Buk Bilong Baibel Namba 50—Filipai
Man Bilong Raitim: Pol
Ples Em i Bin Raitim: Rom
Raitim Pinis: 60–61 C.E. samting
TAIM aposel Pol i lukim samting olsem driman na harim singaut bilong i go autim tok long Masedonia, kwiktaim em wantaim ol poroman bilong em, em Luk na Sailas na yangpela man Timoti, ol i bihainim dispela tok. Ol i kalap long sip long Troas, long Esia Maina, na go kamap long Neapolis, na nau ol i wokabaut namel long ol maunten i go long Filipai, em i stap longwe inap 15 kilomita. Luk i tok, Filipai “em i namba wan taun bilong distrik Masedonia.” (Ap. 16:12) King Filip Namba 2 bilong Masedonia (em papa bilong Bikpela King Aleksander) em i daunim dispela taun long yia 356 B.C.E., olsem na ol i putim nem bilong em long dispela taun na kolim Filipai. Bihain ol Rom i kisim dispela taun. Long yia 42 B.C.E., Oktevian i winim sampela pait long dispela hap na kisim strong, na bihain em i kamap Sisar Ogastus. Bilong tingim dispela pait em i winim, em i makim taun Filipai long kamap wanpela taun bilong Rom.
2 Taim Pol i kam long wanpela taun em i no bin kam long en bipo, em i save autim tok long ol Juda pastaim. Tasol taim em i kam long Filipai long yia 50 C.E., i no gat planti Juda i stap, na ating ol i no gat haus lotu, long wanem, ol i save go beten ausait long taun, klostu long wanpela wara. Pol i autim tok na kwiktaim wok bilong em i karim kaikai. Lidia, em wanpela bilong ol manmeri i kamap Kristen pastaim, em i wanpela bisnismeri i save bihainim lotu Juda. Em i amamas long kisim tok i tru bilong Krais, na em i strong long Pol na ol poroman bilong em i mas i kam i stap long haus bilong em. Luk i tok: “Em i strong tumas long mipela, na mipela i bihainim tok bilong em.” Tasol i no longtaim na sampela man i birua long ol, na ol i paitim Pol wantaim Sailas long kanda na putim tupela long kalabus. Tupela i stap kalabus na wanpela guria i kamap; tupela i autim tok long woda wantaim famili bilong em na ol i bilip. Long de bihain tupela i lusim kalabus na ol i go long haus bilong Lidia na givim tok long ol brata bilong strongim ol, na bihain tupela i lusim taun na i go. Pol i no lusim tingting long ol hevi i bin kamap long taim kongrigesen i kamap nupela long Filipai.—Ap. 16:9-40.
3 Sampela yia bihain, taim Pol i mekim namba 3 raun bilong autim gutnius, em i go bek lukim kongrigesen long Filipai. Na inap 10-pela yia bihain long taim em i kirapim dispela kongrigesen, ol i mekim gutpela pasin sori long em na em i pilim tru, na dispela i kirapim em long raitim pas long ol. Spirit bilong God i as bilong ol tok bilong dispela pas nau i stap long Baibel, em pas i gat nem bilong dispela gutpela kongrigesen i stap long en.
4 Ol saveman bilong Baibel i bilip olsem Pol i raitim dispela pas, olsem namba wan ves i tok, na i gat gutpela as bilong bilip olsem. Polikap (69?-155? C.E.) i bin raitim pas long ol Filipai na em i stori long pas Pol i bin raitim long ol. Planti saveman bilong Baibel long bipo, olsem Ignatius, Airenius, Tetulian, na Klemen bilong Aleksandria, ol i kolim sampela tok bilong dispela pas na ol i tok, em tok bilong Pol. Wanpela rait bilong yia 150 C.E. samting (em Muratorian Fragment) na olgeta narapela olpela rait bilong Baibel tu ol i kolim sampela tok bilong dispela pas. Na dispela pas i stap wantaim 8-pela narapela pas bilong Pol long wanpela olpela rait bilong yia 200 C.E. samting, em Chester Beatty Papyrus Namba 2 (P46).
5 Yumi inap save long ples stret na taim stret Pol i bin raitim dispela pas. Taim Pol i raitim, em i stap kalabus na lain soldia bilong King bilong Rom i was long em, na em i taim bilong ol Kristen i wok strong long autim tok. Long pinis bilong pas em i tok, ol Kristen i wok long haus bilong Sisar ol i givim gude long ol Kristen long Filipai. Yumi skelim ol dispela samting na yumi save, Pol i stap long Rom na em i raitim dispela pas.—Fl. 1:7, 13, 14; 4:22; Ap. 28:30, 31.
6 Tasol em i bin raitim long wanem taim? I olsem em i bin i stap longtaim liklik long Rom taim em i raitim dispela pas, long wanem, olgeta lain soldia bilong lukautim haus bilong Sisar, na ol narapela man tu, ol i save pinis olsem Pol i stap kalabus na ol i save long as bilong dispela. Na tu, Epafroditus i bin lusim Filipai (em longwe inap 1,000 kilomita) na kisim presen i kam long Pol long Rom, na sik i painim em, na ol Filipai i harim tok long dispela na ol i salim tok i go bek long Rom na tokim Pol ol i wari long Epafroditus. Bikpela hap taim liklik i mas lus bambai ol dispela samting i ken kamap. (Fl. 2:25-30; 4:18) Pol i kalabus long Rom long namba wan taim namel long yia 59 na yia 61 C.E., olsem na yumi ken save em i bin raitim dispela pas long yia 60 o 61 C.E., inap olsem wanpela yia samting bihain long taim em i kamap long Rom long namba wan taim.
7 Pol i autim tok i tru na mekim bikpela hatwok, olsem em i kisim pen, bilong kamapim ‘ol dispela pikinini’ long Filipai, na em i pilim tru gutpela pasin sori bilong ol, em planti taim ol i salim mani samting bilong helpim em taim em i raun autim tok na karim hevi, na em i lukim Jehova i blesim wok bilong autim tok long Masedonia long namba wan taim, olsem na Pol i laikim tru ol brata long Filipai na ol i laikim tru Pol. Nau ol i salim presen gen, na ol i laik save long sik bilong Epafroditus, na long wok bilong autim gutnius long Rom, olsem na Pol i kirap raitim dispela gutpela pas long ol bilong strongim ol.
HELPIM YUMI OLSEM WANEM?
12 Pas bilong ol Filipai inap helpim tru yumi! Yumi tu yumi laik bai Jehova i amamas long yumi, na yumi laik bai ol wasman Kristen i ken tok yumi mekim gutpela wok, olsem Pol i bin mekim long kongrigesen bilong Filipai. Sapos yumi bihainim gutpela pasin bilong ol Filipai na gutpela tok Pol i givim long ol, orait Jehova na ol elda bai amamas long yumi. Olsem ol Filipai, yumi tu mas i gat pasin bilong givim samting long ol narapela, na tingting long helpim ol brata i sot long ol samting, na helpim na strongim wok bilong autim gutnius long rot bilong kot. (1:3-7) Oltaim yumi mas “sanap strong na i stap wanbel, na long wanpela tingting tasol [yumi mas] wok wantaim bilong kirapim ol manmeri long bilip long gutnius.” Yumi mas i stap olsem “ol lait” namel long ol manmeri bilong dispela graun ol i lusim pinis stretpela pasin na mekim planti rong. Taim yumi mekim ol dispela samting, na yumi tingting oltaim long ol pasin i gutpela long mekim, orait ol brata bai amamas long yumi, olsem aposel Pol i bin amamas long ol Filipai.—1:27; 2:15; 4:1, 8.
13 Pol i tok: “Yupela olgeta i mas bihainim pasin bilong mi.” Yumi mas bihainim wanem pasin bilong em? Wanpela pasin em olsem: Bel bilong yumi mas i stap isi maski wanem kain samting i kamap long yumi. Maski Pol i gat planti samting o em i sot tru long ol samting em i no bel nogut na toktok planti. Em i lain long i stap isi bambai em i ken givim bel long mekim wok bilong God na amamas long mekim. Na yumi olgeta i mas bihainim pasin bilong Pol long laikim tru ol brata i stap gut long God. Taim Pol i toktok long wok Timoti na Epafroditus i bin mekim, em i kamapim klia olsem em i laikim tru tupela na em i amamas tru long wok bilong ol! Em i laikim tru ol brata long Filipai, na em i tok: “Mi save givim bel bilong mi long yupela, na mi wari tru long yupela. Yupela i stap olsem gutpela prais mi bin wok strong long kisim, na mi save amamas moa yet long yupela.”—3:17; 4:1, 11, 12; 2:19-30.
14 Yumi mas bihainim wanem narapela pasin bilong Pol? Yumi mas “ran strong bilong kamap long mak na kisim prais”! Olgeta man i tingim ‘ol pasin i gutpela bilong mekim,’ ol i laik tru long save long gutpela samting Jehova i kamapim long heven na long graun na long dispela rot ‘bai olgeta i tokaut olsem Krais Jisas em i Bikpela, na dispela bai givim biknem long God Papa.’ Ol gutpela tok Pol i givim long ol Filipai i strongim olgeta man i wet long kisim laip oltaim long rot bilong Kingdom Bilong God na bai ol i ran strong bilong kisim dispela prais. Nambawan wok bilong dispela pas bilong ol Filipai em bilong helpim ol manmeri i “stap manmeri bilong heven,” em ol i wetim taim bilong bodi bilong ol bai “i kamap gutpela moa moa yet olsem bodi bilong [Krais].” Olgeta dispela man i mas bihainim pasin bilong aposel Pol na “lusim tingting long olgeta samting bilong bipo, na . . . wok strong long kisim dispela samting bai i kamap bihain.” Ol i mas “ran strong bilong kamap long mak na kisim prais,” em gutpela samting tru ol bai kisim long Kingdom bilong heven!—4:8; 2:10, 11; 3:13, 14, 20, 21.