Ol Elda—Skulim Ol Narapela Long Mekim Wok

LONG ol kongrigesen bilong ol Witnes Bilong Jehova long olgeta hap i mas i gat sampela man moa bilong mekim wok wasman. I gat tripela as bilong dispela samting.

Namba wan as: Jehova i wok long truim tok promis bilong em long mekim “lain i liklik tru bai ol i kamap planti moa.” (Aisaia 60:22) Long pasin marimari bilong God, insait long 3-pela yia i go pinis ol i bin baptaisim klostu wan milion nupela disaipel na ol i kamap Witnes Bilong Jehova. I mas i gat ol man i save mekim gut wok bilong helpim ol dispela nupela baptais long kamap strongpela Kristen.​—⁠Hibru 6:⁠1.

Namba tu as: Sampela brata em ol i bin mekim wok elda inap planti yia pinis, ol i lapun o ol i gat sik na dispela i mekim na ol i mas lusim sampela wok ol i mekim insait long kongrigesen.

Namba tri as: Nau sampela strongpela elda Kristen i mekim wok olsem memba bilong lain Hospital Lieson Komiti, o Komiti Bilong Wokim Ol Haus Kingdom, o Komiti Bilong Wokim Ol Haus Kibung. Olsem na sampela elda i mas lusim sampela wok long kongrigesen bilong ol bambai ol i ken mekim gut olgeta wok bilong ol.

Olsem wanem ol inap kisim sampela brata moa i winim mak bilong mekim wok? Ol i mas skulim ol man. Baibel i kirapim ol wasman Kristen long skulim ol “man i save holim strong tok bilong God, na bai ol inap long skulim ol arapela man tu.” (2 Timoti 2:⁠2) Dispela tok “skulim” i olsem “pasin bilong lainim man bambai em i gat save na em inap tru long mekim wok.” Orait, nau yumi ken skelim ol samting ol elda i ken mekim bilong skulim ol narapela man i winim mak bilong mekim wok.

Bihainim Pasin Bilong Jehova

Jisas Krais em i gat ‘save na em inap tru long mekim wok bilong em.’ Yumi no kirap nogut long dispela, long wanem, God Jehova yet i bin skulim em. Wanem samting i mekim na wok bilong Jehova long skulim em i karim gutpela kaikai? Long Jon 5:​20, Jisas i tok long tripela samting: “Papa i [1] laikim tumas Pikinini na [2] em i save soim em olgeta samting em yet i save mekim. . . . Papa bai i soim Pikinini ol arapela bikpela wok tu, [3] i winim ol dispela wok em i mekim pinis.” Taim yumi skelim ol dispela tripela samting bai yumi kisim gutpela save long wok bilong skulim man.

Tingim tok Jisas i mekim pastaim: “Papa i laikim tumas Pikinini.” Kirap long taim God i wokim olgeta samting, Jehova na Pikinini bilong em ol i pas gut wantaim. Sindaun 8:30 i stori long dispela samting: “Long taim Bikpela i mekim ol dispela wok, mi [Jisas] stap wantaim em [God Jehova] na em i makim mi olsem saveman i bosim wok. Olgeta de mi bin mekim em i amamas, long wanem, mi bin amamas tumas long lukim ol samting em i bin wokim.” Jisas i save tru olsem Jehova “i amamas” long em. Na Jisas i kamapim klia amamas em i kisim taim em i wok wantaim Papa bilong em. Em i gutpela samting tru long ol elda Kristen na ol man ol i skulim ol, ol i pas gut na wok gut wantaim!

Namba tu samting Jisas i tok long en, em Papa “i save soim em olgeta samting em yet i save mekim.” Dispela tok i strongim tok i stap long Sindaun 8:​30, olsem Jisas i “stap wantaim” Jehova taim em i wokim ol samting long heven na graun. (Stat 1:26) Ol elda i ken bihainim dispela gutpela pasin na wok gut wantaim ol kongrigesen sevent, na soim ol long pasin bilong mekim gut wok bilong ol. Tasol i no ol nupela kongrigesen sevent tasol i mas kisim skul, nogat. Olsem wanem long ol gutpela brata em planti yia pinis ol i gat laik long mekim wok wasman, tasol ol brata i no bin makim ol? (1 Timoti 3:⁠1) Ol elda i mas givim sampela gutpela tok long ol kain man olsem bambai ol i ken save long ol samting ol i mas wok strong long mekim.

Olsem: Ating kongrigesen sevent i save kam stret long taim, mekim gut ol wok bilong em, na ol narapela inap bilip long em. Ating em i gutpela tisa tu. Long planti rot em i mekim gutpela wok insait long kongrigesen. Tasol ating em i no luksave olsem em i save mekim strongpela pasin tumas long ol narapela. Ol elda i mas bihainim “pasin bilong gutpela tingting na save.” (Jems 3:13) Elda bai mekim gutpela pasin sapos em i toktok wantaim kongrigesen sevent, kamapim klia dispela pasin, stori long sampela samting i bin kamap na i soim dispela pasin bilong brata, na kamapim sampela gutpela tok i helpim em long stretim dispela pasin. Sapos elda i “mekim gutpela tok tasol, em olkain tok ol man i save laik long harim,” ating brata bai putim yau long tok bilong em. (Kolosi 4:⁠6) Sapos kongrigesen sevent i amamas long harim na kisim tok kaunsel, dispela bai mekim na elda i no hatwok long givim tok long em.​—⁠Song 141:⁠5.

Long sampela kongrigesen, oltaim ol elda i save wok long skulim gut ol kongrigesen sevent. Olsem: Ol i save kisim ol kongrigesen sevent i mekim gut wok i go wantaim ol long lukim ol brata i sik o lapun. Long dispela rot ol kongrigesen sevent i kisim save long mekim wok wasman. I gat planti samting kongrigesen sevent yet i ken mekim bilong kamap strong long ol samting bilong spirit.​—⁠Lukim blok daunbilo “Ol Samting Kongrigesen Sevent i Ken Mekim.”

Namba tri samting i mekim na wok bilong skulim Jisas i karim gutpela kaikai i olsem: Jehova i skulim em bilong mekim ol bikpela wok moa long bihain. Jisas i tok, Papa bai soim Pikinini ol wok “i winim ol dispela wok em i mekim pinis.” Ol samting i painim Jisas taim em i stap long graun i helpim em long kamapim ol pasin em i mas kisim bilong mekim ol wok bilong em long bihain. (Hibru 4:15; 5:​8, 9) Olsem: Klostu nau Jisas bai kisim wanpela bikpela wok tru​—⁠em bai kirapim bek planti bilion manmeri i dai pinis na skelim ol long kot!​—⁠Jon 5:​21, 22.

Taim ol elda i skulim ol kongrigesen sevent long nau, ol i mas tingting long ol wok bai kamap long bihain. Ating nau i gat inap elda na kongrigesen sevent bilong lukautim wok, tasol olsem wanem sapos ol i kamapim wanpela nupela kongrigesen? O sapos ol i kamapim planti nupela kongrigesen? Insait long 3-pela yia i go pinis, winim 6,000 nupela kongrigesen i bin kamap long olgeta hap. Man! I mas i gat planti elda na kongrigesen sevent bilong lukautim ol dispela nupela kongrigesen, a?

Olsem wanem? Yupela ol elda, yupela i save bihainim pasin bilong Jehova na yupela i mekim gutpela pasin pren wantaim ol man yupela i skulim? Yupela i soim ol long pasin bilong mekim wok bilong ol? Yupela i tingting long ol wok i stap bilong mekim long bihain? Sapos yupela i bihainim pasin bilong Jehova taim em i skulim Jisas, planti man bai kisim ol gutpela samting.

No Ken Pret Long Tilim Wok i Go Long Ol Narapela

Ol gutpela elda i lain pinis long mekim planti bikpela wok, ating sampela i no gat laik long tilim sampela bikpela wok i go long ol narapela. Ating ol i bin mekim olsem long bipo, tasol dispela i no bin karim gutpela kaikai. Olsem na ol inap tok: ‘Sapos yu laik bai wok i kamap gutpela, yu yet i mas mekim dispela wok.’ Tasol yu ting dispela kain tingting i stret wantaim laik bilong Jehova em Baibel i kamapim, olsem ol man i no gat bikpela save ol i mas kisim skul long ol man i gat bikpela save long mekim wok?​—⁠2 Timoti 2:⁠2.

Aposel Pol i bel hevi taim Jon Mak, em wanpela man i bin raun wantaim Pol, em i lusim wok bilong em long Pamfilia na i go bek long ples. (Aposel 15:​38, 39) Tasol Pol i no larim dispela samting i mekim em i bel hevi na em i no laik skulim moa ol narapela. Nogat. Em i makim narapela yangpela brata, em Timoti, na em i skulim em long mekim wok misineri.a (Aposel 16:​1-3) Ol man i birua tru long ol misineri long Beria na i no gutpela long Pol i stap moa long dispela hap. Olsem na em i lusim dispela nupela kongrigesen long han bilong Sailas, em wanpela strongpela brata i lapun liklik, na long han bilong Timoti. (Aposel 17:​13-15) Sailas i lainim Timoti long planti samting. Bihain, taim Timoti i redi long mekim sampela wok moa, Pol i salim em i go long Tesalonaika bilong strongim kongrigesen long dispela hap.​—⁠1 Tesalonaika 3:​1-3.

Pasin i stap namel long Pol na Timoti i no olsem bilong tupela bisnisman, em narapela i no tingim narapela​—⁠olsem ol i tingim samting bilong bisnis tasol. Nogat. Tupela i pas gut wantaim. Taim Pol i raitim pas i go long kongrigesen Korin, em i toktok long Timoti olsem “pikinini bilong mi, na mi laikim em tru,” na Pol i tingting long salim em i go long dispela hap. Em i tok moa: “[Timoti] i kirapim gen tingting bilong yupela long ol pasin mi save mekim long i stap pas wantaim Krais.” (1 Korin 4:17) Timoti i pilim tru skul em i kisim long Pol, na em i winim tru mak bilong mekim gut ol wok bilong em. Planti yangpela brata i bin kamap kongrigesen sevent, o elda, o wasman raun, long wanem, ol i bin kisim skul long ol man i lapun liklik na ol i tingim tru ol dispela yangpela man, olsem Pol i bin mekim long Timoti.

Ol Elda, Skulim Ol Narapela!

Tru tumas, truim bilong tok profet bilong Aisaia 60:22 i wok long kamap long nau. Jehova i wok long mekim ‘lain i liklik tru bai ol i kamap planti moa olsem strongpela kantri.’ Bilong dispela lain i ken stap “strongpela,” ol i mas stretim gut ol wok. Yupela ol elda, gutpela sapos yupela i tingting long sampela rot moa bilong skulim ol brata i dediket pinis na i winim mak bilong kisim skul. Tokim olgeta wan wan kongrigesen sevent long ol samting em i mas mekim bambai wok bilong em i ken kamap gutpela moa. Na yupela ol brata i baptais pinis, bihainim ol gutpela tok ol narapela i givim long yupela. Wok strong long kisim sampela save moa, na save gut moa long mekim wok. Jehova bai blesim kain gutpela wok olsem bilong helpim ol narapela.​—⁠Aisaia 61:⁠5.

[Futnot]

[Blok long pes 30]

Ol Samting Kongrigesen Sevent i Ken Mekim

Tru, ol elda i mas skulim ol kongrigesen sevent, tasol i gat planti samting ol kongrigesen sevent yet i ken mekim bilong kamap strong moa long ol samting bilong spirit. Olsem:

—⁠Ol kongrigesen sevent i mas wok strong na mekim tru ol wok bilong ol. Ol i mas kisim tu pasin bilong stadi gut long Baibel. Sapos ol i stadi gut na bihainim ol dispela tok ol i kisim save long en, dispela bai helpim ol long kamap strong long ol samting bilong spirit.

—⁠Taim kongrigesen sevent i redim tok bilong mekim long miting Kristen, gutpela sapos em i askim wanpela elda i gat save long givim sampela gutpela tingting long em long pasin bilong mekim tok.

—⁠Kongrigesen sevent inap askim tu wanpela elda long lukim gut pasin bilong em long mekim tok bilong Baibel, na kamapim sampela tok kaunsel bilong helpim em long mekim tok i kamap gutpela moa.

Ol kongrigesen sevent i mas askim ol elda long givim sampela tok kaunsel long ol, na ol i mas harim na bihainim dispela tok. Long dispela rot ‘olgeta manmeri bai lukim pasin bilong ol i kamap gutpela tru.’​—⁠1 Timoti 4:15.