‘Painimaut Wanem Man i Gutpela na Stretpela’

DAMASKUS em wanpela taun i bin i stap long taim bilong ol aposel na i gat planti wok bisnis i stap. I gat ol diwai prut i raunim, na em i olsem gutpela ples malolo bilong ol lain i save raun long ol kamel em ol i kam long hap is. I no longtaim bihain long Jisas Krais i dai, i gat wanpela kongrigesen Kristen long Damaskus. Sampela bilong dispela kongrigesen, em ol Juda​—⁠ating ol i bin kamap disaipel bilong Jisas long taim bilong Pentikos 33 C.E. long Jerusalem. (Aposel 2:​5, 41) Ating sampela disaipel bilong Judia i bin go sindaun long Damaskus long taim ol man i kirap long mekim nogut long ol Kristen bihain long ol i tromoi ston long Stiven na kilim em dai.​—⁠Aposel 8:⁠1.

Ating long 34 C.E. samting, wanpela Kristen bilong Damaskus nem bilong em Ananaias i kisim wanpela wok i narapela kain. Bikpela i tokim em: “Yu kirap na yu go long dispela rot, nem bilong en Stretpela Rot. Long haus bilong Judas yu mas askim long wanpela man bilong taun Tarsus, nem bilong en Sol. Nau em i prea i stap.”​—⁠Aposel 9:⁠11.

Dispela rot ol kolim Stretpela Rot, em i longpela olsem 1.5 kilomita na i go namel stret long taun Damaskus. Long dispela piksa em ol i bin wokim long 1800 samting, yumi inap kisim sampela save long dispela rot i luk olsem wanem long dispela taim bipo. Ating Ananaias i mas wok long painim haus bilong Judas inap sampela taim. Tasol Ananaias i bin painim haus, na long ol samting i kamap bihain long dispela Sol i kamap aposel Pol, man bilong givim bel long autim gutnius.​—⁠Aposel 9:​12-19.

Jisas i bin salim ol disaipel bilong em i go na tokim ol long ‘painimaut wanem man i gutpela na stretpela’ em ol i mas harim gutnius. (Matyu 10:11) Tru tru Ananaias i mas wok long painim Sol. Olsem Ananaias, ol Witnes Bilong Jehova i amamas long painim ol man i gat gutpela bel na ol i amamas taim ol dispela man i kisim gutnius bilong Kingdom. Hatwok bilong ol long painim ol dispela man i no lus nating.​—⁠1 Korin 15:⁠58.

[Piksa long pes 32]

“Stretpela Rot” long nau

[Piksa Kredit Lain long pes 32]

From the book La Tierra Santa, Volume II, 1830