Em i Strong Long Mipela i Mas i Kam

OL KANTRI long hap bilong Is ol i gat nem tru long pasin bilong mekim gut long ol narapela man. Olsem, long India wanpela famili bai i stap hangre bilong givim kaikai long visita bilong ol. Wanpela mama long Iran i save pulapim kaikai long bokis ais bilong em olgeta taim na bai em i ken mekim gutpela pasin na givim kaikai long ol visita i kam long haus.

Pasin bilong givim samting long ol narapela em pasin tru bilong planti man em stori bilong ol i stap long Baibel. Wanpela i stap gutpela piksa tru bilong mekim kain pasin olsem, em Lidia, wanpela meri i bihainim lotu Juda i save sindaun long Filipai, em nambawan biktaun bilong distrik Masedonia. Long wanpela de sabat, aposel Pol wantaim ol wanwok bilong em i lukim Lidia na sampela meri ol i bung i stap arere long wanpela wara ausait long Filipai. Jehova i opim bel na tingting bilong em taim Pol i autim tok long ol. Orait, em wantaim ol wanhaus bilong em i kisim baptais. Em i tokim Pol na ol wanwok bilong em olsem: “Sapos yupela i ting mi bilip tru long Bikpela, orait yupela i ken i kam i stap long haus bilong mi.” Wanwok bilong Pol, em Luk, i tok: “Em i strong tumas long mipela, na mipela i bihainim tok bilong em.”​—⁠Aposel 16:​11-​15.

Olsem Lidia, ol Kristen long nau i save mekim gut na lukautim gut ol wanbilip bilong ol, olsem ol wasman raun na meri bilong ol. Pasin bilong ol dispela bratasista i mekim na ol i kam. Taim ol i mekim olsem ol i kisim gutpela blesing olsem ol i kisim strong long rot bilong toktok na poroman wantaim ol wasman raun. Maski planti Witnes Bilong Jehova i no gat planti samting bilong skin, ol i wok long bihainim dispela tok: “Sapos ol man bilong narapela ples ol i kamap long yupela, orait yupela i mas lukautim ol gut.” (Rom 12:13; Hibru 13:⁠2) Pasin bilong ol long givim samting i mekim ol i amamas. Tok bilong Jisas i stret taim em i tok: “Amamas bilong man i givim samting long ol arapela man, dispela i winim amamas bilong man i kisim samting bilong em yet.”​—⁠Aposel 20:⁠35.