Sapta 2
Bikpela As Tok Bilong Baibel
Kamapim As Bilong Tok Bilong Baibel Inap longtaim pinis ol man bilong givim bel long lainim tok bilong Baibel ol i laik save long as bilong ol tok hait bilong laspela hap bilong Baibel, em Kamapim Tok Hait. Long taim God i makim pinis, dispela save i mas kamap ples klia. Tasol em bai kamap olsem wanem? Na long wanem taim? Na husat i mas kisim dispela save? Spirit bilong God tasol inap kamapim as bilong ol dispela tok hait long taim God i makim. (KTH 1:3) Ol wokboi bilong God long graun i mas kisim dispela save bambai ol inap sanap strong na autim tok long strafe bilong God i laik painim ol man. (Matyu 13:10, 11) I no olsem stori bilong dispela buk nau yu holim i no inap kranki. Nogat. Tasol olsem Josep long bipo, mipela tu i tok: “God tasol i save soim yumi as bilong ol [tok].” (Stat 40:8) Mipela i bilip tru olsem stori bilong dispela buk i stret wantaim olgeta tok bilong Baibel, na i makim olsem ol samting i kamap long graun long dispela taim bilong planti hevi i truim ol tok profet bilong God.
1. Jehova i gat wanem laik?
BAIBEL i tok: “Sapos man i kirapim wanpela wok, orait dispela i gutpela pasin. Tasol sapos em i pinisim dispela wok, orait dispela i win tru.” (Saveman 7:8) Hap bilong Kamapim Tok Hait i stori long ol laspela bikpela samting i mas kamap bilong inapim laik bilong Jehova, em i laik mekim holi nem bilong em long ai bilong olgeta man na ensel. Long maus bilong wanpela profet long bipo, planti taim Jehova i bin tok: “Bai ol i save gut olsem, mi yet mi Bikpela [Jehova].”—Esekiel 25:17; 38:23.
2. Kamapim Tok Hait na ol narapela hap bilong Baibel paslain long en, ol inap givim wanem save long yumi na bai yumi amamas?
2 Hap bilong Kamapim Tok Hait i stori long God i pinisim dispela wok em i laik mekim, na sampela hap bilong Baibel paslain long dispela i stori long God i kirapim dispela wok. Olsem na sapos yumi skelim ol dispela hap bilong Baibel bai yumi inap save long ol bikpela tok i bin kamap, na bai yumi inap save long ol samting God i laik mekim. Sapos yumi kisim dispela save bai yumi amamas! Na dispela save i mas kirapim yumi long mekim ol wok bambai yumi inap i stap long gutpela taim bilong bihain. (Song 145:16, 20) Olsem na i stret yumi mas save long ol samting i bin kamap long pastaim na long bikpela as tok bilong Baibel, bambai yumi ken tingim gut wanpela bikpela tok olgeta manmeri i insait long en, na yumi ken tingim gut ol samting God i laik mekim bilong stretim dispela tok.
3. Wanem tok profet long Stat i kamapim as tok bilong Baibel olgeta na bilong Kamapim Tok Hait tu wantaim?
3 Namba wan hap bilong Baibel, em Stat, em i stori long kirap bilong olgeta samting. Em i stori long God i wokim ol samting, na em i stori long nambawan gutpela samting God i bin wokim long graun, em man yet. Na Stat i kolim namba wan tok profet God i bin mekim long Iden inap olsem 6,000 yia bipo. Long rot bilong wanpela snek Iv i harim sampela tok i giamanim em, na Iv i pulim man bilong em Adam na tupela wantaim i brukim lo bilong Jehova. Tupela i kaikai pikinini bilong “dispela diwai bilong givim gutpela save long wanem samting i gutpela na wanem samting i nogut.” Tasol God i bin tambuim tupela long mekim olsem. Taim God i kolim strafe i mas painim tupela, em i tokim snek: “Na bai mi mekim yu i stap birua bilong meri, na meri i stap birua bilong yu. Na bai mi mekim ol lain bilong yu i birua long lain bilong meri. Bai [em] i krungutim het bilong yu, na bai yu kaikaim lek bilong [em].” (Stat 1:1; 2:17; 3:1-6, 14, 15) Dispela tok profet i kamapim bikpela as tok bilong Baibel olgeta na bilong hap bilong Kamapim Tok Hait tu.
4. (a) God i mekim pinis namba wan tok profet na bihain wanem samting i bin painim namba wan tumbuna papamama bilong yumi? (b) Yumi gat wanem ol askim long dispela namba wan tok profet? Bilong wanem yumi mas save long bekim bilong ol dispela askim?
4 God i mekim pinis dispela tok profet na nau em i rausim namba wan tumbuna papamama bilong yumi long Iden. Tupela i no inap tingting moa long i stap oltaim long Paradais; ol i mas i stap long bus ausait. Bai ol i kamapim ol pikinini i gat sin, na bihain tupela i mas i dai. (Stat 3:23–4:1; Rom 5:12) Tasol wanem insait bilong dispela tok profet God i bin mekim long Iden? Dispela tok profet i makim husat husat? Olsem wanem em i insait long ol samting Kamapim Tok Hait i kolim? Em i givim wanem tingting long yumi long nau? Samting nogut i bin kamap long Iden em i putim planti hevi long yumi na i kirapim Jehova long mekim dispela tok profet, na sapos yumi laik bai ol dispela hevi i tekewe long yumi, orait i bikpela samting yumi mas save long bekim bilong ol dispela askim.
Ol Man Dispela Tok Profet i Makim
5. Snek i giamanim Iv na wanem samting i kamap long nem na wok king bilong God? God bai stretim dispela tok long wanem rot?
5 God i mekim dispela tok profet bilong Stat 3:15 long snek i bin giamanim Iv. Snek i tokim Iv, sapos Iv i sakim tok bilong God em i no ken i dai; bai em inap bosim wokabaut bilong em yet, na bai em i kamap olsem wanpela god meri. I olsem snek i tok Jehova em i man bilong giaman, na sapos ol man i sakim wok king bilong Em, dispela inap helpim ol long i stap gutpela moa. (Stat 3:1-5) Long dispela rot bikpela tok i bin kamap long wok king bilong Jehova, na gutpela nem bilong em i bagarap. Kamapim Tok Hait i stori long ol wok em stretpela Jas Jehova bai mekim long rot bilong Kingdom bilong Krais bilong mekim nem bilong em i stap holi, na bilong kamapim long ples klia olsem em i King tru bilong heven na graun.—KTH 12:10; 14:7.
6. Kamapim Tok Hait i tok wanem na yumi inap save long dispela man em i bin toktok wantaim Iv long maus bilong snek?
6 Dispela tok “snek” i makim wanpela snek tru o olsem wanem? Nogat! Kamapim Tok Hait i helpim yumi bambai yumi ken save long dispela spirit nogut em i bin mekim tok long maus bilong dispela snek. Em i “dispela snek bilong bipo yet, na ol i kolim em Satan . . . Em i man bilong giamanim olgeta manmeri bilong graun,” na “bipo tru em i bin giamanim Iv.”—KTH 12:9; 2 Korin 11:3.
7. Wanem samting i makim olsem dispela meri long Stat 3:15 em i bilong ples spirit?
7 Stat 3:15 i stori long wanpela “meri” tu. Dispela meri em Iv o nogat? Ating Iv i ting dispela tok i makim em. (Lukim Stat 4:1.) Tasol nogat. Iv i dai pinis winim 5,000 yia bipo—em i no bin stap longtaim. Tasol pasin birua i mas i stap longtaim tru namel long Satan na dispela “meri” long tok profet, olsem na Iv i no dispela “meri.” Na dispela Snek em Jehova i toktok long em, em i wanpela spirit yumi no inap lukim, olsem na dispela “meri” long dispela tok profet, em tu i bilong ples spirit. Tok bilong Kamapim Tok Hait 12:1, 2 i kamapim dispela samting long ples klia. Ol dispela tok i makim olsem dispela “meri” em i lain ensel bilong God long heven.—Lukim tu Aisaia 54:1, 5, 13.
Tupela Lain i Birua
8. Bilong wanem yumi mas tingim gut ol tok dispela buk i laik kamapim long tupela lain?
8 Stat 3:15 i stori long tupela lain na yumi mas tingim gut dispela tupela lain, long wanem ol i insait long bikpela tok i bin kamap long Iden olsem: I stret husat i mas i stap nambawan bos bilong olgeta hap? Maski yumi yangpela o yumi lapun, yumi insait long dispela bikpela tok. Orait, taim yu skelim dispela tupela lain, yu laikim wanem lain?
9. Husat ol i hap lain tru bilong Satan?
9 Pastaim yumi ken stori long lain bilong Satan. Husat ol i lain bilong Satan? Hap lain tru bilong em, em ol narapela ensel ol tu i bikhet long God, na bihain ol gutpela ensel i bin ‘tromoi ol i go daun long graun wantaim em.’ (KTH 12:9) Satan o Belsebul em i “hetman bilong ol spirit nogut,” olsem na yumi save ol dispela ensel nogut ol i lain bilong Satan.—Mak 3:22; Efesus 6:12.
10. Baibel i tok wanem na em i makim olsem sampela man moa ol i hap lain bilong Satan?
10 Na Jisas i bin tokim ol hetman bilong lotu Juda long taim bilong em: “Yupela i pikinini bilong papa bilong yupela, em Satan. Na yupela i strong long bihainim ol laik bilong papa bilong yupela.” (Jon 8:44) Ol dispela hetman i birua long Jisas, em Pikinini bilong God, olsem na ol i kamapim long ples klia olsem ol tu i hap lain bilong Satan. Ol i mekim wok bilong Satan, olsem na ol i lain bilong em na em i olsem “papa” bilong ol. Planti narapela man tu, long bipo na long nau, ol i bin bihainim laik bilong Satan, olsem ol i bin birua long ol disaipel bilong Jisas na mekim nogut long ol, na long dispela rot ol i bin kamapim long ples klia olsem ol i lain bilong Satan. Sapos yumi bungim olgeta dispela man wantaim yumi ken tok, ol i lain o oganaisesen bilong Satan long graun.—Lukim Jon 15:20; 16:33; 17:15.
Lain Bilong Meri i Kamap Ples Klia
11. Insait long planti yia God i givim wanem save long ol man bambai ol inap save long lain bilong meri?
11 Tok profet long Stat 3:15 i stori tu long lain bilong meri. Satan i wok long kamapim lain bilong em, na Jehova i redim rot bambai “meri” bilong em, em ol ensel long heven, i ken kamapim wanpela pikinini. Inap olsem 4,000 yia Jehova i wok long givim save long ol man i bihainim tok bilong em bambai ol i ken save long dispela pikinini em bai kam. (Aisaia 46:9, 10) Long dispela rot Abraham na Aisak na Jekop na ol narapela inap bilip tru olsem dispela pikinini bai kamap long lain bilong ol. (Stat 22:15-18; 26:4; 28:14) Ol dispela wokboi bilong Jehova i no lusim bilip liklik, olsem na Satan wantaim lain bilong em ol i save mekim nogut long ol.—Hibru 11:1, 2, 32-38.
12. (a) Wanem taim namba wan pikinini bilong lain bilong meri em i bin kam? Wanem samting i bin kamap long dispela taim? (b) God i kapsaitim spirit holi long Jisas bilong makim em long mekim wanem wok?
12 Na bihain, olsem long yia 29, Jisas, em man i nambawan olgeta, em i go long wara Jordan na kisim baptais. Long dispela taim, Jehova i kapsaitim spirit holi long Jisas na i tok: “Dispela em i Pikinini bilong mi. Mi laikim em tumas.” (Matyu 3:17) Dispela i makim olsem Jisas em i bilong lain bilong God long heven na God i bin salim em i kam. Na long dispela taim God i makim Jisas bilong kamap King bilong Kingdom. Long nem bilong Jehova dispela Kingdom bai kamapim bek wok king bilong Jehova long olgeta hap bilong graun, na dispela bai stretim bikpela tok i bin kamap long husat i mas i stap nambawan bos bilong olgeta hap; em nau, dispela tok i no ken kamap gen. (KTH 11:15) Olsem na Jisas em i namba wan Pikinini bilong lain bilong meri na em i dispela Bikman em God i bin makim na Baibel i tok em i mas kamap.—Lukim Galesia 3:16; Daniel 9:25.
13, 14. (a) Bilong wanem yumi no ken kirap nogut taim yumi kisim save olsem lain o pikinini bilong meri em i no wanpela pikinini tasol i gat biknem? (b) God i makim hamas manmeri olsem ol namba tu pikinini? Ol i wanem kain lain? (c) Husat i wok gut wantaim ol?
13 Lain bilong meri em dispela wanpela pikinini tasol i gat biknem o olsem wanem? Orait, bilong save long dispela samting yumi ken tingim lain bilong Satan. Baibel i makim olsem lain bilong Satan ol i planti, olsem bikpela lain ensel nogut na ol planti planti man ol i save bagarapim nem bilong God. Olsem na yumi no ken kirap nogut taim yumi save God i laik makim 144,000 ol i holimpas lo bilong em, na bai ol i kamap pris na king wantaim dispela namba wan Pikinini, em Krais Jisas. Kamapim Tok Hait i stori long dispela lain na i tok, Satan i birua long “meri” o lain bilong God long heven na “em i go na i laik pait long ol arapela pikinini bilong [meri].”—KTH 12:17; 14:1-4.
14 Ol Kristen God i makim, Baibel i kolim ol olsem ol “brata” bilong Krais. Olsem na ol wantaim Krais ol i gat wanpela Papa tasol na wanpela mama tasol. (Hibru 2:11) God Jehova em i Papa bilong ol, na ol ensel bilong God long heven, olsem “meri” bilong em, i olsem mama bilong ol. Krais Jisas em i namba wan pikinini, na ol dispela brata bilong em i olsem ol namba tu pikinini. Hap lain bilong ol i stap yet long graun na ol i olsem lain bilong God long graun. Ol i mekim wok bilong God long graun aninit long lain o “meri” bilong God i stap long heven. Taim ol i dai na kirap bek, ol i go i stap wantaim Krais Jisas long heven. (Rom 8:14-17; Galesia 3:16, 29) I gat sampela milion “arapela sipsip” ol i wok wantaim dispela lain bilong God long graun, tasol ol i no insait long lain bilong meri. Yu wanpela bilong ol dispela arapela sipsip? Sapos olsem, orait yu ken amamas na wet long kisim laip i stap oltaim long Paradais long graun.—Jon 10:16; 17:1-3.
Pasin Birua i Bin Kamap Olsem Wanem?
15. (a) Stori long olsem wanem lain bilong Satan i bin kamap long graun na long heven. (b) Olsem wanem long lain bilong Satan taim Bikpela Tait Wara i bin kamap long taim bilong Noa?
15 Taim ol man i kamap long pastaim, kwiktaim lain bilong Satan long graun i kamap ples klia. Wanpela em Kein, em namba wan pikinini i bin kamap long graun. Kein “em i man bilong Satan, na em i kilim i dai brata bilong en,” em Abel. (1 Jon 3:12) Bihain Enok i stori long Jehova bai kam ‘wantaim ol planti tausen ensel bilong em na em bai kotim olgeta man na mekim save long ol man i no save bihainim em.’ (Jut 14, 15) Sampela ensel i bikhet ol i bung wantaim Satan na ol i kamap hap lain bilong em. Ol i bin “lusim ples bilong ol” long heven bambai ol i ken tanim i kamap man na kisim ol meri bilong graun. Ol i kamapim ol pikinini ol i traipela man na ol i man bilong pait. Long dispela taim bipo pasin pait na pasin nogut i pulap long graun, olsem na God i bagarapim ol man nogut long Bikpela Tait Wara. Bilipman Noa wantaim lain bilong em ol tasol i abrusim bagarap. Ol ensel i bikhet—em ol i kamap spirit nogut na Satan i bosim ol—ol i mas lusim meri bilong ol long graun na ol hapkas pikinini bilong ol. Ol i tanim i kamap spirit gen na i go bek long ples spirit. Ol i lain bilong Satan na ol i wetim de God i makim bilong givim strafe long ol wantaim Satan. Dispela de i hariap i kam.—Jut 6; Stat 6:4-12; 7:21-23; 2 Pita 2:4, 5.
16. (a) Bihain long Tait wanem hatpela bos em i bin kamap? Em i mekim wanem na yumi ken save, em i lain bilong Satan? (b) God i mekim wanem na ol man i lusim wok bilong sanapim taua bilong Babilon?
16 Bihain liklik long Bikpela Tait Wara wanpela hatpela bos, nem bilong em Nimrot, em i bin kamap long graun. Baibel i tok, Nimrot em i “saveman tru bilong painim abus” na em i save birua long Jehova. Nimrot em i hap lain tru bilong Satan. Nimrot i mekim pasin bikhet olsem Satan i bin mekim. Jehova i laik bai ol man i mas go nabaut long olgeta hap bilong graun, tasol Nimrot i wokim biktaun Babel o Babilon bilong pasim ol i stap long wanpela hap tasol. Namel long dispela biktaun em i laik wokim wanpela longpela taua “i go antap inap long skai.” Tasol God i pasim wok bilong ol—em i paulim tok ples bilong ol, na “em i brukim lain bilong ol na ol i go nabaut nabaut long olgeta hap bilong graun.” Tasol em i larim taun Babilon i stap.—Stat 9:1; 10:8-12; 11:1-9.
Ol Gavman i Kamap
17. Ol man i wok long kamap planti na wanem pasin nogut i bin kamap? Olsem na wanem ol bikpela gavman i bin kamap?
17 Long Babilon ol man i kirapim sampela wok i makim olsem ol i bikhet long wok king bilong Jehova. Wanpela wok olsem em wok politik. Ol man i wok long kamap planti long graun na sampela man i bihainim pasin bilong Nimrot. Ol i laik kamap bikman na ol i kirap bosim ol narapela manmeri. Ol i daunim ol na mekim nogut long ol. (Saveman 8:9) Long taim bilong Abraham, ol king bilong kantri Babilonia na bilong sampela narapela longwe ples, ol i daunim biktaun Sodom na Gomora na sampela biktaun moa i stap klostu, na ol dispela king i bosim ol dispela ples. (Stat 14:1-4) Bihain sampela saveman bilong ami na bilong bosim wok ol i kirap bosim planti hap bilong graun na planti man, na long dispela rot ol i kisim bikpela nem na bikpela mani kago bilong ol yet. Baibel i stori long sampela bikpela gavman olsem i bin kamap, em Isip, Asiria, Babilon, Midia wantaim Persia, Grik, Rom.
18. (a) Lain bilong God i save mekim wanem long ol gavman bilong graun? (b) Ol gavman i bin mekim wanem na sampela taim i olsem ol i mekim wok bilong God? (c) Tasol planti hetman bilong graun i bin mekim wanem na ol i kamapim long ples klia olsem ol i lain bilong Satan?
18 Jehova i larim ol dispela strongpela gavman i kamap, na lain bilong em i save daun long ol gavman i bosim ples ol i stap long en, tasol ol i daun long Jehova, em i nambawan bos bilong ol. (Rom 13:1, 2) Sampela hetman bilong gavman i bin mekim sampela samting i kamapim laik bilong God o i helpim lain bilong God bambai ol i no ken bagarap. (Esra 1:1-4; 7:12-26; Aposel 25:11, 12; KTH 12:15, 16) Tasol planti hetman ol i bin birua tru long ol man i lotuim trupela God, na dispela samting i kamapim long ples klia olsem ol i hap lain bilong Snek.—1 Jon 5:19.
19. Kamapim Tok Hait i tok ol bikpela gavman bilong graun i olsem wanem samting?
19 Wok gavman bilong ol man i no bin helpim yumi ol man long i stap amamas, na i no bin stretim ol hevi i save painim yumi. Jehova i bin larim ol man i traim save bilong ol long bosim graun na ol i bin kamapim kain kain gavman. Tasol Jehova i no orait long pasin nogut na pasin giaman ol gavman i mekim, em ol i bin bosim nogut ol man. (Sindaun 22:22, 23) Kamapim Tok Hait i tok, ol bikpela gavman bilong graun ol i bin putim hevi long ol man, ol i olsem wanpela wel animal nogut i hambak tru.—KTH 13:1, 2.
Ol Man Bilong Bisnis Ol i Tingim Ol Yet Tasol
20, 21. I gat wanem namba tu lain na yumi mas bungim ol wantaim “ol kepten bilong ol soldia” na “ol strongpela man” insait long lain bilong Satan? Olsem wanem na ol tu i hap lain bilong Satan?
20 I gat narapela lain i bin kamap na ol i wok gut wantaim ol hetman politik. Dispela lain em ol bikpela kampani na bisnis ol i no save mekim stretpela pasin. Ol man i painim pinis sampela olpela rait bilong taun Babilon long bipo i stori long wok bisnis ol man i bin mekim. Ol dispela rait i kamapim klia olsem long dispela taim bipo tu sampela bisnisman i bin pulim mani long ol man i stap rabis na putim hevi long ol. Long nau tu ol bikpela kampani na bisnis i tingim ol yet tasol na ol i wok strong long kisim bikpela winmani. Olsem na long planti kantri long nau liklik hap lain tasol ol i kamap maniman, na bikpela hap lain ol i stap rabis. Long taim bilong yumi ol bikpela kampani na bisnis i bin wokim planti samting nogut bilong pait na baim i go long ol gavman na kisim bikpela winmani. Ol manmeri long nau i save tingting planti long ol samting bilong pait ol i bin wokim bilong bagarapim planti manmeri tru. Ol bikpela man bilong bisnis, em ol i mangalim mani, na ol kain man olsem, ol yet wantaim “ol kepten bilong ol soldia” na “ol strongpela man” ol i insait long lain nogut bilong Satan. Olgeta ol i bilong dispela lain bilong graun em God na Krais i skelim ol pinis na ol i mas bagarap.—KTH 19:18.
21 Strafe bilong God bai painim ol gavman nogut na ol bikpela kampani na bisnis i mangalim mani. Na i gat narapela lain tu yumi mas bungim wantaim dispela tupela lain. Em wanem lain? Ating bai yu kirap nogut long ol tok Kamapim Tok Hait i mekim long dispela lain i bosim ol man long olgeta hap.
Bikpela Babilon
22. Wanem kain lotu i bin kamap long Babilon bilong bipo?
22 Taim ol i wokim taun Babilon long pastaim, dispela i no samting bilong wok gavman o wok politik tasol. Nogat. Ol i bikhet long wok king bilong Jehova, olsem na dispela wok ol i mekim em i samting bilong lotu tu. Tru tumas, Babilon bilong bipo em i as ples bilong ol god giaman na lotu giaman. Ol pris bilong Babilon i bin lainim ol man long ol tok i bagarapim nem bilong God; ol i tok yumi gat tewel na taim yumi dai, tewel i stap yet. Na ol i tok ol man i dai pinis ol i stap long wanpela ples nogut tru bilong kisim pen, na ol spirit nogut i bosim dispela ples. Ol dispela pris i bin kirapim ol man long lotuim ol animal samting, na ol i lotuim kain kain god na god meri. Ol i bin kamapim ol stori nating long graun wantaim ol man i bin kamap olsem wanem. Taim ol i mekim lotu ol i save mekim ol pasin i gat sem, na ol ofa nogut. Ol i bilip olsem ol dispela ofa inap helpim ol long kamapim planti pikinini, o gaden bilong ol i ken karim kaikai, o ol i ken winim pait.
23. (a) Taim ol man i lusim Babilon na i go nabaut ol i kisim wanem samting i go wantaim ol? Na wanem samting i bin kamap long dispela rot? (b) Kamapim Tok Hait i kolim wanem nem long olgeta lotu giaman? (c) Long olgeta taim lotu giaman i bin pait wantaim wanem samting?
23 Taim God i paulim tok ples bilong ol man, nau ol i lusim Babilon na ol i go nabaut long olgeta hap bilong graun. Ol i kisim lotu bilong Babilon i go wantaim ol. Olsem na ol lain i go sindaun pastaim long hap bilong Yurop na Afrika na Amerika na Esia na Pasifik ol i bihainim ol pasin bilong lotu na ol bilip i wankain olsem bilong ol Babilon long bipo. Na planti bilong ol dispela bilip i stap yet. Olsem na i stret Kamapim Tok Hait i kolim olgeta lotu giaman wantaim olsem Bikpela Taun Babilon. (KTH, sapta 17, 18) Long olgeta hap em lotu giaman i bin kamap long en, long ol dispela hap i gat ol pris i mekim hatpela pasin long ol man, na i gat ol bilip giaman, na ol man i no gat save, na pasin pamuk samting. Lotu giaman i olsem strongpela samting bilong mekim wok bilong Satan. Bikpela Babilon i wok strong oltaim long biruaim lotu i tru bilong Nambawan Bikpela King Jehova.
24. (a) Olsem wanem Snek i bin “kaikaim lek” bilong Pikinini bilong meri? (b) Bilong wanem Baibel i tok Snek i kaikaim lek tasol bilong dispela Pikinini?
24 Ol saveman bilong lo na ol Farisi long lotu Juda long taim bilong ol aposel ol i hap lain bilong Satan na ol i gat bikpela asua, long wanem ol i bin go pas long mekim nogut long namba wan pikinini long lain bilong meri. Na bihain ol i kilim em i dai. Long dispela rot Snek i bin “kaikaim lek bilong [dispela pikinini bilong meri].” (Stat 3:15; Jon 8:39-44; Aposel 3:12, 15) Bilong wanem Baibel i tok, em i kaikaim lek tasol? Long wanem dispela samting i bagarapim dispela Pikinini, em Jisas, inap liklik taim tasol hia long graun. Dispela i no bagarapim em olgeta, long wanem long namba 3 de Jehova i bin kirapim bek em na givim laip na biknem long em long heven.—Aposel 2:32, 33; 1 Pita 3:18.
25. (a) Jisas i kisim pinis biknem long heven na em i mekim pinis wanem wok bilong daunim Satan na ol ensel bilong Satan? (b) Wanem taim bai God i rausim lain bilong Satan long graun? (c) Wanem samting bai painim Satan taim Pikinini bilong meri bilong God i krungutim “het” bilong em?
25 Nau Krais Jisas i kisim pinis biknem long heven na em i stap long han sut bilong God na mekim wok; em i skelim long kot ol birua bilong Jehova. Em i kirap pinis long mekim wok bilong daunim Satan—em i tromoi Satan wantaim ol ensel bilong Satan i kam daun pinis long graun. Nau ol inap mekim wok long hap bilong graun tasol, olsem na bikpela hevi moa yet i kamap long graun long nau. (KTH 12:9, 12) Tasol bihain bai God i rausim lain bilong Satan olgeta long graun—bai em i givim strafe long Bikpela Babilon na olgeta narapela hap bilong lain bilong Satan long graun. Na las tru Pikinini bilong meri bilong God, em Krais Jisas, em bai krungutim “het” bilong Satan, dispela snek bilong bipo yet em i save tumas long pasin bilong giaman. Bai Satan i pinis olgeta na i no inap mekim sampela wok moa long ol man.—Rom 16:20.
26. Bilong wanem i bikpela samting long yumi mas kisim save long tok profet bilong Kamapim Tok Hait?
26 Olgeta dispela samting bai kamap olsem wanem? Em nau, hap bilong Kamapim Tok Hait long Baibel i kamapim ol dispela samting long ples klia long rot bilong ol driman na ol bikpela mak na piksa. Orait, nau yumi ken givim bel long kisim save long dispela strongpela tok profet. Sapos yumi harim na bihainim ol dispela tok long Kamapim Tok Hait, yumi ken amamas! Sapos yumi mekim olsem, bai yumi litimapim nem bilong Nambawan Bikpela King Jehova, na bai yumi inap kisim ol blesing bilong em i bilong i stap oltaim. Plis, kaunim dispela buk i go moa na bihainim gut ol tok yu lainim. Sapos yu mekim olsem, dispela inap helpim yu na taim pinis tru i kamap, orait bai yu inap kisim laip i stap oltaim.
[Blok/Piksa long pes 13]
Olpela rait i stori long sampela wok bisnis bilong bipo
Wanpela buk (Ancient Near Eastern Texts, bilong James B. Pritchard) i kolim 300 lo wanpela man, nem bilong em Hamurabi, em i bin kamapim long taim bilong ol Babilon. Ol dispela lo i kamapim klia olsem long dispela taim bilong bipo ol man bilong wok bisnis i save giamanim ol man na pulim mani long ol na i mas i gat lo bilong pasim ol. Wanpela lo i tok: “Sapos wanpela bikman i baim silva o gol o wokman o wokmeri o bulmakau o sipsip o donki o narapela samting long pikinini man bilong wanpela bikman o long wokboi bilong wanpela bikman, o ol i givim long em bilong lukautim na i no gat witnes o kontrak, orait dispela bikman em i stilman na ol i mas kilim em i dai.”