Yu Save Skelim Gut Ol Samting?

JISAS KRAIS i tokim ol disaipel long ol inap kisim gutpela samting long bihain em laip i stap oltaim, tasol em i tokim ol tu long skelim ol samting ol i mas mekim bilong i stap olsem wanpela Kristen. Em i mekim wanpela tok piksa na i tok: “Sapos wanpela bilong yupela i laik wokim wanpela haus bilong ol man i ken i stap na was long ol samting bilong en, orait ating em bai i sindaun pastaim na tingim gut [o skelim gut] pe bilong wokim dispela haus. Em i laik save, mani bilong en bai inap long pinisim dispela haus, o nogat.” (Luk 14:28) Jisas i tok long skelim gut wanem samting?

Ol traim i save painim olgeta Kristen​—sampela traim i bikpela tru. (Song 34:19; Matyu 10:36) Olsem na yumi mas redi i stap long tingting na long ol samting bilong spirit na bai yumi no kirap nogut taim ol man i birua o ol narapela hevi i painim yumi. Ating yumi tingim pinis ol kain hevi olsem bai painim yumi sapos yumi wanpela disaipel bilong Krais, na yumi save long gutpela pe bilong en​​—God bai kisim bek yumi long sin na indai, na dispela i winim olgeta narapela samting dispela graun inap givim yumi. Tru tumas, sapos yumi wok yet long mekim wok bilong God, ol samting em i larim i painim yumi​—indai tu​—i no inap bagarapim yumi inap oltaim.​—2 Korin 4:​16-​18; Filipai 3:8.

Olsem wanem bilip bilong yumi inap kamap strong tru? Bilip bilong yumi bai kamap strong moa taim yumi skelim stret ol samting yumi laik mekim, stap gut long ol lo Kristen, o mekim pasin i stret wantaim laik bilong God​​—na moa yet taim ol hevi samting i mekim na yumi hatwok long bihainim laik bilong God. Taim yumi yet i lukim ol blesing Jehova i givim yumi long pasin bilong yumi long stap gut long em, dispela i strongim tru bilip bilong yumi. Long dispela rot, yumi bihainim pasin bilong Jisas, ol disaipel bilong em long pastaim, na olgeta bilipman na meri bilong bipo em ol i bin ‘skelim gut’ ol samting bilong mekim wok bilong God.​​—Mak 1:​16-​20; Hibru 11:​4, 7, 17, 24, 25, 32-​38.