Bihainim Jehova, Em God Bilong Tingim Olgeta Man
“God i save skelim olgeta manmeri long wankain pasin tasol, maski ol i bilong wanem lain.”—ROM 2:11.
1, 2. (a) Jehova i tingting pinis long mekim wanem long lain Kenan? (b) Jehova i bin mekim wanem? Dispela i kamapim wanem ol askim?
TAIM ol i kem long ples stret bilong ol Moap long 1473 B.C.E., lain Israel i bin putim gut yau long tok bilong Moses. Bikpela hevi i wetim ol long hapsait bilong wara Jordan. Moses i tokaut long samting Jehova i tingting pinis long mekim, em long daunim 7-pela strongpela kantri bilong Kenan long Graun Bilong Promis. Tok bilong Moses i strongim tru bel bilong ol, em i tok: “Taim God, Bikpela bilong yumi, i larim yupela i daunim ol, orait yupela i mas kilim olgeta i dai”! Lain Israel i no ken mekim kontrak wantaim ol, na marimari long ol.—Lo 1:1; 7:1, 2.
2 Tasol i gat wanpela famili Jehova i no bin bagarapim long namba wan taun ol Israel i pait long en. Na tu, God i bin lukautim ol manmeri bilong 4-pela narapela taun. Bilong wanem em i mekim olsem? Ol dispela narapela kain samting i kamap na i opim rot long ol dispela lain Kenan i abrusim bagarap i lainim yumi long wanem pasin bilong Jehova? Na olsem wanem yumi inap bihainim pasin bilong em?
Biknem Bilong Jehova —Ol Man i Mekim Wanem?
3, 4. Stori bilong ol pait lain Israel i bin winim i mekim wanem long sampela manmeri long Kenan?
3 Lain Israel i raun long ples drai nating inap 40 yia paslain long ol i go insait long Graun Bilong Promis, na long dispela taim Jehova i bin lukautim ol na pait bilong helpim ol. Long hap saut bilong Graun Bilong Promis, lain Israel i bungim king bilong taun Arat. Jehova i helpim lain Israel na ol i daunim dispela king wantaim lain bilong em long Horma. (Namba 21:1-3) Bihain, lain Israel i wokabaut arere long kantri Idom na i go olsem long hap not-is bilong solwara Detsi. Bipo lain Moap i bin sindaun long dispela hap, tasol nau lain Amor i stap. King Sihon bilong Amor i no laik larim ol Israel i go namel long kantri bilong em. Tupela lain i kirap pait long taun Jahas, em long hap not bilong ples daun Arnon, na ol Israel i kilim i dai Sihon. (Namba 21:23, 24; Lo 2:30-33) I go moa long hap not, King Ok i bosim narapela lain Amor long kantri Basan. Maski Ok em man i traipela tru, em i no inap sakim Jehova. Ol i kilim i dai Ok long taun Edrei. (Namba 21:33-35; Lo 3:1-3, 11) Stori bilong ol dispela pait lain Israel i winim na long God i kisim bek ol long Isip i bin kirapim tru sampela manmeri long Kenan.a
4 Taim lain Israel i go insait long Kenan bihain long ol i bin brukim wara Jordan, ol i sanapim kem long Gilgal. (Josua 4:9-19) Klostu liklik em taun Jeriko i sanap wantaim banis bilong en. Ol stori Rahap bilong Kenan i harim long ol samting Jehova i bin mekim i kirapim em long bilip na mekim ol samting. Olsem na taim Jehova i bagarapim taun Jeriko, em i lukautim Rahap na ol lain i stap long haus bilong em.—Josua 2:1-13; 6:17, 18; Jems 2:25.
5. Wanem samting i bin kirapim lain Gibeon long mekim pasin trik?
5 Bihain, lain Israel i lusim ples daun klostu long wara Jordan na ol i go moa long ol maunten. Josua i bihainim tok bilong Jehova na ol i go hait na bagarapim taun Ai. (Josua, sapta 8) Stori bilong lain Israel i winim dispela pait i kirapim planti king bilong Kenan long bung wantaim bilong redi long pait. (Josua 9:1, 2) Ol manmeri bilong taun Gibeon ol i mekim samting i narapela kain. Josua 9:4 i tok: “Ol i pasim tok long trikim em.” Olsem Rahap, ol tu i bin harim stori bilong Jehova i kisim bek lain bilong em long Isip na em i bin daunim Sihon na Ok. (Josua 9:6-10) Lain Gibeon i luksave olsem i no gat wanpela samting ol inap mekim bilong sakim ol. Olsem na bilong helpim Gibeon na 3-pela taun i stap klostu—Kefira, Berot, na Kiriat Jearim—ol i salim sampela man i go long Josua long Gilgal, na ol dispela man i mekim olsem ol i kam long wanpela longwe ples. Dispela trik i wok gut. Josua i mekim kontrak wantaim ol bilong makim olsem ol bai i no inap bagarapim ol. Tripela de bihain, Josua na lain Israel i kisim save olsem ol dispela man i bin giamanim ol. Tasol ol i bin mekim tok tru antap long Jehova long bihainim dispela kontrak, olsem na ol i mekim olsem. (Josua 9:16-19) Olsem wanem? Jehova i orait long dispela samting?
6. Jehova i mekim wanem long kontrak Josua i mekim wantaim lain Gibeon?
6 Lain Gibeon i kisim wok bilong katim paiawut na karim wara bilong lain Israel, na “bilong alta” bilong Jehova long haus lotu sel. (Josua 9:21-27) Na taim 5-pela king bilong Amor na ami bilong ol i laik pait long lain Gibeon, Jehova i wokim mirakel bilong helpim ol. Bikpela ren ais i kilim i dai planti man moa bilong lain birua winim namba bilong ol man em ami bilong Josua i kilim i dai. Na tu, Jehova i harim singaut bilong Josua long larim san na mun i sanap i stap na bai ol inap pinisim olgeta birua. Josua i tok: “Long taim bipo na i kam inap nau i no gat wanpela de olsem dispela de. Dispela samting i kamap, long wanem, Bikpela i bin harim tok bilong wanpela man na em i helpim ol Israel long pait.”—Josua 10:1-14.
7. Wanem tok i tru em Pita i bin tokaut long en, i kamap klia long ol samting i bin painim sampela manmeri bilong lain Kenan?
7 Rahap bilong lain Kenan na famili bilong em, na lain Gibeon, ol i pret long Jehova na mekim ol samting. Samting i painim ol i kamapim klia wanpela tok i tru em aposel Kristen Pita i tokaut long en bihain, olsem: “God i save mekim wankain pasin long olgeta manmeri, maski ol i bilong wanem lain. Long olgeta lain em i save laikim ol manmeri i aninit long em na i mekim stretpela pasin.”—Aposel 10:34, 35.
Pasin Jehova i Mekim Long Abraham na Israel
8, 9. Olsem wanem pasin Jehova i mekim long Abraham na lain Israel i kamapim klia pasin bilong em long tingim ol man bilong olgeta lain?
8 Disaipel Jems i stori long pasin marimari bilong God long ol samting em i mekim long Abraham na ol tumbuna pikinini bilong em. Bilip—i no lain—bilong Abraham i mekim na em i stap “pren” bilong Jehova. (Jems 2:23) Bilip bilong Abraham na pasin bilong em long laikim Jehova i opim rot long ol tumbuna pikinini bilong em i kisim ol blesing. (2 Stori 20:7) Jehova i bin tok promis olsem long Abraham: “Tru tumas bai mi mekim gut long yu na bai mi mekim ol pikinini bilong yu i kamap planti olsem ol sta long skai na olsem wesan long nambis.” Tasol lukim tok promis long ves i kamap bihain: “Long rot bilong pikinini bilong yu olgeta lain bilong graun bai kisim blesing.”—Stat 22:17, 18, NW; Rom 4:1-8.
9 Jehova i no save tingim ol man bilong wanpela lain tasol, nogat; pasin em i mekim long lain Israel i kamapim klia ol samting em inap mekim long ol man i bihainim tok bilong em. Ol dispela samting Jehova i bin mekim i kamapim pasin bilong em long laikim tru ol gutpela wokboi bilong em. Maski lain Israel i “lain manmeri bilong em stret,” dispela i no makim olsem God i no inap mekim gut long ol manmeri bilong ol narapela lain, nogat. (Kisim Bek 19:5; Lo 7:6-8) Tru, Jehova i bin kisim bek lain Israel long Isip na em i bin tok: “I gat planti lain manmeri i stap long graun. Tasol mi makim yupela tasol bilong i stap lain bilong mi.” Tasol long rot bilong profet Amos na ol narapela profet, Jehova i mekim tok promis long ol manmeri bilong “olgeta arapela kantri” bai kisim gutpela samting bihain.—Amos 3:2; 9:11, 12; Aisaia 2:2-4.
Jisas—Tisa i Save Tingim Olgeta Man
10. Long wanem rot Jisas i bin bihainim pasin bilong Papa bilong em long tingim ol man bilong olgeta lain?
10 Taim Jisas, em i wankain tru olsem Papa, i bin mekim wok bilong em long graun, em i bihainim pasin bilong Jehova long tingim ol man bilong olgeta lain. (Hibru 1:3) Nambawan laik bilong em long dispela taim em long painim ol “sipsip i lus” bilong lain Israel. Tasol em i no bin surik long autim tok long wanpela meri Samaria long hul wara. (Matyu 15:24; Jon 4:7-30) Em i wokim mirakel bilong helpim wanpela ofisa bilong ami em i no bilong lain Juda. (Luk 7:1-10) Na tu, ol pasin em i mekim i kamapim klia olsem em i laikim ol manmeri bilong God. Ol disaipel bilong Jisas i mekim bikpela wok autim tok long planti hap. Ol dispela samting i kamapim klia olsem pasin man i mekim bai makim olsem em bai kisim blesing bilong Jehova o nogat, i no lain o kantri bilong man. Ol man i gat pasin daun, na gutpela bel na ol i laik tumas long kisim save long tok i tru ol i putim yau long gutnius bilong Kingdom. Tasol ol man i gat pasin antap ol i tingim Jisas na tok bilong em i olsem samting nating. Jisas i tok: “Papa, yu Bikpela bilong heven na graun, mi tenkyu long yu, long wanem, yu bin haitim ol dispela samting long ol man i gat gutpela save na tingting, na yu bin soim long ol man i stap olsem ol liklik pikinini tasol. Yes, Papa, yu bihainim laik bilong yu tasol na yu mekim olsem.” (Luk 10:21) Taim pasin bilong laikim ol narapela na bilip i as bilong ol samting yumi mekim long ol narapela, yumi mekim pasin bilong tingim ol man bilong olgeta lain, na yumi save olsem Jehova i orait long dispela pasin.
11. Olsem wanem kongrigesen Kristen bilong pastaim i bin kamapim pasin bilong laikim olgeta lain wantaim?
11 Long kongrigesen Kristen bilong pastaim, ol Juda na ol man i no Juda, ol i gat wankain namba. Pol i tok: “God bai i givim gutpela sindaun long heven na biknem na bel isi long olgeta man i save mekim gutpela pasin, long ol Juda pastaim, na long ol manmeri bilong ol arapela lain tu. God i save skelim olgeta manmeri long wankain pasin tasol, maski ol i bilong wanem lain.” (Rom 2:10, 11) Jehova i no tingim ol i bilong wanem lain na em i marimari long ol, nogat; em i skelim samting ol i mekim taim ol i kisim save long Jehova na ol samting ol inap kisim long rot bilong ofa bilong Pikinini bilong em, Jisas. (Jon 3:16, 36) Pol i tok: “Man i stap Juda long nem tasol, em i no Juda tru. Na pasin bilong katim skin, em i no samting bilong bodi tasol. Nogat. Man i stap Juda long bel na tingting bilong en, em i Juda tru. Na pasin tru bilong katim skin, em tu i mas kamap insait long bel na tingting bilong man. Em i no save kamap long pasin bilong bihainim ol tok ol i bin raitim long lo. Nogat. Em i samting Spirit bilong God i save kamapim.” Orait nau, Pol i yusim tok i kamapim mining bilong dispela tok “Juda” (mining i olsem “bilong Juda,” olsem ol i litimapim o givim biknem), na em i tok: “Dispela kain man i no save kisim biknem long ai bilong ol man. Nogat. Tasol em i gat biknem long ai bilong God.” (Rom 2:28, 29) Jehova i givim biknem long ol man bilong olgeta lain. Olsem wanem? Yumi save mekim olsem?
12. Kamapim Tok Hait 7:9 i stori long wanem samting em ol man inap wet long kisim? Na husat inap kisim dispela samting?
12 Bihain, long wanpela driman, aposel Jon i lukim ol Kristen God i bin makim na ol i stap gut long em, ol i olsem wanpela lain spirit i gat 144,000 long en, em ol i bilong “olgeta lain bilong Israel.” Bihain long dispela, Jon i lukim “planti manmeri tru . . . ol i bilong olgeta lain man na bilong olgeta kantri na bilong olgeta kain skin na bilong olgeta tok ples. Ol i sanap i stap long pes bilong sia king na long ai bilong Pikinini Sipsip. Ol i bin putim ol longpela waitpela klos, na long han bilong ol, ol i holim ol lip bilong diwai pam.” (KTH 7:4, 9) Olsem na ol man bilong olgeta lain na tok ples ol i insait long kongrigesen Kristen bilong nau. Ol manmeri bilong olgeta kain sindaun ol inap abrusim bagarap long taim bilong “bikpela hevi” na dring long “hul i gat wara i kamap, em wara bilong givim laip” long nupela taim.—KTH 7:14-17.
Ol Gutpela Samting i Kamap
13-15. (a) Olsem wanem yumi inap daunim pasin bilong tingting kranki long ol man bilong narapela lain o skin o pasin bilong sindaun? (b) Stori long sampela gutpela samting i save kamap taim yumi mekim pasin pren.
13 Jehova i save gut long yumi, olsem wanpela gutpela papa i save gut long ol pikinini bilong em. Olsem tasol, taim yumi save gut long ol narapela, olsem yumi kisim save long pasin bilong ol na ol i go bikpela olsem wanem, dispela bai mekim na ol samting i narapela narapela long yumi bai kamap olsem samting nating. Pasin birua i stap namel long ol man bilong narapela narapela lain bai pinis, na pasin pren na pasin bilong laikim narapela bai kamap strong. Dispela i save strongim pasin wanbel. (1 Korin 9:19-23) Dispela samting i kamap ples klia long wok ol misineri i mekim long ol narapela ples. Ol i tingim gut ol manmeri bilong ol ples ol i go long en, olsem na insait long sotpela taim tasol ol inap pas gut wantaim ol kongrigesen bilong ol dispela ples.—Filipai 2:4.
14 Long planti hap yumi inap lukim ol gutpela samting em pasin bilong tingim ol man bilong olgeta lain i save kamapim. Aklilu bilong Itiopia i pilim olsem em i stap wanpis long London, Inglan. Em i pilim moa yet olsem em i stap wanpis, long wanem, i olsem ol asples i no laik pren wantaim ol man bilong ol narapela kantri, em dispela pasin i stap long planti biktaun bilong Yurop. Tasol taim Aklilu i go long wanpela miting Kristen long Haus Kingdom bilong ol Witnes Bilong Jehova, em i pilim samting i narapela kain olgeta! Ol manmeri i tok amamas long em, na em i pilim bel isi. Em i kisim kwik pasin bilong tenkyu tru long Man bilong wokim olgeta samting. I no longtaim na em i painim rot bilong autim gutnius bilong Kingdom long ol narapela long hap em i stap long en. Wanpela de, taim poroman bilong Aklilu long autim tok i askim em long ol mak em i laik winim, kwiktaim Aklilu i tokaut olsem em i laik bai wanpela taim i kamap na em i ken insait long kongrigesen i mekim tok ples bilong em, tok Amharik. Kongrigesen bilong dispela hap i save mekim wok long tok Inglis, na taim ol elda bilong dispela kongrigesen i harim dispela tok, ol i amamas long stretim rot long mekim wanpela pablik-tok long tok ples bilong Aklilu. Planti manmeri bilong ol narapela kantri na ol asples tu ol i kam long harim dispela namba wan pablik-tok long tok Amharik long Briten. Long nau, ol man Itiopia na ol narapela long dispela hap ol i stap wanbel long wanpela strongpela kongrigesen. Planti manmeri long dispela hap ol i lukim olsem i no gat samting i pasim ol long givim bel long Jehova na kamapim klia dispela samting long rot bilong kisim baptais Kristen.—Aposel 8:26-36.
15 Ol man i gat ol narapela narapela pasin na pasin ol i bin go bikpela long en. Ol dispela samting i no mekim na sampela lain i winim ol narapela lain, nogat. Taim ol man i dediket long Jehova ol i kisim baptais bilong kamap ol nupela wokman na wokmeri bilong Jehova long ailan Malta, ol asples Witnes ol i amamas tru, na aiwara i pundaun long ai bilong ol Witnes bilong Briten i bin kam raun long Malta. Tupela lain wantaim i kamapim klia samting ol i pilim long bel, tasol ol i mekim long narapela narapela pasin, na pasin bilong ol long laikim tru Jehova i strongim pasin bilong bung wantaim olsem ol Kristen.—Song 133:1; Kolosi 3:14.
Daunim Pasin Bilong Tingting Nogut
16-18. Stori long wanpela ekspiriens i soim olsem wanem yumi inap daunim pasin bilong tingting nogut long ol man bilong wanpela lain insait long kongrigesen Kristen.
16 Taim pasin bilong yumi long laikim tru Jehova na ol brata Kristen bilong yumi i kamap strong moa, dispela bai helpim yumi long bihainim gut pasin bilong Jehova long holim stretpela tingting long ol narapela. Yumi inap daunim ol tingting nogut yumi gat long ol man bilong narapela kantri, lain, o sindaun. Tingim samting i bin painim Albert. Em i bin insait long ami bilong Briten long taim bilong Namba Tu Pait, na ol Japan i bin holim em taim ol i daunim Singapo long yia 1942. Inap 3-pela yia samting em i mekim wok long rot bilong tren em planti man i bin dai long en, klostu long hap ol i kolim olsem bris i brukim wara Kwai. Taim pait i pinis, hevi bilong em i 32 kilo, wasket na nus bilong em i bruk, em i kisim sik bilong pekpek blut, grile, na sik malaria. Planti tausen wanlain bilong em ol i kisim ol hevi i nogut moa; planti ol i dai. Ol dispela pasin nogut tru em Albert i bin lukim na pilim i mekim na taim em i go bek long ples long 1945, em i kamap man bilong bel nogut na em i no laik tru long harim wanpela tok i stori long God o lotu.
17 Meri bilong Albert, em Irene, em i kamap wanpela Witnes Bilong Jehova. Bilong amamasim em, Albert i go long sampela miting bilong kongrigesen bilong ol Witnes Bilong Jehova long hap bilong ol. Paul, wanpela yangpela Kristen i mekim wok fultaim bilong autim tok, em i go lukim Albert bilong stadi wantaim em long Baibel. I no longtaim na Albert i luksave olsem bilong skelim man, Jehova i save lukluk long ol tingting i stap long bel. Em i dediket long Jehova na em i kisim baptais.
18 Bihain Paul i go stap long London, em i lainim tok ples Japan, na em i bung wantaim kongrigesen i mekim dispela tok ples. Taim em i tok long kisim sampela Witnes em ol i bilong Japan i go long kongrigesen bilong em long pastaim, ol brata i tingim bek olsem Albert i gat tingting nogut long ol Japan. Kirap long taim em i bin go bek long Briten, Albert i no laik bungim ol manmeri bilong Japan, olsem na ol brata i tingting planti long wanem samting em bai mekim. I no gat wok long ol brata i bin tingting planti—Albert i kamapim pasin bilong laikim tru ol brata taim ol dispela lain i go.—1 Pita 3:8, 9.
‘Givim Bel Olgeta’
19. Wanem gutpela tok bilong aposel Pol inap helpim yumi sapos yumi gat pasin bilong tingim sampela lain tasol na sampela nogat?
19 King Solomon i tok: “I no stret sapos man i helpim wanpela man long kot na daunim arapela man.” (Sindaun 28:21) Em i isi long pas gut wantaim ol lain yumi save gut long ol. Tasol sampela taim, yumi no tingim tumas ol lain yumi no save gut long ol. Dispela kain pasin bilong tingim sampela lain tasol na sampela nogat em i no stret long man i mekim wok bilong Jehova. Yumi olgeta i mas bihainim tok bilong Pol long ‘givim bel olgeta’ long ol narapela—yes, yumi mas givim bel olgeta long laikim ol wanlain Kristen bilong narapela narapela sindaun.—2 Korin 6:13.
20. Long wanem ol samting yumi mas bihainim pasin bilong Jehova, em God bilong tingim ol man bilong olgeta lain?
20 Maski yumi bilong i go long heven o kisim laip oltaim long graun, pasin bilong yumi long tingim ol man bilong olgeta lain i helpim yumi long stap wanbel olsem wanpela lain sipsip aninit long wanpela Wasman. (Efesus 4:4, 5, 16) Taim yumi wok strong long bihainim pasin bilong Jehova, em God bilong tingim ol man bilong olgeta lain, dispela inap helpim yumi long wok Kristen bilong yumi long autim tok, insait long famili, long kongrigesen, na long olgeta samting long i stap bilong yumi. Olsem wanem em inap helpim yumi? Stori i kamap bihain long dispela bai toktok long dispela samting.
[Ol Futnot]
a Bihain ol i kamapim planti singsing i stori long ol samting Jehova i bin mekim.—Song 135:8-11; 136:11-20.
Bai Yu Bekim Olsem Wanem?
• Jehova i mekim wanem long Rahap na lain Gibeon na em i kamapim pasin bilong tingim ol man bilong olgeta lain?
• Olsem wanem Jisas i kamapim pasin bilong tingim ol man bilong olgeta lain long wok tisa bilong em?
• Wanem samting inap helpim yumi long daunim pasin bilong tingting nogut long ol man i gat narapela sindaun o bilong narapela lain o skin?
[Piksa long pes 13]
Lain Israel i kirapim pait bilong daunim Kenan
[Piksa long pes 15]
Jisas i no bin surik long autim tok long wanpela meri Samaria
[Piksa long pes 16]
Wanpela pablik-miting long tok ples Amharik long Briten
[Piksa long pes 16]
Pasin bilong Albert long laikim Jehova i helpim em long daunim pasin bilong tingting nogut long ol man bilong narapela lain