Satan i Traim Ol Kristen Olsem Man i Sakim Wit Bilong Rausim Ol Pipia
PASLAIN liklik long Jisas i dai, em i tok lukaut long ol disaipel bilong em olsem: “Harim. Satan i tok pinis long em bai i traim bilip bilong yupela, olsem ol man i save sakim wit bilong rausim ol pipia long en.” (Lu. 22:31) Wanem insait bilong tok bilong em?
Long taim bilong Jisas, ol i save lusim bikpela hap taim na strong bilong katim wit. Pastaim, ol wokman i save bungim ol stik wit long gaden. Bihain, ol i paitim stik wit antap long wanpela ston samting o ol i mekim wok long bulmakau bilong pulim plang i go antap long ol stik wit na brukbrukim ol i go liklik liklik. Dispela i rausim sid long stik wit na long skin. Bihain long dispela, ol fama i save tromoi olgeta dispela hap bilong wit i go long win. Ol sid i save pundaun long graun, na win i kisim ol stik wit na skin wit i go. Orait bihain, ol i sekim gut ol sid na rausim ol narapela pipia samting.
Olsem Jisas i tok, Satan i bin wok strong long biruaim ol disaipel bilong Jisas long bipo, na em i birua long yumi long nau tu. (Ef. 6:11) Tru, i no olgeta hevi i painim yumi i kam long Satan. (Sav. 9:11) Tasol Satan i amamas long yusim olgeta samting em inap mekim wok long en bilong kirapim yumi long lusim pasin bilong stap gut long God. Olsem, em inap pulim yumi long bihainim pasin bilong kisim planti samting bilong skin, o insait long ol amamas nogut, o insait long pasin pamuk. Ating em inap yusim tu ol poroman long skul, long ples wok, na ol wanblut em ol i no Witnes long subim yumi long go long ol bikpela skul na kisim gutpela wok mani. Na tu, Satan inap mekim wok long ol lain bilong em long mekim nogut tru long yumi bambai yumi lusim pasin bilong stap gut long God. Na i gat planti narapela rot em Satan i yusim bilong traim yumi.
Olsem wanem yumi inap sanap strong na sakim dispela strongpela birua? Yumi no inap mekim long strong bilong yumi yet. Strong bilong Satan i winim strong bilong yumi, tasol yumi save olsem strong bilong Jehova i winim tru strong bilong Satan. Sapos yumi bilip tru long Jehova, beten oltaim long em long givim gutpela tingting na strong long yumi bilong karim hevi, na wetim em long soim rot long yumi, orait em bai strongim yumi long sakim Satan.—Sng. 25:4, 5.
Taim ol traim i painim yumi, yumi mas i gat save long “skelim wanem ol pasin i gutpela na wanem ol pasin i nogut” na yumi no ken larim ol trik bilong Satan i giamanim yumi. (Hi. 5:13, 14) Jehova inap helpim yumi long kisim save long mekim olsem. Na yumi yet i mas bihainim stretpela rot, maski wanem samting i kamap. Sapos yumi bihainim ol stiatok bilong Jehova, em bai strongim tingting bilong yumi long mekim ol samting i stret long ai bilong em.—Ef. 6:10.
Ating Satan bai traim yumi olsem man i sakim wit bilong rausim pipia. Tasol long strong bilong Jehova, yumi inap stap strong long bilip na sakim Satan. (1 Pi. 5:9) Yes, Tok Bilong Jehova i tokim yumi olsem: “Yupela i mas sakim Satan, na em bai i lusim yupela na ranawe.”—Jem. 4:7.