Olsem Wanem? I Stret Ol Kristen i Bel Nogut?

YU TING bel nogut em wanpela pasin ol Kristen i mas wok long kisim? Baibel i kirapim yumi ol Kristen long “givim bel long ol arapela” na Baibel i tokim yumi olsem “man i givim bel long ol arapela . . . em i no save bel nogut.” (1 Korin 13:4; 14:⁠1) Na tu, Baibel i tokim yumi olsem Jehova em i “God bilong bel nogut” olsem na yumi gat wok long “bihainim ol pasin em yet i save mekim.” (Kisim Bek 34:​14, NW; Efesus 5:⁠1) Sampela man i gat askim long ol dispela ves bilong Baibel? Bilong wanem?

Long wanem, tok Hibru na tok Grik ol i tanim olsem “bel nogut” long Baibel Tok Pisin, em i gat planti insait bilong en. Em i ken makim gutpela samting na samting nogut taim yumi skelim tok ol i mekim. Olsem: Long tok Hibru dispela tok “bel nogut” inap makim “strong long lotu long God wanpela tasol, strong long bihainim Bikpela, givim bel, strongpela laik, belhat olsem paia, bel nogut [stretpela na i no stret]; bel kaskas.” Long tok Grik em i wankain. Dispela ol tok i ken makim tingting kranki yu gat long man yu ting em i laik winim yu o man yu ting em i gat ol gutpela samting, winim yu. (Sindaun 14:30) Ol dispela tok i ken makim gutpela pasin God i givim long yumi​​—⁠yumi laik lukautim man yumi laikim em tru na bai em i abrusim bagarap.​​—⁠2 Korin 11:⁠2.

Nambawan Gutpela Piksa

Jehova i stap namba wan gutpela piksa long mekim pasin bilong bel nogut i stret long mekim. Tingting bilong Jehova i klin tru, em i gat laik long lukautim ol manmeri bilong em long ol samting bilong spirit na bai pasin nogut i no ken pundaunim ol. Em i tok long ol manmeri bilong em long bipo olsem ol Jerusalem, na em i tok: “Mi laikim tumas ol Jerusalem, olsem na mi laik helpim ol. Mi laikim ol tru olsem na mi belhat long ol birua bilong ol.” (Sekaraia 8:⁠2) Olsem wanpela gutpela papa i save was oltaim bilong lukautim ol pikinini bilong em na bai ol samting i no ken bagarapim ol, Jehova i save was oltaim long lukautim ol wokboi bilong em na bai ol samting i no ken bagarapim ol long ol samting bilong skin na spirit.

Bilong was gut long ol manmeri bilong em, Jehova i givim Tok bilong em, em Baibel long ol. Em i gat ol tok bilong helpim ol long wokabaut stret, na em i gat planti stori bilong ol man husat i bin i stap gutpela piksa long mekim olsem. Yumi ritim long Aisaia 48:17 olsem: “Mi God, Bikpela bilong yupela. Oltaim mi save skulim yupela na soim yupela long ol stretpela pasin yupela i mas bihainim na bai yupela i stap gut.” Taim yumi save olsem stretpela pasin bilong bel nogut i kirapim em long lukautim na was long yumi, dispela i mekim gut bel bilong yumi! Sapos em i no mekim olsem, bai yumi kisim nogut long ol kain kain hevi, long wanem, yumi no save gut long abrusim ol hevi. Tru tumas, pasin bilong Jehova long bel nogut i no gat pasin bilong tingim em yet.

Olsem na wanem samting tru i mekim na pasin bilong bel nogut long samting i stret i narapela kain long pasin bilong bel nogut i no stret long mekim? Bilong painim bekim, bai yumi skelim stori bilong Miriam na Finias. Orait luksave long samting i bin kirapim ol long mekim samting ol i bin mekim.

Miriam na Finias

Miriam em bikpela susa bilong Moses na Aron, em ol lida bilong ol Israel long taim ol i lusim Isip. Taim ol Israel i stap long ples drai nating, Miriam i bel nogut long brata bilong em Moses. Baibel i tok olsem: “Moses i bin maritim wanpela meri bilong kantri Sudan. Na taim ol i stap yet long Haserot, Aron wantaim Miriam i tok nogut long Moses long dispela samting em i bin mekim. Na tupela i tok olsem, ‘Ating Bikpela i bin givim tok long ol manmeri long maus bilong Moses wanpela tasol, a? Nogat ya. Em i givim tok long ol long maus bilong mitupela tu.’ ” Ating Miriam i go pas long ol dispela toktok bilong daunim Moses, long wanem, Jehova i stretim Miriam, i no Aron, na Jehova i givim sik lepra long em inap long wanpela wik long pasin antap bilong em.​​—⁠Namba 12:​1-​15.

Wanem samting i kirapim Miriam long bel nogut long Moses? Em i tingim lotu i tru na em i gat laik long lukautim ol narapela Israel na bai ol samting nogut i no ken bagarapim ol? Nogat. I luk olsem Miriam i larim laik bilong kisim biknem na namba i kamap bikpela long bel bilong em. Em wanpela profet meri bilong Israel, olsem na ol manmeri i rispektim em, na moa yet ol meri. Em i go pas long ol long singsing taim God i mekim mirakel na kisim bek ol long solwara Retsi. Bihain liklik, ating Miriam i tingting planti, nogut meri bilong Moses i kisim biknem long ai bilong ol manmeri. Em i tingim em yet na i bel nogut, na em i kros na toktok planti long Moses, em man Jehova i makim.​​—⁠Kisim Bek 15:​1, 20, 21.

Tasol i gat narapela tingting i kirapim Finias long mekim wanpela samting. Paslain liklik long ol i go insait long Graun Bilong Promis, ol Israel i bung long Ples Daun Bilong Moap na ol meri Moap na ol meri Midian i pulim planti ol man bilong Israel long mekim pasin pamuk na lotuim god giaman. Bilong pinisim dispela pasin na pasim belhat bilong Jehova, ol hetman bilong Israel i mas kilim i dai olgeta man i bin mekim ol dispela pasin. Bilong mekim pasin pamuk, Simri, em wanpela bikman bilong lain Simeon, i kisim Kosbi, wanpela meri Midian, i kam insait long kem long ai bilong olgeta manmeri bilong Israel. Kwiktaim Finias i mekim wanpela samting. Em i strong tru long ol man i mas lotuim Jehova, na em i laik bai stretpela pasin tasol i stap long kem na dispela i kirapim em, na em i kilim i dai tupela taim ol i mekim pasin pamuk insait long haus sel. Na Jehova i amamas long pasin bilong em long “bel nogut na belhat” long dispela pasin na em i strong long ol i mas lotu long Jehova wanpela tasol​—⁠em i no laik tru bai ol Israel i lotu long ol giaman god. Pasin bilong Finias long hariap mekim samting i pasim dispela sik nogut i bin kilim i dai 24,000 manmeri, na Jehova i tok promis long em olsem wok pris bai stap long lain bilong em i go inap bihain bihain.​​—⁠Namba 25:​4-​13; The New English Bible.

Wanem samting i mekim na dispela tupela pasin bilong bel nogut i narapela narapela kain? Miriam i tingim em yet na i bel nogut, olsem na em i no daun long brata bilong em. Tasol stretpela pasin bilong bel nogut i as na Finias i kilim i dai tupela. Olsem Finias, sampela taim yumi tu i mas pilim olsem yumi mas tokaut long tingting bilong yumi o mekim sampela samting bilong sambai long nem bilong Jehova, na lotu bilong em, na ol manmeri bilong em.

Bel Nogut Em Ol Samting i No Stret i As Bilong En

Yu ting yumi inap long holim pasin bilong bel nogut em ol samting i no stret i as bilong en? Yes yumi inap holim dispela pasin. Dispela samting i bin painim ol Juda long taim bilong ol aposel. Ol i strong long was long Lo God i bin givim long ol na pasin tumbuna bilong ol yet. Ol i wok strong long lukautim Lo, olsem na ol i kamapim planti ol liklik lo bilong ol yet na dispela i givim hevi long ol manmeri. (Matyu 23:⁠4) Ol i no luksave o ol i no laik luksave olsem God i bin senisim Lo Bilong Moses na kamapim samting tru tru em Lo i olsem piksa tasol bilong en. Olsem na pasin bilong ol long strong long was long Lo i kirapim ol long belhat nogut tru long ol man i bihainim Jisas Krais. Bipo aposel Pol i strong long stap gut long Lo, na tingting kranki i as bilong dispela pasin bilong em, tasol bihain em i tok olsem ol manmeri i wok long sambai long Lo ‘ol i strong tumas long bihainim pasin God i laikim, tasol ol i no klia gut long laik tru bilong God, na ol i mekim.’​​—⁠Rom 10:2; Galesia 1:​14.

Planti Juda em ol i bin kamap Kristen ol tu i gat hatwok long lusim pasin bilong strong long sambai long Lo. Bihain long namba 3 raun bilong em, Pol i bin givim ripot long ol hetman bilong kongrigesen Kristen long ol lain manmeri i tanim bel na kamap Kristen. Long dispela taim, planti tausen Juda Kristen ol i “givim bel long Lo.” (Aposel 21:20) Dispela samting i bin kamap sampela yia bihain long taim ol hetman bilong kongrigesen Kristen i bin tok olsem ol Kristen bilong ol arapela lain i no gat wok long katim skin. Ol tok i kamap long pasin bilong bihainim Lo i bin kamapim kros pait insait long kongrigesen. (Aposel 15:​1, 2, 28, 29; Galesia 4:​9, 10; 5:​7-​12) Sampela Juda Kristen i no save gut long pasin nau Jehova i mekim long ol manmeri bilong em, olsem na ol i strong long bihainim tingting bilong ol yet, na ol i sutim tok long ol narapela.​​—⁠Kolosi 2:​17; Hibru 10:⁠1.

Yumi tu mas abrusim pasin bilong strong tumas long holimpas ol tingting o pasin bilong yumi yet em Baibel i no as bilong en na yumi bel nogut long ol man i no bihainim dispela tingting. Yumi mas redi long kisim ol nupela save bilong Baibel i kam long rot Jehova i mekim wok long en long nau.

Yumi Mas Strong Long Lotuim Jehova

Tasol pasin bilong bel nogut long lotuim narapela god, dispela pasin i stret long mekim insait long trupela lotu. Taim yumi tingting tumas long gutnem bilong yumi yet na ol samting i stret yumi yet i ken mekim, orait pasin bilong givim bel long God bai kirapim yumi long putim tingting i go long Jehova. Em i kirapim yumi long painim kain kain rot long autim tok tru long pasin bilong em, na sambai long ol wok bilong em na ol manmeri bilong em.

Akiko, em wanpela Witnes Bilong Jehova i save autim tok fultaim, em i bungim wanpela meri long haus em i bin i gat tingting kranki long lo bilong God long blut na em i strong na i no laik harim tok. Akiko i bihainim savepasin na i sambai long tok bilong Baibel, na em i kolim ol kain kain hevi em pasin bilong kisim blut i kamapim. Akiko i gat laik long toktok long pasin bilong Jehova, na em i senisim toktok long samting em i ting em as tru na meri i no laik harim tok​—⁠em i no bilip olsem wanpela Man i bin wokim olgeta samting. Akiko i toktok gut wantaim meri long olsem wanem ol samting i kamap i helpim dispela bilip olsem i gat Man i wokim ol samting. Pasin bilong Akiko long sambai long tok bilong Baibel i rausim dispela tingting kranki bilong meri, na tu, em i kirapim Baibel-stadi wantaim em. Dispela meri bilong haus pastaim em i bin kros, tasol nau em i save litimapim nem bilong Jehova.

Pasin bilong givim bel long trupela lotu i kirapim yumi long redi long painim kain kain rot bilong toktok na sambai long bilip bilong yumi long ples wok, long skul, long stua, na taim yumi raun. Olsem: Midori i strong long tokaut long bilip bilong em long ol wanwok bilong em. Wanpela wanwok em i gat 40 krismas samting i tok em i no gat laik long toktok wantaim ol Witnes Bilong Jehova. Long narapela taim ol i toktok, dispela meri em i toktok planti olsem pikinini meri bilong em i wok long kisim sampela pasin i no gutpela. Midori i soim em long buk Askim Bilong Ol Yangpela​—⁠Ol Gutpela Bekim,a na em i stretim rot bilong stadi wantaim pikinini meri bilong em long dispela buk. Ol i kirapim stadi, tasol mama i no sindaun wantaim ol long stadi. Midori i pasim tok long soim dispela meri long wanpela video, Jehovah’s Witnesses​—⁠The Organization Bihain the Name.* Dispela i stretim planti tingting kranki bilong em. Ol samting em i lukim i kirapim em na em i tok: “Mi laik kamap olsem ol Witnes Bilong Jehova.” Em i kirap bung wantaim pikinini meri bilong em long stadi long Baibel.

Pasin bilong bel nogut long ol samting i no stret, em i gutpela insait long kongrigesen Kristen tu. Em i save kamapim strong pasin bilong laikim na tingim narapela, na em i kirapim yumi long sakim ol samting inap bagarapim ol brata spirit bilong yumi, olsem pasin bilong tok baksait na bihainim tingting bilong ol man i bin tromoi lotu i tru. Stretpela bel nogut i kirapim yumi long sapotim ol tok ol elda i pasim taim ol i mas stretim man i mekim rong. (1 Korin 5:​11-​13; 1 Timoti 5:​20) Paul i bin bel nogut long ol samting inap bagarapim ol Kristen long kongrigesen bilong Korin, na em i tok: “Mi gat strongpela laik long yupela i mas bihainim tru Krais. Mi yet mi bin makim yupela bilong kamap ol lain bilong Krais, na mi laik givim yupela long Krais olsem mi bringim yangpela meri i stap klin tru i go long man em i laik maritim.” (2 Korin 11:⁠2) Olsem na yumi tu, stretpela pasin bilong bel nogut i kirapim yumi long mekim olgeta samting yumi inap mekim bilong lukautim kongrigesen long ol samting bilong bilip, na ol samting bilong spirit, na pasin bilong i stap klin na bihainim stretpela pasin.

Yes, taim pasin bilong bel nogut i gat stretpela as bilong en​—⁠olsem strong long lotuim Jehova wanpela tasol​—⁠dispela i save helpim ol narapela. Jehova i orait long en na em i wanpela pasin ol Kristen i mas bihainim long nau.​​—⁠Jon 2:​17.

[Futnot]

[Ol Piksa long pes 29]

Pasin Finias i mekim em stretpela kain bel nogut

[Ol Piksa long pes 30]

Abrusim bel nogut em ol samting i no stret i as bilong en

[Ol Piksa long pes 31]

Pasin bilong strong long lotuim Jehova i kirapim yumi long toktok long bilip bilong yumi na amamas long stap brata brata