ol i bel nogut long ol. Tasol dispela i no mekim ol i bel hevi na surik. Ol disaipel tru i sakim tingting bilong ol man na ol i no wari long sem ol i kisim. (Mt. 10:17; Ap. 5:40; 2 Ko. 11:​23-25) Ol i save ol i mas karim pos diwai bilong ol na bihainim Jisas long olgeta taim.​—Lu. 9:​23, 26.

Orait olsem wanem long yumi long nau? Ol samting ol man bilong graun i ting em i kranki, o i no gat strong, o i pipia nating, God i lukim olsem ol i samting i gat savepasin, na strong, na biknem. (1 Ko. 1:​25-28) Olsem na sapos yumi larim tingting bilong ol man bilong graun i stiaim yumi, em i pasin kranki tru, a?

Ol man i laik kisim biknem ol i mas tingting gut olsem ol man bilong graun i ting olsem wanem long ol. Tasol olsem Jisas na ol disaipel bilong em long bipo, yumi laik bai Jehova i stap Pren bilong yumi. Olsem na yumi bai givim biknem long samting i gat biknem long ai bilong em, na ol samting em i ting i gat sem, yumi tu i mas ting i gat sem.

[Piksa long pes 4]

Jisas i no kisim tingting bilong ol man bilong graun long sem