Ol Man i Askim
Kingdom Bilong God i Stap Long Bel Bilong Ol Man?
Planti man long nau i ting bekim bilong dispela askim em yes. Olsem, buk The Catholic Encyclopedia i tok: “Mining bilong dispela tok kingdom bilong God i olsem . . . em pasin bilong God long bosim tingting bilong bel bilong yumi.” Ol pris pasto i save skulim ol man olsem. Yu ting Baibel i tok Kingdom Bilong God i stap long bel bilong ol man?
Sampela i ting Jisas yet i bin kamapim dispela bilip olsem Kingdom Bilong God i stap long bel bilong ol man. Jisas i bin tok: “Harim. Kingdom bilong God em i stap pinis namel long yupela.” (Luk 17:21) Sampela Baibel i tok: “Kingdom Bilong God em i stap insait long yupela.” Yu ting ol i tanim stret dispela tok? Yu ting Jisas i tok Kingdom Bilong God i stap insait long bel bilong ol man?
Taim Baibel i stori long bel bilong man dispela i makim tingting na pasin na filings bilong man. Ating yumi laikim dispela tingting olsem samting i gutpela tru olsem Kingdom Bilong God i ken stap insait long bel bilong ol man na em inap senisim man na mekim em i kisim ol gutpela pasin. Tasol yumi laik save, i gat as na yumi ken bilip olsem?
Baibel i tok: “Bel bilong olgeta man i save tingting oltaim long mekim pasin giaman. Tingting bilong man em i nogut tru.” (Jeremaia 17:9) Jisas yet i bin tok: “Samting i stap insait long man na i kam ausait, dispela em i save mekim man i doti. Mi tok long olkain samting i save kamap long tingting bilong man, em ol samting olsem, ol tingting nogut na pasin pamuk na pasin bilong stil na pasin bilong kilim man i dai na pasin bilong pamuk wantaim ol marit na pasin bilong mangal na ol kain kain pasin nogut.” (Mak 7:20-22) Tingim: Ol tingting nogut i stap long bel bilong ol sinman i as bilong planti pen na hevi. Kingdom Bilong God em i gutpela olgeta, olsem na olsem wanem Kingdom inap stap long bel bilong ol sinman? Tru tumas, bel bilong ol man i no inap kamapim Kingdom Bilong God, wankain olsem gras nogut i no inap kamapim wanpela gutpela prut fik.—Matyu 7:16.
Namba tu, tingim husat Jisas i toktok long ol taim em i kamapim tok bilong Luk 17:21. Ves i kamap paslain i tok: “Ol Farisi i askim Jisas olsem, ‘Wanem taim bai kingdom bilong God i kam?’ ” (Luk 17:20) Ol Farisi em ol birua bilong Jisas. Jisas i bin tokaut klia olsem ol dispela man bilong tupela maus ol i no inap go insait long Kingdom Bilong God. (Matyu 23:13) Ol Farisi i no inap go insait long Kingdom Bilong God, olsem na yu ting Kingdom i stap insait long bel bilong ol? Nogat tru! Olsem na Jisas i laik tok wanem?
Planti Baibel, olsem Buk Baibel, i bin tanim gut dispela tok Jisas i mekim. Ol i tok Kingdom i “stap pinis namel long yupela.” Olsem wanem Kingdom Bilong God i stap namel long ol manmeri na ol Farisi long taim bilong Jisas? Tingim, Jisas em man God Jehova i bin makim bilong i stap King bilong Kingdom. Jisas, em Man Bilong Kamap King, i stap namel long ol dispela manmeri. Em i skulim ol man long Kingdom Bilong God na em i wokim ol mirakel i soim ol man ol samting Kingdom bai mekim long bihain. Olsem na yumi ken tok Kingdom i bin stap namel long ol.
Olsem na em i klia tru olsem Baibel i no sapotim dispela tingting olsem Kingdom Bilong God i stap long bel bilong ol man. Nogat. Em i wanpela gavman tru, na em bai kamapim ol bikpela senis hia long graun olsem ol profet i bin tok profet long en.—Aisaia 9:6, 7; Daniel 2:44.