Satan—Em i No Wanpela Bilip Kranki Bilong Ol Tumbuna Tasol
“The New Bible Dictionary” i tok: “Long olgeta hap bilong Nupela Testamen ol spirit bilong God na ol gutpela pasin i pait wantaim ol pasin nogut em Satan i bosim. Dispela i no tingting bilong wanpela o tupela man tasol bilong raitim Baibel, nogat; planti ol i gat wankain tingting long dispela samting. . . . Olsem na Nupela Testamen i kamapim klia olsem Satan em i wanpela man nogut i stap tru, na oltaim em i save birua long God na long lain bilong God.”
ORAIT, bilong wanem planti man em ol i tok ol i Kristen—na ol i tok ol i bilip long Baibel—ol i no bilip olsem Satan em i wanpela man i stap tru? Long wanem, ol i no bilip olsem Baibel em i Tok Bilong God. (Jeremaia 8:9) Ol dispela man i tok, ol man i bin raitim Baibel i kamapim tingting bilong ol lain man i bin stap klostu long ol na ol i no kamapim tok i tru bilong God. Wanpela tisa bilong lotu Katolik, Hans Küng, em i tok: “Ol stori nating long Satan wantaim planti tausen spirit nogut bilong em . . . i kam long ol stori tumbuna bilong ol Babilon na i go insait long lotu Juda bilong bipo na long dispela rot em i go insait long Nupela Testamen.”—Buk On Being a Christian.
Tasol Baibel em i no tok bilong ol man tasol, nogat. Em i Tok Bilong God na spirit holi i kamapim ol tok bilong en. Olsem na yumi bihainim savepasin sapos yumi tingim tru tok Baibel i mekim long Satan.—2 Timoti 3:14-17; 2 Pita 1:20, 21.
Jisas i Ting Olsem Wanem Long Satan?
Jisas Krais i bilip olsem Satan i stap tru. I no samting nogut i stap insait long Jisas yet i pulim em long mekim sin. Wanpela man tru i traim em, em bihain Jisas i kolim dispela man olsem “hetman i save bosim dispela graun.” (Jon 14:30; Matyu 4:1-11) Jisas i bilip tu olsem sampela narapela spirit i helpim Satan long mekim ol wok nogut bilong em. Em i oraitim ol man “i gat spirit nogut i stap” long ol. (Matyu 12:22-28) Wanpela buk (A Rationalist Encyclopædia) bilong ol man i no bilip long God i stori long dispela samting olsem: “Oltaim ol tisa bilong lotu i save tingting planti long tok bilong ol Gutnius olsem Jisas i bilip long ol spirit nogut.” Taim Jisas i toktok long Satan na ol spirit nogut bilong em, em i no toktok long ol bilip kranki i stap long ol stori tumbuna bilong ol Babilon, em ol stori nating tasol. Em i save olsem ol i stap tru.
Yumi ken kisim planti save long Satan taim yumi tingim tok Jisas i mekim long ol bikman bilong lotu long taim bilong em. Em i tok: “Yupela i pikinini bilong papa bilong yupela, em Satan. Na yupela i strong long bihainim ol laik bilong papa bilong yupela. Bipo yet em i stap man bilong kilim ol man i dai. Na em i no bihainim pasin i tru, long wanem, pasin i tru em i no i stap long em. Tok giaman em i save mekim, dispela em i tok bilong em stret. Em i man bilong tok giaman, na em i papa tru bilong pasin bilong tok giaman.”—Jon 8:44.
Satan (em dispela nem long tok Grik i makim olsem man bilong bagarapim gutnem bilong man) em i ‘man bilong tok giaman, na papa tru bilong pasin bilong tok giaman.’ Em i namba wan man i tok giaman long God, na em i bin mekim olsem long gaden Iden. Jehova i bin tok namba wan man na meri bai “dai” sapos ol i kaikai pikinini bilong diwai bilong givim save long wanem samting i gutpela na wanem samting i nogut. Long rot bilong maus bilong wanpela snek, Satan i tok dispela tok i no tru. (Stat 2:17; 3:4) Olsem na i stret Baibel i kolim em olsem ‘dispela snek bilong bipo yet, ol i kolim em Satan.’—KTH 12:9.
Satan i giaman taim em i toktok long dispela diwai. Em i tok, i no stret long God i tambuim ol long kaikai pikinini bilong dispela diwai; God i mekim wok nogut long namba bilong em. Em i tok, Adam tupela Iv bai “kamap wankain olsem God,” na ol yet i ken makim wanem samting i gutpela na wanem samting i nogut. Satan i tok ol i stap fri long bihainim laik bilong ol yet, olsem na ol yet i ken makim ol samting ol i laik mekim. (Stat 3:1-5) Ol dispela tok bilong kamapim olsem i no stret long God i bosim ol man, i kamapim ol bikpela tok bilong stretim. Olsem na Jehova i bin givim hap taim bilong stretim ol dispela tok. Dispela i mekim na God i larim Satan i stap inap sampela hap taim. Hap taim bilong em i wok long pinis hariap. (KTH 12:12) Tasol em i wok yet long giamanim ol manmeri bilong ol i go longwe long God, na bilong strongim tok bilong em, em i save mekim wok long ol man i olsem ol saveman bilong lo na Farisi long taim bilong Jisas.—Matyu 23:13, 15.
Jisas i tok tu olsem Satan em i “man bilong kilim ol man i dai” na “em i no bihainim pasin i tru.” Dispela i no makim olsem Jehova i wokim Satan long kamap “man bilong kilim ol man i dai.” Baibel i no tok God i wokim Satan i kamap olsem wanpela animal nogut i bosim ples paia na ples bilong givim pen long ol man i birua long God, na tu, Baibel i no tok kain ples olsem i stap. Baibel i soim olsem ol daiman i stap long matmat, ol i no stap long ples paia o long wanpela hap Satan i bosim.—Aposel 2:25-27; KTH 20:13, 14.
Pastaim “pasin i tru” i stap long Satan. Em i bin stap insait long famili bilong Jehova long heven olsem wanpela pikinini spirit bilong God i gutpela olgeta. Tasol em i no “bihainim pasin i tru.” Em i laik bihainim laik bilong em yet na ol tingting giaman bilong em. Em i kamap man nogut taim em i bikhet long Jehova na giamanim Adam tupela Iv, em i no man nogut taim God i wokim em i kamap wanpela ensel, olsem pikinini bilong God. Satan i kain olsem ol man i bikhet long Jehova long taim bilong Moses. Baibel i tok long ol olsem: ‘Ol i manmeri bilong mekim sin tasol. Olsem na ol i no inap i stap lain pikinini bilong God.’ (Lo 32:5) Yumi ken mekim wankain tok long Satan. Taim em i bikhet em i kamap “man bilong kilim ol man i dai,” na em i mekim na Adam tupela Iv, na olgeta lain man ol i dai.—Rom 5:12.
Ol Bikhet Ensel
Sampela narapela ensel i bihainim Satan na ol tu i bikhet long God. (Luk 11:14, 15) Ol dispela ensel i “lusim ples bilong ol,” na ol i tanim i kamap man bilong ol i ken mekim maritpasin wantaim ol “meri” long taim bilong Noa. (Jut 6; Stat 6:1-4; 1 Pita 3:19, 20) “Wanpela lain sta,” olsem wanpela lain ensel i bin bihainim dispela pasin nogut.—KTH 12:4.
Buk Kamapim Tok Hait i gat planti tok piksa long en; em i tok Satan i olsem “wanpela traipela retpela snek.” (KTH 12:3) Bilong wanem Baibel i kolim em olsem? I no olsem skin bilong Satan i luk nogut tru. Yumi no save ol spirit i gat wanem kain bodi, tasol ating Satan i luk wankain tasol olsem ol narapela spirit. Tasol i stret Baibel i kolim Satan i olsem “wanpela traipela retpela snek,” long wanem, em i laik kaikai ol man, ol man i pret long em, em i gat strong, na em i laik bagarapim ol samting.
Nau God i pasim tru Satan na ol spirit nogut bilong em long mekim sampela samting. Ol i no inap tanim i kamap man moa, olsem bipo ol i bin mekim. Taim Kingdom bilong God long han bilong Krais i kamap pinis long heven long 1914, bihain liklik Krais i rausim Satan na ol spirit nogut i kam daun long graun.—KTH 12:7-9.
Satan i Wanpela Birua i Hatwok Long Daunim
Maski God i pasim Satan long mekim sampela samting, em i stap yet olsem wanpela strongpela birua. Em i ‘save raun olsem wanpela laion i singaut strong bilong painim ol manmeri bilong kaikai.’ (1 Pita 5:8) Em i no olsem pasin nogut i stap insait long skin bilong yumi. Tru, long olgeta de yumi pait wantaim ol laik nogut i stap long skin bilong yumi. (Rom 7:18-20) Tasol bikpela pait yumi mas mekim em wantaim ‘ol strongpela spirit i save bosim graun long dispela taim bilong tudak. Yumi pait long olgeta spirit nogut i stap antap.’—Efesus 6:12.
Strong bilong Satan long stiaim ol man i go inap long wanem ol hap? Aposel Jon i tok: “Dispela graun olgeta em i stap aninit long strong bilong Satan.” (1 Jon 5:19) Tasol yumi no laik dispela i mekim na yumi tingting oltaim long Satan, o larim pasin bilong pret nogut tru long em i pasim yumi long mekim ol samting. Yumi bihainim savepasin sapos yumi was gut long ol samting em i mekim bilong yumi no ken tingim tok i tru na yumi lusim pasin bilong i stap gut long God.—Jop 2:3-5; 2 Korin 4:3, 4.
I no olsem olgeta taim Satan i save mekim ol samting nogut bilong pulim ol man i laik mekim laik bilong God. Sampela taim em i tanim em yet i kamap olsem “ensel bilong lait.” Aposel Pol i toksave long ol Kristen long dispela taim na em i tok: “Mi ting long dispela snek i save tumas long pasin bilong giaman, na bipo tru em i bin giamanim Iv, na mi pret, nogut wankain samting i kamap long yupela. Nogut tingting bilong yupela i paul, na yupela i lusim pasin bilong i stap klin na tingting long Krais tasol.”—2 Korin 11:3, 14.
Olsem na yumi mas ‘stap redi na was gut, na stap strong long bilip na sakim em.’ (1 Pita 5:8, 9; 2 Korin 2:11) Yumi no ken larim Satan i giamanim yumi long rot bilong posin marila samting. (Lo 18:10-12) Givim bel long stadi long Tok Bilong God, na tingim olsem oltaim Jisas Krais i bin kamapim tok bilong Baibel taim Satan i traim em. (Matyu 4:4, 7, 10) Beten askim God long givim spirit holi bilong em long yu. Ol pasin dispela spirit i kamapim inap helpim yu long sakim ol pasin bilong olpela bel, em samting Satan i save kirapim planti man long bihainim. (Galesia 5:16-24) Na tu, beten askim Jehova long helpim yu taim Satan o ol spirit nogut bilong em i putim hevi long yu.—Filipai 4:6, 7.
I no gat as na yumi mas pret nogut tru long Satan. Jehova i tok promis long em bai lukautim yumi long ol samting nogut Satan inap mekim. (Song 91:1-4; Sindaun 18:10; Jems 4:7, 8) Aposel Pol i tok: “Yupela i mas tingting long olgeta bikpela strong bilong en, na yupela i mas sanap strong.” Long dispela rot “bai yupela inap long sanap strong na sakim olgeta kain pasin bilong trik na giaman Satan i save hait na mekim.”—Efesus 6:10, 11.
[Piksa long pes 5]
Jisas i save olsem Satan i wanpela man tru
[Piksa long pes 6]
“Dispela graun olgeta em i stap aninit long strong bilong Satan”
[Kredit Lain]
NASA photo
[Ol Piksa long pes 7]
Stadi long Tok Bilong God na beten oltaim bilong sanap strong na sakim Satan