Jisas Krais—Ol Samting i Soim Klia Em i Bin i Stap Long Graun
YU BILIP olsem wanpela man, nem bilong em Albert Einstein, em i bin i stap long graun? Ating kwiktaim bai yu tok yes, tasol bilong wanem yu bekim olsem? Planti manmeri i no bin lukim em stret. Tasol i gat ol buk i stori long ol wok samting em i bin mekim na dispela i soim olsem em i bin i stap tru. Dispela tok olsem em i bin i stap long graun i kamap klia long rot bilong ol samting bilong saiens em i bin painimaut. Olsem: Planti man i save kisim pawa long wanpela nuklia pawa stesen. Bilong kamapim dispela pawa nuklia, ol man i mas bihainim tingting Einstein i kamapim long dispela samting, E=mc2 (strong i olsem hevi bilong samting taims spit bilong lait taims spit bilong lait).
Na i wankain tu long Jisas Krais. Ol tok bilong em i bin mekim bikpela wok na senisim i stap bilong planti man tru. Ol samting ol man i bin raitim long em na ol samting em yet i bin mekim i bikpela samting bilong soim olsem tru tru em i bin i stap long graun. Tru, dispela rait long Jems ol i painim, em yumi stori pinis long en, em i bikpela samting, tasol dispela samting o narapela samting tu i no soim olsem Jisas i bin i stap long graun, nogat. Yumi ken painim ol samting i kamapim klia olsem Jisas i bin i stap long graun long rot bilong ol samting ol saveman i bin raitim long Jisas na ol disaipel bilong em.
Tok Bilong Ol Saveman
Olsem: Tingim ol tok bilong Flavius Josifas em wanpela saveman Juda na Farisi, em i bin i stap long taim bilong ol aposel. Em i bin stori long Jisas Krais long buk Jewish Antiquities. Planti i gat tupela tingting long namba wan stori em i bin raitim olsem Jisas em i Mesaia, tasol Profesa Louis H. Feldman bilong Yunivesiti bilong Yeshiva i tok, wan wan man tasol i gat tupela tingting long namba tu stori em i bin raitim. Long dispela stori, Josifas i tok: “[Hetpris Anas] i singautim ol jas bilong Kaunsil na ol i bringim wanpela man nem bilong em Jems, brata bilong Jisas em ol i kolim Krais.” (Jewish Antiquities, XX, 200) Yes, Josifas em wanpela Farisi na em i insait long dispela lain em planti bilong ol i birua long Jisas, em i tokaut long “Jems, brata bilong Jisas” em i bin i stap long graun.
Ol samting ol disaipel bilong Jisas i bin mekim i soim olsem Jisas i bin i stap long graun. Taim aposel Pol i stap kalabus long Rom long yia 59 C.E. samting, ol hetman bilong Juda i tokim em: “Mipela i save, long olgeta ples, ol manmeri i save mekim tok nogut long dispela nupela lain i bin kamap namel long yumi Juda.” (Aposel 28:17-22) Ol i kolim ol disaipel bilong Jisas olsem “nupela lain.” Sapos ol manmeri long olgeta ples i save mekim tok nogut long ol, yumi ken ting olsem ol saveman bilong bipo bai stori long ol tu, a?
Tasitus, mama i bin karim em long yia 55 C.E., na ol man i tingim em olsem wanpela nambawan saveman bilong ol samting bilong bipo, em i bin stori long ol Kristen long ol buk (Annals) bilong em. Long stori bilong em long Niro i sutim tok long ol Kristen olsem ol i as bilong bikpela paia i bin kukim Rom long yia 64 C.E., em i tok: “Niro i sutim tok long wanpela lain ol man i kolim ol olsem Kristen na em i bel nogut long ol na em i givim strafe nogut tru long ol. Krais, em ol man i kisim nem [Kristen] long en, em i bin kisim nambawan bikpela strafe long taim Taiberius i stap king. Pontius Pailat em wanpela man bilong yumi, em i bin i stap namba wan gavman, em i tok na ol man i kilim [Krais] i dai.” Ol tok bilong dispela stori i wankain long ol tok bilong Jisas em Baibel i stori long en.
Narapela man i bin stori long ol disaipel bilong Jisas em Plini Namba Tu, gavena bilong Bitinia. Long yia 111 C.E. samting, Plini i askim King Trajan long wanem samting em i mas mekim long ol Kristen. Plini i tok, ol manmeri em ol narapela i sutim tok giaman long ol olsem ol i Kristen, ol bai singaut long ol god bilong helpim ol na lotuim imis bilong Trajan bilong kamapim olsem ol i no Kristen. Plini i tok moa olsem: “Ol man i tok, ol i no inap subim ol lain em ol i Kristen tru long mekim ol dispela samting.” Dispela i kamapim ples klia olsem Krais i bin i stap long graun, na ol disaipel bilong em i bin redi long i dai, long wanem, ol i bilip long em.
Taim ol i tingim pinis ol tok bilong Jisas Krais na ol disaipel bilong em, em ol saveman bilong yia 1 C.E. i go 200 C.E. i bin raitim, buk The Encyclopædia Britannica (2002 edisen) i tok: ‘Ol dispela stori i kamapim long ples klia olsem bipo, maski ol man i birua long lain Kristen, ol i no gat tupela tingting olsem Jisas i bin i stap tru o nogat. Namba wan taim ol i tok pait long dispela samting, em bihain long yia 1780 samting, na namel long yia 1800 na 1900, na bihain long yia 1900, na ol dispela tok bilong ol i no gat as bilong en.’
Tok Bilong Ol Disaipel Bilong Jisas
Buk The Encyclopedia Americana i tok: “Nupela Testamen i kamapim planti samting long laip bilong Jisas na ol samting i painim em, na ol Kristen bilong bipo i gat wanem tingting long em.” Ol man i no bilip tumas ol i no bilipim ol tok bilong Baibel olsem Jisas i bin i stap tru long graun. Tasol tupela tok em Baibel i as bilong en inap helpim yumi long save olsem Jisas i bin i stap tru tru long graun.
Olsem yumi stori pinis, ol bikpela samting Einstein i bin mekim i soim klia olsem em i bin i stap long graun. Olsem tasol, ol tok Jisas i skulim ol man long en i kamapim klia em i bin i stap long graun. Olsem: Tingim tok Jisas i bin mekim antap long maunten, em wanpela tok planti man i save long en. (Matyu, sapta 5-7) Aposel Matyu i stori long ol samting dispela tok i mekim long ol man: “Ol bikpela lain manmeri ol i kirap nogut tru long skul bilong en. Long wanem, . . . em i skulim ol olsem man i gat namba.” (Matyu 7:28, 29) Long ol samting dispela tok i mekim long ol man inap planti handet yia, Profesa Hans Dieter Betz i tok: “Dispela tok antap long maunten i no mekim bikpela samting tasol long tingting na pasin bilong ol manmeri bilong lotu Juda na lotu Kristen, na ol lain bilong wes, em i mekim bikpela samting long planti lain moa.” Em i tok moa olsem, dispela tok long maunten “em wanpela tok olgeta manmeri bilong graun i laikim.”
Tingim ol sotpela savetok i gutpela bilong helpim man long tok bilong Jisas antap long maunten, olsem: “Sapos wanpela man i solapim wanpela wasket bilong yu, orait yu mas tanim narapela wasket tu i go long em.” “Yupela i no ken mekim ol gutpela gutpela pasin bilong yupela long ai bilong ol manmeri.” “Yupela i no ken tingting tumas long tumora. De tumora em i ken tingting long samting bilong em yet.” “Yupela i no ken tromoi ol gutpela gutpela bis bilong yupela i go long ol pik.” “Yupela i mas prea na askim God long givim ol samting long yupela, na em bai i givim long yupela.” “Olgeta pasin yupela i laik bai ol arapela manmeri i mas mekim long yupela, ol dispela pasin tasol yupela i mas mekim long ol.” “Yupela i mas i go insait long liklik dua.” “Yupela lukim pasin bilong ol na bai yupela i save, ol i giaman profet, o nogat.” “Olgeta gutpela diwai i save karim gutpela kaikai.”—Matyu 5:39; 6:1, 34; 7:6, 7, 12, 13, 16, 17.
Ating yu bin harim pinis sampela bilong ol dispela tok o kain tok olsem. Ating ol dispela tok i kamap olsem ol savetok long tok ples bilong yu. Olgeta dispela tok i kam long tok Jisas i bin mekim antap long maunten. Ol samting dispela tok i bin mekim long planti manmeri na planti lain, em i kamapim klia olsem dispela “bikpela tisa” i bin i stap long graun.
Yumi ken tingim olsem wanpela man i kamapim stori nating long wanpela man nem bilong em Jisas Krais. Na sapos dispela man i gat save long kamapim ol tok em Jisas i bin mekim long Baibel. Ating dispela man i mekim na ol manmeri bai laikim Jisas na ol tok bilong em, a? Tasol aposel Pol i tok: “Ol Juda i save strong tumas long lukim ol mirakel, na ol Grik i wok strong long kisim gutpela tingting na save. Tasol mipela i save autim tok bilong Krais i dai pinis long diwai . . . , na dispela tok i olsem tok nogut long tingting bilong ol Juda. Na ol Grik i ting dispela em i kranki toktok tasol.” (1 Korin 1:22, 23) Dispela tok olsem Krais i dai long diwai em i no wanpela gutpela samting long ol Juda na ol narapela lain. Tasol ol Kristen long taim bilong ol aposel i bin tokaut long wanpela Krais olsem. Bilong wanem ol man i tokaut long Krais i dai long diwai? I gat wanpela rot tasol bilong kisim stretpela bekim, em ol man i bin raitim Ol Skripsa Grik, ol i bin raitim ol trupela stori long laip na i dai bilong Jisas.
Narapela samting i sapotim tok olsem Jisas i bin i stap long graun em ol tok ol disaipel bilong em i autim long ol samting Jisas i skulim ol long en. Inap olsem 30 yia tasol bihain long taim Jisas i bin kirapim wok bilong em long autim tok, Pol i tok ol i autim pinis gutnius “long olgeta manmeri i stap long graun.” (Kolosi 1:23) Yes, ol tok Jisas i skulim ol man long en i go long olgeta hap long bipo maski i gat ol birua. Pol, em wanpela Kristen ol man i bin mekim nogut long em, em i tok: “Sapos i tru God i no bin kirapim Krais, orait dispela tok mipela i save autim, em i samting nating, na bilip bilong yupela em tu i samting nating.” (1 Korin 15:12-17) Sapos ol i autim tok long wanpela Krais i no bin kirap bek, wok bilong ol bai lus nating, na sapos ol i autim tok long wanpela Krais i no bin i stap long graun, wok bilong ol bai i lus nating moa yet. Olsem yumi bin ritim tok bilong Plini Namba Tu, ol Kristen long taim bilong ol aposel i bin redi long i dai long bilip bilong ol long Krais Jisas. Ol i redi long i dai, long wanem, Krais em i bin i stap tru; em i bin i stap long graun olsem tok bilong Gutnius i kamapim.
Yu Bin Lukim Ol Samting i Soim Klia Krais
Ol dispela Kristen i mas i gat bilip long kirap bek bilong Jisas Krais bambai ol i ken autim tok. Long ai bilong tingting bilong yu, yu tu i ken lukim Jisas i kirap bek pinis, long rot bilong lukim ol samting em wok bilong em i mekim long nau.
Paslain liklik long Jisas i dai long diwai, em i mekim bikpela tok profet long taim em i kam i stap. Em i tok tu olsem em bai kirap bek na sindaun long han sut bilong God na wetim taim em bai bagarapim ol birua bilong em. (Song 110:1; Jon 6:62; Aposel 2:34, 35; Rom 8:34) Bihain, em bai i rausim Satan na ol ensel nogut bilong em long heven.—KTH 12:7-9.
Wanem taim bai olgeta dispela samting i kamap? Jisas i tokim ol disaipel long ol ‘mak bai i kamap pastaim na em i kam bek na dispela graun i laik pinis.’ Ol mak i soim olsem em i kam i stap, em ol bikpela pait, hangre, guria, ol giaman profet bai kamap, pasin nogut bai i go bikpela, na ol bikpela sik. Yumi mas save olsem ol dispela hevi bai kamap, long wanem, ol i bin tromoi Satan i kam daun na dispela i kamapim ‘bikpela hevi long graun.’ Satan i bin kam daun pinis long graun na “em i belhat nogut tru. Em i save, em i gat sotpela taim tasol bilong i stap.” Na tu, wanpela samting bilong dispela mak em wok bilong autim gutnius bilong Kingdom long “olgeta hap bilong graun, bai olgeta lain manmeri i ken harim.”—Matyu 24:3-14; KTH 12:12; Luk 21:7-19.
Em nau, ol samting Jisas i tok profet long en, em i kamap pinis. Kirap long Namba Wan Pait long 1914 i kam inap nau, yumi bin lukim ol samting i kamapim klia olsem Jisas Krais i kam i stap. Em i mekim wok olsem King bilong Kingdom bilong God na em i wok long mekim ol bikpela samting. Dispela magasin yu holim, em wanpela mak i soim olsem ol i mekim wok bilong autim tok bilong Kingdom long nau.
Bilong pilim moa yet ol samting long i stap bilong Jisas, yu mas stadi long Baibel. Gutpela sapos yu askim ol Witnes Bilong Jehova long ol tok i makim olsem Jisas i kam i stap.
[Ol Piksa long pes 5]
Josifas, Tasitus, na Plini Namba Tu ol i stori long Jisas Krais na ol disaipel bilong em
[Kredit Lain]
All three images: © Bettmann/CORBIS
[Piksa long pes 7]
Ol Kristen bilong pastaim i bilip olsem Jisas em i man i bin i stap long graun