Jehova i Skulim Ol Wasman Bilong Lukautim Ol Sipsip Bilong Em
“Bikpela yet em i as bilong gutpela tingting. Na em i save givim gutpela tingting na save long yumi.”—SINDAUN 2:6.
1, 2. Wanem as na ol man i baptais pinis i gat laik long mekim bikpela wok moa insait long kongrigesen?
NICK, husat i mekim wok wasman inap 7-pela yia pinis, i tok: “Mi bin amamas tru taim ol i makim mi long mekim wok elda. Mi ting dispela gutpela wok em i wanpela rot we mi inap mekim bikpela wok moa bilong Jehova. Mi pilim olsem mi gat dinau mi mas bekim long em long ol gutpela samting em i bin mekim bilong helpim mi. Na tu, mi gat laik tru long helpim ol arapela insait long kongrigesen. Mi laik helpim ol olsem ol elda i bin helpim mi.” Em i amamas, tasol em i tingting planti long sampela samting. Nick i tok moa: “Taim ol i makim mi long kamap elda, mi no winim yet 30 krismas. Olsem na mi tingting planti, mi gat savetingting na pasin bilong skelim gut ol samting o nogat? Em ol pasin wasman i mas i gat bilong lukautim gut kongrigesen.”
2 Ol man Jehova i makim bilong lukautim lain sipsip bilong em i gat planti as na ol i ken amamas. Aposel Pol i kirapim ol elda bilong Efesus long tingim wanpela as taim em i kolim tok bilong Jisas, em i tok: “Amamas bilong man i givim samting long ol arapela man, dispela i winim amamas bilong man i kisim samting bilong em yet.” (Aposel 20:35) Taim ol man i baptais pinis ol i mekim wok olsem kongrigesen sevan o elda em i narapela rot we ol i ken givim samting long Jehova na long kongrigesen. Olsem: Ol kongrigesen sevan i save helpim ol elda. Ol i save mekim planti wok, em ol wok i save kisim bikpela haptaim. Ol i laikim God na ol narapela man na dispela i kirapim ol long mekim dispela gutpela wok.—Mak 12:30, 31.
3. Bilong wanem sampela i surik liklik long kisim wok insait long kongrigesen?
3 Tasol olsem wanem long wanpela man Kristen husat i surik liklik long kisim wok kongrigesen sevan na bihain wok elda, long wanem, em i pilim olsem em i no inap winim mak? Olsem Nick, ating em i tingting planti na ting olsem em i sot long sampela save o pasin bilong mekim gut wok wasman. Olsem wanem? Yu wanpela brata i baptais pinis, na yu gat kain tingting olsem? I stret yu mas tingting long dispela samting. Jehova bai skelim wok ol wasman i mekim bilong lukautim lain sipsip. Jisas i tok: “Ol man i kisim planti samting, ol i mas bekim planti samting gen. Sapos ol manmeri i putim planti samting long han bilong wanpela man, orait ol bai i tokim em long bekim planti samting moa.”—Luk 12:48.
4. Jehova i save mekim wanem bilong helpim ol man em i makim bilong lukautim ol sipsip bilong em?
4 Yumi laik save, Jehova i ting ol man husat em i makim olsem kongrigesen sevan na elda ol i mas mekim dispela bikpela wok long strong bilong ol yet? Nogat, em i save givim gutpela helpim long ol na ol inap mekim gut tru dispela wok. Olsem yumi bin stori pinis long stadi paslain long dispela, Jehova i save givim holi spirit long ol dispela brata. Ol pasin holi spirit i as bilong en i save helpim ol brata long lukautim gut ol sipsip. (Aposel 20:28; Galesia 5:22, 23) Na tu, Jehova i save givim save, savetingting, na pasin bilong skelim gut ol samting long ol. (Sindaun 2:6) Em i mekim olsem wanem? Yumi laik stori long 3-pela rot we Jehova i save skulim ol man em i makim bilong lukautim ol sipsip bilong em.
Ol Wasman i Gat Save i Skulim Ol
5. Wanem samting i mekim na Pita na Jon i mekim gut wok wasman?
5 Taim aposel Pita na Jon i sanap long ai bilong Sanhedrin, ol dispela jas i ting tupela ‘i no bin skul na ol i man nating tasol.’ Tru, ol inap rit rait, tasol ol i no bin kisim skul long pasin bilong stadi long Baibel long ol bikpela skul bilong ol tisa bilong lotu Juda. Tasol maski i olsem, Pita na Jon na ol arapela disaipel i bin kamapim long ples klia olsem ol i save mekim gutpela wok tisa. Ol i bin kirapim planti man husat i putim yau long tok bilong ol long kamap Kristen. Olsem wanem na ol dispela man nating i bin kamap ol gutpela tisa? Bihain long ol i harim tok bilong Pita na Jon, ol jas i luksave olsem “bipo tupela i stap wantaim Jisas.” (Aposel 4:1-4, 13) Ol i bin kisim holi spirit. (Aposel 1:8) Tasol wanpela samting i stap ples klia na ol dispela jas husat i no kliagut long tok i tru, ol tu i luksave long dispela samting. Em olsem: Jisas i bin skulim ol dispela man. Taim em i stap wantaim ol hia long graun, Jisas i bin skulim ol aposel long pasin bilong bungim ol man i olsem sipsip, na tu, em i skulim ol long pasin bilong lukautim ol taim ol i kam insait long lain sipsip.—Matyu 11:29; 20:24-28; 1 Pita 5:4.
6. Jisas na Pol i bin mekim wanem na ol i stap gutpela piksa long pasin bilong skulim ol arapela?
6 Bihain long Jisas i kirap bek, em i wok yet long skulim ol man husat em i bin makim long mekim wok wasman. (KTH 1:1; 2:1–3:22) Olsem: Em yet i makim Pol na em i bosim wok bilong skulim em. (Aposel 22:6-10) Pol i pilim tru skul em i kisim na em i skulim ol arapela elda long ol save em i bin kisim. (Aposel 20:17-35) Olsem: Em i lusim bikpela haptaim na strong bilong skulim Timoti long kamap “wokman tru” bilong God, na bai em i “no gat sem long ai bilong [God].” (2 Timoti 2:15) Dispela tupela man i kamap gutpela poroman tru. Pastaim, Pol i bin tok long Timoti: “Yupela i save, em i bin helpim mi long wok bilong gutnius, olsem pikinini i save helpim papa.” (Filipai 2:22) Pol i no laik mekim Timoti o ol arapela manmeri i kamap disaipel bilong em yet. Nogat. Em i strongim ol wanbilip long ‘bihainim pasin bilong em na wokabaut, olsem em tu i save bihainim pasin bilong Krais na wokabaut.’—1 Korin 11:1.
7, 8. (a) Wanem ekspiriens i soim olsem gutpela samting i save kamap taim ol elda i bihainim pasin bilong Jisas na Pol? (b) Ol elda i mas kirap long wanem taim long skulim ol brata em bihain ol i ken kisim wok kongrigesen sevan na elda?
7 Ol wasman i gat save ol i bihainim pasin bilong Jisas na Pol, na ol i go pas long skulim ol brata i baptais pinis, na dispela i karim gutpela kaikai. Tingim samting i bin painim Chad. Em i go bikpela insait long wanpela famili i no wanbel long lotu, tasol i no longtaim i go pinis em i winim mak bilong mekim wok elda. Em i tok: “Insait long planti yia i gat sampela gutpela elda i bin helpim mi long kamap strong long tok i tru. Papa bilong mi i no wanbilip, olsem na ol dispela elda i bin helpim mi na ol i kamap olsem ol papa bilong mi long ol samting bilong lotu. Ol i lusim haptaim long skulim mi long autim tok, na bihain, wanpela elda i skulim mi long mekim ol wok bilong kongrigesen mi bin kisim.”
8 Olsem ekspiriens bilong Chad i kamapim, ol wasman i gat pasin bilong skelim gut ol samting ol i save kirap skulim ol brata paslain tru long taim ol dispela brata inap winim ol mak bilong kisim wok olsem kongrigesen sevan na elda. Bilong wanem ol i mekim olsem? Bikos Baibel i tok ol kongrigesen sevan na ol elda i mas winim ol mak Baibel i kolim na bihainim stretpela pasin paslain long ol i makim ol long mekim dispela wok. Pastaim ol elda i mas “traim wok bilong ol.”—1 Timoti 3:1-10.
9. Ol gutpela wasman i gat wanem wok? Bilong wanem ol i mas mekim dispela wok?
9 Sapos ol elda i laik traim wok bilong ol brata i baptais pinis, orait i stret ol dispela brata i mas kisim skul pastaim. Olsem: Sapos wanpela stiuden bai mekim wanpela eksem i hatwok, tasol ol tisa i no bin skulim em long ol samting bai kamap long eksem, yu ting stiuden bai winim eksem? Yumi ken tok, em bai feil, a? Olsem na man i mas kisim skul. Tasol ol gutpela tisa i no skulim ol stiuden long winim wanpela eksem tasol, nogat, ol tisa bai skulim ol stiuden long yusim save ol i kisim pinis. Na olsem tasol ol gutpela elda i save helpim ol brata i baptais pinis long kisim ol pasin ol man i mas i gat bilong kamap wanpela kongrigesen sevan o elda. Na ol i mekim olsem long rot bilong givim skul i stret long ol. Ol i skulim ol olsem bilong helpim ol dispela brata long winim mak bilong mekim wok, na tu, bilong helpim ol long lukautim gut lain sipsip. (2 Timoti 2:2) Ol brata i baptais pinis ol i mas wok strong long winim ol mak bilong mekim wok kongrigesen sevan o elda. (Taitus 1:5-9) Tasol taim ol i amamas long skulim ol brata husat i laik mekim wok insait long kongrigesen, ol wasman i gat save inap helpim ol dispela brata long kamap strong hariap.
10, 11. Ol wasman i ken mekim wanem bilong skulim ol arapela long wok ol inap mekim long bihain?
10 Orait olsem wanem ol wasman i gat save ol inap skulim ol arapela long mekim wok insait long kongrigesen? Pastaim ol i mas soim olsem ol i tingim ol brata long kongrigesen. Oltaim ol i wok wantaim ol long autim tok na helpim ol long kamap gutpela moa long pasin bilong ol long “autim stret tok tru bilong God.” (2 Timoti 2:15) Ol gutpela wasman i save stori wantaim ol dispela brata long amamas ol i kisim long wok bilong helpim ol narapela na amamas ol i kisim taim ol i putim na winim sampela mak insait long lotu i tru. Ol wasman i save kolim stret ol samting brata i ken mekim bilong em i ken stap gutpela piksa ol narapela i ken “lukim na bihainim.”—1 Pita 5:3, 5.
11 Taim wanpela brata i kamap kongrigesen sevan pinis, ol wasman i gat save ol i wok yet long skulim em. Bruce i bin mekim wok elda klostu 50 yia pinis, em i tok: “Taim ol i makim nupela kongrigesen sevan, mi laik sindaun wantaim em na stori long ol tok wokboi i gat gutpela tingting i bin raitim long wok bilong kongrigesen sevan. Mitupela i ritim ol tok i stori long wok stret dispela brata bai mekim, na mi laik wok wantaim em i go inap long em i save gut long wok em i mas mekim.” Taim wanpela sevan i wok long mekim gut wok bilong em, ol elda i ken kirap skulim em long mekim ol visit bilong strongim ol brata. Bruce i tok moa: “Taim mi kisim wanpela kongrigesen sevan i go wantaim mi long mekim visit bilong wasman, mi save helpim em long makim sampela skripsa bilong strongim na kirapim ol bratasista o famili mipela i laik visitim. Bilong wanpela sevan i ken kamap gutpela wasman em i mas lain long kamapim ol tok bilong Baibel ol bratasista inap pilim tru long bel bilong ol.”—Hibru 4:12; 5:14.
12. Olsem wanem ol wasman i gat save ol inap skulim ol nupela elda?
12 Taim ol nupela wasman i kisim sampela skul moa dispela i save helpim ol tu. Nick, em yumi stori pinis long em, i tok: “Skul mi kisim long tupela wasman, em krismas bilong ol i antap long mi, i bin helpim mi gut. Tupela brata hia i kliagut long pasin bilong mekim ol samting. Olgeta taim ol i bihainim pasin isi na putim yau long tok mi mekim na skelim gut tingting mi kamapim—maski ol i no wanbel long dispela tingting. Mi lainim planti samting taim mi lukim ol i bihainim pasin daun na soim rispek taim ol i wok long helpim ol bratasista bilong kongrigesen. Dispela tupela elda i helpim mi long save olsem mi mas mekim gutpela wok long Baibel taim mi laik stretim ol hevi o taim mi mekim tok bilong strongim ol narapela.”
Baibel i Skulim Ol
13. (a) Bilong mekim gut wok wasman, brata i mas i gat wanem save? (b) Bilong wanem Jisas i tok: “Dispela tok mi givim yupela, em i no bilong mi yet”?
13 Tru tumas, insait long Tok Bilong God, em Baibel, i gat ol lo, ol stiatok, na ol stori bilong helpim ol wasman long ‘kisim tru olgeta gutpela pasin, na mekim em i redi long mekim olgeta kain gutpela wok.’ (2 Timoti 3:16, 17) Ating brata i bin kisim gutpela skul bilong graun, tasol save bilong em long Baibel na pasin bilong em long bihainim dispela save i helpim em long mekim gutpela wok wasman. Tingim pasin bilong Jisas. Save, pasin bilong skelim gut ol samting, na savetingting bilong em i winim olgeta narapela wasman i bin i stap long graun; tasol em i no bilip long savetingting bilong em yet taim em i skulim ol sipsip bilong Jehova. Em i tok: “Dispela tok mi givim yupela, em i no bilong mi yet. Nogat. Em i bilong God, em i bin salim mi na mi kam.” Bilong wanem Jisas i givim biknem long Papa bilong em long heven? Em i tok: “Man i mekim toktok long tingting bilong em yet, em i laik litimapim nem bilong em yet.”—Jon 7:16, 18.
14. Ol wasman i save mekim wanem na bai ol i no litimapim nem bilong ol yet?
14 Ol gutpela wasman i no laik litimapim nem bilong ol yet. Ol tok kaunsel na tok bilong strongim narapela ol i kisim long Tok Bilong God, i no long tingting bilong ol yet. Ol i save em wok bilong wasman long helpim ol sipsip long kisim “tingting bilong Krais,” i no tingting bilong ol elda. (1 Korin 2:14-16) Olsem: Olsem wanem sapos wanpela elda husat i wok long helpim tupela marit i gat hevi insait long marit bilong ol, na as bilong ol tok em i givim ol em ol samting i bin painim dispela elda yet na i no ol stiatok bilong Baibel na ol tok “wokboi i gat gutpela tingting” i bin kamapim long ol buk samting? (Matyu 24:45) Ating pasin bilong ples i as bilong ol tok em i mekim, na ating save bilong em i sot. Tru, sampela pasin bilong ples i no gat rong long en, na ating dispela elda i gat planti save long ol samting i save painim ol man. Tasol ol sipsip i kisim gutpela helpim moa taim ol wasman i strongim ol long bihainim tok bilong Jisas na Jehova, i no tingting bilong ol man na pasin bilong ples.—Song 12:6; Sindaun 3:5, 6.
“Wokboi i Gat Gutpela Tingting” i Skulim Ol
15. Jisas i givim wanem wok long lain “wokboi i gat gutpela tingting”? Wanem wanpela as na ol i bin mekim gutpela wok tru?
15 Ol wasman olsem aposel Pita, Jon, na Pol i insait long wanpela lain Jisas i kolim olsem “wokboi i gat gutpela tingting, na i save mekim gutpela wok oltaim.” Dispela lain wokboi em ol brata bilong Jisas, em God i bin makim ol long holi spirit na ol i stap hia long graun, na ol bai mekim wok king wantaim Krais long heven. (KTH 5:9, 10) Nau long taim bilong las de bilong pasin nogut bilong dispela graun, namba bilong ol brata bilong Krais husat i stap yet long graun i go liklik. Tasol wok Jisas i makim ol long mekim—wok bilong autim gutnius bilong Kingdom paslain long pinis i kamap—em i bikpela wok tru, winim olgeta taim bipo. Tasol maski lain wokboi i go liklik, ol i bin mekim gutpela wok tru! Bilong wanem i olsem? Wanpela as i olsem, ol i bin skulim ol manmeri bilong lain “arapela sipsip” long helpim ol long autim tok na skulim ol man. (Jon 10:16; Matyu 24:14; 25:40) Long nau, ol arapela sipsip i save mekim klostu olgeta dispela wok.
16. Olsem wanem lain wokboi i givim skul long ol brata ol i bin makim bilong mekim wok?
16 Lain wokboi i save givim dispela skul olsem wanem? Long taim bilong ol aposel, ol mausman bilong lain wokboi i gat namba long skulim na makim ol wasman long ol kongrigesen, na ol wasman i bin skulim ol sipsip. (1 Korin 4:17) I wankain long nau. Gavening Bodi—em liklik lain elda em God i bin makim ol long holi spirit, na ol i stap mausman bilong lain wokboi—i givim namba long ol man long skulim na makim ol kongrigesen sevan na ol elda long olgeta kongrigesen long olgeta hap. Na tu, Gavening Bodi i kamapim ol skul bilong skulim ol brata bilong ol Brens Komiti, ol wasman raun, ol elda, na ol kongrigesen sevan. Ol i skulim ol long mekim gut tru wok bilong lukautim ol sipsip. Ol i kisim sampela tok moa bilong stiaim ol long rot bilong ol pas, ol tok i stap long ol Wastaua, na long rot bilong ol narapela buk, olsem buk Oganaisesen Bilong Mekim Laik Bilong Jehova.a
17. (a) Jisas i mekim wanem na dispela i soim olsem em i bilip tru long lain wokboi? (b) Ol wasman i ken mekim wanem bilong soim olsem ol i bilip tru long lain wokboi?
17 Jisas i bilip tru long lain wokboi, olsem na em i makim ol long bosim “olgeta samting bilong en”—olsem olgeta samting bilong lotu i tru hia long graun. (Matyu 24:47) Ol wasman i kamapim long ples klia olsem ol i bilip tru long lain wokboi taim ol i bihainim ol tok ol i kisim long Gavening Bodi. Tru tumas, taim ol wasman i skulim ol narapela, taim ol i larim Tok Bilong God i skulim ol, na taim ol i bihainim ol tok lain wokboi i kamapim, ol i kamapim pasin wanbel namel long lain sipsip. Yumi tenkyu tru long Jehova long pasin bilong em long skulim ol man husat i tingim tru olgeta wan wan bratasista insait long kongrigesen Kristen!
[Futnot]
a Ol Witnes Bilong Jehova i wokim.
Bai Yu Bekim Olsem Wanem?
• Ol gutpela wasman i save skulim ol narapela olsem wanem?
• Bilong wanem ol wasman i no save skulim ol narapela long tingting bilong ol yet?
• Olsem wanem ol wasman i soim olsem ol i bilip tru long lain wokboi? Bilong wanem ol i mekim olsem?
[Ol Piksa long pes 24, 25]
Ol elda Kristen i save skulim ol yangpela man insait long kongrigesen
[Ol Piksa long pes 26]
“Wokboi i gat gutpela tingting” i save givim planti skul long ol elda