“Nogut Traim i Kamap Long Yupela na Yupela i Pundaun”
“Yupela i mas was na prea i stap. Nogut traim i kamap long yupela na yupela i pundaun.”—MATYU 26:41.
DISPELA hevi i bikpela tru—winim olgeta hevi i bin painim em long bipo. Klostu nau Jisas Krais, Pikinini Bilong God, bai i dai. Jisas i save i no longtaim na ol man bai holim em, makim em bilong i dai, na nilim em long diwai. Em i save olsem olgeta samting em i mekim na pasin bilong em bai litimapim o daunim nem bilong Papa. Jisas i save tu olsem ol samting em i mekim long dispela taim bai makim ol man inap kisim laip o nogat. Olgeta dispela samting i putim bikpela hevi long em, olsem na em bai mekim wanem?
2 Jisas i go long gaden Getsemani wantaim ol disaipel bilong em. Jisas i laikim tru dispela hap. Taim ol i kamap long gaden em i go longwe liklik long ol disaipel. Taim em i stap wanpis, em i beten askim Papa bilong em long heven long givim strong long em, em i kamapim olgeta tingting i stap long bel bilong em—em i mekim olsem inap tripela taim, i no wanpela taim tasol. Maski Jisas i gutpela olgeta, em i no ting em inap karim dispela hevi long strong bilong em yet.—Matyu 26:36-44.
3 Yumi tu i karim ol hevi. Long dispela buklet yumi bin skelim pinis ol samting i kamapim klia olsem yumi stap long taim bilong las de bilong pasin nogut bilong nau. Ol traim na hevi bilong graun bilong Satan i wok long kamap bikpela moa. Ol rot yumi makim bilong bihainim na ol pasin bilong yumi—yumi husat i tok yumi mekim wok bilong God tru—i mekim sampela samting long nem bilong God, na em bai makim olsem yumi inap kisim laip long nupela taim God bai kamapim o nogat. Yumi laikim tru Jehova. Yumi gat laik long “stap strong inap long las de”—maski em las de bilong laip bilong yumi o las de bilong pasin nogut bilong dispela graun. (Matyu 24:13) Tasol olsem wanem yumi ken holimpas dispela tingting olsem taim i sot pinis na was i stap?
4 Jisas i save ol hevi bai painim tu ol disaipel bilong em—long bipo na long nau—olsem na em i tok: “Yupela i mas was na prea i stap. Nogut traim i kamap long yupela na yupela i pundaun.” (Matyu 26:41) Ol dispela tok i gat wanem mining bilong en long yumi long nau? Wanem ol traim i save painim yu? Na olsem wanem yu inap ‘was i stap’?
Wanem Kain Traim?
5 Long olgeta de yumi olgeta i bungim ol traim i laik pulim yumi long ‘umben bilong Satan.’ (2 Timoti 2:26) Baibel i mekim tok lukaut olsem Satan i birua moa yet long ol man i lotuim Jehova. (1 Pita 5:8; KTH 12:12, 17) Bilong wanem em i mekim olsem? Ating em i no tingting tasol long kilim yumi i dai. Satan i no win sapos yumi stap gut long God na dai. Satan i save olsem long taim Jehova i makim, Em bai givim bek laip long ol man long rot bilong kirap bek.—Luk 20:37, 38.
6 Satan i laik bagarapim wanpela bikpela samting, winim laip bilong yumi—em pasin bilong yumi long stap gut long God. Satan i gat bikpela laik long soim olsem em inap pulim yumi long lusim Jehova. Olsem na sapos em inap mekim na yumi no stap gut long God—yumi lusim wok bilong autim gutnius o ol lo Kristen—dispela bai makim olsem Satan i win! (Efesus 6:11-13) Olsem na “man bilong traim” i kamapim ol traim bilong pulim yumi.—Matyu 4:3.
7 Satan i gat kain kain pasin bilong “trik na giaman.” (Efesus 6:11) Em inap traim yumi long rot bilong mani kago, pasin bilong pret, kisim tupela tingting, o tingting long painim amamas tasol. Wanpela rot bilong em long traim yumi na i save wok gut em pasin bilong bel hevi. Em i gat tingting nogut, na em i save olsem pasin bilong bel hevi inap mekim na yumi no strong long samting bilong spirit na yumi no inap sakim ol traim. (Sindaun 24:10) Olsem na taim bel bilong yumi i “bagarap tru,” em i traim pulim yumi long givap.—Song 38:8.
8 Taim yumi go klostu moa long pinis bilong taim nogut bilong nau, ol samting bilong mekim yumi i bel hevi bai go bikpela moa, na yumi no inap abrusim ol dispela samting. (Lukim blok “Sampela As Bilong Bel Hevi.”) Maski wanem samting i mekim na yumi bel hevi, dispela inap daunim strong bilong yumi. Sapos skin, tingting, na bel bilong yu i les pinis tru, em bai hatwok long makim haptaim bilong mekim ol wok bilong spirit—olsem stadi long Baibel, go long ol miting Kristen, mekim wok autim tok. (Efesus 5:15, 16) Tingim, Satan i laik bai yu givap. Tasol nau i no taim bilong slek o lusim tingting olsem pinis i klostu tru! (Luk 21:34-36) Yu ken mekim wanem bilong sakim ol traim na was i stap? Tingim 4-pela samting inap helpim yu.
“Prea i Stap”
9 Kamapim olgeta hevi long Jehova long rot bilong beten. Tingim pasin Jisas i bin mekim long gaden Getsemani. Taim bel bilong em i pilim hevi nogut tru, em i mekim wanem? Em i beten askim Jehova long helpim em, em i beten strong tru na “tuhat bilong en i kamap olsem blut na i pundaun long graun.” (Luk 22:44) Tingim. Jisas i save gut long Satan. Jisas i bin stap long heven na lukim olgeta traim Satan i save kamapim bilong pundaunim ol wokman bilong God. Tasol Jisas i no ting em bai isi long winim ol traim Satan i putim long em. Sapos Pikinini Bilong God i gutpela olgeta, i mas askim God long helpim na strongim em, orait yumi mas mekim olsem moa yet!—1 Pita 2:21.
10 Tingim tu olsem bihain long Jisas i tokim ol disaipel long “prea i stap,” em i tok: “Tru, bel em i gat laik bilong mekim samting, tasol bodi em i no gat strong.” (Matyu 26:41) Jisas i tok long bodi bilong husat? Em i no tok long bodi bilong em yet; bodi bilong em i gutpela olgeta na i no gat sin. (1 Pita 2:22) Tasol bodi bilong ol disaipel i no olsem. Sin na laik nogut i stap long skin bilong ol, olsem na ol i mas kisim helpim bilong sakim ol traim. (Rom 7:21-24) Long dispela as Jisas i kirapim ol—na olgeta Kristen tru i kamap bihain long ol—long ol i mas beten askim God long helpim ol taim traim i kamap. (Matyu 6:13) Jehova i save harim ol kain beten olsem. (Song 65:2) Olsem wanem em i harim ol kain beten olsem? Em i save mekim tupela samting.
11 Namba wan samting, God i save helpim yumi long luksave long ol traim. Ol traim bilong Satan i olsem ol umben i stap long rot i tudak. Sapos yu no lukim, ol inap holimpas yu. Long rot bilong Baibel na ol buk na nius bilong Baibel, Jehova i kamapim ol umben bilong Satan long ples klia na bai yumi ken abrusim ol. Inap planti yia, ol buk na nius na program bilong ol kibung i bin givim tok lukaut planti taim long pasin bilong pret long man, pasin pamuk, pasin bilong laikim tumas mani kago, na ol arapela traim bilong Satan. (Sindaun 29:25; 1 Korin 10:8-11; 1 Timoti 6:9, 10) Yumi tenkyu tru long Jehova i tokim yumi long ol tingting na pasin bilong Satan. (2 Korin 2:11) Olgeta dispela tok lukaut i soim olsem Jehova i harim ol beten yu mekim bilong kisim helpim long sakim ol traim.
12 Namba tu samting, Jehova i givim strong long yumi bilong winim ol traim. Baibel i tok: “God . . . bai i no inap larim wanpela bilong ol traim i kamap long yupela, em i winim strong bilong yupela. Nogat. Sapos traim i kamap long yupela, orait God bai i wokim rot bilong helpim yupela. . . . Em bai i mekim yupela i sanap strong, na dispela traim bai i no inap daunim yupela.” (1 Korin 10:13) Sapos yumi wok long bilip long God na askim em long helpim yumi, em bai no larim wanpela traim i go bikpela tru na bai yumi no gat strong long ol samting bilong spirit long winim dispela traim. Olsem wanem em i “wokim rot bilong helpim” yumi? Em i “givim Holi Spirit long ol man i askim em.” (Luk 11:13) Holi spirit inap helpim yumi long tingim sampela stiatok bilong Baibel i strongim yumi long mekim pasin i stret na helpim yumi long bihainim gutpela tingting taim yumi makim ol samting yumi mas mekim. (Jon 14:26; Jems 1:5, 6) Em inap helpim yumi long kamapim ol pasin yumi mas i gat bilong winim ol laik nogut. (Galesia 5:22, 23) Spirit bilong God inap kirapim ol wanbilip long ‘helpim yumi gut tru.’ (Kolosi 4:11) Yumi amamas tru long Jehova i mekim gutpela pasin olsem taim yumi beten askim em long helpim yumi.
Kisim Stretpela Tingting
13 Bilong yumi ken was i stap, yumi mas i gat stretpela tingting long ol samting inap painim yumi. I gat ol hevi bilong laip em yumi mas karim, olsem na sampela taim yumi olgeta i save les. Tasol yumi mas tingim olsem God i no bin tok promis olsem i stap bilong yumi long dispela taim bai i no gat ol hevi long en. Nogat. Long taim bilong ol man i bin raitim Baibel, ol wokman bilong God i bin karim ol hevi, olsem ol man i birua long ol, ol i stap rabis, bel hevi, na ol i gat sik.—Aposel 8:1; 2 Korin 8:1, 2; 1 Tesalonaika 5:14; 1 Timoti 5:23.
14 Long nau, yumi tu i gat ol hevi. Ating ol man i birua long yumi, yumi gat hevi long mani, yumi save bel hevi, kisim sik, o karim sampela arapela hevi. Sapos Jehova i banisim yumi na ol hevi i no painim yumi, dispela bai mekim na i gat as na Satan i ken sutim tok long Jehova, a? (Sindaun 27:11) Jehova i larim ol samting i traim ol wokman bilong em, na sampela taim traim inap mekim na ol i dai long han bilong ol birua.—Jon 16:2.
15 Orait Jehova i bin tok promis long mekim wanem? Olsem yumi stori pinis, Jehova i bin tok promis long helpim yumi long winim ol traim i painim yumi, sapos yumi bilip tru long em. (Sindaun 3:5, 6) Long rot bilong Tok, spirit, na oganaisesen bilong em, em i lukautim yumi long ol samting bilong spirit, na i helpim yumi long pas gut wantaim em. Sapos yumi pas gut wantaim em, yumi win, maski yumi dai. I no gat wanpela samting—indai tu—inap pasim God long mekim gut tru long ol wokman bilong em i stap gut long em. (Hibru 11:6) Na long nupela taim i kam klostu pinis nau, Jehova bai inapim olgeta arapela gutpela tok promis em i bin tok long kamapim long ol man i laikim em.—Song 145:16, NW.
Tingim Ol Bikpela Tok
16 Bilong sanap strong i go inap long pinis, yumi mas tingim ol bikpela tok i olsem as na God i larim pasin nogut i stap. Sapos sampela taim yumi pilim olsem ol hevi bilong yumi i bikpela tumas na yumi laik givap, em i gutpela long tingim gen olsem Satan i bin sutim tok long Jehova olsem i no stret Jehova i stap nambawan bos. Satan i bin sutim tok tu long ol wokman bilong God olsem ol i no inap stap gut long God. (Jop 1:8-11; 2:3, 4) Ol dispela bikpela tok na rot Jehova i makim bilong stretim ol dispela tok i bikpela samting, winim laip bilong yumi. Olsem wanem yumi ken tok olsem?
17 God i bin larim ol hevi i stap na dispela i bin givim haptaim long ol arapela man long kisim tok i tru. Tingim: Jisas i karim pen bambai yumi ken kisim laip. (Jon 3:16) Yumi amamas tru long dispela samting, a? Tasol olsem wanem? Yumi redi long karim ol hevi inap sampela haptaim moa na bai ol arapela man i ken kisim laip? Bilong sanap strong i go inap long pinis, yumi mas save olsem savetingting bilong Jehova i winim tru savetingting bilong yumi. (Aisaia 55:9) Em bai pinisim pasin nogut long taim stret, em long taim em i stretim ol dispela bikpela tok na bai ol i no inap kamap gen, na yumi ken stap gut inap oltaim oltaim. Em bai stretim ol tok long nambawan gutpela rot. God i no save mekim pasin i no stret!—Rom 9:14-24.
“Go Klostu Tru Long God”
18 Bilong holimpas dispela tingting olsem taim i sot pinis, yumi mas i stap klostu tru long Jehova. No ken lusim tingting olsem Satan i wok strong tru long bagarapim pasin bilong yumi long pas gut wantaim Jehova. Satan i laik bai yumi bilip olsem pinis bai no inap kamap, na i no gat as na yumi autim gutnius o bihainim ol lo bilong Baibel. Tasol em i “man bilong tok giaman, na em i papa tru bilong pasin bilong tok giaman.” (Jon 8:44) Yumi mas strong long “sakim Satan.” Yumi no ken ting pasin bilong yumi long pas gut wantaim Jehova em i liklik samting. Baibel i mekim dispela gutpela tok long yumi: “Yupela i mas i go klostu tru long God, na em bai i kam klostu tru long yupela.” (Jems 4:7, 8) Orait yu ken mekim wanem bilong i go klostu moa long Jehova?
19 Pasin bilong beten na skelim ol tok long bel i bikpela samting. Taim yu ting ol hevi bilong laip i laik daunim yu, kamapim bel bilong yu long Jehova. Taim yu kolim stret ol samting, bai yu luksave gut moa long ol samting em i mekim bilong helpim yu. Ating sampela taim em i no mekim ol samting yu bin tingting long en, tasol sapos yu laik givim ona long em na stap gut long em, em bai helpim yu na bai yu inap sanap strong. (1 Jon 5:14) Taim yu lukim Jehova i stiaim wokabaut bilong yu, bai yu go klostu moa long em. Pasin bilong ritim na tingim tingim ol pasin bilong Jehova olsem Baibel i kamapim, em tu i bikpela samting. Kain pasin olsem bai helpim yu long save gut moa long em; em bai kirapim bel bilong yu na strongim pasin bilong yu long laikim em tru. (Song 19:14) Na dispela pasin laikim, winim olgeta narapela samting, bai helpim yu long sakim ol traim na was i stap.—1 Jon 5:3.
20 Bilong stap klostu long Jehova, em i bikpela samting tu long yumi mas i stap klostu long ol wanbilip. Bai yumi skelim dispela samting long laspela hap bilong dispela buklet.
OL ASKIM BILONG STADI
• Jisas i mekim wanem taim em i pilim bikpela hevi tru klostu long taim em i laik i dai? Em i kirapim ol disaipel bilong em long mekim wanem? (Par. 1-4)
• Bilong wanem Satan i birua long ol man i lotuim Jehova? Long wanem ol rot em i save traim yumi? (Par. 5-8)
• Bilong sakim ol traim, bilong wanem yumi mas beten oltaim (Par. 9-12), kisim stretpela tingting long ol samting inap painim yumi (Par. 13-15), tingim ol bikpela tok Satan i bin kamapim (Par. 16-17), na “go klostu tru long God” (Par. 18-20)?
[Blok long pes 25]
Sampela As Bilong Bel Hevi
Helt o krismas bilong man. Sapos yumi gat wanpela sik i no inap pinis o yumi lapun na yumi no inap mekim bikpela wok tumas, yumi inap bel hevi, long wanem, yumi no inap mekim sampela wok moa bilong God.—Hibru 6:10.
Samting i no kamap gutpela. Yumi inap bel hevi sapos wok bilong yumi long autim Tok Bilong God i karim liklik kaikai tasol.—Sindaun 13:12.
Tingting olsem yumi no gutpela man. Sapos ol arapela i bin mekim nogut long wanpela man inap planti yia pinis, em inap ting olsem ol arapela i no laikim em, na em inap ting Jehova tu i no laikim em.—1 Jon 3:19, 20.
Bel i bagarap. Sapos pasin o tok bilong wanbilip i bin bagarapim tru bel bilong wanpela, em inap bel hevi tru na tingting long lusim ol miting na wok autim tok.—Luk 17:1.
Ol man i birua. Ol man husat i no wanbilip bilong yu ol inap birua o tok bilas long yu.—2 Timoti 3:12; 2 Pita 3:3, 4.
[Piksa long pes 26]
Jisas i tokim yumi long “prea i stap” na bai yumi ken sakim ol traim