Bikpela Tisa i Mekim Wok Bilong Helpim Ol Arapela

YU SAVE amamas taim wanpela man i mekim gutpela pasin long yu?— Yumi olgeta i save amamas taim wanpela man i mekim olsem long yumi. Bikpela Tisa i save long dispela, na oltaim em i save mekim ol samting bilong helpim ol man. Em i tok: ‘Mi no kam bilong ol man i ken mekim wok bilong helpim mi, nogat. Mi kam bilong mekim wok bilong helpim ol.’—Matyu 20:28.

Olsem na sapos yumi laik bihainim pasin bilong Bikpela Tisa, yumi mas mekim wanem?— Yumi mas mekim wok bilong helpim ol arapela. Yumi mas mekim ol gutpela pasin long ol. Tru, planti man i no save mekim olsem. Planti man i laik bai ol arapela i mekim wok bilong helpim ol. Wanpela taim ol disaipel bilong Jisas tu i bin kisim kain tingting olsem. Olgeta i laik stap bikpela o nambawan, winim ol narapela.

Wanpela taim Jisas i raun wantaim ol disaipel bilong em. Ol i go long taun Kaperneam, klostu long raunwara Galili, na olgeta i go insait long wanpela haus. Orait nau Jisas i askim ol: “Long rot yupela i mekim wanem toktok?” Tasol ol i no mekim wanpela tok, long wanem, ol i bin tok pait long husat i stap nambawan.—Mak 9:​33, 34.

Jisas i save olsem i no stret long wanpela disaipel bilong em i ting em i nambawan na i winim ol arapela. Olsem yumi bin lainim long namba wan sapta bilong dispela buk, em i sanapim wanpela liklik pikinini namel long ol na i tokim ol long daunim ol yet olsem dispela liklik pikinini. Tasol ol i no kisimgut dispela samting Jisas i skulim ol long en. Olsem na paslain liklik long taim em i dai, em i skulim ol long wanpela samting ol i no inap lusim tingting long en. Em i mekim wanem?—

Taim ol i wok long kaikai i stap, Jisas i kirap sanap na i rausim saket bilong em. Em i kisim wanpela taul na pasim long namel bilong em. Bihain em i kisim wanpela dis na pulimapim wara long en. Ating ol disaipel bilong em i tingting planti long em bai mekim wanem. Ol i lukluk i stap, na Jisas i go long olgeta wan wan, em i lindaun na wasim lek bilong ol. Bihain em i draim lek bilong ol long taul. Man! Sapos yu bin stap long dispela taim, bai yu pilim olsem wanem?—

Ol disaipel bilong em i ting i no stret long Bikpela Tisa i mekim dispela kain wok. Ol i pilim sem. Pita i no laik larim Jisas i wasim lek bilong em. Tasol Jisas i tok, em i bikpela samting long em i mas mekim dispela samting.

Long nau yumi no save wasim lek bilong narapela narapela. Tasol taim Jisas i bin stap long graun, ol man i save mekim dispela pasin. Yu save long as na ol i mekim olsem?— Long ples we Jisas na ol disaipel bilong em i bin stap long en, ol man i save putim sandel. Na taim ol i wokabaut long rot, das i save karamapim lek bilong ol. Olsem na em i gutpela pasin long wasim lek bilong man i bin wokabaut i kam long haus.

Tasol long dispela taim i no gat wanpela bilong ol disaipel i laik wasim lek bilong ol arapela. Olsem na Jisas yet i mekim dispela wok. Taim Jisas i mekim olsem, em i skulim ol disaipel long wanpela bikpela samting. Ol i mas kisim save long dispela samting Jisas i skulim ol long en. Na yumi tu long nau i mas kisim save long dispela samting.

Jisas i laik skulim ol long wanem samting?— Jisas i werim gen saket na em i go sindaun, na em i tokim ol: “Ating yupela i save long as bilong dispela samting mi mekim long yupela? Yupela i save kolim mi Tisa na Bikpela. Na i gutpela yupela i tok olsem. . . . Mi Bikpela na mi Tisa, na mi wasim lek bilong yupela. Orait yupela tu i mas wasim lek bilong ol arapela man bilong lain bilong yumi.”—Jon 13:​2-14.

Bikpela Tisa i soim olsem em i laik bai ol disaipel bilong em i mas mekim wok bilong helpim narapela narapela. Em i no laik bai ol i tingim ol yet tasol, nogat. Em i no laik bai ol i ting olsem ol i stap bikpela na ol arapela i mas mekim wok bilong helpim ol. Em i laik bai ol i mas amamas long mekim wok bilong helpim ol arapela.

Em gutpela skul tru ol i kisim, a?— Yu bai bihainim pasin bilong Bikpela Tisa na mekim wok bilong helpim ol arapela?— Yumi olgeta inap mekim ol samting bilong helpim ol arapela. Dispela bai mekim ol i amamas. Tasol bikpela samting moa, dispela bai mekim Jisas na Papa bilong em i amamas.

I no hatwok long mekim olsem. Sapos yu lukluk gut, bai yu lukim planti wok yu inap mekim bilong helpim ol arapela. Tingim: I gat sampela samting yu inap mekim bilong helpim mama bilong yu? Yu save olsem em i save mekim bikpela wok bilong helpim yu na ol narapela long famili. Yu ting yu inap helpim em?— Traim askim em.

Ating yu ken redim ol plet kap samting long tebol paslain long taim bilong kaikai. O taim famili i kaikai pinis, yu ken rausim ol doti plet long tebol. Sampela pikinini i save kisim ol pipia i go na putim long ples pipia long olgeta de. Maski yu mekim wanem wanem wok, yu mekim wok bilong helpim ol arapela, olsem Jisas i bin mekim.

Yu gat ol liklik brata na susa em yu ken helpim ol? Tingim, Jisas, em Bikpela Tisa, em i bin mekim wok bilong helpim ol disaipel bilong em. Yu bihainim pasin bilong Jisas taim yu mekim wok bilong helpim ol liklik brata na susa bilong yu. Yu inap mekim wanem wok bilong helpim ol?— Ating yu ken helpim ol long lain long putim gut ol toi samting taim ol i pilai pinis. O yu ken helpim ol long bilas. O yu ken helpim ol long stretim bet bilong ol. Yu inap tingim sampela samting moa yu ken mekim bilong helpim ol?— Ol bai laikim yu tumas taim yu mekim ol dispela samting bilong helpim ol, wankain olsem ol disaipel bilong Jisas i bin laikim em tumas.

Long skul tu yu inap mekim wok bilong helpim ol arapela. Ating yu inap helpim ol wanskul o tisa bilong yu. Sapos ol buk bilong wanpela i pundaun, em i gutpela pasin long helpim em long kisim ol buk. Ating yu ken tokim tisa olsem yu laik klinim blakbot o mekim narapela samting bilong helpim em. Em gutpela pasin tu long opim dua na holim i stap na bai narapela i ken i go.

Sampela taim, yumi bai lukim olsem ol man i no tenkyu long wok yumi mekim bilong helpim ol. Yu ting dispela i mas pasim yumi long mekim gutpela wok bilong helpim ol arapela?— Nogat tru! Planti man i no bin tok tenkyu long Jisas long ol gutpela wok em i bin mekim. Tasol dispela i no pasim em long mekim yet ol gutpela pasin.

Olsem na yumi no ken surik long helpim ol arapela man. Yumi ken tingim Bikpela Tisa, Jisas, na oltaim bihainim pasin bilong em.