No Ken Opim Dua Long Satan

“Nogut yupela i opim dua long Satan.”​—EFESUS 4:27.

 1. Bilong wanem planti man i gat tupela tingting long Satan, olsem em i stap tru o nogat?

INAP planti handet yia, ol man i ting Satan em wanpela man i gat tupela kom, na kapa bilong han lek i bruk tupela hap, na em i pasim retpela klos na i holim traipela fok bilong tromoi ol man nogut i go long helpaia. Baibel i no stori olsem long Satan. Tasol ol kain tingting kranki olsem i bin kirapim planti milion man long kisim tupela tingting, olsem Satan i stap tru o nogat; o ol i ting dispela nem Satan i makim pasin nogut i stap long bel bilong man.

 2. Baibel i mekim wanem sampela tok tru long Satan?

² Baibel i kamapim klia ol samting i soim olsem Satan i stap tru na i tokaut long wanpela man i bin lukim Satan. Jisas Krais i bin lukim em long ples spirit long heven na em i bin toktok wantaim em long graun. (Jop 1:6; Matyu 4:​4-11) Baibel i no tokaut long nem tru bilong dispela spirit, tasol Baibel i kolim em Devil (olsem “Man bilong bagarapim gutnem bilong narapela”), long wanem, em i bin sutim tok giaman long God, na em i kolim em tu Satan (olsem “Birua”), long wanem, em i biruaim Jehova. Na tu, Baibel i kolim em olsem “dispela snek bilong bipo yet,” long wanem, em i bin giamanim Iv long rot bilong wanpela snek. (KTH 12:9; 1 Timoti 2:14) Na sampela Baibel i kolim em tu olsem “dispela man nogut.”​—Matyu 6:​13, NW.a

 3. Bai yumi skelim wanem askim?

³ Yumi ol wokman bilong Jehova i no laik tru long bihainim pasin bilong Satan, em i nambawan birua bilong dispela wanpela God tru. Olsem na yumi mas harim gut tok bilong aposel Pol, em i tok: “Nogut yupela i opim dua long Satan.” (Efesus 4:27) Orait wanem sampela pasin bilong Satan yumi no ken bihainim?

No Ken Bagarapim Gutnem Bilong Narapela

 4. Olsem wanem Devil i bagarapim gutnem bilong God?

⁴ I stret dispela man nogut i kisim nem Devil, long wanem, em i man bilong bagarapim gutnem bilong narapela, olsem sutim tok giaman na mekim tok nogut long man bilong bagarapim nem bilong em. God i bin tokim Adam: “Yu no ken kaikai pikinini bilong dispela diwai bilong givim gutpela save long wanem samting i gutpela na wanem samting i nogut. Sapos yu kaikai, wantu bai yu dai.” (Stat 2:17) Iv i bin kisim toksave long dispela, tasol long rot bilong snek, Satan i tokim em: “Yutupela i no inap i dai. Sapos yutupela i kaikai pikinini bilong dispela diwai, bai ai bilong yutupela i op na yutupela i kisim save long wanem samting i gutpela, na wanem samting i nogut, na bai yutupela i kamap wankain olsem God.” (Stat 3:​4, 5) Dispela em i wanpela tok giaman nogut bilong bagarapim gutnem bilong God Jehova!

 5. Bilong wanem i stret Diotrefes i mas kot long pasin bilong em long bagarapim gutnem bilong narapela?

⁵ God i bin tokim ol Israel: “Yupela i no ken raun long ol wantok na tok baksait long narapela man.” (Wok Pris 19:16) Aposel Jon i stori long wanpela man bilong bagarapim nem bilong narapela long taim bilong em, olsem: “Mi raitim pinis sampela tok long ol manmeri bilong sios. Tasol Diotrefes em i laik i stap namba wan bilong ol, na em i no save harim tok bilong mipela. Olsem na sapos mi kam long yupela, mi bai tokaut long dispela pasin em i mekim. Em i save toktok nabaut long mipela long ol kain kain tok nogut.” (3 Jon 9, 10) Diotrefes i bin bagarapim gutnem bilong Jon, na i stret em i mas kot long dispela pasin. Ol gutpela Kristen i no laik i stap olsem Diotrefes na bihainim pasin bilong Satan, em man bilong bagarapim gutnem bilong narapela.

6, 7. Bilong wanem yumi no ken bagarapim gutnem bilong narapela?

⁶ Planti taim ol man i save bagarapim nem bilong ol wokman bilong Jehova na sutim tok giaman long ol. “Ol bikpris na ol saveman bilong lo i kam sanap klostu na ol i kotim [Jisas] strong tumas.” (Luk 23:10) Hetpris Ananaias na sampela moa i bin sutim tok giaman long Pol. (Aposel 24:​1-8) Na Baibel i tok Satan em i “man bilong kotim ol brata bilong yumi, em i bin kotim ol long ai bilong God bilong yumi long san na long nait.” (KTH 12:10) Ol dispela brata em i sutim tok giaman long ol, em ol Kristen God i bin makim na ol i stap long graun nau long taim bilong las de.

⁷ Ol Kristen i no laik bagarapim gutnem bilong narapela o sutim tok giaman long em. Tasol dispela samting inap kamap sapos yumi sanap long kot na tokaut long man i bin mekim rong, tasol yumi no save tru tru long ol samting i bin kamap. Lo Bilong Moses i tok, sapos long laik bilong em yet man i sutim tok giaman long wanpela man long kot, orait ol bai kilim em i dai. (Kisim Bek 20:16; Lo 19:​15-19) Wanpela samting Jehova i nolaik tru long en, em “pasin bilong tok giaman long kot.” (Sindaun 6:​16-19) Olsem na yumi laik sakim pasin nogut bilong dispela namba wan man bilong sutim tok giaman na bagarapim gutnem bilong narapela.

Sakim Pasin Bilong Nambawan Kilman

 8. Olsem wanem long ‘bipo yet Satan i stap man bilong kilim ol man i dai’?

⁸ Satan em man bilong kilim man i dai. Jisas i tok: “Bipo yet em i stap man bilong kilim ol man i dai.” (Jon 8:44) Kirap long taim em i bin pulim Adam na Iv long lusim God, Satan i bin stap olsem man bilong kilim ol man i dai. Em i mekim na dai i painim namba wan man na meri wantaim ol pikinini bilong ol. (Rom 5:12) Na tingim, man i mekim dispela samting​—i no pasin nogut i stap long bel bilong em i mekim.

 9. Olsem 1 Jon 3:15 i makim, olsem wanem yumi inap kamap man bilong kilim man i dai?

⁹ Wanpela bilong ol Tenpela Lo i tok: “Yupela i no ken kilim i dai ol arapela manmeri.” (Lo 5:17) Aposel Pita i tokim ol Kristen: “Yupela i mas lukaut, nogut ol i givim pen long yupela, long wanem, yupela i bin kilim man i dai.” (1 Pita 4:15) Olsem na yumi ol wokman bilong Jehova i no ken kilim man i dai. Tasol bai yumi gat asua long ai bilong God sapos yumi bel nogut long wanpela Kristen na yumi laik bai em i dai. Aposel Jon i tok: “Man i no laikim tru brata bilong en na i bel nogut long em, i olsem em i kilim man i dai. Na yupela i save, man i kilim narapela man i dai, em i no kisim laip bilong i stap gut oltaim oltaim.” (1 Jon 3:15) God i bin tokim ol Israel: “Yu no ken kros oltaim long [wantok bilong yu] long tingting bilong yu.” (Wok Pris 19:17) Sapos wanpela hevi i kamap namel long yumi na wanpela wanbilip, yumi mas kirap kwik long stretim bambai Satan, em man bilong kilim man i dai, i no ken bagarapim pasin wanbel Kristen i stap namel long yumi.​—Luk 17:​3, 4.

Sakim Nambawan Man Bilong Giaman

10, 11. Yumi mas mekim wanem bilong sanap strong na sakim nambawan man bilong tok giaman, em Satan?

¹⁰ Satan em i man bilong giaman. Jisas i tok: “Tok giaman em i save mekim, dispela em i tok bilong em stret. Em i man bilong tok giaman, na em i papa tru bilong pasin bilong tok giaman.” (Jon 8:44) Satan i bin giamanim Iv, tasol Jisas i bin kam long graun bilong autim tok i tru. (Jon 18:37) Sapos yumi laik sanap strong olsem lain bilong Krais na sakim Satan, yumi no ken tok giaman na giamanim man. Yumi mas “mekim tok tru tasol.” (Sekaraia 8:16; Efesus 4:25) Jehova, em “God bilong mekim pasin tru tasol,” em i save mekim gut long ol Witnes bilong em ol i save tok tru tasol. Ol man nogut i no inap i stap mausman bilong em.​—Song 31:5; 50:16; Aisaia 43:10.

¹¹ Sapos yumi amamas long i stap fri long ol tok giaman bilong Satan, bai yumi holimpas lotu Kristen, em “Rot bilong pasin i tru.” (2 Pita 2:2; Jon 8:32) Olgeta tok bilong lotu Kristen em “tok tru bilong gutnius.” (Galesia 2:​5, 14) Bilong kisim laip i stap oltaim yumi mas “wokabaut long pasin bilong tok tru”​—yumi mas holimpas tok i tru na sanap strong na sakim “papa tru bilong pasin bilong tok giaman.”​—3 Jon 3, 4, 8.

Sakim Man i Go Pas Long Tromoi Bilip i Tru

12, 13. Yumi mas mekim wanem kain pasin long ol man i tromoi bilip i tru?

¹² Dispela ensel i bin kamap Satan, pastaim em i stap long tok i tru. Tasol Jisas i tok, “em i no bihainim pasin i tru, long wanem, pasin i tru em i no i stap long em.” (Jon 8:44) Dispela man i bin go pas long tromoi bilip i tru em i bin strong long bihainim rot bilong sakim “God bilong mekim pasin tru tasol.” Sampela Kristen long taim bilong ol aposel i pundaun long ‘umben bilong Satan,’ long wanem, em i bin giamanim ol na ol i lusim tok i tru. So Pol i tokim wanwok Timoti long stretim tingting bilong ol long pasin isi bambai ol i ken kamap orait gen long ol samting bilong spirit na lusim umben bilong Satan. (2 Timoti 2:​23-26) Tasol mobeta yumi holim strong tok i tru na bai ol man i tromoi bilip i tru, em ol apostet, i no inap kisim yumi long umben bilong ol.

¹³ Namba wan man na meri i bin harim tok bilong Satan na i no sakim ol tok giaman bilong em, na long dispela pasin tupela i tromoi bilip i tru. Olsem na yu ting i stret yumi harim tok bilong ol apostet, o ritim ol buk bilong ol, o skelim tok bilong ol i stap long Intenet? Sapos yumi laikim tru God na tok i tru, bai yumi no mekim olsem. Yumi no ken larim ol apostet i kam insait long haus bilong yumi o tok gude long em, long wanem, sapos yumi mekim olsem, yumi “helpim em long wok nogut bilong em.” (2 Jon 9-11) Yumi mas was gut, nogut yumi larim ol trik na giaman bilong Satan i pulim yumi na yumi lusim rot bilong tok i tru na bihainim ol tisa giaman i laik ‘kamapim ol kain kain tok giaman bilong bagarapim bilip bilong yumi’ na ol “i mekim planti tok giaman” bilong pulim yumi.​—2 Pita 2:​1-3.

14, 15. Pol i givim wanem tok lukaut long ol elda bilong Efesus na wanwok bilong em Timoti?

¹⁴ Pol i bin tokim ol elda Kristen long Efesus: “Yupela i mas was gut long yupela yet, na long olgeta manmeri bilong sios bilong God, em ol dispela manmeri em i bin baim long blut bilong Pikinini bilong em yet. Na Holi Spirit i makim yupela i stap wasman bilong ol dispela sipsip bilong God. Mi save, taim mi lusim yupela na mi go pinis, ol weldok nogut tru bai i kam namel long yupela, na ol bai i bagarapim ol sipsip. Na sampela man bilong yupela yet bai i kirap na mekim tok giaman nabaut, bilong pulim ol manmeri bilong God i go bihainim ol.” (Aposel 20:​28-30) Na tru tumas, bihain ol man i tromoi bilip tru i kamap na ol i “mekim tok giaman nabaut.”

¹⁵ Long 65 C.E. samting, aposel Pol i tokim Timoti long “autim stret tok tru bilong God.” Tasol em i mas “givim baksait long olkain toktok nabaut i no bihainim tingting bilong God. Dispela kain tok bai i bringim ol man i go moa yet long rot bilong givim baksait long God. Dispela kain tok em i olsem sua nogut bilong bagarapim man, na em bai i kamap bikpela tru. Tupela bilong ol man i save mekim dispela kain tok em Himeneus wantaim Filetus. Tupela i lusim pinis rot bilong tok tru, long wanem, tupela i save tok olsem, ‘Yumi kirap bek pinis long matmat, olsem na bihain yumi no inap kirap bek gen.’ Long dispela tok ol i save bagarapim bilip bilong sampela manmeri.” Em nau, pasin apostet i kirap pinis! Pol i tok moa: “Tasol God i planim pinis strongpela pos . . . , na dispela pos i sanap strong i stap.”​—2 Timoti 2:​15-19.

16. Maski Satan i mekim olkain trik na giaman, i gat wanem as na yumi bin stap gut long God na Tok bilong em?

¹⁶ Planti taim Satan i mekim wok long ol apostet bilong em i ken bagarapim lotu i tru, tasol em i no inap. Long 1868 samting, Charles Taze Russell i kirap skelim gut ol bilip i bin i stap longtaim long ol lotu Kristendom, na em i lukim olsem ol i paulim ol tok bilong Baibel. Russell wantaim sampela man i laik painim tok i tru ol i kamapim wanpela grup bilong stadi long Baibel, long Pittsburgh, Pennsylvania, Amerika. Inap olsem 140 yia bihain long en, ol wokman bilong Jehova i save gut moa na i laikim moa yet God na Tok bilong em. Maski Satan i mekim olkain pasin trik na giaman, lain wokboi i gat gutpela tingting i was i stap long ol samting bilong spirit na dispela i bin helpim ol dispela Kristen tru long stap gut long Jehova na Tok bilong em.​—Matyu 24:45.

No Ken Larim Hetman Bilong Graun i Bosim Yu

17-19. Wanem dispela graun i stap aninit long strong bilong Satan? Bilong wanem yumi no ken laikim?

¹⁷ Narapela rot bilong Satan long kisim yumi long umben bilong em, em i laik grisim yumi long laikim pasin bilong dispela graun​—em ol manmeri i no gat stretpela pasin na ol i stap longwe long God. Jisas i kolim Satan olsem “hetman i save bosim dispela graun,” na i tok: “Em i no gat strong bilong mekim wanpela samting long mi.” (Jon 14:30) Yumi no ken larim Satan i bosim yumi! Yumi save, “dispela graun olgeta em i stap aninit long strong bilong Satan.” (1 Jon 5:19) Olsem na Satan inap tok long givim “olgeta strongpela kantri bilong dispela graun” long Jisas sapos em i tromoi bilip i tru na lotuim Satan inap wanpela taim tasol​—tasol Pikinini Bilong God i sakim tru dispela samting. (Matyu 4:​8-10) Dispela graun Satan i bosim i birua tru long lain bilong Krais. (Jon 15:​18-21) Olsem na aposel Jon i mekim tok lukaut olsem yumi no ken laikim pasin bilong dispela graun!

¹⁸ Jon i tok: “Yupela i no ken laikim ol pasin bilong graun na olgeta samting bilong graun. Sapos wanpela man i laikim ol pasin bilong graun, orait em i no save laikim tru Papa. Yumi save, olgeta pasin bilong ol man bilong graun, em pasin bilong bel kirap na aigris na bikhet, ol dispela pasin i no kam long Papa. Nogat. Ol i pasin bilong graun tasol. . . . Olgeta pasin bilong dispela graun, em ol pasin bilong bel i kirap na aigris, ol tu bai i pinis wantaim. Tasol man i bihainim tok bilong God, em bai i stap oltaim.” (1 Jon 2:​15-17) Yumi no ken laikim pasin bilong dispela graun, long wanem, sin i stap long yumi inap pulim yumi long laikim pasin bilong graun em dispela pasin i narapela kain olgeta long ol lo bilong God Jehova.

¹⁹ Tasol olsem wanem sapos bel bilong yumi i laikim pasin bilong dispela graun? Sapos olsem, yumi mas beten askim God long helpim yumi long daunim dispela pasin wantaim ol laik nogut bilong skin. (Galesia 5:​16-21) Bai yumi wok strong na bai “pasin bilong dispela graun i no ken mekim yumi i kamap doti.” Yumi mas tingim olsem “olgeta spirit nogut” ol “i save bosim graun,” olsem ol manmeri i no save bihainim stretpela pasin.​—Jems 1:27; Efesus 6:​11, 12; 2 Korin 4:4.

20. Olsem wanem yumi ken tok, yumi “no bilong dispela graun”?

²⁰ Jisas i tok long ol disaipel bilong em: “Ol i no bilong dispela graun, olsem mi yet mi no bilong dispela graun.” (Jon 17:16) Ol Kristen God i bin makim na ol poroman bilong ol i dediket pinis, ol i wok strong long stap klin long pasin bilong ol na long ol samting bilong spirit, na stap longwe long pasin nogut bilong dispela graun. (Jon 15:19; 17:14; Jems 4:4) Ol lain bilong graun i bel nogut long yumi, long wanem, yumi stap longwe long ol na yumi save “tokaut long stretpela pasin.” (2 Pita 2:5) Tru, yumi stap namel long ol manmeri bilong graun em sampela i save mekim pasin pamuk, brukim marit, pulim nating mani bilong man, lotuim god giaman, stil, tok giaman, na dring spak. (1 Korin 5:​9-11; 6:​9-11; KTH 21:8) Tasol yumi no kisim tingting bilong dispela graun, long wanem, strong bilong en long kirapim ol man long mekim sin i no bosim yumi.​—1 Korin 2:12.

No Ken Opim Dua Long Satan

21, 22. Olsem wanem yu ken bihainim tok bilong Pol long Efesus 4:​26, 27?

²¹ Tingting bilong ol man bilong dispela graun i no bosim yumi, nogat; spirit bilong God i stiaim yumi, na em i save kamapim pasin laikim na bosim gut bel. (Galesia 5:​22, 23) Ol dispela pasin i helpim yumi long sanap strong na sakim ol samting Satan i mekim bilong bagarapim bilip bilong yumi. Em i laik bai yumi “belhat” na mekim pasin nogut, tasol spirit bilong God i save helpim yumi long lusim ‘kros na pasin bilong belhat.’ (Song 37:8) Tru, sampela taim i gat as na yumi kros, tasol Pol i tok: “Sapos bel bilong yupela i hat, orait yupela lukaut. Nogut yupela i mekim sin. Nogut yupela i belhat yet i stap na san i go daun. Nogut yupela i opim dua long Satan.”​—Efesus 4:​26, 27.

²² Kros inap kirapim yumi long mekim sin sapos yumi belhat yet i stap. Sapos yumi gat dispela kain tingting, yumi givim rot long Satan long kirapim kros insait long kongrigesen o kirapim yumi long mekim sampela pasin nogut. Olsem na sapos yumi gat kros wantaim narapela, yumi mas stretim kwik long pasin God i laikim. (Wok Pris 19:​17, 18; Matyu 5:​23, 24; 18:​15, 16) Em nau, yumi mas larim spirit bilong God i soim rot long yumi, na bosim gut skin, na maski i gat as na yumi kros, yumi no ken larim kros i go bikpela na yumi bel nogut, birua, na tingting long mekim nogut long narapela.

23. Bai yumi skelim wanem ol askim long stadi i kamap bihain long dispela?

²³ Yumi bin toktok long sampela pasin bilong Satan yumi no ken bihainim. Tasol sampela inap tingting: Yumi mas pret long Satan? Bilong wanem em i save kirapim ol man long mekim nogut long ol Kristen? Na yumi ken mekim wanem na bai Satan i no inap winim yumi?

[Futnot]

Wanem Bekim Bilong Yu?

• Bilong wanem yumi no ken bagarapim gutnem bilong narapela?

• Olsem 1 Jon 3:15 i tok, yumi mas mekim wanem na bai yumi no kamap kilman?

• Yumi mas ting olsem wanem long ol man i tromoi bilip i tru? Bilong wanem yumi mas ting olsem?

• Bilong wanem yumi no ken laikim pasin bilong graun?

[Piksa long pes 23]

Yumi no ken larim Satan i bagarapim pasin wanbel Kristen bilong yumi

[Ol Piksa long pes 24]

Bilong wanem Jon i tok yumi no ken laikim pasin bilong graun?