Jehova, Em God Bilong Mekim Tok Tru
“Bikpela, yu God bilong mekim pasin tru tasol, yu kisim bek mi pinis.”—SONG 31:5.
1. Bipo, taim i no gat pasin giaman, olsem wanem long ol samting long heven na graun?
BIPO, i no gat pasin bilong tok giaman. Long heven i gat ol ensel i gutpela olgeta ol i bihainim laik bilong Man bilong wokim ol, em “God bilong mekim pasin tru tasol.” (Song 31:5) Pasin giaman na tok giaman i no stap. Jehova i bin kamapim tok tru long ol dispela pikinini spirit bilong em. Em i mekim olsem, long wanem, em i laikim tru ol na em i tingim tru i stap bilong ol. Na i wankain tu hia long graun. Jehova i wokim namba wan man na meri, na long rot em i makim, em i givim tok long ol long pasin i klia na i tru. Em i gutpela samting tru, a?
2. Husat i kamapim pasin bilong tok giaman? I gat wanem as na em i mekim olsem?
2 Tasol bihain, wanpela pikinini spirit bilong God i laik kamap wanpela god na em i birua long Jehova. Dispela spirit, em bihain em i kisim nem Satan, em i laik bai ol narapela i lotu long em. Bilong winim dispela mak, em i kamapim pasin bilong tok giaman na bai em i ken pulim ol man i kam aninit long em na em i bosim ol. Taim em i mekim olsem, em i kamap “man bilong tok giaman, na . . . papa tru bilong pasin bilong tok giaman.”—Jon 8:44.
3. Adam na Iv i mekim wanem long ol tok giaman bilong Satan? Wanem samting i bin kamap long dispela?
3 Long rot bilong wanpela snek, Satan i tokim namba wan meri, Iv, olsem sapos em i sakim lo bilong God na kaikai long prut tambu, bai em i no dai. Dispela tok em i tok giaman. Na em i tokim Iv, sapos em i kaikai, bai em i kamap wankain olsem God na save long wanem samting i gutpela na wanem samting i nogut. Dispela tok tu em i tok giaman. Maski bipo i no gat wanpela i bin tok giaman long Iv, yumi ken ting olsem em i luksave dispela tok bilong snek i no stret wantaim ol tok God i bin givim long man bilong em, Adam. Tasol em i bilipim tok bilong Satan, tok bilong Jehova nogat. Satan i giamanim Iv, na em i kisim prut na kaikai. Bihain, Adam tu i kaikai. (Stat 3:1-6) Olsem Iv, i no gat wanpela taim bipo Adam i bin harim wanpela tok giaman, tasol dispela tok bilong Satan i no giamanim em. (1 Timoti 2:14) Ol samting Adam i mekim i soim olsem em i sakim dispela Man bilong wokim em. Dispela i kamapim samting nogut tru long ol man. Long pasin bikhet bilong Adam, sin na dai—na planti hevi—i kamap long olgeta tumbuna pikinini bilong em.—Rom 5:12.
4. (a) Ol tok giaman i kamap long gaden Iden i bilong mekim wanem? (b) Yumi mas mekim wanem na bai Satan i no ken giamanim yumi?
4 Pasin giaman tu i go bikpela. Yumi mas save olsem ol dispela tok giaman i kamap long gaden Iden ol i bilong daunim pasin bilong Jehova yet long mekim tok tru tasol. Satan i bin tok, God i laik pasim namba wan man na meri long kisim gutpela samting. Tasol dispela tok bilong em i no stret. Pasin bikhet bilong Adam tupela Iv i no bin helpim ol. Ol i dai, olsem Jehova i tok ol bai dai. Tasol Satan i wok yet long sutim tok giaman long Jehova, olsem na sampela handet yia bihain, spirit bilong God i kirapim aposel Jon long tok, Satan i “giamanim olgeta manmeri bilong graun.” (KTH 12:9) Yumi no laik bai Satan i giamanim yumi, olsem na yumi mas bilip tru olsem Jehova i save tok tru tasol, na ol tok bilong em long Baibel i tru olgeta. Olsem wanem yu inap kisim pasin bilong bilip tru long Jehova, na strongim yu yet bambai ol tok bilong dispela Birua bilong em i no ken giamanim yu?
Jehova i Save Tru Long Ol Samting
5, 6. (a) Jehova i gat wanem save? (b) Skelim save bilong yumi ol man wantaim save bilong Jehova.
5 Baibel i tok Jehova i “bin wokim olgeta samting.” (Efesus 3:9) Em i “bin wokim skai na graun na solwara na olgeta samting i stap long en.” (Aposel 4:24) Jehova em Man bilong wokim olgeta samting, olsem na em i save tru long olgeta dispela samting. Tingim wanpela man i droim plen na wokim haus bilong em yet—em wanpela tasol i mekim olgeta wok bilong sanapim dispela haus. Em bai save tru long olgeta samting bilong dispela haus, winim ol man i sanap lukluk tasol long en. Yes, ol man i save gut tru long ol samting ol yet i bin droim plen long en na wokim. Na olsem tasol, Jehova i save gut tru long olgeta samting em yet i bin wokim.
6 Profet Aisaia i stori gut long save bilong Jehova. Em i tok: “I gat wanpela man i stap em inap pulimapim olgeta solwara long han bilong en, a? Na i gat wanpela man inap metaim antap bilong skai, a? Na i gat wanpela man inap pulimapim olgeta graun long kap, a? Na i gat wanpela man inap putim ol maunten long skel na skelim, a? Husat inap soim Bikpela long pasin bilong wokim ol samting? Ating i gat wanpela man inap givim tingting long em, a? Na husat i bin skulim em long mekim gutpela na stretpela pasin? Na husat i skulim em long olgeta dispela gutpela tingting na save em i gat? I no gat wanpela man.” (Aisaia 40:12-14) Tru tumas, Jehova em “God i save long olgeta samting” na em “i gat olgeta save.” (1 Samuel 2:3; Jop 36:4; 37:16) Save bilong yumi i liklik tasol taim yumi skelim wantaim save bilong Jehova! Maski yumi ol man i bin bungim planti save, save yumi kisim long ol samting God i bin wokim em i “liklik hap tasol” bilong bikpela save bilong God.—Jop 26:14.
7. Devit i luksave long wanem samting bilong save bilong Jehova? Olsem na yumi mas save long wanem samting?
7 Jehova i bin wokim yumi, olsem na em i save gut tru long yumi. King Devit i bin luksave long dispela samting. Em i tok: “Bikpela, yu skelim pinis bel bilong mi, na yu save tru long mi. Yu save long olgeta samting mi save mekim. Yu stap longwe, tasol yu save long olgeta tingting bilong mi. Yu save lukim mi long taim mi mekim wok na long taim mi slip. Yu save long olgeta pasin bilong mi. Na sapos mi laik mekim wanpela tok, yu save pinis long dispela tok.” (Song 139:1-4) Tasol Devit i save tu olsem yumi ol man inap makim rot yumi yet i laik bihainim—God i bin wokim yumi bai yumi inap bihainim tok bilong em o sakim tok bilong em. (Lo 30:19, 20; Josua 24:15) Tasol maski dispela i olsem, Jehova i save gut tru long yumi, winim yumi yet. Em i laik bai yumi ken i stap gut, na em inap tru long stiaim gut wokabaut bilong yumi. (Jeremaia 10:23) I no gat wanpela tisa o saveman i winim Jehova long pasin bilong lainim yumi long tok i tru na long helpim yumi long stap amamas na kisim gutpela tingting na save.
Jehova i Save Tok Tru
8. Olsem wanem yumi ken save, Jehova i save tok tru?
8 Tasol pasin bilong save long tok tru, dispela i no makim olsem man bai mekim tok tru long olgeta taim, nogat. Olsem: Satan “i no bihainim pasin i tru.” (Jon 8:44) Tasol Jehova i “save tok tru oltaim.” (Kisim Bek 34:6, NW ) Planti taim Baibel i tok Jehova i save tok tru tasol. Aposel Pol i tok, “God i no inap tru long giaman” na God “i no save giaman.” (Hibru 6:18; Taitus 1:2) Pasin bilong tok tru em i wanpela bikpela pasin bilong God. Yumi ken bilip tru long Jehova, long wanem, em i save tok tru oltaim; em i no save giamanim ol man i stap gut long em, nogat.
9. Olsem wanem nem bilong Jehova i insait long pasin bilong tok tru?
9 Nem bilong Jehova yet i makim olsem em i save tok tru. Mining bilong dispela nem i olsem, “Em i Mekim i Kamap.” Dispela i kamapim Jehova olsem Man bilong inapim olgeta tok promis bilong em. I no gat narapela man inap long mekim olsem. Jehova em Nambawan Bikpela, olsem na i no gat wanpela samting inap pasim em long kamapim ol samting em i tingting pinis long mekim. Jehova i save tok tru tasol, na tu, em wanpela tasol i gat save na strong inap long kamapim tru olgeta tok bilong em.
10. (a) Josua i bin lukim wanem ol tok bilong Jehova i kamap tru? (b) Wanem ol promis bilong Jehova yu yet i bin lukim i kamap tru?
10 Josua em wanpela bilong planti man i bin lukim ol narakain samting i kamap, em ol samting i kamapim klia olsem Jehova i save tok tru tasol. Josua i bin stap long Isip long taim Jehova i kamapim 10-pela bikpela hevi long dispela lain, em ol hevi Jehova i bin tokaut long ol paslain long ol wan wan i kamap. Na tu, Josua i bin lukim truim bilong ol promis bilong Jehova long kisim bek ol Israel long Isip, na bringim ol i kam insait long Graun Bilong Promis, na daunim ol strongpela ami Kenan i birua long ol. Klostu long taim Josua i dai, em i tokim ol hetman bilong lain Israel: “Yupela i save pinis, God, Bikpela bilong yumi i bin givim yupela olgeta gutpela samting em i bin promis long givim yupela. Olgeta samting em i bin promis long mekim, ol i kamap pinis, na i no gat wanpela promis i popaia.” (Josua 23:14) Tru, yu yet i no bin lukim ol mirakel Josua i bin lukim, tasol olsem wanem? Long taim yu stap laip, yu bin lukim truim bilong sampela tok promis bilong Jehova?
Jehova i Kamapim Tok i Tru
11. Wanem samting i soim olsem Jehova i laik givim tok i tru long ol man?
11 Tingim wanpela papa i gat planti save, tasol em i no save toktok tumas wantaim ol pikinini bilong em. Yumi ken amamas Jehova i no wankain olsem dispela papa, a? Long gutpela pasin laikim Jehova i save givim planti tok long ol man. Jehova em Nambawan Tisa bilong yumi. (Aisaia 30:20) Na tu, em i save wok long givim tok bilong em long ol man i no laik harim tok bilong em. Olsem: Esekiel i bin kisim wok bilong autim tok long ol man em Jehova i save pinis ol i no inap harim tok. Jehova i tok: “Man bilong graun, yu go long ol manmeri bilong Israel na autim olgeta tok mi givim yu.” Na em i toksave: “I no gat wanpela bilong ol bai i bihainim tok bilong yu. Ol i no save harim tok bilong mi yet, na olsem wanem bai ol inap harim tok bilong yu? Long wanem, het bilong ol i strong olsem ston na olgeta i man bilong sakim tok tasol.” Dispela wok i gat hatwok long en, tasol Esekiel i mekim gut, na long mekim olsem, em i kamapim pasin bilong Jehova long sori long ol. Sapos yu yet i mas autim tok long wanpela hap i gat hatwok long en na yu wetim God i helpim yu, orait yu ken bilip tru olsem em bai strongim yu wankain olsem em i bin strongim profet bilong em Esekiel.—Esekiel 3:4, 7-9.
12, 13. God i bin kamapim tingting bilong em long ol man long wanem ol rot?
12 Jehova i laik “kisim bek olgeta manmeri, bai ol i ken save long as bilong tok tru.” (1 Timoti 2:4) Em i bin toktok long rot bilong ol profet, na ol ensel, na long rot bilong gutpela Pikinini bilong em, Jisas Krais. (Hibru 1:1, 2; 2:2) Jisas i tokim Pailat: “Mama i karim mi na mi kam long dispela graun bilong mekim wanpela wok tasol, em bilong autim tok tru, bai olgeta manmeri i ken harim. Na olgeta man i bihainim tok tru, ol i save harim tok bilong mi.” Pailat i gat gutpela rot—long maus bilong Pikinini yet bilong God—long save long samting Jehova i bin putim bilong kisim bek ol man. Tasol Pailat i no stap long sait bilong tok i tru, na em i no laik bai Jisas i lainim em. Long pasin i makim olsem i no gat rot long save long tok i tru, Pailat i tok: “Tok tru, em wanem samting tru?” (Jon 18:37, 38) Sori tru, Pailat i no laik save long tok i tru! Tasol i gat planti man i putim yau long tok i tru Jisas i autim. Jisas i tokim ol disaipel: “Yupela i ken amamas. Ai bilong yupela i save lukim ol samting. Na yau bilong yupela i save harim tok.”—Matyu 13:16.
13 Jehova i bin lukautim gut tok i tru long rot bilong Baibel na ol man long olgeta hap inap kisim. Baibel i kamapim tok i tru bilong ol samting. Baibel i stori long ol pasin bilong God, na ol samting em i tingting pinis long mekim, na ol lo bilong em, na i stap bilong ol man hia long graun. Jisas i beten tokim Jehova: “Tok bilong yu i tru olgeta.” (Jon 17:17) Dispela i mekim na Baibel em narapela kain buk. Em dispela wanpela buk tasol em God i save long olgeta samting i bin kirapim ol man long raitim. (2 Timoti 3:16) Baibel em wanpela gutpela presen tru em i bin givim long ol man, na ol wokboi bilong God i save tingim tru. Yumi bihainim savepasin sapos yumi ritim long olgeta de.
Holimpas Tok i Tru
14. Wanem sampela samting Jehova i tok em bai mekim? Bilong wanem yumi ken bilipim ol dispela tok bilong em?
14 Yumi ken bilipim ol samting Jehova i tokim yumi long en long Baibel. Tok em i mekim long em yet em i tru, na samting em i tok em bai mekim, em bai mekim. I gat as na yumi ken bilip tru long God. Yumi ken bilipim tok bilong Jehova taim em i tok em bai “mekim save long ol man i no laik save long God na i no bihainim gutnius bilong Jisas.” (2 Tesalonaika 1:8) Na tu, yumi ken bilipim tok bilong Jehova taim em i tok olsem, em i laikim ol man i bihainim stretpela pasin, na em bai givim laip oltaim long ol man i kamapim bilip bilong ol, na em bai pinisim pen na krai na dai. Bilong strongim dispela laspela promis, Jehova i tokim aposel Jon: “Yu raitim dispela tok. Dispela tok em i tru olgeta, inap olgeta man i ken bilip tru long en.”—KTH 21:4, 5; Sindaun 15:9; Jon 3:36.
15. Wanem sampela tok giaman Satan i save kamapim?
15 Satan em i narapela kain olgeta long Jehova. Satan i save giamanim ol man, em i no helpim ol long kisim save. Em i laik pulim ol man na bai ol i lusim lotu i tru, olsem na em i save kamapim planti tok giaman. Olsem: Satan i laik bai yumi bilip olsem God i stap longwe long yumi na em i no tingim ol hevi long graun. Tasol Baibel i tok, Jehova i save tingim tru ol manmeri na em i no laik tru long ol pasin nogut na hevi. (Aposel 17:24-30) Na Satan i laik bai ol man i bilip olsem pasin bilong mekim ol gutpela wok bilong spirit i no inap helpim tru ol. Tasol Baibel i tok, “God em i no man nogut, na bai em i lusim tingting long ol gutpela wok yupela i bin mekim. Nogat.” Na tu, Baibel i tok klia olsem em i “save mekim gut tru long ol man i wok long painim em.”—Hibru 6:10; 11:6.
16. I gat wanem as na ol Kristen i mas was gut na holimpas tok i tru?
16 Aposel Pol i tok long Satan olsem: “Giaman god bilong dispela graun, em i bin pasim tingting bilong ol dispela man i no bilip, na lait bilong gutnius bilong marimari na sori bilong Krais, em i no inap i go insait long bel bilong ol.” (2 Korin 4:4) Olsem Iv, sampela man i bilipim tok giaman bilong Satan. Na sampela i bihainim pasin bilong Adam. Em i no bilipim tok giaman bilong Satan—long laik bilong em yet em i bihainim pasin bilong sakim tok. (Jut 5, 11) Olsem na i bikpela samting long ol Kristen i mas was gut na holimpas tok i tru.
Jehova i Laik Bai Yumi Mas “Bilip Tru”
17. Yumi mas mekim wanem na bai Jehova i ken mekim gut long yumi?
17 Jehova i save bihainim pasin bilong tok tru long olgeta samting em i mekim, olsem na em i laik bai ol man i lotu long em ol tu i mas tok tru tasol. Man bilong raitim song i tok: “Bikpela, husat inap i stap long haus bilong yu? Husat inap sindaun long Saion, dispela maunten bilong yu yet? Man i bihainim laik bilong God long olgeta samting, na i mekim stretpela pasin oltaim, na i save tok tru oltaim [“long bel bilong em,” NW ], em bai i stap long haus bilong yu.” (Song 15:1, 2) Ol Juda i singim dispela song, ol i tingim maunten Saion, we King Devit i bin bringim bokis kontrak i kam na putim long haus sel em i bin sanapim long dispela hap. (2 Samuel 6:12, 17) Dispela maunten na haus sel i kirapim ol long tingim ples we i olsem Jehova i stap. Long dispela hap ol man inap beten long God na askim em long mekim gut long ol.
18 Ol man i laik stap pren bilong Jehova, ol i mas tok tru oltaim ‘long bel bilong ol’ na i no long maus tasol. Ol pren tru bilong God i mas i gat stretpela bel na ol i mas kamapim klia ol i “bilip tru,” long wanem, pasin bilong mekim tok tru i save kirap long bel. (1 Timoti 1:5; Matyu 12:34, 35) Jehova i “no laikim . . . ol man bilong kusai,” olsem na ol pren bilong God i no save giaman. (Song 5:6) Ol Witnes Bilong Jehova long olgeta hap bilong graun ol i save wok strong long bihainim pasin bilong tok tru tasol olsem God bilong ol i save mekim. Stori i kamap bihain long dispela bai skelim dispela samting.
Bai Yu Bekim Olsem Wanem?
• I gat wanem as na Jehova i save gut tru long olgeta samting?
• Wanem samting i soim olsem Jehova i save tok tru tasol?
• Jehova i bin kamapim tok i tru long wanem ol rot?
• Long ol samting bilong tok i tru, God i laik bai yumi mas mekim wanem?
18. (a) Sapos yumi laik stap pren bilong God, yumi mas mekim wanem? (b) Stori i kam bihain long dispela bai toktok long wanem samting?
[Ol Piksa long pes 10]
God bilong tok tru i save gut tru long olgeta samting em i bin wokim
[Ol Piksa long pes 12, 13]
Olgeta tok promis bilong Jehova bai kamap tru