Wok Bilong Maria Insait Long Laik Bilong God

LONG taim Jisas i bin mekim wok autim tok bilong em, wanpela meri i singaut bikmaus namel long ol bikpela lain manmeri olsem: “Dispela meri i bin karim yu na i givim susu long yu, em i ken amamas.” Sapos Jisas i laik bai ol manmeri i mas lotu long mama bilong em, orait nau rot i op bilong em i ken tokim ol long mekim olsem. Tasol nogat, em i tok: “Mobeta yumi tok olsem, ol man i harim tok bilong God na i bihainim, em ol i ken amamas.”​—⁠Luk 11:​27, 28.

Jisas i no tok ol man i mas givim spesel ona long mama bilong em, na i no gat wanpela taim em i bin tokim ol disaipel bilong em long mekim olsem. Orait olsem wanem long pasin bilong planti bilipman long adorim Maria? Nau yumi ken tingim sampela tok em planti man i bin lain long en na skelim wantaim ol tok Baibel i mekim long mama bilong Jisas.

‘God i Blesim Yu, Winim Blesing Em i Givim Long Ol Arapela Meri’

Ensel Gebriel i tokim Maria long wok Maria bai mekim insait long samting God i tingting pinis long mekim. Long dispela taim, em i tokim Maria olsem: “Gude, meri. Bikpela i stap wantaim yu, na em i bin blesim yu na mekim gut long yu.” (Luk 1:28) I no longtaim bihain, na taim Elisabet i lukim Maria, em i tok: “God i bin mekim gut tru long yu na givim yu blesing i winim blesing em i givim long ol arapela meri. Na dispela pikinini i stap long bel bilong yu, em tu i kisim blesing bilong God.” (Luk 1:42) Olsem wanem? Ol dispela tok i makim olsem yumi mas adorim Maria?

Nogat. Maski ol dispela tok i stap insait long wanpela beten bilong Maria em ol Katolik i save mekim, Baibel i no tok ol man i ken beten long Maria, nogat. Ensel Gebriel na Elisabet i luksave long spesel wok Maria bai mekim, olsem em bai karim Mesaia. Tasol Baibel i no tok ol man i ken beten long Maria, nogat. Taim ol disaipel bilong Jisas i askim em long skulim ol long pasin bilong beten, em i tok olsem ol i mas beten long Papa bilong em. Beten em Jisas i skulim ol man long en, i kirap wantaim dispela tok: “Papa bilong mipela, yu stap long heven.”​—⁠Matyu 6:⁠9.

Wanpela Bilong Lain i Mekim Wok King

Narapela bilip em planti man i lainim, em olsem: Maria em i “Kwin bilong heven.” Maski Baibel i no givim dispela biknem long Maria, Baibel i kamapim klia olsem Maria i holim wanpela bikpela wok insait long ol wok God i mekim long heven. Wanem dispela wok?

Tok Jisas i mekim i makim olsem sampela gutpela disaipel bilong em bai mekim wok king wantaim em long Kingdom bilong em. (Luk 22:​28-30) Jisas bai givim namba na strong long ol long mekim wok olsem “lain pris bilong God bilong [yumi]. Na bai ol i stap king na bosim ol manmeri bilong graun.” (KTH 5:10) Baibel i tok klia olsem Maria i insait long dispela lain husat i kisim dispela bikpela wok. Olsem wanem na yumi tok olsem?

Tingim: Bihain long taim Jisas i dai, Maria i bin i stap wantaim ol disaipel na ol brata bilong Jisas, na ol i wok long “beten.” Samting olsem 120 man wantaim “ol meri” i bin bung bilong mekim olsem. (Aposel 1:​12-15) Baibel i tok: “Bikpela De Bilong Pentikos i kam pinis, na ol manmeri i bilip long Jisas ol i bung wantaim long wanpela haus” na God i kapsaitim holi spirit bilong em long ol, na ol inap mekim tok long narapela narapela tok ples.​—⁠Aposel 2:​1-4.

Maria i bin stap namel long dispela lain em God i bin givim blesing long ol na dispela i soim olsem Maria wantaim sampela arapela meri i bin kisim holi spirit na God i makim ol long wok wantaim Jisas insait long Kingdom bilong heven. Olsem na yumi inap bilip tru olsem nau Maria i stap wantaim Jisas long heven. (Rom 8:​14-17) Nau yumi ken skelim sampela gutpela wok em Maria na ol arapela wanwok bilong Jisas bai mekim insait long ol samting em God i tingting pinis long mekim.

Kamapim Ol Gutpela Blesing

Buk Kamapim Tok Hait long Baibel i tok olsem God bai kirapim bek 144,000 manmeri long indai na ol bai stap long heven na mekim wok wantaim Jisas olsem pris, jas na king. (KTH 14:​1, 4; 20:​4, 6) Taim ol i mekim wok pris, ol bai mekim wok long ofa bilong Jisas bilong helpim ol gutpela manmeri long pas gut moa wantaim God, na helpim ol long bihainim ol gutpela klinpela pasin, na kamap gutpela olgeta, no gat sin. (KTH 21:​1-4) Em wanpela gutpela samting tru bai painim olgeta man husat i stap gut long lotuim Jehova!a

Maria i bin mekim wok insait long samting Jehova i bin tingting pinis long mekim, na long nau tu em i mekim olsem. I stret yumi ken bihainim pasin bilong Maria, long wanem, em i stap gutpela piksa olsem meri i gat pasin daun, strongpela bilip, pasin bilong bihainim tok, na em i bin stap olsem wanpela gutpela mama. Na tu, em i stap gutpela piksa long pasin bilong sanap strong na i no les kwik long taim bilong hevi. Na i stret yumi givim bikpela rispek long em, long wanem, em i karim Mesaia na em bai insait long wok bilong helpim ol man inap oltaim oltaim.

Tasol nambawan bikpela samting yumi lainim long pasin bilong Maria i olsem: Em​—⁠wantaim olgeta arapela gutpela wokboi bilong God​—⁠i save lotuim Jehova na em i no lotuim narapela god. Maria, wantaim ol arapela i mekim wok king wantaim Krais long heven, i singaut strong olsem: “Dispela Man [God] i save sindaun long sia king bilong en, na Pikinini Sipsip [Jisas Krais] tu, tupela i ken kisim olgeta tenkyu na biknem na amamas na strong, inap oltaim oltaim.”​—⁠KTH 5:13; 19:⁠10.

[Futnot]

[Rait long pes 10]

Pasin daun, strongpela bilip, na pasin bilong Maria long bihainim tok, i stap gutpela piksa long yumi bihainim