‘Yupela Pikinini, Bihainim Tok Bilong Papamama Bilong Yupela’
“Yupela pikinini, yupela i mas bihainim tok bilong papamama bilong yupela. Yupela olgeta i pas wantaim Bikpela, na dispela pasin em i stretpela pasin bilong yupela i mekim.”—EFESUS 6:1.
1. Olsem wanem pasin bilong bihainim tok inap lukautim yu?
ATING yumi stap laip long nau, long wanem, yumi bin bihainim tok, na sampela i dai pinis, long wanem, ol i no bin bihainim tok. Bihainim wanem tok? Olsem: Yumi save bihainim sampela toksave em bodi bilong yumi i “nambawan tru” i save givim long yumi. (Song 139:14) Ai bilong yumi i lukim ol blakpela klaut, na yau bilong yumi i harim ol klaut i pairap. Orait nau pawa i stap long win i mekim na gras bilong het bilong yumi i sanap stret. Long ol man em ol i bin lain long ol bagarap inap kamap long dispela, dispela i olsem toksave long painim wanpela ples hait long strongpela win wantaim klaut i pairap na ren ais i pundaun, na bai ol i no ken kisim bagarap.
2. Bilong wanem ol pikinini i mas kisim ol toksave? Bilong wanem ol i mas bihainim tok bilong papamama?
2 Yupela ol yangpela i mas kisim ol toksave long ol hevi inap kamap, na ol papamama bilong yupela i gat wok long givim ol dispela toksave long yupela. Ating yu tingim yet olsem ol i bin tokim yu: “Yu no ken holim stov. Em i hat.” “No ken go klostu long wara. Yu inap kisim bagarap.” “Lukluk gut taim yu laik brukim rot.” Sori tru, sampela pikinini i kisim bagarap o ol i dai, long wanem, ol i no bin bihainim tok. Pasin bilong bihainim tok bilong papamama bilong yu em i “stretpela pasin.” Na tu, em i gutpela tingting na save. (Sindaun 8:33) Narapela skripsa long Baibel i tok Bikpela Jisas Krais i “laikim” dispela pasin. Tru tumas, God i tok yu mas bihainim tok bilong papamama.—Kolosi 3:20; 1 Korin 8:6.
Kisim Pe Long Pasin Bilong Bihainim Tok
3. Long planti bilong yumi “laip tru” i makim wanem samting? Ol pikinini inap kisim dispela laip olsem wanem?
3 Pasin bilong bihainim tok bilong papamama bai lukautim dispela “laip nau” yu stap long en, na tu, dispela “laip [yu] bai kisim bihain,” em dispela laip em i “laip tru.” (1 Timoti 4:8; 6:19) Planti bilong yumi bai kisim laip oltaim long graun long nupela taim God bai kamapim, em laip tru God i bin tok promis long ol manmeri i bihainim ol lo bilong em ol bai kisim. Wanpela bilong ol dispela lo i olsem: “ ‘Yu mas aninit long papamama bilong yu na bihainim tok bilong ol.’ Dispela lo em i namba wan lo i gat promis i stap wantaim, em promis i tok olsem, ‘Sapos yu mekim olsem, orait olgeta wok samting yu mekim i ken kamap gutpela, na bai yu stap longpela taim long dispela graun.’ ” Olsem na sapos yu bihainim tok bilong papamama bilong yu, bai yu stap amamas. Bai yu kisim gutpela sindaun long bihain, na bai yu inap kisim laip oltaim long Paradais long graun!—Efesus 6:2, 3.
4. Olsem wanem ol pikinini i ken aninit long God? Olsem wanem dispela i helpim ol?
4 Taim yu aninit long papamama bilong yu long rot bilong bihainim tok bilong ol, yu aninit tu long God, long wanem, em i tokim yu long bihainim tok bilong ol. Na dispela bai helpim yu. Baibel i tok: “Mi God, Bikpela bilong yupela. Oltaim mi save skulim yupela na soim yupela long ol stretpela pasin yupela i mas bihainim na bai yupela i stap gut.” (Aisaia 48:17; 1 Jon 5:3) Olsem wanem yu inap stap gut sapos yu bihainim tok? Em bai mekim mama na papa bilong yu i stap amamas, na ol bai kamapim dispela amamas long kain kain rot, na dispela bai mekim yu i stap amamas. (Sindaun 23:22-25) Tasol bikpela samting moa, pasin bilong yu long bihainim tok bai mekim Papa bilong yu long heven i stap amamas, na em bai givim gutpela pe long yu! Orait, nau yumi ken lukim olsem wanem Jehova i bin mekim gut na lukautim Jisas, em i tok long em yet olsem: “Oltaim mi save mekim ol samting em i laikim.”—Jon 8:29.
Jisas—Em Man Bilong Wok
5. I gat wanem ol as na yumi ken ting olsem Jisas i bin mekim gut wok?
5 Jisas em i namba wan pikinini bilong mama bilong em, Maria. Waspapa bilong em, Josep, em i mekim wok kamda. Jisas tu i mekim wok kamda, na ating em i lainim dispela wok long Josep. (Matyu 13:55; Mak 6:3; Luk 1:26-31) Yu ting Jisas i mekim gut wok kamda? Taim em i stap long heven, paslain long em i kamap long bel bilong wanpela meri husat i no bin stap yet wantaim wanpela man, olsem man i gat gutpela tingting na save, em i tok: “Long taim Bikpela i mekim ol dispela wok, mi stap wantaim em na em i makim mi olsem saveman i bosim wok. Olgeta de mi bin mekim em i amamas, long wanem, mi bin amamas tumas long lukim ol samting em i bin wokim.” Taim Jisas i stap long heven em i mekim gut wok na God i amamas long em. Yu ting taim em i yangpela na i stap long graun, em i wok strong long mekim gutpela wok, olsem gutpela wok kamda?—Sindaun 8:30; Kolosi 1:15, 16.
6. (a) Bilong wanem yu ting olsem taim Jisas i stap pikinini em i mekim sampela wok long haus? (b) Olsem wanem ol pikinini i ken bihainim pasin bilong Jisas?
6 Tru, taim Jisas i pikinini, sampela taim em i pilai, olsem Baibel i stori long ol pikinini bilong bipo i bin mekim. (Sekaraia 8:5; Matyu 11:16, 17) Tasol yumi ken save, olsem namba wan pikinini insait long wanpela bikpela famili i no gat planti samting, em i mas mekim sampela wok long haus, na tu, Josep i skulim em long kamap kamda. Bihain, Jisas i kamap man bilong autim tok na em i mekim strong dispela wok, em i mekim olsem inap long mak bilong lusim gutpela sindaun bilong em. (Luk 9:58; Jon 5:17) Yu lukim sampela samting yu ken mekim bilong bihainim pasin bilong Jisas? Olsem wanem? Papamama i save tokim yu long klinim rum bilong yu o mekim sampela narapela wok long haus? Ol i save kirapim yu long mekim wok bilong God long rot bilong go long ol miting Kristen na autim bilip bilong yu long ol narapela? Yu ting yangpela Jisas i mekim wanem sapos papamama i askim em long mekim olsem?
Gutpela Sumatin na Tisa Bilong Baibel
7. (a) Ating Jisas i go wantaim husat long Pasova? (b) Jisas i stap we taim ol narapela i go bek long ples? Bilong wanem em i stap long dispela hap?
7 God i tok, olgeta man long ol famili Israel i mas go lotuim Jehova long tempel long taim bilong 3-pela bikpela de bilong ol Juda. (Lo 16:16) Taim Jisas i gat 12-pela krismas, ating famili olgeta bilong em ol i go long Jerusalem bilong tingim Pasova. Ol brata na susa bilong Jisas ol tu i go. Na ating Salome, em susa bilong Maria, na man bilong em Sebedi na ol pikinini man bilong ol, Jems na Jon, bihain ol i kamap aposel, ol tu i go wantaim ol.a (Matyu 4:20, 21; 13:54-56; 27:56; Mak 15:40; Jon 19:25) Taim ol i go bek long ples bilong ol, ating Josep na Maria i ting Jisas i stap wantaim ol wanblut bilong ol, olsem na pastaim ol i no luksave long em i no stap. Tripela de bihain, taim Maria na Josep i painim Jisas, em i stap long tempel, na em i “sindaun i stap namel long ol tisa. Em i wok long harim tok bilong ol, na long askim ol tu.”—Luk 2:44-46.
8. Long tempel Jisas i mekim wanem samting? Bilong wanem ol manmeri i kirap nogut long em?
8 Long wanem rot Jisas i bin “askim” ol tisa? Pasin bilong em long givim askim long ol tisa i no makim olsem em i givim ol askim nating long ol long sampela samting em i laik save long en, nogat. Tok Grik ol i tanim long hia olsem “askim” i makim ol askim i save kamap long kot bilong save long as bilong tok, em i tru o nogat. Yes, taim Jisas i yangpela, em i wanpela gutpela sumatin bilong Baibel na ol tisa bilong lotu em ol i gat bikpela save ol i kirap nogut long save bilong em! Baibel i tok: “Ol man i harim tok bilong en, ol i kirap nogut long save bilong en na long tok em i bekim long ol.”—Luk 2:47.
9. Olsem wanem yu inap bihainim pasin bilong Jisas long stadi long Baibel?
9 Yu ting olsem wanem Jisas inap mekim na ol tisa i gat save ol i kirap nogut long save bilong em long Baibel, maski em i yangpela? Em i gat gutpela papamama i pret long God, na kirap long taim em i bebi ol i skulim em long ol tok bilong God. (Kisim Bek 12:24-27; Lo 6:6-9; Matyu 1:18-20) Yumi ken save olsem Josep i bin kisim yangpela Jisas i go long haus lotu bilong harim ol man i ritim ol tok bilong Baibel na toktok long en. Olsem wanem? Yu tu i gat papamama i save stadi long Baibel wantaim yu na kisim yu i go long ol miting Kristen? Yu save amamas long wok bilong ol, olsem Jisas i bin amamas long papamama bilong em? Yu save autim ol tok yu save lainim long ol narapela, olsem Jisas i bin mekim?
Jisas i Daun Long Papamama
10. (a) Bilong wanem papamama bilong Jisas i mas save long ol i ken painim Jisas long wanem hap? (b) Olsem wanem Jisas i olsem gutpela piksa long ol pikinini?
10 Yu ting Maria na Josep i pilim olsem wanem taim ol i painim Jisas long tempel bihain long 3-pela de? Ol i amamas tru. Tasol Jisas i kirap nogut long papamama bilong em ol i no bin save long em i stap we. Tupela i bin save olsem God i bin wokim mirakel na Jisas i kamap. Tru, ol i no save long olgeta samting, tasol ol i save long sampela samting long wok bilong Jisas long bihain olsem Man Bilong Kisim Bek ol man na King bilong Kingdom Bilong God. (Matyu 1:21; Luk 1:32-35; 2:11) Olsem na Jisas i askim ol: “Bilong wanem yutupela i wok long painim mi? Ating yutupela i no save, mi mas i stap long haus bilong Papa bilong mi?” Tasol Jisas i bihainim tok bilong papamama bilong em na em i go bek wantaim ol long ples bilong ol long Nasaret. Baibel i tok: “Oltaim em i save bihainim tok bilong tupela.” Na tu, “mama bilong en i putim dispela olgeta tok long bel bilong en na i holim i stap.”—Luk 2:48-51.
11. Pasin bilong Jisas long bihainim tok inap skulim yu long wanem samting?
11 Olsem wanem? Em i isi long yu long bihainim pasin bilong Jisas, olsem bihainim tok bilong papamama long olgeta taim? O planti taim yu ting ol i no save gut long ol samting bilong nau na save bilong yu i winim save bilong ol? Tru, ating save bilong yu long sampela samting i winim save bilong ol—olsem yusim mobail fon, kompiuta, o sampela narapela samting olsem. Tasol tingim Jisas, ol tisa i gat bikpela save ol i kirap nogut long “save bilong en na long tok em i bekim long ol.” Ating yu wanbel long tok olsem save bilong yu i liklik long save bilong em. Tasol Jisas i stap daun long papamama bilong em. Dispela i no makim olsem long olgeta taim em i wanbel long ol disisen bilong ol. Tasol “oltaim em i save bihainim tok bilong tupela”—long olgeta yia em i stap yangpela. Yu ting pasin bilong em inap skulim yu long wanem samting?—Lo 5:16, 29.
Bihainim Tok—Em Hatwok
12. Olsem wanem pasin bilong bihainim tok inap helpim yu long abrusim bagarap?
12 Tru, sampela taim em i hatwok long bihainim tok. Dispela i kamap ples klia long pasin em tupela yangpela meri i mekim inap sampela yia i go pinis. Ol i laik brukim bikrot na i no yusim bris i stap antap long dispela bikrot. Ol i strong long pren bilong ol husat i laik yusim dispela bris i stap antap, na ol i tok: “John, yu kam. Yu bai go wantaim mipela, a?” Taim em i no laik go, wanpela meri i tokim em: “Yu pret, a?” Tasol John i no pret, em i tok: “Mi mas bihainim tok bilong mama bilong mi.” Bihain liklik, taim em i wokabaut long bris, em i harim wanpela ka i brek strong na em i lukluk i go daun long bikrot na em i lukim wanpela ka i bamim tupela yangpela meri. Wanpela i dai, na narapela i kisim bikpela bagarap na ol i mas katim na rausim lek bilong em. Dispela mama husat i bin givim tok lukaut long ol pikinini meri bilong em long ol i mas wokabaut long bris antap long bikrot, bihain em i bin tokim mama bilong John olsem: “Mi laik tru long tupela i bihainim tok bilong mi olsem pikinini man bilong yu i bin mekim.”—Efesus 6:1.
13. (a) Bilong wanem yu mas bihainim tok bilong papamama? (b) Long wanem taim i stret long pikinini i no mekim ol samting em papamama i tokim em long mekim?
13 Bilong wanem God i tok: “Yupela pikinini, yupela i mas bihainim tok bilong papamama bilong yupela”? Long wanem, sapos yu bihainim tok bilong papamama, i olsem yu bihainim tok bilong God. Na tu, ol papamama i gat bikpela save long yu. Olsem: Inap 5-pela yia paslain long dispela eksiden yumi stori long en i bin kamap, mama bilong John i gat wanpela pren em pikinini bilong em i bin dai taim em i laik brukim dispela bikrot! Tru, sampela taim i hatwok long bihainim tok bilong papamama, tasol God i tok yu mas bihainim tok bilong ol. Tasol sapos papamama bilong yu—o sampela narapela man—i tokim yu long giaman, stil, o mekim sampela narapela samting em God i no orait long en, yu mas “bihainim tok bilong God tasol . . . no ken bihainim tok bilong ol man.” Olsem na bihain long tok “yupela i mas bihainim tok bilong papamama bilong yupela,” Baibel i tok moa, “yupela olgeta i pas wantaim Bikpela.” Dispela i makim olsem yupela i mas bihainim olgeta tok bilong papamama bilong yupela taim ol dispela tok i stret wantaim ol lo bilong God.—Aposel 5:29.
14. Bilong wanem pasin bilong bihainim tok i isi moa long ol man i gutpela olgeta? Tasol bilong wanem man i gutpela olgeta i mas lain long en?
14 Yu ting sapos yu gutpela olgeta—olsem ‘klin olgeta long ai bilong God na longwe tru long ol man bilong mekim sin,’ olsem Jisas—long olgeta taim bai i isi long yu long bihainim tok bilong papamama? (Hibru 7:26) Sapos yu gutpela olgeta, bai yu no gat laik long mekim ol samting nogut, olsem nau yu laik mekim. (Stat 8:21; Song 51:5) Jisas tu i mas lain long bihainim tok. Baibel i tok: “Jisas em i Pikinini Bilong God, tasol em i karim pen, na dispela i skulim em tru long pasin bilong bihainim tok bilong God.” (Hibru 5:8) Olsem wanem pasin bilong karim pen i helpim Jisas long lain long pasin bilong bihainim tok, em wanpela samting em i no mas lain long heven?
15, 16. Olsem wanem Jisas i lain long pasin bilong bihainim tok?
15 Jehova i stiaim Josep na Maria na ol i lukautim Jisas bambai i no gat wanpela samting nogut i ken painim em taim em i pikinini. (Matyu 2:7-23) Tasol bihain God i no lukautim moa Jisas long narakain strong. Jisas i kisim bikpela hevi long tingting na skin, olsem na Baibel i tok “em i save mekim prea na beten long God . . . na em i singaut strong na i krai planti.” (Hibru 5:7) Dispela samting i kamap long wanem taim?
16 Long ol laspela aua bilong Jisas long i stap long graun, Satan i mekim bikpela samting tru bilong traim bagarapim pasin bilong Jisas long i stap gut long God. Tingting bilong Jisas i bagarap tru, sapos em i dai olsem wanpela man nogut, dispela bai mekim wanem long nem bilong Papa bilong em, olsem na “Jisas i pilim hevi nogut tru, na em i beten strong moa. Na tuhat bilong en i kamap olsem blut na i pundaun long graun.” Sampela aua bihain, indai bilong Jisas long diwai pos i givim bikpela pen long em na “em i singaut strong na i krai planti.” (Luk 22:42-44; Mak 15:34) Olsem na “em i karim pen, na dispela i skulim em tru long pasin bilong bihainim tok bilong God,” na long dispela rot em i mekim Papa bilong em i amamas. Nau Jisas i stap long heven na em i pilim pen bilong yumi taim yumi wok strong long bihainim tok bilong God.—Sindaun 27:11; Hibru 2:18; 4:15.
Lain Long Bihainim Tok
17. Yumi mas ting olsem wanem taim narapela i stretim yumi?
17 Taim papa na mama i save stretim yu, dispela i kamapim olsem ol i laik helpim yu tru, olsem ol i laikim yu tru. Baibel i tok: “Wanem pikinini i stap na papa bilong en i no save stretim em?” Em pasin nogut tru sapos papamama bilong yu i no laikim yu tru na ol i no lusim haptaim na wok strong bilong stretim yu, a? Wankain tasol, Jehova i save laikim yu tru, olsem na em i stretim yu. “Taim Papa i givim hevi long yumi bilong stretim yumi, yumi no save amamas. Nogat. Bel bilong yumi i pilim hevi tasol. Tasol taim em i stretim yumi pinis, yumi bai kisim gutpela pasin tru. Yumi bai mekim ol stretpela pasin, na bel bilong yumi bai i stap isi.”—Hibru 12:7-11.
18. (a) Pasin bilong stretim narapela em i mak bilong wanem samting? (b) Yu lukim wanem ol gutpela samting i kamap long pasin bilong stretim narapela?
18 Wanpela king long Israel bilong bipo, em Jisas i tok long em olsem man i gat bikpela savetingting, em i tok pasin bilong stretim gut pikinini em i bikpela samting. Solomon i tok: “Sapos papa i no givim kanda long pikinini bilong en long taim pikinini i mekim rong, i olsem em i no laikim pikinini. Tasol sapos papa i laikim pikinini, orait em i save strong long stretim em.” Na Solomon i tok tu olsem sapos wanpela i stretim narapela long gutpela pasin dispela bai i helpim em na em bai i no inap i go long ples bilong ol man i dai pinis. (Sindaun 13:24; 23:13, 14; Matyu 12:42) Wanpela meri Kristen i tingim taim em i pikinini na em i bikhet long ol miting Kristen, papa i tokim em olsem taim ol i kam bek long haus em bai stretim em. Nau em i tingim papa bilong em long pasin laikim, long wanem, em i bin stretim em gut na dispela i stiaim em long gutpela rot.
19. Bilong wanem em i bikpela samting long yu bihainim tok bilong papamama bilong yu?
19 Sapos yu gat papamama i laikim yu tru na ol i lusim haptaim na wok strong long stretim yu long gutpela pasin, yu mas i stap amamas. Bihainim tok bilong ol, olsem Bikpela Jisas Krais i bin bihainim tok bilong papamama bilong em, em Josep na Maria. Tasol gutpela moa yet, yu mas bihainim tok bilong ol, long wanem, Papa bilong yu long heven, God Jehova, em i tok yu mas mekim olsem. Sapos yu mekim olsem, dispela bai helpim yu na “olgeta wok samting yu mekim i ken kamap gutpela, na bai yu stap longpela taim long dispela graun.”—Efesus 6:2, 3.
[Futnot]
a Lukim buk Insight on the Scriptures, Volium 2, pes 841, ol Witnes Bilong Jehova i wokim.
Bai Yu Bekim Olsem Wanem?
• Ol pikinini inap kisim wanem gutpela samting sapos ol i bihainim tok bilong papamama?
• Taim Jisas i stap pikinini, olsem wanem em i olsem gutpela piksa long bihainim tok bilong papamama?
• Olsem wanem Jisas i lain long pasin bilong bihainim tok?
[Piksa long pes 24]
Jisas i gat 12-pela krismas na em i save gut long Tok Bilong God
[Piksa long pes 26]
Olsem wanem Jisas i karim pen na dispela i skulim em long pasin bilong bihainim tok?