Jehova i Save Givim Yumi Ol Samting Yumi Mas Kisim
“Yupela i no ken wari na tingting planti . . . Papa bilong yupela em i save pinis, yupela i mas kisim ol dispela samting.”—LUK 12:29, 30.
1. Olsem wanem Jehova i save lukautim ol animal samting na ol i stap laip?
SAMPELA taim yu bin lukim liklik pisin i wok long painim kaikai long hap i olsem graun nating tasol? Ating yu tingting olsem em i no inap painim kaikai long dispela hap. Long bikpela tok Jisas i bin mekim antap long maunten, em i soim olsem pasin bilong Jehova long lukautim ol pisin em inap skulim yumi. Em i tok: “Yupela lukim ol pisin. Ol i no save planim kaikai, na ol i no save bungim na putim long haus kaikai. Tasol Papa bilong yupela i stap long heven em i save givim kaikai long ol. Ating yupela i no winim tru ol pisin, a?” (Matyu 6:26) Long ol gutpela rot tru, Jehova i save givim kaikai long olgeta samting.—Song 104:14, 21; 147:9.
2, 3. Taim Jisas i skulim yumi long prea long kisim kaikai inap long dispela de, dispela inap skulim yumi long wanem ol samting bilong spirit?
2 Olsem na i gat wanem as na Jisas i kolim dispela tok insait long beten bilong em: “Yu ken givim mipela kaikai inap long dispela de”? (Matyu 6:11) Dispela tok inap skulim yumi long sampela bikpela samting bilong spirit. Namba wan, em i kirapim yumi long tingim Jehova em i Bikpela Man Bilong Lukautim olgeta samting. (Song 145:15, 16) Ol man inap planim kaikai na lukautim, tasol God wanpela tasol inap mekim kaikai i kamap, em kaikai bilong spirit na kaikai bilong skin. (1 Korin 3:7) Ol kaikai na wara yumi kisim, em presen i kam long God. (Aposel 14:17) Taim yumi askim em long givim yumi ol samting yumi mas kisim long ol wan wan de, dispela i soim em olsem yumi pilim tru ol samting em i givim long yumi. Tasol taim yumi askim em long ol dispela samting, i no olsem yumi no gat wok long mekim ol wok bilong skin sapos yumi inap mekim olsem.—Efesus 4:28; 2 Tesalonaika 3:10.
3 Namba tu, em taim yumi askim God long ‘givim yumi kaikai inap long dispela de,’ dispela i makim olsem yumi no ken tingting planti long ol samting bilong bihain. Jisas i tok moa: “Yupela i no ken tingting planti na tok, ‘Bai yumi kaikai wanem samting? Bai yumi dring wanem samting?’ Nogat. Ol haiden i save wari long painim olgeta dispela samting. Tasol Papa bilong yupela i stap long heven em i save pinis, yupela i mas kisim olgeta kain samting olsem. Yupela i mas wok pastaim long painim kingdom bilong God wantaim stretpela pasin bilong em. Na bihain bai em i givim dispela olgeta arapela samting tu long yupela. Olsem na yupela i no ken tingting tumas long tumora. De tumora em i ken tingting long samting bilong em yet. Hevi bilong wanpela de em inap long dispela de tasol.” (Matyu 6:31-34, Nupela Testamen na Ol Sam) Dispela beten long kisim “kaikai inap long dispela de” bai helpim yumi long “bihainim pasin bilong God” long laip bilong yumi, na “amamas long ol samting God i save givim yumi.”—1 Timoti 6:6-8.
Kaikai Bilong Spirit Long Ol Wan Wan De
4. Wanem samting i bin painim Jisas na ol Israel na i soim olsem yumi mas kisim ol kaikai bilong spirit?
4 Taim yumi beten long kisim kaikai bilong ol wan wan de, dispela i mas kirapim tingting bilong yumi olsem yumi mas kisim kaikai bilong spirit tu long ol wan wan de. Taim Jisas i no bin kaikai inap planti de, em i hangre nogut tru, tasol em i sakim traim bilong Satan long tanim ol ston i kamap bret. Em i tokim Satan: “Buk bilong God i gat tok olsem, ‘Ol manmeri i no inap kisim laip long kaikai tasol. Nogat. Ol i mas bihainim olgeta tok bilong God tu na bai ol i kisim laip.’ ” (Matyu 4:4) Long dispela ves Jisas i kamapim tok bilong profet Moses, em i bin tokim ol Israel: “[Jehova] i bin mekim yupela i hangre, na bihain em i givim yupela mana bilong kaikai. . . . Em i mekim olsem bai yupela i ken save, yumi man i no inap kisim laip long kaikai tasol. Nogat. Yumi mas bihainim olgeta tok bilong God tu na bai yumi kisim laip.” (Lo 8:3) Pasin Jehova i bin mekim bilong kamapim mana, dispela i mekim na ol Israel i kisim kaikai bilong skin, na tu, em i skulim ol long sampela samting bilong spirit. Wanpela samting i olsem: “Long olgeta de wan wan ol manmeri i mas i go kisim kaikai bilong dispela de.” Sapos ol i kisim planti, winim skel bilong wanpela de, hap kaikai i stap yet bai smel nogut na ol liklik snek bai pulap long en. (Kisim Bek 16:4, 20) Tasol dispela samting i no kamap long namba 6 de, taim ol i mas bungim kaikai bilong dispela de na bilong de Sabat wantaim. (Kisim Bek 16:5, 23, 24) Olsem na mana i kirapim tingting bilong ol olsem ol i mas bihainim tok, na bilong i stap laip ol i no inap kisim kaikai tasol, ol i mas kisim “olgeta tok bilong God tu.”
5. Olsem wanem Jehova i save givim kaikai bilong spirit long yumi long olgeta de?
5 Yumi tu i mas kisim kaikai bilong spirit long olgeta de, em Jehova i save givim long yumi long rot bilong Pikinini bilong em. Olsem na Jisas i bin makim wanpela “wokboi i gat gutpela tingting” bilong “skelim kaikai long ol [wanbilip] long taim bikman i makim.” (Matyu 24:45) Dispela lain wokboi i save givim planti kaikai bilong spirit long yumi, em ol buk samting bilong helpim yumi long stadi long Baibel, na tu, ol i wok long kirapim yumi long ritim Baibel long olgeta de. (Josua 1:8; Song 1:1-3) Olsem Jisas, yumi tu inap kisim kaikai bilong spirit sapos long olgeta de yumi wok strong long lainim na bihainim laik bilong Jehova.—Jon 4:34.
Lusim Ol Rong Bilong Yumi
6. Yumi mas askim God long lusim wanem ol dinau bilong yumi? Yumi mas mekim wanem na bai Jehova i orait long pinisim ol dispela dinau?
6 Narapela samting yumi askim long en long dispela beten i olsem: “Yu ken lusim ol rong bilong mipela, olsem mipela i save lusim ol rong ol arapela i mekim long mipela.” (Matyu 6:12) Taim yumi mekim wanpela rong, i olsem yumi gat dinau long Jehova. Tasol gutpela God bilong yumi em i redi long “rausim,” o pinisim, dispela dinau sapos yumi “tanim bel” tru na askim em long lusim rong bilong yumi, long wanem, yumi bilip long ofa bilong Krais bilong baim bek ol man.—Aposel 3:19; 10:43; 1 Timoti 2:5, 6.
7. Bilong wanem yumi mas beten askim God long lusim ol sin bilong yumi long olgeta de?
7 Na tu, yumi mekim sin taim yumi no winim mak Jehova i putim long ol lo bilong stretpela pasin. Yumi bin kisim sin long Adam, olsem na yumi olgeta i save mekim sin long tok na pasin na tingting bilong yumi, o yumi no mekim ol samting yumi mas mekim. (Saveman 7:20; Rom 3:23; Jems 3:2; 4:17) Olsem na maski yumi save yumi bin mekim sin o nogat, taim yumi beten yumi mas askim God long lusim ol sin bilong yumi.—Song 19:12; 40:12.
8. Taim yumi beten askim God long lusim ol sin bilong yumi, dispela i mas kirapim yumi long mekim wanem? Wanem gutpela samting bai kamap?
8 Taim yumi beten askim God long lusim ol sin bilong yumi, orait nau yumi mas skelim gut bel bilong yumi, na tanim bel, na autim sin bilong yumi, as na yumi mekim olsem em yumi bilip long strong bilong blut bilong Krais long baim bek ol man. (1 Jon 1:7-9) Bilong kamapim klia olsem yumi no giaman taim yumi beten olsem, taim yumi askim God long lusim sin bilong yumi, ‘pasin bilong yumi i mas soim olsem yumi tanim bel pinis.’ (Aposel 26:20) Orait nau yumi ken bilip olsem Jehova i redi long lusim ol sin bilong yumi. (Song 86:5; 103:8-14) Em nau, bel na tingting bilong yumi bai i stap isi tru, em dispela “bel isi God i save givim yumi, em i gutpela samting tru,” na “long dispela pasin [yumi] bai i pas gut wantaim Krais Jisas, na bel na tingting bilong [yumi] bai i stap gut tru.” (Filipai 4:7) Tasol dispela beten bilong Jisas i skulim yumi long sampela samting moa yumi mas mekim na bai God i ken lusim ol sin bilong yumi.
Lusim Rong Bilong Narapela
9, 10. (a) Jisas i skruim wanem tok i go long beten bilong em? Dispela i kamapim klia wanem samting? (b) Jisas i mekim wanem samting moa bilong soim olsem yumi mas lusim rong bilong ol narapela?
9 Dispela tok long “lusim ol rong bilong mipela, olsem mipela i save lusim ol rong ol arapela i mekim long mipela,” em dispela hap tasol bilong beten Jisas i bin mekim sampela tok long en. Taim em i pinisim beten, em i tok moa: “Sapos yupela i lusim rong bilong ol arapela manmeri, orait Papa bilong yupela long heven em bai i lusim rong bilong yupela tu. Tasol sapos yupela i no lusim rong bilong ol arapela manmeri, orait Papa bilong yupela em tu bai i no lusim ol rong bilong yupela.” (Matyu 6:14, 15) Olsem na Jisas i kamapim klia tru olsem: Bilong Jehova i ken lusim rong bilong yumi, yumi mas lusim rong bilong ol arapela.—Mak 11:25.
10 Long narapela taim, Jisas i mekim tok piksa bilong soim olsem yumi mas lusim rong bilong ol narapela sapos yumi laik bai Jehova i lusim rong bilong yumi. Em i stori long wanpela king i bin rausim bikpela dinau tru bilong wanpela wokboi. Orait bihain king i givim bikpela strafe long em, long wanem, man hia i no laik rausim liklik dinau tasol bilong narapela wokboi. Bilong pinisim tok piksa, Jisas i tok: “Olsem tasol Papa bilong mi i stap long heven, em bai i mekim wankain pasin tasol long yupela sapos yupela i no lusim tru ol rong ol brata i mekim long yupela.” (Matyu 18:23-35) Em nau, skul yumi kisim em i klia tru. Dinau bilong sin Jehova i bin lusim bilong yumi wan wan, em i bikpela moa, winim ol rong em narapela i bin mekim long yumi. Na Jehova i save lusim ol rong bilong yumi long olgeta de. Olsem na yumi tu i ken lusim rong ol narapela i mekim long yumi long wan wan taim tasol, a?
11. Sapos yumi laik bai Jehova i lusim ol rong bilong yumi, bai yumi bihainim wanem tok bilong aposel Pol? Wanem ol gutpela samting bai kamap?
11 Aposel Pol i tok: “Yupela i mas mekim gutpela pasin long ol arapela Kristen na givim bel bilong yupela long ol. Yupela i mas lusim sin bilong ol, olsem God i lusim sin bilong yupela long nem bilong Krais.” (Efesus 4:32) Taim narapela i lusim rong bilong narapela, dispela i save kamapim pasin wanbel namel long ol Kristen. Pol i tok moa: ‘Yupela i mas sori tru na mekim gut long ol arapela, na daunim yupela yet na mekim pasin isi long ol man, na no ken belhat kwik long ol man i rongim yupela. Sapos wanpela namel long yupela em i gat tok long narapela brata i bin mekim rong long em, orait em i mas karim dispela hevi na lusim sin bilong em. Bikpela em i lusim pinis sin bilong yupela, na olsem tasol yupela tu i mas lusim sin bilong ol arapela. Yupela i mas givim bel bilong yupela long ol arapela manmeri. Dispela pasin i winim tru olgeta pasin, na em i save mekim ol arapela gutpela pasin i kamap strong na i wok bung wantaim.’ (Kolosi 3:12-14) Ol dispela samting i insait long beten Jisas i bin skulim yumi long en: “Yu ken lusim ol rong bilong mipela, olsem mipela i save lusim ol rong ol arapela i mekim long mipela.”
Lukautim Yu Long Taim Bilong Traim
12, 13. (a) Dispela hap long beten olsem God i no ken larim ol traim i kamap long yumi i no makim wanem samting? (b) Husat em i bikpela Man Bilong Traim yumi? Wanem mining bilong dispela hap beten olsem God i no ken larim ol traim i kamap long yumi?
12 Klostu long pinis bilong beten, Jisas i tok: “Yu no ken larim ol traim i kamap long mipela.” (Matyu 6:13) Yu ting Jisas i laik bai yumi askim Jehova long em i no ken traim yumi? Nogat, mining bilong dispela tok i no olsem, long wanem, holi spirit i kirapim disaipel Jems long tok: “Sapos samting i kirapim bel bilong wanpela man na i pulim em long mekim sin, em i no ken tok, ‘God i pulim mi long mekim dispela pasin.’ Nogat. Sin i no inap pulim God, na God i no save pulim man long mekim sin.” (Jems 1:13) Na tu, man bilong raitim song i tok: “Sapos yu [God] kaunim olgeta sin bilong mipela bai husat inap long winim kot bilong yu?” (Song 130:3) Jehova i no wok long painim olgeta popaia bilong yumi, na em i no save traim long pundaunim yumi, nogat tru. Olsem na wanem mining bilong dispela hap bilong beten?
13 Man i laik pulim yumi, na mekim yumi i pundaun long ol pasin trik bilong em, na kaikai yumi, em Satan yet. (Efesus 6:11) Em i bikpela Man Bilong Traim yumi. (1 Tesalonaika 3:5) Taim yumi prea long Jehova i no ken larim ol traim i kamap long yumi, yumi askim em olsem em i no ken larim yumi i pundaun taim ol traim i painim yumi. Yumi askim em long helpim yumi, ‘nogut Satan i winim yumi,’ nogut yumi pundaun long ol traim. (2 Korin 2:11) Yumi beten olsem yumi ken i stap “insait long ples hait bilong God Antap Tru” na Em i lukautim yumi long ol samting bilong spirit, olsem em i save mekim long ol man i daun long wok bos bilong em long olgeta samting ol i save mekim.—Song 91:1-3, NW.
14. Aposel Pol i tok wanem na yumi save Jehova i no inap lusim yumi sapos yumi go long em taim ol traim i kamap long yumi?
14 Yumi ken save tru olsem: Sapos dispela em i laik tru bilong yumi, na yumi kamapim long beten na long ol samting yumi mekim, Jehova i no inap lusim yumi, nogat tru. Aposel Pol i tok: “Ol traim i bin kamap long yupela, ol i . . . wankain olsem ol traim i save kamap long olgeta man. Na God i save bihainim tok bilong en, na em bai i no inap larim wanpela bilong ol traim i kamap long yupela, em i winim strong bilong yupela. Nogat. Sapos traim i kamap long yupela, orait God bai i wokim rot bilong helpim yupela . . . na dispela traim bai i no inap daunim yupela.”—1 Korin 10:13.
“Tekewe Mipela Long Man Bilong Mekim Ol Pasin Nogut”
15. Bilong wanem nau em i bikpela samting tru long yumi mas beten askim God long kisim bek yumi long dispela man nogut?
15 Long sampela olpela rait bilong Ol Skripsa Grik em ol saveman i ting i stret tru, beten bilong Jisas i pinis long dispela tok: “Tekewe mipela long Man bilong mekim ol pasin nogut.”a (Matyu 6:13, lukim sta) Nau long taim bilong pinis, Jehova i mas lukautim yumi moa yet. Satan wantaim ol spirit nogut ol i wok long mekim pait long lain remnan em God i bin makim, em ol “i save bihainim ol lo bilong God, na ol i save autim tok bilong Jisas na bihainim em,” na tu, ol i mekim pait long ol poroman bilong ol bilong dispela lain “planti manmeri tru.” (KTH. 7:9; 12:9, 17) Aposel Pita i tokim ol Kristen: “Yupela i mas stap redi na was gut. Satan, dispela birua bilong yupela, em i olsem wanpela laion i singaut strong. Oltaim em i save raun bilong painim ol manmeri bilong kaikai. Tasol yupela i mas i stap strong long bilip na sakim em.” (1 Pita 5:8, 9) Satan i laik pasim wok bilong yumi long autim tok, na long rot bilong ol wokman bilong em long graun—maski ol i bilong lotu, o ol bikpela kampani, o bilong wok politik—em i traim long pretim yumi. Tasol sapos yumi sanap strong, Jehova bai kisim bek yumi. Disaipel Jems i tok: “Yupela i mas daunim yupela yet na i stap aninit long God. Yupela i mas sakim Satan, na em bai i lusim yupela na ranawe.”—Jems 4:7.
16. Jehova i save mekim wok long wanem samting bilong helpim ol wokman bilong em taim ol traim i kamap long ol?
16 Jehova i bin larim Satan i traim Pikinini bilong em. Tasol taim Jisas i mekim wok long Tok Bilong God na em i sakim Satan, Jehova i salim ol ensel bilong strongim em. (Matyu 4:1-11) Long nau tu Jehova i save yusim ol ensel bilong em long helpim yumi sapos yumi bilip tru na beten na yumi go long em olsem ples hait bilong yumi. (Song 34:7; 91:9-11) Aposel Pita i tok: “Sapos traim i kamap long ol man i bihainim God, orait Bikpela i save long rot bilong kisim bek ol long dispela traim . . . na em i save long rot bilong bekim pe nogut long ol [man nogut], i go inap long De bilong bikpela kot bilong God.”—2 Pita 2:9.
Klostu Nau God Bai Kisim Bek Yumi
17. Long rot bilong beten Jisas i givim long yumi, olsem wanem em i makim ol samting em i bikpela samting tru?
17 Long dispela beten, Jisas i makim ol samting i bikpela samting tru. Nambawan samting yumi mas tingim, em bikpela nem bilong Jehova i mas i stap holi. Rot bilong mekim dispela samting em Kingdom Bilong Mesaia, olsem na yumi prea long Kingdom i mas i kam na bagarapim olgeta kingdom, o gavman, bilong dispela graun, na bilong mekim laik bilong God i kamap tru long graun olsem i stap long heven. Bilong yumi ken i stap oltaim oltaim long Paradais long graun, Jehova i mas mekim nem bilong em i stap holi, na olgeta lain long heven na graun i mas daun long stretpela wok king bilong em. Taim yumi prea pinis long ol dispela bikpela samting, orait nau yumi ken prea long ol kaikai samting yumi mas kisim long olgeta de, na long God i ken lusim ol rong bilong yumi, na kisim bek yumi long ol traim na ol pasin trik bilong man nogut, Satan.
18, 19. Olsem wanem beten bilong Jisas i helpim yumi long was i stap na i mekim bilip bilong yumi i stap strong i go inap long pinis?
18 Klostu nau na Jehova bai kisim bek yumi long dispela man nogut na ol pasin nogut bilong graun em i bosim. Satan i save pinis em i gat “sotpela taim tasol” bilong kamapim belhat bilong em long graun, na moa yet long ol wokman bilong Jehova i stap gut long em. (KTH 12:12, 17) Long bikpela mak bilong taim “[“pasin bilong,” NW ] dispela graun i laik pinis,” Jisas i tok profet long sampela bikpela samting bai kamap, em sampela bilong ol i no kamap yet. (Matyu 24:3, 29-31) Taim yumi lukim ol dispela samting i kamap, yumi inap tingting moa yet long God bai kisim bek yumi. Jisas i tok: “Taim ol dispela samting i stat long kamap, orait yupela i mas sanap na litimapim het bilong yupela, long wanem, taim bilong God i kisim bek yupela em i kam klostu pinis.”—Luk 21:25-28.
19 Dispela beten Jisas i givim long ol disaipel i soim yumi ol samting yumi ken kamapim insait long beten bilong yumi nau long dispela taim em pinis i wok long kam klostu. Yumi mas bilip strong olsem Jehova bai wok yet long givim yumi ol samting yumi mas kisim, em ol samting bilong spirit na bilong skin. Sapos oltaim yumi prea na was i stap, dispela bai mekim bilip bilong yumi i stap strong tru i go inap long pinis.—Hibru 3:14; 1 Pita 4:7.
[Futnot]
a Long sampela olpela Baibel, olsem King James Version, laspela hap bilong dispela beten (em wanpela tok bilong litimapim nem bilong God) i olsem: “Kingdom na strong na biknem em i bilong yu tasol oltaim oltaim. I tru.” Buk, The Jerome Biblical Commentary, i tok: “Dispela tok . . . i no stap long ol olpela rait bilong Baibel em ol saveman i ting ol tok bilong en i stret.”
Sampela Askim
• Taim yumi beten long kisim “kaikai inap long dispela de,” dispela i makim wanem samting?
• Kamapim klia dispela beten, “yu ken lusim ol rong bilong mipela, olsem mipela i save lusim ol rong ol arapela i mekim long mipela.”
• Taim yumi askim Jehova long em i no ken larim ol traim i kamap long yumi, i olsem yumi tok wanem?
• Bilong wanem yumi mas prea olsem “tekewe mipela long Man bilong mekim ol pasin nogut”?
[Ol Piksa long pes 15]
Yumi mas lusim rong bilong ol narapela na God bai lusim rong bilong yumi
[Piksa Kredit Lain long pes 13]
Lydekker