Baibel i Tok Wanem?

I Gat Rong Long Krai Sori Taim Wanpela i Dai?

“OL BRATA, MIPELA I LAIK BAI YUPELA I KEN SAVE GUT LONG WANEM OL SAMTING BAI I KAMAP LONG OL MANMERI I DAI PINIS. NOGUT YUPELA I SORI TUMAS, OLSEM OL ARAPELA MANMERI I NO BILIP LONG GOD NA I NO WETIM TAIM BILONG KIRAP BEK LONG MATMAT.”​—⁠1 TESALONAIKA 4:⁠13.

BAIBEL i tok ol man i dai pinis ol bai i kirap bek. Wok Jisas i mekim bilong kirapim bek ol man i dai pinis, na ol tok em i skulim ol man long en, i makim taim bai kamap bihain na ol man i dai pinis ol bai kirap bek. (Matyu 22:​23-33; Mak 5:​35, 36, 41, 42; Luk 7:​12-16) Dispela bilip i mas mekim wanem long yumi? Tok aposel Pol i mekim na i stap antap i makim olsem dispela bilip inap strongim bel bilong yumi taim wanpela yumi laikim tumas em i dai.

Sapos wanpela yu laikim tumas em i dai, ating yu bin sori tumas na bel i bagarap stret long dispela samting i bin kamap. Theresa i bin marit inap 42 krismas na man bilong em i dai taim em i kisim operesen long klok bilong em. Theresa i tok: “Mi kirap nogut long dispela! Namba wan samting mi pilim, em mi pret nogut tru. Bihain, taim ol de i wok long kamap na i go mi bel hevi nogut tru. Mi krai planti.” Taim man o meri i bel hevi olsem, yu ting dispela i makim olsem em i no bilip long tok promis bilong Jehova long kirapim bek ol man? Olsem wanem? Tok bilong Pol i makim olsem i gat rong long krai sori long wanpela i dai?

Stori Bilong Baibel Long Ol Man i Krai Sori

Yumi inap lukim bekim bilong ol dispela askim taim yumi skelim ol stori bilong Baibel long ol man i krai sori taim wanpela i dai. Long planti stori bilong Baibel ol i stori olsem taim wanpela long famili i dai ol i save krai sori inap sampela de. (Stat 27:41; 50:​7-10; Song 35:14) Taim man i krai sori long wanpela i dai, planti taim bel hevi bilong en i bikpela tru.

Yumi ken skelim stori bilong sampela bilipman i bin krai sori long taim wanpela ol i laikim tru em i dai. Abraham i gat strongpela bilip olsem God bai kirapim bek ol man i dai pinis. (Hibru 11:19) Maski em i bilip tru long dispela samting, taim meri bilong em i dai, em i “sori tru na i krai long em.” (Stat 23:​1, 2) Taim ol pikinini bilong Jekop i giamanim em na tokim em olsem Josep, dispela pikinini em i save laikim tumas, em i dai, Jekop i “brukim klos bilong en na . . . i krai tasol i stap.” (Stat 37:​34, 35) Em nau, planti yia bihain Jekop i tingim yet pikinini bilong em i dai na em i save bel hevi tru! (Stat 42:​36-38) King Devit tu i bin bel hevi na krai sori nogut tru taim tupela pikinini man bilong em Amon na Apsalom i dai. Tru, tupela i givim hevi long Devit na famili bilong em, tasol ol i pikinini bilong em na i dai bilong ol i mekim em i bel hevi tru.​—⁠2 Samuel 13:​28-39; 18:⁠33.

Sampela taim, lain Israel olgeta i bin krai sori, kain olsem ol i bin mekim long taim Moses i dai. Lo 34:8 i tok olsem ol Israel i bin krai inap 30 de.

Narapela em stori bilong Jisas Krais. Gutpela pren bilong em Lasarus i dai. Na taim em i lukim ol susa bilong Lasarus, em Marta na Maria, na ol pren bilong ol i krai, “bel bilong en i sori tru na em tu i laik krai.” Maski em i save olsem liklik taim em bai kirapim bek pren bilong em, tasol “Jisas i krai.” Jisas i laikim tumas tupela pren bilong em Marta na Maria. Olsem na bel bilong em i pilim tru taim em i lukim tupela i krai sori long brata bilong ol i dai.​—⁠Jon 11:​33-36.

Abraham, Jekop, Devit, na Jisas, olgeta i bin bilip tru long Jehova na ol tok promis bilong em, tasol ol i bin krai. Olsem wanem? Ol i krai sori na dispela i makim olsem ol i slek long ol samting bilong spirit? Taim ol i krai, dispela i makim olsem ol i no bilip olsem ol man i dai pinis bai kirap bek? Nogat tru! Bel hevi na krai em wanpela pasin olgeta man i mekim taim wanpela ol i laikim tumas em i dai.

Bilong Wanem Yumi Save Krai Sori?

Em i no laik bilong God long ol manmeri i mas i dai. Jehova i kamapim laik bilong em long bipo taim em i tokim Adam na Iv olsem ol i mas mekim dispela graun i kamap gutpela ples paradais na ol gutpela manmeri i ken i stap long en. Sapos tupela i sakim tok bilong Jehova, indai bai painim tupela. (Stat 1:28; 2:17) Sori tru, Adam na Iv i sakim tok na long dispela as “dai i kisim olgeta man, long wanem, olgeta man i bin mekim sin.” (Rom 5:12; 6:23) Indai em i wanpela birua nogut tru na i no laik bilong God na dispela samting i kamap.​—⁠1 Korin 15:⁠26.

Olsem na yumi save, taim wanpela yumi laikim tumas em i dai, dispela i save bagarapim tru bel bilong yumi. Em i no stap moa wantaim yumi na yumi pilim tru dispela samting. Theresa, dispela meri yumi bin stori long en pastaim, em i stori long man bilong em olsem: “Mi save mi bai lukim em long taim em i kirap bek, tasol mi save wari tru long em i no stap moa. Dispela i save mekim na bel bilong mi i bagarap tru.” I dai bilong papa o mama i mekim na yumi save tingting long i dai bilong yumi yet. Taim wanpela yangpela i dai, dispela i save bagarapim tru bel bilong yumi, long wanem, em i yangpela yet na em i no bin stap longpela taim.​—⁠Aisaia 38:⁠10.

Yes, indai i narapela kain samting tru. Olsem na yumi mas save dispela inap kamapim bikpela bel hevi, na Jehova i no save ting olsem taim man i krai sori em i no bilip tumas long kirap bek, nogat. Olsem yumi bin skelim long stori bilong Abraham, Jekop, Devit, ol lain Israel, na Jisas, taim man i krai sori long wanpela i dai, dispela i no makim olsem em i no strong long ol samting bilong spirit.a

Tru, yumi ol Kristen i save bel hevi long taim wanpela i dai, tasol yumi no save “sori tumas, olsem ol arapela manmeri i no bilip long God na i no wetim taim bilong kirap bek long matmat.” (1 Tesalonaika 4:13) Yumi no save mekim ol samting bilong kamapim bel hevi bilong yumi, olsem singaut o paitim skin o mekim ol kain samting olsem, long wanem, yumi save long samting i painim ol man i dai pinis. Yumi save olsem ol i no kisim pen o bel hevi, nogat. Ol man i dai pinis i olsem ol i slip i dai, ol i no tingim wanpela samting. (Saveman 9:5; Mak 5:39; Jon 11:​11-14) Na tu, yumi bilip tru olsem Jisas, em man i bin tok “kirap bek, em mi yet. Na laip, em mi yet,” em bai truim tok promis bilong em long kirapim bek “olgeta manmeri i stap long matmat.”​​—⁠Jon 5:​28, 29; 11:​24, 25.

Olsem na sapos yu bel hevi na krai nau long dispela taim, orait yu mas save olsem Jehova i save long hevi yu karim na dispela i ken strongim bel bilong yu. Dispela save na bilip bilong yu long ol man i dai pinis bai kirap bek em i ken mekim isi bel bilong yu na helpim yu long karim hevi bilong yu long wanpela yu laikim tumas em i dai.

[Futnot]